| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[498] 2. жид̇д̇асамбхууд̇аж̇аад̇агаван̣н̣анаа
[498] 2. Cittasambhūtajātakavaṇṇanā
саб̣б̣ам̣ нараанам̣ сапалам̣ сужин̣н̣анд̇и ид̣̇ам̣ сад̇т̇аа ж̇зд̇аванз вихаранд̇о ааяасмад̇о махаагассабасса бияасам̣ваасз д̣̇вз сад̣̇д̇хивихааригз бхигкуу аараб̣бха гат̇зси. д̇з гира ан̃н̃аман̃н̃ам̣ аббадивибхад̇д̇абхог̇аа барамависсаасигаа ахзсум̣, бин̣д̣ааяа жаранд̇ааби згад̇ова г̇ажчанд̇и, згад̇ова ааг̇ажчанд̇и, винаа бхавид̇ум̣ на саггонд̇и. д̇хаммасабхааяам̣ бхигкуу д̇зсам̣язва виссаасам̣ ван̣н̣аяамаанаа нисийд̣̇им̣су. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘анажчарияам̣, бхигкавз, имзсам̣ згасмим̣ ад̇д̇абхаавз виссаасигад̇д̇ам̣, бораан̣агабан̣д̣ид̇аа д̇ийн̣и жад̇д̇аари бхаванд̇араани г̇ажчанд̇ааби мид̇д̇абхаавам̣ на виж̇ахим̣суязваа’’д̇и вад̇ваа ад̇ийд̇ам̣ аахари.
Sabbaṃ narānaṃ saphalaṃ suciṇṇanti idaṃ satthā jetavane viharanto āyasmato mahākassapassa piyasaṃvāse dve saddhivihārike bhikkhū ārabbha kathesi. Te kira aññamaññaṃ appaṭivibhattabhogā paramavissāsikā ahesuṃ, piṇḍāya carantāpi ekatova gacchanti, ekatova āgacchanti, vinā bhavituṃ na sakkonti. Dhammasabhāyaṃ bhikkhū tesaṃyeva vissāsaṃ vaṇṇayamānā nisīdiṃsu. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘anacchariyaṃ, bhikkhave, imesaṃ ekasmiṃ attabhāve vissāsikattaṃ, porāṇakapaṇḍitā tīṇi cattāri bhavantarāni gacchantāpi mittabhāvaṃ na vijahiṃsuyevā’’ti vatvā atītaṃ āhari.
ад̇ийд̇з аванд̇ирадтз уж̇ж̇знияам̣ аванд̇имахаарааж̇аа наама раж̇ж̇ам̣ гаарзси. д̇ад̣̇аа уж̇ж̇знияаа б̣ахи жан̣д̣аалаг̇аамаго ахоси. махаасад̇д̇о д̇ад̇т̇а ниб̣б̣ад̇д̇и, абароби сад̇д̇о д̇ассзва маад̇ужчаабуд̇д̇о худ̇ваа ниб̣б̣ад̇д̇и. д̇зсу зго жид̇д̇о наама ахоси, зго самбхууд̇о наама. д̇з убхоби ваяаббад̇д̇аа жан̣д̣аалавам̣сад̇хованам̣ наама сиббам̣ уг̇г̇ан̣хид̇ваа згад̣̇ивасам̣ ‘‘уж̇ж̇знийнаг̇арад̣̇ваарз сиббам̣ д̣̇ассзссаамаа’’д̇и зго уд̇д̇арад̣̇ваарз сиббам̣ д̣̇ассзси, зго баажийнад̣̇ваарз. д̇асмин̃жа наг̇арз д̣̇вз д̣̇идтаман̇г̇алигааяо ахзсум̣, згаа сздтид̇хийд̇аа, згаа бурохид̇ад̇хийд̇аа. д̇аа б̣ахукаад̣̇анийяабхож̇анийяамаалааг̇анд̇хаад̣̇ийни г̇аахаабзд̇ваа ‘‘уяяаанагийл̣ам̣ гийл̣иссаамаа’’д̇и згаа уд̇д̇арад̣̇ваарзна нигками, згаа баажийнад̣̇ваарзна. д̇аа д̇з жан̣д̣аалабуд̇д̇з сиббам̣ д̣̇ассзнд̇з д̣̇исваа ‘‘гз зд̇з’’д̇и бужчид̇ваа ‘‘жан̣д̣аалабуд̇д̇аа’’д̇и суд̇ваа ‘‘абассид̇аб̣б̣аяуд̇д̇агам̣ вад̇а бассимхаа’’д̇и г̇анд̇ход̣̇агзна агкийни д̇ховид̇ваа нивад̇д̇им̣су. махааж̇ано ‘‘арз д̣̇удтажан̣д̣аала, д̇умхз ниссааяа маяам̣ амуулагаани сураабхад̇д̇аад̣̇ийни на лабхимхаа’’д̇и д̇з убхоби бхаад̇игз бот̇зд̇ваа анаяаб̣яасанам̣ баабзси.
Atīte avantiraṭṭhe ujjeniyaṃ avantimahārājā nāma rajjaṃ kāresi. Tadā ujjeniyā bahi caṇḍālagāmako ahosi. Mahāsatto tattha nibbatti, aparopi satto tasseva mātucchāputto hutvā nibbatti. Tesu eko citto nāma ahosi, eko sambhūto nāma. Te ubhopi vayappattā caṇḍālavaṃsadhovanaṃ nāma sippaṃ uggaṇhitvā ekadivasaṃ ‘‘ujjenīnagaradvāre sippaṃ dassessāmā’’ti eko uttaradvāre sippaṃ dassesi, eko pācīnadvāre. Tasmiñca nagare dve diṭṭhamaṅgalikāyo ahesuṃ, ekā seṭṭhidhītā, ekā purohitadhītā. Tā bahukhādanīyabhojanīyamālāgandhādīni gāhāpetvā ‘‘uyyānakīḷaṃ kīḷissāmā’’ti ekā uttaradvārena nikkhami, ekā pācīnadvārena. Tā te caṇḍālaputte sippaṃ dassente disvā ‘‘ke ete’’ti pucchitvā ‘‘caṇḍālaputtā’’ti sutvā ‘‘apassitabbayuttakaṃ vata passimhā’’ti gandhodakena akkhīni dhovitvā nivattiṃsu. Mahājano ‘‘are duṭṭhacaṇḍāla, tumhe nissāya mayaṃ amūlakāni surābhattādīni na labhimhā’’ti te ubhopi bhātike pothetvā anayabyasanaṃ pāpesi.
д̇з бадилад̣̇д̇хасан̃н̃аа удтааяа ан̃н̃аман̃н̃асса санд̇игам̣ г̇ажчанд̇аа згасмим̣ таанз самааг̇анд̇ваа ан̃н̃аман̃н̃асса д̇ам̣ д̣̇угкуббад̇д̇им̣ аарожзд̇ваа род̣̇ид̇ваа барид̣̇звид̇ваа ‘‘гинд̇и гариссаамаа’’д̇и манд̇зд̇ваа ‘‘имам̣ амхаагам̣ ж̇аад̇им̣ ниссааяа д̣̇угкам̣ уббаннам̣, жан̣д̣аалагаммам̣ гаад̇ум̣ на сагкиссаама, ж̇аад̇им̣ бадижчаад̣̇зд̇ваа б̣раахман̣амаан̣ававан̣н̣зна д̇аггасилам̣ г̇анд̇ваа сиббам̣ уг̇г̇ан̣хиссаамаа’’д̇и саннидтаанам̣ гад̇ваа д̇ад̇т̇а г̇анд̇ваа д̇хамманд̇зваасигаа худ̇ваа д̣̇исаабаамогкаажарияасса санд̇игз сиббам̣ бадтабзсум̣. ж̇амб̣уд̣̇ийбад̇алз ‘‘д̣̇вз гира жан̣д̣аалаа ж̇аад̇им̣ бадижчаад̣̇зд̇ваа сиббам̣ уг̇г̇ан̣ханд̇ий’’д̇и сууяид̇т̇а. д̇зсу жид̇д̇абан̣д̣ид̇асса сиббам̣ нидтид̇ам̣, самбхууд̇асса на д̇аава нидтаад̇и.
Te paṭiladdhasaññā uṭṭhāya aññamaññassa santikaṃ gacchantā ekasmiṃ ṭhāne samāgantvā aññamaññassa taṃ dukkhuppattiṃ ārocetvā roditvā paridevitvā ‘‘kinti karissāmā’’ti mantetvā ‘‘imaṃ amhākaṃ jātiṃ nissāya dukkhaṃ uppannaṃ, caṇḍālakammaṃ kātuṃ na sakkhissāma, jātiṃ paṭicchādetvā brāhmaṇamāṇavavaṇṇena takkasilaṃ gantvā sippaṃ uggaṇhissāmā’’ti sanniṭṭhānaṃ katvā tattha gantvā dhammantevāsikā hutvā disāpāmokkhācariyassa santike sippaṃ paṭṭhapesuṃ. Jambudīpatale ‘‘dve kira caṇḍālā jātiṃ paṭicchādetvā sippaṃ uggaṇhantī’’ti sūyittha. Tesu cittapaṇḍitassa sippaṃ niṭṭhitaṃ, sambhūtassa na tāva niṭṭhāti.
