| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. சிதகபூஜகத்தே²ரஅபதா³னவண்ணனா
6. Citakapūjakattheraapadānavaṇṇanā
வஸாமி ராஜாயதனேதிஆதி³கங் ஆயஸ்மதோ சிதகபூஜகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ ததோ பரங் உப்பன்னுப்பன்னப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே ராஜாயதனருக்க²தே³வதா ஹுத்வா நிப்³ப³த்தோ அந்தரந்தரா தே³வதாஹி ஸத்³தி⁴ங் த⁴ம்மங் ஸுத்வா பஸன்னோ ப⁴க³வதி பரினிப்³பு³தே ஸபரிவாரோ க³ந்த⁴தீ³பதூ⁴பபுப்ப²பே⁴ரிஆதீ³னி கா³ஹாபெத்வா ப⁴க³வதோ ஆளஹனட்டா²னங் க³ந்த்வா தீ³பாதீ³னி பூஜெத்வா அனேகேஹி தூரியேஹி அனேகேஹி வாதி³தேஹி தங் பூஜேஸி. ததோ பட்டா²ய ஸகப⁴வனங் உபவிட்டோ²பி ப⁴க³வந்தமேவ ஸரித்வா ஸம்முகா² விய வந்த³தி. ஸோ தேனேவ புஞ்ஞேன தேன சித்தப்பஸாதே³ன ராஜாயதனதோ காலங் கதோ துஸிதாதீ³ஸு நிப்³ப³த்தோ தி³ப்³ப³ஸம்பத்திங் அனுப⁴வித்வா ததோ மனுஸ்ஸேஸு மனுஸ்ஸஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ப⁴க³வதி உப்பன்னசித்தப்பஸாதோ³ ப⁴க³வதோ ஸாஸனே பப்³ப³ஜித்வா நசிரஸ்ஸேவ அரஹா அஹோஸி.
Vasāmi rājāyatanetiādikaṃ āyasmato citakapūjakattherassa apadānaṃ. Ayampi purimabuddhesu katādhikāro tato paraṃ uppannuppannabhave vivaṭṭūpanissayāni puññāni upacinanto sikhissa bhagavato kāle rājāyatanarukkhadevatā hutvā nibbatto antarantarā devatāhi saddhiṃ dhammaṃ sutvā pasanno bhagavati parinibbute saparivāro gandhadīpadhūpapupphabheriādīni gāhāpetvā bhagavato āḷahanaṭṭhānaṃ gantvā dīpādīni pūjetvā anekehi tūriyehi anekehi vāditehi taṃ pūjesi. Tato paṭṭhāya sakabhavanaṃ upaviṭṭhopi bhagavantameva saritvā sammukhā viya vandati. So teneva puññena tena cittappasādena rājāyatanato kālaṃ kato tusitādīsu nibbatto dibbasampattiṃ anubhavitvā tato manussesu manussasampattiṃ anubhavitvā imasmiṃ buddhuppāde kulagehe nibbatto viññutaṃ patto bhagavati uppannacittappasādo bhagavato sāsane pabbajitvā nacirasseva arahā ahosi.
49. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ வஸாமி ராஜாயதனேதிஆதி³மாஹ. ராஜாயதனேதி தே³வராஜூனங் ஆயதனங் ராஜாயதனங், தஸ்ஸ ருக்க²ஸ்ஸ நாமதெ⁴ய்யோ வா. பரினிப்³பு³தே ப⁴க³வதீதி பரிஸமந்ததோ கிஞ்சி அனவஸேஸெத்வா க²ந்த⁴பரினிப்³பா³னகாலே பரினிப்³பா³னஸமயே பரினிப்³பா³னப்பத்தஸ்ஸ ஸிகி²னோ லோகப³ந்து⁴னோதி ஸம்ப³ந்தோ⁴.
49. So aparabhāge attano pubbakammaṃ saritvā somanassajāto pubbacaritāpadānaṃ pakāsento vasāmi rājāyatanetiādimāha. Rājāyataneti devarājūnaṃ āyatanaṃ rājāyatanaṃ, tassa rukkhassa nāmadheyyo vā. Parinibbute bhagavatīti parisamantato kiñci anavasesetvā khandhaparinibbānakāle parinibbānasamaye parinibbānappattassa sikhino lokabandhunoti sambandho.
50. சிதகங் அக³மாஸஹந்தி சந்த³னாக³ருதே³வதா³ருகப்பூரதக்கோலாதி³ஸுக³ந்த⁴தா³ரூஹி சிதங் ராஸிக³தந்தி சிதங், சிதமேவ சிதகங், பு³த்³த⁴கா³ரவேன சிதகங் பூஜனத்தா²ய சிதகஸ்ஸ ஸமீபங் அஹங் அக³மாஸிந்தி அத்தோ². தத்த² க³ந்த்வா கதகிச்சங் த³ஸ்ஸெந்தோ தூரியங் தத்த² வாதெ³த்வாதிஆதி³மாஹ. தங் ஸப்³ப³ங் ஸுவிஞ்ஞெய்யமேவாதி.
50.Citakaṃ agamāsahanti candanāgarudevadārukappūratakkolādisugandhadārūhi citaṃ rāsigatanti citaṃ, citameva citakaṃ, buddhagāravena citakaṃ pūjanatthāya citakassa samīpaṃ ahaṃ agamāsinti attho. Tattha gantvā katakiccaṃ dassento tūriyaṃ tattha vādetvātiādimāha. Taṃ sabbaṃ suviññeyyamevāti.
சிதகபூஜகத்தே²ரஅபதா³னவண்ணனா ஸமத்தா.
Citakapūjakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. சிதகபூஜகத்தே²ரஅபதா³னங் • 6. Citakapūjakattheraapadānaṃ
