| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
3. சீவரனித்³தே³ஸவண்ணனா
3. Cīvaraniddesavaṇṇanā
30. ஏவங் க³ருகே ஸிக்கி²தப்³பா³காரங் த³ஸ்ஸெத்வா இதா³னி சீவரேஸு த³ஸ்ஸேதுங் ‘‘சீவர’’ந்தி உத்³த⁴டங். தத்த² ஜாதிதோ ச² சீவரானி (மஹாவ॰ 339; பாரா॰ அட்ட²॰ 2.462-463; கங்கா²॰ அட்ட²॰ கதி²னஸிக்கா²பத³வண்ணனா), தானி கானீதி சே, தங் த³ஸ்ஸேதுங் ‘‘கோ²மா’’திஆதி³ ஆரத்³த⁴ங். தத்த² கோ²மங் நாம கோ²மவாகஸுத்தேஹி கதங் வத்த²ங். ஸாணங் நாம ஸாணவாகேஹி கதங் வத்த²ங். ப⁴ங்க³ங் நாம கோ²மஸுத்தாதீ³ஹி பஞ்சஹி மிஸ்ஸெத்வா கதங் வத்த²ங். பாடேக்கங் வாகமயமேவ வாதி வத³ந்தி. கம்ப³லங் நாம மனுஸ்ஸலோமங் வாளலோமங் ட²பெத்வா லோமேஹி வாயித்வா கதங் வத்த²ங். ச²ளேதானீதி ச² ஏதானி. ஸஹ அனுலோமேஹீதி ஸானுலோமானி. ஜாதிதோ பன கப்பியானி ச² சீவரானீதி வுத்தங் ஹோதி.
30. Evaṃ garuke sikkhitabbākāraṃ dassetvā idāni cīvaresu dassetuṃ ‘‘cīvara’’nti uddhaṭaṃ. Tattha jātito cha cīvarāni (mahāva. 339; pārā. aṭṭha. 2.462-463; kaṅkhā. aṭṭha. kathinasikkhāpadavaṇṇanā), tāni kānīti ce, taṃ dassetuṃ ‘‘khomā’’tiādi āraddhaṃ. Tattha khomaṃ nāma khomavākasuttehi kataṃ vatthaṃ. Sāṇaṃ nāma sāṇavākehi kataṃ vatthaṃ. Bhaṅgaṃ nāma khomasuttādīhi pañcahi missetvā kataṃ vatthaṃ. Pāṭekkaṃ vākamayameva vāti vadanti. Kambalaṃ nāma manussalomaṃ vāḷalomaṃ ṭhapetvā lomehi vāyitvā kataṃ vatthaṃ. Chaḷetānīti cha etāni. Saha anulomehīti sānulomāni. Jātito pana kappiyāni cha cīvarānīti vuttaṃ hoti.
31. இதா³னி தேஸங் அனுலோமானி த³ஸ்ஸேதுங் ‘‘து³கூல’’ந்திஆதி³ வுத்தங். தத்த² (மஹாவ॰ அட்ட²॰ 305) து³கூலங் ஸாணஸ்ஸ அனுலோமங் வாகமயத்தா. பட்டுண்ணந்தி பட்டுண்ணதே³ஸே பாணகேஹி ஸஞ்ஜாதவத்த²ங். ஸோமாரதே³ஸே, சீனதே³ஸே ஜாதங் ஸோமாரசீனஜங் படந்தி ஸம்ப³ந்தோ⁴. இமானி தீணிபி கோஸெய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜந்தி ஏஹிபி⁴க்கூ²னங் புஞ்ஞித்³தி⁴யா நிப்³ப³த்தசீவரங். தங் பன கோ²மாதீ³னங் அஞ்ஞதரங் ஹோதி. கப்பருக்கே²ஹி நிப்³ப³த்தங் ஜாலினியா தே³வகஞ்ஞாய அனுருத்³த⁴த்தே²ரஸ்ஸ தி³ன்னவத்தா²தி³கங் தே³வதி³ன்னங். தம்பி கோ²மாதீ³ஹி நிப்³ப³த்தவத்த²ஸதி³ஸத்தா ச²ன்னம்பி அனுலோமங் ஹோதியேவ கப்பாஸிகஸ்ஸ வா, இத்³தி⁴ஜம்பி ததே²வ வேதி³தப்³ப³ங். தஸ்ஸ தஸ்ஸாதி கோ²மாதி³கஸ்ஸ. அனுலோமிகந்தி அனுரூபங்.
31. Idāni tesaṃ anulomāni dassetuṃ ‘‘dukūla’’ntiādi vuttaṃ. Tattha (mahāva. aṭṭha. 305) dukūlaṃ sāṇassa anulomaṃ vākamayattā. Paṭṭuṇṇanti paṭṭuṇṇadese pāṇakehi sañjātavatthaṃ. Somāradese, cīnadese jātaṃ somāracīnajaṃ paṭanti sambandho. Imāni tīṇipi koseyyassa anulomāni pāṇakehi katasuttamayattā. Iddhijanti ehibhikkhūnaṃ puññiddhiyā nibbattacīvaraṃ. Taṃ pana khomādīnaṃ aññataraṃ hoti. Kapparukkhehi nibbattaṃ jāliniyā devakaññāya anuruddhattherassa dinnavatthādikaṃ devadinnaṃ. Tampi khomādīhi nibbattavatthasadisattā channampi anulomaṃ hotiyeva kappāsikassa vā, iddhijampi tatheva veditabbaṃ. Tassa tassāti khomādikassa. Anulomikanti anurūpaṃ.
32-33. ஏவங் ஜாதிதோ ஸானுலோமானி ச² சீவரானி த³ஸ்ஸெத்வா இதா³னி தேஸு அதி⁴ட்டா²னாதி³கங் விதா⁴னங் த³ஸ்ஸேதுங் ‘‘திசீவர’’ந்திஆதி³ வுத்தங். எத்த² (கங்கா²॰ அட்ட²॰ கதி²னஸிககா²பத³வண்ணனா; மஹாவ॰ 358) தி⁴ட்டா²னதோ புப்³பே³ திசீவரங் நாம பாடேக்கங் நத்தி² ஸங்கா⁴டிஆதி³ப்பஹோனகஸ்ஸ பச்சத்த²ரணாதி³வஸேனாபி அதி⁴ட்டா²துங் அனுஞ்ஞாதத்தா. தஸ்மா ‘‘திசீவரங் அதி⁴ட்டெ²ய்ய ந விகப்பெய்யா’’தி எத்த² ‘‘இமங் ஸங்கா⁴டி’’ந்தி ஏவங் நாமே க³ஹிதே ‘‘அதி⁴ட்டா²ன’’மிச்சேவ வத்தப்³ப³ங், ‘‘விகப்பேமீ’’தி பன ந வத்தப்³ப³ந்தி அதி⁴ப்பாயோ. ஏவங் ஸேஸேஸுபி. முக²புஞ்ச²னஞ்ச நிஸீத³னஞ்ச முக²புஞ்ச²னநிஸீத³னங். கண்டு³ச்சா²தி³ந்தி கண்டு³ப்படிச்சா²தி³ங் அதி⁴ட்டெ²ய்ய, ந விகப்பெய்யாதி ஸம்ப³ந்தோ⁴. எத்தா²தி இமேஸு நவஸு சீவரேஸு. திசீவரந்தி திசீவராதி⁴ட்டா²னநயேன அதி⁴ட்டி²ததிசீவரங். வினா அலத்³த⁴ஸம்முதிகோ பி⁴க்கு² அவிப்பவாஸஸம்முதிஅலத்³த⁴ட்டா²னே ஏகாஹம்பி ஹத்த²பாஸங் விஜஹித்வா ந வஸெய்யாதி அத்தோ². ‘‘ந பி⁴க்க²வே சாதுமாஸங் நிஸீத³னேன விப்பவஸிதப்³ப³ங், யோ விப்பவஸெய்ய, ஆபத்தி து³க்கடஸ்ஸா’’தி கு²த்³த³கக்க²ந்த⁴கே (சூளவ॰ 263) வுத்தத்தா சாதுமாஸங் நிஸீத³னங் வினா ந வஸெய்யாதி அத்தோ².
32-33. Evaṃ jātito sānulomāni cha cīvarāni dassetvā idāni tesu adhiṭṭhānādikaṃ vidhānaṃ dassetuṃ ‘‘ticīvara’’ntiādi vuttaṃ. Ettha (kaṅkhā. aṭṭha. kathinasikakhāpadavaṇṇanā; mahāva. 358) dhiṭṭhānato pubbe ticīvaraṃ nāma pāṭekkaṃ natthi saṅghāṭiādippahonakassa paccattharaṇādivasenāpi adhiṭṭhātuṃ anuññātattā. Tasmā ‘‘ticīvaraṃ adhiṭṭheyya na vikappeyyā’’ti ettha ‘‘imaṃ saṅghāṭi’’nti evaṃ nāme gahite ‘‘adhiṭṭhāna’’micceva vattabbaṃ, ‘‘vikappemī’’ti pana na vattabbanti adhippāyo. Evaṃ sesesupi. Mukhapuñchanañca nisīdanañca mukhapuñchananisīdanaṃ. Kaṇḍucchādinti kaṇḍuppaṭicchādiṃ adhiṭṭheyya, na vikappeyyāti sambandho. Etthāti imesu navasu cīvaresu. Ticīvaranti ticīvarādhiṭṭhānanayena adhiṭṭhitaticīvaraṃ. Vinā aladdhasammutiko bhikkhu avippavāsasammutialaddhaṭṭhāne ekāhampi hatthapāsaṃ vijahitvā na vaseyyāti attho. ‘‘Na bhikkhave cātumāsaṃ nisīdanena vippavasitabbaṃ, yo vippavaseyya, āpatti dukkaṭassā’’ti khuddakakkhandhake (cūḷava. 263) vuttattā cātumāsaṃ nisīdanaṃ vinā na vaseyyāti attho.
34. இதா³னி அதி⁴ட்டா²னவிதி⁴ங் த³ஸ்ஸேதுங் ‘‘இமங் ஸங்கா⁴டி’’ந்திஆதி³ வுத்தங். தத்த² மிச்சதி⁴ட்ட²யேதி இதி அதி⁴ட்ட²யே, ‘‘இமங் ஸங்கா⁴டிங் அதி⁴ட்டா²மீ’’தி ஏவங் ஸங்கா⁴டிங் அதி⁴ட்ட²யேதி அத்தோ². அஹத்த²பாஸமேதந்தி தூ³ரே டி²தங் பன ட²பிதோகாஸங் ஸல்லக்கெ²த்வா ஸசே ஏகங், ‘‘ஏத’’ந்தி, ப³ஹூனி சே, ‘‘ஏதானீ’’தி வத்வா அதி⁴ட்ட²யேதி அத்த²ஸம்ப³ந்தோ⁴. ஸேஸேஸுபி அயங் நயோதி யதா² ‘‘இமங் ஸங்கா⁴டிங் அதி⁴ட்டா²மீ’’தி வுத்தங், ஏவங் ‘‘இமங் உத்தராஸங்க³ங், இமங் கண்டு³ப்படிச்சா²தி³ங் அதி⁴ட்டா²மீ’’தி ஏவங் அத்தனோ நாமேனேவ வத்வா ஸம்முகா²பி பரம்முகா²பி வுத்தனயேன அதி⁴ட்டா²தப்³ப³ந்தி வுத்தங் ஹோதி.
