| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
30. சிதகபூஜகவக்³கோ³
30. Citakapūjakavaggo
1-10. சிதகபூஜகத்தே²ரஅபதா³னாதி³வண்ணனா
1-10. Citakapūjakattheraapadānādivaṇṇanā
1-2. திங்ஸதிமே வக்³கே³ பட²மாபதா³னே ஆஹுதிங் யிட்டு²காமோஹந்தி பூஜாஸக்காரங் காரேதுகாமோ அஹங். நானாபுப்ப²ங் ஸமானயிந்தி நானா அனேகவித⁴ங் சம்பகஸலலாதி³புப்ப²ங் ஸங் ஸுட்டு² ஆனயிங், ராஸிங் அகாஸிந்தி அத்தோ². ஸிகி²னோ லோகப³ந்து⁴னோதி ஸகலலோகத்தயப³ந்து⁴ஸ்ஸ ஞாதகஸ்ஸ ஸிகி²ஸ்ஸ ப⁴க³வதோ பரினிப்³பு³தஸ்ஸ சிதகங் ஆளாஹனசிதகங் தா³ருராஸிங் ஜலந்தங் ஆதி³த்தங் தி³ஸ்வா தஞ்ச மயா ராஸீகதங் புப்ப²ங் ஓகிரிங் பூஜேஸிந்தி அத்தோ².
1-2. Tiṃsatime vagge paṭhamāpadāne āhutiṃ yiṭṭhukāmohanti pūjāsakkāraṃ kāretukāmo ahaṃ. Nānāpupphaṃ samānayinti nānā anekavidhaṃ campakasalalādipupphaṃ saṃ suṭṭhu ānayiṃ, rāsiṃ akāsinti attho. Sikhino lokabandhunoti sakalalokattayabandhussa ñātakassa sikhissa bhagavato parinibbutassa citakaṃ āḷāhanacitakaṃ dārurāsiṃ jalantaṃ ādittaṃ disvā tañca mayā rāsīkataṃ pupphaṃ okiriṃ pūjesinti attho.
6-7. து³தியாபதா³னே அஜினுத்தரவாஸனோதி அஜினமிக³சம்மங் உத்தராஸங்க³ங் கத்வா நிவாஸினோ அச்சா²த³னோதி அத்தோ². அபி⁴ஞ்ஞா பஞ்ச நிப்³ப³த்தாதி இத்³தி⁴விதா⁴த³யோ பஞ்ச அபி⁴ஞ்ஞாயோ பஞ்ச ஞாணானி நிப்³ப³த்தா உப்பாதி³தா நிப்பா²தி³தா. சந்த³ஸ்ஸ பரிமஜ்ஜகோதி சந்த³மண்ட³லஸ்ஸ ஸமந்ததோ மஜ்ஜகோ, பு²ட்டோ² அஹோஸிந்தி அத்தோ². விபஸ்ஸிங் லோகபஜ்ஜோதந்தி ஸகலலோகத்தயே பதீ³பஸதி³ஸங் விபஸ்ஸிங் ப⁴க³வந்தங் மம ஸந்திகங் அபி⁴க³தங் விஸேஸேன ஸம்பத்தங் ஆக³தங். தி³ஸ்வா பாரிச்ச²த்தகபுப்பா²னீதி தே³வலோகதோ பாரிச்ச²த்தகபுப்பா²னி ஆஹரித்வா விபஸ்ஸிஸ்ஸ ஸத்து²னோ மத்த²கே ச²த்தாகாரேன அஹங் தா⁴ரேஸிந்தி அத்தோ².
6-7. Dutiyāpadāne ajinuttaravāsanoti ajinamigacammaṃ uttarāsaṅgaṃ katvā nivāsino acchādanoti attho. Abhiññā pañca nibbattāti iddhividhādayo pañca abhiññāyo pañca ñāṇāni nibbattā uppāditā nipphāditā. Candassa parimajjakoti candamaṇḍalassa samantato majjako, phuṭṭho ahosinti attho. Vipassiṃ lokapajjotanti sakalalokattaye padīpasadisaṃ vipassiṃ bhagavantaṃ mama santikaṃ abhigataṃ visesena sampattaṃ āgataṃ. Disvā pāricchattakapupphānīti devalokato pāricchattakapupphāni āharitvā vipassissa satthuno matthake chattākārena ahaṃ dhāresinti attho.
