| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
5. චීවරඅච්‌ඡින්‌දනසික්‌ඛාපදං
5. Cīvaraacchindanasikkhāpadaṃ
631. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා උපනන්‌දො සක්‍යපුත්‌තො භාතුනො සද්‌ධිවිහාරිකං භික්‌ඛුං එතදවොච – ‘‘එහාවුසො, ජනපදචාරිකං පක්‌කමිස්‌සාමා’’ති. ‘‘නාහං, භන්‌තෙ, ගමිස්‌සාමි; දුබ්‌බලචීවරොම්‌හී’’ති. ‘‘එහාවුසො, අහං තෙ චීවරං දස්‌සාමී’’ති තස්‌ස චීවරං අදාසි. අස්‌සොසි ඛො සො භික්‌ඛු – ‘‘භගවා කිර ජනපදචාරිකං පක්‌කමිස්‌සතී’’ති. අථ ඛො තස්‌ස භික්‌ඛුනො එතදහොසි – ‘‘න දානාහං ආයස්‌මතා උපනන්‌දෙන සක්‍යපුත්‌තෙන සද්‌ධිං ජනපදචාරිකං පක්‌කමිස්‌සාමි, භගවතා සද්‌ධිං ජනපදචාරිකං පක්‌කමිස්‌සාමී’’ති. අථ ඛො ආයස්‌මා උපනන්‌දො සක්‍යපුත්‌තො තං භික්‌ඛුං එතදවොච – ‘‘එහි දානි, ආවුසො, ජනපදචාරිකං පක්‌කමිස්‌සාමා’’ති. ‘‘නාහං, භන්‌තෙ, තයා සද්‌ධිං ජනපදචාරිකං පක්‌කමිස්‌සාමි, භගවතා සද්‌ධිං ජනපදචාරිකං පක්‌කමිස්‌සාමී’’ති. ‘‘යම්‌පි ත්‍යාහං, ආවුසො, චීවරං අදාසිං, මයා සද්‌ධිං ජනපදචාරිකං පක්‌කමිස්‌සතී’’ති, කුපිතො අනත්‌තමනො අච්‌ඡින්‌දි.
631. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto bhātuno saddhivihārikaṃ bhikkhuṃ etadavoca – ‘‘ehāvuso, janapadacārikaṃ pakkamissāmā’’ti. ‘‘Nāhaṃ, bhante, gamissāmi; dubbalacīvaromhī’’ti. ‘‘Ehāvuso, ahaṃ te cīvaraṃ dassāmī’’ti tassa cīvaraṃ adāsi. Assosi kho so bhikkhu – ‘‘bhagavā kira janapadacārikaṃ pakkamissatī’’ti. Atha kho tassa bhikkhuno etadahosi – ‘‘na dānāhaṃ āyasmatā upanandena sakyaputtena saddhiṃ janapadacārikaṃ pakkamissāmi, bhagavatā saddhiṃ janapadacārikaṃ pakkamissāmī’’ti. Atha kho āyasmā upanando sakyaputto taṃ bhikkhuṃ etadavoca – ‘‘ehi dāni, āvuso, janapadacārikaṃ pakkamissāmā’’ti. ‘‘Nāhaṃ, bhante, tayā saddhiṃ janapadacārikaṃ pakkamissāmi, bhagavatā saddhiṃ janapadacārikaṃ pakkamissāmī’’ti. ‘‘Yampi tyāhaṃ, āvuso, cīvaraṃ adāsiṃ, mayā saddhiṃ janapadacārikaṃ pakkamissatī’’ti, kupito anattamano acchindi.
අථ ඛො සො භික්‌ඛු භික්‌ඛූනං එතමත්‌ථං ආරොචෙසි. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ආයස්‌මා උපනන්‌දො සක්‍යපුත්‌තො භික්‌ඛුස්‌ස සාමං චීවරං දත්‌වා කුපිතො අනත්‌තමනො අච්‌ඡින්‌දිස්‌සතී’’ති! අථ ඛො තෙ භික්‌ඛූ ආයස්‌මන්‌තං උපනන්‌දං සක්‍යපුත්‌තං අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර ත්‌වං, උපනන්‌ද, භික්‌ඛුස්‌ස සාමං චීවරං දත්‌වා කුපිතො අනත්‌තමනො අච්‌ඡින්‌දී’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම ත්‌වං, මොඝපුරිස , භික්‌ඛුස්‌ස සාමං චීවරං දත්‌වා කුපිතො අනත්‌තමනො අච්‌ඡින්‌දිස්‌සසි! නෙතං, මොඝපුරිස, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto bhikkhussa sāmaṃ cīvaraṃ datvā kupito anattamano acchindissatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, bhikkhussa sāmaṃ cīvaraṃ datvā kupito anattamano acchindī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa , bhikkhussa sāmaṃ cīvaraṃ datvā kupito anattamano acchindissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
632. ‘‘යො පන භික්‌ඛු භික්‌ඛුස්‌ස සාමං චීවරං දත්‌වා කුපිතො අනත්‌තමනො අච්‌ඡින්‌දෙය්‍ය වා අච්‌ඡින්‌දාපෙය්‍ය වා, නිස්‌සග්‌ගියං පාචිත්‌තිය’’න්‌ති.
632.‘‘Yo pana bhikkhu bhikkhussa sāmaṃ cīvaraṃ datvā kupito anattamano acchindeyya vā acchindāpeyya vā, nissaggiyaṃ pācittiya’’nti.
