| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
5. චීවරඅච්‌ඡින්‌දනසික්‌ඛාපදවණ්‌ණනා
5. Cīvaraacchindanasikkhāpadavaṇṇanā
631. තෙන සමයෙනාති චීවරඅච්‌ඡින්‌දනසික්‌ඛාපදං. තත්‌ථ යම්‌පි ත්‍යාහන්‌ති යම්‌පි තෙ අහං. සො කිර ‘‘මම පත්‌තචීවරඋපාහනපච්‌චත්‌ථරණානි වහන්‌තො මයා සද්‌ධිං චාරිකං පක්‌කමිස්‌සතී’’ති අදාසි. තෙනෙවමාහ. අච්‌ඡින්‌දීති බලක්‌කාරෙන අග්‌ගහෙසි, සකසඤ්‌ඤාය ගහිතත්‌තා පනස්‌ස පාරාජිකං නත්‌ථි, කිලමෙත්‌වා ගහිතත්‌තා ආපත්‌ති පඤ්‌ඤත්‌තා.
631.Tena samayenāti cīvaraacchindanasikkhāpadaṃ. Tattha yampi tyāhanti yampi te ahaṃ. So kira ‘‘mama pattacīvaraupāhanapaccattharaṇāni vahanto mayā saddhiṃ cārikaṃ pakkamissatī’’ti adāsi. Tenevamāha. Acchindīti balakkārena aggahesi, sakasaññāya gahitattā panassa pārājikaṃ natthi, kilametvā gahitattā āpatti paññattā.
633. සයං අච්‌ඡින්‌දති නිස්‌සග්‌ගියං පාචිත්‌තියන්‌ති එකං චීවරං එකාබද්‌ධානි ච බහූනි අච්‌ඡින්‌දතො එකා ආපත්‌ති. එකතො අබද්‌ධානි විසුං විසුං ඨිතානි ච බහූනි අච්‌ඡින්‌දතො ‘‘සඞ්‌ඝාටිං ආහර, උත්‌තරාසඞ්‌ගං ආහරා’’ති එවං ආහරාපයතො ච වත්‌ථුගණනාය ආපත්‌තියො. ‘‘මයා දින්‌නානි සබ්‌බානි ආහරා’’ති වදතොපි එකවචනෙනෙව සම්‌බහුලා ආපත්‌තියො.
633.Sayaṃ acchindati nissaggiyaṃ pācittiyanti ekaṃ cīvaraṃ ekābaddhāni ca bahūni acchindato ekā āpatti. Ekato abaddhāni visuṃ visuṃ ṭhitāni ca bahūni acchindato ‘‘saṅghāṭiṃ āhara, uttarāsaṅgaṃ āharā’’ti evaṃ āharāpayato ca vatthugaṇanāya āpattiyo. ‘‘Mayā dinnāni sabbāni āharā’’ti vadatopi ekavacaneneva sambahulā āpattiyo.
අඤ්‌ඤං ආණාපෙති ආපත්‌ති දුක්‌කටස්‌සාති ‘‘චීවරං ගණ්‌හා’’ති ආණාපෙති, එකං දුක්‌කටං. ආණත්‌තො බහූනි ගණ්‌හාති, එකං පාචිත්‌තියං ‘‘සඞ්‌ඝාටිං ගණ්‌හ, උත්‌තරාසඞ්‌ගං ගණ්‌හා’’ති වදතො වාචාය වාචාය දුක්‌කටං. ‘‘මයා දින්‌නානි සබ්‌බානි ගණ්‌හා’’ති වදතො එකවාචාය සම්‌බහුලා ආපත්‌තියො.
