| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
5. சித்தாகா³ரவக்³கோ³
5. Cittāgāravaggo
1. ராஜாகா³ரஸிக்கா²பத³வண்ணனா
1. Rājāgārasikkhāpadavaṇṇanā
சித்தாகா³ரவக்³க³ஸ்ஸ பட²மே ராஜாகா³ரந்தி ரஞ்ஞோ கீளனக⁴ரங். சித்தாகா³ரந்தி கீளனசித்தஸாலங். ஆராமந்தி கீளனஉபவனங். உய்யானந்தி கீளனுய்யானங். பொக்க²ரணிந்தி கீளனபொக்க²ரணிங். த³ஸ்ஸனாயாதி ‘‘ஏதேஸு யங்கிஞ்சி பஸ்ஸிஸ்ஸாமீ’’தி க³ச்ச²ந்தியா பதே³ பதே³ து³க்கடங், யத்த² ட²த்வா பஸ்ஸதி, தத்த² பத³ங் அனுத்³த⁴ரித்வா பஞ்சாபி பஸ்ஸந்தியா ஏகாவ ஆபத்தி. ஸசே பன தங் தங் விலோகெத்வா பஸ்ஸதி, கீ³வங் பரிவத்தனப்பயோக³க³ணனாய ஆபத்தியோ, ந உம்மீலனக³ணனாய.
Cittāgāravaggassa paṭhame rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Uyyānanti kīḷanuyyānaṃ. Pokkharaṇinti kīḷanapokkharaṇiṃ. Dassanāyāti ‘‘etesu yaṃkiñci passissāmī’’ti gacchantiyā pade pade dukkaṭaṃ, yattha ṭhatvā passati, tattha padaṃ anuddharitvā pañcāpi passantiyā ekāva āpatti. Sace pana taṃ taṃ viloketvā passati, gīvaṃ parivattanappayogagaṇanāya āpattiyo, na ummīlanagaṇanāya.
ஸாவத்தி²யங் ச²ப்³ப³க்³கி³யா பி⁴க்கு²னியோ ஆரப்³ப⁴ சித்தாகா³ரங் த³ஸ்ஸனாய க³மனவத்து²ஸ்மிங் பஞ்ஞத்தங், பி⁴க்கு²ஸ்ஸ ஸப்³ப³த்த² து³க்கடங், அவஸேஸோ வினிச்ச²யோ நச்சத³ஸ்ஸனஸிக்கா²பதே³ வுத்தனயேனேவ வேதி³தப்³போ³தி.
Sāvatthiyaṃ chabbaggiyā bhikkhuniyo ārabbha cittāgāraṃ dassanāya gamanavatthusmiṃ paññattaṃ, bhikkhussa sabbattha dukkaṭaṃ, avaseso vinicchayo naccadassanasikkhāpade vuttanayeneva veditabboti.
ராஜாகா³ரஸிக்கா²பத³வண்ணனா நிட்டி²தா.
Rājāgārasikkhāpadavaṇṇanā niṭṭhitā.
2. ஆஸந்தி³பரிபு⁴ஞ்ஜனஸிக்கா²பத³வண்ணனா
2. Āsandiparibhuñjanasikkhāpadavaṇṇanā
து³தியே ஆஸந்தீ³ நாம அதிக்கந்தப்பமாணா வுச்சதி. பல்லங்கோ நாம ஸங்ஹாரிமேன வாளேன கதோதி வுத்தோ. பரிபு⁴ஞ்ஜெய்யாதி எத்த² பன நிஸீத³னநிபஜ்ஜனப்பயோக³க³ணனாய பாசித்தியங் வேதி³தப்³ப³ங்.
