| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. චිරට්‌ඨිතිසුත්‌තං
2. Ciraṭṭhitisuttaṃ
388. තංයෙව නිදානං. එකමන්‌තං නිසින්‌නො ඛො ආයස්‌මා භද්‌දො ආයස්‌මන්‌තං ආනන්‌දං එතදවොච – ‘‘කො නු ඛො, ආවුසො ආනන්‌ද, හෙතු, කො පච්‌චයො යෙන තථාගතෙ පරිනිබ්‌බුතෙ සද්‌ධම්‌මො න චිරට්‌ඨිතිකො හොති? කො පනාවුසො ආනන්‌ද, හෙතු, කො පච්‌චයො යෙන තථාගතෙ පරිනිබ්‌බුතෙ සද්‌ධම්‌මො චිරට්‌ඨිතිකො හොතී’’ති?
388. Taṃyeva nidānaṃ. Ekamantaṃ nisinno kho āyasmā bhaddo āyasmantaṃ ānandaṃ etadavoca – ‘‘ko nu kho, āvuso ānanda, hetu, ko paccayo yena tathāgate parinibbute saddhammo na ciraṭṭhitiko hoti? Ko panāvuso ānanda, hetu, ko paccayo yena tathāgate parinibbute saddhammo ciraṭṭhitiko hotī’’ti?
‘‘සාධු සාධු, ආවුසො භද්‌ද! භද්‌දකො ඛො තෙ, ආවුසො භද්‌ද, උම්‌මඞ්‌ගො, භද්‌දකං පටිභානං, කල්‍යාණී පරිපුච්‌ඡා. එවඤ්‌හි ත්‌වං, ආවුසො භද්‌ද, පුච්‌ඡසි – ‘කො නු ඛො, ආවුසො ආනන්‌ද, හෙතු, කො පච්‌චයො යෙන තථාගතෙ පරිනිබ්‌බුතෙ සද්‌ධම්‌මො න චිරට්‌ඨිතිකො හොති? කො පනාවුසො ආනන්‌ද, හෙතු, කො පච්‌චයො යෙන තථාගතෙ පරිනිබ්‌බුතෙ සද්‌ධම්‌මො චිරට්‌ඨිතිකො හොතී’’’ති? ‘‘එවමාවුසො’’ති. ‘‘චතුන්‌නං ඛො, ආවුසො, සතිපට්‌ඨානානං අභාවිතත්‌තා අබහුලීකතත්‌තා තථාගතෙ පරිනිබ්‌බුතෙ සද්‌ධම්‌මො න චිරට්‌ඨිතිකො හොති. චතුන්‌නඤ්‌ච ඛො, ආවුසො, සතිපට්‌ඨානානං භාවිතත්‌තා බහුලීකතත්‌තා තථාගතෙ පරිනිබ්‌බුතෙ සද්‌ධම්‌මො චිරට්‌ඨිතිකො හොති’’.
‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘ko nu kho, āvuso ānanda, hetu, ko paccayo yena tathāgate parinibbute saddhammo na ciraṭṭhitiko hoti? Ko panāvuso ānanda, hetu, ko paccayo yena tathāgate parinibbute saddhammo ciraṭṭhitiko hotī’’’ti? ‘‘Evamāvuso’’ti. ‘‘Catunnaṃ kho, āvuso, satipaṭṭhānānaṃ abhāvitattā abahulīkatattā tathāgate parinibbute saddhammo na ciraṭṭhitiko hoti. Catunnañca kho, āvuso, satipaṭṭhānānaṃ bhāvitattā bahulīkatattā tathāgate parinibbute saddhammo ciraṭṭhitiko hoti’’.
‘‘කතමෙසං චතුන්‌නං? ඉධාවුසො , භික්‌ඛු කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. ඉමෙසං ඛො, ආවුසො, චතුන්‌නං සතිපට්‌ඨානානං අභාවිතත්‌තා අබහුලීකතත්‌තා තථාගතෙ පරිනිබ්‌බුතෙ සද්‌ධම්‌මො න චිරට්‌ඨිතිකො හොති. ඉමෙසඤ්‌ච ඛො, ආවුසො, චතුන්‌නං සතිපට්‌ඨානානං භාවිතත්‌තා බහුලීකතත්‌තා තථාගතෙ පරිනිබ්‌බුතෙ සද්‌ධම්‌මො චිරට්‌ඨිතිකො හොතී’’ති. දුතියං.
‘‘Katamesaṃ catunnaṃ? Idhāvuso , bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imesaṃ kho, āvuso, catunnaṃ satipaṭṭhānānaṃ abhāvitattā abahulīkatattā tathāgate parinibbute saddhammo na ciraṭṭhitiko hoti. Imesañca kho, āvuso, catunnaṃ satipaṭṭhānānaṃ bhāvitattā bahulīkatattā tathāgate parinibbute saddhammo ciraṭṭhitiko hotī’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-2. සීලසුත්‌තාදිවණ්‌ණනා • 1-2. Sīlasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-2. සීලසුත්‌තාදිවණ්‌ණනා • 1-2. Sīlasuttādivaṇṇanā
