| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৮. চিত্তযমকং
8. Cittayamakaṃ
উদ্দেসৰারৰণ্ণনা
Uddesavāravaṇṇanā
১-৬২. ইদানি তেসঞ্ঞেৰ মূলযমকে দেসিতানং কুসলাদিধম্মানং লব্ভমানৰসেন একদেসমেৰ সঙ্গণ্হিত্ৰা অনুসযযমকানন্তরং দেসিতস্স চিত্তযমকস্স অত্থৰণ্ণনা হোতি। তত্থ পাল়িৰৰত্থানং তাৰ ৰেদিতব্বং। ইমস্মিঞ্হি চিত্তযমকে মাতিকাঠপনং, ঠপিতমাতিকায ৰিস্সজ্জনন্তি দ্ৰে ৰারা হোন্তি। তত্থ মাতিকাঠপনে পুগ্গলৰারো, ধম্মৰারো, পুগ্গলধম্মৰারোতি আদিতোৰ তযো সুদ্ধিকমহাৰারা হোন্তি।
1-62. Idāni tesaññeva mūlayamake desitānaṃ kusalādidhammānaṃ labbhamānavasena ekadesameva saṅgaṇhitvā anusayayamakānantaraṃ desitassa cittayamakassa atthavaṇṇanā hoti. Tattha pāḷivavatthānaṃ tāva veditabbaṃ. Imasmiñhi cittayamake mātikāṭhapanaṃ, ṭhapitamātikāya vissajjananti dve vārā honti. Tattha mātikāṭhapane puggalavāro, dhammavāro, puggaladhammavāroti āditova tayo suddhikamahāvārā honti.
তত্থ ‘‘যস্স চিত্তং উপ্পজ্জতি, ন নিরুজ্ঝতী’’তি এৰং পুগ্গলৰসেন চিত্তস্স উপ্পজ্জননিরুজ্ঝনাদিভেদং দীপেন্তো গতো পুগ্গলৰারো নাম। ‘‘যং চিত্তং উপ্পজ্জতি, ন নিরুজ্ঝতী’’তি এৰং ধম্মৰসেনেৰ চিত্তস্স উপ্পজ্জননিরুজ্ঝনাদিভেদং দীপেন্তো গতো ধম্মৰারো নাম। ‘‘যস্স যং চিত্তং উপ্পজ্জতি, ন নিরুজ্ঝতী’’তি এৰং উভযৰসেন চিত্তস্স উপ্পজ্জননিরুজ্ঝনাদিভেদং দীপেন্তো গতো পুগ্গলধম্মৰারো নাম। ততো ‘‘যস্স সরাগং চিত্ত’’ন্তি সোল়সন্নং পদানং ৰসেন অপরে সরাগাদিপদৰিসেসিতা সোল়স পুগ্গলৰারা, সোল়স ধম্মৰারা, সোল়স পুগ্গলধম্মৰারাতি অট্ঠচত্তালীসং মিস্সকৰারা হোন্তি। তে সরাগাদিপদমত্তং দস্সেত্ৰা সঙ্খিত্তা। ততো ‘‘যস্স কুসলং চিত্ত’’ন্তিআদিনা নযেন ছসট্ঠিদ্ৰিসতসঙ্খানং অভিধম্মমাতিকাপদানং ৰসেন অপরে কুসলাদিপদৰিসেসিতা ছসট্ঠিদ্ৰিসতপুগ্গলৰারা, ছসট্ঠিদ্ৰিসতধম্মৰারা ছসট্ঠিদ্ৰিসতপুগ্গলধম্মৰারাতি অট্ঠনৰুতিসত্তসতা মিস্সকৰারা হোন্তি। তেপি কুসলাদিপদমত্তং দস্সেত্ৰা সঙ্খিত্তাযেৰ। যানিপেত্থ সনিদস্সনাদীনি পদানি চিত্তেন সদ্ধিং ন যুজ্জন্তি, তানি মোঘপুচ্ছাৰসেন ঠপিতানি।