Dutiye āsandī nāma atikkantappamāṇā vuccati. Pallaṅko nāma saṃhārimena vāḷena katoti vutto. Paribhuñjeyyāti ettha pana nisīdananipajjanappayogagaṇanāya pācittiyaṃ veditabbaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ ஆஸந்தி³பல்லங்கபரிபோ⁴க³வத்து²ஸ்மிங் பஞ்ஞத்தங், ஆஸந்தி³யா பாதே³ சி²ந்தி³த்வா, பல்லங்கஸ்ஸ வாளே பி⁴ந்தி³த்வா பரிபு⁴ஞ்ஜந்தியா, உம்மத்திகாதீ³னஞ்ச அனாபத்தி. ஆஸந்தி³பல்லங்கதா, நிஸீத³னங் நிபஜ்ஜனங் வாதி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ sambahulā bhikkhuniyo ārabbha āsandipallaṅkaparibhogavatthusmiṃ paññattaṃ, āsandiyā pāde chinditvā, pallaṅkassa vāḷe bhinditvā paribhuñjantiyā, ummattikādīnañca anāpatti. Āsandipallaṅkatā, nisīdanaṃ nipajjanaṃ vāti imānettha dve aṅgāni. Samuṭṭhānādīni eḷakalomasadisānīti.
ஆஸந்தி³பரிபு⁴ஞ்ஜனஸிக்கா²பத³வண்ணனா நிட்டி²தா.
Āsandiparibhuñjanasikkhāpadavaṇṇanā niṭṭhitā.
3. ஸுத்தகந்தனஸிக்கா²பத³வண்ணனா
3. Suttakantanasikkhāpadavaṇṇanā
ததியே ஸுத்தந்தி ச²ன்னங் அஞ்ஞதரங். கந்தெய்யாதி எத்த² யத்தகங் ஹத்தே²ன அஞ்சி²தங் ஹோதி, தஸ்மிங் தக்கம்ஹி வேடி²தே ஏகா ஆபத்தி. இத³ஞ்ஹி ஸந்தா⁴ய பத³பா⁴ஜனீயே (பாசி॰ 988) ‘‘உஜ்ஜவுஜ்ஜவே’’தி வுத்தங்.
Tatiye suttanti channaṃ aññataraṃ. Kanteyyāti ettha yattakaṃ hatthena añchitaṃ hoti, tasmiṃ takkamhi veṭhite ekā āpatti. Idañhi sandhāya padabhājanīye (pāci. 988) ‘‘ujjavujjave’’ti vuttaṃ.
ஸாவத்தி²யங் ச²ப்³ப³க்³கி³யா பி⁴க்கு²னியோ ஆரப்³ப⁴ ஸுத்தங் கந்தனவத்து²ஸ்மிங் பஞ்ஞத்தங், கந்தனதோ புப்³பே³ கப்பாஸவிசினநங் ஆதி³ங் கத்வா ஸப்³ப³ப்பயோகே³ஸு ஹத்த²வாரக³ணனாய து³க்கடங். கந்திதஸுத்தங் கந்தந்தியா, உம்மத்திகாதீ³னஞ்ச அனாபத்தி. அகந்திததா, கந்தனந்தி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ chabbaggiyā bhikkhuniyo ārabbha suttaṃ kantanavatthusmiṃ paññattaṃ, kantanato pubbe kappāsavicinanaṃ ādiṃ katvā sabbappayogesu hatthavāragaṇanāya dukkaṭaṃ. Kantitasuttaṃ kantantiyā, ummattikādīnañca anāpatti. Akantitatā, kantananti imānettha dve aṅgāni. Samuṭṭhānādīni eḷakalomasadisānīti.
ஸுத்தகந்தனஸிக்கா²பத³வண்ணனா நிட்டி²தா.
Suttakantanasikkhāpadavaṇṇanā niṭṭhitā.
4. கி³ஹிவெய்யாவச்சஸிக்கா²பத³வண்ணனா
4. Gihiveyyāvaccasikkhāpadavaṇṇanā
சதுத்தே² கி³ஹிவெய்யாவச்சந்தி கி³ஹீனங் வெய்யாவச்சங். ஸசேபி ஹி மாதாபிதரோ அத்தனோ கிஞ்சி கம்மங் அகாராபெத்வா தேஸங் யாகு³பசனாதீ³னி கரொந்தி, புப்³ப³ப்பயோகே³ஸு பயோக³க³ணனாய து³க்கடானி ஆபஜ்ஜித்வா யாகு³ஆதீ³ஸு பா⁴ஜனக³ணனாய, கா²த³னீயாதீ³ஸு பூவக³ணனாய பாசித்தியங் ஆபஜ்ஜதி.
