| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
5. சீவரஅச்சி²ந்த³னஸிக்கா²பத³வண்ணனா
5. Cīvaraacchindanasikkhāpadavaṇṇanā
631. தேன ஸமயேனாதி சீவரஅச்சி²ந்த³னஸிக்கா²பத³ங். தத்த² யம்பி த்யாஹந்தி யம்பி தே அஹங். ஸோ கிர ‘‘மம பத்தசீவரஉபாஹனபச்சத்த²ரணானி வஹந்தோ மயா ஸத்³தி⁴ங் சாரிகங் பக்கமிஸ்ஸதீ’’தி அதா³ஸி. தேனேவமாஹ. அச்சி²ந்தீ³தி ப³லக்காரேன அக்³க³ஹேஸி, ஸகஸஞ்ஞாய க³ஹிதத்தா பனஸ்ஸ பாராஜிகங் நத்தி², கிலமெத்வா க³ஹிதத்தா ஆபத்தி பஞ்ஞத்தா.
631.Tena samayenāti cīvaraacchindanasikkhāpadaṃ. Tattha yampi tyāhanti yampi te ahaṃ. So kira ‘‘mama pattacīvaraupāhanapaccattharaṇāni vahanto mayā saddhiṃ cārikaṃ pakkamissatī’’ti adāsi. Tenevamāha. Acchindīti balakkārena aggahesi, sakasaññāya gahitattā panassa pārājikaṃ natthi, kilametvā gahitattā āpatti paññattā.
633. ஸயங் அச்சி²ந்த³தி நிஸ்ஸக்³கி³யங் பாசித்தியந்தி ஏகங் சீவரங் ஏகாப³த்³தா⁴னி ச ப³ஹூனி அச்சி²ந்த³தோ ஏகா ஆபத்தி. ஏகதோ அப³த்³தா⁴னி விஸுங் விஸுங் டி²தானி ச ப³ஹூனி அச்சி²ந்த³தோ ‘‘ஸங்கா⁴டிங் ஆஹர, உத்தராஸங்க³ங் ஆஹரா’’தி ஏவங் ஆஹராபயதோ ச வத்து²க³ணனாய ஆபத்தியோ. ‘‘மயா தி³ன்னானி ஸப்³பா³னி ஆஹரா’’தி வத³தோபி ஏகவசனேனேவ ஸம்ப³ஹுலா ஆபத்தியோ.
633.Sayaṃ acchindati nissaggiyaṃ pācittiyanti ekaṃ cīvaraṃ ekābaddhāni ca bahūni acchindato ekā āpatti. Ekato abaddhāni visuṃ visuṃ ṭhitāni ca bahūni acchindato ‘‘saṅghāṭiṃ āhara, uttarāsaṅgaṃ āharā’’ti evaṃ āharāpayato ca vatthugaṇanāya āpattiyo. ‘‘Mayā dinnāni sabbāni āharā’’ti vadatopi ekavacaneneva sambahulā āpattiyo.
அஞ்ஞங் ஆணாபேதி ஆபத்தி து³க்கடஸ்ஸாதி ‘‘சீவரங் க³ண்ஹா’’தி ஆணாபேதி, ஏகங் து³க்கடங். ஆணத்தோ ப³ஹூனி க³ண்ஹாதி, ஏகங் பாசித்தியங் ‘‘ஸங்கா⁴டிங் க³ண்ஹ, உத்தராஸங்க³ங் க³ண்ஹா’’தி வத³தோ வாசாய வாசாய து³க்கடங். ‘‘மயா தி³ன்னானி ஸப்³பா³னி க³ண்ஹா’’தி வத³தோ ஏகவாசாய ஸம்ப³ஹுலா ஆபத்தியோ.
Aññaṃ āṇāpeti āpatti dukkaṭassāti ‘‘cīvaraṃ gaṇhā’’ti āṇāpeti, ekaṃ dukkaṭaṃ. Āṇatto bahūni gaṇhāti, ekaṃ pācittiyaṃ ‘‘saṅghāṭiṃ gaṇha, uttarāsaṅgaṃ gaṇhā’’ti vadato vācāya vācāya dukkaṭaṃ. ‘‘Mayā dinnāni sabbāni gaṇhā’’ti vadato ekavācāya sambahulā āpattiyo.
