| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២. ទុតិយវគ្គោ
2. Dutiyavaggo
(១៦) ៧. ចិត្តដ្ឋិតិកថា
(16) 7. Cittaṭṭhitikathā
៣៣៥. ឯកំ ចិត្តំ ទិវសំ តិដ្ឋតីតិ? អាមន្តា។ ឧបឌ្ឍទិវសោ ឧប្បាទក្ខណោ, ឧបឌ្ឍទិវសោ វយក្ខណោតិ? ន ហេវំ វត្តព្ពេ។
335. Ekaṃ cittaṃ divasaṃ tiṭṭhatīti? Āmantā. Upaḍḍhadivaso uppādakkhaṇo, upaḍḍhadivaso vayakkhaṇoti? Na hevaṃ vattabbe.
ឯកំ ចិត្តំ ទ្វេ ទិវសេ តិដ្ឋតីតិ? អាមន្តា។ ទិវសោ ឧប្បាទក្ខណោ, ទិវសោ វយក្ខណោតិ? ន ហេវំ វត្តព្ពេ។
Ekaṃ cittaṃ dve divase tiṭṭhatīti? Āmantā. Divaso uppādakkhaṇo, divaso vayakkhaṇoti? Na hevaṃ vattabbe.
ឯកំ ចិត្តំ ចត្តារោ ទិវសេ តិដ្ឋតិ… អដ្ឋ ទិវសេ តិដ្ឋតិ… ទស ទិវសេ តិដ្ឋតិ… វីសតិ ទិវសេ តិដ្ឋតិ… មាសំ តិដ្ឋតិ… ទ្វេ មាសេ តិដ្ឋតិ… ចត្តារោ មាសេ តិដ្ឋតិ… អដ្ឋ មាសេ តិដ្ឋតិ… ទស មាសេ តិដ្ឋតិ… សំវច្ឆរំ តិដ្ឋតិ… ទ្វេ វស្សានិ តិដ្ឋតិ… ចត្តារិ វស្សានិ តិដ្ឋតិ… អដ្ឋ វស្សានិ តិដ្ឋតិ… ទស វស្សានិ តិដ្ឋតិ… វីសតិ វស្សានិ តិដ្ឋតិ… តិំស វស្សានិ តិដ្ឋតិ… ចត្តារីស វស្សានិ តិដ្ឋតិ… បញ្ញាស វស្សានិ តិដ្ឋតិ… វស្សសតំ តិដ្ឋតិ… ទ្វេ វស្សសតានិ តិដ្ឋតិ… ចត្តារិ វស្សសតានិ តិដ្ឋតិ… បញ្ច វស្សសតានិ តិដ្ឋតិ… វស្សសហស្សំ តិដ្ឋតិ… ទ្វេ វស្សសហស្សានិ តិដ្ឋតិ… ចត្តារិ វស្សសហស្សានិ តិដ្ឋតិ… អដ្ឋ វស្សសហស្សានិ តិដ្ឋតិ… សោឡស វស្សសហស្សានិ តិដ្ឋតិ… កប្បំ តិដ្ឋតិ… ទ្វេ កប្បេ តិដ្ឋតិ… ចត្តារោ កប្បេ តិដ្ឋតិ… អដ្ឋ កប្បេ តិដ្ឋតិ… សោឡស កប្បេ តិដ្ឋតិ… ពាត្តិំស កប្បេ តិដ្ឋតិ… ចតុសដ្ឋិ កប្បេ តិដ្ឋតិ… បញ្ច កប្បសតានិ តិដ្ឋតិ… កប្បសហស្សានិ តិដ្ឋតិ… ទ្វេ កប្បសហស្សានិ តិដ្ឋតិ… ចត្តារិ កប្បសហស្សានិ តិដ្ឋតិ… អដ្ឋ កប្បសហស្សានិ តិដ្ឋតិ… សោឡស កប្បសហស្សានិ តិដ្ឋតិ… វីសតិ កប្បសហស្សានិ តិដ្ឋតិ… ចត្តារីស កប្បសហស្សានិ តិដ្ឋតិ… សដ្ឋិ កប្បសហស្សានិ តិដ្ឋតិ… ចតុរាសីតិ កប្បសហស្សានិ តិដ្ឋតីតិ? អាមន្តា។ ទ្វេចត្តារីស កប្បសហស្សានិ ឧប្បាទក្ខណោ, ទ្វេចត្តារីស កប្បសហស្សានិ វយក្ខណោតិ? ន ហេវំ វត្តព្ពេ។
