| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၇. စိတ္တာရမ္မဏကထာဝဏ္ဏနာ
7. Cittārammaṇakathāvaṇṇanā
၄၃၆-၄၃၈. ဣဒာနိ စိတ္တာရမ္မဏကထာ နာမ ဟောတိ။ တတ္ထ စေတောပရိယာယေ ဉာဏန္တိ ဝစနမတ္တမေဝ ဂဟေတ္ဝာ ‘‘တံ ဉာဏံ စိတ္တာရမ္မဏမေဝာ’’တိ ယေသံ လဒ္ဓိ, သေယ္ယထာပိ ဧတရဟိ အန္ဓကာနံ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ အထသ္သ ‘‘ယော သရာဂာဒိဝသေန စိတ္တံ ဇာနာတိ, တသ္သ ရာဂာဒယောပိ အာရမ္မဏာ ဟောန္တိ, တသ္မာ န ဝတ္တဗ္ဗံ တံ စိတ္တာရမ္မဏညေဝာ’’တိ စောဒနတ္ထံ နနု အတ္ထိ ကောစီတိအာဒိ အာရဒ္ဓံ။ ဖသ္သာရမ္မဏေတိ ဖသ္သသင္ခာတေ အာရမ္မဏေ။ ဝေဒနာရမ္မဏေတိအာဒီသုပိ ဧသေဝ နယော။ ပုန ဖသ္သာရမ္မဏေ ဉာဏံ န ဝတ္တဗ္ဗန္တိ ပုဋ္ဌော ဖသ္သသ္သ ဖုသနလက္ခဏံ မနသိကရောတော ဖသ္သောဝာရမ္မဏံ ဟောတီတိ ပဋိဇာနာတိ။ ကိံ ပနေတံ ဖသ္သပရိယာယေ ဉာဏန္တိ ပုဋ္ဌော ပန တာဒိသသ္သ သုတ္တပဒသ္သ အဘာဝာ ပဋိက္ခိပတိ။ ဝေဒနာဒီသုပိ ဧသေဝ နယော။ ဣဒာနိ ယံ နိသ္သာယ လဒ္ဓိ, တဒေဝ ဒသ္သေတ္ဝာ လဒ္ဓိံ ပတိဋ္ဌာပေတုံ နနု စေတောပရိယာယေ ဉာဏန္တိအာဒိမာဟ။ သာ ပနေသာ ဝစနမတ္တာဘိနိဝေသေန ပတိဋ္ဌာပိတာပိ အပ္ပတိဋ္ဌာပိတာဝ ဟောတီတိ။
436-438. Idāni cittārammaṇakathā nāma hoti. Tattha cetopariyāye ñāṇanti vacanamattameva gahetvā ‘‘taṃ ñāṇaṃ cittārammaṇamevā’’ti yesaṃ laddhi, seyyathāpi etarahi andhakānaṃ; te sandhāya pucchā sakavādissa, paṭiññā itarassa. Athassa ‘‘yo sarāgādivasena cittaṃ jānāti, tassa rāgādayopi ārammaṇā honti, tasmā na vattabbaṃ taṃ cittārammaṇaññevā’’ti codanatthaṃ nanu atthi kocītiādi āraddhaṃ. Phassārammaṇeti phassasaṅkhāte ārammaṇe. Vedanārammaṇetiādīsupi eseva nayo. Puna phassārammaṇe ñāṇaṃ na vattabbanti puṭṭho phassassa phusanalakkhaṇaṃ manasikaroto phassovārammaṇaṃ hotīti paṭijānāti. Kiṃ panetaṃ phassapariyāye ñāṇanti puṭṭho pana tādisassa suttapadassa abhāvā paṭikkhipati. Vedanādīsupi eseva nayo. Idāni yaṃ nissāya laddhi, tadeva dassetvā laddhiṃ patiṭṭhāpetuṃ nanu cetopariyāye ñāṇantiādimāha. Sā panesā vacanamattābhinivesena patiṭṭhāpitāpi appatiṭṭhāpitāva hotīti.
စိတ္တာရမ္မဏကထာဝဏ္ဏနာ။
Cittārammaṇakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၄၉) ၇. စိတ္တာရမ္မဏကထာ • (49) 7. Cittārammaṇakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၇. စိတ္တာရမ္မဏကထာဝဏ္ဏနာ • 7. Cittārammaṇakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. စိတ္တာရမ္မဏကထာဝဏ္ဏနာ • 7. Cittārammaṇakathāvaṇṇanā
