| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
2. து³தியவக்³கோ³
2. Dutiyavaggo
(16) 7. சித்தட்டி²திகதா²
(16) 7. Cittaṭṭhitikathā
335. ஏகங் சித்தங் தி³வஸங் திட்ட²தீதி? ஆமந்தா. உபட்³ட⁴தி³வஸோ உப்பாத³க்க²ணோ, உபட்³ட⁴தி³வஸோ வயக்க²ணோதி? ந ஹேவங் வத்தப்³பே³.
335. Ekaṃ cittaṃ divasaṃ tiṭṭhatīti? Āmantā. Upaḍḍhadivaso uppādakkhaṇo, upaḍḍhadivaso vayakkhaṇoti? Na hevaṃ vattabbe.
ஏகங் சித்தங் த்³வே தி³வஸே திட்ட²தீதி? ஆமந்தா. தி³வஸோ உப்பாத³க்க²ணோ, தி³வஸோ வயக்க²ணோதி? ந ஹேவங் வத்தப்³பே³.
Ekaṃ cittaṃ dve divase tiṭṭhatīti? Āmantā. Divaso uppādakkhaṇo, divaso vayakkhaṇoti? Na hevaṃ vattabbe.
ஏகங் சித்தங் சத்தாரோ தி³வஸே திட்ட²தி… அட்ட² தி³வஸே திட்ட²தி… த³ஸ தி³வஸே திட்ட²தி… வீஸதி தி³வஸே திட்ட²தி… மாஸங் திட்ட²தி… த்³வே மாஸே திட்ட²தி… சத்தாரோ மாஸே திட்ட²தி… அட்ட² மாஸே திட்ட²தி… த³ஸ மாஸே திட்ட²தி… ஸங்வச்ச²ரங் திட்ட²தி… த்³வே வஸ்ஸானி திட்ட²தி… சத்தாரி வஸ்ஸானி திட்ட²தி… அட்ட² வஸ்ஸானி திட்ட²தி… த³ஸ வஸ்ஸானி திட்ட²தி… வீஸதி வஸ்ஸானி திட்ட²தி… திங்ஸ வஸ்ஸானி திட்ட²தி… சத்தாரீஸ வஸ்ஸானி திட்ட²தி… பஞ்ஞாஸ வஸ்ஸானி திட்ட²தி… வஸ்ஸஸதங் திட்ட²தி… த்³வே வஸ்ஸஸதானி திட்ட²தி… சத்தாரி வஸ்ஸஸதானி திட்ட²தி… பஞ்ச வஸ்ஸஸதானி திட்ட²தி… வஸ்ஸஸஹஸ்ஸங் திட்ட²தி… த்³வே வஸ்ஸஸஹஸ்ஸானி திட்ட²தி… சத்தாரி வஸ்ஸஸஹஸ்ஸானி திட்ட²தி… அட்ட² வஸ்ஸஸஹஸ்ஸானி திட்ட²தி… ஸோளஸ வஸ்ஸஸஹஸ்ஸானி திட்ட²தி… கப்பங் திட்ட²தி… த்³வே கப்பே திட்ட²தி… சத்தாரோ கப்பே திட்ட²தி… அட்ட² கப்பே திட்ட²தி… ஸோளஸ கப்பே திட்ட²தி… பா³த்திங்ஸ கப்பே திட்ட²தி… சதுஸட்டி² கப்பே திட்ட²தி… பஞ்ச கப்பஸதானி திட்ட²தி… கப்பஸஹஸ்ஸானி திட்ட²தி… த்³வே கப்பஸஹஸ்ஸானி திட்ட²தி… சத்தாரி கப்பஸஹஸ்ஸானி திட்ட²தி… அட்ட² கப்பஸஹஸ்ஸானி திட்ட²தி… ஸோளஸ கப்பஸஹஸ்ஸானி திட்ட²தி… வீஸதி கப்பஸஹஸ்ஸானி திட்ட²தி… சத்தாரீஸ கப்பஸஹஸ்ஸானி திட்ட²தி… ஸட்டி² கப்பஸஹஸ்ஸானி திட்ட²தி… சதுராஸீதி கப்பஸஹஸ்ஸானி திட்ட²தீதி? ஆமந்தா. த்³வேசத்தாரீஸ கப்பஸஹஸ்ஸானி உப்பாத³க்க²ணோ, த்³வேசத்தாரீஸ கப்பஸஹஸ்ஸானி வயக்க²ணோதி? ந ஹேவங் வத்தப்³பே³.
