| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
३-४. चिन्तीसुत्तादिवण्णना
3-4. Cintīsuttādivaṇṇanā
३-४. ततिये एतेहीति दुच्चिन्तितचिन्तितादीहि। एतेन लक्खणसद्दस्स सरणत्थतमाह। तानेवाति लक्खणानि एव। अस्साति बालस्स। बालो अयन्ति निमीयति सञ्जानीयति एतेहीति बालनिमित्तानि। अपदानं वुच्चति, विख्यातं कम्मं, दुच्चिन्तितचिन्तितादीनि च बाले विख्यातानि असाधारणभावेन। तस्मा ‘‘बालस्स अपदानानी’’ति। अभिज्झादीहि दुट्ठं दूसितं चिन्तितं दुच्चिन्तितं, तं चिन्तेतीति दुच्चिन्तितचिन्ती। लोभादीहि दुट्ठं भासितं मुसावादादिं भासतीति दुब्भासितभासी। तेसंयेव वसेन कत्तब्बतो दुक्कटकम्मं पाणातिपातादिं करोतीति दुक्कटकम्मकारी। तेनाह ‘‘चिन्तयन्तो’’तिआदि। वुत्तानुसारेनाति ‘‘बालो अय’’न्तिआदिना वुत्तस्स अत्थवचनस्स ‘‘पण्डितो अयन्ति एतेहि लक्खीयती’’तिआदिना अनुस्सरणेन। मनोसुचरितादीनं वसेनाति ‘‘चिन्तयन्तो अनभिज्झाब्यापादसम्मादस्सनवसेन सुचिन्तितमेव चिन्तेती’’तिआदिना मनोसुचरितादीनं तिण्णं सुचरितानं वसेन योजेतब्बानि। चतुत्थं वुत्तनयत्ता उत्तानत्थमेव।
3-4. Tatiye etehīti duccintitacintitādīhi. Etena lakkhaṇasaddassa saraṇatthatamāha. Tānevāti lakkhaṇāni eva. Assāti bālassa. Bālo ayanti nimīyati sañjānīyati etehīti bālanimittāni. Apadānaṃ vuccati, vikhyātaṃ kammaṃ, duccintitacintitādīni ca bāle vikhyātāni asādhāraṇabhāvena. Tasmā ‘‘bālassa apadānānī’’ti. Abhijjhādīhi duṭṭhaṃ dūsitaṃ cintitaṃ duccintitaṃ, taṃ cintetīti duccintitacintī. Lobhādīhi duṭṭhaṃ bhāsitaṃ musāvādādiṃ bhāsatīti dubbhāsitabhāsī. Tesaṃyeva vasena kattabbato dukkaṭakammaṃ pāṇātipātādiṃ karotīti dukkaṭakammakārī. Tenāha ‘‘cintayanto’’tiādi. Vuttānusārenāti ‘‘bālo aya’’ntiādinā vuttassa atthavacanassa ‘‘paṇḍito ayanti etehi lakkhīyatī’’tiādinā anussaraṇena. Manosucaritādīnaṃ vasenāti ‘‘cintayanto anabhijjhābyāpādasammādassanavasena sucintitameva cintetī’’tiādinā manosucaritādīnaṃ tiṇṇaṃ sucaritānaṃ vasena yojetabbāni. Catutthaṃ vuttanayattā uttānatthameva.
चिन्तीसुत्तादिवण्णना निट्ठिता।
Cintīsuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
३. चिन्तीसुत्तं • 3. Cintīsuttaṃ
४. अच्चयसुत्तं • 4. Accayasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
३. चिन्तीसुत्तवण्णना • 3. Cintīsuttavaṇṇanā
४. अच्चयसुत्तवण्णना • 4. Accayasuttavaṇṇanā