Ekaṃ cittaṃ cattāro divase tiṭṭhati… aṭṭha divase tiṭṭhati… dasa divase tiṭṭhati… vīsati divase tiṭṭhati… māsaṃ tiṭṭhati… dve māse tiṭṭhati… cattāro māse tiṭṭhati… aṭṭha māse tiṭṭhati… dasa māse tiṭṭhati… saṃvaccharaṃ tiṭṭhati… dve vassāni tiṭṭhati… cattāri vassāni tiṭṭhati… aṭṭha vassāni tiṭṭhati… dasa vassāni tiṭṭhati… vīsati vassāni tiṭṭhati… tiṃsa vassāni tiṭṭhati… cattārīsa vassāni tiṭṭhati… paññāsa vassāni tiṭṭhati… vassasataṃ tiṭṭhati… dve vassasatāni tiṭṭhati… cattāri vassasatāni tiṭṭhati… pañca vassasatāni tiṭṭhati… vassasahassaṃ tiṭṭhati… dve vassasahassāni tiṭṭhati… cattāri vassasahassāni tiṭṭhati… aṭṭha vassasahassāni tiṭṭhati… soḷasa vassasahassāni tiṭṭhati… kappaṃ tiṭṭhati… dve kappe tiṭṭhati… cattāro kappe tiṭṭhati… aṭṭha kappe tiṭṭhati… soḷasa kappe tiṭṭhati… bāttiṃsa kappe tiṭṭhati… catusaṭṭhi kappe tiṭṭhati… pañca kappasatāni tiṭṭhati… kappasahassāni tiṭṭhati… dve kappasahassāni tiṭṭhati… cattāri kappasahassāni tiṭṭhati… aṭṭha kappasahassāni tiṭṭhati… soḷasa kappasahassāni tiṭṭhati… vīsati kappasahassāni tiṭṭhati… cattārīsa kappasahassāni tiṭṭhati… saṭṭhi kappasahassāni tiṭṭhati… caturāsīti kappasahassāni tiṭṭhatīti? Āmantā. Dvecattārīsa kappasahassāni uppādakkhaṇo, dvecattārīsa kappasahassāni vayakkhaṇoti? Na hevaṃ vattabbe.
ឯកំ ចិត្តំ ទិវសំ តិដ្ឋតីតិ? អាមន្តា។ អត្ថញ្ញេ ធម្មា ឯកាហំ ពហុម្បិ ឧប្បជ្ជិត្វា និរុជ្ឈន្តីតិ? អាមន្តា។ តេ ធម្មា ចិត្តេន លហុបរិវត្តាតិ? ន ហេវំ វត្តព្ពេ។
Ekaṃ cittaṃ divasaṃ tiṭṭhatīti? Āmantā. Atthaññe dhammā ekāhaṃ bahumpi uppajjitvā nirujjhantīti? Āmantā. Te dhammā cittena lahuparivattāti? Na hevaṃ vattabbe.
តេ ធម្មា ចិត្តេន លហុបរិវត្តាតិ? អាមន្តា។ ននុ វុត្តំ ភគវតា – ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ ឯវំ លហុបរិវត្តំ យថយិទំ ចិត្តំ។ យាវញ្ចិទំ, ភិក្ខវេ, ឧបមាបិ ន សុករា យាវ លហុបរិវត្តំ ចិត្ត’’ន្តិ 1។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘តេ ធម្មា ចិត្តេន លហុបរិវត្តា’’តិ។
Te dhammā cittena lahuparivattāti? Āmantā. Nanu vuttaṃ bhagavatā – ‘‘nāhaṃ, bhikkhave, aññaṃ ekadhammampi samanupassāmi evaṃ lahuparivattaṃ yathayidaṃ cittaṃ. Yāvañcidaṃ, bhikkhave, upamāpi na sukarā yāva lahuparivattaṃ citta’’nti 2. Attheva suttantoti? Āmantā. Tena hi na vattabbaṃ – ‘‘te dhammā cittena lahuparivattā’’ti.