34. Idāni adhiṭṭhānavidhiṃ dassetuṃ ‘‘imaṃ saṅghāṭi’’ntiādi vuttaṃ. Tattha miccadhiṭṭhayeti iti adhiṭṭhaye, ‘‘imaṃ saṅghāṭiṃ adhiṭṭhāmī’’ti evaṃ saṅghāṭiṃ adhiṭṭhayeti attho. Ahatthapāsametanti dūre ṭhitaṃ pana ṭhapitokāsaṃ sallakkhetvā sace ekaṃ, ‘‘eta’’nti, bahūni ce, ‘‘etānī’’ti vatvā adhiṭṭhayeti atthasambandho. Sesesupi ayaṃ nayoti yathā ‘‘imaṃ saṅghāṭiṃ adhiṭṭhāmī’’ti vuttaṃ, evaṃ ‘‘imaṃ uttarāsaṅgaṃ, imaṃ kaṇḍuppaṭicchādiṃ adhiṭṭhāmī’’ti evaṃ attano nāmeneva vatvā sammukhāpi parammukhāpi vuttanayena adhiṭṭhātabbanti vuttaṃ hoti.
35. இதா³னி ஸசே புப்³பே³ அதி⁴ட்டி²தங் திசீவரங் நிஸீத³னங் வஸ்ஸிகஸாடிகங் கண்டு³ப்படிச்சா²தீ³தி இமேஸு ச²ஸு சீவரேஸு அஞ்ஞதரங் சீவரங் அத்தி², புன ததா²வித⁴ங் சீவரங் அதி⁴ட்ட²ஹித்வா பரிஹரிதுங் இச்ச²ந்தேன ‘‘த்³வே பன ந வட்டந்தீ’’தி (பாரா॰ அட்ட²॰ 2.469; கங்கா²॰ அட்ட²॰ கதி²னஸிக்கா²பத³வண்ணனா) வுத்தத்தா புப்³பே³ அதி⁴ட்டி²தங் பச்சுத்³த⁴ரித்வா அதி⁴ட்டா²தப்³ப³ந்தி த³ஸ்ஸேதுங் ‘‘அதி⁴ட்ட²ஹந்தோ’’திஆதி³ வுத்தங், தங் உத்தானமேவ. பத்தாதி⁴ட்ட²ஹனே ததா²தி ‘‘இமங் பத்தங், ஏதங் பத்த’’ந்தி ஏவங் நாமமத்தமேவ விஸேஸோ. ஸேஸங் தாதி³ஸமேவாதி அத்தோ².
35. Idāni sace pubbe adhiṭṭhitaṃ ticīvaraṃ nisīdanaṃ vassikasāṭikaṃ kaṇḍuppaṭicchādīti imesu chasu cīvaresu aññataraṃ cīvaraṃ atthi, puna tathāvidhaṃ cīvaraṃ adhiṭṭhahitvā pariharituṃ icchantena ‘‘dve pana na vaṭṭantī’’ti (pārā. aṭṭha. 2.469; kaṅkhā. aṭṭha. kathinasikkhāpadavaṇṇanā) vuttattā pubbe adhiṭṭhitaṃ paccuddharitvā adhiṭṭhātabbanti dassetuṃ ‘‘adhiṭṭhahanto’’tiādi vuttaṃ, taṃ uttānameva. Pattādhiṭṭhahane tathāti ‘‘imaṃ pattaṃ, etaṃ patta’’nti evaṃ nāmamattameva viseso. Sesaṃ tādisamevāti attho.
36. ஏதங் இமங் வ ஸங்கா⁴டிங் ஸங்ஸேதி எத்த² ஸசே அந்தோக³ப்³பே⁴ வா ஸாமந்தவிஹாரே வா ஹோதி, ட²பிதட்டா²னங் ஸல்லக்கெ²த்வா ‘‘ஏதங் ஸங்கா⁴டிங் அதி⁴ட்டா²மீ’’தி வாசா பி⁴ந்தி³தப்³பா³, ஸசே ஹத்த²பாஸே ஹோதி, ‘‘இமங் ஸங்கா⁴டி’’ந்தி தேஸங் தேஸங் நாமவஸேன வாசா பி⁴ந்தி³தப்³பா³தி அத்தோ². பச்சுத்³தா⁴ரேபி ஏஸேவ நயோ. எத்த² பன ‘‘த்³வே சீவரஸ்ஸ அதி⁴ட்டா²னா காயேன வா அதி⁴ட்டே²தி, வாசாய வா அதி⁴ட்டே²தீ’’தி (பரி॰ 322) வுத்தத்தா ஸங்கா⁴டிஆதி³கங் ஹத்தே²ன க³ஹெத்வா ‘‘இமங் ஸங்கா⁴டிங் அதி⁴ட்டா²மீ’’திஆதி³னா நயேன சித்தேன ஆபோ⁴க³ங் கத்வா காயவிகாரங் கரொந்தேன காயேன அதி⁴ட்டா²தப்³ப³ங், யேன கேனசி ஸரீராவயவேன அபு²ஸந்தஸ்ஸ ந வட்டதி. வாசாய அதி⁴ட்ட²ஹந்தேன வசீபே⁴த³ங் கத்வாவ அதி⁴ட்டா²தப்³ப³ங். ததா² பத்தேபி. விதூ³தி பண்டி³தோ.
36.Etaṃ imaṃ va saṅghāṭiṃ saṃseti ettha sace antogabbhe vā sāmantavihāre vā hoti, ṭhapitaṭṭhānaṃ sallakkhetvā ‘‘etaṃ saṅghāṭiṃ adhiṭṭhāmī’’ti vācā bhinditabbā, sace hatthapāse hoti, ‘‘imaṃ saṅghāṭi’’nti tesaṃ tesaṃ nāmavasena vācā bhinditabbāti attho. Paccuddhārepi eseva nayo. Ettha pana ‘‘dve cīvarassa adhiṭṭhānā kāyena vā adhiṭṭheti, vācāya vā adhiṭṭhetī’’ti (pari. 322) vuttattā saṅghāṭiādikaṃ hatthena gahetvā ‘‘imaṃ saṅghāṭiṃ adhiṭṭhāmī’’tiādinā nayena cittena ābhogaṃ katvā kāyavikāraṃ karontena kāyena adhiṭṭhātabbaṃ, yena kenaci sarīrāvayavena aphusantassa na vaṭṭati. Vācāya adhiṭṭhahantena vacībhedaṃ katvāva adhiṭṭhātabbaṃ. Tathā pattepi. Vidūti paṇḍito.
37-8. இதா³னி தேஸங் பமாணபரிச்சே²த³ங் த³ஸ்ஸேதுங் ‘‘ஸங்கா⁴டி பச்சி²மந்தேனா’’திஆதி³ வுத்தங். தத்த² தீ³க⁴தோ முட்டி²பஞ்சகதோ (பாரா॰ அட்ட²॰ 2.469; கங்கா²॰ அட்ட²॰ கதி²னஸிக்கா²பத³வண்ணனா) பட்டா²ய ‘‘தத்ரித³ங் ஸுக³தஸ்ஸ ஸுக³தசீவரப்பமாணங், தீ³க⁴ஸோ நவ வித³த்தி²யோ ஸுக³தவித³த்தி²யா, திரியங் ச² வித³த்தி²யோ’’தி (பாசி॰ 548) ஏவங் வுத்தஸுக³தசீவரூனாபி வட்டதி. திரியங் பன முட்டி²த்திகங். ச-ஸத்³தே³ன அதிரேகம்பி வட்டதீதி அத்தோ². உத்தராஸங்க³ஸ்ஸபி ஏததே³வ பமாணந்தி தங் த³ஸ்ஸேதுங் ‘‘ததா² ஏகங்ஸிகஸ்ஸாபீ’’தி வுத்தங். அந்தரவாஸகஸ்ஸ பன ‘‘பாருபனேனபி ஹி ஸக்கா நாபி⁴ங் படிச்சா²தே³து’’ந்தி (பாரா॰ அட்ட²॰ 2.469) அட்ட²கதா²வசனதோ ‘‘த்³விஹத்தோ² வா’’தி வுத்தங்.
37-8. Idāni tesaṃ pamāṇaparicchedaṃ dassetuṃ ‘‘saṅghāṭi pacchimantenā’’tiādi vuttaṃ. Tattha dīghato muṭṭhipañcakato (pārā. aṭṭha. 2.469; kaṅkhā. aṭṭha. kathinasikkhāpadavaṇṇanā) paṭṭhāya ‘‘tatridaṃ sugatassa sugatacīvarappamāṇaṃ, dīghaso nava vidatthiyo sugatavidatthiyā, tiriyaṃ cha vidatthiyo’’ti (pāci. 548) evaṃ vuttasugatacīvarūnāpi vaṭṭati. Tiriyaṃ pana muṭṭhittikaṃ. Ca-saddena atirekampi vaṭṭatīti attho. Uttarāsaṅgassapi etadeva pamāṇanti taṃ dassetuṃ ‘‘tathā ekaṃsikassāpī’’ti vuttaṃ. Antaravāsakassa pana ‘‘pārupanenapi hi sakkā nābhiṃ paṭicchādetu’’nti (pārā. aṭṭha. 2.469) aṭṭhakathāvacanato ‘‘dvihattho vā’’ti vuttaṃ.
39. நிஸீத³னஸ்ஸ தீ³கே⁴னாதி எத்த² (பாசி॰ 531 ஆத³யோ; பாசி॰ அட்ட²॰ 531; கங்கா²॰ அட்ட²॰ நிஸீத³னஸிக்கா²பத³வண்ணனா) நிஸீத³னந்தி ஸந்த²தஸதி³ஸங் ஸந்த²ரித்வா ஏகஸ்மிங் அந்தே வுத்தப்பமாணேன த்³வீஸு டா²னேஸு பா²லெத்வா கதாஹி தீஹி த³ஸாஹி யுத்தஸ்ஸ பரிக்கா²ரஸ்ஸேதங் நாமங்.
39.Nisīdanassadīghenāti ettha (pāci. 531 ādayo; pāci. aṭṭha. 531; kaṅkhā. aṭṭha. nisīdanasikkhāpadavaṇṇanā) nisīdananti santhatasadisaṃ santharitvā ekasmiṃ ante vuttappamāṇena dvīsu ṭhānesu phāletvā katāhi tīhi dasāhi yuttassa parikkhārassetaṃ nāmaṃ.
40. கண்டு³ப்படிச்சா²தி³ (பாசி॰ 538; மஹாவ॰ 354; பாசி॰ அட்ட²॰ 537; கங்கா²॰ அட்ட²॰ கண்டு³ப்படிச்சா²தி³ஸிக்கா²பத³வண்ணனா) நாம யஸ்ஸ அதோ⁴னாபி⁴உப்³ப⁴ஜாணுமண்ட³லங் கண்டு³ வா பிளகா வா அஸ்ஸாவோ வா து²ல்லகச்சு² வா ஆபா³தோ⁴, தஸ்ஸ படிச்சா²த³னத்தா²ய அனுஞ்ஞாதங் சீவரங். கா³தா²யோ ஸுவிஞ்ஞெய்யாவ.
40.Kaṇḍuppaṭicchādi (pāci. 538; mahāva. 354; pāci. aṭṭha. 537; kaṅkhā. aṭṭha. kaṇḍuppaṭicchādisikkhāpadavaṇṇanā) nāma yassa adhonābhiubbhajāṇumaṇḍalaṃ kaṇḍu vā piḷakā vā assāvo vā thullakacchu vā ābādho, tassa paṭicchādanatthāya anuññātaṃ cīvaraṃ. Gāthāyo suviññeyyāva.
41. அட்³ட⁴தெய்யாவாதி (பாசி॰ 544) எத்த² ததோ உத்³த⁴ங் ந வட்டதீதி அத்தோ².
41.Aḍḍhateyyāvāti (pāci. 544) ettha tato uddhaṃ na vaṭṭatīti attho.
