| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৫. চিত্তাগারৰগ্গো
5. Cittāgāravaggo
১. রাজাগারসিক্খাপদৰণ্ণনা
1. Rājāgārasikkhāpadavaṇṇanā
চিত্তাগারৰগ্গস্স পঠমে রাজাগারন্তি রঞ্ঞো কীল়নঘরং। চিত্তাগারন্তি কীল়নচিত্তসালং। আরামন্তি কীল়নউপৰনং। উয্যানন্তি কীল়নুয্যানং। পোক্খরণিন্তি কীল়নপোক্খরণিং। দস্সনাযাতি ‘‘এতেসু যংকিঞ্চি পস্সিস্সামী’’তি গচ্ছন্তিযা পদে পদে দুক্কটং, যত্থ ঠত্ৰা পস্সতি, তত্থ পদং অনুদ্ধরিত্ৰা পঞ্চাপি পস্সন্তিযা একাৰ আপত্তি। সচে পন তং তং ৰিলোকেত্ৰা পস্সতি, গীৰং পরিৰত্তনপ্পযোগগণনায আপত্তিযো, ন উম্মীলনগণনায।
Cittāgāravaggassa paṭhame rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Uyyānanti kīḷanuyyānaṃ. Pokkharaṇinti kīḷanapokkharaṇiṃ. Dassanāyāti ‘‘etesu yaṃkiñci passissāmī’’ti gacchantiyā pade pade dukkaṭaṃ, yattha ṭhatvā passati, tattha padaṃ anuddharitvā pañcāpi passantiyā ekāva āpatti. Sace pana taṃ taṃ viloketvā passati, gīvaṃ parivattanappayogagaṇanāya āpattiyo, na ummīlanagaṇanāya.
সাৰত্থিযং ছব্বগ্গিযা ভিক্খুনিযো আরব্ভ চিত্তাগারং দস্সনায গমনৰত্থুস্মিং পঞ্ঞত্তং, ভিক্খুস্স সব্বত্থ দুক্কটং, অৰসেসো ৰিনিচ্ছযো নচ্চদস্সনসিক্খাপদে ৰুত্তনযেনেৰ ৰেদিতব্বোতি।
Sāvatthiyaṃ chabbaggiyā bhikkhuniyo ārabbha cittāgāraṃ dassanāya gamanavatthusmiṃ paññattaṃ, bhikkhussa sabbattha dukkaṭaṃ, avaseso vinicchayo naccadassanasikkhāpade vuttanayeneva veditabboti.
রাজাগারসিক্খাপদৰণ্ণনা নিট্ঠিতা।
Rājāgārasikkhāpadavaṇṇanā niṭṭhitā.
২. আসন্দিপরিভুঞ্জনসিক্খাপদৰণ্ণনা
2. Āsandiparibhuñjanasikkhāpadavaṇṇanā
দুতিযে আসন্দী নাম অতিক্কন্তপ্পমাণা ৰুচ্চতি। পল্লঙ্কো নাম সংহারিমেন ৰাল়েন কতোতি ৰুত্তো। পরিভুঞ্জেয্যাতি এত্থ পন নিসীদননিপজ্জনপ্পযোগগণনায পাচিত্তিযং ৰেদিতব্বং।
Dutiye āsandī nāma atikkantappamāṇā vuccati. Pallaṅko nāma saṃhārimena vāḷena katoti vutto. Paribhuñjeyyāti ettha pana nisīdananipajjanappayogagaṇanāya pācittiyaṃ veditabbaṃ.