តេ ធម្មា ចិត្តេន លហុបរិវត្តាតិ? អាមន្តា។ ននុ វុត្តំ ភគវតា – ‘‘សេយ្យថាបិ, ភិក្ខវេ, មក្កដោ អរញ្ញេ បវនេ ចរមានោ សាខំ គណ្ហតិ, តំ មុញ្ចិត្វា អញ្ញំ គណ្ហតិ, តំ មុញ្ចិត្វា អញ្ញំ គណ្ហតិ; ឯវមេវ ខោ, ភិក្ខវេ, យមិទំ 3 វុច្ចតិ ចិត្តំ ឥតិបិ មនោ ឥតិបិ វិញ្ញាណំ ឥតិបិ តំ រត្តិយា ច ទិវសស្ស ច អញ្ញទេវ ឧប្បជ្ជតិ អញ្ញំ និរុជ្ឈតី’’តិ 4។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘តេ ធម្មា ចិត្តេន លហុបរិវត្តា’’តិ។
Te dhammā cittena lahuparivattāti? Āmantā. Nanu vuttaṃ bhagavatā – ‘‘seyyathāpi, bhikkhave, makkaṭo araññe pavane caramāno sākhaṃ gaṇhati, taṃ muñcitvā aññaṃ gaṇhati, taṃ muñcitvā aññaṃ gaṇhati; evameva kho, bhikkhave, yamidaṃ 5 vuccati cittaṃ itipi mano itipi viññāṇaṃ itipi taṃ rattiyā ca divasassa ca aññadeva uppajjati aññaṃ nirujjhatī’’ti 6. Attheva suttantoti? Āmantā. Tena hi na vattabbaṃ – ‘‘te dhammā cittena lahuparivattā’’ti.
៣៣៦. ឯកំ ចិត្តំ ទិវសំ តិដ្ឋតីតិ? អាមន្តា។ ចក្ខុវិញ្ញាណំ ទិវសំ តិដ្ឋតីតិ? ន ហេវំ វត្តព្ពេ។ សោតវិញ្ញាណំ…បេ.… ឃានវិញ្ញាណំ… ជិវ្ហាវិញ្ញាណំ… កាយវិញ្ញាណំ… អកុសលំ ចិត្តំ… រាគសហគតំ… ទោសសហគតំ… មោហសហគតំ… មានសហគតំ… ទិដ្ឋិសហគតំ… វិចិកិច្ឆាសហគតំ… ថិនសហគតំ… ឧទ្ធច្ចសហគតំ… អហិរិកសហគតំ… អនោត្តប្បសហគតំ ចិត្តំ ទិវសំ តិដ្ឋតីតិ? ន ហេវំ វត្តព្ពេ…បេ.…។
336. Ekaṃ cittaṃ divasaṃ tiṭṭhatīti? Āmantā. Cakkhuviññāṇaṃ divasaṃ tiṭṭhatīti? Na hevaṃ vattabbe. Sotaviññāṇaṃ…pe… ghānaviññāṇaṃ… jivhāviññāṇaṃ… kāyaviññāṇaṃ… akusalaṃ cittaṃ… rāgasahagataṃ… dosasahagataṃ… mohasahagataṃ… mānasahagataṃ… diṭṭhisahagataṃ… vicikicchāsahagataṃ… thinasahagataṃ… uddhaccasahagataṃ… ahirikasahagataṃ… anottappasahagataṃ cittaṃ divasaṃ tiṭṭhatīti? Na hevaṃ vattabbe…pe….