Tattha ‘‘yassa cittaṃ uppajjati, na nirujjhatī’’ti evaṃ puggalavasena cittassa uppajjananirujjhanādibhedaṃ dīpento gato puggalavāro nāma. ‘‘Yaṃ cittaṃ uppajjati, na nirujjhatī’’ti evaṃ dhammavaseneva cittassa uppajjananirujjhanādibhedaṃ dīpento gato dhammavāro nāma. ‘‘Yassa yaṃ cittaṃ uppajjati, na nirujjhatī’’ti evaṃ ubhayavasena cittassa uppajjananirujjhanādibhedaṃ dīpento gato puggaladhammavāro nāma. Tato ‘‘yassa sarāgaṃ citta’’nti soḷasannaṃ padānaṃ vasena apare sarāgādipadavisesitā soḷasa puggalavārā, soḷasa dhammavārā, soḷasa puggaladhammavārāti aṭṭhacattālīsaṃ missakavārā honti. Te sarāgādipadamattaṃ dassetvā saṅkhittā. Tato ‘‘yassa kusalaṃ citta’’ntiādinā nayena chasaṭṭhidvisatasaṅkhānaṃ abhidhammamātikāpadānaṃ vasena apare kusalādipadavisesitā chasaṭṭhidvisatapuggalavārā, chasaṭṭhidvisatadhammavārā chasaṭṭhidvisatapuggaladhammavārāti aṭṭhanavutisattasatā missakavārā honti. Tepi kusalādipadamattaṃ dassetvā saṅkhittāyeva. Yānipettha sanidassanādīni padāni cittena saddhiṃ na yujjanti, tāni moghapucchāvasena ṭhapitāni.
তেসু পন তীসু ৰারেসু সব্বপঠমে সুদ্ধিকপুগ্গলমহাৰারে উপ্পাদনিরোধকালসম্ভেদৰারো, উপ্পাদুপ্পন্নৰারো, নিরোধুপ্পন্নৰারো, উপ্পাদৰারো, নিরোধৰারো, উপ্পাদনিরোধৰারো উপ্পজ্জমাননিরোধৰারো, উপ্পজ্জমানুপ্পন্নৰারো, নিরুজ্ঝমানুপ্পন্নৰারো, উপ্পন্নুপ্পাদৰারো, অতীতানাগতৰারো, উপ্পন্নুপ্পজ্জমানৰারো, নিরুদ্ধনিরুজ্ঝমানৰারো, অতিক্কন্তকালৰারোতি চুদ্দস অন্তরৰারা। তেসু উপ্পাদৰারো, নিরোধৰারো, উপ্পাদনিরোধৰারোতি ইমেসু তীসু ৰারেসু অনুলোমপটিলোমৰসেন ছ ছ কত্ৰা অট্ঠারস যমকানি। উপ্পন্নুপ্পাদৰারে অতীতানাগতকালৰসেন অনুলোমতো দ্ৰে, পটিলোমতো দ্ৰেতি চত্তারি যমকানি। সেসেসু আদিতো নিদ্দিট্ঠেসু তীসু, অনন্তরে নিদ্দিট্ঠেসু তীসু; অৰসানে নিদ্দিট্ঠেসু চতূসূতি দসসু ৰারেসু অনুলোমতো একং, পটিলোমতো একন্তি দ্ৰে দ্ৰে কত্ৰা ৰীসতি যমকানি। এৰং সব্বেসুপি চুদ্দসসু অন্তরৰারেসু দ্ৰাচত্তালীস যমকানি, চতুরাসীতি