সাৰত্থিযং সম্বহুলা ভিক্খুনিযো আরব্ভ আসন্দিপল্লঙ্কপরিভোগৰত্থুস্মিং পঞ্ঞত্তং, আসন্দিযা পাদে ছিন্দিত্ৰা, পল্লঙ্কস্স ৰাল়ে ভিন্দিত্ৰা পরিভুঞ্জন্তিযা, উম্মত্তিকাদীনঞ্চ অনাপত্তি। আসন্দিপল্লঙ্কতা, নিসীদনং নিপজ্জনং ৰাতি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ sambahulā bhikkhuniyo ārabbha āsandipallaṅkaparibhogavatthusmiṃ paññattaṃ, āsandiyā pāde chinditvā, pallaṅkassa vāḷe bhinditvā paribhuñjantiyā, ummattikādīnañca anāpatti. Āsandipallaṅkatā, nisīdanaṃ nipajjanaṃ vāti imānettha dve aṅgāni. Samuṭṭhānādīni eḷakalomasadisānīti.
আসন্দিপরিভুঞ্জনসিক্খাপদৰণ্ণনা নিট্ঠিতা।
Āsandiparibhuñjanasikkhāpadavaṇṇanā niṭṭhitā.
৩. সুত্তকন্তনসিক্খাপদৰণ্ণনা
3. Suttakantanasikkhāpadavaṇṇanā
ততিযে সুত্তন্তি ছন্নং অঞ্ঞতরং। কন্তেয্যাতি এত্থ যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে একা আপত্তি। ইদঞ্হি সন্ধায পদভাজনীযে (পাচি॰ ৯৮৮) ‘‘উজ্জৰুজ্জৰে’’তি ৰুত্তং।
Tatiye suttanti channaṃ aññataraṃ. Kanteyyāti ettha yattakaṃ hatthena añchitaṃ hoti, tasmiṃ takkamhi veṭhite ekā āpatti. Idañhi sandhāya padabhājanīye (pāci. 988) ‘‘ujjavujjave’’ti vuttaṃ.
সাৰত্থিযং ছব্বগ্গিযা ভিক্খুনিযো আরব্ভ সুত্তং কন্তনৰত্থুস্মিং পঞ্ঞত্তং, কন্তনতো পুব্বে কপ্পাসৰিচিননং আদিং কত্ৰা সব্বপ্পযোগেসু হত্থৰারগণনায দুক্কটং। কন্তিতসুত্তং কন্তন্তিযা, উম্মত্তিকাদীনঞ্চ অনাপত্তি। অকন্তিততা, কন্তনন্তি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ chabbaggiyā bhikkhuniyo ārabbha suttaṃ kantanavatthusmiṃ paññattaṃ, kantanato pubbe kappāsavicinanaṃ ādiṃ katvā sabbappayogesu hatthavāragaṇanāya dukkaṭaṃ. Kantitasuttaṃ kantantiyā, ummattikādīnañca anāpatti. Akantitatā, kantananti imānettha dve aṅgāni. Samuṭṭhānādīni eḷakalomasadisānīti.
সুত্তকন্তনসিক্খাপদৰণ্ণনা নিট্ঠিতা।
Suttakantanasikkhāpadavaṇṇanā niṭṭhitā.
৪. গিহিৰেয্যাৰচ্চসিক্খাপদৰণ্ণনা
4. Gihiveyyāvaccasikkhāpadavaṇṇanā
চতুত্থে গিহিৰেয্যাৰচ্চন্তি গিহীনং ৰেয্যাৰচ্চং। সচেপি হি মাতাপিতরো অত্তনো কিঞ্চি কম্মং অকারাপেত্ৰা তেসং যাগুপচনাদীনি করোন্তি, পুব্বপ্পযোগেসু পযোগগণনায দুক্কটানি আপজ্জিত্ৰা যাগুআদীসু ভাজনগণনায, খাদনীযাদীসু পূৰগণনায পাচিত্তিযং আপজ্জতি।
Catutthe gihiveyyāvaccanti gihīnaṃ veyyāvaccaṃ. Sacepi hi mātāpitaro attano kiñci kammaṃ akārāpetvā tesaṃ yāgupacanādīni karonti, pubbappayogesu payogagaṇanāya dukkaṭāni āpajjitvā yāguādīsu bhājanagaṇanāya, khādanīyādīsu pūvagaṇanāya pācittiyaṃ āpajjati.
