| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৭. সুনিক্খিত্তৰিমানৰগ্গো
7. Sunikkhittavimānavaggo
১. চিত্তলতাৰিমানৰণ্ণনা
1. Cittalatāvimānavaṇṇanā
যথা ৰনং চিত্তলতং পভাসতীতি চিত্তলতাৰিমানং। তস্স কা উপ্পত্তি? ভগৰা সাৰত্থিযং ৰিহরতি জেতৰনে। তেন সমযেন সাৰত্থিযং অঞ্ঞতরো উপাসকো দলিদ্দো অপ্পভোগো পরেসং কম্মং কত্ৰা জীৰতি। সো সদ্ধো পসন্নো জিণ্ণে ৰুড্ঢে মাতাপিতরো পোসেন্তো ‘‘ইত্থিযো নাম পতিকুলে ঠিতা ইস্সরিযং করোন্তি, সস্সুসসুরানং মনাপচারিনিযো দুল্লভা’’তি মাতাপিতূনং চিত্তদুক্খং পরিহরন্তো দারপরিগ্গহং অকত্ৰা সযমেৰ নে উপট্ঠহতি, সীলানি রক্খতি, উপোসথং উপৰসতি , যথাৰিভৰং দানানি দেতি। সো অপরভাগে কালং কত্ৰা তাৰতিংসেসু দ্ৰাদসযোজনিকে ৰিমানে নিব্বত্তি। তং আযস্মা মহামোগ্গল্লানো হেট্ঠা ৰুত্তনযেন গন্ত্ৰা কতকম্মং ইমাহি গাথাহি পটিপুচ্ছি –
Yathāvanaṃ cittalataṃ pabhāsatīti cittalatāvimānaṃ. Tassa kā uppatti? Bhagavā sāvatthiyaṃ viharati jetavane. Tena samayena sāvatthiyaṃ aññataro upāsako daliddo appabhogo paresaṃ kammaṃ katvā jīvati. So saddho pasanno jiṇṇe vuḍḍhe mātāpitaro posento ‘‘itthiyo nāma patikule ṭhitā issariyaṃ karonti, sassusasurānaṃ manāpacāriniyo dullabhā’’ti mātāpitūnaṃ cittadukkhaṃ pariharanto dārapariggahaṃ akatvā sayameva ne upaṭṭhahati, sīlāni rakkhati, uposathaṃ upavasati , yathāvibhavaṃ dānāni deti. So aparabhāge kālaṃ katvā tāvatiṃsesu dvādasayojanike vimāne nibbatti. Taṃ āyasmā mahāmoggallāno heṭṭhā vuttanayena gantvā katakammaṃ imāhi gāthāhi paṭipucchi –
১১১৪.
1114.
‘‘যথা ৰনং চিত্তলতং পভাসতি, উয্যানসেট্ঠং তিদসানমুত্তমং।
‘‘Yathā vanaṃ cittalataṃ pabhāsati, uyyānaseṭṭhaṃ tidasānamuttamaṃ;
তথূপমং তুয্হমিদং ৰিমানং, ওভাসযং তিট্ঠতি অন্তলিক্খে॥
Tathūpamaṃ tuyhamidaṃ vimānaṃ, obhāsayaṃ tiṭṭhati antalikkhe.
১১১৫.
1115.
‘‘দেৰিদ্ধিপত্তোসি মহানুভাৰো…পে॰…
‘‘Deviddhipattosi mahānubhāvo…pe…
ৰণ্ণো চ তে সব্বদিসা পভাসতী’’তি॥
Vaṇṇo ca te sabbadisā pabhāsatī’’ti.
১১১৬.
1116.
‘‘সো দেৰপুত্তো অত্তমনো…পে॰… যস্স কম্মস্সিদং ফলং’’॥
‘‘So devaputto attamano…pe… yassa kammassidaṃ phalaṃ’’.
১১১৭.
1117.
‘‘অহং মনুস্সেসু মনুস্সভূতো, দলিদ্দো অতাণো কপণো কম্মকরো অহোসিং।
‘‘Ahaṃ manussesu manussabhūto, daliddo atāṇo kapaṇo kammakaro ahosiṃ;
জিণ্ণে চ মাতাপিতরো অভারিং, পিযা চ মে সীলৰন্তো অহেসুং।
Jiṇṇe ca mātāpitaro abhāriṃ, piyā ca me sīlavanto ahesuṃ;
অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং॥
Annañca pānañca pasannacitto, sakkacca dānaṃ vipulaṃ adāsiṃ.
১১১৮.
1118.
‘‘তেন মেতাদিসো ৰণ্ণো…পে॰…ৰণ্ণো চ মে সব্বদিসা পভাসতী’’তি॥ –
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
সোপি তস্স ব্যাকাসি। সেসং ৰুত্তনযমেৰ।
Sopi tassa byākāsi. Sesaṃ vuttanayameva.
চিত্তলতাৰিমানৰণ্ণনা নিট্ঠিতা।
Cittalatāvimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ১. চিত্তলতাৰিমানৰত্থু • 1. Cittalatāvimānavatthu