ат̇згад̣̇ивасам̣ зго г̇аамаваасий ‘‘б̣раахман̣аваажанагам̣ гариссаамий’’д̇и аажарияам̣ ниманд̇зси. д̇амзва рад̇д̇им̣ д̣̇зво вассид̇ваа маг̇г̇з ганд̣̇араад̣̇ийни буурзси. аажарияо баад̇ова жид̇д̇абан̣д̣ид̇ам̣ баггосаабзд̇ваа ‘‘д̇аад̇а, ахам̣ г̇анд̇ум̣ на сагкиссаами, д̇вам̣ маан̣авзхи сад̣̇д̇хим̣ г̇анд̇аа ман̇г̇алам̣ вад̇ваа д̇умхзхи лад̣̇д̇хам̣ бхун̃ж̇ид̇ваа амхзхи лад̣̇д̇хам̣ аахараа’’д̇и бзсзси. со ‘‘саад̇хуу’’д̇и маан̣авагз г̇ахзд̇ваа г̇ад̇о. яаава маан̣аваа нхааяанд̇и жзва мукаани жа д̇хованд̇и, д̇аава мануссаа бааяаасам̣ вад̣дхзд̇ваа ниб̣б̣аад̇ууд̇и табзсум̣. маан̣аваа д̇асмим̣ аниб̣б̣уд̇зязва ааг̇анд̇ваа нисийд̣̇им̣су. мануссаа д̣̇агкин̣од̣̇агам̣ д̣̇ад̇ваа д̇зсам̣ бурад̇о баад̇ияо табзсум̣. самбхууд̇о луд̣̇д̇хад̇хаад̇уго вияа худ̇ваа ‘‘сийд̇ало’’д̇и сан̃н̃ааяа бааяаасабин̣д̣ам̣ угкибид̇ваа мукз табзси, со д̇асса аад̣̇ид̇д̇ааяог̇ул̣о вияа мукам̣ д̣̇ахи. со гамбамаано сад̇им̣ анубадтаабзд̇ваа жид̇д̇абан̣д̣ид̇ам̣ ологзд̇ваа жан̣д̣аалабхаасааяа зва ‘‘кал̣у кал̣уу’’д̇и ааха . соби д̇ат̇зва сад̇им̣ анубадтаабзд̇ваа жан̣д̣аалабхаасааяа зва ‘‘ниг̇г̇ала ниг̇г̇алаа’’д̇и ааха. маан̣аваа ан̃н̃аман̃н̃ам̣ ологзд̇ваа ‘‘гим̣ бхаасаа наамзсаа’’д̇и вад̣̇им̣су. жид̇д̇абан̣д̣ид̇о ман̇г̇алам̣ абхааси. маан̣аваа б̣ахи нигкамид̇ваа ваг̇г̇аваг̇г̇аа худ̇ваа д̇ад̇т̇а д̇ад̇т̇а нисийд̣̇ид̇ваа бхаасам̣ сод̇хзнд̇аа ‘‘жан̣д̣аалабхаасаа’’д̇и н̃ад̇ваа ‘‘арз д̣̇удтажан̣д̣аалаа, зд̇д̇агам̣ гаалам̣ ‘б̣раахман̣аамхаа’д̇и вад̇ваа ван̃жаяид̇т̇аа’’д̇и убхоби д̇з бот̇аяим̣су. ат̇зго саббурисо ‘‘абзт̇аа’’д̇и ваарзд̇ваа ‘‘аяам̣ д̇умхаагам̣ ж̇аад̇ияаа д̣̇осо, г̇ажчат̇а гад̇т̇ажи д̣̇зсзва баб̣б̣аж̇ид̇ваа ж̇ийват̇аа’’д̇и д̇з убхо уяяож̇зси. маан̣аваа д̇зсам̣ жан̣д̣аалабхаавам̣ аажарияасса аарожзсум̣.
Athekadivasaṃ eko gāmavāsī ‘‘brāhmaṇavācanakaṃ karissāmī’’ti ācariyaṃ nimantesi. Tameva rattiṃ devo vassitvā magge kandarādīni pūresi. Ācariyo pātova cittapaṇḍitaṃ pakkosāpetvā ‘‘tāta, ahaṃ gantuṃ na sakkhissāmi, tvaṃ māṇavehi saddhiṃ gantā maṅgalaṃ vatvā tumhehi laddhaṃ bhuñjitvā amhehi laddhaṃ āharā’’ti pesesi. So ‘‘sādhū’’ti māṇavake gahetvā gato. Yāva māṇavā nhāyanti ceva mukhāni ca dhovanti, tāva manussā pāyāsaṃ vaḍḍhetvā nibbātūti ṭhapesuṃ. Māṇavā tasmiṃ anibbuteyeva āgantvā nisīdiṃsu. Manussā dakkhiṇodakaṃ datvā tesaṃ purato pātiyo ṭhapesuṃ. Sambhūto luddhadhātuko viya hutvā ‘‘sītalo’’ti saññāya pāyāsapiṇḍaṃ ukkhipitvā mukhe ṭhapesi, so tassa ādittaayoguḷo viya mukhaṃ dahi. So kampamāno satiṃ anupaṭṭhāpetvā cittapaṇḍitaṃ oloketvā caṇḍālabhāsāya eva ‘‘khaḷu khaḷū’’ti āha . Sopi tatheva satiṃ anupaṭṭhāpetvā caṇḍālabhāsāya eva ‘‘niggala niggalā’’ti āha. Māṇavā aññamaññaṃ oloketvā ‘‘kiṃ bhāsā nāmesā’’ti vadiṃsu. Cittapaṇḍito maṅgalaṃ abhāsi. Māṇavā bahi nikkhamitvā vaggavaggā hutvā tattha tattha nisīditvā bhāsaṃ sodhentā ‘‘caṇḍālabhāsā’’ti ñatvā ‘‘are duṭṭhacaṇḍālā, ettakaṃ kālaṃ ‘brāhmaṇāmhā’ti vatvā vañcayitthā’’ti ubhopi te pothayiṃsu. Atheko sappuriso ‘‘apethā’’ti vāretvā ‘‘ayaṃ tumhākaṃ jātiyā doso, gacchatha katthaci deseva pabbajitvā jīvathā’’ti te ubho uyyojesi. Māṇavā tesaṃ caṇḍālabhāvaṃ ācariyassa ārocesuṃ.
д̇зби аран̃н̃ам̣ бависид̇ваа исибаб̣б̣аж̇ж̇ам̣ баб̣б̣аж̇ид̇ваа на жирассзва д̇ад̇о жавид̇ваа нзран̃ж̇арааяа д̇ийрз миг̇ияаа гужчисмим̣ ниб̣б̣ад̇д̇им̣су. д̇з маад̇угужчид̇о нигканд̇агаалад̇о бадтааяа згад̇ова вижаранд̇и, винаа бхавид̇ум̣ на саггонд̇и. д̇з згад̣̇ивасам̣ г̇ожарам̣ г̇ахзд̇ваа згасмим̣ ругкамуулз сийсзна сийсам̣, син̇г̇зна син̇г̇ам̣, д̇ун̣д̣зна д̇ун̣д̣ам̣ аллийяаабзд̇ваа романт̇аяамаанз тид̇з д̣̇исваа зго луд̣̇д̣̇аго сад̇д̇им̣ кибид̇ваа згаббахаарзнзва ж̇ийвид̇аа воробзси. д̇ад̇о жавид̇ваа наммад̣̇аанад̣̇ийд̇ийрз уггусаяонияам̣ ниб̣б̣ад̇д̇им̣су. д̇ад̇рааби вуд̣̇д̇хиббад̇д̇з г̇ожарам̣ г̇ахзд̇ваа сийсзна сийсам̣, д̇ун̣д̣зна д̇ун̣д̣ам̣ аллийяаабзд̇ваа тид̇з д̣̇исваа зго яадтилуд̣̇д̣̇аго згаббахаарзнзва б̣анд̇хид̇ваа вад̇хи. д̇ад̇о бана жавид̇ваа жид̇д̇абан̣д̣ид̇о госамб̣ияам̣ бурохид̇асса буд̇д̇о худ̇ваа ниб̣б̣ад̇д̇и. самбхууд̇абан̣д̣ид̇о уд̇д̇арабан̃жааларан̃н̃о буд̇д̇о худ̇ваа ниб̣б̣ад̇д̇и. д̇з наамаг̇г̇ахан̣ад̣̇ивасад̇о бадтааяа ад̇д̇ано ж̇аад̇им̣ ануссарим̣су. д̇зсу самбхууд̇абан̣д̣ид̇о ниранд̇арам̣ сарид̇ум̣ асаггонд̇о жад̇уд̇т̇ам̣ жан̣д̣аалаж̇аад̇имзва ануссарад̇и, жид̇д̇абан̣д̣ид̇о бадибаадияаа жад̇ассоби ж̇аад̇ияо. со сол̣асавассагаалз нигкамид̇ваа химаванд̇ам̣ бависид̇ваа исибаб̣б̣аж̇ж̇ам̣ баб̣б̣аж̇ид̇ваа жхаанаабхин̃н̃ам̣ ниб̣б̣ад̇д̇зд̇ваа жхаанасукзна вийд̇инаамзнд̇о васи. самбхууд̇абан̣д̣ид̇оби бид̇у ажжаязна чад̇д̇ам̣ уссаабзд̇ваа чад̇д̇аман̇г̇алад̣̇ивасзязва махааж̇анамаж̇жхз ман̇г̇алаг̇ийд̇ам̣ гад̇ваа уд̣̇аанавасзна д̣̇вз г̇аат̇аа абхааси. д̇ам̣ суд̇ваа ‘‘амхаагам̣ ран̃н̃о ман̇г̇алаг̇ийд̇а’’нд̇и ород̇хааби г̇анд̇хаб̣б̣ааби д̇амзва г̇ийд̇ам̣ г̇ааяанд̇и. ануггамзнзва ‘‘ран̃н̃о бияаг̇ийд̇а’’нд̇и саб̣б̣зби наг̇араваасино мануссаа д̇амзва г̇ааяанд̇и.