Aññaṃ āṇāpeti āpatti dukkaṭassāti ‘‘cīvaraṃ gaṇhā’’ti āṇāpeti, ekaṃ dukkaṭaṃ. Āṇatto bahūni gaṇhāti, ekaṃ pācittiyaṃ ‘‘saṅghāṭiṃ gaṇha, uttarāsaṅgaṃ gaṇhā’’ti vadato vācāya vācāya dukkaṭaṃ. ‘‘Mayā dinnāni sabbāni gaṇhā’’ti vadato ekavācāya sambahulā āpattiyo.
634. අඤ්‌ඤං පරික්‌ඛාරන්‌ති විකප්‌පනුපගපච්‌ඡිමචීවරං ඨපෙත්‌වා යං කිඤ්‌චි අන්‌තමසො සූචිම්‌පි. වෙඨෙත්‌වා ඨපිතසූචීසුපි වත්‌ථුගණනාය දුක්‌කටානි. සිථිලවෙඨිතාසු එවං. ගාළ්‌හං කත්‌වා බද්‌ධාසු පන එකමෙව දුක්‌කටන්‌ති මහාපච්‌චරියං වුත්‌තං. සූචිඝරෙ පක්‌ඛිත්‌තාසුපි එසෙව නයො. ථවිකාය පක්‌ඛිපිත්‌වා සිථිලබද්‌ධ ගාළ්‌හබද්‌ධෙසු තිකටුකාදීසු භෙසජ්‌ජෙසුපි එසෙව නයො.
634.Aññaṃ parikkhāranti vikappanupagapacchimacīvaraṃ ṭhapetvā yaṃ kiñci antamaso sūcimpi. Veṭhetvā ṭhapitasūcīsupi vatthugaṇanāya dukkaṭāni. Sithilaveṭhitāsu evaṃ. Gāḷhaṃ katvā baddhāsu pana ekameva dukkaṭanti mahāpaccariyaṃ vuttaṃ. Sūcighare pakkhittāsupi eseva nayo. Thavikāya pakkhipitvā sithilabaddha gāḷhabaddhesu tikaṭukādīsu bhesajjesupi eseva nayo.
635. සො වා දෙතීති ‘‘භන්‌තෙ, තුම්‌හාකංයෙව ඉදං සාරුප්‌ප’’න්‌ති එවං වා දෙති, අථ වා පන ‘‘ආවුසො, මයං තුය්‌හං ‘වත්‌තපටිපත්‌තිං කරිස්‌සති, අම්‌හාකං සන්‌තිකෙ උපජ්‌ඣං ගණ්‌හිස්‌සති, ධම්‌මං පරියාපුණිස්‌සතී’ති චීවරං අදම්‌හ, සො දානි ත්‌වං න වත්‌තං කරොසි, න උපජ්‌ඣං ගණ්‌හාසි, න ධම්‌මං පරියාපුණාසී’’ති එවමාදීනි වුත්‌තො ‘‘භන්‌තෙ, චීවරත්‌ථාය මඤ්‌ඤෙ භණථ, ඉදං වො චීවර’’න්‌ති දෙති, එවම්‌පි සො වා දෙති. දිසාපක්‌කන්‌තං වා පන දහරං ‘‘නිවත්‌තෙථ න’’න්‌ති භණති, සො න නිවත්‌තති. චීවරං ගහෙත්‌වා රුන්‌ධථාති, එවං චෙ නිවත්‌තති, සාධු. සචෙ ‘‘පත්‌තචීවරත්‌ථාය මඤ්‌ඤෙ තුම්‌හෙ භණථ, ගණ්‌හථ න’’න්‌ති දෙති. එවම්‌පි සො වා දෙති, විබ්‌භන්‌තං වා දිස්‌වා ‘‘මයං තුය්‌හං ‘වත්‌තං කරිස්‌සතී’ති පත්‌තචීවරං අදම්‌හ, සො දානි ත්‌වං විබ්‌භමිත්‌වා චරසී’’ති වදති. ඉතරො ‘‘ගණ්‌හථ තුම්‌හාකං පත්‌තචීවර’’න්‌ති දෙති, එවම්‌පි සො වා දෙති. ‘‘මම සන්‌තිකෙ උපජ්‌ඣං ගණ්‌හන්‌තස්‌සෙව දෙමි, අඤ්‌ඤත්‌ථ ගණ්‌හන්‌තස්‌ස න දෙමි. වත්‌තං කරොන්‌තස්‌සෙව දෙමි, අකරොන්‌තස්‌ස න දෙමි, ධම්‌මං පරියාපුණන්‌තස්‌සෙව දෙමි, අපරියාපුණන්‌තස්‌ස න දෙමි, අවිබ්‌භමන්‌තස්‌සෙව දෙමි, විබ්‌භමන්‌තස්‌ස න දෙමී’’ති එවං පන දාතුං න වට්‌ටති, දදතො දුක්‌කටං. ආහරාපෙතුං පන වට්‌ටති. චජිත්‌වා දින්‌නං අච්‌ඡින්‌දිත්‌වා ගණ්‌හන්‌තො භණ්‌ඩග්‌ඝෙන කාරෙතබ්‌බො. සෙසමෙත්‌ථ උත්‌තානමෙවාති.