42. எத்தா²தி ஸங்கா⁴டிதோ பட்டா²ய யாவ வஸ்ஸிகஸாடிகா, தாவ த³ஸ்ஸிதசீவரேஸூதி அத்தோ². தது³த்தரிந்தி ததோ தேஸங் சீவரானங் வுத்தப்பமாணதோ உத்தரிங் கரொந்தஸ்ஸ சே²த³னபாசித்தி ஹோதீதி பாட²ஸேஸோ, தங் அதிரேகங் சி²ந்தி³த்வா புன பாசித்தியங் தே³ஸேதப்³ப³ந்தி அத்தோ². பச்சத்த²ரணமுக²சோளாதி எத்த² ‘‘அனுஜானாமி, பி⁴க்க²வே, யாவ மஹந்தங் பச்சத்த²ரணங் ஆகங்க²தி, தாவ மஹந்தங் பச்சத்த²ரணங் காது’’ந்தி (மஹாவ॰ 353) வுத்தத்தா பச்சத்த²ரணஸ்ஸ பமாணபரிச்சே²தோ³ நத்தி²,. முக²புஞ்ச²னசோளஸ்ஸ பன உக்கட்ட²வஸேன வா அந்திமவஸேன வா பமாணபரிச்சே²தோ³ ந வுத்தோ, தஸ்மா தம்பி அப்பமாணிகங். தேன வுத்தங் ‘‘ஆகங்கி²தப்பமாணிகா’’தி, இச்சி²தப்பமாணிகாதி அத்தோ². யாவ ஏகங் தோ⁴வீயதி, தாவ அஞ்ஞங் பரிபோ⁴க³த்தா²ய இச்சி²தப்³ப³ந்தி த்³வேபி வட்டந்தி.
42.Etthāti saṅghāṭito paṭṭhāya yāva vassikasāṭikā, tāva dassitacīvaresūti attho. Taduttarinti tato tesaṃ cīvarānaṃ vuttappamāṇato uttariṃ karontassa chedanapācitti hotīti pāṭhaseso, taṃ atirekaṃ chinditvā puna pācittiyaṃ desetabbanti attho. Paccattharaṇamukhacoḷāti ettha ‘‘anujānāmi, bhikkhave, yāva mahantaṃ paccattharaṇaṃ ākaṅkhati, tāva mahantaṃ paccattharaṇaṃ kātu’’nti (mahāva. 353) vuttattā paccattharaṇassa pamāṇaparicchedo natthi,. Mukhapuñchanacoḷassa pana ukkaṭṭhavasena vā antimavasena vā pamāṇaparicchedo na vutto, tasmā tampi appamāṇikaṃ. Tena vuttaṃ ‘‘ākaṅkhitappamāṇikā’’ti, icchitappamāṇikāti attho. Yāva ekaṃ dhovīyati, tāva aññaṃ paribhogatthāya icchitabbanti dvepi vaṭṭanti.
43. ந தீ³பிதந்தி கத்த² ந தீ³பிதங்? அட்ட²கதா²ஸு. கஸ்மாதி சே? ‘‘தேன கோ² பன ஸமயேன பி⁴க்கூ²னங் பரிபுண்ணங் ஹோதி திசீவரங், அத்தோ² ச ஹோதி பரிஸ்ஸாவனேஹிபி த²விகாஹிபி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பரிக்கா²ரசோளக’’ந்தி (மஹாவ॰ 357) ப³ஹூனங் பத்தத²விகபரிஸ்ஸாவனாதீ³னங் ஸங்க³ஹவஸேன வுத்தத்தா பாடேக்கங் நிதா⁴னமுக²ந்தி. யஸ்மா பன ப⁴க³வதா ‘‘யங் யங் லப்³ப⁴தி, தங் தங் இமினா விதா⁴னேன அதி⁴ட்ட²ஹித்வா புன யேன யேன பரிஸ்ஸாவனாதி³னா அத்தோ² ஹோதி, தங் தங் கத்வா க³ண்ஹந்தூ’’தி அனுகம்பாய அனுஞ்ஞாதங், தஸ்மா விகப்பனுபக³பச்சி²மசீவரப்பமாணங் த²விகம்பி படபரிஸ்ஸாவனம்பி ப³ஹூனிபி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி வத்வா அதி⁴ட்டா²தும்பி வட்டதியேவ. தஸ்மா வுத்தங் ‘‘ததா² வத்வா’’தி, ‘‘பரிக்கா²ரசோள’’ந்தி வத்வாதி அத்தோ². விகப்பியந்தி விகப்பனுபக³ங்.
43.Nadīpitanti kattha na dīpitaṃ? Aṭṭhakathāsu. Kasmāti ce? ‘‘Tena kho pana samayena bhikkhūnaṃ paripuṇṇaṃ hoti ticīvaraṃ, attho ca hoti parissāvanehipi thavikāhipi. Bhagavato etamatthaṃ ārocesuṃ. Anujānāmi, bhikkhave, parikkhāracoḷaka’’nti (mahāva. 357) bahūnaṃ pattathavikaparissāvanādīnaṃ saṅgahavasena vuttattā pāṭekkaṃ nidhānamukhanti. Yasmā pana bhagavatā ‘‘yaṃ yaṃ labbhati, taṃ taṃ iminā vidhānena adhiṭṭhahitvā puna yena yena parissāvanādinā attho hoti, taṃ taṃ katvā gaṇhantū’’ti anukampāya anuññātaṃ, tasmā vikappanupagapacchimacīvarappamāṇaṃ thavikampi paṭaparissāvanampi bahūnipi ekato katvā ‘‘imāni cīvarāni parikkhāracoḷāni adhiṭṭhāmī’’ti vatvā adhiṭṭhātumpi vaṭṭatiyeva. Tasmā vuttaṃ ‘‘tathā vatvā’’ti, ‘‘parikkhāracoḷa’’nti vatvāti attho. Vikappiyanti vikappanupagaṃ.
44. அஹதகப்பானந்தி (மஹாவ॰ 348) ஏகவாரங் தோ⁴விதகானங்.
44.Ahatakappānanti (mahāva. 348) ekavāraṃ dhovitakānaṃ.
45. உதுத்³த⁴டானந்தி உதுதோ தீ³க⁴காலதோ உத்³த⁴டானங், கதவத்த²கிச்சானங் பிலோதிகானந்தி வுத்தங் ஹோதி. ஸேஸாதி உத்தராஸங்க³அந்தரவாஸகா. பங்ஸு விய குச்சி²தபா⁴வங் படிக்கூலபா⁴வங் உலதி க³ச்ச²தீதி பங்ஸுகூலங், சோளக²ண்டா³னமேதங் நாமங், தஸ்மிங் பங்ஸுகூலே யதா²ருசீதி அத்தோ². கஸ்மாதி சே? ‘‘அனுஜானாமி, பி⁴க்க²வே, அஹதானங் து³ஸ்ஸானங் அஹதகப்பானங் தி³கு³ணங் ஸங்கா⁴டிங் ஏகச்சியங் உத்தராஸங்க³ங் ஏகச்சியங் அந்தரவாஸகங், உதுத்³த⁴டானங் து³ஸ்ஸானங் சதுக்³கு³ணங் ஸங்கா⁴டிங் தி³கு³ணங் உத்தராஸங்க³ங் தி³கு³ணங் அந்தரவாஸகங், பங்ஸுகூலே யாவத³த்த²ங், பாபணிகே உஸ்ஸாஹோ கரணீயோ’’தி வுத்தத்தா, தஸ்மா ஸுஸானாதீ³ஸு பதிதபங்ஸுகூலே ச அந்தராபணே பதிதபிலோதிகசீவரே ச படபரிச்சே²தோ³ நத்தி², படஸதம்பி வட்டதீதி ஸித்³த⁴ங்.
45.Utuddhaṭānanti ututo dīghakālato uddhaṭānaṃ, katavatthakiccānaṃ pilotikānanti vuttaṃ hoti. Sesāti uttarāsaṅgaantaravāsakā. Paṃsu viya kucchitabhāvaṃ paṭikkūlabhāvaṃ ulati gacchatīti paṃsukūlaṃ, coḷakhaṇḍānametaṃ nāmaṃ, tasmiṃ paṃsukūle yathārucīti attho. Kasmāti ce? ‘‘Anujānāmi, bhikkhave, ahatānaṃ dussānaṃ ahatakappānaṃ diguṇaṃ saṅghāṭiṃ ekacciyaṃ uttarāsaṅgaṃ ekacciyaṃ antaravāsakaṃ, utuddhaṭānaṃ dussānaṃ catugguṇaṃ saṅghāṭiṃ diguṇaṃ uttarāsaṅgaṃ diguṇaṃ antaravāsakaṃ, paṃsukūle yāvadatthaṃ, pāpaṇike ussāho karaṇīyo’’ti vuttattā, tasmā susānādīsu patitapaṃsukūle ca antarāpaṇe patitapilotikacīvare ca paṭaparicchedo natthi, paṭasatampi vaṭṭatīti siddhaṃ.
46. இதா³னி ‘‘அனுஜானாமி, பி⁴க்க²வே, சி²ன்னகங் ஸங்கா⁴டிங் சி²ன்னகங் உத்தராஸங்க³ங் சி²ன்னகங் அந்தரவாஸக’’ந்தி (மஹாவ॰ 345) வத்வா புன ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ திசீவரே கயிரமானே ஸப்³ப³ங் சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வே சி²ன்னகானி ஏகங் அச்சி²ன்னகந்தி. த்³வே சி²ன்னகானி ஏகங் அச்சி²ன்னகங் நப்பஹோதி. அனுஜானாமி, பி⁴க்க²வே, த்³வே அச்சி²ன்னகானி ஏகங் சி²ன்னகந்தி. ஏகங் சி²ன்னகங் நப்பஹோதி. அனுஜானாமி, பி⁴க்க²வே, அன்வாதி⁴கம்பி ஆரோபேதுங். ந ச, பி⁴க்க²வே, ஸப்³ப³ங் அச்சி²ன்னகங் தா⁴ரேதப்³ப³ங், யோ தா⁴ரெய்ய, ஆபத்தி து³க்கடஸ்ஸா’’தி (மஹாவ॰ 360) ஏவங் வுத்தவிதா⁴னங் த³ஸ்ஸேதுங் ‘‘தீஸூ’’திஆதி³ ஆரத்³த⁴ங். தஸ்ஸ அத்தோ² – தீஸு சீவரேஸு யங் சி²ந்தி³த்வா ஸிப்³பி³துங் ஸப்³ப³பச்சி²மப்பமாணங் பஹோதி, தங் சி²ந்தி³தப்³ப³ங். ஸப்³பே³ஸு பன அப்பஹொந்தேஸு அன்வாதி⁴கங் ஆதி³யெய்யாதி. தத்த² அன்வாதி⁴ நாம அனுவாதங் விய ஸங்ஹரித்வா சீவரஸ்ஸ உபரி ஸங்கா⁴டிஆகாரேன ஆரோபேதப்³ப³ங். ஆக³ந்துகபத்தந்திபி வத³ந்தி. இத³ங் பன அப்பஹோனகே அனுஞ்ஞாதங். ஸசே பஹோதி, ந வட்டந்தி, சி²ந்தி³தப்³ப³மேவ. அனாதி³ண்ணந்தி அனாரோபிதங் அன்வாதி⁴கங். ந தா⁴ரெய்யாதி திசீவராதி⁴ட்டா²னவஸேன அதி⁴ட்ட²ஹித்வா ந தா⁴ரேதப்³ப³ந்தி அதி⁴ப்பாயோ.
