| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. চিত্তাগারৰগ্গো
5. Cittāgāravaggo
২৩৫. রাজাগারং ৰা চিত্তাগারং ৰা আরামং ৰা উয্যানং ৰা পোক্খরণিং ৰা দস্সনায গচ্ছন্তী দ্ৰে আপত্তিযো আপজ্জতি। গচ্ছতি, আপত্তি দুক্কটস্স; যত্থ ঠিতা পস্সতি, আপত্তি পাচিত্তিযস্স।
235. Rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gacchantī dve āpattiyo āpajjati. Gacchati, āpatti dukkaṭassa; yattha ṭhitā passati, āpatti pācittiyassa.
আসন্দিং ৰা পল্লঙ্কং ৰা পরিভুঞ্জন্তী দ্ৰে আপত্তিযো আপজ্জতি। পরিভুঞ্জতি, পযোগে দুক্কটং; পরিভুত্তে, আপত্তি পাচিত্তিযস্স।
Āsandiṃ vā pallaṅkaṃ vā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
সুত্তং কন্তন্তী দ্ৰে আপত্তিযো আপজ্জতি। কন্ততি, পযোগে দুক্কটং; উজ্জৰুজ্জৰে, আপত্তি পাচিত্তিযস্স।
Suttaṃ kantantī dve āpattiyo āpajjati. Kantati, payoge dukkaṭaṃ; ujjavujjave, āpatti pācittiyassa.
গিহিৰেয্যাৰচ্চং করোন্তী দ্ৰে আপত্তিযো আপজ্জতি। করোতি, পযোগে দুক্কটং; কতে, আপত্তি পাচিত্তিযস্স।
Gihiveyyāvaccaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
ভিক্খুনিযা – ‘‘এহায্যে ইমং অধিকরণং ৰূপসমেহী’’তি ৰুচ্চমানা – ‘‘সাধূ’’তি পটিস্সুণিত্ৰা নেৰ ৰূপসমেন্তী ন ৰূপসমায উস্সুক্কং করোন্তী একং আপত্তিং আপজ্জতি। পাচিত্তিযং।
Bhikkhuniyā – ‘‘ehāyye imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā neva vūpasamentī na vūpasamāya ussukkaṃ karontī ekaṃ āpattiṃ āpajjati. Pācittiyaṃ.
অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দেন্তী দ্ৰে আপত্তিযো আপজ্জতি। দেতি, পযোগে দুক্কটং; দিন্নে, আপত্তি পাচিত্তিযস্স।
Agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
আৰসথচীৰরং অনিস্সজ্জিত্ৰা পরিভুঞ্জন্তী দ্ৰে আপত্তিযো আপজ্জতি। পরিভুঞ্জতি, পযোগে দুক্কটং; পরিভুত্তে, আপত্তি পাচিত্তিযস্স।
Āvasathacīvaraṃ anissajjitvā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
আৰসথং অনিস্সজ্জিত্ৰা চারিকং পক্কমন্তী দ্ৰে আপত্তিযো আপজ্জতি। পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স।
Āvasathaṃ anissajjitvā cārikaṃ pakkamantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
তিরচ্ছানৰিজ্জং পরিযাপুণন্তী দ্ৰে আপত্তিযো আপজ্জতি। পরিযাপুণাতি, পযোগে দুক্কটং; পদে পদে আপত্তি পাচিত্তিযস্স।
Tiracchānavijjaṃ pariyāpuṇantī dve āpattiyo āpajjati. Pariyāpuṇāti, payoge dukkaṭaṃ; pade pade āpatti pācittiyassa.
তিরচ্ছানৰিজ্জং ৰাচেন্তী দ্ৰে আপত্তিযো আপজ্জতি। ৰাচেতি, পযোগে দুক্কটং; পদে পদে আপত্তি পাচিত্তিযস্স।
Tiracchānavijjaṃ vācentī dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
চিত্তাগারৰগ্গো পঞ্চমো।
Cittāgāravaggo pañcamo.