সাৰত্থিযং সম্বহুলা ভিক্খুনিযো আরব্ভ গিহীনং ৰেয্যাৰচ্চকরণৰত্থুস্মিং পঞ্ঞত্তং, মনুস্সেহি সঙ্ঘস্স যাগুপানে ৰা ভত্তে ৰা চেতিযপূজায ৰা করীযমানায তেসং সহাযভাৰেন যাগুপচনাদীনি, অত্তনো ৰেয্যাৰচ্চকরস্স চ তানিযেৰ করোন্তিযা, উম্মত্তিকাদীনঞ্চ অনাপত্তি। গিহিৰেয্যাৰচ্চকরণং, অনুঞ্ঞাতকারণাভাৰোতি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানেৰাতি।
Sāvatthiyaṃ sambahulā bhikkhuniyo ārabbha gihīnaṃ veyyāvaccakaraṇavatthusmiṃ paññattaṃ, manussehi saṅghassa yāgupāne vā bhatte vā cetiyapūjāya vā karīyamānāya tesaṃ sahāyabhāvena yāgupacanādīni, attano veyyāvaccakarassa ca tāniyeva karontiyā, ummattikādīnañca anāpatti. Gihiveyyāvaccakaraṇaṃ, anuññātakāraṇābhāvoti imānettha dve aṅgāni. Samuṭṭhānādīni eḷakalomasadisānevāti.
গিহিৰেয্যাৰচ্চসিক্খাপদৰণ্ণনা নিট্ঠিতা।
Gihiveyyāvaccasikkhāpadavaṇṇanā niṭṭhitā.
৫. অধিকরণসিক্খাপদৰণ্ণনা
5. Adhikaraṇasikkhāpadavaṇṇanā
পঞ্চমে অধিকরণন্তি চতুন্নং অঞ্ঞতরং। পাচিত্তিযন্তি ইধ চীৰরসিব্বনে ৰিয ধুরং নিক্খিত্তমত্তে পাচিত্তিযং, একাহম্পি পরিহারো নত্থি।
Pañcame adhikaraṇanti catunnaṃ aññataraṃ. Pācittiyanti idha cīvarasibbane viya dhuraṃ nikkhittamatte pācittiyaṃ, ekāhampi parihāro natthi.
সাৰত্থিযং থুল্লনন্দং আরব্ভ অধিকরণং নৰূপসমনৰত্থুস্মিং পঞ্ঞত্তং, সেসমেত্থ চীৰরসিব্বনসিক্খাপদে ৰুত্তনযেনেৰ ৰেদিতব্বন্তি।
Sāvatthiyaṃ thullanandaṃ ārabbha adhikaraṇaṃ navūpasamanavatthusmiṃ paññattaṃ, sesamettha cīvarasibbanasikkhāpade vuttanayeneva veditabbanti.
অধিকরণসিক্খাপদৰণ্ণনা নিট্ঠিতা।
Adhikaraṇasikkhāpadavaṇṇanā niṭṭhitā.
৬. ভোজনদানসিক্খাপদৰণ্ণনা
6. Bhojanadānasikkhāpadavaṇṇanā
ছট্ঠে সহত্থাতি কাযেন ৰা কাযপ্পটিবদ্ধেন ৰা নিস্সগ্গিযেন ৰা ঠপেত্ৰা পঞ্চসহধম্মিকে অৰসেসানং অঞ্ঞত্র উদকদন্তপোনা যংকিঞ্চি অজ্ঝোহরণীযং দদন্তিযা পাচিত্তিযং।
Chaṭṭhe sahatthāti kāyena vā kāyappaṭibaddhena vā nissaggiyena vā ṭhapetvā pañcasahadhammike avasesānaṃ aññatra udakadantaponā yaṃkiñci ajjhoharaṇīyaṃ dadantiyā pācittiyaṃ.