46. Idāni ‘‘anujānāmi, bhikkhave, chinnakaṃ saṅghāṭiṃ chinnakaṃ uttarāsaṅgaṃ chinnakaṃ antaravāsaka’’nti (mahāva. 345) vatvā puna ‘‘tena kho pana samayena aññatarassa bhikkhuno ticīvare kayiramāne sabbaṃ chinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, dve chinnakāni ekaṃ acchinnakanti. Dve chinnakāni ekaṃ acchinnakaṃ nappahoti. Anujānāmi, bhikkhave, dve acchinnakāni ekaṃ chinnakanti. Ekaṃ chinnakaṃ nappahoti. Anujānāmi, bhikkhave, anvādhikampi āropetuṃ. Na ca, bhikkhave, sabbaṃ acchinnakaṃ dhāretabbaṃ, yo dhāreyya, āpatti dukkaṭassā’’ti (mahāva. 360) evaṃ vuttavidhānaṃ dassetuṃ ‘‘tīsū’’tiādi āraddhaṃ. Tassa attho – tīsu cīvaresu yaṃ chinditvā sibbituṃ sabbapacchimappamāṇaṃ pahoti, taṃ chinditabbaṃ. Sabbesu pana appahontesu anvādhikaṃ ādiyeyyāti. Tattha anvādhi nāma anuvātaṃ viya saṃharitvā cīvarassa upari saṅghāṭiākārena āropetabbaṃ. Āgantukapattantipi vadanti. Idaṃ pana appahonake anuññātaṃ. Sace pahoti, na vaṭṭanti, chinditabbameva. Anādiṇṇanti anāropitaṃ anvādhikaṃ. Na dhāreyyāti ticīvarādhiṭṭhānavasena adhiṭṭhahitvā na dhāretabbanti adhippāyo.
47-8. இதா³னி உதோ³ஸிதஸிக்கா²பத³னயங் த³ஸ்ஸேதுங் ‘‘கா³மே’’திஆதி³ வுத்தங். எத்த² பன ஸசே கா³மோ (பாரா॰ 478; பாரா॰ அட்ட²॰ 2.477-478; கங்கா²॰ அட்ட²॰ உதோ³ஸிதஸிக்கா²பத³வண்ணனா) ஏகஸ்ஸ ரஞ்ஞோ வா போ⁴ஜகஸ்ஸ வா வஸேன ஏககுலஸ்ஸ ஹோதி, பாகாராதி³னா பரிக்கி²த்தத்தா ஏகூபசாரோ ச, ஏவரூபே கா³மே சீவரங் நிக்கி²பித்வா தஸ்மிங் கா³மே யதா²ருசிதட்டா²னே வஸிதுங் லப்³ப⁴தி. ஸசே ஸோ கா³மோ அபரிக்கி²த்தோ, யஸ்மிங் க⁴ரே சீவரங் நிக்கி²த்தங் ஹோதி, தஸ்மிங் க⁴ரே வஸிதப்³ப³ங், தஸ்ஸ வா க⁴ரஸ்ஸ ஸமந்ததோ ஹத்த²பாஸா ந விஜஹிதப்³ப³ங்.
47-8. Idāni udositasikkhāpadanayaṃ dassetuṃ ‘‘gāme’’tiādi vuttaṃ. Ettha pana sace gāmo (pārā. 478; pārā. aṭṭha. 2.477-478; kaṅkhā. aṭṭha. udositasikkhāpadavaṇṇanā) ekassa rañño vā bhojakassa vā vasena ekakulassa hoti, pākārādinā parikkhittattā ekūpacāro ca, evarūpe gāme cīvaraṃ nikkhipitvā tasmiṃ gāme yathārucitaṭṭhāne vasituṃ labbhati. Sace so gāmo aparikkhitto, yasmiṃ ghare cīvaraṃ nikkhittaṃ hoti, tasmiṃ ghare vasitabbaṃ, tassa vā gharassa samantato hatthapāsā na vijahitabbaṃ.
ஸசே ஸோ கா³மோ வேஸாலிகுஸினாராத³யோ விய நானாராஜூனங் வா போ⁴ஜகானங் வா ஹோதி, வுத்தப்பகாரேன பரிக்கி²த்தோ ச, ஏவரூபே கா³மே யஸ்மிங் க⁴ரே சீவரங் நிக்கி²த்தங், தஸ்மிங் க⁴ரே வா வத்த²ப்³ப³ங். யஸ்ஸா வீதி²யா தங் க⁴ரங் ஹோதி, தஸ்ஸா வீதி²யா தஸ்ஸ க⁴ரஸ்ஸ ஸம்முகா²ட்டா²னே ஸபா⁴யே வா நக³ரத்³வாரே வா வத்த²ப்³ப³ங், தேஸங் ஸபா⁴யத்³வாரானங் ஹத்த²பாஸா வா ந விஜஹிதப்³ப³ங். ஸசே அபரிக்கி²த்தோ, யஸ்மிங் க⁴ரே நிக்கி²த்தங், தத்த² வா தஸ்ஸ ஹத்த²பாஸே வா வத்த²ப்³ப³ங்.
Sace so gāmo vesālikusinārādayo viya nānārājūnaṃ vā bhojakānaṃ vā hoti, vuttappakārena parikkhitto ca, evarūpe gāme yasmiṃ ghare cīvaraṃ nikkhittaṃ, tasmiṃ ghare vā vatthabbaṃ. Yassā vīthiyā taṃ gharaṃ hoti, tassā vīthiyā tassa gharassa sammukhāṭṭhāne sabhāye vā nagaradvāre vā vatthabbaṃ, tesaṃ sabhāyadvārānaṃ hatthapāsā vā na vijahitabbaṃ. Sace aparikkhitto, yasmiṃ ghare nikkhittaṃ, tattha vā tassa hatthapāse vā vatthabbaṃ.
நிவேஸனாத³யோ ஹம்மியபரியோஸானா கா³மபரிக்கே²பதோ ப³ஹி ஸன்னிவிட்டா²தி வேதி³தப்³பா³. இதரதா² தேஸங் கா³மக்³க³ஹணேனேவ க³ஹிதத்தா கா³மஸ்ஸ ஏககுலனானாகுலஏகூபசாரனானூபசாரதாவஸேனேவ வினிச்ச²யோ வத்தப்³போ³ ஸியா. நிவேஸனாதீ³னங் வஸேனேவ பாளியங் (பாரா॰ 478 ஆத³யோ) அத்தோ² விப⁴த்தோ, ந கா³மவஸேன. உதோ³ஸிதவினிச்ச²யே அயங் நயோ வுத்தோயேவ.
Nivesanādayo hammiyapariyosānā gāmaparikkhepato bahi sanniviṭṭhāti veditabbā. Itarathā tesaṃ gāmaggahaṇeneva gahitattā gāmassa ekakulanānākulaekūpacāranānūpacāratāvaseneva vinicchayo vattabbo siyā. Nivesanādīnaṃ vaseneva pāḷiyaṃ (pārā. 478 ādayo) attho vibhatto, na gāmavasena. Udositavinicchaye ayaṃ nayo vuttoyeva.
நிவேஸனேதி எத்த² ஸசே ஏககுலஸ்ஸ நிவேஸனங் ஹோதி பரிக்கி²த்தஞ்ச, அந்தோனிவேஸனே சீவரங் நிக்கி²பித்வா அந்தோனிவேஸனே வத்த²ப்³ப³ங். அபரிக்கி²த்தஞ்சே ஹோதி, யஸ்மிங் க³ப்³பே⁴ சீவரங் நிக்கி²த்தங், தஸ்மிங் வத்த²ப்³ப³ங், தஸ்ஸ க³ப்³ப⁴ஸ்ஸ ஹத்த²பாஸா வா ந விஜஹிதப்³ப³ங். ஸசே நானாகுலஸ்ஸ ஹோதி பரிக்கி²த்தஞ்ச, யஸ்மிங் க³ப்³பே⁴ சீவரங் நிக்கி²த்தங், தஸ்மிங் க³ப்³பே⁴ வத்த²ப்³ப³ங், ஸப்³பே³ஸங் ஸாதா⁴ரணத்³வாரமூலே வா தேஸங் க³ப்³ப⁴த்³வாரமூலே வா தேஸங் க³ப்³ப⁴த்³வாரமூலானங் வா ஹத்த²பாஸா ந விஜஹிதப்³ப³ங். அபரிக்கி²த்தஞ்சே ஹோதி, யஸ்மிங் க³ப்³பே⁴ சீவரங் நிக்கி²த்தங், தஸ்மிங் க³ப்³பே⁴ வத்த²ப்³ப³ங், ஹத்த²பாஸா வா ந விஜஹிதப்³ப³ங்.
Nivesaneti ettha sace ekakulassa nivesanaṃ hoti parikkhittañca, antonivesane cīvaraṃ nikkhipitvā antonivesane vatthabbaṃ. Aparikkhittañce hoti, yasmiṃ gabbhe cīvaraṃ nikkhittaṃ, tasmiṃ vatthabbaṃ, tassa gabbhassa hatthapāsā vā na vijahitabbaṃ. Sace nānākulassa hoti parikkhittañca, yasmiṃ gabbhe cīvaraṃ nikkhittaṃ, tasmiṃ gabbhe vatthabbaṃ, sabbesaṃ sādhāraṇadvāramūle vā tesaṃ gabbhadvāramūle vā tesaṃ gabbhadvāramūlānaṃ vā hatthapāsā na vijahitabbaṃ. Aparikkhittañce hoti, yasmiṃ gabbhe cīvaraṃ nikkhittaṃ, tasmiṃ gabbhe vatthabbaṃ, hatthapāsā vā na vijahitabbaṃ.
உதோ³ஸிதோதி யானாதீ³னங் ப⁴ண்டா³னங் ஸாலா. பாஸாதோ³தி தீ³க⁴பாஸாதோ³. ஹம்மியந்தி முண்ட³ச்ச²த³னபாஸாதோ³. நாவா பன த²லங் ஆரோபெத்வா நிக்கி²த்தாபி ஹோதி, ஸமுத்³தே³ டி²தாபி. ஸசே ஏககுலஸ்ஸ நாவா ஹோதி, அந்தோனாவாய சீவரங் நிக்கி²பித்வா அந்தோனாவாய வத்த²ப்³ப³ங். நானாகுலஸ்ஸ நாவா ஹோதி நானாக³ப்³பா⁴ நானாஓவரகா, யஸ்மிங் ஓவரகே சீவரங் நிக்கி²த்தங், தஸ்மிங் வத்த²ப்³ப³ங், சீவரஸ்ஸ ஹத்த²பாஸா வா ந விஜஹிதப்³ப³ங்.
Udositoti yānādīnaṃ bhaṇḍānaṃ sālā. Pāsādoti dīghapāsādo. Hammiyanti muṇḍacchadanapāsādo. Nāvā pana thalaṃ āropetvā nikkhittāpi hoti, samudde ṭhitāpi. Sace ekakulassa nāvā hoti, antonāvāya cīvaraṃ nikkhipitvā antonāvāya vatthabbaṃ. Nānākulassa nāvā hoti nānāgabbhā nānāovarakā, yasmiṃ ovarake cīvaraṃ nikkhittaṃ, tasmiṃ vatthabbaṃ, cīvarassa hatthapāsā vā na vijahitabbaṃ.
அட்டோதி படிராஜாதீ³னங் படிபா³ஹனத்த²ங் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோதி ஏககூடஸங்க³ஹிதோ சதுரஸ்ஸபாஸாதோ³. இமேஸு பன உதோ³ஸிதாதீ³ஸு மாளபரியோஸானேஸு நிவேஸனே வுத்தனயேனேவ வினிச்ச²யோ வேதி³தப்³போ³. நிவேஸனந்தி பன உதோ³ஸிதாதீ³னங் வஸேன அகதாய பதிஸ்ஸயவிகதியா அதி⁴வசனங்.
Aṭṭoti paṭirājādīnaṃ paṭibāhanatthaṃ iṭṭhakāhi kato bahalabhittiko catupañcabhūmiko patissayaviseso. Māḷoti ekakūṭasaṅgahito caturassapāsādo. Imesu pana udositādīsu māḷapariyosānesu nivesane vuttanayeneva vinicchayo veditabbo. Nivesananti pana udositādīnaṃ vasena akatāya patissayavikatiyā adhivacanaṃ.