634. அஞ்ஞங் பரிக்கா²ரந்தி விகப்பனுபக³பச்சி²மசீவரங் ட²பெத்வா யங் கிஞ்சி அந்தமஸோ ஸூசிம்பி. வேடெ²த்வா ட²பிதஸூசீஸுபி வத்து²க³ணனாய து³க்கடானி. ஸிதி²லவேடி²தாஸு ஏவங். கா³ள்ஹங் கத்வா ப³த்³தா⁴ஸு பன ஏகமேவ து³க்கடந்தி மஹாபச்சரியங் வுத்தங். ஸூசிக⁴ரே பக்கி²த்தாஸுபி ஏஸேவ நயோ. த²விகாய பக்கி²பித்வா ஸிதி²லப³த்³த⁴ கா³ள்ஹப³த்³தே⁴ஸு திகடுகாதீ³ஸு பே⁴ஸஜ்ஜேஸுபி ஏஸேவ நயோ.
634.Aññaṃ parikkhāranti vikappanupagapacchimacīvaraṃ ṭhapetvā yaṃ kiñci antamaso sūcimpi. Veṭhetvā ṭhapitasūcīsupi vatthugaṇanāya dukkaṭāni. Sithilaveṭhitāsu evaṃ. Gāḷhaṃ katvā baddhāsu pana ekameva dukkaṭanti mahāpaccariyaṃ vuttaṃ. Sūcighare pakkhittāsupi eseva nayo. Thavikāya pakkhipitvā sithilabaddha gāḷhabaddhesu tikaṭukādīsu bhesajjesupi eseva nayo.
635. ஸோ வா தே³தீதி ‘‘ப⁴ந்தே, தும்ஹாகங்யேவ இத³ங் ஸாருப்ப’’ந்தி ஏவங் வா தே³தி, அத² வா பன ‘‘ஆவுஸோ, மயங் துய்ஹங் ‘வத்தபடிபத்திங் கரிஸ்ஸதி, அம்ஹாகங் ஸந்திகே உபஜ்ஜ²ங் க³ண்ஹிஸ்ஸதி, த⁴ம்மங் பரியாபுணிஸ்ஸதீ’தி சீவரங் அத³ம்ஹ, ஸோ தா³னி த்வங் ந வத்தங் கரோஸி, ந உபஜ்ஜ²ங் க³ண்ஹாஸி, ந த⁴ம்மங் பரியாபுணாஸீ’’தி ஏவமாதீ³னி வுத்தோ ‘‘ப⁴ந்தே, சீவரத்தா²ய மஞ்ஞே ப⁴ணத², இத³ங் வோ சீவர’’ந்தி தே³தி, ஏவம்பி ஸோ வா தே³தி. தி³ஸாபக்கந்தங் வா பன த³ஹரங் ‘‘நிவத்தேத² ந’’ந்தி ப⁴ணதி, ஸோ ந நிவத்ததி. சீவரங் க³ஹெத்வா ருந்த⁴தா²தி, ஏவங் சே நிவத்ததி, ஸாது⁴. ஸசே ‘‘பத்தசீவரத்தா²ய மஞ்ஞே தும்ஹே ப⁴ணத², க³ண்ஹத² ந’’ந்தி தே³தி. ஏவம்பி ஸோ வா தே³தி, விப்³ப⁴ந்தங் வா தி³ஸ்வா ‘‘மயங் துய்ஹங் ‘வத்தங் கரிஸ்ஸதீ’தி பத்தசீவரங் அத³ம்ஹ, ஸோ தா³னி த்வங் விப்³ப⁴மித்வா சரஸீ’’தி வத³தி. இதரோ ‘‘க³ண்ஹத² தும்ஹாகங் பத்தசீவர’’ந்தி தே³தி, ஏவம்பி ஸோ வா தே³தி. ‘‘மம ஸந்திகே உபஜ்ஜ²ங் க³ண்ஹந்தஸ்ஸேவ தே³மி, அஞ்ஞத்த² க³ண்ஹந்தஸ்ஸ ந தே³மி. வத்தங் கரொந்தஸ்ஸேவ தே³மி, அகரொந்தஸ்ஸ ந தே³மி, த⁴ம்மங் பரியாபுணந்தஸ்ஸேவ தே³மி, அபரியாபுணந்தஸ்ஸ ந தே³மி, அவிப்³ப⁴மந்தஸ்ஸேவ தே³மி, விப்³ப⁴மந்தஸ்ஸ ந தே³மீ’’தி ஏவங் பன தா³துங் ந வட்டதி, த³த³தோ து³க்கடங். ஆஹராபேதுங் பன வட்டதி. சஜித்வா தி³ன்னங் அச்சி²ந்தி³த்வா க³ண்ஹந்தோ ப⁴ண்ட³க்³கே⁴ன காரேதப்³போ³. ஸேஸமெத்த² உத்தானமேவாதி.