ឯកំ ចិត្តំ ទិវសំ តិដ្ឋតីតិ? អាមន្តា។ យេនេវ ចិត្តេន ចក្ខុនា រូបំ បស្សតិ, តេនេវ ចិត្តេន សោតេន សទ្ទំ សុណាតិ…បេ.… ឃានេន គន្ធំ ឃាយតិ… ជិវ្ហាយ រសំ សាយតិ… កាយេន ផោដ្ឋព្ពំ ផុសតិ… មនសា ធម្មំ វិជានាតិ…បេ.… យេនេវ ចិត្តេន មនសា ធម្មំ វិជានាតិ, តេនេវ ចិត្តេន ចក្ខុនា រូបំ បស្សតិ…បេ.… សោតេន សទ្ទំ សុណាតិ… ឃានេន គន្ធំ ឃាយតិ… ជិវ្ហាយ រសំ សាយតិ…បេ.… កាយេន ផោដ្ឋព្ពំ ផុសតីតិ? ន ហេវំ វត្តព្ពេ…បេ.…។
Ekaṃ cittaṃ divasaṃ tiṭṭhatīti? Āmantā. Yeneva cittena cakkhunā rūpaṃ passati, teneva cittena sotena saddaṃ suṇāti…pe… ghānena gandhaṃ ghāyati… jivhāya rasaṃ sāyati… kāyena phoṭṭhabbaṃ phusati… manasā dhammaṃ vijānāti…pe… yeneva cittena manasā dhammaṃ vijānāti, teneva cittena cakkhunā rūpaṃ passati…pe… sotena saddaṃ suṇāti… ghānena gandhaṃ ghāyati… jivhāya rasaṃ sāyati…pe… kāyena phoṭṭhabbaṃ phusatīti? Na hevaṃ vattabbe…pe….
ឯកំ ចិត្តំ ទិវសំ តិដ្ឋតីតិ? អាមន្តា។ យេនេវ ចិត្តេន អភិក្កមតិ, តេនេវ ចិត្តេន បដិក្កមតិ; យេនេវ ចិត្តេន បដិក្កមតិ, តេនេវ ចិត្តេន អភិក្កមតិ; យេនេវ ចិត្តេន អាលោកេតិ, តេនេវ ចិត្តេន វិលោកេតិ; យេនេវ ចិត្តេន វិលោកេតិ, តេនេវ ចិត្តេន អាលោកេតិ; យេនេវ ចិត្តេន សមិញ្ជេតិ, តេនេវ ចិត្តេន បសារេតិ ; យេនេវ ចិត្តេន បសារេតិ, តេនេវ ចិត្តេន សមិញ្ជេតីតិ? ន ហេវំ វត្តព្ពេ…បេ.…។
Ekaṃ cittaṃ divasaṃ tiṭṭhatīti? Āmantā. Yeneva cittena abhikkamati, teneva cittena paṭikkamati; yeneva cittena paṭikkamati, teneva cittena abhikkamati; yeneva cittena āloketi, teneva cittena viloketi; yeneva cittena viloketi, teneva cittena āloketi; yeneva cittena samiñjeti, teneva cittena pasāreti ; yeneva cittena pasāreti, teneva cittena samiñjetīti? Na hevaṃ vattabbe…pe….
៣៣៧. អាកាសានញ្ចាយតនូបគានំ ទេវានំ ឯកំ ចិត្តំ យាវតាយុកំ តិដ្ឋតីតិ? អាមន្តា។ មនុស្សានំ ឯកំ ចិត្តំ យាវតាយុកំ តិដ្ឋតីតិ? ន ហេវំ វត្តព្ពេ។
337. Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti? Āmantā. Manussānaṃ ekaṃ cittaṃ yāvatāyukaṃ tiṭṭhatīti? Na hevaṃ vattabbe.
អាកាសានញ្ចាយតនូបគានំ ទេវានំ ឯកំ ចិត្តំ យាវតាយុកំ តិដ្ឋតីតិ? អាមន្តា។ ចាតុមហារាជិកានំ ទេវានំ…បេ.… តាវតិំសានំ ទេវានំ… យាមានំ ទេវានំ… តុសិតានំ ទេវានំ… និម្មានរតីនំ ទេវានំ… បរនិម្មិតវសវត្តីនំ ទេវានំ… ព្រហ្មបារិសជ្ជានំ ទេវានំ… ព្រហ្មបុរោហិតានំ ទេវានំ… មហាព្រហ្មានំ ទេវានំ… បរិត្តាភានំ ទេវានំ… អប្បមាណាភានំ ទេវានំ… អាភស្សរានំ ទេវានំ… បរិត្តសុភានំ ទេវានំ… អប្បមាណសុភានំ ទេវានំ… សុភកិណ្ហានំ ទេវានំ … វេហប្ផលានំ ទេវានំ… អវិហានំ ទេវានំ… អតប្បានំ ទេវានំ… សុទស្សានំ ទេវានំ… សុទស្សីនំ ទេវានំ… អកនិដ្ឋានំ ទេវានំ ឯកំ ចិត្តំ យាវតាយុកំ តិដ្ឋតីតិ? ន ហេវំ វត្តព្ពេ។
Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti? Āmantā. Cātumahārājikānaṃ devānaṃ…pe… tāvatiṃsānaṃ devānaṃ… yāmānaṃ devānaṃ… tusitānaṃ devānaṃ… nimmānaratīnaṃ devānaṃ… paranimmitavasavattīnaṃ devānaṃ… brahmapārisajjānaṃ devānaṃ… brahmapurohitānaṃ devānaṃ… mahābrahmānaṃ devānaṃ… parittābhānaṃ devānaṃ… appamāṇābhānaṃ devānaṃ… ābhassarānaṃ devānaṃ… parittasubhānaṃ devānaṃ… appamāṇasubhānaṃ devānaṃ… subhakiṇhānaṃ devānaṃ … vehapphalānaṃ devānaṃ… avihānaṃ devānaṃ… atappānaṃ devānaṃ… sudassānaṃ devānaṃ… sudassīnaṃ devānaṃ… akaniṭṭhānaṃ devānaṃ ekaṃ cittaṃ yāvatāyukaṃ tiṭṭhatīti? Na hevaṃ vattabbe.