পুচ্ছা অট্ঠসট্ঠিঅত্থসতং হোতি। যথা চ একস্মিং সুদ্ধিকপুগ্গলমহাৰারে, তথা সুদ্ধিকধম্মৰারেপি সুদ্ধিকপুগ্গলধম্মৰারেপীতি তীসু মহাৰারেসু ছব্বীসতিযমকসতং, ততো দিগুণা পুচ্ছা, ততো দিগুণা অত্থা চ ৰেদিতব্বা। ইদং পন ৰারত্তযং সরাগাদিৰসেন সোল়সগুণং, কুসলাদিৰসেন ছসট্ঠিদ্ৰিসতগুণং কত্ৰা ইমস্মিং চিত্তযমকে অনেকানি যমকসহস্সানি, ততো দিগুণা পুচ্ছা, ততো দিগুণা অত্থা চ হোন্তীতি । পাঠো পন সংখিত্তোতি। এৰং তাৰ ইমস্মিং চিত্তযমকে পাল়িৰৰত্থানং ৰেদিতব্বং।
Tesu pana tīsu vāresu sabbapaṭhame suddhikapuggalamahāvāre uppādanirodhakālasambhedavāro, uppāduppannavāro, nirodhuppannavāro, uppādavāro, nirodhavāro, uppādanirodhavāro uppajjamānanirodhavāro, uppajjamānuppannavāro, nirujjhamānuppannavāro, uppannuppādavāro, atītānāgatavāro, uppannuppajjamānavāro, niruddhanirujjhamānavāro, atikkantakālavāroti cuddasa antaravārā. Tesu uppādavāro, nirodhavāro, uppādanirodhavāroti imesu tīsu vāresu anulomapaṭilomavasena cha cha katvā aṭṭhārasa yamakāni. Uppannuppādavāre atītānāgatakālavasena anulomato dve, paṭilomato dveti cattāri yamakāni. Sesesu ādito niddiṭṭhesu tīsu, anantare niddiṭṭhesu tīsu; avasāne niddiṭṭhesu catūsūti dasasu vāresu anulomato ekaṃ, paṭilomato ekanti dve dve katvā vīsati yamakāni. Evaṃ sabbesupi cuddasasu antaravāresu dvācattālīsa yamakāni, caturāsīti pucchā aṭṭhasaṭṭhiatthasataṃ hoti. Yathā ca ekasmiṃ suddhikapuggalamahāvāre, tathā suddhikadhammavārepi suddhikapuggaladhammavārepīti tīsu mahāvāresu chabbīsatiyamakasataṃ, tato diguṇā pucchā, tato diguṇā atthā ca veditabbā. Idaṃ pana vārattayaṃ sarāgādivasena soḷasaguṇaṃ, kusalādivasena chasaṭṭhidvisataguṇaṃ katvā imasmiṃ cittayamake anekāni yamakasahassāni, tato diguṇā pucchā, tato diguṇā atthā ca hontīti . Pāṭho pana saṃkhittoti. Evaṃ tāva imasmiṃ cittayamake pāḷivavatthānaṃ veditabbaṃ.
মাতিকাঠপনৰণ্ণনা।
Mātikāṭhapanavaṇṇanā.