Tepi araññaṃ pavisitvā isipabbajjaṃ pabbajitvā na cirasseva tato cavitvā nerañjarāya tīre migiyā kucchismiṃ nibbattiṃsu. Te mātukucchito nikkhantakālato paṭṭhāya ekatova vicaranti, vinā bhavituṃ na sakkonti. Te ekadivasaṃ gocaraṃ gahetvā ekasmiṃ rukkhamūle sīsena sīsaṃ, siṅgena siṅgaṃ, tuṇḍena tuṇḍaṃ allīyāpetvā romanthayamāne ṭhite disvā eko luddako sattiṃ khipitvā ekappahāreneva jīvitā voropesi. Tato cavitvā nammadānadītīre ukkusayoniyaṃ nibbattiṃsu. Tatrāpi vuddhippatte gocaraṃ gahetvā sīsena sīsaṃ, tuṇḍena tuṇḍaṃ allīyāpetvā ṭhite disvā eko yaṭṭhiluddako ekappahāreneva bandhitvā vadhi. Tato pana cavitvā cittapaṇḍito kosambiyaṃ purohitassa putto hutvā nibbatti. Sambhūtapaṇḍito uttarapañcālarañño putto hutvā nibbatti. Te nāmaggahaṇadivasato paṭṭhāya attano jātiṃ anussariṃsu. Tesu sambhūtapaṇḍito nirantaraṃ sarituṃ asakkonto catutthaṃ caṇḍālajātimeva anussarati, cittapaṇḍito paṭipāṭiyā catassopi jātiyo. So soḷasavassakāle nikkhamitvā himavantaṃ pavisitvā isipabbajjaṃ pabbajitvā jhānābhiññaṃ nibbattetvā jhānasukhena vītināmento vasi. Sambhūtapaṇḍitopi pitu accayena chattaṃ ussāpetvā chattamaṅgaladivaseyeva mahājanamajjhe maṅgalagītaṃ katvā udānavasena dve gāthā abhāsi. Taṃ sutvā ‘‘amhākaṃ rañño maṅgalagīta’’nti orodhāpi gandhabbāpi tameva gītaṃ gāyanti. Anukkameneva ‘‘rañño piyagīta’’nti sabbepi nagaravāsino manussā tameva gāyanti.
жид̇д̇абан̣д̣ид̇оби химаванд̇абад̣̇зсз васанд̇оязва ‘‘гим̣ ну ко мама бхаад̇игзна самбхууд̇зна чад̇д̇ам̣ лад̣̇д̇хам̣, уд̣̇ааху на ваа’’д̇и убад̇хаарзнд̇о лад̣̇д̇хабхаавам̣ н̃ад̇ваа ‘‘навараж̇ж̇ам̣ д̇аава ид̣̇аани г̇анд̇вааби б̣од̇хзд̇ум̣ на сагкиссаами, махаллагагаалз нам̣ убасан̇гамид̇ваа д̇хаммам̣ гат̇зд̇ваа баб̣б̣ааж̇зссаамий’’д̇и жинд̇зд̇ваа бан̣н̣ааса вассаани аг̇анд̇ваа ран̃н̃о буд̇д̇ад̇хийд̇аахи вад̣дхид̇агаалз ид̣̇д̇хияаа г̇анд̇ваа уяяаанз од̇арид̇ваа ман̇г̇аласилаабаддз суван̣н̣абадимаа вияа нисийд̣̇и. д̇асмим̣ кан̣з зго д̣̇аараго д̇ам̣ г̇ийд̇ам̣ г̇ааяанд̇о д̣̇аарууни уд̣̇д̇харад̇и. жид̇д̇абан̣д̣ид̇о д̇ам̣ баггоси. со ааг̇анд̇ваа ванд̣̇ид̇ваа адтааси. ат̇а нам̣ ааха – ‘‘д̇вам̣ баад̇ова бадтааяа имамзва г̇ийд̇ам̣ г̇ааяаси, гим̣ ан̃н̃ам̣ на ж̇аанаасий’’д̇и. ‘‘бханд̇з, ан̃н̃ааниби б̣ахууни ж̇аанаами, имаани бана д̣̇вз ран̃н̃о бияаг̇ийд̇аани, д̇асмаа имаанзва г̇ааяаамий’’д̇и. ‘‘ад̇т̇и бана ран̃н̃о г̇ийд̇асса бадиг̇ийд̇ам̣ г̇ааяанд̇о’’д̇и? ‘‘над̇т̇и бханд̇з’’д̇и. ‘‘сагкиссаси бана д̇вам̣ бадиг̇ийд̇ам̣ г̇ааяид̇у’’нд̇и? ‘‘ж̇аананд̇о сагкиссаамий’’д̇и. ‘‘д̇зна хи д̇вам̣ ран̃н̃аа д̣̇вийсу г̇ийд̇зсу г̇ааяид̇зсу ид̣̇ам̣ д̇ад̇ияам̣ гад̇ваа г̇ааяассуу’’д̇и г̇ийд̇ам̣д̣̇ад̇ваа ‘‘г̇анд̇ваа ран̃н̃о санд̇игз г̇ааяиссаси, рааж̇аа д̇з басийд̣̇ид̇ваа маханд̇ам̣ иссарияам̣ д̣̇ассад̇ий’’д̇и уяяож̇зси.
Cittapaṇḍitopi himavantapadese vasantoyeva ‘‘kiṃ nu kho mama bhātikena sambhūtena chattaṃ laddhaṃ, udāhu na vā’’ti upadhārento laddhabhāvaṃ ñatvā ‘‘navarajjaṃ tāva idāni gantvāpi bodhetuṃ na sakkhissāmi, mahallakakāle naṃ upasaṅkamitvā dhammaṃ kathetvā pabbājessāmī’’ti cintetvā paṇṇāsa vassāni agantvā rañño puttadhītāhi vaḍḍhitakāle iddhiyā gantvā uyyāne otaritvā maṅgalasilāpaṭṭe suvaṇṇapaṭimā viya nisīdi. Tasmiṃ khaṇe eko dārako taṃ gītaṃ gāyanto dārūni uddharati. Cittapaṇḍito taṃ pakkosi. So āgantvā vanditvā aṭṭhāsi. Atha naṃ āha – ‘‘tvaṃ pātova paṭṭhāya imameva gītaṃ gāyasi, kiṃ aññaṃ na jānāsī’’ti. ‘‘Bhante, aññānipi bahūni jānāmi, imāni pana dve rañño piyagītāni, tasmā imāneva gāyāmī’’ti. ‘‘Atthi pana rañño gītassa paṭigītaṃ gāyanto’’ti? ‘‘Natthi bhante’’ti. ‘‘Sakkhissasi pana tvaṃ paṭigītaṃ gāyitu’’nti? ‘‘Jānanto sakkhissāmī’’ti. ‘‘Tena hi tvaṃ raññā dvīsu gītesu gāyitesu idaṃ tatiyaṃ katvā gāyassū’’ti gītaṃdatvā ‘‘gantvā rañño santike gāyissasi, rājā te pasīditvā mahantaṃ issariyaṃ dassatī’’ti uyyojesi.
со сийгхам̣ маад̇у санд̇игам̣ г̇анд̇ваа ад̇д̇аанам̣ алан̇гаараабзд̇ваа рааж̇ад̣̇ваарам̣ г̇анд̇ваа ‘‘зго гира д̣̇аараго д̇умхзхи сад̣̇д̇хим̣ бадиг̇ийд̇ам̣ г̇ааяиссад̇ий’’д̇и ран̃н̃о аарожаабзд̇ваа ‘‘ааг̇ажчад̇уу’’д̇и вуд̇д̇з г̇анд̇ваа ванд̣̇ид̇ваа ‘‘д̇вам̣ гира, д̇аад̇а, бадиг̇ийд̇ам̣ г̇ааяиссасий’’д̇и будто ‘‘аама, д̣̇зва, саб̣б̣ам̣ рааж̇абарисам̣ саннибаад̇зт̇аа’’д̇и саннибад̇ид̇ааяа барисааяа рааж̇аанам̣ ааха ‘‘д̇умхз д̇аава, д̣̇зва, д̇умхаагам̣ г̇ийд̇ам̣ г̇ааяат̇а, ат̇аахам̣ бадиг̇ийд̇ам̣ г̇ааяиссаамий’’д̇и. рааж̇аа г̇аат̇аад̣̇ваяамааха –
So sīghaṃ mātu santikaṃ gantvā attānaṃ alaṅkārāpetvā rājadvāraṃ gantvā ‘‘eko kira dārako tumhehi saddhiṃ paṭigītaṃ gāyissatī’’ti rañño ārocāpetvā ‘‘āgacchatū’’ti vutte gantvā vanditvā ‘‘tvaṃ kira, tāta, paṭigītaṃ gāyissasī’’ti puṭṭho ‘‘āma, deva, sabbaṃ rājaparisaṃ sannipātethā’’ti sannipatitāya parisāya rājānaṃ āha ‘‘tumhe tāva, deva, tumhākaṃ gītaṃ gāyatha, athāhaṃ paṭigītaṃ gāyissāmī’’ti. Rājā gāthādvayamāha –
24.