Ekaṃ cittaṃ cattāro divase tiṭṭhati… aṭṭha divase tiṭṭhati… dasa divase tiṭṭhati… vīsati divase tiṭṭhati… māsaṃ tiṭṭhati… dve māse tiṭṭhati… cattāro māse tiṭṭhati… aṭṭha māse tiṭṭhati… dasa māse tiṭṭhati… saṃvaccharaṃ tiṭṭhati… dve vassāni tiṭṭhati… cattāri vassāni tiṭṭhati… aṭṭha vassāni tiṭṭhati… dasa vassāni tiṭṭhati… vīsati vassāni tiṭṭhati… tiṃsa vassāni tiṭṭhati… cattārīsa vassāni tiṭṭhati… paññāsa vassāni tiṭṭhati… vassasataṃ tiṭṭhati… dve vassasatāni tiṭṭhati… cattāri vassasatāni tiṭṭhati… pañca vassasatāni tiṭṭhati… vassasahassaṃ tiṭṭhati… dve vassasahassāni tiṭṭhati… cattāri vassasahassāni tiṭṭhati… aṭṭha vassasahassāni tiṭṭhati… soḷasa vassasahassāni tiṭṭhati… kappaṃ tiṭṭhati… dve kappe tiṭṭhati… cattāro kappe tiṭṭhati… aṭṭha kappe tiṭṭhati… soḷasa kappe tiṭṭhati… bāttiṃsa kappe tiṭṭhati… catusaṭṭhi kappe tiṭṭhati… pañca kappasatāni tiṭṭhati… kappasahassāni tiṭṭhati… dve kappasahassāni tiṭṭhati… cattāri kappasahassāni tiṭṭhati… aṭṭha kappasahassāni tiṭṭhati… soḷasa kappasahassāni tiṭṭhati… vīsati kappasahassāni tiṭṭhati… cattārīsa kappasahassāni tiṭṭhati… saṭṭhi kappasahassāni tiṭṭhati… caturāsīti kappasahassāni tiṭṭhatīti? Āmantā. Dvecattārīsa kappasahassāni uppādakkhaṇo, dvecattārīsa kappasahassāni vayakkhaṇoti? Na hevaṃ vattabbe.
ஏகங் சித்தங் தி³வஸங் திட்ட²தீதி? ஆமந்தா. அத்த²ஞ்ஞே த⁴ம்மா ஏகாஹங் ப³ஹும்பி உப்பஜ்ஜித்வா நிருஜ்ஜ²ந்தீதி? ஆமந்தா. தே த⁴ம்மா சித்தேன லஹுபரிவத்தாதி? ந ஹேவங் வத்தப்³பே³.
Ekaṃ cittaṃ divasaṃ tiṭṭhatīti? Āmantā. Atthaññe dhammā ekāhaṃ bahumpi uppajjitvā nirujjhantīti? Āmantā. Te dhammā cittena lahuparivattāti? Na hevaṃ vattabbe.
தே த⁴ம்மா சித்தேன லஹுபரிவத்தாதி? ஆமந்தா. நனு வுத்தங் ப⁴க³வதா – ‘‘நாஹங், பி⁴க்க²வே, அஞ்ஞங் ஏகத⁴ம்மம்பி ஸமனுபஸ்ஸாமி ஏவங் லஹுபரிவத்தங் யத²யித³ங் சித்தங். யாவஞ்சித³ங், பி⁴க்க²வே, உபமாபி ந ஸுகரா யாவ லஹுபரிவத்தங் சித்த’’ந்தி 1. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘தே த⁴ம்மா சித்தேன லஹுபரிவத்தா’’தி.
Te dhammā cittena lahuparivattāti? Āmantā. Nanu vuttaṃ bhagavatā – ‘‘nāhaṃ, bhikkhave, aññaṃ ekadhammampi samanupassāmi evaṃ lahuparivattaṃ yathayidaṃ cittaṃ. Yāvañcidaṃ, bhikkhave, upamāpi na sukarā yāva lahuparivattaṃ citta’’nti 2. Attheva suttantoti? Āmantā. Tena hi na vattabbaṃ – ‘‘te dhammā cittena lahuparivattā’’ti.