អាកាសានញ្ចាយតនូបគានំ ទេវានំ វីសតិ កប្បសហស្សានិ អាយុប្បមាណំ, អាកាសានញ្ចាយតនូបគានំ ទេវានំ ឯកំ ចិត្តំ វីសតិ កប្បសហស្សានិ តិដ្ឋតីតិ? អាមន្តា។ មនុស្សានំ វស្សសតំ អាយុប្បមាណំ, មនុស្សានំ ឯកំ ចិត្តំ វស្សសតំ តិដ្ឋតីតិ? ន ហេវំ វត្តព្ពេ។
Ākāsānañcāyatanūpagānaṃ devānaṃ vīsati kappasahassāni āyuppamāṇaṃ, ākāsānañcāyatanūpagānaṃ devānaṃ ekaṃ cittaṃ vīsati kappasahassāni tiṭṭhatīti? Āmantā. Manussānaṃ vassasataṃ āyuppamāṇaṃ, manussānaṃ ekaṃ cittaṃ vassasataṃ tiṭṭhatīti? Na hevaṃ vattabbe.
អាកាសានញ្ចាយតនូបគានំ ទេវានំ វីសតិ កប្បសហស្សានិ អាយុប្បមាណំ, អាកាសានញ្ចាយតនូបគានំ ទេវានំ ឯកំ ចិត្តំ វីសតិ កប្បសហស្សានិ តិដ្ឋតីតិ? អាមន្តា។ ចាតុមហារាជិកានំ ទេវានំ បញ្ច វស្សសតានិ អាយុប្បមាណំ, ចាតុមហារាជិកានំ ទេវានំ ឯកំ ចិត្តំ បញ្ច វស្សសតានិ តិដ្ឋតិ… វស្សសហស្សំ តិដ្ឋតិ… ទ្វេ វស្សសហស្សានិ តិដ្ឋតិ… ចត្តារិ វស្សសហស្សានិ តិដ្ឋតិ… អដ្ឋ វស្សសហស្សានិ តិដ្ឋតិ… សោឡស វស្សសហស្សានិ តិដ្ឋតិ… កប្បស្ស តតិយភាគំ តិដ្ឋតិ… ឧបឌ្ឍកប្បំ តិដ្ឋតិ… ឯកំ កប្បំ តិដ្ឋតិ… ទ្វេ កប្បេ តិដ្ឋតិ… ចត្តារោ កប្បេ តិដ្ឋតិ… អដ្ឋ កប្បេ តិដ្ឋតិ… សោឡស កប្បេ តិដ្ឋតិ… ពាត្តិំស កប្បេ តិដ្ឋតិ… ចតុសដ្ឋិ កប្បេ តិដ្ឋតិ… បញ្ច កប្បសតានិ តិដ្ឋតិ… កប្បសហស្សំ តិដ្ឋតិ… ទ្វេ កប្បសហស្សានិ តិដ្ឋតិ… ចត្តារិ កប្បសហស្សានិ តិដ្ឋតិ… អដ្ឋ កប្បសហស្សានិ តិដ្ឋតិ… អកនិដ្ឋានំ ទេវានំ សោឡស កប្បសហស្សានិ អាយុប្បមាណំ, អកនិដ្ឋានំ ទេវានំ ឯកំ ចិត្តំ សោឡស កប្បសហស្សានិ តិដ្ឋតីតិ? ន ហេវំ វត្តព្ពេ។
Ākāsānañcāyatanūpagānaṃ devānaṃ vīsati kappasahassāni āyuppamāṇaṃ, ākāsānañcāyatanūpagānaṃ devānaṃ ekaṃ cittaṃ vīsati kappasahassāni tiṭṭhatīti? Āmantā. Cātumahārājikānaṃ devānaṃ pañca vassasatāni āyuppamāṇaṃ, cātumahārājikānaṃ devānaṃ ekaṃ cittaṃ pañca vassasatāni tiṭṭhati… vassasahassaṃ tiṭṭhati… dve vassasahassāni tiṭṭhati… cattāri vassasahassāni