24.
‘‘саб̣б̣ам̣ нараанам̣ сапалам̣ сужин̣н̣ам̣, на гаммунаа гин̃жана могхамад̇т̇и;
‘‘Sabbaṃ narānaṃ saphalaṃ suciṇṇaṃ, na kammunā kiñcana moghamatthi;
бассаами самбхууд̇ам̣ махаанубхаавам̣, сагаммунаа бун̃н̃апалуубабаннам̣.
Passāmi sambhūtaṃ mahānubhāvaṃ, sakammunā puññaphalūpapannaṃ.
25.
25.
‘‘саб̣б̣ам̣ нараанам̣ сапалам̣ сужин̣н̣ам̣, на гаммунаа гин̃жана могхамад̇т̇и;
‘‘Sabbaṃ narānaṃ saphalaṃ suciṇṇaṃ, na kammunā kiñcana moghamatthi;
гажжинну жид̇д̇ассаби звамзвам̣, ид̣̇д̇хо мано д̇асса яат̇ааби маяха’’нд̇и.
Kaccinnu cittassapi evamevaṃ, iddho mano tassa yathāpi mayha’’nti.
д̇ад̇т̇а на гаммунаа гин̃жана могхамад̇т̇ийд̇и сугад̇ад̣̇уггадзсу гаммзсу гин̃жана згагаммамби могхам̣ наама над̇т̇и, нибпалам̣ на ход̇и, вибаагам̣ д̣̇ад̇ваава нассад̇ийд̇и абараабарияавзд̣̇анийяагаммам̣ санд̇хааяааха. самбхууд̇анд̇и ад̇д̇аанам̣ вад̣̇ад̇и, бассаамахам̣ ааяасманд̇ам̣ самбхууд̇ам̣ сагзна гаммзна бун̃н̃апалуубабаннам̣, сагаммам̣ ниссааяа бун̃н̃апалзна убабаннам̣ д̇ам̣ бассаамийд̇и ад̇т̇о. гажжинну жид̇д̇ассабийд̇и маяан̃хи д̣̇взби ж̇анаа згад̇о худ̇ваа на жирам̣ сийлам̣ рагкимха, ахам̣ д̇аава д̇асса палзна маханд̇ам̣ яасам̣ бад̇д̇о, гажжи ну ко мз бхаад̇игасса жид̇д̇ассаби звамзва мано ид̣̇д̇хо самид̣̇д̇ход̇и.
Tattha na kammunā kiñcana moghamatthīti sukatadukkaṭesu kammesu kiñcana ekakammampi moghaṃ nāma natthi, nipphalaṃ na hoti, vipākaṃ datvāva nassatīti aparāpariyavedanīyakammaṃ sandhāyāha. Sambhūtanti attānaṃ vadati, passāmahaṃ āyasmantaṃ sambhūtaṃ sakena kammena puññaphalūpapannaṃ, sakammaṃ nissāya puññaphalena upapannaṃ taṃ passāmīti attho. Kaccinnu cittassapīti mayañhi dvepi janā ekato hutvā na ciraṃ sīlaṃ rakkhimha, ahaṃ tāva tassa phalena mahantaṃ yasaṃ patto, kacci nu kho me bhātikassa cittassapi evameva mano iddho samiddhoti.
д̇асса г̇ийд̇аавасаанз д̣̇аараго г̇ааяанд̇о д̇ад̇ияам̣ г̇аат̇амааха –
Tassa gītāvasāne dārako gāyanto tatiyaṃ gāthamāha –
26.
26.
‘‘саб̣б̣ам̣ нараанам̣ сапалам̣ сужин̣н̣ам̣, на гаммунаа гин̃жана могхамад̇т̇и;
‘‘Sabbaṃ narānaṃ saphalaṃ suciṇṇaṃ, na kammunā kiñcana moghamatthi;
жид̇д̇амби ж̇аанаахи д̇ат̇зва д̣̇зва, ид̣̇д̇хо мано д̇асса яат̇ааби д̇уяха’’нд̇и.
Cittampi jānāhi tatheva deva, iddho mano tassa yathāpi tuyha’’nti.
д̇ам̣ суд̇ваа рааж̇аа жад̇уд̇т̇ам̣ г̇аат̇амааха –
Taṃ sutvā rājā catutthaṃ gāthamāha –
27.
27.
‘‘бхавам̣ ну жид̇д̇о суд̇аман̃н̃ад̇о д̇з, уд̣̇ааху д̇з гожи нам̣ зд̇ад̣̇агкаа;
‘‘Bhavaṃ nu citto sutamaññato te, udāhu te koci naṃ etadakkhā;
г̇аат̇аа суг̇ийд̇аа на мамад̇т̇и ган̇каа, д̣̇ад̣̇аами д̇з г̇аамаварам̣ сад̇ан̃жаа’’д̇и.
Gāthā sugītā na mamatthi kaṅkhā, dadāmi te gāmavaraṃ satañcā’’ti.
д̇ад̇т̇а суд̇аман̃н̃ад̇о д̇зд̇и ахам̣ самбхууд̇асса бхаад̇аа жид̇д̇о наамаад̇и вад̣̇анд̇асса жид̇д̇ассзва ну д̇з санд̇игаа суд̇анд̇и ад̇т̇о. гожи нанд̇и уд̣̇ааху маяаа самбхууд̇асса ран̃н̃о бхаад̇аа жид̇д̇о д̣̇идтод̇и гожи д̇з зд̇амад̇т̇ам̣ аажигки. суг̇ийд̇аад̇и саб̣б̣ат̇ааби аяам̣ г̇аат̇аа суг̇ийд̇аа, над̇т̇зд̇т̇а мама ган̇каа. г̇аамаварам̣ сад̇ан̃жаад̇и г̇аамавараанам̣ д̇з сад̇ам̣ д̣̇ад̣̇аамийд̇и вад̣̇ад̇и.
Tattha sutamaññato teti ahaṃ sambhūtassa bhātā citto nāmāti vadantassa cittasseva nu te santikā sutanti attho. Koci nanti udāhu mayā sambhūtassa rañño bhātā citto diṭṭhoti koci te etamatthaṃ ācikkhi. Sugītāti sabbathāpi ayaṃ gāthā sugītā, natthettha mama kaṅkhā. Gāmavaraṃ satañcāti gāmavarānaṃ te sataṃ dadāmīti vadati.
д̇ад̇о д̣̇аараго бан̃жамам̣ г̇аат̇амааха –
Tato dārako pañcamaṃ gāthamāha –
28.
28.
‘‘на жаахам̣ жид̇д̇о суд̇аман̃н̃ад̇о мз, исий жа мз зд̇амад̇т̇ам̣ асам̣си;
‘‘Na cāhaṃ citto sutamaññato me, isī ca me etamatthaṃ asaṃsi;
г̇анд̇ваана ран̃н̃о бадиг̇аахи г̇аат̇ам̣, аби д̇з варам̣ ад̇д̇амано д̣̇ад̣̇зяяаа’’д̇и.
Gantvāna rañño paṭigāhi gāthaṃ, api te varaṃ attamano dadeyyā’’ti.
д̇ад̇т̇а зд̇амад̇т̇анд̇и д̇умхаагам̣ уяяаанз нисинно зго иси маяхам̣ зд̇амад̇т̇ам̣ аажигки.
Tattha etamatthanti tumhākaṃ uyyāne nisinno eko isi mayhaṃ etamatthaṃ ācikkhi.
д̇ам̣ суд̇ваа рааж̇аа ‘‘со мама бхаад̇аа жид̇д̇о бхависсад̇и, ид̣̇аанзва нам̣ г̇анд̇ваа бассиссаамий’’д̇и бурисз аан̣аабзнд̇о г̇аат̇аад̣̇ваяамааха –
Taṃ sutvā rājā ‘‘so mama bhātā citto bhavissati, idāneva naṃ gantvā passissāmī’’ti purise āṇāpento gāthādvayamāha –
29.
29.
‘‘яож̇знд̇у вз рааж̇арат̇з, сугад̇з жид̇д̇асиб̣б̣анз;
‘‘Yojentu ve rājarathe, sukate cittasibbane;
гажчам̣ нааг̇аанам̣ б̣анд̇хат̇а, г̇ийвзяяам̣ бадимун̃жат̇а.