Catutthe gihiveyyāvaccanti gihīnaṃ veyyāvaccaṃ. Sacepi hi mātāpitaro attano kiñci kammaṃ akārāpetvā tesaṃ yāgupacanādīni karonti, pubbappayogesu payogagaṇanāya dukkaṭāni āpajjitvā yāguādīsu bhājanagaṇanāya, khādanīyādīsu pūvagaṇanāya pācittiyaṃ āpajjati.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ கி³ஹீனங் வெய்யாவச்சகரணவத்து²ஸ்மிங் பஞ்ஞத்தங், மனுஸ்ஸேஹி ஸங்க⁴ஸ்ஸ யாகு³பானே வா ப⁴த்தே வா சேதியபூஜாய வா கரீயமானாய தேஸங் ஸஹாயபா⁴வேன யாகு³பசனாதீ³னி, அத்தனோ வெய்யாவச்சகரஸ்ஸ ச தானியேவ கரொந்தியா, உம்மத்திகாதீ³னஞ்ச அனாபத்தி. கி³ஹிவெய்யாவச்சகரணங், அனுஞ்ஞாதகாரணாபா⁴வோதி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.
Sāvatthiyaṃ sambahulā bhikkhuniyo ārabbha gihīnaṃ veyyāvaccakaraṇavatthusmiṃ paññattaṃ, manussehi saṅghassa yāgupāne vā bhatte vā cetiyapūjāya vā karīyamānāya tesaṃ sahāyabhāvena yāgupacanādīni, attano veyyāvaccakarassa ca tāniyeva karontiyā, ummattikādīnañca anāpatti. Gihiveyyāvaccakaraṇaṃ, anuññātakāraṇābhāvoti imānettha dve aṅgāni. Samuṭṭhānādīni eḷakalomasadisānevāti.
கி³ஹிவெய்யாவச்சஸிக்கா²பத³வண்ணனா நிட்டி²தா.
Gihiveyyāvaccasikkhāpadavaṇṇanā niṭṭhitā.
5. அதி⁴கரணஸிக்கா²பத³வண்ணனா
5. Adhikaraṇasikkhāpadavaṇṇanā
பஞ்சமே அதி⁴கரணந்தி சதுன்னங் அஞ்ஞதரங். பாசித்தியந்தி இத⁴ சீவரஸிப்³ப³னே விய து⁴ரங் நிக்கி²த்தமத்தே பாசித்தியங், ஏகாஹம்பி பரிஹாரோ நத்தி².
Pañcame adhikaraṇanti catunnaṃ aññataraṃ. Pācittiyanti idha cīvarasibbane viya dhuraṃ nikkhittamatte pācittiyaṃ, ekāhampi parihāro natthi.
ஸாவத்தி²யங் து²ல்லனந்த³ங் ஆரப்³ப⁴ அதி⁴கரணங் நவூபஸமனவத்து²ஸ்மிங் பஞ்ஞத்தங், ஸேஸமெத்த² சீவரஸிப்³ப³னஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ thullanandaṃ ārabbha adhikaraṇaṃ navūpasamanavatthusmiṃ paññattaṃ, sesamettha cīvarasibbanasikkhāpade vuttanayeneva veditabbanti.
அதி⁴கரணஸிக்கா²பத³வண்ணனா நிட்டி²தா.
Adhikaraṇasikkhāpadavaṇṇanā niṭṭhitā.
6. போ⁴ஜனதா³னஸிக்கா²பத³வண்ணனா
6. Bhojanadānasikkhāpadavaṇṇanā
ச²ட்டே² ஸஹத்தா²தி காயேன வா காயப்படிப³த்³தே⁴ன வா நிஸ்ஸக்³கி³யேன வா ட²பெத்வா பஞ்சஸஹத⁴ம்மிகே அவஸேஸானங் அஞ்ஞத்ர உத³கத³ந்தபோனா யங்கிஞ்சி அஜ்ஜோ²ஹரணீயங் த³த³ந்தியா பாசித்தியங்.