தே த⁴ம்மா சித்தேன லஹுபரிவத்தாதி? ஆமந்தா. நனு வுத்தங் ப⁴க³வதா – ‘‘ஸெய்யதா²பி, பி⁴க்க²வே, மக்கடோ அரஞ்ஞே பவனே சரமானோ ஸாக²ங் க³ண்ஹதி, தங் முஞ்சித்வா அஞ்ஞங் க³ண்ஹதி, தங் முஞ்சித்வா அஞ்ஞங் க³ண்ஹதி; ஏவமேவ கோ², பி⁴க்க²வே, யமித³ங் 3 வுச்சதி சித்தங் இதிபி மனோ இதிபி விஞ்ஞாணங் இதிபி தங் ரத்தியா ச தி³வஸஸ்ஸ ச அஞ்ஞதே³வ உப்பஜ்ஜதி அஞ்ஞங் நிருஜ்ஜ²தீ’’தி 4. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘தே த⁴ம்மா சித்தேன லஹுபரிவத்தா’’தி.
Te dhammā cittena lahuparivattāti? Āmantā. Nanu vuttaṃ bhagavatā – ‘‘seyyathāpi, bhikkhave, makkaṭo araññe pavane caramāno sākhaṃ gaṇhati, taṃ muñcitvā aññaṃ gaṇhati, taṃ muñcitvā aññaṃ gaṇhati; evameva kho, bhikkhave, yamidaṃ 5 vuccati cittaṃ itipi mano itipi viññāṇaṃ itipi taṃ rattiyā ca divasassa ca aññadeva uppajjati aññaṃ nirujjhatī’’ti 6. Attheva suttantoti? Āmantā. Tena hi na vattabbaṃ – ‘‘te dhammā cittena lahuparivattā’’ti.
336. ஏகங் சித்தங் தி³வஸங் திட்ட²தீதி? ஆமந்தா. சக்கு²விஞ்ஞாணங் தி³வஸங் திட்ட²தீதி? ந ஹேவங் வத்தப்³பே³. ஸோதவிஞ்ஞாணங்…பே॰… கா⁴னவிஞ்ஞாணங்… ஜிவ்ஹாவிஞ்ஞாணங்… காயவிஞ்ஞாணங்… அகுஸலங் சித்தங்… ராக³ஸஹக³தங்… தோ³ஸஸஹக³தங்… மோஹஸஹக³தங்… மானஸஹக³தங்… தி³ட்டி²ஸஹக³தங்… விசிகிச்சா²ஸஹக³தங்… தி²னஸஹக³தங்… உத்³த⁴ச்சஸஹக³தங்… அஹிரிகஸஹக³தங்… அனொத்தப்பஸஹக³தங் சித்தங் தி³வஸங் திட்ட²தீதி? ந ஹேவங் வத்தப்³பே³…பே॰….
336. Ekaṃ cittaṃ divasaṃ tiṭṭhatīti? Āmantā. Cakkhuviññāṇaṃ divasaṃ tiṭṭhatīti? Na hevaṃ vattabbe. Sotaviññāṇaṃ…pe… ghānaviññāṇaṃ… jivhāviññāṇaṃ… kāyaviññāṇaṃ… akusalaṃ cittaṃ… rāgasahagataṃ… dosasahagataṃ… mohasahagataṃ… mānasahagataṃ… diṭṭhisahagataṃ… vicikicchāsahagataṃ… thinasahagataṃ… uddhaccasahagataṃ… ahirikasahagataṃ… anottappasahagataṃ cittaṃ divasaṃ tiṭṭhatīti? Na hevaṃ vattabbe…pe….
ஏகங் சித்தங் தி³வஸங் திட்ட²தீதி? ஆமந்தா. யேனேவ சித்தேன சக்கு²னா ரூபங் பஸ்ஸதி, தேனேவ சித்தேன ஸோதேன ஸத்³த³ங் ஸுணாதி…பே॰… கா⁴னேன க³ந்த⁴ங் கா⁴யதி… ஜிவ்ஹாய ரஸங் ஸாயதி… காயேன பொ²ட்ட²ப்³ப³ங் பு²ஸதி… மனஸா த⁴ம்மங் விஜானாதி…பே॰… யேனேவ சித்தேன மனஸா த⁴ம்மங் விஜானாதி, தேனேவ சித்தேன சக்கு²னா ரூபங் பஸ்ஸதி…பே॰… ஸோதேன ஸத்³த³ங் ஸுணாதி… கா⁴னேன க³ந்த⁴ங் கா⁴யதி… ஜிவ்ஹாய ரஸங் ஸாயதி…பே॰… காயேன பொ²ட்ட²ப்³ப³ங் பு²ஸதீதி? ந ஹேவங் வத்தப்³பே³…பே॰….