সাৰত্থিযং থুল্লনন্দং আরব্ভ অগারিকস্স খাদনীযভোজনীযদানৰত্থুস্মিং পঞ্ঞত্তং, উদকদন্তপোনে দুক্কটং। যা পন দাপেতি ন দেতি, উপনিক্খিপিত্ৰা দেতি, বাহিরলেপং দেতি, তস্সা, উম্মত্তিকাদীনঞ্চ অনাপত্তি। অঞ্ঞত্র উদকদন্তপোনা অজ্ঝোহরণিযং, ঠপেত্ৰা পঞ্চ সহধম্মিকে অঞ্ঞস্স সহত্থা দানন্তি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ thullanandaṃ ārabbha agārikassa khādanīyabhojanīyadānavatthusmiṃ paññattaṃ, udakadantapone dukkaṭaṃ. Yā pana dāpeti na deti, upanikkhipitvā deti, bāhiralepaṃ deti, tassā, ummattikādīnañca anāpatti. Aññatra udakadantaponā ajjhoharaṇiyaṃ, ṭhapetvā pañca sahadhammike aññassa sahatthā dānanti imānettha dve aṅgāni. Samuṭṭhānādīni eḷakalomasadisānīti.
ভোজনদানসিক্খাপদৰণ্ণনা নিট্ঠিতা।
Bhojanadānasikkhāpadavaṇṇanā niṭṭhitā.
৭. আৰসথচীৰরসিক্খাপদৰণ্ণনা
7. Āvasathacīvarasikkhāpadavaṇṇanā
সত্তমে আৰসথচীৰরন্তি ‘‘উতুনিযো ভিক্খুনিযো পরিভুঞ্জন্তূ’’তি দিন্নচীৰরং। অনিস্সজ্জিত্ৰাতি চতুত্থে দিৰসে ধোৰিত্ৰা অঞ্ঞিস্সা অন্তমসো সামণেরিযাপি উতুনিযা অদত্ৰা। পাচিত্তিযন্তি এৰং অনিস্সজ্জিত্ৰা পরিভুঞ্জন্তিযা পাচিত্তিযং।
Sattame āvasathacīvaranti ‘‘utuniyo bhikkhuniyo paribhuñjantū’’ti dinnacīvaraṃ. Anissajjitvāti catutthe divase dhovitvā aññissā antamaso sāmaṇeriyāpi utuniyā adatvā. Pācittiyanti evaṃ anissajjitvā paribhuñjantiyā pācittiyaṃ.
সাৰত্থিযং থুল্লনন্দং আরব্ভ আৰসথচীৰরং অনিস্সজ্জিত্ৰা পরিভুঞ্জনৰত্থুস্মিং পঞ্ঞত্তং, তিকপাচিত্তিযং, নিস্সজ্জিতে দ্ৰিকদুক্কটং। তস্মিং পন নিস্সজ্জিতসঞ্ঞায, পুন পরিযাযেন ৰা, অঞ্ঞাসং উতুনীনং অভাৰেন ৰা, অচ্ছিন্ননট্ঠচীৰরিকায ৰা, আপদাসু ৰা পরিভুঞ্জন্তিযা, উম্মত্তিকাদীনঞ্চ অনাপত্তি। আৰসথচীৰরতা, চতুত্থদিৰসতা, ধোৰিত্ৰা অনিস্সজ্জনং, অনুঞ্ঞাতকারণাভাৰোতি ইমানেত্থ চত্তারি অঙ্গানি। সমুট্ঠানাদীনি কথিনসদিসানি, ইদং পন কিরিযাকিরিযন্তি।
Sāvatthiyaṃ thullanandaṃ ārabbha āvasathacīvaraṃ anissajjitvā paribhuñjanavatthusmiṃ paññattaṃ, tikapācittiyaṃ, nissajjite dvikadukkaṭaṃ. Tasmiṃ pana nissajjitasaññāya, puna pariyāyena vā, aññāsaṃ utunīnaṃ abhāvena vā, acchinnanaṭṭhacīvarikāya vā, āpadāsu vā paribhuñjantiyā, ummattikādīnañca anāpatti. Āvasathacīvaratā, catutthadivasatā, dhovitvā anissajjanaṃ, anuññātakāraṇābhāvoti imānettha cattāri aṅgāni. Samuṭṭhānādīni kathinasadisāni, idaṃ pana kiriyākiriyanti.
