| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. சித்தட்டி²திகதா²வண்ணனா
7. Cittaṭṭhitikathāvaṇṇanā
335. இதா³னி சித்தட்டி²திகதா² நாம ஹோதி. தத்த² யேஸங் ஸமாபத்திசித்தஞ்சேவ ப⁴வங்க³சித்தஞ்ச அனுப்பப³ந்தே⁴ன பவத்தமானங் தி³ஸ்வா ‘‘ஏகமேவ சித்தங் சிரங் திட்ட²தீ’’தி லத்³தி⁴ ஸெய்யதா²பி ஏதரஹி ஹெட்டா² வுத்தப்பபே⁴தா³னங் அந்த⁴கானங், தங்லத்³தி⁴விஸோத⁴னத்த²ங் ஏகங், சித்தங் தி³வஸங் திட்ட²தீதி புச்சா² ஸகவாதி³ஸ்ஸ, படிஞ்ஞா பரவாதி³ஸ்ஸ. உபட்³ட⁴தி³வஸோ உப்பாத³க்க²ணோதி எத்த² டி²திக்க²ணங் அனாமஸித்வா ‘‘அனிச்சா வத ஸங்கா²ரா, உப்பாத³வயத⁴ம்மினோ’’தி (ஸங்॰ நி॰ 1.186; 2.143) தே³ஸனானயேன உப்பாத³வயவஸேனேவ புச்சா² கதா.
335. Idāni cittaṭṭhitikathā nāma hoti. Tattha yesaṃ samāpatticittañceva bhavaṅgacittañca anuppabandhena pavattamānaṃ disvā ‘‘ekameva cittaṃ ciraṃ tiṭṭhatī’’ti laddhi seyyathāpi etarahi heṭṭhā vuttappabhedānaṃ andhakānaṃ, taṃladdhivisodhanatthaṃ ekaṃ, cittaṃ divasaṃ tiṭṭhatīti pucchā sakavādissa, paṭiññā paravādissa. Upaḍḍhadivaso uppādakkhaṇoti ettha ṭhitikkhaṇaṃ anāmasitvā ‘‘aniccā vata saṅkhārā, uppādavayadhammino’’ti (saṃ. ni. 1.186; 2.143) desanānayena uppādavayavaseneva pucchā katā.
தே த⁴ம்மா சித்தேன லஹுபரிவத்தாதி புட்டோ² சித்ததோ லஹுதரபரிவத்தினோ த⁴ம்மே அபஸ்ஸந்தோ படிக்கி²பதி. து³தியங் புட்டோ² யஸ்ஸ சித்தஸ்ஸ தீ³க⁴ட்டி²திங் இச்ச²தி, தங் ஸந்தா⁴ய படிஜானாதி. யாவதாயுகங் திட்ட²தீதி பஞ்ஹே ‘‘சுல்லாஸீதிஸஹஸ்ஸானி, கப்பா திட்ட²ந்தி யே மரூ’’திஆதி³வசனவஸேன (மஹானி॰ 10) ஆருப்பதோ அஞ்ஞத்ர படிக்கி²பதி, ஆருப்பே படிஜானாதி. முஹுத்தங் முஹுத்தங் உப்பஜ்ஜதீதி பஞ்ஹே பரவாதி³ஸ்ஸ ‘‘உப்பாத³வயத⁴ம்மினோ’’திஆதி³ஸுத்தவிரோத⁴ப⁴யேன படிஜானாதி. டி²திங் பனஸ்ஸ லத்³தி⁴வஸேன இச்ச²தி. ஸேஸமெத்த² உத்தானத்த²மேவாதி.
Te dhammā cittena lahuparivattāti puṭṭho cittato lahutaraparivattino dhamme apassanto paṭikkhipati. Dutiyaṃ puṭṭho yassa cittassa dīghaṭṭhitiṃ icchati, taṃ sandhāya paṭijānāti. Yāvatāyukaṃ tiṭṭhatīti pañhe ‘‘cullāsītisahassāni, kappā tiṭṭhanti ye marū’’tiādivacanavasena (mahāni. 10) āruppato aññatra paṭikkhipati, āruppe paṭijānāti. Muhuttaṃ muhuttaṃ uppajjatīti pañhe paravādissa ‘‘uppādavayadhammino’’tiādisuttavirodhabhayena paṭijānāti. Ṭhitiṃ panassa laddhivasena icchati. Sesamettha uttānatthamevāti.
சித்தட்டி²திகதா²வண்ணனா.
Cittaṭṭhitikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (16) 7. சித்தட்டி²திகதா² • (16) 7. Cittaṭṭhitikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. சித்தட்டி²திகதா²வண்ணனா • 7. Cittaṭṭhitikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. சித்தட்டி²திகதா²வண்ணனா • 7. Cittaṭṭhitikathāvaṇṇanā