11-13. ததியாபதா³னே புத்தோ மம பப்³ப³ஜிதோதி மய்ஹங் புத்தோ ஸத்³தா⁴ய பப்³ப³ஜிதோ. காஸாயவஸனோ ததா³தி தஸ்மிங் பப்³ப³ஜிதகாலே காஸாயனிவத்தோ² , ந பா³ஹிரகபப்³ப³ஜ்ஜாய பப்³ப³ஜிதோதி அத்தோ². ஸோ ச பு³த்³த⁴த்தங் ஸம்பத்தோதி ஸோ மய்ஹங் புத்தோ சதூஸு பு³த்³தே⁴ஸு ஸாவகபு³த்³த⁴பா⁴வங் ஸங் ஸுட்டு² பத்தோ, அரஹத்தங் பத்தோதி அத்தோ². நிப்³பு³தோ லோகபூஜிதோதி ஸகலலோகேஹி கதஸக்காரோ க²ந்த⁴பரினிப்³பா³னேன பரினிப்³பு³தோதி அத்தோ². விசினந்தோ ஸகங் புத்தந்தி அஹங் தஸ்ஸ க³ததே³ஸங் புச்சி²த்வா ஸகங் புத்தங் விசினந்தோ பச்ச²தோ அக³மங், அனுக³தோ அஸ்மீதி அத்தோ². நிப்³பு³தஸ்ஸ மஹந்தஸ்ஸாதி மஹந்தேஹி ஸீலக்க²ந்தா⁴தீ³ஹி யுத்தத்தா மஹந்தஸ்ஸ தஸ்ஸ மம புத்தஸ்ஸ அரஹதோ ஆத³ஹனட்டா²னே சிதகங் சிதகட்டா²னங் அஹங் அக³மாஸிந்தி அத்தோ². பக்³க³ய்ஹ அஞ்ஜலிங் தத்தா²தி தஸ்மிங் ஆத³ஹனட்டா²னே அஞ்ஜலிங் த³ஸங்கு³லிஸமோதா⁴னங் பக்³க³ஹெத்வா ஸிரஸி கத்வா அஹங் சிதகங் த³ஹனதா³ருராஸிங் வந்தி³த்வா பணாமங் கத்வா ஸேதச்ச²த்தஞ்ச பக்³க³ய்ஹாதி ந கேவலமேவ வந்தி³த்வா த⁴வலச்ச²த்தஞ்ச பக்³க³ய்ஹ உக்கி²பித்வா அஹங் ஆரோபேஸிங் பதிட்ட²பேஸிந்தி அத்தோ².
11-13. Tatiyāpadāne putto mama pabbajitoti mayhaṃ putto saddhāya pabbajito. Kāsāyavasano tadāti tasmiṃ pabbajitakāle kāsāyanivattho , na bāhirakapabbajjāya pabbajitoti attho. Soca buddhattaṃ sampattoti so mayhaṃ putto catūsu buddhesu sāvakabuddhabhāvaṃ saṃ suṭṭhu patto, arahattaṃ pattoti attho. Nibbuto lokapūjitoti sakalalokehi katasakkāro khandhaparinibbānena parinibbutoti attho. Vicinanto sakaṃ puttanti ahaṃ tassa gatadesaṃ pucchitvā sakaṃ puttaṃ vicinanto pacchato agamaṃ, anugato asmīti attho. Nibbutassa mahantassāti mahantehi sīlakkhandhādīhi yuttattā mahantassa tassa mama puttassa arahato ādahanaṭṭhāne citakaṃ citakaṭṭhānaṃ ahaṃ agamāsinti attho. Paggayha añjaliṃ tatthāti tasmiṃ ādahanaṭṭhāne añjaliṃ dasaṅgulisamodhānaṃ paggahetvā sirasi katvā ahaṃ citakaṃ dahanadārurāsiṃ vanditvā paṇāmaṃ katvā setacchattañca paggayhāti na kevalameva vanditvā dhavalacchattañca paggayha ukkhipitvā ahaṃ āropesiṃ patiṭṭhapesinti attho.
