| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༧. ཙིཏྟཊྛིཏིཀཐཱཝཎྞནཱ
7. Cittaṭṭhitikathāvaṇṇanā
༣༣༥. ཨིདཱནི ཙིཏྟཊྛིཏིཀཐཱ ནཱམ ཧོཏི། ཏཏྠ ཡེསཾ སམཱཔཏྟིཙིཏྟཉྩེཝ བྷཝངྒཙིཏྟཉྩ ཨནུཔྤབནྡྷེན པཝཏྟམཱནཾ དིསྭཱ ‘‘ཨེཀམེཝ ཙིཏྟཾ ཙིརཾ ཏིཊྛཏཱི’’ཏི ལདྡྷི སེཡྻཐཱཔི ཨེཏརཧི ཧེཊྛཱ ཝུཏྟཔྤབྷེདཱནཾ ཨནྡྷཀཱནཾ, ཏཾལདྡྷིཝིསོདྷནཏྠཾ ཨེཀཾ, ཙིཏྟཾ དིཝསཾ ཏིཊྛཏཱིཏི པུཙྪཱ སཀཝཱདིསྶ, པཊིཉྙཱ པརཝཱདིསྶ། ཨུཔཌྜྷདིཝསོ ཨུཔྤཱདཀྑཎོཏི ཨེཏྠ ཋིཏིཀྑཎཾ ཨནཱམསིཏྭཱ ‘‘ཨནིཙྩཱ ཝཏ སངྑཱརཱ, ཨུཔྤཱདཝཡདྷམྨིནོ’’ཏི (སཾ॰ ནི॰ ༡.༡༨༦; ༢.༡༤༣) དེསནཱནཡེན ཨུཔྤཱདཝཡཝསེནེཝ པུཙྪཱ ཀཏཱ།
335. Idāni cittaṭṭhitikathā nāma hoti. Tattha yesaṃ samāpatticittañceva bhavaṅgacittañca anuppabandhena pavattamānaṃ disvā ‘‘ekameva cittaṃ ciraṃ tiṭṭhatī’’ti laddhi seyyathāpi etarahi heṭṭhā vuttappabhedānaṃ andhakānaṃ, taṃladdhivisodhanatthaṃ ekaṃ, cittaṃ divasaṃ tiṭṭhatīti pucchā sakavādissa, paṭiññā paravādissa. Upaḍḍhadivaso uppādakkhaṇoti ettha ṭhitikkhaṇaṃ anāmasitvā ‘‘aniccā vata saṅkhārā, uppādavayadhammino’’ti (saṃ. ni. 1.186; 2.143) desanānayena uppādavayavaseneva pucchā katā.
ཏེ དྷམྨཱ ཙིཏྟེན ལཧུཔརིཝཏྟཱཏི པུཊྛོ ཙིཏྟཏོ ལཧུཏརཔརིཝཏྟིནོ དྷམྨེ ཨཔསྶནྟོ པཊིཀྑིཔཏི། དུཏིཡཾ པུཊྛོ ཡསྶ ཙིཏྟསྶ དཱིགྷཊྛིཏིཾ ཨིཙྪཏི, ཏཾ སནྡྷཱཡ པཊིཛཱནཱཏི། ཡཱཝཏཱཡུཀཾ ཏིཊྛཏཱིཏི པཉྷེ ‘‘ཙུལླཱསཱིཏིསཧསྶཱནི, ཀཔྤཱ ཏིཊྛནྟི ཡེ མརཱུ’’ཏིཨཱདིཝཙནཝསེན (མཧཱནི॰ ༡༠) ཨཱརུཔྤཏོ ཨཉྙཏྲ པཊིཀྑིཔཏི, ཨཱརུཔྤེ པཊིཛཱནཱཏི། མུཧུཏྟཾ མུཧུཏྟཾ ཨུཔྤཛྫཏཱིཏི པཉྷེ པརཝཱདིསྶ ‘‘ཨུཔྤཱདཝཡདྷམྨིནོ’’ཏིཨཱདིསུཏྟཝིརོདྷབྷཡེན པཊིཛཱནཱཏི། ཋིཏིཾ པནསྶ ལདྡྷིཝསེན ཨིཙྪཏི། སེསམེཏྠ ཨུཏྟཱནཏྠམེཝཱཏི།
Te dhammā cittena lahuparivattāti puṭṭho cittato lahutaraparivattino dhamme apassanto paṭikkhipati. Dutiyaṃ puṭṭho yassa cittassa dīghaṭṭhitiṃ icchati, taṃ sandhāya paṭijānāti. Yāvatāyukaṃ tiṭṭhatīti pañhe ‘‘cullāsītisahassāni, kappā tiṭṭhanti ye marū’’tiādivacanavasena (mahāni. 10) āruppato aññatra paṭikkhipati, āruppe paṭijānāti. Muhuttaṃ muhuttaṃ uppajjatīti pañhe paravādissa ‘‘uppādavayadhammino’’tiādisuttavirodhabhayena paṭijānāti. Ṭhitiṃ panassa laddhivasena icchati. Sesamettha uttānatthamevāti.
ཙིཏྟཊྛིཏིཀཐཱཝཎྞནཱ།
Cittaṭṭhitikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༦) ༧. ཙིཏྟཊྛིཏིཀཐཱ • (16) 7. Cittaṭṭhitikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༧. ཙིཏྟཊྛིཏིཀཐཱཝཎྞནཱ • 7. Cittaṭṭhitikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. ཙིཏྟཊྛིཏིཀཐཱཝཎྞནཱ • 7. Cittaṭṭhitikathāvaṇṇanā