নিদ্দেসো
Niddeso
১. পুগ্গলৰারৰণ্ণনা
1. Puggalavāravaṇṇanā
৬৩. ইদানি ঠপিতানুক্কমেন মাতিকং ৰিস্সজ্জেতুং যস্স চিত্তং উপ্পজ্জতি ন নিরুজ্ঝতীতিআদি আরদ্ধং। তত্থ উপ্পজ্জতীতি উপ্পাদক্খণসমঙ্গিতায উপ্পজ্জতি ন নিরুজ্ঝতীতি নিরোধক্খণং অপ্পত্ততায ন নিরুজ্ঝতি। তস্স চিত্তন্তি তস্স পুগ্গলস্স ততো পট্ঠায চিত্তং নিরুজ্ঝিস্সতি নুপ্পজ্জিস্সতীতি পুচ্ছতি। তেসং চিত্তন্তি যেসং পরিচ্ছিন্নৰট্টদুক্খানং খীণাসৰানং সব্বপচ্ছিমস্স চুতিচিত্তস্স উপ্পাদক্খণো ৰত্ততি, এতেসং তদেৰ চুতিচিত্তং উপ্পাদপ্পত্ততায উপ্পজ্জতি নাম, ভঙ্গং অপ্পত্ততায ন নিরুজ্ঝতি। ইদানি পন ভঙ্গং পত্ৰা তং তেসং চিত্তং নিরুজ্ঝিস্সতি, ততো অপ্পটিসন্ধিকত্তা অঞ্ঞং নুপ্পজ্জিস্সতি। ইতরেসন্তি পচ্ছিমচিত্তসমঙ্গিং খীণাসৰং ঠপেত্ৰা অৰসেসানং সেক্খাসেক্খপুথুজ্জনানং নিরুজ্ঝিস্সতি চেৰ উপ্পজ্জিস্সতি চাতি যং তং উপ্পাদক্খণপ্পত্তং তং নিরুজ্ঝিস্সতেৰ। অঞ্ঞং পন তস্মিং ৰা অঞ্ঞস্মিং ৰা অত্তভাৰে উপ্পজ্জিস্সতি চেৰ নিরুজ্ঝিস্সতি চ। দুতিযপুচ্ছাৰিস্সজ্জনেপি তথারূপস্সেৰ খীণাসৰস্স চিত্তং সন্ধায ‘আমন্তা’তি ৰুত্তং। নুপ্পজ্জতি নিরুজ্ঝতীতি ভঙ্গক্খণে অরহতো পচ্ছিমচিত্তম্পি সেসানং ভিজ্জমানচিত্তম্পি। ততো পট্ঠায পন অরহতো চিত্তং ন নিরুজ্ঝিস্সতীতি সক্কা ৰত্তুং উপ্পজ্জিস্সতীতি পন ন সক্কা। সেসানং উপ্পজ্জিস্সতীতি সক্কা ৰত্তুং, ন নিরুজ্ঝিস্সতীতি ন সক্কা। তস্মা ‘নো’তি পটিসেধো কতো। দুতিযপঞ্হে যস্স চিত্তং ন নিরুজ্ঝিস্সতি, উপ্পজ্জিস্সতীতি সো পুগ্গলোযেৰ নত্থি, তস্মা নত্থীতি পটিক্খেপো কতো।
63. Idāni ṭhapitānukkamena mātikaṃ vissajjetuṃ yassa cittaṃ uppajjati na nirujjhatītiādi āraddhaṃ. Tattha uppajjatīti uppādakkhaṇasamaṅgitāya uppajjati na nirujjhatīti nirodhakkhaṇaṃ appattatāya na nirujjhati. Tassa cittanti tassa puggalassa tato paṭṭhāya cittaṃ nirujjhissati nuppajjissatīti pucchati. Tesaṃ cittanti yesaṃ paricchinnavaṭṭadukkhānaṃ khīṇāsavānaṃ sabbapacchimassa cuticittassa uppādakkhaṇo vattati, etesaṃ tadeva cuticittaṃ uppādappattatāya uppajjati nāma, bhaṅgaṃ appattatāya na nirujjhati. Idāni pana bhaṅgaṃ patvā taṃ tesaṃ cittaṃ nirujjhissati, tato appaṭisandhikattā aññaṃ nuppajjissati. Itaresanti pacchimacittasamaṅgiṃ khīṇāsavaṃ ṭhapetvā avasesānaṃ sekkhāsekkhaputhujjanānaṃ nirujjhissati ceva uppajjissati cāti yaṃ taṃ uppādakkhaṇappattaṃ taṃ nirujjhissateva. Aññaṃ pana tasmiṃ vā aññasmiṃ vā attabhāve uppajjissati ceva nirujjhissati ca. Dutiyapucchāvissajjanepi tathārūpasseva khīṇāsavassa cittaṃ sandhāya ‘āmantā’ti vuttaṃ. Nuppajjati nirujjhatīti bhaṅgakkhaṇe arahato pacchimacittampi sesānaṃ bhijjamānacittampi. Tato paṭṭhāya pana arahato cittaṃ na nirujjhissatīti sakkā vattuṃ uppajjissatīti pana na sakkā. Sesānaṃ uppajjissatīti sakkā vattuṃ, na nirujjhissatīti na sakkā. Tasmā ‘no’ti paṭisedho kato. Dutiyapañhe yassa cittaṃ na nirujjhissati, uppajjissatīti so puggaloyeva natthi, tasmā natthīti paṭikkhepo kato.