Kacchaṃ nāgānaṃ bandhatha, gīveyyaṃ paṭimuñcatha.
30.
30.
‘‘аахан̃н̃анд̇у бхзримуд̣̇ин̇г̇асан̇кз, сийгхаани яаанаани жа яож̇аяанд̇у;
‘‘Āhaññantu bherimudiṅgasaṅkhe, sīghāni yānāni ca yojayantu;
аж̇ж̇звахам̣ ассамам̣ д̇ам̣ г̇амиссам̣, яад̇т̇зва д̣̇агкиссамисим̣ нисинна’’нд̇и.
Ajjevahaṃ assamaṃ taṃ gamissaṃ, yattheva dakkhissamisiṃ nisinna’’nti.
д̇ад̇т̇а аахан̃н̃анд̇ууд̇и аахананд̇у. ассамам̣ д̇анд̇и д̇ам̣ ассамам̣.
Tattha āhaññantūti āhanantu. Assamaṃ tanti taṃ assamaṃ.
со звам̣ вад̇ваа рат̇ам̣ абхируяха сийгхам̣ г̇анд̇ваа уяяаанад̣̇ваарз рат̇ам̣ табзд̇ваа жид̇д̇абан̣д̣ид̇ам̣ убасан̇гамид̇ваа ванд̣̇ид̇ваа згаманд̇ам̣ нисинно д̇удтамаанасо адтамам̣ г̇аат̇амааха –
So evaṃ vatvā rathaṃ abhiruyha sīghaṃ gantvā uyyānadvāre rathaṃ ṭhapetvā cittapaṇḍitaṃ upasaṅkamitvā vanditvā ekamantaṃ nisinno tuṭṭhamānaso aṭṭhamaṃ gāthamāha –
31.
31.
‘‘сулад̣̇д̇халаабхо вад̇а мз ахоси, г̇аат̇аа суг̇ийд̇аа барисааяа маж̇жхз;
‘‘Suladdhalābho vata me ahosi, gāthā sugītā parisāya majjhe;
сваахам̣ исим̣ сийлавад̇уубабаннам̣, д̣̇исваа бад̇ийд̇о суманохамасмий’’д̇и.
Svāhaṃ isiṃ sīlavatūpapannaṃ, disvā patīto sumanohamasmī’’ti.
д̇ассад̇т̇о – сулад̣̇д̇халаабхо вад̇а маяхам̣ чад̇д̇аман̇г̇алад̣̇ивасз барисааяа маж̇жхз г̇ийд̇аг̇аат̇аа суг̇ийд̇аава ахоси, сваахам̣ аж̇ж̇а сийлавад̇асамбаннам̣ исим̣ д̣̇исваа бийд̇исоманассаббад̇д̇о ж̇аад̇од̇и.
Tassattho – suladdhalābho vata mayhaṃ chattamaṅgaladivase parisāya majjhe gītagāthā sugītāva ahosi, svāhaṃ ajja sīlavatasampannaṃ isiṃ disvā pītisomanassappatto jātoti.
со жид̇д̇абан̣д̣ид̇асса д̣̇идтагаалад̇о бадтааяа соманассаббад̇д̇о ‘‘бхаад̇игасса мз баллан̇гам̣ ад̇т̇арат̇аа’’д̇иаад̣̇ийни аан̣аабзнд̇о навамам̣ г̇аат̇амааха –
So cittapaṇḍitassa diṭṭhakālato paṭṭhāya somanassappatto ‘‘bhātikassa me pallaṅkaṃ attharathā’’tiādīni āṇāpento navamaṃ gāthamāha –
32.
32.
‘‘аасанам̣ уд̣̇агам̣ баж̇ж̇ам̣, бадиг̇г̇ан̣хаад̇у но бхавам̣;
‘‘Āsanaṃ udakaṃ pajjaṃ, paṭiggaṇhātu no bhavaṃ;
аг̇гхз бхаванд̇ам̣ бужчаама, аг̇гхам̣ гуруд̇у но бхава’’нд̇и.
Agghe bhavantaṃ pucchāma, agghaṃ kurutu no bhava’’nti.
д̇ад̇т̇а аг̇гхзд̇и ад̇ит̇ино д̣̇аад̇аб̣б̣аяуд̇д̇агасмим̣ аг̇гхз бхаванд̇ам̣ аабужчаама. гуруд̇у нод̇и имам̣ но аг̇гхам̣ бхавам̣ бадиг̇г̇ан̣хаад̇у.
Tattha aggheti atithino dātabbayuttakasmiṃ agghe bhavantaṃ āpucchāma. Kurutu noti imaṃ no agghaṃ bhavaṃ paṭiggaṇhātu.
звам̣ мад̇хурабадисант̇аарам̣ гад̇ваа раж̇ж̇ам̣ маж̇жхз бхинд̣̇ид̇ваа д̣̇знд̇о ид̇арам̣ г̇аат̇амааха –
Evaṃ madhurapaṭisanthāraṃ katvā rajjaṃ majjhe bhinditvā dento itaraṃ gāthamāha –
33.
33.
‘‘рамман̃жа д̇з аавасат̇ам̣ гаронд̇у, наарийг̇ан̣зхи барижаараяассу;
‘‘Rammañca te āvasathaṃ karontu, nārīgaṇehi paricārayassu;
гарохи огаасамануг̇г̇ахааяа, убхобимам̣ иссарияам̣ гаромаа’’д̇и.
Karohi okāsamanuggahāya, ubhopimaṃ issariyaṃ karomā’’ti.
д̇ад̇т̇а имам̣ иссарияанд̇и габиларадтз уд̇д̇арабан̃жааланаг̇арз раж̇ж̇ам̣ маж̇жхз бхинд̣̇ид̇ваа д̣̇взби ж̇анаа гарома анубхаваама.
Tattha imaṃ issariyanti kapilaraṭṭhe uttarapañcālanagare rajjaṃ majjhe bhinditvā dvepi janā karoma anubhavāma.
д̇асса д̇ам̣ важанам̣ суд̇ваа жид̇д̇абан̣д̣ид̇о д̇хаммам̣ д̣̇зсзнд̇о ча г̇аат̇аа абхааси –
Tassa taṃ vacanaṃ sutvā cittapaṇḍito dhammaṃ desento cha gāthā abhāsi –
34.
34.
‘‘д̣̇исваа палам̣ д̣̇ужжарид̇асса рааж̇а, ад̇т̇о сужин̣н̣асса махаавибаагам̣;
‘‘Disvā phalaṃ duccaritassa rāja, attho suciṇṇassa mahāvipākaṃ;
ад̇д̇аанамзва бадисам̣яамиссам̣, на бад̇т̇аяз буд̇д̇а басум̣ д̇ханам̣ ваа.
Attānameva paṭisaṃyamissaṃ, na patthaye putta pasuṃ dhanaṃ vā.
35.
35.
‘‘д̣̇асзвимаа вассад̣̇асаа, мажжаанам̣ ид̇ха ж̇ийвид̇ам̣;
‘‘Dasevimā vassadasā, maccānaṃ idha jīvitaṃ;
абад̇д̇ан̃н̃зва д̇ам̣ од̇хим̣, нал̣о чиннова суссад̇и.
Apattaññeva taṃ odhiṃ, naḷo chinnova sussati.
36.
36.
‘‘д̇ад̇т̇а гаа нанд̣̇и гаа кид̣д̣аа, гаа рад̇ий гаа д̇ханзсанаа;
‘‘Tattha kā nandi kā khiḍḍā, kā ratī kā dhanesanā;
гим̣ мз буд̇д̇зхи д̣̇аарзхи, рааж̇а муд̇д̇осми б̣анд̇ханаа.
Kiṃ me puttehi dārehi, rāja muttosmi bandhanā.
37.
37.
‘‘сохам̣ звам̣ баж̇аанаами, мажжу мз наббамаж̇ж̇ад̇и;
‘‘Sohaṃ evaṃ pajānāmi, maccu me nappamajjati;
анд̇агзнаад̇хибаннасса, гаа рад̇ий гаа д̇ханзсанаа.
Antakenādhipannassa, kā ratī kā dhanesanā.
38.
38.
‘‘ж̇аад̇и нараанам̣ ад̇хамаа ж̇анинд̣̇а, жан̣д̣аалаяони д̣̇вибад̣̇ааганидтаа;
‘‘Jāti narānaṃ adhamā janinda, caṇḍālayoni dvipadākaniṭṭhā;
сагзхи гаммзхи субаабагзхи, жан̣д̣аалаг̇аб̣бхз авасимха буб̣б̣з.
Sakehi kammehi supāpakehi, caṇḍālagabbhe avasimha pubbe.
39.
39.
‘‘жан̣д̣аалаахумха аванд̇ийсу, миг̇аа нзран̃ж̇арам̣ бад̇и;
‘‘Caṇḍālāhumha avantīsu, migā nerañjaraṃ pati;
уггусаа наммад̣̇аад̇ийрз, д̇яаж̇ж̇а б̣раахман̣акад̇д̇ияаа’’д̇и.
Ukkusā nammadātīre, tyajja brāhmaṇakhattiyā’’ti.