633. යො පනාති යො යාදිසො…පෙ.… භික්‌ඛූති…පෙ.… අයං ඉමස්‌මිං අත්‌ථෙ අධිප්‌පෙතො භික්‌ඛූති.
633.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
භික්‌ඛුස්‌සාති අඤ්‌ඤස්‌ස භික්‌ඛුස්‌ස.
Bhikkhussāti aññassa bhikkhussa.
සාමන්‌ති සයං දත්‌වා.
Sāmanti sayaṃ datvā.
චීවරං නාම ඡන්‌නං චීවරානං අඤ්‌ඤතරං චීවරං, විකප්‌පනුපගං පච්‌ඡිමං.
Cīvaraṃ nāma channaṃ cīvarānaṃ aññataraṃ cīvaraṃ, vikappanupagaṃ pacchimaṃ.
කුපිතො අනත්‌තමනොති අනභිරද්‌ධො ආහතචිත්‌තො ඛිලජාතො.
Kupitoanattamanoti anabhiraddho āhatacitto khilajāto.
අච්‌ඡින්‌දෙය්‍යාති සයං අච්‌ඡින්‌දති, නිස්‌සග්‌ගියං පාචිත්‌තියං 1.
Acchindeyyāti sayaṃ acchindati, nissaggiyaṃ pācittiyaṃ 2.
අච්‌ඡින්‌දාපෙය්‍යාති අඤ්‌ඤං ආණාපෙති, ආපත්‌ති දුක්‌කටස්‌ස. සකිං ආණත්‌තො බහුකම්‌පි අච්‌ඡින්‌දති, නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, භන්‌තෙ, චීවරං භික්‌ඛුස්‌ස සාමං දත්‌වා අච්‌ඡින්‌නං නිස්‌සග්‌ගියං ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති …පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Acchindāpeyyāti aññaṃ āṇāpeti, āpatti dukkaṭassa. Sakiṃ āṇatto bahukampi acchindati, nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ bhikkhussa sāmaṃ datvā acchinnaṃ nissaggiyaṃ imāhaṃ saṅghassa nissajjāmīti…pe… dadeyyāti …pe… dadeyyunti…pe… āyasmato dammīti.
634. උපසම්‌පන්‌නෙ උපසම්‌පන්‌නසඤ්‌ඤී චීවරං දත්‌වා කුපිතො අනත්‌තමනො අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං. උපසම්‌පන්‌නෙ වෙමතිකො චීවරං දත්‌වා කුපිතො අනත්‌තමනො අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං. උපසම්‌පන්‌නෙ අනුපසම්‌පන්‌නසඤ්‌ඤී චීවරං දත්‌වා කුපිතො අනත්‌තමනො අච්‌ඡින්‌දති වා අච්‌ඡින්‌දාපෙති වා, නිස්‌සග්‌ගියං පාචිත්‌තියං.
634. Upasampanne upasampannasaññī cīvaraṃ datvā kupito anattamano acchindati vā acchindāpeti vā, nissaggiyaṃ pācittiyaṃ. Upasampanne vematiko cīvaraṃ datvā kupito anattamano acchindati vā acchindāpeti vā, nissaggiyaṃ pācittiyaṃ. Upasampanne anupasampannasaññī cīvaraṃ datvā kupito anattamano acchindati vā acchindāpeti vā, nissaggiyaṃ pācittiyaṃ.
අඤ්‌ඤං පරික්‌ඛාරං දත්‌වා කුපිතො අනත්‌තමනො අච්‌ඡින්‌දති වා අච්‌ඡින්‌දාපෙති වා, ආපත්‌ති දුක්‌කටස්‌ස. අනුපසම්‌පන්‌නස්‌ස චීවරං වා අඤ්‌ඤං වා පරික්‌ඛාරං දත්‌වා කුපිතො අනත්‌තමනො අච්‌ඡින්‌දති වා අච්‌ඡින්‌දාපෙති වා, ආපත්‌ති දුක්‌කටස්‌ස. අනුපසම්‌පන්‌නෙ උපසම්‌පන්‌නසඤ්‌ඤී, ආපත්‌ති දුක්‌කටස්‌ස. අනුපසම්‌පන්‌නෙ වෙමතිකො, ආපත්‌ති දුක්‌කටස්‌ස. අනුපසම්‌පන්‌නෙ අනුපසම්‌පන්‌නසඤ්‌ඤී, ආපත්‌ති දුක්‌කටස්‌ස.
Aññaṃ parikkhāraṃ datvā kupito anattamano acchindati vā acchindāpeti vā, āpatti dukkaṭassa. Anupasampannassa cīvaraṃ vā aññaṃ vā parikkhāraṃ datvā kupito anattamano acchindati vā acchindāpeti vā, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
635. අනාපත්‌ති – සො වා දෙති, තස්‌ස වා විස්‌සසන්‌තො ගණ්‌හාති, උම්‌මත්‌තකස්‌ස ආදිකම්‌මිකස්‌සාති.
635. Anāpatti – so vā deti, tassa vā vissasanto gaṇhāti, ummattakassa ādikammikassāti.
චීවරඅච්‌ඡින්‌දනසික්‌ඛාපදං නිට්‌ඨිතං පඤ්‌චමං.
Cīvaraacchindanasikkhāpadaṃ niṭṭhitaṃ pañcamaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