ஆராமோ நாம புப்பா²ராமப²லாராமாதி³கோ. ஸசே ஏககுலஸ்ஸ ஆராமோ ஹோதி பரிக்கி²த்தோ ச, அந்தோஆராமே சீவரங் நிக்கி²பித்வா அந்தோஆராமே வத்த²ப்³ப³ங். ஸசே அபரிக்கி²த்தோ, சீவரஸ்ஸ ஹத்த²பாஸா ந விஜஹிதப்³ப³ங். ஸசே நானாகுலஸ்ஸ ஆராமோ ஹோதி பரிக்கி²த்தோ ச, த்³வாரமூலே வா வத்த²ப்³ப³ங், த்³வாரமூலஸ்ஸ ஹத்த²பாஸா வா ந விஜஹிதப்³ப³ங். அபரிக்கி²த்தோ சே, சீவரஸ்ஸ ஹத்த²பாஸா ந விஜஹிதப்³ப³ங்.
Ārāmo nāma pupphārāmaphalārāmādiko. Sace ekakulassa ārāmo hoti parikkhitto ca, antoārāme cīvaraṃ nikkhipitvā antoārāme vatthabbaṃ. Sace aparikkhitto, cīvarassa hatthapāsā na vijahitabbaṃ. Sace nānākulassa ārāmo hoti parikkhitto ca, dvāramūle vā vatthabbaṃ, dvāramūlassa hatthapāsā vā na vijahitabbaṃ. Aparikkhitto ce, cīvarassa hatthapāsā na vijahitabbaṃ.
ஸத்தோ² நாம ஜங்க⁴ஸத்த²ஸகடஸத்தா²னமஞ்ஞதரோ. ஸசே ஏககுலஸ்ஸ ஸத்தோ² ஹோதி, ஸத்தே² சீவரங் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரங் ந விஜஹிதப்³ப³ங். அப்³ப⁴ந்தரங் நாம அட்ட²வீஸதிஹத்த²ங் ஹோதி. ஸசே க³ச்ச²ந்தோ ஸத்தோ² ஸகடே வா ப⁴க்³கே³, கோ³ணே வா நட்டே² அந்தரா சி²ஜ்ஜதி, யஸ்மிங் கொட்டா²ஸே சீவரங் நிக்கி²பிதப்³ப³ங், தத்த² வஸிதப்³ப³ங். ஸசே நானாகுலஸ்ஸ ஹோதி , ஸத்தே² சீவரங் நிக்கி²பித்வா சீவரஸ்ஸ ஹத்த²பாஸா ந விஜஹிதப்³ப³ங்.
Sattho nāma jaṅghasatthasakaṭasatthānamaññataro. Sace ekakulassa sattho hoti, satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Abbhantaraṃ nāma aṭṭhavīsatihatthaṃ hoti. Sace gacchanto sattho sakaṭe vā bhagge, goṇe vā naṭṭhe antarā chijjati, yasmiṃ koṭṭhāse cīvaraṃ nikkhipitabbaṃ, tattha vasitabbaṃ. Sace nānākulassa hoti , satthe cīvaraṃ nikkhipitvā cīvarassa hatthapāsā na vijahitabbaṃ.
கெ²த்தக²லேஸு ஆராமே வுத்தஸதி³ஸோவ வினிச்ச²யோ. து³மேதி ருக்க²மூலே. ஸசே ஏககுலஸ்ஸ ருக்க²மூலங் ஹோதி, யங் மஜ்ஜ²ன்ஹிககாலே ஸமந்தா சா²யா ப²ரதி, தஸ்மிங் டா²னே அவிரளே பதே³ஸே தஸ்ஸ சா²யாய பு²ட்டோ²காஸஸ்ஸ அந்தோ ஏவ நிக்கி²பிதப்³ப³ங். ஸசே விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பேதி, அருணுக்³க³மனே ஸசே ஸோ பி⁴க்கு² தஸ்ஸ ஹத்த²பாஸே ந ஹோதி, அஞ்ஞஸ்மிங் வா டா²னே தஸ்ஸ சா²யாயபி ஹோதி, நிஸ்ஸக்³கி³யங் ஹோதியேவ. நானாகுலஸ்ஸ சே ஹோதி, சீவரஸ்ஸ ஹத்த²பாஸா ந விஜஹிதப்³ப³ங்.
Khettakhalesu ārāme vuttasadisova vinicchayo. Dumeti rukkhamūle. Sace ekakulassa rukkhamūlaṃ hoti, yaṃ majjhanhikakāle samantā chāyā pharati, tasmiṃ ṭhāne aviraḷe padese tassa chāyāya phuṭṭhokāsassa anto eva nikkhipitabbaṃ. Sace viraḷasākhassa pana rukkhassa ātapena phuṭṭhokāse ṭhapeti, aruṇuggamane sace so bhikkhu tassa hatthapāse na hoti, aññasmiṃ vā ṭhāne tassa chāyāyapi hoti, nissaggiyaṃ hotiyeva. Nānākulassa ce hoti, cīvarassa hatthapāsā na vijahitabbaṃ.
அஜ்ஜோ²காஸே பன விஞ்ஜா²டவீஆதீ³ஸு அரஞ்ஞேஸுபி ஸமுத்³த³மஜ்ஜே² மச்ச²ப³ந்தா⁴னங் அக³மனபதே²ஸு தீ³பகேஸுபி சீவரங் ட²பெத்வா ததோ ஸமந்தா ஸத்தப்³ப⁴ந்தரே பதே³ஸே யத்த² கத்த²சி வஸிதப்³ப³ங். ஸசே ஸத்தப்³ப⁴ந்தரதோ கேஸக்³க³மத்தம்பி அதிக்கமித்வா அருணங் உட்ட²பேதி, நிஸ்ஸக்³கி³யங் ஹோதி.
Ajjhokāse pana viñjhāṭavīādīsu araññesupi samuddamajjhe macchabandhānaṃ agamanapathesu dīpakesupi cīvaraṃ ṭhapetvā tato samantā sattabbhantare padese yattha katthaci vasitabbaṃ. Sace sattabbhantarato kesaggamattampi atikkamitvā aruṇaṃ uṭṭhapeti, nissaggiyaṃ hoti.
எத்த² பன பாளியங் ‘‘கா³மோ ஏகூபசாரோ நானூபசாரோ’’திஆதி³னா (பாரா॰ 477) அவிஸேஸேன மாதிகங் நிக்கி²பித்வாபி கா³மனிவேஸனஉதோ³ஸிதகெ²த்தத⁴ஞ்ஞகரணஆராமவிஹாரானங் ஏகூபசாரனானூபசாரதா ‘‘கா³மோ ஏகூபசாரோ நாம ஏககுலஸ்ஸ கா³மோ ஹோதி பரிக்கி²த்தோ ச அபரிக்கி²த்தோ சா’’திஆதி³னா (பாரா॰ 478) பரிக்கி²த்தாபரிக்கி²த்தவஸேன விப⁴த்தா. அட்டமாளபாஸாத³ஹம்மியனாவாஸத்த²ருக்க²மூலஅஜ்ஜோ²காஸானம்பி ஏவங் அவத்வா ‘‘ஏககுலஸ்ஸ அட்டோ ஹோதி, நானாகுலஸ்ஸ அட்டோ ஹோதீ’’திஆதி³னா (பாரா॰ 484) நயேன ஏககுலனானாகுலவஸேன ச அந்தே ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரங் நானூபசாரோ’’தி (பாரா॰ 494) ச ஏவங் ஏகூபசாரனானூபசாரதா விப⁴த்தா. தஸ்மா கா³மாதீ³ஸு பரிக்கி²த்தங் ஏகூபசாரங், அபரிக்கி²த்தங் நானூபசாரந்தி ச அட்டாதீ³ஸு யங் ஏககுலஸ்ஸ, தங் ஏகூபசாரங் நானாகுலஸ்ஸ நானூபசாரந்தி ச க³ஹேதப்³ப³ங். அஜ்ஜோ²காஸபதே³ வுத்தனயேன க³ஹேதப்³ப³ங்.
Ettha pana pāḷiyaṃ ‘‘gāmo ekūpacāro nānūpacāro’’tiādinā (pārā. 477) avisesena mātikaṃ nikkhipitvāpi gāmanivesanaudositakhettadhaññakaraṇaārāmavihārānaṃ ekūpacāranānūpacāratā ‘‘gāmo ekūpacāro nāma ekakulassa gāmo hoti parikkhitto ca aparikkhitto cā’’tiādinā (pārā. 478) parikkhittāparikkhittavasena vibhattā. Aṭṭamāḷapāsādahammiyanāvāsattharukkhamūlaajjhokāsānampi evaṃ avatvā ‘‘ekakulassa aṭṭo hoti, nānākulassa aṭṭo hotī’’tiādinā (pārā. 484) nayena ekakulanānākulavasena ca ante ‘‘ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro’’ti (pārā. 494) ca evaṃ ekūpacāranānūpacāratā vibhattā. Tasmā gāmādīsu parikkhittaṃ ekūpacāraṃ, aparikkhittaṃ nānūpacāranti ca aṭṭādīsu yaṃ ekakulassa, taṃ ekūpacāraṃ nānākulassa nānūpacāranti ca gahetabbaṃ. Ajjhokāsapade vuttanayena gahetabbaṃ.
பி⁴க்கு²ஸம்முதியாஞ்ஞத்ராதி யங் கி³லானஸ்ஸ பி⁴க்கு²னோ சீவரங் ஆதா³ய பக்கமிதுங் அஸக்கொந்தஸ்ஸ ஞத்திது³தியேன கம்மேன அவிப்பவாஸஸம்முதி தீ³யதி, தங் ட²பெத்வாதி அத்தோ². லத்³த⁴ஸம்முதிகஸ்ஸ பன யாவ ரோகோ³ ந வூபஸம்மதி, தஸ்மிங் வூபஸந்தே அஞ்ஞோ வா குப்பதி, அனாபத்தியேவ.
Bhikkhusammutiyāññatrāti yaṃ gilānassa bhikkhuno cīvaraṃ ādāya pakkamituṃ asakkontassa ñattidutiyena kammena avippavāsasammuti dīyati, taṃ ṭhapetvāti attho. Laddhasammutikassa pana yāva rogo na vūpasammati, tasmiṃ vūpasante añño vā kuppati, anāpattiyeva.
49. ‘‘அனுஜானாமி, பி⁴க்க²வே, கண்டு³ப்படிச்சா²தி³ங் யாவ ஆபா³தா⁴ அதி⁴ட்டா²துங், ததோ பரங் விகப்பேதுங். வஸ்ஸிகஸாடிகங் வஸ்ஸானங் சாதுமாஸங் அதி⁴ட்டா²துங், ததோ பரங் விகப்பேது’’ந்தி (மஹாவ॰ 358) வுத்தத்தா ரோக³பரியந்தா கண்டு³ப்படிச்சா²தி³, வஸ்ஸானபரியந்தா வஸ்ஸிகஸாடிகாதி அத்தோ². ஸேஸாதி திசீவராத³யோ காலவஸேன அபரியந்திகாதி அத்தோ².
49. ‘‘Anujānāmi, bhikkhave, kaṇḍuppaṭicchādiṃ yāva ābādhā adhiṭṭhātuṃ, tato paraṃ vikappetuṃ. Vassikasāṭikaṃ vassānaṃ cātumāsaṃ adhiṭṭhātuṃ, tato paraṃ vikappetu’’nti (mahāva. 358) vuttattā rogapariyantā kaṇḍuppaṭicchādi, vassānapariyantā vassikasāṭikāti attho. Sesāti ticīvarādayo kālavasena apariyantikāti attho.
50. பச்சத்த²ரணாதி³த்தயங் ஸத³ஸம்பி அத³ஸம்பி ரத்தம்பி அரத்தம்பி ஆதி³ண்ணகப்பம்பி அனாதி³ண்ணகப்பம்பி லப்³ப⁴தீதி அத்தோ². நிஸீத³னந்தி நிஸீத³னஞ்ச ரத்தங் அனாதி³ண்ணகப்பஞ்ச லப்³ப⁴தீதி அதி⁴ப்பாயோ. பச்சத்த²ரணபரிக்கா²ரமுக²புஞ்ச²னசோளானி பன நீலம்பி பீதகம்பி லோஹிதகம்பி புப்ப²த³ஸாதி³கம்பி வட்டந்தி, தஸ்மா ‘‘ஸத³ஸம்பீ’’திஆதி³ வுத்தங். ஏவரூபங் பன நிவாஸேதுங் வா பாருபிதுங் வா ந வட்டதி, கேவலங் பச்சத்த²ரணாதி³வஸேன அதி⁴ட்டா²னமத்தங் காதுங் வட்டதி.
