| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
5. පඤ්‌චමවග්‌ගො
5. Pañcamavaggo
(49) 7. චිත්‌තාරම්‌මණකථා
(49) 7. Cittārammaṇakathā
436. චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණන්‌ති? ආමන්‌තා. නනු අත්‌ථි කොචි ‘‘සරාගං චිත්‌තං සරාගං චිත්‌ත’’න්‌ති පජානාතීති? ආමන්‌තා. හඤ්‌චි අත්‌ථි කොචි ‘‘සරාගං චිත්‌තං සරාගං චිත්‌ත’’න්‌ති පජානාති, නො ච වත රෙ වත්‌තබ්‌බෙ – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
436. Cetopariyāye ñāṇaṃ cittārammaṇaññeva na aññārammaṇanti? Āmantā. Nanu atthi koci ‘‘sarāgaṃ cittaṃ sarāgaṃ citta’’nti pajānātīti? Āmantā. Hañci atthi koci ‘‘sarāgaṃ cittaṃ sarāgaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
නනු අත්‌ථි කොචි වීතරාගං චිත්‌තං…පෙ.… සදොසං චිත්‌තං… වීතදොසං චිත්‌තං… සමොහං චිත්‌තං… වීතමොහං චිත්‌තං… සංඛිත්‌තං චිත්‌තං… වික්‌ඛිත්‌තං චිත්‌තං… මහග්‌ගතං චිත්‌තං… අමහග්‌ගතං චිත්‌තං… සඋත්‌තරං චිත්‌තං… අනුත්‌තරං චිත්‌තං… සමාහිතං චිත්‌තං… අසමාහිතං චිත්‌තං… විමුත්‌තං චිත්‌තං…පෙ.… අවිමුත්‌තං චිත්‌තං ‘‘අවිමුත්‌තං චිත්‌ත’’න්‌ති පජානාතීති? ආමන්‌තා. හඤ්‌චි අත්‌ථි කොචි ‘‘අවිමුත්‌තං චිත්‌තං අවිමුත්‌තං චිත්‌ත’’න්‌ති පජානාති, නො ච වත රෙ වත්‌තබ්‌බෙ – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
Nanu atthi koci vītarāgaṃ cittaṃ…pe… sadosaṃ cittaṃ… vītadosaṃ cittaṃ… samohaṃ cittaṃ… vītamohaṃ cittaṃ… saṃkhittaṃ cittaṃ… vikkhittaṃ cittaṃ… mahaggataṃ cittaṃ… amahaggataṃ cittaṃ… sauttaraṃ cittaṃ… anuttaraṃ cittaṃ… samāhitaṃ cittaṃ… asamāhitaṃ cittaṃ… vimuttaṃ cittaṃ…pe… avimuttaṃ cittaṃ ‘‘avimuttaṃ citta’’nti pajānātīti? Āmantā. Hañci atthi koci ‘‘avimuttaṃ cittaṃ avimuttaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
437. ඵස්‌සාරම්‌මණෙ ඤාණං වත්‌තබ්‌බං – ‘‘චෙතොපරියායෙ ඤාණ’’න්‌ති? ආමන්‌තා . හඤ්‌චි ඵස්‌සාරම්‌මණෙ ඤාණං වත්‌තබ්‌බං චෙතොපරියායෙ ඤාණං, නො ච වත රෙ වත්‌තබ්‌බෙ – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති. වෙදනාරම්‌මණෙ ඤාණං…පෙ.… සඤ්‌ඤාරම්‌මණෙ ඤාණං… චෙතනාරම්‌මණෙ ඤාණං… චිත්‌තාරම්‌මණෙ ඤාණං… සද්‌ධාරම්‌මණෙ ඤාණං… වීරියාරම්‌මණෙ ඤාණං… සතාරම්‌මණෙ ඤාණං… සමාධාරම්‌මණෙ ඤාණං… පඤ්‌ඤාරම්‌මණෙ ඤාණං… රාගාරම්‌මණෙ ඤාණං … දොසාරම්‌මණෙ ඤාණං… මොහාරම්‌මණෙ ඤාණං…පෙ.… අනොත්‌තප්‌පාරම්‌මණෙ ඤාණං වත්‌තබ්‌බං – ‘‘චෙතොපරියායෙ ඤාණ’’න්‌ති? ආමන්‌තා. හඤ්‌චි අනොත්‌තප්‌පාරම්‌මණෙ ඤාණං වත්‌තබ්‌බං චෙතොපරියායෙ ඤාණං, නො ච වත රෙ වත්‌තබ්‌බෙ – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
437. Phassārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā . Hañci phassārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti. Vedanārammaṇe ñāṇaṃ…pe… saññārammaṇe ñāṇaṃ… cetanārammaṇe ñāṇaṃ… cittārammaṇe ñāṇaṃ… saddhārammaṇe ñāṇaṃ… vīriyārammaṇe ñāṇaṃ… satārammaṇe ñāṇaṃ… samādhārammaṇe ñāṇaṃ… paññārammaṇe ñāṇaṃ… rāgārammaṇe ñāṇaṃ … dosārammaṇe ñāṇaṃ… mohārammaṇe ñāṇaṃ…pe… anottappārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā. Hañci anottappārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ඵස්‌සාරම්‌මණෙ ඤාණං න වත්‌තබ්‌බං – ‘‘චෙතොපරියායෙ ඤාණ’’න්‌ති? ආමන්‌තා. ඵස්‌සපරියායෙ ඤාණන්‌ති? න හෙවං වත්‌තබ්‌බෙ…පෙ.… වෙදනාරම්‌මණෙ ඤාණං…පෙ.… සඤ්‌ඤාරම්‌මණෙ ඤාණං…පෙ.… අනොත්‌තප්‌පාරම්‌මණෙ ඤාණං න වත්‌තබ්‌බං – ‘‘චෙතොපරියායෙ ඤාණ’’න්‌ති? ආමන්‌තා. අනොත්‌තප්‌පපරියායෙ ඤාණන්‌ති? න හෙවං වත්‌තබ්‌බෙ…පෙ.….
Phassārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Phassapariyāye ñāṇanti? Na hevaṃ vattabbe…pe… vedanārammaṇe ñāṇaṃ…pe… saññārammaṇe ñāṇaṃ…pe… anottappārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Anottappapariyāye ñāṇanti? Na hevaṃ vattabbe…pe….
438. න වත්‌තබ්‌බං – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති? ආමන්‌තා. නනු චෙතොපරියායෙ ඤාණන්‌ති? ආමන්‌තා. හඤ්‌චි චෙතොපරියායෙ ඤාණං, තෙන වත රෙ වත්‌තබ්‌බෙ – ‘‘චෙතොපරියායෙ ඤාණං චිත්‌තාරම්‌මණඤ්‌ඤෙව න අඤ්‌ඤාරම්‌මණ’’න්‌ති.
438. Na vattabbaṃ – ‘‘cetopariyāye ñāṇaṃ cittārammaṇaññeva na aññārammaṇa’’nti? Āmantā. Nanu cetopariyāye ñāṇanti? Āmantā. Hañci cetopariyāye ñāṇaṃ, tena vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
චිත්‌තාරම්‌මණකථා නිට්‌ඨිතා.
Cittārammaṇakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 7. චිත්‌තාරම්‌මණකථාවණ්‌ණනා • 7. Cittārammaṇakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. චිත්‌තාරම්‌මණකථාවණ්‌ණනා • 7. Cittārammaṇakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. චිත්‌තාරම්‌මණකථාවණ්‌ණනා • 7. Cittārammaṇakathāvaṇṇanā