৬৫-৮২. উপ্পন্নন্তি উপ্পাদসমঙ্গিনোপেতং নামং। উপ্পাদং পত্ৰা অনিরুদ্ধস্সাপি। তত্থ উপ্পাদসমঙ্গিতং সন্ধায ‘আমন্তা’তি, উপ্পাদং পত্ৰা অনিরুদ্ধভাৰং সন্ধায ‘‘তেসং চিত্তং উপ্পন্ন’’ন্তি ৰুত্তং। অনুপ্পন্নন্তি উপ্পাদং অপ্পত্তং। তেসং চিত্তং উপ্পজ্জিত্থাতি এত্থাপি সব্বেসং তাৰ চিত্তং খণপচ্চুপ্পন্নমেৰ হুত্ৰা উপ্পাদক্খণং অতীতত্তা উপ্পজ্জিত্থ নাম, নিরোধসমাপন্নানং নিরোধতো পুব্বে উপ্পন্নপুব্বত্তা, অসঞ্ঞসত্তানং সঞ্ঞীভৰে উপ্পন্নপুব্বত্তা। উপ্পজ্জিত্থ চেৰ উপ্পজ্জতি চাতি উপ্পাদং পত্তত্তা উপ্পজ্জিত্থ, অনতীতত্তা উপ্পজ্জতি নামাতি অত্থো।
65-82. Uppannanti uppādasamaṅginopetaṃ nāmaṃ. Uppādaṃ patvā aniruddhassāpi. Tattha uppādasamaṅgitaṃ sandhāya ‘āmantā’ti, uppādaṃ patvā aniruddhabhāvaṃ sandhāya ‘‘tesaṃ cittaṃ uppanna’’nti vuttaṃ. Anuppannanti uppādaṃ appattaṃ. Tesaṃ cittaṃ uppajjitthāti etthāpi sabbesaṃ tāva cittaṃ khaṇapaccuppannameva hutvā uppādakkhaṇaṃ atītattā uppajjittha nāma, nirodhasamāpannānaṃ nirodhato pubbe uppannapubbattā, asaññasattānaṃ saññībhave uppannapubbattā. Uppajjittha ceva uppajjati cāti uppādaṃ pattattā uppajjittha, anatītattā uppajjati nāmāti attho.
উপ্পাদক্খণে অনাগতঞ্চাতি উপ্পাদক্খণে চ চিত্তং অনাগতঞ্চ চিত্তন্তি অত্থো।
Uppādakkhaṇeanāgatañcāti uppādakkhaṇe ca cittaṃ anāgatañca cittanti attho.