д̇ад̇т̇а д̣̇ужжарид̇ассаад̇и махаарааж̇а, д̇вам̣ сужарид̇ассзва палам̣ ж̇аанааси, ахам̣ бана д̣̇ужжарид̇ассаби палам̣ бассаамиязва. маяан̃хи убхо д̣̇ужжарид̇асса палзна ид̇о жад̇уд̇т̇з ад̇д̇абхаавз жан̣д̣аалаяонияам̣ ниб̣б̣ад̇д̇аа. д̇ад̇т̇а на жирам̣ сийлам̣ рагкид̇ваа д̇асса палзна д̇вам̣ кад̇д̇ияагулз ниб̣б̣ад̇д̇о, ахам̣ б̣раахман̣агулз, зваахам̣ д̣̇ужжарид̇асса жа палам̣ сужин̣н̣асса жа махаавибаагам̣ д̣̇исваа ад̇д̇аанамзва сийласам̣яамзна бадисам̣яамиссам̣, буд̇д̇ам̣ ваа басум̣ ваа д̇ханам̣ ваа на бад̇т̇зми.
Tattha duccaritassāti mahārāja, tvaṃ sucaritasseva phalaṃ jānāsi, ahaṃ pana duccaritassapi phalaṃ passāmiyeva. Mayañhi ubho duccaritassa phalena ito catutthe attabhāve caṇḍālayoniyaṃ nibbattā. Tattha na ciraṃ sīlaṃ rakkhitvā tassa phalena tvaṃ khattiyakule nibbatto, ahaṃ brāhmaṇakule, evāhaṃ duccaritassa ca phalaṃ suciṇṇassa ca mahāvipākaṃ disvā attānameva sīlasaṃyamena paṭisaṃyamissaṃ, puttaṃ vā pasuṃ vā dhanaṃ vā na patthemi.
д̣̇асзвимаа вассад̣̇асаад̇и махаарааж̇а, манд̣̇ад̣̇асагам̣ кид̣д̣аад̣̇асагам̣ ван̣н̣ад̣̇асагам̣ б̣алад̣̇асагам̣ бан̃н̃аад̣̇асагам̣ хаанид̣̇асагам̣ баб̣бхаарад̣̇асагам̣ ван̇гад̣̇асагам̣ момуухад̣̇асагам̣ саяанад̣̇асаганд̇и имзсан̃хи д̣̇асаннам̣ д̣̇асагаанам̣ васзна д̣̇асзва вассад̣̇асаа имзсам̣ мажжаанам̣ ид̇ха мануссалогз ж̇ийвид̇ам̣. д̇аяид̣̇ам̣ на нияамзна саб̣б̣аа зва зд̇аа д̣̇асаа баабун̣аад̇и, ат̇а ко аббад̇д̇ан̃н̃зва д̇ам̣ од̇хим̣ нал̣о чиннова суссад̇и. язби сагалам̣ вассасад̇ам̣ ж̇ийванд̇и, д̇зсамби манд̣̇ад̣̇асагз бавад̇д̇аа руубааруубад̇хаммаа вижчинд̣̇ид̇ваа аад̇абз кид̇д̇анал̣о вияа д̇ад̇т̇зва суссанд̇и анд̇арад̇хааяанд̇и, д̇ам̣ од̇хим̣ ад̇иггамид̇ваа кид̣д̣аад̣̇асагам̣ на баабун̣анд̇и, д̇ат̇аа киддаад̣̇асагаад̣̇ийсу бавад̇д̇аа ван̣н̣ад̣̇асагаад̣̇ийни.
Dasevimā vassadasāti mahārāja, mandadasakaṃ khiḍḍādasakaṃ vaṇṇadasakaṃ baladasakaṃ paññādasakaṃ hānidasakaṃ pabbhāradasakaṃ vaṅkadasakaṃ momūhadasakaṃ sayanadasakanti imesañhi dasannaṃ dasakānaṃ vasena daseva vassadasā imesaṃ maccānaṃ idha manussaloke jīvitaṃ. Tayidaṃ na niyamena sabbā eva etā dasā pāpuṇāti, atha kho appattaññeva taṃ odhiṃ naḷo chinnova sussati. Yepi sakalaṃ vassasataṃ jīvanti, tesampi mandadasake pavattā rūpārūpadhammā vicchinditvā ātape khittanaḷo viya tattheva sussanti antaradhāyanti, taṃ odhiṃ atikkamitvā khiḍḍādasakaṃ na pāpuṇanti, tathā khiṭṭādasakādīsu pavattā vaṇṇadasakādīni.
д̇ад̇т̇аад̇и д̇асмим̣ звам̣ суссамаанз ж̇ийвид̇з гаа бан̃жа гаамаг̇ун̣з ниссааяа абхинанд̣̇ий, гаа гааяагийл̣аад̣̇ивасзна кид̣д̣аа, гаа соманассавасзна рад̇и, гаа д̇ханзсанаа, гим̣ мз буд̇д̇зхи, гим̣ д̣̇аарзхи, муд̇д̇осми д̇амхаа буд̇д̇ад̣̇аараб̣анд̇ханаад̇и ад̇т̇о. анд̇агзнаад̇хибаннассаад̇и ж̇ийвид̇анд̇агарзна мажжунаа абхибхууд̇асса. д̣̇вибад̣̇ааганидтаад̇и д̣̇вибад̣̇аанам̣ анд̇арз лаамагаа. авасимхаад̇и д̣̇взби маяам̣ васимха.
Tatthāti tasmiṃ evaṃ sussamāne jīvite kā pañca kāmaguṇe nissāya abhinandī, kā kāyakīḷādivasena khiḍḍā, kā somanassavasena rati, kā dhanesanā, kiṃ me puttehi, kiṃ dārehi, muttosmi tamhā puttadārabandhanāti attho. Antakenādhipannassāti jīvitantakarena maccunā abhibhūtassa. Dvipadākaniṭṭhāti dvipadānaṃ antare lāmakā. Avasimhāti dvepi mayaṃ vasimha.
жан̣д̣аалаахумхаад̇и махаарааж̇а, ид̇о буб̣б̣з жад̇уд̇т̇ам̣ ж̇аад̇им̣ аванд̇ирадтз уж̇ж̇знинаг̇арз жан̣д̣аалаа ахумха, д̇ад̇о жавид̇ваа нзран̃ж̇арааяа над̣̇ияаа д̇ийрз убхоби миг̇аа ахумха. д̇ад̇т̇а д̣̇взби амхз згасмим̣ ругкамуулз ан̃н̃аман̃н̃ам̣ ниссааяа тид̇з зго луд̣̇д̣̇аго згзнзва сад̇д̇ибахаарзна ж̇ийвид̇аа воробзси, д̇ад̇о жавид̇ваа наммад̣̇аанад̣̇ийд̇ийрз гурараа ахумха. д̇ад̇рааби но ниссааяа тид̇з зго нзсаад̣̇о згаббахаарзнзва б̣анд̇хид̇ваа ж̇ийвид̇агкаяам̣ баабзси, д̇ад̇о жавид̇ваа д̇з маяам̣ аж̇ж̇а б̣раахман̣акад̇д̇ияаа ж̇аад̇аа. ахам̣ госамб̣ияам̣ б̣раахман̣агулз ниб̣б̣ад̇д̇о, д̇вам̣ ид̇ха рааж̇аа ж̇аад̇од̇и.
Caṇḍālāhumhāti mahārāja, ito pubbe catutthaṃ jātiṃ avantiraṭṭhe ujjeninagare caṇḍālā ahumha, tato cavitvā nerañjarāya nadiyā tīre ubhopi migā ahumha. Tattha dvepi amhe ekasmiṃ rukkhamūle aññamaññaṃ nissāya ṭhite eko luddako ekeneva sattipahārena jīvitā voropesi, tato cavitvā nammadānadītīre kurarā ahumha. Tatrāpi no nissāya ṭhite eko nesādo ekappahāreneva bandhitvā jīvitakkhayaṃ pāpesi, tato cavitvā te mayaṃ ajja brāhmaṇakhattiyā jātā. Ahaṃ kosambiyaṃ brāhmaṇakule nibbatto, tvaṃ idha rājā jātoti.
звамасса ад̇ийд̇з лаамагаж̇аад̇ияо багаасзд̇ваа ид̣̇аани имиссааби ж̇аад̇ияаа ааяусан̇каарабарид̇д̇ад̇ам̣ д̣̇ассзд̇ваа бун̃н̃зсу уссаахам̣ ж̇анзнд̇о жад̇ассо г̇аат̇аа абхааси –
Evamassa atīte lāmakajātiyo pakāsetvā idāni imissāpi jātiyā āyusaṅkhāraparittataṃ dassetvā puññesu ussāhaṃ janento catasso gāthā abhāsi –
40.
40.
‘‘убанийяад̇и ж̇ийвид̇амаббамааяу, ж̇аруубанийд̇асса на санд̇и д̇аан̣аа;
‘‘Upanīyati jīvitamappamāyu, jarūpanītassa na santi tāṇā;
гарохи бан̃жаала мамзд̇а ваагяам̣, маагааси гаммаани д̣̇угкуд̣̇раяаани.
Karohi pañcāla mameta vākyaṃ, mākāsi kammāni dukkhudrayāni.
41.
41.
