| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༥. ཙཱིཝརཨཙྪིནྡནསིཀྑཱཔདཝཎྞནཱ
5. Cīvaraacchindanasikkhāpadavaṇṇanā
༦༣༡. པཉྩམེ ཡམྤི…པེ॰… ཨཙྪིནྡཱིཏི ཨེཏྠ ཡཾ ཏེ ཨཧཾ ཙཱིཝརཾ ཨདཱསིཾ, ཏཾ ‘‘མཡཱ སདྡྷིཾ པཀྐམིསྶཏཱི’’ཏི སཉྙཱཡ ཨདཱསིཾ, ན ཨཉྙཐཱཏི ཀུཔིཏོ ཨཙྪིནྡཱིཏི ཨེཝཾ ཨཛ྄ཛྷཱཧརིཏྭཱ ཡོཛེཏབྦཾ།
631. Pañcame yampi…pe… acchindīti ettha yaṃ te ahaṃ cīvaraṃ adāsiṃ, taṃ ‘‘mayā saddhiṃ pakkamissatī’’ti saññāya adāsiṃ, na aññathāti kupito acchindīti evaṃ ajjhāharitvā yojetabbaṃ.
༦༣༣. ཨེཀཾ དུཀྐཊནྟི ཡདི ཨཱཎཏྟོ ཨཝསྶཾ ཨཙྪིནྡཏི, ཨཱཎཏྟིཀྑཎེ པཱཙིཏྟིཡམེཝ། ཡདི ན ཨཙྪིནྡཏི, ཏདཱ ཨེཝ དུཀྐཊནྟི དཊྛབྦཾ། ཨེཀཝཱཙཱཡ སམྦཧུལཱ ཨཱཔཏྟིཡོཏི ཡདི ཨཱཎཏྟོ ཨནནྟརཱཡེན ཨཙྪིནྡཏི, ཨཱཎཏྟིཀྑཎེཡེཝ ཝཏྠུགཎནཱཡ པཱཙིཏྟིཡཨཱཔཏྟིཡོ པཡོགཀརཎཀྑཎེཡེཝ ཨཱཔཏྟིཡཱ ཨཱཔཛྫིཏབྦཏོ, ཙཱིཝརཾ པན ཨཙྪིནྣེཡེཝ ནིསྶགྒིཡཾ ཧོཏི། ཡདི སོ ན ཨཙྪིནྡཏི, ཨཱཎཏྟིཀྑཎེ ཨེཀམེཝ དུཀྐཊནྟི དཊྛབྦཾ། ཨེཝཾ ཨཉྙཏྠཱཔི ཨཱིདིསེསུ ནཡོ ཉཱཏབྦོ།
633.Ekaṃ dukkaṭanti yadi āṇatto avassaṃ acchindati, āṇattikkhaṇe pācittiyameva. Yadi na acchindati, tadā eva dukkaṭanti daṭṭhabbaṃ. Ekavācāya sambahulā āpattiyoti yadi āṇatto anantarāyena acchindati, āṇattikkhaṇeyeva vatthugaṇanāya pācittiyaāpattiyo payogakaraṇakkhaṇeyeva āpattiyā āpajjitabbato, cīvaraṃ pana acchinneyeva nissaggiyaṃ hoti. Yadi so na acchindati, āṇattikkhaṇe ekameva dukkaṭanti daṭṭhabbaṃ. Evaṃ aññatthāpi īdisesu nayo ñātabbo.
༦༣༥. ཨུཔཛ྄ཛྷཾ གཎྷིསྶཏཱིཏི སཱམཎེརསྶ དཱནཾ དཱིཔེཏི, ཏེན ཙ སཱམཎེརཀཱལེ དཏྭཱ ཨུཔསམྤནྣཀཱལེ ཨཙྪིནྡཏོཔི པཱཙིཏྟིཡཾ དཱིཔེཏི། ‘‘བྷིཀྑུསྶ སཱམཾ ཙཱིཝརཾ དཏྭཱ’’ཏི ཨིདཾ ཨུཀྐཊྛཝསེན ཝུཏྟཾ། ཨཱཧརཱཔེཏུཾ པན ཝཊྚཏཱིཏི ཀམྨེ ཨཀཏེ བྷཏིསདིསཏྟཱ ཝུཏྟཾ། ཝིཀཔྤནུཔགཔཙྪིམཙཱིཝརཏཱ, སཱམཾ དིནྣཏཱ, སཀསཉྙིཏཱ, ཨུཔསམྤནྣཏཱ, ཀོདྷཝསེན ཨཙྪིནྡནཾ ཝཱ ཨཙྪིནྡཱཔནཾ ཝཱཏི ཨིམཱནེཏྠ པཉྩ ཨངྒཱནི།
635.Upajjhaṃ gaṇhissatīti sāmaṇerassa dānaṃ dīpeti, tena ca sāmaṇerakāle datvā upasampannakāle acchindatopi pācittiyaṃ dīpeti. ‘‘Bhikkhussa sāmaṃ cīvaraṃ datvā’’ti idaṃ ukkaṭṭhavasena vuttaṃ. Āharāpetuṃ pana vaṭṭatīti kamme akate bhatisadisattā vuttaṃ. Vikappanupagapacchimacīvaratā, sāmaṃ dinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni.
ཙཱིཝརཨཙྪིནྡནསིཀྑཱཔདཝཎྞནཱ ནིཊྛིཏཱ།
Cīvaraacchindanasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༥. ཙཱིཝརཨཙྪིནྡནསིཀྑཱཔདཾ • 5. Cīvaraacchindanasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༥. ཙཱིཝརཨཙྪིནྡནསིཀྑཱཔདཝཎྞནཱ • 5. Cīvaraacchindanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༥. ཙཱིཝརཨཙྪིནྡནསིཀྑཱཔདཝཎྞནཱ • 5. Cīvaraacchindanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. ཙཱིཝརཨཙྪིནྡནསིཀྑཱཔདཝཎྞནཱ • 5. Cīvaraacchindanasikkhāpadavaṇṇanā