635.Sovā detīti ‘‘bhante, tumhākaṃyeva idaṃ sāruppa’’nti evaṃ vā deti, atha vā pana ‘‘āvuso, mayaṃ tuyhaṃ ‘vattapaṭipattiṃ karissati, amhākaṃ santike upajjhaṃ gaṇhissati, dhammaṃ pariyāpuṇissatī’ti cīvaraṃ adamha, so dāni tvaṃ na vattaṃ karosi, na upajjhaṃ gaṇhāsi, na dhammaṃ pariyāpuṇāsī’’ti evamādīni vutto ‘‘bhante, cīvaratthāya maññe bhaṇatha, idaṃ vo cīvara’’nti deti, evampi so vā deti. Disāpakkantaṃ vā pana daharaṃ ‘‘nivattetha na’’nti bhaṇati, so na nivattati. Cīvaraṃ gahetvā rundhathāti, evaṃ ce nivattati, sādhu. Sace ‘‘pattacīvaratthāya maññe tumhe bhaṇatha, gaṇhatha na’’nti deti. Evampi so vā deti, vibbhantaṃ vā disvā ‘‘mayaṃ tuyhaṃ ‘vattaṃ karissatī’ti pattacīvaraṃ adamha, so dāni tvaṃ vibbhamitvā carasī’’ti vadati. Itaro ‘‘gaṇhatha tumhākaṃ pattacīvara’’nti deti, evampi so vā deti. ‘‘Mama santike upajjhaṃ gaṇhantasseva demi, aññattha gaṇhantassa na demi. Vattaṃ karontasseva demi, akarontassa na demi, dhammaṃ pariyāpuṇantasseva demi, apariyāpuṇantassa na demi, avibbhamantasseva demi, vibbhamantassa na demī’’ti evaṃ pana dātuṃ na vaṭṭati, dadato dukkaṭaṃ. Āharāpetuṃ pana vaṭṭati. Cajitvā dinnaṃ acchinditvā gaṇhanto bhaṇḍagghena kāretabbo. Sesamettha uttānamevāti.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மவசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammavacīkammaṃ, akusalacittaṃ, dukkhavedananti.
சீவரஅச்சி²ந்த³னஸிக்கா²பத³வண்ணனா நிட்டி²தா.
Cīvaraacchindanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 5. சீவரஅச்சி²ந்த³னஸிக்கா²பத³ங் • 5. Cīvaraacchindanasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. சீவரஅச்சி²ந்த³னஸிக்கா²பத³வண்ணனா • 5. Cīvaraacchindanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. சீவரஅச்சி²ந்த³னஸிக்கா²பத³வண்ணனா • 5. Cīvaraacchindanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. சீவரஅச்சி²ந்த³னஸிக்கா²பத³வண்ணனா • 5. Cīvaraacchindanasikkhāpadavaṇṇanā