‘‘убанийяад̇и ж̇ийвид̇амаббамааяу, ж̇аруубанийд̇асса на санд̇и д̇аан̣аа;
‘‘Upanīyati jīvitamappamāyu, jarūpanītassa na santi tāṇā;
гарохи бан̃жаала мамзд̇а ваагяам̣, маагааси гаммаани д̣̇угкабпалаани.
Karohi pañcāla mameta vākyaṃ, mākāsi kammāni dukkhapphalāni.
42.
42.
‘‘убанийяад̇и ж̇ийвид̇амаббамааяу, ж̇аруубанийд̇асса на санд̇и д̇аан̣аа;
‘‘Upanīyati jīvitamappamāyu, jarūpanītassa na santi tāṇā;
гарохи бан̃жаала мамзд̇а ваагяам̣, маагааси гаммаани раж̇ассираани.
Karohi pañcāla mameta vākyaṃ, mākāsi kammāni rajassirāni.
43.
43.
‘‘убанийяад̇и ж̇ийвид̇амаббамааяу, ван̣н̣ам̣ ж̇араа ханд̇и нарасса ж̇ияяад̇о;
‘‘Upanīyati jīvitamappamāyu, vaṇṇaṃ jarā hanti narassa jiyyato;
гарохи бан̃жаала мамзд̇а ваагяам̣, маагааси гаммам̣ нираяуубабад̇д̇ияаа’’д̇и.
Karohi pañcāla mameta vākyaṃ, mākāsi kammaṃ nirayūpapattiyā’’ti.
д̇ад̇т̇а убанийяад̇ийд̇и махаарааж̇а, ид̣̇ам̣ ж̇ийвид̇ам̣ маран̣ам̣ убаг̇ажчад̇и. ид̣̇ан̃хи имзсам̣ сад̇д̇аанам̣ аббамааяу сарасабарид̇д̇ад̇ааяаби тид̇ибарид̇д̇ад̇ааяаби барид̇д̇агам̣, суурияуг̇г̇аманз д̇ин̣аг̇г̇з уссааваб̣инд̣̇усад̣̇исам̣. на санд̇и д̇аан̣аад̇и на хи ж̇арааяа маран̣ам̣ убанийд̇асса буд̇д̇аад̣̇аяо д̇аан̣аа наама хонд̇и. мамзд̇а ваагяанд̇и мама зд̇ам̣ важанам̣. маагаасийд̇и маа руубаад̣̇игаамаг̇ун̣ахзд̇у бамаад̣̇ам̣ аабаж̇ж̇ид̇ваа нираяаад̣̇ийсу д̣̇угкавад̣дханаани гаммаани гари. д̣̇угкабпалаанийд̇и д̣̇угкавибаагаани. раж̇ассираанийд̇и гилзсараж̇зна огин̣н̣асийсаани. ван̣н̣анд̇и ж̇ийрамаанасса нарасса сарийраван̣н̣ам̣ ж̇араа ханд̇и. нираяуубабад̇д̇ияаад̇и нирассаад̣̇з нираяз уббаж̇ж̇анад̇т̇ааяа.
Tattha upanīyatīti mahārāja, idaṃ jīvitaṃ maraṇaṃ upagacchati. Idañhi imesaṃ sattānaṃ appamāyu sarasaparittatāyapi ṭhitiparittatāyapi parittakaṃ, sūriyuggamane tiṇagge ussāvabindusadisaṃ. Na santi tāṇāti na hi jarāya maraṇaṃ upanītassa puttādayo tāṇā nāma honti. Mameta vākyanti mama etaṃ vacanaṃ. Mākāsīti mā rūpādikāmaguṇahetu pamādaṃ āpajjitvā nirayādīsu dukkhavaḍḍhanāni kammāni kari. Dukkhapphalānīti dukkhavipākāni. Rajassirānīti kilesarajena okiṇṇasīsāni. Vaṇṇanti jīramānassa narassa sarīravaṇṇaṃ jarā hanti. Nirayūpapattiyāti nirassāde niraye uppajjanatthāya.
звам̣ махаасад̇д̇з гат̇знд̇з рааж̇аа д̇уссид̇ваа д̇иссо г̇аат̇аа абхааси –
Evaṃ mahāsatte kathente rājā tussitvā tisso gāthā abhāsi –
44.
44.
‘‘ад̣̇д̇хаа хи сажжам̣ важанам̣ д̇авзд̇ам̣, яат̇аа исий бхаасаси звамзд̇ам̣;
‘‘Addhā hi saccaṃ vacanaṃ tavetaṃ, yathā isī bhāsasi evametaṃ;
гаамаа жа мз санд̇и анаббаруубаа, д̇з д̣̇ужжаж̇аа маад̣̇исагзна бхигку.
Kāmā ca me santi anapparūpā, te duccajā mādisakena bhikkhu.
45.
45.
‘‘нааг̇о яат̇аа бан̇гамаж̇жхз б̣яасанно, бассам̣ т̇алам̣ наабхисамбход̇и г̇анд̇ум̣;
‘‘Nāgo yathā paṅkamajjhe byasanno, passaṃ thalaṃ nābhisambhoti gantuṃ;
звамбахам̣ гаамабан̇гз б̣яасанно, на бхигкуно маг̇г̇амануб̣б̣аж̇аами.
Evampahaṃ kāmapaṅke byasanno, na bhikkhuno maggamanubbajāmi.
46.
46.
‘‘яат̇ааби маад̇аа жа бид̇аа жа буд̇д̇ам̣, анусаасарз гинд̇и сукий бхавзяяа;
‘‘Yathāpi mātā ca pitā ca puttaṃ, anusāsare kinti sukhī bhaveyya;
звамби мам̣ д̇вам̣ анусааса бханд̇з, яат̇аа жирам̣ бзжжа сукий бхавзяяа’’нд̇и.
Evampi maṃ tvaṃ anusāsa bhante, yathā ciraṃ pecca sukhī bhaveyya’’nti.
д̇ад̇т̇а анаббаруубаад̇и абарид̇д̇аж̇аад̇игаа б̣ахуу абаримид̇аа. д̇з д̣̇ужжаж̇аа маад̣̇исагзнаад̇и бхаад̇ига, д̇вам̣ гилзсз бахааяа тид̇о, ахам̣ бана гаамабан̇гз нимуг̇г̇о, д̇асмаа маад̣̇исагзна д̇з гаамаа д̣̇ужжаж̇аа. ‘‘нааг̇о яат̇аа’’д̇и иминаа ад̇д̇ано гаамабан̇гз нимуг̇г̇абхаавасса убамам̣ д̣̇ассзд̇и. д̇ад̇т̇а б̣яасаннод̇и висанно анубавидто аяамзва ваа баато. маг̇г̇анд̇и д̇умхаагам̣ оваад̣̇аанусаасаниймаг̇г̇ам̣ наануб̣б̣аж̇аами баб̣б̣аж̇ид̇ум̣ на саггоми, ид̇хзва бана мз тид̇асса оваад̣̇ам̣ д̣̇зт̇аад̇и. анусаасарзд̇и анусаасанд̇и.
Tattha anapparūpāti aparittajātikā bahū aparimitā. Te duccajā mādisakenāti bhātika, tvaṃ kilese pahāya ṭhito, ahaṃ pana kāmapaṅke nimuggo, tasmā mādisakena te kāmā duccajā. ‘‘Nāgo yathā’’ti iminā attano kāmapaṅke nimuggabhāvassa upamaṃ dasseti. Tattha byasannoti visanno anupaviṭṭho ayameva vā pāṭho. Magganti tumhākaṃ ovādānusāsanīmaggaṃ nānubbajāmi pabbajituṃ na sakkomi, idheva pana me ṭhitassa ovādaṃ dethāti. Anusāsareti anusāsanti.
ат̇а нам̣ махаасад̇д̇о ааха –
Atha naṃ mahāsatto āha –
47.
47.
‘‘но жз д̇увам̣ уссахасз ж̇анинд̣̇а, гаамз имз маанусагз бахаад̇ум̣;
‘‘No ce tuvaṃ ussahase janinda, kāme ime mānusake pahātuṃ;
д̇хаммим̣ б̣алим̣ бадтабаяассу рааж̇а, ад̇хаммагааро д̇ава мааху радтз.
Dhammiṃ baliṃ paṭṭhapayassu rāja, adhammakāro tava māhu raṭṭhe.
48.
48.
‘‘д̣̇ууд̇аа вид̇хааванд̇у д̣̇исаа жад̇ассо, ниманд̇агаа саман̣аб̣раахман̣аанам̣;
‘‘Dūtā vidhāvantu disā catasso, nimantakā samaṇabrāhmaṇānaṃ;
д̇з аннабаанзна убадтахассу, вад̇т̇зна сзнаасанабажжаязна жа.
Te annapānena upaṭṭhahassu, vatthena senāsanapaccayena ca.
49.
49.
‘‘аннзна баанзна басаннажид̇д̇о, санд̇аббаяа саман̣аб̣раахман̣з жа;
‘‘Annena pānena pasannacitto, santappaya samaṇabrāhmaṇe ca;
д̣̇ад̇ваа жа бхуд̇ваа жа яат̇аанубхаавам̣, анинд̣̇ид̇о саг̇г̇амубзхи таанам̣.
