| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೭. ಚಿತ್ತಟ್ಠಿತಿಕಥಾವಣ್ಣನಾ
7. Cittaṭṭhitikathāvaṇṇanā
೩೩೫. ಇದಾನಿ ಚಿತ್ತಟ್ಠಿತಿಕಥಾ ನಾಮ ಹೋತಿ। ತತ್ಥ ಯೇಸಂ ಸಮಾಪತ್ತಿಚಿತ್ತಞ್ಚೇವ ಭವಙ್ಗಚಿತ್ತಞ್ಚ ಅನುಪ್ಪಬನ್ಧೇನ ಪವತ್ತಮಾನಂ ದಿಸ್ವಾ ‘‘ಏಕಮೇವ ಚಿತ್ತಂ ಚಿರಂ ತಿಟ್ಠತೀ’’ತಿ ಲದ್ಧಿ ಸೇಯ್ಯಥಾಪಿ ಏತರಹಿ ಹೇಟ್ಠಾ ವುತ್ತಪ್ಪಭೇದಾನಂ ಅನ್ಧಕಾನಂ, ತಂಲದ್ಧಿವಿಸೋಧನತ್ಥಂ ಏಕಂ, ಚಿತ್ತಂ ದಿವಸಂ ತಿಟ್ಠತೀತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಪರವಾದಿಸ್ಸ। ಉಪಡ್ಢದಿವಸೋ ಉಪ್ಪಾದಕ್ಖಣೋತಿ ಏತ್ಥ ಠಿತಿಕ್ಖಣಂ ಅನಾಮಸಿತ್ವಾ ‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ’’ತಿ (ಸಂ॰ ನಿ॰ ೧.೧೮೬; ೨.೧೪೩) ದೇಸನಾನಯೇನ ಉಪ್ಪಾದವಯವಸೇನೇವ ಪುಚ್ಛಾ ಕತಾ।
335. Idāni cittaṭṭhitikathā nāma hoti. Tattha yesaṃ samāpatticittañceva bhavaṅgacittañca anuppabandhena pavattamānaṃ disvā ‘‘ekameva cittaṃ ciraṃ tiṭṭhatī’’ti laddhi seyyathāpi etarahi heṭṭhā vuttappabhedānaṃ andhakānaṃ, taṃladdhivisodhanatthaṃ ekaṃ, cittaṃ divasaṃ tiṭṭhatīti pucchā sakavādissa, paṭiññā paravādissa. Upaḍḍhadivaso uppādakkhaṇoti ettha ṭhitikkhaṇaṃ anāmasitvā ‘‘aniccā vata saṅkhārā, uppādavayadhammino’’ti (saṃ. ni. 1.186; 2.143) desanānayena uppādavayavaseneva pucchā katā.
ತೇ ಧಮ್ಮಾ ಚಿತ್ತೇನ ಲಹುಪರಿವತ್ತಾತಿ ಪುಟ್ಠೋ ಚಿತ್ತತೋ ಲಹುತರಪರಿವತ್ತಿನೋ ಧಮ್ಮೇ ಅಪಸ್ಸನ್ತೋ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ಯಸ್ಸ ಚಿತ್ತಸ್ಸ ದೀಘಟ್ಠಿತಿಂ ಇಚ್ಛತಿ, ತಂ ಸನ್ಧಾಯ ಪಟಿಜಾನಾತಿ। ಯಾವತಾಯುಕಂ ತಿಟ್ಠತೀತಿ ಪಞ್ಹೇ ‘‘ಚುಲ್ಲಾಸೀತಿಸಹಸ್ಸಾನಿ, ಕಪ್ಪಾ ತಿಟ್ಠನ್ತಿ ಯೇ ಮರೂ’’ತಿಆದಿವಚನವಸೇನ (ಮಹಾನಿ॰ ೧೦) ಆರುಪ್ಪತೋ ಅಞ್ಞತ್ರ ಪಟಿಕ್ಖಿಪತಿ, ಆರುಪ್ಪೇ ಪಟಿಜಾನಾತಿ। ಮುಹುತ್ತಂ ಮುಹುತ್ತಂ ಉಪ್ಪಜ್ಜತೀತಿ ಪಞ್ಹೇ ಪರವಾದಿಸ್ಸ ‘‘ಉಪ್ಪಾದವಯಧಮ್ಮಿನೋ’’ತಿಆದಿಸುತ್ತವಿರೋಧಭಯೇನ ಪಟಿಜಾನಾತಿ। ಠಿತಿಂ ಪನಸ್ಸ ಲದ್ಧಿವಸೇನ ಇಚ್ಛತಿ। ಸೇಸಮೇತ್ಥ ಉತ್ತಾನತ್ಥಮೇವಾತಿ।
Te dhammā cittena lahuparivattāti puṭṭho cittato lahutaraparivattino dhamme apassanto paṭikkhipati. Dutiyaṃ puṭṭho yassa cittassa dīghaṭṭhitiṃ icchati, taṃ sandhāya paṭijānāti. Yāvatāyukaṃ tiṭṭhatīti pañhe ‘‘cullāsītisahassāni, kappā tiṭṭhanti ye marū’’tiādivacanavasena (mahāni. 10) āruppato aññatra paṭikkhipati, āruppe paṭijānāti. Muhuttaṃ muhuttaṃ uppajjatīti pañhe paravādissa ‘‘uppādavayadhammino’’tiādisuttavirodhabhayena paṭijānāti. Ṭhitiṃ panassa laddhivasena icchati. Sesamettha uttānatthamevāti.
ಚಿತ್ತಟ್ಠಿತಿಕಥಾವಣ್ಣನಾ।
Cittaṭṭhitikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೬) ೭. ಚಿತ್ತಟ್ಠಿತಿಕಥಾ • (16) 7. Cittaṭṭhitikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೭. ಚಿತ್ತಟ್ಠಿತಿಕಥಾವಣ್ಣನಾ • 7. Cittaṭṭhitikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೭. ಚಿತ್ತಟ್ಠಿತಿಕಥಾವಣ್ಣನಾ • 7. Cittaṭṭhitikathāvaṇṇanā