635.Sovā detīti ‘‘bhante, tumhākaṃyeva idaṃ sāruppa’’nti evaṃ vā deti, atha vā pana ‘‘āvuso, mayaṃ tuyhaṃ ‘vattapaṭipattiṃ karissati, amhākaṃ santike upajjhaṃ gaṇhissati, dhammaṃ pariyāpuṇissatī’ti cīvaraṃ adamha, so dāni tvaṃ na vattaṃ karosi, na upajjhaṃ gaṇhāsi, na dhammaṃ pariyāpuṇāsī’’ti evamādīni vutto ‘‘bhante, cīvaratthāya maññe bhaṇatha, idaṃ vo cīvara’’nti deti, evampi so vā deti. Disāpakkantaṃ vā pana daharaṃ ‘‘nivattetha na’’nti bhaṇati, so na nivattati. Cīvaraṃ gahetvā rundhathāti, evaṃ ce nivattati, sādhu. Sace ‘‘pattacīvaratthāya maññe tumhe bhaṇatha, gaṇhatha na’’nti deti. Evampi so vā deti, vibbhantaṃ vā disvā ‘‘mayaṃ tuyhaṃ ‘vattaṃ karissatī’ti pattacīvaraṃ adamha, so dāni tvaṃ vibbhamitvā carasī’’ti vadati. Itaro ‘‘gaṇhatha tumhākaṃ pattacīvara’’nti deti, evampi so vā deti. ‘‘Mama santike upajjhaṃ gaṇhantasseva demi, aññattha gaṇhantassa na demi. Vattaṃ karontasseva demi, akarontassa na demi, dhammaṃ pariyāpuṇantasseva demi, apariyāpuṇantassa na demi, avibbhamantasseva demi, vibbhamantassa na demī’’ti evaṃ pana dātuṃ na vaṭṭati, dadato dukkaṭaṃ. Āharāpetuṃ pana vaṭṭati. Cajitvā dinnaṃ acchinditvā gaṇhanto bhaṇḍagghena kāretabbo. Sesamettha uttānamevāti.
තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මවචීකම්‌මං, අකුසලචිත්‌තං, දුක්‌ඛවෙදනන්‌ති.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammavacīkammaṃ, akusalacittaṃ, dukkhavedananti.
චීවරඅච්‌ඡින්‌දනසික්‌ඛාපදවණ්‌ණනා නිට්‌ඨිතා.
Cīvaraacchindanasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 5. චීවරඅච්‌ඡින්‌දනසික්‌ඛාපදං • 5. Cīvaraacchindanasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 5. චීවරඅච්‌ඡින්‌දනසික්‌ඛාපදවණ්‌ණනා • 5. Cīvaraacchindanasikkhāpadavaṇṇanā
