| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
5. சீவரஅச்சி²ந்த³னஸிக்கா²பத³வண்ணனா
5. Cīvaraacchindanasikkhāpadavaṇṇanā
‘‘த³த்வா’’தி யங் கிஞ்சி பச்சாஸீஸமானஸ்ஸேவ தா³னமிஹ அதி⁴ப்பேதங், ந நிஸ்ஸட்ட²தா³னந்தி ஆஹ ‘‘வெய்யாவச்சாதீ³னீ’’திஆதி³. ஸகஸஞ்ஞாயாதி ‘‘ஸக’’ந்தி ஸஞ்ஞாய. இமினா பாராஜிகாபா⁴வங் த³ஸ்ஸேதி. சஜித்வா தி³ன்னம்பி ஹி ஸகஸஞ்ஞாய க³ண்ஹதோ நத்தி² பாராஜிகங். அச்சி²ந்த³ந்தஸ்ஸாதி ஏகதோ அப³த்³தா⁴னி, விஸுங் ட²பிதானி ச ப³ஹூனி அச்சி²ந்த³தோ, ‘‘ஸங்கா⁴டிங் ஆஹர, உத்தராஸங்க³ங் ஆஹரா’’தி ஏவங் ஆஹராபயதோ ச. தேனாஹ ‘‘வத்து²க³ணனாய ஆபத்தியோ’’தி. ‘‘மயா தி³ன்னானி ஸப்³பா³னி ஆஹரா’’தி வத³தோபி ஏகவசனேனேவ ஸம்ப³ஹுலா ஆபத்தியோ. ஏகங் சீவரங் பன ஏகாப³த்³தா⁴னி ச ப³ஹூனி அச்சி²ந்த³தோ ஏகா ஆபத்தி. ‘‘அச்சி²ந்தா³’’தி ஆணத்தியா து³க்கடந்தி ‘‘மயா தி³ன்னானி ஸப்³பா³னி க³ண்ஹா’’தி ஆணத்தியா ஏகங் து³க்கடங், அச்சி²ன்னேஸு பன ஏகவசனேனேவ ஸம்ப³ஹுலா பாசித்தியோ. தேனாஹ ‘‘அச்சி²ன்னேஸு வத்து²க³ணனாய ஆபத்தியோ’’தி. அச்சி²ன்னேஸூதி தேனாணத்தேன அச்சி²ன்னேஸு சீவரேஸு. யத்த² பன பொத்த²கேஸு ‘‘அச்சி²ன்னேஸு யத்தகானி ஆணத்தானி, தேஸங் க³ணனாய ஆபத்தியோ’’தி பாடோ², தத்த² யத்தகானி ஆணத்தானீதி யத்தகானி சீவரானி க³ண்ஹிதுங் ஆணத்தானீதி அத்தோ². யங் பன ஸமந்தபாஸாதி³காயங் ‘‘சீவரங் ‘க³ண்ஹா’தி ஆணாபேதி, ஏகங் து³க்கடங். ஆணத்தோ ப³ஹூனி க³ண்ஹாதி, ஏகங் பாசித்திய’’ந்தி (பாரா॰ அட்ட²॰ 2.633) வுத்தங், தங் ஏகாப³த்³த⁴ங் ஸந்தா⁴ய. ஏவஞ்ச கத்வா ஸமந்தபாஸாதி³காய ஸத்³தி⁴ங் இமாய அட்ட²கதா²ய ந கோசி விரோதோ⁴. ஸசே பன ‘‘ஸங்கா⁴டிங் க³ண்ஹ, உத்தராஸங்க³ங் க³ண்ஹா’’தி ஆணாபேதி, வாசாய வாசாய து³க்கடங். அச்சி²ன்னேஸு வத்து²க³ணனாய ஆபத்தியோ. எத்த² ச ‘‘இத³ங் மே, ப⁴ந்தே, சீவரங் பி⁴க்கு²ஸ்ஸ ஸாமங் த³த்வா அச்சி²ன்னங் நிஸ்ஸக்³கி³ய’’ந்தி (பாரா॰ 633) இமினா நயேன நிஸ்ஸஜ்ஜனவிதா⁴னங் வேதி³தப்³ப³ங்.
