| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༧. ཙིཏྟཱརམྨཎཀཐཱཝཎྞནཱ
7. Cittārammaṇakathāvaṇṇanā
༤༣༦-༤༣༨. ཨིདཱནི ཙིཏྟཱརམྨཎཀཐཱ ནཱམ ཧོཏི། ཏཏྠ ཙེཏོཔརིཡཱཡེ ཉཱཎནྟི ཝཙནམཏྟམེཝ གཧེཏྭཱ ‘‘ཏཾ ཉཱཎཾ ཙིཏྟཱརམྨཎམེཝཱ’’ཏི ཡེསཾ ལདྡྷི, སེཡྻཐཱཔི ཨེཏརཧི ཨནྡྷཀཱནཾ; ཏེ སནྡྷཱཡ པུཙྪཱ སཀཝཱདིསྶ, པཊིཉྙཱ ཨིཏརསྶ། ཨཐསྶ ‘‘ཡོ སརཱགཱདིཝསེན ཙིཏྟཾ ཛཱནཱཏི, ཏསྶ རཱགཱདཡོཔི ཨཱརམྨཎཱ ཧོནྟི, ཏསྨཱ ན ཝཏྟབྦཾ ཏཾ ཙིཏྟཱརམྨཎཉྙེཝཱ’’ཏི ཙོདནཏྠཾ ནནུ ཨཏྠི ཀོཙཱིཏིཨཱདི ཨཱརདྡྷཾ། ཕསྶཱརམྨཎེཏི ཕསྶསངྑཱཏེ ཨཱརམྨཎེ། ཝེདནཱརམྨཎེཏིཨཱདཱིསུཔི ཨེསེཝ ནཡོ། པུན ཕསྶཱརམྨཎེ ཉཱཎཾ ན ཝཏྟབྦནྟི པུཊྛོ ཕསྶསྶ ཕུསནལཀྑཎཾ མནསིཀརོཏོ ཕསྶོཝཱརམྨཎཾ ཧོཏཱིཏི པཊིཛཱནཱཏི། ཀིཾ པནེཏཾ ཕསྶཔརིཡཱཡེ ཉཱཎནྟི པུཊྛོ པན ཏཱདིསསྶ སུཏྟཔདསྶ ཨབྷཱཝཱ པཊིཀྑིཔཏི། ཝེདནཱདཱིསུཔི ཨེསེཝ ནཡོ། ཨིདཱནི ཡཾ ནིསྶཱཡ ལདྡྷི, ཏདེཝ དསྶེཏྭཱ ལདྡྷིཾ པཏིཊྛཱཔེཏུཾ ནནུ ཙེཏོཔརིཡཱཡེ ཉཱཎནྟིཨཱདིམཱཧ། སཱ པནེསཱ ཝཙནམཏྟཱབྷིནིཝེསེན པཏིཊྛཱཔིཏཱཔི ཨཔྤཏིཊྛཱཔིཏཱཝ ཧོཏཱིཏི།
436-438. Idāni cittārammaṇakathā nāma hoti. Tattha cetopariyāye ñāṇanti vacanamattameva gahetvā ‘‘taṃ ñāṇaṃ cittārammaṇamevā’’ti yesaṃ laddhi, seyyathāpi etarahi andhakānaṃ; te sandhāya pucchā sakavādissa, paṭiññā itarassa. Athassa ‘‘yo sarāgādivasena cittaṃ jānāti, tassa rāgādayopi ārammaṇā honti, tasmā na vattabbaṃ taṃ cittārammaṇaññevā’’ti codanatthaṃ nanu atthi kocītiādi āraddhaṃ. Phassārammaṇeti phassasaṅkhāte ārammaṇe. Vedanārammaṇetiādīsupi eseva nayo. Puna phassārammaṇe ñāṇaṃ na vattabbanti puṭṭho phassassa phusanalakkhaṇaṃ manasikaroto phassovārammaṇaṃ hotīti paṭijānāti. Kiṃ panetaṃ phassapariyāye ñāṇanti puṭṭho pana tādisassa suttapadassa abhāvā paṭikkhipati. Vedanādīsupi eseva nayo. Idāni yaṃ nissāya laddhi, tadeva dassetvā laddhiṃ patiṭṭhāpetuṃ nanu cetopariyāye ñāṇantiādimāha. Sā panesā vacanamattābhinivesena patiṭṭhāpitāpi appatiṭṭhāpitāva hotīti.
ཙིཏྟཱརམྨཎཀཐཱཝཎྞནཱ།
Cittārammaṇakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༤༩) ༧. ཙིཏྟཱརམྨཎཀཐཱ • (49) 7. Cittārammaṇakathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༧. ཙིཏྟཱརམྨཎཀཐཱཝཎྞནཱ • 7. Cittārammaṇakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. ཙིཏྟཱརམྨཎཀཐཱཝཎྞནཱ • 7. Cittārammaṇakathāvaṇṇanā