50. Paccattharaṇādittayaṃ sadasampi adasampi rattampi arattampi ādiṇṇakappampi anādiṇṇakappampi labbhatīti attho. Nisīdananti nisīdanañca rattaṃ anādiṇṇakappañca labbhatīti adhippāyo. Paccattharaṇaparikkhāramukhapuñchanacoḷāni pana nīlampi pītakampi lohitakampi pupphadasādikampi vaṭṭanti, tasmā ‘‘sadasampī’’tiādi vuttaṃ. Evarūpaṃ pana nivāsetuṃ vā pārupituṃ vā na vaṭṭati, kevalaṃ paccattharaṇādivasena adhiṭṭhānamattaṃ kātuṃ vaṭṭati.
51. திசீவரங் கண்டு³ப்படிச்சா²தி³ வஸ்ஸிகஸாடிகாதி இத³ங் பன ஸேஸசீவரபஞ்சகங் அத³ஸங் ரஜிதங்யேவ கப்பதி, தஞ்ச ஆதி³ண்ணகப்பமேவாதி அத்தோ². ஸத³ஸங்வ நிஸீத³னந்தி இத³ங் பன புப்³பே³ ‘‘ஸத³ஸம்பீ’’தி எத்த² வுத்தத்தா அத³ஸம்பி நிஸீத³னங் வட்டதீதி ஸம்மோஹனிவாரணத்த²ங் வுத்தந்தி வத³ந்தி.
51. Ticīvaraṃ kaṇḍuppaṭicchādi vassikasāṭikāti idaṃ pana sesacīvarapañcakaṃ adasaṃ rajitaṃyeva kappati, tañca ādiṇṇakappamevāti attho. Sadasaṃva nisīdananti idaṃ pana pubbe ‘‘sadasampī’’ti ettha vuttattā adasampi nisīdanaṃ vaṭṭatīti sammohanivāraṇatthaṃ vuttanti vadanti.
52. அனதி⁴ட்டி²தந்தி திசீவராதி³வஸேன அனதி⁴ட்டி²தங். அனிஸ்ஸட்ட²ங் நாம அஞ்ஞேஸங் அவிஸ்ஸஜ்ஜிதங், தங் பன விகப்பெத்வா பரிபு⁴ஞ்ஜிதப்³ப³ந்தி அத்தோ².
52.Anadhiṭṭhitanti ticīvarādivasena anadhiṭṭhitaṃ. Anissaṭṭhaṃ nāma aññesaṃ avissajjitaṃ, taṃ pana vikappetvā paribhuñjitabbanti attho.
இதா³னி விகப்பனுபக³ஸ்ஸ பமாணங் ஹெட்டி²மபரிச்சே²தே³ன த³ஸ்ஸேதுங் ‘‘ஹத்த²தீ³க⁴’’ந்திஆதி³மாஹ. தத்த² ‘‘அனுஜானாமி, பி⁴க்க²வே, ஆயாமேன அட்ட²ங்கு³லங் ஸுக³தங்கு³லேன சதுரங்கு³லவித்த²தங் பச்சி²மங் சீவரங் விகப்பேது’’ந்தி (மஹாவ॰ 358) வுத்தத்தா தீ³க⁴தோ ஏகஹத்த²ங் புது²லதோ உபட்³ட⁴ஹத்த²ங் விகப்பேதப்³ப³ந்தி அதி⁴ப்பாயோ.
Idāni vikappanupagassa pamāṇaṃ heṭṭhimaparicchedena dassetuṃ ‘‘hatthadīgha’’ntiādimāha. Tattha ‘‘anujānāmi, bhikkhave, āyāmena aṭṭhaṅgulaṃ sugataṅgulena caturaṅgulavitthataṃ pacchimaṃ cīvaraṃ vikappetu’’nti (mahāva. 358) vuttattā dīghato ekahatthaṃ puthulato upaḍḍhahatthaṃ vikappetabbanti adhippāyo.
53. திசீவரஸ்ஸாதி வினயதிசீவரஸ்ஸ, ந து⁴தங்க³திசீவரஸ்ஸ. தஸ்ஸ பன இமேஸு நவஸு சீவரத்தயமேவ லப்³ப⁴தி, ந அஞ்ஞங் லப்³ப⁴தி. ஸப்³ப³மேதந்தி ஸப்³ப³ங் அதி⁴ட்டா²னவிதா⁴னஞ்ச பரிஹரணவிதா⁴னஞ்சாதி அத்தோ². பரிக்கா²ரசோளியோ ஸப்³ப³ந்தி திசீவராதி³கங் நவவித⁴ம்பி சீவரங். ததா² வத்வாதி ‘‘பரிக்கா²ரசோள’’ந்தி வத்வா. அதி⁴ட்ட²தீதி அதி⁴ட்டா²தி. கிங் பன திசீவரங் பரிக்கா²ரசோளங் அதி⁴ட்டா²துங் வட்டதீதி? ஆம வட்டதி, ‘‘பரிக்கா²ரசோளங் நாம பாடேக்கங் நிதா⁴னமுக²மேதந்தி திசீவரங் பரிக்கா²ரசோளங் அதி⁴ட்ட²ஹித்வா பரிபு⁴ஞ்ஜிதுங் வட்டதி. உதோ³ஸிதஸிக்கா²பதே³ பன திசீவரங் அதி⁴ட்ட²ஹித்வா பரிஹரந்தஸ்ஸ பரிஹாரோ வுத்தோ’’தி அட்ட²கதா²யங் (பாரா॰ அட்ட²॰ 2.469) வுத்தங், தஸ்மா திசீவரங் பரிக்கா²ரசோளங் அதி⁴ட்ட²ஹந்தேன பச்சுத்³த⁴ரித்வா புன அதி⁴ட்டா²தப்³ப³ங்.
53.Ticīvarassāti vinayaticīvarassa, na dhutaṅgaticīvarassa. Tassa pana imesu navasu cīvarattayameva labbhati, na aññaṃ labbhati. Sabbametanti sabbaṃ adhiṭṭhānavidhānañca pariharaṇavidhānañcāti attho. Parikkhāracoḷiyo sabbanti ticīvarādikaṃ navavidhampi cīvaraṃ. Tathā vatvāti ‘‘parikkhāracoḷa’’nti vatvā. Adhiṭṭhatīti adhiṭṭhāti. Kiṃ pana ticīvaraṃ parikkhāracoḷaṃ adhiṭṭhātuṃ vaṭṭatīti? Āma vaṭṭati, ‘‘parikkhāracoḷaṃ nāma pāṭekkaṃ nidhānamukhametanti ticīvaraṃ parikkhāracoḷaṃ adhiṭṭhahitvā paribhuñjituṃ vaṭṭati. Udositasikkhāpade pana ticīvaraṃ adhiṭṭhahitvā pariharantassa parihāro vutto’’ti aṭṭhakathāyaṃ (pārā. aṭṭha. 2.469) vuttaṃ, tasmā ticīvaraṃ parikkhāracoḷaṃ adhiṭṭhahantena paccuddharitvā puna adhiṭṭhātabbaṃ.
54. இதா³னி ஏதேஸங் அதி⁴ட்டா²னவிஜஹனாகாரங் த³ஸ்ஸேதுங் ‘‘அச்சே²த³விஸ்ஸஜ்ஜனகா³ஹவிப்³ப⁴மா’’திஆதி³ வுத்தங். தத்த² அச்சே²தோ³தி சோராதீ³ஹி அச்சி²ந்த³னங். விஸ்ஸஜ்ஜனந்தி அஞ்ஞேஸங் தா³னங். கத²ங் பன தி³ன்னங், கத²ங் க³ஹிதங் ஸுதி³ன்னங் ஸுக்³க³ஹிதஞ்ச ஹோதீதி? ஸசே ‘‘இத³ங் துய்ஹங் தே³மி த³தா³மி த³ஜ்ஜாமி ஓணோஜேமி பரிச்சஜாமி நிஸ்ஸஜ்ஜாமி விஸ்ஸஜ்ஜாமீ’’தி வா ‘‘இத்த²ன்னாமஸ்ஸ தே³மி…பே॰… விஸ்ஸஜ்ஜாமீ’’தி வா வத³தி, ஸம்முகா²பி பரம்முகா²பி தி³ன்னங்யேவ ஹோதி. ‘‘துய்ஹங் க³ண்ஹாஹீ’’தி வுத்தே ‘‘மய்ஹங் க³ண்ஹாமீ’’தி வத³தி, ஸுதி³ன்னங் ஸுக்³க³ஹிதஞ்ச. ‘‘தவ ஸந்தகங் கரோஹி, தவ ஸந்தகங் ஹோது, தவ ஸந்தகங் கரிஸ்ஸதீ’’தி வுத்தே ‘‘மமஸந்தகங் கரோமி, மம ஸந்தகங் ஹோது, மம ஸந்தகங் கரிஸ்ஸாமீ’’தி வத³தி, து³த்³தி³ன்னங் து³க்³க³ஹிதஞ்ச. ஸசே பன ‘‘தவ ஸந்தகங் கரோஹீ’’தி வுத்தே ‘‘ஸாது⁴, ப⁴ந்தே, மய்ஹங் க³ண்ஹாமீ’’தி க³ண்ஹாதி, ஸுக்³க³ஹிதங்.
54. Idāni etesaṃ adhiṭṭhānavijahanākāraṃ dassetuṃ ‘‘acchedavissajjanagāhavibbhamā’’tiādi vuttaṃ. Tattha acchedoti corādīhi acchindanaṃ. Vissajjananti aññesaṃ dānaṃ. Kathaṃ pana dinnaṃ, kathaṃ gahitaṃ sudinnaṃ suggahitañca hotīti? Sace ‘‘idaṃ tuyhaṃ demi dadāmi dajjāmi oṇojemi pariccajāmi nissajjāmi vissajjāmī’’ti vā ‘‘itthannāmassa demi…pe… vissajjāmī’’ti vā vadati, sammukhāpi parammukhāpi dinnaṃyeva hoti. ‘‘Tuyhaṃ gaṇhāhī’’ti vutte ‘‘mayhaṃ gaṇhāmī’’ti vadati, sudinnaṃ suggahitañca. ‘‘Tava santakaṃ karohi, tava santakaṃ hotu, tava santakaṃ karissatī’’ti vutte ‘‘mamasantakaṃ karomi, mama santakaṃ hotu, mama santakaṃ karissāmī’’ti vadati, duddinnaṃ duggahitañca. Sace pana ‘‘tava santakaṃ karohī’’ti vutte ‘‘sādhu, bhante, mayhaṃ gaṇhāmī’’ti gaṇhāti, suggahitaṃ.