Datvā ca bhutvā ca yathānubhāvaṃ, anindito saggamupehi ṭhānaṃ.
50.
50.
‘‘сажз жа д̇ам̣ рааж̇а мад̣̇о сахзяяа, наарийг̇ан̣зхи барижаараяанд̇ам̣;
‘‘Sace ca taṃ rāja mado saheyya, nārīgaṇehi paricārayantaṃ;
имамзва г̇аат̇ам̣ манасий гарохи, бхаасзси жзнам̣ барисааяа маж̇жхз.
Imameva gāthaṃ manasī karohi, bhāsesi cenaṃ parisāya majjhe.
51.
51.
‘‘аб̣бхогаасасаяо ж̇анд̇у, важ̇анд̇яаа кийрабааяид̇о;
‘‘Abbhokāsasayo jantu, vajantyā khīrapāyito;
баригин̣н̣о суваанзхи, свааж̇ж̇а рааж̇аад̇и вужжад̇ий’’д̇и.
Parikiṇṇo suvānehi, svājja rājāti vuccatī’’ti.
д̇ад̇т̇а уссахасзд̇и уссахаси. д̇хаммим̣ б̣алинд̇и д̇хаммзна самзна анад̇ирид̇д̇ам̣ б̣алим̣ г̇ан̣хаад̇и ад̇т̇о. ад̇хаммагаарод̇и бораан̣агарааж̇уухи табид̇ам̣ винижчаяад̇хаммам̣ бхинд̣̇ид̇ваа бавад̇д̇аа ад̇хаммагирияаа. ниманд̇агаад̇и д̇хаммигасаман̣аб̣раахман̣з ниманд̇зд̇ваа баггосагаа. яат̇аанубхааванд̇и яат̇ааб̣алам̣ яат̇аасад̇д̇им̣. имамзва г̇аат̇анд̇и ид̣̇аани вад̇д̇аб̣б̣ам̣ санд̇хааяааха. д̇ад̇рааяам̣ ад̇хиббааяо – ‘‘махаарааж̇а, сажз д̇ам̣ мад̣̇о абхибхавзяяа, сажз д̇з наарийг̇ан̣абаривуд̇асса руубаад̣̇аяо ваа гаамаг̇ун̣з раж̇ж̇асукам̣ ваа аараб̣бха маано уббаж̇ж̇зяяа, ат̇звам̣ жинд̇зяяааси ‘ахам̣ бурз жан̣д̣аалаяонияам̣ ниб̣б̣ад̇д̇о чаннасса д̇ин̣агудимад̇д̇ассаби абхааваа аб̣бхогаасасаяо ахосим̣, д̇ад̣̇аа хи мз маад̇аа жан̣д̣аалий аран̃н̃ам̣ д̣̇аарубан̣н̣аад̣̇ийнам̣ ад̇т̇ааяа г̇ажчанд̇ий мам̣ гуггураг̇ан̣асса маж̇жхз аб̣бхогаасз нибаж̇ж̇аабзд̇ваа ад̇д̇ано кийрам̣ бааязд̇ваа г̇ажчад̇и, сохам̣ гуггурзхи бариваарид̇о д̇зхиязва сад̣̇д̇хим̣ сунакияаа кийрам̣ бивид̇ваа вад̣дхид̇о, звам̣ нийжаж̇ажжо худ̇ваа аж̇ж̇а рааж̇аа наама ж̇аад̇о’д̇и. ‘ид̇и ко, д̇вам̣ махаарааж̇а, иминаа ад̇т̇зна ад̇д̇аанам̣ овад̣̇анд̇о яо со буб̣б̣з аб̣бхогаасасаяо ж̇анд̇у аран̃н̃з важ̇анд̇ияаа жан̣д̣аалияаа ид̇о жид̇о жа анусан̃жаранд̇ияаа сунакияаа жа кийрам̣ бааяид̇о сунакзхи баригин̣н̣о вад̣дхид̇о, со аж̇ж̇а рааж̇аад̇и вужжад̇ий’д̇и имам̣ г̇аат̇ам̣ бхаасзяяаасий’’д̇и.
Tattha ussahaseti ussahasi. Dhammiṃ balinti dhammena samena anatirittaṃ baliṃ gaṇhāti attho. Adhammakāroti porāṇakarājūhi ṭhapitaṃ vinicchayadhammaṃ bhinditvā pavattā adhammakiriyā. Nimantakāti dhammikasamaṇabrāhmaṇe nimantetvā pakkosakā. Yathānubhāvanti yathābalaṃ yathāsattiṃ. Imameva gāthanti idāni vattabbaṃ sandhāyāha. Tatrāyaṃ adhippāyo – ‘‘mahārāja, sace taṃ mado abhibhaveyya, sace te nārīgaṇaparivutassa rūpādayo vā kāmaguṇe rajjasukhaṃ vā ārabbha māno uppajjeyya, athevaṃ cinteyyāsi ‘ahaṃ pure caṇḍālayoniyaṃ nibbatto channassa tiṇakuṭimattassapi abhāvā abbhokāsasayo ahosiṃ, tadā hi me mātā caṇḍālī araññaṃ dārupaṇṇādīnaṃ atthāya gacchantī maṃ kukkuragaṇassa majjhe abbhokāse nipajjāpetvā attano khīraṃ pāyetvā gacchati, sohaṃ kukkurehi parivārito tehiyeva saddhiṃ sunakhiyā khīraṃ pivitvā vaḍḍhito, evaṃ nīcajacco hutvā ajja rājā nāma jāto’ti. ‘Iti kho, tvaṃ mahārāja, iminā atthena attānaṃ ovadanto yo so pubbe abbhokāsasayo jantu araññe vajantiyā caṇḍāliyā ito cito ca anusañcarantiyā sunakhiyā ca khīraṃ pāyito sunakhehi parikiṇṇo vaḍḍhito, so ajja rājāti vuccatī’ti imaṃ gāthaṃ bhāseyyāsī’’ti.
звам̣ махаасад̇д̇о д̇асса оваад̣̇ам̣ д̣̇ад̇ваа ‘‘д̣̇инно д̇з маяаа оваад̣̇о, ид̣̇аани д̇вам̣ баб̣б̣аж̇а ваа маа ваа, ад̇д̇анаава ад̇д̇ано гаммасса вибаагам̣ бадисзвиссад̇ий’’д̇и вад̇ваа аагаасз уббад̇ид̇ваа д̇асса мад̇т̇агз баад̣̇араж̇ам̣ баад̇знд̇о химаванд̇амзва г̇ад̇о. рааж̇ааби д̇ам̣ д̣̇исваа уббаннасам̣взг̇о ж̇здтабуд̇д̇асса раж̇ж̇ам̣ д̣̇ад̇ваа б̣алагааяам̣ нивад̇д̇зд̇ваа химаванд̇аабхимуко бааяааси. махаасад̇д̇о д̇ассааг̇аманам̣ н̃ад̇ваа исиг̇ан̣абаривуд̇о ааг̇анд̇ваа д̇ам̣ аад̣̇ааяа г̇анд̇ваа баб̣б̣ааж̇зд̇ваа гасин̣абаригаммам̣ аажигки. со жхаанаабхин̃н̃ам̣ ниб̣б̣ад̇д̇зси. ид̇и д̇з убхоби б̣рахмалогуубаг̇аа ахзсум̣.
Evaṃ mahāsatto tassa ovādaṃ datvā ‘‘dinno te mayā ovādo, idāni tvaṃ pabbaja vā mā vā, attanāva attano kammassa vipākaṃ paṭisevissatī’’ti vatvā ākāse uppatitvā tassa matthake pādarajaṃ pātento himavantameva gato. Rājāpi taṃ disvā uppannasaṃvego jeṭṭhaputtassa rajjaṃ datvā balakāyaṃ nivattetvā himavantābhimukho pāyāsi. Mahāsatto tassāgamanaṃ ñatvā isigaṇaparivuto āgantvā taṃ ādāya gantvā pabbājetvā kasiṇaparikammaṃ ācikkhi. So jhānābhiññaṃ nibbattesi. Iti te ubhopi brahmalokūpagā ahesuṃ.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣, бхигкавз, бораан̣агабан̣д̣ид̇аа д̇ийн̣и жад̇д̇аари бхаванд̇араани г̇ажчанд̇ааби д̣̇ал̣хависсаасаава ахзсу’’нд̇и вад̇ваа ж̇аад̇агам̣ самод̇хаанзси – ‘‘д̇ад̣̇аа самбхууд̇абан̣д̣ид̇о аананд̣̇о ахоси, жид̇д̇абан̣д̣ид̇о бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ, bhikkhave, porāṇakapaṇḍitā tīṇi cattāri bhavantarāni gacchantāpi daḷhavissāsāva ahesu’’nti vatvā jātakaṃ samodhānesi – ‘‘tadā sambhūtapaṇḍito ānando ahosi, cittapaṇḍito pana ahameva ahosi’’nti.
жид̇д̇асамбхууд̇аж̇аад̇агаван̣н̣анаа д̣̇уд̇ияаа
Cittasambhūtajātakavaṇṇanā dutiyā
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 498. жид̇д̇асамбхууд̇аж̇аад̇агам̣ • 498. Cittasambhūtajātakaṃ