tiṭṭhati… aṭṭha vassasahassāni tiṭṭhati… soḷasa vassasahassāni tiṭṭhati… kappassa tatiyabhāgaṃ tiṭṭhati… upaḍḍhakappaṃ tiṭṭhati… ekaṃ kappaṃ tiṭṭhati… dve kappe tiṭṭhati… cattāro kappe tiṭṭhati… aṭṭha kappe tiṭṭhati… soḷasa kappe tiṭṭhati… bāttiṃsa kappe tiṭṭhati… catusaṭṭhi kappe tiṭṭhati… pañca kappasatāni tiṭṭhati… kappasahassaṃ tiṭṭhati… dve kappasahassāni tiṭṭhati… cattāri kappasahassāni tiṭṭhati… aṭṭha kappasahassāni tiṭṭhati… akaniṭṭhānaṃ devānaṃ soḷasa kappasahassāni āyuppamāṇaṃ, akaniṭṭhānaṃ devānaṃ ekaṃ cittaṃ soḷasa kappasahassāni tiṭṭhatīti? Na hevaṃ vattabbe.
អាកាសានញ្ចាយតនូបគានំ ទេវានំ ចិត្តំ មុហុត្តំ មុហុត្តំ ឧប្បជ្ជតិ មុហុត្តំ មុហុត្តំ និរុជ្ឈតីតិ? អាមន្តា។ អាកាសានញ្ចាយតនូបគា ទេវា មុហុត្តំ មុហុត្តំ ចវន្តិ មុហុត្តំ មុហុត្តំ ឧប្បជ្ជន្តីតិ? ន ហេវំ វត្តព្ពេ។
Ākāsānañcāyatanūpagānaṃ devānaṃ cittaṃ muhuttaṃ muhuttaṃ uppajjati muhuttaṃ muhuttaṃ nirujjhatīti? Āmantā. Ākāsānañcāyatanūpagā devā muhuttaṃ muhuttaṃ cavanti muhuttaṃ muhuttaṃ uppajjantīti? Na hevaṃ vattabbe.
អាកាសានញ្ចាយតនូបគានំ ទេវានំ ឯកំ ចិត្តំ យាវតាយុកំ តិដ្ឋតីតិ ? អាមន្តា។ អាកាសានញ្ចាយតនូបគា ទេវា យេនេវ ចិត្តេន ឧប្បជ្ជន្តិ, តេនេវ ចិត្តេន ចវន្តីតិ? ន ហេវំ វត្តព្ពេ…បេ.…។
Ākāsānañcāyatanūpagānaṃ devānaṃ ekaṃ cittaṃ yāvatāyukaṃ tiṭṭhatīti ? Āmantā. Ākāsānañcāyatanūpagā devā yeneva cittena uppajjanti, teneva cittena cavantīti? Na hevaṃ vattabbe…pe….
ចិត្តដ្ឋិតិកថា និដ្ឋិតា។
Cittaṭṭhitikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៧. ចិត្តដ្ឋិតិកថាវណ្ណនា • 7. Cittaṭṭhitikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៧. ចិត្តដ្ឋិតិកថាវណ្ណនា • 7. Cittaṭṭhitikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៧. ចិត្តដ្ឋិតិកថាវណ្ណនា • 7. Cittaṭṭhitikathāvaṇṇanā