Ekaṃ cittaṃ divasaṃ tiṭṭhatīti? Āmantā. Yeneva cittena cakkhunā rūpaṃ passati, teneva cittena sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti…pe… yeneva cittena manasā dhammaṃ vijānāti, teneva cittena cakkhunā rūpaṃ passati…pe… sotena saddaṃ suṇāti… ghānena gandhaṃ ghāyati… jivhāya rasaṃ sāyati…pe… kāyena phoṭṭhabbaṃ phusatīti? Na hevaṃ vattabbe…pe….
ஏகங் சித்தங் தி³வஸங் திட்ட²தீதி? ஆமந்தா. யேனேவ சித்தேன அபி⁴க்கமதி, தேனேவ சித்தேன படிக்கமதி; யேனேவ சித்தேன படிக்கமதி, தேனேவ சித்தேன அபி⁴க்கமதி; யேனேவ சித்தேன ஆலோகேதி, தேனேவ சித்தேன விலோகேதி; யேனேவ சித்தேன விலோகேதி, தேனேவ சித்தேன ஆலோகேதி; யேனேவ சித்தேன ஸமிஞ்ஜேதி, தேனேவ சித்தேன பஸாரேதி ; யேனேவ சித்தேன பஸாரேதி, தேனேவ சித்தேன ஸமிஞ்ஜேதீதி? ந ஹேவங் வத்தப்³பே³…பே॰….
Ekaṃ cittaṃ divasaṃ tiṭṭhatīti? Āmantā. Yeneva cittena abhikkamati, teneva cittena paṭikkamati; yeneva cittena paṭikkamati, teneva cittena abhikkamati; yeneva cittena āloketi, teneva cittena viloketi; yeneva cittena viloketi, teneva cittena āloketi; yeneva cittena samiñjeti, teneva cittena pasāreti ; yeneva cittena pasāreti, teneva cittena samiñjetīti? Na hevaṃ vattabbe…pe….
337. ஆகாஸானஞ்சாயதனூபகா³னங் தே³வானங் ஏகங் சித்தங் யாவதாயுகங் திட்ட²தீதி? ஆமந்தா. மனுஸ்ஸானங் ஏகங் சித்தங் யாவதாயுகங் திட்ட²தீதி? ந ஹேவங் வத்தப்³பே³.
337. Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti? Āmantā. Manussānaṃ ekaṃ cittaṃ yāvatāyukaṃ tiṭṭhatīti? Na hevaṃ vattabbe.
ஆகாஸானஞ்சாயதனூபகா³னங் தே³வானங் ஏகங் சித்தங் யாவதாயுகங் திட்ட²தீதி? ஆமந்தா. சாதுமஹாராஜிகானங் தே³வானங்…பே॰… தாவதிங்ஸானங் தே³வானங்… யாமானங் தே³வானங்… துஸிதானங் தே³வானங்… நிம்மானரதீனங் தே³வானங்… பரனிம்மிதவஸவத்தீனங் தே³வானங்… ப்³ரஹ்மபாரிஸஜ்ஜானங் தே³வானங்… ப்³ரஹ்மபுரோஹிதானங் தே³வானங்… மஹாப்³ரஹ்மானங் தே³வானங்… பரித்தாபா⁴னங் தே³வானங்… அப்பமாணாபா⁴னங் தே³வானங்… ஆப⁴ஸ்ஸரானங் தே³வானங்… பரித்தஸுபா⁴னங் தே³வானங்… அப்பமாணஸுபா⁴னங் தே³வானங்… ஸுப⁴கிண்ஹானங் தே³வானங் … வேஹப்ப²லானங் தே³வானங்… அவிஹானங் தே³வானங்… அதப்பானங் தே³வானங்… ஸுத³ஸ்ஸானங் தே³வானங்… ஸுத³ஸ்ஸீனங் தே³வானங்… அகனிட்டா²னங் தே³வானங் ஏகங் சித்தங் யாவதாயுகங் திட்ட²தீதி? ந ஹேவங் வத்தப்³பே³.
Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti? Āmantā. Cātumahārājikānaṃ devānaṃ…pe… tāvatiṃsānaṃ devānaṃ… yāmānaṃ devānaṃ… tusitānaṃ devānaṃ… nimmānaratīnaṃ devānaṃ… paranimmitavasavattīnaṃ devānaṃ… brahmapārisajjānaṃ devānaṃ… brahmapurohitānaṃ devānaṃ… mahābrahmānaṃ devānaṃ… parittābhānaṃ devānaṃ… appamāṇābhānaṃ devānaṃ… ābhassarānaṃ devānaṃ… parittasubhānaṃ devānaṃ… appamāṇasubhānaṃ devānaṃ… subhakiṇhānaṃ devānaṃ … vehapphalānaṃ devānaṃ… avihānaṃ devānaṃ… atappānaṃ devānaṃ… sudassānaṃ devānaṃ… sudassīnaṃ devānaṃ… akaniṭṭhānaṃ devānaṃ ekaṃ cittaṃ yāvatāyukaṃ tiṭṭhatīti? Na hevaṃ vattabbe.
ஆகாஸானஞ்சாயதனூபகா³னங் தே³வானங் வீஸதி கப்பஸஹஸ்ஸானி ஆயுப்பமாணங், ஆகாஸானஞ்சாயதனூபகா³னங் தே³வானங் ஏகங் சித்தங் வீஸதி கப்பஸஹஸ்ஸானி திட்ட²தீதி? ஆமந்தா. மனுஸ்ஸானங் வஸ்ஸஸதங் ஆயுப்பமாணங், மனுஸ்ஸானங் ஏகங் சித்தங் வஸ்ஸஸதங் திட்ட²தீதி? ந ஹேவங் வத்தப்³பே³.
Ākāsānañcāyatanūpagānaṃ devānaṃ vīsati kappasahassāni āyuppamāṇaṃ, ākāsānañcāyatanūpagānaṃ devānaṃ ekaṃ cittaṃ vīsati kappasahassāni tiṭṭhatīti? Āmantā. Manussānaṃ vassasataṃ āyuppamāṇaṃ, manussānaṃ ekaṃ cittaṃ vassasataṃ tiṭṭhatīti? Na hevaṃ vattabbe.
ஆகாஸானஞ்சாயதனூபகா³னங் தே³வானங் வீஸதி கப்பஸஹஸ்ஸானி ஆயுப்பமாணங், ஆகாஸானஞ்சாயதனூபகா³னங் தே³வானங் ஏகங் சித்தங் வீஸதி கப்பஸஹஸ்ஸானி திட்ட²தீதி? ஆமந்தா. சாதுமஹாராஜிகானங் தே³வானங் பஞ்ச வஸ்ஸஸதானி ஆயுப்பமாணங், சாதுமஹாராஜிகானங் தே³வானங் ஏகங் சித்தங் பஞ்ச வஸ்ஸஸதானி திட்ட²தி… வஸ்ஸஸஹஸ்ஸங் திட்ட²தி… த்³வே வஸ்ஸஸஹஸ்ஸானி திட்ட²தி… சத்தாரி வஸ்ஸஸஹஸ்ஸானி திட்ட²தி… அட்ட² வஸ்ஸஸஹஸ்ஸானி திட்ட²தி… ஸோளஸ வஸ்ஸஸஹஸ்ஸானி திட்ட²தி… கப்பஸ்ஸ ததியபா⁴க³ங் திட்ட²தி… உபட்³ட⁴கப்பங் திட்ட²தி… ஏகங் கப்பங் திட்ட²தி… த்³வே கப்பே திட்ட²தி… சத்தாரோ கப்பே திட்ட²தி… அட்ட² கப்பே திட்ட²தி… ஸோளஸ கப்பே திட்ட²தி… பா³த்திங்ஸ கப்பே திட்ட²தி… சதுஸட்டி² கப்பே திட்ட²தி… பஞ்ச கப்பஸதானி திட்ட²தி… கப்பஸஹஸ்ஸங் திட்ட²தி… த்³வே கப்பஸஹஸ்ஸானி திட்ட²தி… சத்தாரி கப்பஸஹஸ்ஸானி திட்ட²தி… அட்ட² கப்பஸஹஸ்ஸானி திட்ட²தி… அகனிட்டா²னங் தே³வானங் ஸோளஸ கப்பஸஹஸ்ஸானி ஆயுப்பமாணங், அகனிட்டா²னங் தே³வானங் ஏகங் சித்தங் ஸோளஸ கப்பஸஹஸ்ஸானி திட்ட²தீதி? ந ஹேவங் வத்தப்³பே³.