17-18. சதுத்தா²பதா³னே அனுக்³க³தம்ஹி ஆதி³ச்சேதி ஸூரியே அனுக்³க³தே அனுட்டி²தே பச்சூஸகாலேதி அத்தோ². பஸாதோ³ விபுலோ அஹூதி ரோக³பீளிதஸ்ஸ மய்ஹங் சித்தப்பஸாதோ³ விபுலோ அதிரேகோ பு³த்³தா⁴னுஸ்ஸரணேன அஹு அஹோஸி. மஹேஸினோ பு³த்³த⁴ஸெட்ட²ஸ்ஸ லோகம்ஹி பாதுபா⁴வோ பாகடபா⁴வோ அஹோஸீதி ஸம்ப³ந்தோ⁴. கோ⁴ஸமஸ்ஸோஸஹங் தத்தா²தி தஸ்மிங் பாதுபா⁴வே ஸதி ‘‘அஹங் கி³லானோ பு³த்³தோ⁴ உப்பன்னோ’’தி கோ⁴ஸங் அஸ்ஸோஸிங். ந ச பஸ்ஸாமி தங் ஜினந்தி தங் ஜிதபஞ்சமாரங் ஸம்மாஸம்பு³த்³த⁴ங் ந பஸ்ஸாமி, பா³ள்ஹகி³லானத்தா க³ந்த்வா பஸ்ஸிதுங் ந ஸக்கோமீதி அத்தோ². மரணஞ்ச அனுப்பத்தோதி மரணாஸன்னகாலங் அனுப்பத்தோ, ஆஸன்னமரணோ ஹுத்வாதி அத்தோ². பு³த்³த⁴ஸஞ்ஞமனுஸ்ஸரிந்தி பு³த்³தோ⁴தினாமங் அனுஸ்ஸரிங், பு³த்³தா⁴ரம்மணங் மனஸி அகாஸிந்தி அத்தோ².
17-18. Catutthāpadāne anuggatamhi ādicceti sūriye anuggate anuṭṭhite paccūsakāleti attho. Pasādo vipulo ahūti rogapīḷitassa mayhaṃ cittappasādo vipulo atireko buddhānussaraṇena ahu ahosi. Mahesino buddhaseṭṭhassa lokamhi pātubhāvo pākaṭabhāvo ahosīti sambandho. Ghosamassosahaṃ tatthāti tasmiṃ pātubhāve sati ‘‘ahaṃ gilāno buddho uppanno’’ti ghosaṃ assosiṃ. Na ca passāmi taṃ jinanti taṃ jitapañcamāraṃ sammāsambuddhaṃ na passāmi, bāḷhagilānattā gantvā passituṃ na sakkomīti attho. Maraṇañca anuppattoti maraṇāsannakālaṃ anuppatto, āsannamaraṇo hutvāti attho. Buddhasaññamanussarinti buddhotināmaṃ anussariṃ, buddhārammaṇaṃ manasi akāsinti attho.