கா³ஹோதி விஸ்ஸாஸக்³கா³ஹோ (பாரா॰ அட்ட²॰ 1.131). ஸோ பன ஏவங் வேதி³தப்³போ³ – ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ விஸ்ஸாஸங் க³ஹேதுங். ஸந்தி³ட்டோ² ச ஹோதி, ஸம்ப⁴த்தோ ச, ஆலபிதோ ச, ஜீவதி ச, ஜானாதி ச ‘க³ஹிதே மே அத்தமனோ ப⁴விஸ்ஸதீ’’’தி (மஹாவ॰ 356). தத்த² ஸந்தி³ட்டோ²தி தி³ட்ட²மத்தகமித்தோ. ஸம்ப⁴த்தோதி த³ள்ஹமித்தோ. ஆலபிதோதி ‘‘மம ஸந்தகங் யங் இச்ச²ஸி, தங் க³ண்ஹெய்யாஸி, ஆபுச்சி²த்வா க³ஹணே காரணங் நத்தீ²’’தி வுத்தோ. ஜீவதீதி அனுட்டா²னஸெய்யாய ஸயிதோபி யாவ ஜீவிதிந்த்³ரியுபச்சே²த³ங் ந பாபுணாதி. க³ஹிதே ச அத்தமனோதி க³ஹிதே ச துட்ட²சித்தோ. ஏவரூபஸ்ஸ ஸந்தகங் ‘‘க³ஹிதே மே அத்தமனோ ப⁴விஸ்ஸதீ’’தி ஜானந்தேன க³ஹேதுங் வட்டதி. அனவஸேஸபரியாதா³னவஸேன சேதானி பஞ்ச அங்கா³னி வுத்தானி, விஸ்ஸாஸக்³கா³ஹோ பன தீஹி அங்கே³ஹி ருஹதி. கத²ங்? ஸந்தி³ட்டோ² ஜீவதி க³ஹிதே அத்தமனோ, ஸம்ப⁴த்தோ ஜீவதி க³ஹிதே அத்தமனோ, ஆலபிதோ ஜீவதி க³ஹிதே அத்தமனோதி ஏவங்.
Gāhoti vissāsaggāho (pārā. aṭṭha. 1.131). So pana evaṃ veditabbo – ‘‘anujānāmi, bhikkhave, pañcahaṅgehi samannāgatassa vissāsaṃ gahetuṃ. Sandiṭṭho ca hoti, sambhatto ca, ālapito ca, jīvati ca, jānāti ca ‘gahite me attamano bhavissatī’’’ti (mahāva. 356). Tattha sandiṭṭhoti diṭṭhamattakamitto. Sambhattoti daḷhamitto. Ālapitoti ‘‘mama santakaṃ yaṃ icchasi, taṃ gaṇheyyāsi, āpucchitvā gahaṇe kāraṇaṃ natthī’’ti vutto. Jīvatīti anuṭṭhānaseyyāya sayitopi yāva jīvitindriyupacchedaṃ na pāpuṇāti. Gahite ca attamanoti gahite ca tuṭṭhacitto. Evarūpassa santakaṃ ‘‘gahite me attamano bhavissatī’’ti jānantena gahetuṃ vaṭṭati. Anavasesapariyādānavasena cetāni pañca aṅgāni vuttāni, vissāsaggāho pana tīhi aṅgehi ruhati. Kathaṃ? Sandiṭṭho jīvati gahite attamano, sambhatto jīvati gahite attamano, ālapito jīvati gahite attamanoti evaṃ.
யோ பன ஜீவதி, ந ச க³ஹிதே அத்தமனோ ஹோதி, தஸ்ஸ ஸந்தகங் விஸ்ஸாஸபா⁴வேன க³ஹிதம்பி புன தா³தப்³ப³ங். த³த³ந்தேன மதகத⁴னங் தாவ யே தஸ்ஸ த⁴னே இஸ்ஸரா க³ஹட்டா² வா பப்³ப³ஜிதா வா, தேஸங் தா³தப்³ப³ங். யோ பன பட²மங்யேவ ‘‘ஸுட்டு² கதங் தயா மம ஸந்தகங் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா அனுமோதி³த்வா பச்சா² கேனசி காரணேன குபிதோ, ஸோ பச்சாஹராபேதுங் ந லப⁴தி. யோபி அதா³துகாமோ, சித்தேன பன அதி⁴வாஸேதி, ந கிஞ்சி வத³தி, ஸோபி புன பச்சாஹராபேதுங் ந லப⁴தி. யோ பன ‘‘மயா தும்ஹாகங் ஸந்தகங் க³ஹித’’ந்தி வா ‘‘பரிபு⁴த்த’’ந்தி வா வுத்தே நாதி⁴வாஸேதி, ‘‘படிதே³ஹீ’’தி ப⁴ணதி, ஸோ பச்சாஹராபேதுங் லப⁴தி.
Yo pana jīvati, na ca gahite attamano hoti, tassa santakaṃ vissāsabhāvena gahitampi puna dātabbaṃ. Dadantena matakadhanaṃ tāva ye tassa dhane issarā gahaṭṭhā vā pabbajitā vā, tesaṃ dātabbaṃ. Yo pana paṭhamaṃyeva ‘‘suṭṭhu kataṃ tayā mama santakaṃ gaṇhantenā’’ti vacībhedena vā cittuppādamattena vā anumoditvā pacchā kenaci kāraṇena kupito, so paccāharāpetuṃ na labhati. Yopi adātukāmo, cittena pana adhivāseti, na kiñci vadati, sopi puna paccāharāpetuṃ na labhati. Yo pana ‘‘mayā tumhākaṃ santakaṃ gahita’’nti vā ‘‘paribhutta’’nti vā vutte nādhivāseti, ‘‘paṭidehī’’ti bhaṇati, so paccāharāpetuṃ labhati.
விப்³ப⁴மாதி இமினா பி⁴க்கு²னியாயேவ அதி⁴ட்டா²னவிஜஹனங் க³ஹிதங் ஹோதி. ஸா பன யதா³ விப்³ப⁴மதி, ததா³ அஸ்ஸமணீ ஹோதி. பி⁴க்கு² பன விப்³ப⁴மந்தோபி யாவ ஸிக்க²ங் ந பச்சக்கா²தி, தாவ பி⁴க்கு²யேவாதி அதி⁴ட்டா²னங் ந விஜஹதீதி. லிங்க³ஸிக்கா²தி லிங்க³பரிவத்தனஞ்ச ஸிக்கா²பச்சக்கா²னஞ்சாதி அத்தோ². ஸப்³பே³ஸூதி நவஸு சீவரேஸு. அதி⁴ட்டா²னவியோக³காரணாதி அதி⁴ட்டா²னவிஜஹனகாரணா, இமேஸு அஞ்ஞதரேன அதி⁴ட்டா²னங் விஜஹதீதி அத்தோ².
Vibbhamāti iminā bhikkhuniyāyeva adhiṭṭhānavijahanaṃ gahitaṃ hoti. Sā pana yadā vibbhamati, tadā assamaṇī hoti. Bhikkhu pana vibbhamantopi yāva sikkhaṃ na paccakkhāti, tāva bhikkhuyevāti adhiṭṭhānaṃ na vijahatīti. Liṅgasikkhāti liṅgaparivattanañca sikkhāpaccakkhānañcāti attho. Sabbesūti navasu cīvaresu. Adhiṭṭhānaviyogakāraṇāti adhiṭṭhānavijahanakāraṇā, imesu aññatarena adhiṭṭhānaṃ vijahatīti attho.
கிஞ்ச பி⁴ய்யோ (பாரா॰ அட்ட²॰ 2.469) – திசீவரஸ்ஸ பன வினிப்³பி³த்³த⁴சி²த்³த³ஞ்ச அதி⁴ட்டா²னவிஜஹனங் கரோதீதி அத்தோ². தத்த² ஸங்கா⁴டிஉத்தராஸங்கா³னங் தீ³க⁴ந்ததோ வித³த்தி²ப்பமாணஸ்ஸ திரியந்ததோ அட்ட²ங்கு³லப்பமாணஸ்ஸ பதே³ஸஸ்ஸ ஓரதோ கனிட்ட²ங்கு³லினக²பிட்டி²ப்பமாணகங் சி²த்³த³ங் அதி⁴ட்டா²னங் பி⁴ந்த³தி. அந்தரவாஸகஸ்ஸ தீ³க⁴ந்ததோ வித³த்தி²ப்பமாணஸ்ஸேவ திரியந்ததோ சதுரங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ங் அதி⁴ட்டா²னங் பி⁴ந்த³தி, பரதோ பன ந பி⁴ந்த³தி. தஸ்மா சி²த்³தே³ ஜாதே திசீவரங் அதிரேகசீவரங் ஹோதி, ஸூசிகம்மங் கத்வா புன அதி⁴ட்டா²தப்³ப³ங். இதரேஸங் பன சி²த்³தே³ன விஜஹனங் நாம நத்தி². யோ பன திசீவரேபி து³ப்³ப³லட்டா²னே பட²மங் அக்³க³ளங் த³த்வா பச்சா² து³ப்³ப³லட்டா²னங் சி²ந்தி³த்வா அபனேதி, அதி⁴ட்டா²னங் ந பி⁴ஜ்ஜதி. மண்ட³லபரிவத்தனேபி ஏஸேவ நயோ. யோ பன உபோ⁴ கோடியோ மஜ்ஜே² கரொந்தோ ஸசே பட²மங் சி²ந்தி³த்வா பச்சா² க⁴டேதி, அதி⁴ட்டா²னங் விஜஹதி, அத² க⁴டெத்வா சி²ந்த³தி, ந விஜஹதி. ரஜகேஹி தோ⁴வாபெத்வா ஸேதகங் கரொந்தஸ்ஸாபி ந விஜஹதி ஏவ.
Kiñca bhiyyo (pārā. aṭṭha. 2.469) – ticīvarassa pana vinibbiddhachiddañca adhiṭṭhānavijahanaṃ karotīti attho. Tattha saṅghāṭiuttarāsaṅgānaṃ dīghantato vidatthippamāṇassa tiriyantato aṭṭhaṅgulappamāṇassa padesassa orato kaniṭṭhaṅgulinakhapiṭṭhippamāṇakaṃ chiddaṃ adhiṭṭhānaṃ bhindati. Antaravāsakassa dīghantato vidatthippamāṇasseva tiriyantato caturaṅgulappamāṇassa padesassa orato chiddaṃ adhiṭṭhānaṃ bhindati, parato pana na bhindati. Tasmā chidde jāte ticīvaraṃ atirekacīvaraṃ hoti, sūcikammaṃ katvā puna adhiṭṭhātabbaṃ. Itaresaṃ pana chiddena vijahanaṃ nāma natthi. Yo pana ticīvarepi dubbalaṭṭhāne paṭhamaṃ aggaḷaṃ datvā pacchā dubbalaṭṭhānaṃ chinditvā apaneti, adhiṭṭhānaṃ na bhijjati. Maṇḍalaparivattanepi eseva nayo. Yo pana ubho koṭiyo majjhe karonto sace paṭhamaṃ chinditvā pacchā ghaṭeti, adhiṭṭhānaṃ vijahati, atha ghaṭetvā chindati, na vijahati. Rajakehi dhovāpetvā setakaṃ karontassāpi na vijahati eva.
55. இதா³னி அகப்பியசீவரானி த³ஸ்ஸேதுங் ‘‘குஸவாகப²லகானீ’’திஆதி³ ஆரத்³த⁴ங். தத்த² குஸசீரங் (மஹாவ॰ 371; மஹாவ॰ அட்ட²॰ ) நாம குஸே க³ந்தெ²த்வா கதசீவரங். வாகசீரங் நாம தாபஸானங் வக்கலங். ப²லகசீரங் நாம ப²லகானி ஸிப்³பி³த்வா கதசீவரங். கேஸகம்ப³லந்தி கேஸேஹி தந்தங் வாயித்வா கதகம்ப³லங். வாலகம்ப³லந்தி சமரவாலேஹி வாயித்வா கதகம்ப³லங். உலூகபக்க²ந்தி உலூகஸகுணஸ்ஸ பக்கே²ஹி கதனிவாஸனங். அஜினக்கி²பந்தி ஸலோமங் ஸகு²ரங் அஜினமிக³சம்மங். இமேஸு ஸத்தஸு வத்தே²ஸு யங் கிஞ்சி தா⁴ரயதோ து²ல்லச்சயந்தி அத்தோ². யதா² இமேஸு து²ல்லச்சயங், ததா² அக்கனாளங் நிவாஸெந்தஸ்ஸ. அக்கனாளங் நாம அக்கத³ண்டே³ வாகாதீ³ஹி க³ந்தெ²த்வா கதசீவரங். ‘‘ந பி⁴க்க²வே அக்கனாளங் நிவாஸேதப்³ப³ங், யோ நிவாஸெய்ய, ஆபத்தி து²ல்லச்சயஸ்ஸா’’தி (மஹாவ॰ 371) ஹி வுத்தங்.