৮৩. অতিক্কন্তকালৰারে উপ্পজ্জমানং খণন্তি উপ্পাদক্খণং। তত্থ কিঞ্চাপি উপ্পাদক্খণো উপ্পজ্জমানো নাম ন হোতি, উপ্পজ্জমানস্স পন খণত্তা এৰং ৰুত্তো। খণং ৰীতিক্কন্তং অতিক্কন্তকালন্তি ন চিরং ৰীতিক্কন্তং তমেৰ পন উপ্পাদক্খণং ৰীতিক্কন্তং হুত্ৰা অতিক্কন্তকালন্তি সঙ্খং গচ্ছতি। নিরুজ্ঝমানং খণন্তি নিরোধক্খণং। তত্থ কিঞ্চাপি নিরোধক্খণো নিরুজ্ঝমানো নাম ন হোতি, নিরুজ্ঝমানস্স পন খণত্তা এৰং ৰুত্তো। খণং ৰীতিক্কন্তং অতিক্কন্তকালন্তি কিং তস্স চিত্তং এৰং নিরোধক্খণম্পি ৰীতিক্কন্তং হুত্ৰা অতিক্কন্তকালং নাম হোতীতি পুচ্ছতি। তত্থ যস্মা ভঙ্গক্খণে চিত্তং উপ্পাদক্খণং খণং ৰীতিক্কন্তং হুত্ৰা অতিক্কন্তকালং হোতি, নিরোধক্খণং খণং ৰীতিক্কন্তং হুত্ৰা অতিক্কন্তকালং নাম ন হোতি। অতীতং পন চিত্তং উভোপি খণে খণং ৰীতিক্কন্তং হুত্ৰা অতিক্কন্তকালং নাম, তস্মা ‘‘ভঙ্গক্খণে চিত্তং উপ্পাদক্খণং ৰীতিক্কন্তং, ভঙ্গক্খণং অৰীতিক্কন্তং, অতীতং চিত্তং উপ্পাদক্খণঞ্চ ৰীতিক্কন্তং ভঙ্গক্খণঞ্চ ৰীতিক্কন্তন্তি ৰিস্সজ্জনমাহ। দুতিযপঞ্হস্স ৰিস্সজ্জনে যস্মা অতীতং চিত্তং উভোপি খণে ৰীতিক্কন্তং হুত্ৰা অতিক্কন্তকালং নাম হোতি, তস্মা অতীতং চিত্তন্তি ৰুত্তং। পটিলোমপঞ্হস্স ৰিস্সজ্জনে যস্মা উপ্পাদক্খণে চ চিত্তং অনাগতঞ্চ চিত্তং উভোপি খণে খণং ৰীতিক্কন্তং হুত্ৰা অতিক্কন্তকালং নাম ন হোতি, তেসং খণানং অৰীতিক্কন্তত্তা। তস্মা ‘‘উপ্পাদক্খণে চিত্তং অনাগতং চিত্ত’’ন্তি ৰুত্তং। দুতিযৰিস্সজ্জনং পাকটমেৰ।
83. Atikkantakālavāre uppajjamānaṃ khaṇanti uppādakkhaṇaṃ. Tattha kiñcāpi uppādakkhaṇo uppajjamāno nāma na hoti, uppajjamānassa pana khaṇattā evaṃ vutto. Khaṇaṃ vītikkantaṃ atikkantakālanti na ciraṃ vītikkantaṃ tameva pana uppādakkhaṇaṃ vītikkantaṃ hutvā atikkantakālanti saṅkhaṃ gacchati. Nirujjhamānaṃ khaṇanti nirodhakkhaṇaṃ. Tattha kiñcāpi nirodhakkhaṇo nirujjhamāno nāma na hoti, nirujjhamānassa pana khaṇattā evaṃ vutto. Khaṇaṃ vītikkantaṃ atikkantakālanti kiṃ tassa cittaṃ evaṃ nirodhakkhaṇampi vītikkantaṃ hutvā atikkantakālaṃ nāma hotīti pucchati. Tattha yasmā bhaṅgakkhaṇe cittaṃ uppādakkhaṇaṃ khaṇaṃ vītikkantaṃ hutvā atikkantakālaṃ hoti, nirodhakkhaṇaṃ khaṇaṃ vītikkantaṃ hutvā atikkantakālaṃ nāma na hoti. Atītaṃ pana cittaṃ ubhopi khaṇe khaṇaṃ vītikkantaṃ hutvā atikkantakālaṃ nāma, tasmā ‘‘bhaṅgakkhaṇe cittaṃ uppādakkhaṇaṃ vītikkantaṃ, bhaṅgakkhaṇaṃ avītikkantaṃ, atītaṃ cittaṃ uppādakkhaṇañca vītikkantaṃ bhaṅgakkhaṇañca vītikkantanti vissajjanamāha. Dutiyapañhassa vissajjane yasmā atītaṃ cittaṃ ubhopi khaṇe vītikkantaṃ hutvā atikkantakālaṃ nāma hoti, tasmā atītaṃ cittanti vuttaṃ. Paṭilomapañhassa vissajjane yasmā uppādakkhaṇe ca cittaṃ anāgatañca cittaṃ ubhopi khaṇe khaṇaṃ vītikkantaṃ hutvā atikkantakālaṃ nāma na hoti, tesaṃ khaṇānaṃ avītikkantattā. Tasmā ‘‘uppādakkhaṇe cittaṃ anāgataṃ citta’’nti vuttaṃ. Dutiyavissajjanaṃ pākaṭameva.