21-23. பஞ்சமாபதா³னே ஆராமத்³வாரா நிக்க²ம்மாதி ஆராமத்³வாரதோ ஸங்க⁴ஸ்ஸ நிக்க²மனத்³வாரமக்³கே³ஹி அத்தோ². கோ³ஸீஸங் ஸந்த²தங் மயாதி தஸ்மிங் நிக்க²மனத்³வாரமக்³கே³ ‘‘ப⁴க³வதோ பி⁴க்கு²ஸங்க⁴ஸ்ஸ ச பாதா³ மா கத்³த³மங் அக்கமந்தூ’’தி அக்கமனத்தா²ய கோ³ஸீஸட்டி²ங் மயா ஸந்த²ரிதந்தி அத்தோ². அனுபோ⁴மி ஸகங் கம்மந்தி அத்தனோ கோ³ஸீஸஅத்த²ரணகம்மஸ்ஸ ப³லேன ஆஜானீயா வாதஜவா ஸிந்த⁴வா ஸீக⁴வாஹனாதீ³னி விபாகப²லானி அனுபோ⁴மீதி அத்தோ². அஹோ காரங் பரமகாரந்தி ஸுகெ²த்தே ஸங்கே⁴ மயா ஸுட்டு² கதங் காரங் அப்பகம்பி கிச்சங் மஹப்ப²லதா³னதோ பரமகாரங் உத்தமகிச்சங் அஹோ விம்ஹயந்தி அத்தோ². யதா² திணதோ³ஸாதி³விரஹிதேஸு கெ²த்தேஸு வப்பிதங் ஸாலிபீ³ஜங் மஹப்ப²லங் தே³தி, ஏவமேவ ராக³தோ³ஸாதி³தோ³ஸரஹிதே பரிஸுத்³த⁴காயவசீஸமாசாரே ஸங்க⁴கெ²த்தே கோ³ஸீஸஅத்த²ரணகம்மங் மயா கதங், இத³ங் மஹப்ப²லங் தே³தீதி வுத்தங் ஹோதி. ந அஞ்ஞங் கலமக்³க⁴தீதி அஞ்ஞங் பா³ஹிரஸாஸனே கதங் கம்மங் ஸங்கே⁴ கதஸ்ஸ காரஸ்ஸ பூஜாஸக்காரஸ்ஸ கலங் ஸோளஸிங் கலங் கொட்டா²ஸங் ந அக்³க⁴தீதி ஸம்ப³ந்தோ⁴.
21-23. Pañcamāpadāne ārāmadvārā nikkhammāti ārāmadvārato saṅghassa nikkhamanadvāramaggehi attho. Gosīsaṃ santhataṃ mayāti tasmiṃ nikkhamanadvāramagge ‘‘bhagavato bhikkhusaṅghassa ca pādā mā kaddamaṃ akkamantū’’ti akkamanatthāya gosīsaṭṭhiṃ mayā santharitanti attho. Anubhomi sakaṃ kammanti attano gosīsaattharaṇakammassa balena ājānīyā vātajavā sindhavā sīghavāhanādīni vipākaphalāni anubhomīti attho. Ahokāraṃ paramakāranti sukhette saṅghe mayā suṭṭhu kataṃ kāraṃ appakampi kiccaṃ mahapphaladānato paramakāraṃ uttamakiccaṃ aho vimhayanti attho. Yathā tiṇadosādivirahitesu khettesu vappitaṃ sālibījaṃ mahapphalaṃ deti, evameva rāgadosādidosarahite parisuddhakāyavacīsamācāre saṅghakhette gosīsaattharaṇakammaṃ mayā kataṃ, idaṃ mahapphalaṃ detīti vuttaṃ hoti. Na aññaṃ kalamagghatīti aññaṃ bāhirasāsane kataṃ kammaṃ saṅghe katassa kārassa pūjāsakkārassa kalaṃ soḷasiṃ kalaṃ koṭṭhāsaṃ na agghatīti sambandho.
ச²ட்ட²ஸத்தமட்ட²மனவமத³ஸமாபதா³னானி உத்தானானேவாதி.
Chaṭṭhasattamaṭṭhamanavamadasamāpadānāni uttānānevāti.
திங்ஸதிமவக்³க³வண்ணனா ஸமத்தா.
Tiṃsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
1. சிதகபூஜகத்தே²ரஅபதா³னங் • 1. Citakapūjakattheraapadānaṃ
2. புப்ப²தா⁴ரகத்தே²ரஅபதா³னங் • 2. Pupphadhārakattheraapadānaṃ
3. ச²த்ததா³யகத்தே²ரஅபதா³னங் • 3. Chattadāyakattheraapadānaṃ
4. ஸத்³த³ஸஞ்ஞகத்தே²ரஅபதா³னங் • 4. Saddasaññakattheraapadānaṃ
5. கோ³ஸீஸனிக்கே²பகத்தே²ரஅபதா³னங் • 5. Gosīsanikkhepakattheraapadānaṃ
