| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
7. චිත්‌තට්‌ඨිතිකථාවණ්‌ණනා
7. Cittaṭṭhitikathāvaṇṇanā
335. ඉදානි චිත්‌තට්‌ඨිතිකථා නාම හොති. තත්‌ථ යෙසං සමාපත්‌තිචිත්‌තඤ්‌චෙව භවඞ්‌ගචිත්‌තඤ්‌ච අනුප්‌පබන්‌ධෙන පවත්‌තමානං දිස්‌වා ‘‘එකමෙව චිත්‌තං චිරං තිට්‌ඨතී’’ති ලද්‌ධි සෙය්‍යථාපි එතරහි හෙට්‌ඨා වුත්‌තප්‌පභෙදානං අන්‌ධකානං, තංලද්‌ධිවිසොධනත්‌ථං එකං, චිත්‌තං දිවසං තිට්‌ඨතීති පුච්‌ඡා සකවාදිස්‌ස, පටිඤ්‌ඤා පරවාදිස්‌ස. උපඩ්‌ඪදිවසො උප්‌පාදක්‌ඛණොති එත්‌ථ ඨිතික්‌ඛණං අනාමසිත්‌වා ‘‘අනිච්‌චා වත සඞ්‌ඛාරා, උප්‌පාදවයධම්‌මිනො’’ති (සං. නි. 1.186; 2.143) දෙසනානයෙන උප්‌පාදවයවසෙනෙව පුච්‌ඡා කතා.
335. Idāni cittaṭṭhitikathā nāma hoti. Tattha yesaṃ samāpatticittañceva bhavaṅgacittañca anuppabandhena pavattamānaṃ disvā ‘‘ekameva cittaṃ ciraṃ tiṭṭhatī’’ti laddhi seyyathāpi etarahi heṭṭhā vuttappabhedānaṃ andhakānaṃ, taṃladdhivisodhanatthaṃ ekaṃ, cittaṃ divasaṃ tiṭṭhatīti pucchā sakavādissa, paṭiññā paravādissa. Upaḍḍhadivaso uppādakkhaṇoti ettha ṭhitikkhaṇaṃ anāmasitvā ‘‘aniccā vata saṅkhārā, uppādavayadhammino’’ti (saṃ. ni. 1.186; 2.143) desanānayena uppādavayavaseneva pucchā katā.
තෙ ධම්‌මා චිත්‌තෙන ලහුපරිවත්‌තාති පුට්‌ඨො චිත්‌තතො ලහුතරපරිවත්‌තිනො ධම්‌මෙ අපස්‌සන්‌තො පටික්‌ඛිපති. දුතියං පුට්‌ඨො යස්‌ස චිත්‌තස්‌ස දීඝට්‌ඨිතිං ඉච්‌ඡති, තං සන්‌ධාය පටිජානාති. යාවතායුකං තිට්‌ඨතීති පඤ්‌හෙ ‘‘චුල්‌ලාසීතිසහස්‌සානි, කප්‌පා තිට්‌ඨන්‌ති යෙ මරූ’’තිආදිවචනවසෙන (මහානි. 10) ආරුප්‌පතො අඤ්‌ඤත්‍ර පටික්‌ඛිපති, ආරුප්‌පෙ පටිජානාති. මුහුත්‌තං මුහුත්‌තං උප්‌පජ්‌ජතීති පඤ්‌හෙ පරවාදිස්‌ස ‘‘උප්‌පාදවයධම්‌මිනො’’තිආදිසුත්‌තවිරොධභයෙන පටිජානාති. ඨිතිං පනස්‌ස ලද්‌ධිවසෙන ඉච්‌ඡති. සෙසමෙත්‌ථ උත්‌තානත්‌ථමෙවාති.
Te dhammā cittena lahuparivattāti puṭṭho cittato lahutaraparivattino dhamme apassanto paṭikkhipati. Dutiyaṃ puṭṭho yassa cittassa dīghaṭṭhitiṃ icchati, taṃ sandhāya paṭijānāti. Yāvatāyukaṃ tiṭṭhatīti pañhe ‘‘cullāsītisahassāni, kappā tiṭṭhanti ye marū’’tiādivacanavasena (mahāni. 10) āruppato aññatra paṭikkhipati, āruppe paṭijānāti. Muhuttaṃ muhuttaṃ uppajjatīti pañhe paravādissa ‘‘uppādavayadhammino’’tiādisuttavirodhabhayena paṭijānāti. Ṭhitiṃ panassa laddhivasena icchati. Sesamettha uttānatthamevāti.
චිත්‌තට්‌ඨිතිකථාවණ්‌ණනා.
Cittaṭṭhitikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (16) 7. චිත්‌තට්‌ඨිතිකථා • (16) 7. Cittaṭṭhitikathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. චිත්‌තට්‌ඨිතිකථාවණ්‌ණනා • 7. Cittaṭṭhitikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. චිත්‌තට්‌ඨිතිකථාවණ්‌ණනා • 7. Cittaṭṭhitikathāvaṇṇanā