Chaṭṭhe sahatthāti kāyena vā kāyappaṭibaddhena vā nissaggiyena vā ṭhapetvā pañcasahadhammike avasesānaṃ aññatra udakadantaponā yaṃkiñci ajjhoharaṇīyaṃ dadantiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ அகா³ரிகஸ்ஸ கா²த³னீயபோ⁴ஜனீயதா³னவத்து²ஸ்மிங் பஞ்ஞத்தங், உத³கத³ந்தபோனே து³க்கடங். யா பன தா³பேதி ந தே³தி, உபனிக்கி²பித்வா தே³தி, பா³ஹிரலேபங் தே³தி, தஸ்ஸா, உம்மத்திகாதீ³னஞ்ச அனாபத்தி. அஞ்ஞத்ர உத³கத³ந்தபோனா அஜ்ஜோ²ஹரணியங், ட²பெத்வா பஞ்ச ஸஹத⁴ம்மிகே அஞ்ஞஸ்ஸ ஸஹத்தா² தா³னந்தி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ thullanandaṃ ārabbha agārikassa khādanīyabhojanīyadānavatthusmiṃ paññattaṃ, udakadantapone dukkaṭaṃ. Yā pana dāpeti na deti, upanikkhipitvā deti, bāhiralepaṃ deti, tassā, ummattikādīnañca anāpatti. Aññatra udakadantaponā ajjhoharaṇiyaṃ, ṭhapetvā pañca sahadhammike aññassa sahatthā dānanti imānettha dve aṅgāni. Samuṭṭhānādīni eḷakalomasadisānīti.
போ⁴ஜனதா³னஸிக்கா²பத³வண்ணனா நிட்டி²தா.
Bhojanadānasikkhāpadavaṇṇanā niṭṭhitā.
7. ஆவஸத²சீவரஸிக்கா²பத³வண்ணனா
7. Āvasathacīvarasikkhāpadavaṇṇanā
ஸத்தமே ஆவஸத²சீவரந்தி ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னசீவரங். அனிஸ்ஸஜ்ஜித்வாதி சதுத்தே² தி³வஸே தோ⁴வித்வா அஞ்ஞிஸ்ஸா அந்தமஸோ ஸாமணேரியாபி உதுனியா அத³த்வா. பாசித்தியந்தி ஏவங் அனிஸ்ஸஜ்ஜித்வா பரிபு⁴ஞ்ஜந்தியா பாசித்தியங்.
Sattame āvasathacīvaranti ‘‘utuniyo bhikkhuniyo paribhuñjantū’’ti dinnacīvaraṃ. Anissajjitvāti catutthe divase dhovitvā aññissā antamaso sāmaṇeriyāpi utuniyā adatvā. Pācittiyanti evaṃ anissajjitvā paribhuñjantiyā pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜனவத்து²ஸ்மிங் பஞ்ஞத்தங், திகபாசித்தியங், நிஸ்ஸஜ்ஜிதே த்³விகது³க்கடங். தஸ்மிங் பன நிஸ்ஸஜ்ஜிதஸஞ்ஞாய, புன பரியாயேன வா, அஞ்ஞாஸங் உதுனீனங் அபா⁴வேன வா, அச்சி²ன்னநட்ட²சீவரிகாய வா, ஆபதா³ஸு வா பரிபு⁴ஞ்ஜந்தியா, உம்மத்திகாதீ³னஞ்ச அனாபத்தி. ஆவஸத²சீவரதா, சதுத்த²தி³வஸதா, தோ⁴வித்வா அனிஸ்ஸஜ்ஜனங், அனுஞ்ஞாதகாரணாபா⁴வோதி இமானெத்த² சத்தாரி அங்கா³னி. ஸமுட்டா²னாதீ³னி கதி²னஸதி³ஸானி, இத³ங் பன கிரியாகிரியந்தி.