‘‘Datvā’’ti yaṃ kiñci paccāsīsamānasseva dānamiha adhippetaṃ, na nissaṭṭhadānanti āha ‘‘veyyāvaccādīnī’’tiādi. Sakasaññāyāti ‘‘saka’’nti saññāya. Iminā pārājikābhāvaṃ dasseti. Cajitvā dinnampi hi sakasaññāya gaṇhato natthi pārājikaṃ. Acchindantassāti ekato abaddhāni, visuṃ ṭhapitāni ca bahūni acchindato, ‘‘saṅghāṭiṃ āhara, uttarāsaṅgaṃ āharā’’ti evaṃ āharāpayato ca. Tenāha ‘‘vatthugaṇanāya āpattiyo’’ti. ‘‘Mayā dinnāni sabbāni āharā’’ti vadatopi ekavacaneneva sambahulā āpattiyo. Ekaṃ cīvaraṃ pana ekābaddhāni ca bahūni acchindato ekā āpatti. ‘‘Acchindā’’ti āṇattiyā dukkaṭanti ‘‘mayā dinnāni sabbāni gaṇhā’’ti āṇattiyā ekaṃ dukkaṭaṃ, acchinnesu pana ekavacaneneva sambahulā pācittiyo. Tenāha ‘‘acchinnesu vatthugaṇanāya āpattiyo’’ti. Acchinnesūti tenāṇattena acchinnesu cīvaresu. Yattha pana potthakesu ‘‘acchinnesu yattakāni āṇattāni, tesaṃ gaṇanāya āpattiyo’’ti pāṭho, tattha yattakāni āṇattānīti yattakāni cīvarāni gaṇhituṃ āṇattānīti attho. Yaṃ pana samantapāsādikāyaṃ ‘‘cīvaraṃ ‘gaṇhā’ti āṇāpeti, ekaṃ dukkaṭaṃ. Āṇatto bahūni gaṇhāti, ekaṃ pācittiya’’nti (pārā. aṭṭha. 2.633) vuttaṃ, taṃ ekābaddhaṃ sandhāya. Evañca katvā samantapāsādikāya saddhiṃ imāya aṭṭhakathāya na koci virodho. Sace pana ‘‘saṅghāṭiṃ gaṇha, uttarāsaṅgaṃ gaṇhā’’ti āṇāpeti, vācāya vācāya dukkaṭaṃ. Acchinnesu vatthugaṇanāya āpattiyo. Ettha ca ‘‘idaṃ me, bhante, cīvaraṃ bhikkhussa sāmaṃ datvā acchinnaṃ nissaggiya’’nti (pārā. 633) iminā nayena nissajjanavidhānaṃ veditabbaṃ.
திகபாசித்தியந்தி உபஸம்பன்னே உபஸம்பன்னஸஞ்ஞிவேமதிகஅனுபஸம்பன்னஸஞ்ஞீனங் வஸேன தீணி பாசித்தியானி. அஞ்ஞங் பரிக்கா²ரந்தி பத்தாதி³ங் அஞ்ஞங் பரிக்கா²ரங், அந்தமஸோ ஸூசிம்பீதி அத்தோ². ந கேவலங் அனுபஸம்பன்னஸ்ஸ சீவரங்யேவ அச்சி²ந்த³தோ து³க்கடந்தி ஆஹ ‘‘அனுபஸம்பன்னஸ்ஸ சா’’திஆதி³. தத்த² யங் கிஞ்சீதி சீவரங் வா ஹோது, பத்தாதி³, யங் கிஞ்சி பரிக்கா²ரங் வா. தஸ்ஸ விஸ்ஸாஸங் க³ண்ஹந்தஸ்ஸாதி யஸ்ஸ தி³ன்னங், தஸ்ஸ விஸ்ஸாஸேன க³ண்ஹந்தஸ்ஸ, ததியத்தே² சேதங் உபயோக³வசனங். உபஸம்பன்னதாதி அச்சி²ந்த³னஸமயே உபஸம்பன்னபா⁴வோ. கிஞ்சாபி உபஸம்பன்னபா⁴வோ பாளியங், மாதிகட்ட²கதா²யஞ்ச தா³னக்³க³ஹணேஸு தி³ஸ்ஸதி, ததா²பி அனுபஸம்பன்னகாலே சீவரங் த³த்வா உபஸம்பன்னகாலே அச்சி²ந்த³ந்தஸ்ஸ ஆபத்திதோ அச்சி²ந்த³னகாலேயேவ உபஸம்பன்னதா அங்க³ந்தி வேதி³தப்³ப³ங்.
Tikapācittiyanti upasampanne upasampannasaññivematikaanupasampannasaññīnaṃ vasena tīṇi pācittiyāni. Aññaṃ parikkhāranti pattādiṃ aññaṃ parikkhāraṃ, antamaso sūcimpīti attho. Na kevalaṃ anupasampannassa cīvaraṃyeva acchindato dukkaṭanti āha ‘‘anupasampannassa cā’’tiādi. Tattha yaṃ kiñcīti cīvaraṃ vā hotu, pattādi, yaṃ kiñci parikkhāraṃ vā. Tassa vissāsaṃ gaṇhantassāti yassa dinnaṃ, tassa vissāsena gaṇhantassa, tatiyatthe cetaṃ upayogavacanaṃ. Upasampannatāti acchindanasamaye upasampannabhāvo. Kiñcāpi upasampannabhāvo pāḷiyaṃ, mātikaṭṭhakathāyañca dānaggahaṇesu dissati, tathāpi anupasampannakāle cīvaraṃ datvā upasampannakāle acchindantassa āpattito acchindanakāleyeva upasampannatā aṅganti veditabbaṃ.
சீவரஅச்சி²ந்த³னஸிக்கா²பத³வண்ணனா நிட்டி²தா.
Cīvaraacchindanasikkhāpadavaṇṇanā niṭṭhitā.