Ākāsānañcāyatanūpagānaṃ devānaṃ vīsati kappasahassāni āyuppamāṇaṃ, ākāsānañcāyatanūpagānaṃ devānaṃ ekaṃ cittaṃ vīsati kappasahassāni tiṭṭhatīti? Āmantā. Cātumahārājikānaṃ devānaṃ pañca vassasatāni āyuppamāṇaṃ, cātumahārājikānaṃ devānaṃ ekaṃ cittaṃ pañca vassasatāni tiṭṭhati… vassasahassaṃ tiṭṭhati… dve vassasahassāni tiṭṭhati… cattāri vassasahassāni tiṭṭhati… aṭṭha vassasahassāni tiṭṭhati… soḷasa vassasahassāni tiṭṭhati… kappassa tatiyabhāgaṃ tiṭṭhati… upaḍḍhakappaṃ tiṭṭhati… ekaṃ kappaṃ tiṭṭhati… dve kappe tiṭṭhati… cattāro kappe tiṭṭhati… aṭṭha kappe tiṭṭhati… soḷasa kappe tiṭṭhati… bāttiṃsa kappe tiṭṭhati… catusaṭṭhi kappe tiṭṭhati… pañca kappasatāni tiṭṭhati… kappasahassaṃ tiṭṭhati… dve kappasahassāni tiṭṭhati… cattāri kappasahassāni tiṭṭhati… aṭṭha kappasahassāni tiṭṭhati… akaniṭṭhānaṃ devānaṃ soḷasa kappasahassāni āyuppamāṇaṃ, akaniṭṭhānaṃ devānaṃ ekaṃ cittaṃ soḷasa kappasahassāni tiṭṭhatīti? Na hevaṃ vattabbe.
ஆகாஸானஞ்சாயதனூபகா³னங் தே³வானங் சித்தங் முஹுத்தங் முஹுத்தங் உப்பஜ்ஜதி முஹுத்தங் முஹுத்தங் நிருஜ்ஜ²தீதி? ஆமந்தா. ஆகாஸானஞ்சாயதனூபகா³ தே³வா முஹுத்தங் முஹுத்தங் சவந்தி முஹுத்தங் முஹுத்தங் உப்பஜ்ஜந்தீதி? ந ஹேவங் வத்தப்³பே³.
Ākāsānañcāyatanūpagānaṃ devānaṃ cittaṃ muhuttaṃ muhuttaṃ uppajjati muhuttaṃ muhuttaṃ nirujjhatīti? Āmantā. Ākāsānañcāyatanūpagā devā muhuttaṃ muhuttaṃ cavanti muhuttaṃ muhuttaṃ uppajjantīti? Na hevaṃ vattabbe.
ஆகாஸானஞ்சாயதனூபகா³னங் தே³வானங் ஏகங் சித்தங் யாவதாயுகங் திட்ட²தீதி ? ஆமந்தா. ஆகாஸானஞ்சாயதனூபகா³ தே³வா யேனேவ சித்தேன உப்பஜ்ஜந்தி, தேனேவ சித்தேன சவந்தீதி? ந ஹேவங் வத்தப்³பே³…பே॰….
Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti ? Āmantā. Ākāsānañcāyatanūpagā devā yeneva cittena uppajjanti, teneva cittena cavantīti? Na hevaṃ vattabbe…pe….
சித்தட்டி²திகதா² நிட்டி²தா.
Cittaṭṭhitikathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. சித்தட்டி²திகதா²வண்ணனா • 7. Cittaṭṭhitikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. சித்தட்டி²திகதா²வண்ணனா • 7. Cittaṭṭhitikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. சித்தட்டி²திகதா²வண்ணனா • 7. Cittaṭṭhitikathāvaṇṇanā