Sāvatthiyaṃ thullanandaṃ ārabbha āvasathacīvaraṃ anissajjitvā paribhuñjanavatthusmiṃ paññattaṃ, tikapācittiyaṃ, nissajjite dvikadukkaṭaṃ. Tasmiṃ pana nissajjitasaññāya, puna pariyāyena vā, aññāsaṃ utunīnaṃ abhāvena vā, acchinnanaṭṭhacīvarikāya vā, āpadāsu vā paribhuñjantiyā, ummattikādīnañca anāpatti. Āvasathacīvaratā, catutthadivasatā, dhovitvā anissajjanaṃ, anuññātakāraṇābhāvoti imānettha cattāri aṅgāni. Samuṭṭhānādīni kathinasadisāni, idaṃ pana kiriyākiriyanti.
ஆவஸத²சீவரஸிக்கா²பத³வண்ணனா நிட்டி²தா.
Āvasathacīvarasikkhāpadavaṇṇanā niṭṭhitā.
8. ஆவஸத²விஹாரஸிக்கா²பத³வண்ணனா
8. Āvasathavihārasikkhāpadavaṇṇanā
அட்ட²மே ஆவஸத²ந்தி கவாடப³த்³த⁴விஹாரங். அனிஸ்ஸஜ்ஜித்வாதி ரக்க²ணத்தா²ய அத³த்வா, ‘‘இத³ங் ஜக்³கெ³ய்யாஸீ’’தி ஏவங் அனாபுச்சி²த்வாதி அத்தோ². சாரிகங் பக்கமெய்ய பாசித்தியந்தி எத்த² ஸககா³மதோ அஞ்ஞங் கா³மங் ஏகரத்திவாஸத்தா²யபி பக்கமந்தியா பரிக்கி²த்தஸ்ஸ ஆவஸத²ஸ்ஸ பரிக்கே²பங், அபரிக்கி²த்தஸ்ஸ உபசாரங் பட²மபாதே³ன அதிக்கந்தமத்தே து³க்கடங், து³தியேன பாசித்தியங்.
Aṭṭhame āvasathanti kavāṭabaddhavihāraṃ. Anissajjitvāti rakkhaṇatthāya adatvā, ‘‘idaṃ jaggeyyāsī’’ti evaṃ anāpucchitvāti attho. Cārikaṃ pakkameyya pācittiyanti ettha sakagāmato aññaṃ gāmaṃ ekarattivāsatthāyapi pakkamantiyā parikkhittassa āvasathassa parikkhepaṃ, aparikkhittassa upacāraṃ paṭhamapādena atikkantamatte dukkaṭaṃ, dutiyena pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ ஆவஸத²ங் அனிஸ்ஸஜ்ஜித்வா சாரிகங் பக்கமனவத்து²ஸ்மிங் பஞ்ஞத்தங், திகபாசித்தியங், அகவாடப³த்³தே⁴ து³க்கடங், நிஸ்ஸஜ்ஜிதே த்³விகது³க்கடங். தஸ்மிங் பன நிஸ்ஸஜ்ஜிதஸஞ்ஞாய, ஸதி அந்தராயே, படிஜக்³கி³கங் பரியேஸித்வா அலப⁴ந்தியா, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. ஸகவாடப³த்³த⁴தா, வுத்தனயேன பக்கமனங், அனுஞ்ஞாதகாரணாபா⁴வோதி இமானெத்த² தீணி அங்கா³னி. ஸமுட்டா²னாதீ³னி கதி²னஸதி³ஸானீதி, இத³ங் பன கிரியாகிரியந்தி.
Sāvatthiyaṃ thullanandaṃ ārabbha āvasathaṃ anissajjitvā cārikaṃ pakkamanavatthusmiṃ paññattaṃ, tikapācittiyaṃ, akavāṭabaddhe dukkaṭaṃ, nissajjite dvikadukkaṭaṃ. Tasmiṃ pana nissajjitasaññāya, sati antarāye, paṭijaggikaṃ pariyesitvā alabhantiyā, gilānāya, āpadāsu, ummattikādīnañca anāpatti. Sakavāṭabaddhatā, vuttanayena pakkamanaṃ, anuññātakāraṇābhāvoti imānettha tīṇi aṅgāni. Samuṭṭhānādīni kathinasadisānīti, idaṃ pana kiriyākiriyanti.