৮৪-১১৩. ধম্মৰারেপি ইমিনাৰুপাযেন সব্বৰিস্সজ্জনেসু অত্থো ৰেদিতব্বো। পুগ্গলধম্মৰারো ধম্মৰারগতিকোযেৰ।
84-113. Dhammavārepi imināvupāyena sabbavissajjanesu attho veditabbo. Puggaladhammavāro dhammavāragatikoyeva.
১১৪-১১৬. সব্বেপি মিস্সকৰারা যস্স সরাগং চিত্তন্তিআদিনা নযেন মুখমত্তং দস্সেত্ৰা সঙ্খিত্তা। ৰিত্থারো পন নেসং হেট্ঠা ৰুত্তনযেনেৰ ৰেদিতব্বো। তেসু পন ‘‘যস্স সরাগং চিত্তং উপ্পজ্জতি, ন নিরুজ্ঝতি; তস্স চিত্তং নিরুজ্ঝিস্সতি, নুপ্পজ্জিস্সতী’’তি এৰং ৰিত্থারেতব্বতায পুচ্ছাৰ সদিসা হোতি। যস্মা পন সরাগং চিত্তং পচ্ছিমচিত্তং ন হোতি, তস্মা ‘‘যস্স সরাগং চিত্তং উপ্পজ্জতি, ন নিরুজ্ঝতি; তস্স চিত্তং নিরুজ্ঝিস্সতি, নুপ্পজ্জিস্সতীতি নো’’তি এৰং ৰিস্সজ্জিতব্বত্তা ৰিস্সজ্জনং অসদিসং হোতি। তং তং তস্সা তস্সা পুচ্ছায অনুরূপৰসেন ৰেদিতব্বন্তি।
114-116. Sabbepi missakavārā yassa sarāgaṃ cittantiādinā nayena mukhamattaṃ dassetvā saṅkhittā. Vitthāro pana nesaṃ heṭṭhā vuttanayeneva veditabbo. Tesu pana ‘‘yassa sarāgaṃ cittaṃ uppajjati, na nirujjhati; tassa cittaṃ nirujjhissati, nuppajjissatī’’ti evaṃ vitthāretabbatāya pucchāva sadisā hoti. Yasmā pana sarāgaṃ cittaṃ pacchimacittaṃ na hoti, tasmā ‘‘yassa sarāgaṃ cittaṃ uppajjati, na nirujjhati; tassa cittaṃ nirujjhissati, nuppajjissatīti no’’ti evaṃ vissajjitabbattā vissajjanaṃ asadisaṃ hoti. Taṃ taṃ tassā tassā pucchāya anurūpavasena veditabbanti.
চিত্তযমকৰণ্ণনা নিট্ঠিতা।
Cittayamakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ৮. চিত্তযমকং • 8. Cittayamakaṃ