55. Idāni akappiyacīvarāni dassetuṃ ‘‘kusavākaphalakānī’’tiādi āraddhaṃ. Tattha kusacīraṃ (mahāva. 371; mahāva. aṭṭha. ) nāma kuse ganthetvā katacīvaraṃ. Vākacīraṃ nāma tāpasānaṃ vakkalaṃ. Phalakacīraṃ nāma phalakāni sibbitvā katacīvaraṃ. Kesakambalanti kesehi tantaṃ vāyitvā katakambalaṃ. Vālakambalanti camaravālehi vāyitvā katakambalaṃ. Ulūkapakkhanti ulūkasakuṇassa pakkhehi katanivāsanaṃ. Ajinakkhipanti salomaṃ sakhuraṃ ajinamigacammaṃ. Imesu sattasu vatthesu yaṃ kiñci dhārayato thullaccayanti attho. Yathā imesu thullaccayaṃ, tathā akkanāḷaṃ nivāsentassa. Akkanāḷaṃ nāma akkadaṇḍe vākādīhi ganthetvā katacīvaraṃ. ‘‘Na bhikkhave akkanāḷaṃ nivāsetabbaṃ, yo nivāseyya, āpatti thullaccayassā’’ti (mahāva. 371) hi vuttaṃ.
56. கத³லேரகக்கது³ஸ்ஸே பொத்த²கே சாபீதி எத்த² கத³லிஏரகஅக்கமகசிவாகேஹி கதானி வத்தா²னி ஏவங் வுத்தானீதி வேதி³தப்³பா³னி. ஏதேஸு பொத்த²கோயேவ பாளியங் ஆக³தோ, இதரானி தக்³க³திகத்தா அட்ட²கதா²ஸு படிக்கி²த்தானி. இமேஸு சதூஸுபி து³க்கடமேவ. ‘‘ந பி⁴க்க²வே நக்³கி³யங் தித்தி²யஸமாதா³னங் ஸமாதி³யிதப்³ப³ங், யோ ஸமாதி³யெய்ய, ஆபத்தி து²ல்லச்சயஸ்ஸா’’தி (மஹாவ॰ 370) வுத்தத்தா நக்³கி³யம்பி ந கப்பதி ஏவ. ஸப்³ப³மேவ நீலகங் ஸப்³ப³னீலகங். ஏவங் ஸேஸேஸுபி. எத்த² நீலங் உமாபுப்ப²வண்ணங் ஹோதி . மஞ்ஜெட்ட²கங் மஞ்ஜெட்ட²கவண்ணமேவ. பீதகங் கணிகாரபுப்ப²வண்ணங். லோஹிதகங் ஜயஸுமனபுப்ப²வண்ணங். கண்ஹகங் அத்³தா³ரிட்ட²கவண்ணங்.
56.Kadalerakakkadusse potthake cāpīti ettha kadalierakaakkamakacivākehi katāni vatthāni evaṃ vuttānīti veditabbāni. Etesu potthakoyeva pāḷiyaṃ āgato, itarāni taggatikattā aṭṭhakathāsu paṭikkhittāni. Imesu catūsupi dukkaṭameva. ‘‘Na bhikkhave naggiyaṃ titthiyasamādānaṃ samādiyitabbaṃ, yo samādiyeyya, āpatti thullaccayassā’’ti (mahāva. 370) vuttattā naggiyampi na kappati eva. Sabbameva nīlakaṃ sabbanīlakaṃ. Evaṃ sesesupi. Ettha nīlaṃ umāpupphavaṇṇaṃ hoti . Mañjeṭṭhakaṃ mañjeṭṭhakavaṇṇameva. Pītakaṃ kaṇikārapupphavaṇṇaṃ. Lohitakaṃ jayasumanapupphavaṇṇaṃ. Kaṇhakaṃ addāriṭṭhakavaṇṇaṃ.
57. மஹாரங்க³ங் நாம ஸதபதி³பிட்டி²வண்ணங். மஹானாமங் நாம ரத்தஸம்பி⁴ன்னவண்ணங் ஹோதி. பது³மபுப்ப²வண்ணந்திபி வுத்தங், மந்த³ரத்தந்தி அத்தோ². திரீடகேதி ருக்க²தசே. அச்சி²ன்னதீ³க⁴த³ஸகேதி ஸப்³ப³ஸோ அச்சி²ன்னத³ஸகே ச மஜ்ஜே² சி²ன்னத³ஸகே சாதி அத்தோ². அஞ்ஞமஞ்ஞங் ஸங்ஸிப்³பி³த்வா கதத³ஸங் ப²லத³ஸங் நாம. கேதகபுப்பா²தி³புப்ப²ஸதி³ஸாஹி த³ஸாஹி யுத்தங் புப்ப²த³ஸங் நாம. ஏதேஸுபி ‘‘பொத்த²கே சாபீ’’தி எத்த² வுத்தஅபி-ஸத்³தே³ன து³க்கடந்தி வேதி³தப்³ப³ங். ததா²தி யதா² ஏதேஸு கத³லிது³ஸ்ஸாதீ³ஸு புப்ப²த³ஸாவஸானேஸு து³க்கடங், ததா² கஞ்சுகவேட²னேஸுபி யங் கிஞ்சி தா⁴ரெந்தஸ்ஸ து³க்கடந்தி அத்தோ².
57.Mahāraṅgaṃ nāma satapadipiṭṭhivaṇṇaṃ. Mahānāmaṃ nāma rattasambhinnavaṇṇaṃ hoti. Padumapupphavaṇṇantipi vuttaṃ, mandarattanti attho. Tirīṭaketi rukkhatace. Acchinnadīghadasaketi sabbaso acchinnadasake ca majjhe chinnadasake cāti attho. Aññamaññaṃ saṃsibbitvā katadasaṃ phaladasaṃ nāma. Ketakapupphādipupphasadisāhi dasāhi yuttaṃ pupphadasaṃ nāma. Etesupi ‘‘potthake cāpī’’ti ettha vuttaapi-saddena dukkaṭanti veditabbaṃ. Tathāti yathā etesu kadalidussādīsu pupphadasāvasānesu dukkaṭaṃ, tathā kañcukaveṭhanesupi yaṃ kiñci dhārentassa dukkaṭanti attho.
ஏதேஸு பன அயங் வினிச்ச²யோ (மஹாவ॰ அட்ட²॰ 372) – ஸப்³ப³னீலகாதீ³னி ரஜனானி வமெத்வா புன ரஜித்வா தா⁴ரேதப்³பா³னி, ந ஸக்கா சே வமேதுங், பச்சத்த²ரணாதீ³னி வா காரேதப்³பா³னி, திபட்டசீவரஸ்ஸ மஜ்ஜே² வா தா³தப்³பா³னி. அச்சி²ன்னத³ஸகாதீ³னி த³ஸா சி²ந்தி³த்வா தா⁴ரேதப்³பா³னி. கஞ்சுகங் விஜடெத்வா ரஜித்வா பரிபு⁴ஞ்ஜிதப்³ப³ங். வேட²னேபி ஏஸேவ நயோ. திரீடகங் பாத³புஞ்ச²னங் காதப்³ப³ங். ஸப்³ப³ந்தி இமங் வுத்தப்பகாரங் குஸசீராதி³கங் அகப்பியசீவரங் அச்சி²ன்னசீவரோ லப⁴தீதி அத்தோ². வுத்தம்பி சேதங் பரிவாரே.
Etesu pana ayaṃ vinicchayo (mahāva. aṭṭha. 372) – sabbanīlakādīni rajanāni vametvā puna rajitvā dhāretabbāni, na sakkā ce vametuṃ, paccattharaṇādīni vā kāretabbāni, tipaṭṭacīvarassa majjhe vā dātabbāni. Acchinnadasakādīni dasā chinditvā dhāretabbāni. Kañcukaṃ vijaṭetvā rajitvā paribhuñjitabbaṃ. Veṭhanepi eseva nayo. Tirīṭakaṃ pādapuñchanaṃ kātabbaṃ. Sabbanti imaṃ vuttappakāraṃ kusacīrādikaṃ akappiyacīvaraṃ acchinnacīvaro labhatīti attho. Vuttampi cetaṃ parivāre.
‘‘அகப்பகதங் நாபி ரஜனாய ரத்தங்,
‘‘Akappakataṃ nāpi rajanāya rattaṃ,
தேன நிவத்தோ² யேன காமங் வஜெய்ய;
Tena nivattho yena kāmaṃ vajeyya;
ந சஸ்ஸ ஹோதி ஆபத்தி,
Na cassa hoti āpatti,
ஸோ ச த⁴ம்மோ ஸுக³தேன தே³ஸிதோ;
So ca dhammo sugatena desito;
பஞ்ஹா மேஸா குஸலேஹி சிந்திதா’’தி. (பரி॰ 481);
Pañhā mesā kusalehi cintitā’’ti. (pari. 481);
அயஞ்ஹி பஞ்ஹோ அச்சி²ன்னசீவரபி⁴க்கு²ங் ஸந்தா⁴ய வுத்தோ, தஸ்மா ஹி யங் கிஞ்சி அகப்பியசீவரங் நிவாஸெத்வா வா பாருபித்வா வா அச்சி²ன்னசீவரகேன அஞ்ஞங் பரியேஸிதப்³ப³ங். எத்த² பன ‘‘இத⁴ பன, பி⁴க்க²வே, மனுஸ்ஸா நிஸ்ஸீமக³தானங் பி⁴க்கூ²னங் சீவரங் தெ³ந்தி ‘இமங் சீவரங் இத்த²ன்னாமஸ்ஸ தே³மா’தி, அனுஜானாமி, பி⁴க்க²வே, ஸாதி³துங், ந தாவ தங் க³ணனூபக³ங், யாவ ந ஹத்த²ங் க³ச்ச²தீ’’தி (மஹாவ॰ 259) வுத்தத்தா யாவ ஆஹரித்வா தங் ந தி³ன்னங், ‘‘தும்ஹாகங், ப⁴ந்தே, சீவரங் உப்பன்ன’’ந்தி பஹிணித்வா வா நாரோசிதங், தாவ க³ணனங் ந உபேதி, அனதி⁴ட்டி²தங் வட்டதி. பத்தேபி ஏஸேவ நயோ. ஆனெத்வா தி³ன்னே வா ஆரோசிதே வா பரிஹாரோ நத்தி², த³ஸாஹங் அதி⁴ட்டா²தப்³ப³ங். சீவரவினிச்ச²யோ.
Ayañhi pañho acchinnacīvarabhikkhuṃ sandhāya vutto, tasmā hi yaṃ kiñci akappiyacīvaraṃ nivāsetvā vā pārupitvā vā acchinnacīvarakena aññaṃ pariyesitabbaṃ. Ettha pana ‘‘idha pana, bhikkhave, manussā nissīmagatānaṃ bhikkhūnaṃ cīvaraṃ denti ‘imaṃ cīvaraṃ itthannāmassa demā’ti, anujānāmi, bhikkhave, sādituṃ, na tāva taṃ gaṇanūpagaṃ, yāva na hatthaṃ gacchatī’’ti (mahāva. 259) vuttattā yāva āharitvā taṃ na dinnaṃ, ‘‘tumhākaṃ, bhante, cīvaraṃ uppanna’’nti pahiṇitvā vā nārocitaṃ, tāva gaṇanaṃ na upeti, anadhiṭṭhitaṃ vaṭṭati. Pattepi eseva nayo. Ānetvā dinne vā ārocite vā parihāro natthi, dasāhaṃ adhiṭṭhātabbaṃ. Cīvaravinicchayo.
சீவரனித்³தே³ஸவண்ணனா நிட்டி²தா.
Cīvaraniddesavaṇṇanā niṭṭhitā.