আৰসথচীৰরসিক্খাপদৰণ্ণনা নিট্ঠিতা।
Āvasathacīvarasikkhāpadavaṇṇanā niṭṭhitā.
৮. আৰসথৰিহারসিক্খাপদৰণ্ণনা
8. Āvasathavihārasikkhāpadavaṇṇanā
অট্ঠমে আৰসথন্তি কৰাটবদ্ধৰিহারং। অনিস্সজ্জিত্ৰাতি রক্খণত্থায অদত্ৰা, ‘‘ইদং জগ্গেয্যাসী’’তি এৰং অনাপুচ্ছিত্ৰাতি অত্থো। চারিকং পক্কমেয্য পাচিত্তিযন্তি এত্থ সকগামতো অঞ্ঞং গামং একরত্তিৰাসত্থাযপি পক্কমন্তিযা পরিক্খিত্তস্স আৰসথস্স পরিক্খেপং, অপরিক্খিত্তস্স উপচারং পঠমপাদেন অতিক্কন্তমত্তে দুক্কটং, দুতিযেন পাচিত্তিযং।
Aṭṭhame āvasathanti kavāṭabaddhavihāraṃ. Anissajjitvāti rakkhaṇatthāya adatvā, ‘‘idaṃ jaggeyyāsī’’ti evaṃ anāpucchitvāti attho. Cārikaṃ pakkameyya pācittiyanti ettha sakagāmato aññaṃ gāmaṃ ekarattivāsatthāyapi pakkamantiyā parikkhittassa āvasathassa parikkhepaṃ, aparikkhittassa upacāraṃ paṭhamapādena atikkantamatte dukkaṭaṃ, dutiyena pācittiyaṃ.
সাৰত্থিযং থুল্লনন্দং আরব্ভ আৰসথং অনিস্সজ্জিত্ৰা চারিকং পক্কমনৰত্থুস্মিং পঞ্ঞত্তং, তিকপাচিত্তিযং, অকৰাটবদ্ধে দুক্কটং, নিস্সজ্জিতে দ্ৰিকদুক্কটং। তস্মিং পন নিস্সজ্জিতসঞ্ঞায, সতি অন্তরাযে, পটিজগ্গিকং পরিযেসিত্ৰা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি। সকৰাটবদ্ধতা, ৰুত্তনযেন পক্কমনং, অনুঞ্ঞাতকারণাভাৰোতি ইমানেত্থ তীণি অঙ্গানি। সমুট্ঠানাদীনি কথিনসদিসানীতি, ইদং পন কিরিযাকিরিযন্তি।
Sāvatthiyaṃ thullanandaṃ ārabbha āvasathaṃ anissajjitvā cārikaṃ pakkamanavatthusmiṃ paññattaṃ, tikapācittiyaṃ, akavāṭabaddhe dukkaṭaṃ, nissajjite dvikadukkaṭaṃ. Tasmiṃ pana nissajjitasaññāya, sati antarāye, paṭijaggikaṃ pariyesitvā alabhantiyā, gilānāya, āpadāsu, ummattikādīnañca anāpatti. Sakavāṭabaddhatā, vuttanayena pakkamanaṃ, anuññātakāraṇābhāvoti imānettha tīṇi aṅgāni. Samuṭṭhānādīni kathinasadisānīti, idaṃ pana kiriyākiriyanti.