ஆவஸத²விஹாரஸிக்கா²பத³வண்ணனா நிட்டி²தா.
Āvasathavihārasikkhāpadavaṇṇanā niṭṭhitā.
9. திரச்சா²னவிஜ்ஜாபரியாபுணனஸிக்கா²பத³வண்ணனா
9. Tiracchānavijjāpariyāpuṇanasikkhāpadavaṇṇanā
நவமே திரச்சா²னவிஜ்ஜந்தி யங்கிஞ்சி பா³ஹிரகங் அனத்த²ஸங்ஹிதங் ஹத்தி²அஸ்ஸரத²த⁴னுத²ருஸிப்பஆத²ப்³ப³ணகி²லனவஸீகரணஸோஸாபனமந்தாக³த³ப்பயோகா³தி³பே⁴த³ங் பரூபகா⁴தகரங் விஜ்ஜங். பரியாபுணெய்யாதி எத்த² யஸ்ஸ கஸ்ஸசி ஸந்திகே தங் பதா³தி³வஸேன பரியாபுணந்தியா பத³க³ணனாய சேவ அக்க²ரக³ணனாய ச பாசித்தியந்தி.
Navame tiracchānavijjanti yaṃkiñci bāhirakaṃ anatthasaṃhitaṃ hatthiassarathadhanutharusippaāthabbaṇakhilanavasīkaraṇasosāpanamantāgadappayogādibhedaṃ parūpaghātakaraṃ vijjaṃ. Pariyāpuṇeyyāti ettha yassa kassaci santike taṃ padādivasena pariyāpuṇantiyā padagaṇanāya ceva akkharagaṇanāya ca pācittiyanti.
திரச்சா²னவிஜ்ஜாபரியாபுணனஸிக்கா²பத³வண்ணனா நிட்டி²தா.
Tiracchānavijjāpariyāpuṇanasikkhāpadavaṇṇanā niṭṭhitā.
10. திரச்சா²னவிஜ்ஜாவாசனஸிக்கா²பத³வண்ணனா
10. Tiracchānavijjāvācanasikkhāpadavaṇṇanā
த³ஸமே வாசெய்யாதி பத³ங் விஸேஸோ. உப⁴யம்பி ஸாவத்தி²யங் ச²ப்³ப³க்³கி³யா சேவ ஸம்ப³ஹுலா பி⁴க்கு²னியோ ச ஆரப்³ப⁴ திரச்சா²னவிஜ்ஜங் பரியாபுணனவாசனவத்து²ஸ்மிங் பஞ்ஞத்தங். லேகே², தா⁴ரணாய ச, கு³த்தத்தா²ய ச யக்க²பரித்தனாக³மண்ட³லாதி³கே ஸப்³ப³பரித்தே, உம்மத்திகாதீ³னஞ்ச அனாபத்தி. திரச்சா²னவிஜ்ஜதா, பரியாபுணனவாசனா, அனுஞ்ஞாதகாரணாபா⁴வோதி இமானெத்த² த்³வீஸுபி தீணி அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானீதி.
Dasame vāceyyāti padaṃ viseso. Ubhayampi sāvatthiyaṃ chabbaggiyā ceva sambahulā bhikkhuniyo ca ārabbha tiracchānavijjaṃ pariyāpuṇanavācanavatthusmiṃ paññattaṃ. Lekhe, dhāraṇāya ca, guttatthāya ca yakkhaparittanāgamaṇḍalādike sabbaparitte, ummattikādīnañca anāpatti. Tiracchānavijjatā, pariyāpuṇanavācanā, anuññātakāraṇābhāvoti imānettha dvīsupi tīṇi aṅgāni. Samuṭṭhānādīni padasodhammasadisānīti.
திரச்சா²னவிஜ்ஜாவாசனஸிக்கா²பத³வண்ணனா நிட்டி²தா.
Tiracchānavijjāvācanasikkhāpadavaṇṇanā niṭṭhitā.
சித்தாகா³ரவக்³கோ³ பஞ்சமோ.
Cittāgāravaggo pañcamo.
