| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៥. បញ្ចមវគ្គោ
5. Pañcamavaggo
(៤៩) ៧. ចិត្តារម្មណកថា
(49) 7. Cittārammaṇakathā
៤៣៦. ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណន្តិ? អាមន្តា។ ននុ អត្ថិ កោចិ ‘‘សរាគំ ចិត្តំ សរាគំ ចិត្ត’’ន្តិ បជានាតីតិ? អាមន្តា។ ហញ្ចិ អត្ថិ កោចិ ‘‘សរាគំ ចិត្តំ សរាគំ ចិត្ត’’ន្តិ បជានាតិ, នោ ច វត រេ វត្តព្ពេ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ។
436. Cetopariyāye ñāṇaṃ cittārammaṇaññeva na aññārammaṇanti? Āmantā. Nanu atthi koci ‘‘sarāgaṃ cittaṃ sarāgaṃ citta’’nti pajānātīti? Āmantā. Hañci atthi koci ‘‘sarāgaṃ cittaṃ sarāgaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ននុ អត្ថិ កោចិ វីតរាគំ ចិត្តំ…បេ.… សទោសំ ចិត្តំ… វីតទោសំ ចិត្តំ… សមោហំ ចិត្តំ… វីតមោហំ ចិត្តំ… សំខិត្តំ ចិត្តំ… វិក្ខិត្តំ ចិត្តំ… មហគ្គតំ ចិត្តំ… អមហគ្គតំ ចិត្តំ… សឧត្តរំ ចិត្តំ… អនុត្តរំ ចិត្តំ… សមាហិតំ ចិត្តំ… អសមាហិតំ ចិត្តំ… វិមុត្តំ ចិត្តំ…បេ.… អវិមុត្តំ ចិត្តំ ‘‘អវិមុត្តំ ចិត្ត’’ន្តិ បជានាតីតិ? អាមន្តា។ ហញ្ចិ អត្ថិ កោចិ ‘‘អវិមុត្តំ ចិត្តំ អវិមុត្តំ ចិត្ត’’ន្តិ បជានាតិ, នោ ច វត រេ វត្តព្ពេ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ។
Nanu atthi koci vītarāgaṃ cittaṃ…pe… sadosaṃ cittaṃ… vītadosaṃ cittaṃ… samohaṃ cittaṃ… vītamohaṃ cittaṃ… saṃkhittaṃ cittaṃ… vikkhittaṃ cittaṃ… mahaggataṃ cittaṃ… amahaggataṃ cittaṃ… sauttaraṃ cittaṃ… anuttaraṃ cittaṃ… samāhitaṃ cittaṃ… asamāhitaṃ cittaṃ… vimuttaṃ cittaṃ…pe… avimuttaṃ cittaṃ ‘‘avimuttaṃ citta’’nti pajānātīti? Āmantā. Hañci atthi koci ‘‘avimuttaṃ cittaṃ avimuttaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
៤៣៧. ផស្សារម្មណេ ញាណំ វត្តព្ពំ – ‘‘ចេតោបរិយាយេ ញាណ’’ន្តិ? អាមន្តា ។ ហញ្ចិ ផស្សារម្មណេ ញាណំ វត្តព្ពំ ចេតោបរិយាយេ ញាណំ, នោ ច វត រេ វត្តព្ពេ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ។ វេទនារម្មណេ ញាណំ…បេ.… សញ្ញារម្មណេ ញាណំ… ចេតនារម្មណេ ញាណំ… ចិត្តារម្មណេ ញាណំ… សទ្ធារម្មណេ ញាណំ… វីរិយារម្មណេ ញាណំ… សតារម្មណេ ញាណំ… សមាធារម្មណេ ញាណំ… បញ្ញារម្មណេ ញាណំ… រាគារម្មណេ ញាណំ … ទោសារម្មណេ ញាណំ… មោហារម្មណេ ញាណំ…បេ.… អនោត្តប្បារម្មណេ ញាណំ វត្តព្ពំ – ‘‘ចេតោបរិយាយេ ញាណ’’ន្តិ? អាមន្តា។ ហញ្ចិ អនោត្តប្បារម្មណេ ញាណំ វត្តព្ពំ ចេតោបរិយាយេ ញាណំ, នោ ច វត រេ វត្តព្ពេ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ។
437. Phassārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā . Hañci phassārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti. Vedanārammaṇe ñāṇaṃ…pe… saññārammaṇe ñāṇaṃ… cetanārammaṇe ñāṇaṃ… cittārammaṇe ñāṇaṃ… saddhārammaṇe ñāṇaṃ… vīriyārammaṇe ñāṇaṃ… satārammaṇe ñāṇaṃ… samādhārammaṇe ñāṇaṃ… paññārammaṇe ñāṇaṃ… rāgārammaṇe ñāṇaṃ … dosārammaṇe ñāṇaṃ… mohārammaṇe ñāṇaṃ…pe… anottappārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā. Hañci anottappārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ផស្សារម្មណេ ញាណំ ន វត្តព្ពំ – ‘‘ចេតោបរិយាយេ ញាណ’’ន្តិ? អាមន្តា។ ផស្សបរិយាយេ ញាណន្តិ? ន ហេវំ វត្តព្ពេ…បេ.… វេទនារម្មណេ ញាណំ…បេ.… សញ្ញារម្មណេ ញាណំ…បេ.… អនោត្តប្បារម្មណេ ញាណំ ន វត្តព្ពំ – ‘‘ចេតោបរិយាយេ ញាណ’’ន្តិ? អាមន្តា។ អនោត្តប្បបរិយាយេ ញាណន្តិ? ន ហេវំ វត្តព្ពេ…បេ.…។
Phassārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Phassapariyāye ñāṇanti? Na hevaṃ vattabbe…pe… vedanārammaṇe ñāṇaṃ…pe… saññārammaṇe ñāṇaṃ…pe… anottappārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Anottappapariyāye ñāṇanti? Na hevaṃ vattabbe…pe….
៤៣៨. ន វត្តព្ពំ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ? អាមន្តា។ ននុ ចេតោបរិយាយេ ញាណន្តិ? អាមន្តា។ ហញ្ចិ ចេតោបរិយាយេ ញាណំ, តេន វត រេ វត្តព្ពេ – ‘‘ចេតោបរិយាយេ ញាណំ ចិត្តារម្មណញ្ញេវ ន អញ្ញារម្មណ’’ន្តិ។
438. Na vattabbaṃ – ‘‘cetopariyāye ñāṇaṃ cittārammaṇaññeva na aññārammaṇa’’nti? Āmantā. Nanu cetopariyāye ñāṇanti? Āmantā. Hañci cetopariyāye ñāṇaṃ, tena vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ចិត្តារម្មណកថា និដ្ឋិតា។
Cittārammaṇakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៧. ចិត្តារម្មណកថាវណ្ណនា • 7. Cittārammaṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៧. ចិត្តារម្មណកថាវណ្ណនា • 7. Cittārammaṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៧. ចិត្តារម្មណកថាវណ្ណនា • 7. Cittārammaṇakathāvaṇṇanā