আৰসথৰিহারসিক্খাপদৰণ্ণনা নিট্ঠিতা।
Āvasathavihārasikkhāpadavaṇṇanā niṭṭhitā.
৯. তিরচ্ছানৰিজ্জাপরিযাপুণনসিক্খাপদৰণ্ণনা
9. Tiracchānavijjāpariyāpuṇanasikkhāpadavaṇṇanā
নৰমে তিরচ্ছানৰিজ্জন্তি যংকিঞ্চি বাহিরকং অনত্থসংহিতং হত্থিঅস্সরথধনুথরুসিপ্পআথব্বণখিলনৰসীকরণসোসাপনমন্তাগদপ্পযোগাদিভেদং পরূপঘাতকরং ৰিজ্জং। পরিযাপুণেয্যাতি এত্থ যস্স কস্সচি সন্তিকে তং পদাদিৰসেন পরিযাপুণন্তিযা পদগণনায চেৰ অক্খরগণনায চ পাচিত্তিযন্তি।
Navame tiracchānavijjanti yaṃkiñci bāhirakaṃ anatthasaṃhitaṃ hatthiassarathadhanutharusippaāthabbaṇakhilanavasīkaraṇasosāpanamantāgadappayogādibhedaṃ parūpaghātakaraṃ vijjaṃ. Pariyāpuṇeyyāti ettha yassa kassaci santike taṃ padādivasena pariyāpuṇantiyā padagaṇanāya ceva akkharagaṇanāya ca pācittiyanti.
তিরচ্ছানৰিজ্জাপরিযাপুণনসিক্খাপদৰণ্ণনা নিট্ঠিতা।
Tiracchānavijjāpariyāpuṇanasikkhāpadavaṇṇanā niṭṭhitā.
১০. তিরচ্ছানৰিজ্জাৰাচনসিক্খাপদৰণ্ণনা
10. Tiracchānavijjāvācanasikkhāpadavaṇṇanā
দসমে ৰাচেয্যাতি পদং ৰিসেসো। উভযম্পি সাৰত্থিযং ছব্বগ্গিযা চেৰ সম্বহুলা ভিক্খুনিযো চ আরব্ভ তিরচ্ছানৰিজ্জং পরিযাপুণনৰাচনৰত্থুস্মিং পঞ্ঞত্তং। লেখে, ধারণায চ, গুত্তত্থায চ যক্খপরিত্তনাগমণ্ডলাদিকে সব্বপরিত্তে, উম্মত্তিকাদীনঞ্চ অনাপত্তি। তিরচ্ছানৰিজ্জতা, পরিযাপুণনৰাচনা, অনুঞ্ঞাতকারণাভাৰোতি ইমানেত্থ দ্ৰীসুপি তীণি অঙ্গানি। সমুট্ঠানাদীনি পদসোধম্মসদিসানীতি।
Dasame vāceyyāti padaṃ viseso. Ubhayampi sāvatthiyaṃ chabbaggiyā ceva sambahulā bhikkhuniyo ca ārabbha tiracchānavijjaṃ pariyāpuṇanavācanavatthusmiṃ paññattaṃ. Lekhe, dhāraṇāya ca, guttatthāya ca yakkhaparittanāgamaṇḍalādike sabbaparitte, ummattikādīnañca anāpatti. Tiracchānavijjatā, pariyāpuṇanavācanā, anuññātakāraṇābhāvoti imānettha dvīsupi tīṇi aṅgāni. Samuṭṭhānādīni padasodhammasadisānīti.
তিরচ্ছানৰিজ্জাৰাচনসিক্খাপদৰণ্ণনা নিট্ঠিতা।
Tiracchānavijjāvācanasikkhāpadavaṇṇanā niṭṭhitā.
চিত্তাগারৰগ্গো পঞ্চমো।
Cittāgāravaggo pañcamo.
