| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
२१३. चीवरपटिग्गाहकसम्मुतिकथा
213. Cīvarapaṭiggāhakasammutikathā
३४२. ‘‘यो न छन्दागतिं गच्छती’’तिआदीसु एवं विनिच्छयो वेदितब्बोति योजना। ञातकादीनं चीवरन्ति सम्बन्धो। एकच्चस्मिन्ति जने। वासद्दो विकप्पत्थो। एतेसु तीसु अञ्ञतरेन कारणेन छन्दागतिं गच्छति नामाति हि अत्थो। आगतस्सापि चीवरन्ति सम्बन्धो पिसद्दो गरहत्थो। पगेव पच्छा आगतस्साति हि अत्थो। अवमञ्ञन्ति उञ्ञातं। वोति तुम्हाकं। नत्थि किन्ति योजना। मुट्ठा सति एतस्साति मुट्ठस्सति। आगतानम्पि चीवरन्ति सम्बन्धो। पिसद्दो सम्भावनत्थो। पगेव पठमं आगतानन्ति हि अत्थो। एतं चीवरपटिग्गाहकट्ठानं नामाति योजना। सन्तसन्तो वाति खेदखेदो वा। इदञ्चिदञ्चाति इदञ्च इदञ्च चीवरं। तस्माति यस्मा च गच्छति, यस्मा च जानाति, तस्मा। योति भिक्खु। सक्कोतीति सम्बन्धो। एवरूपो भिक्खु सम्मनितब्बोति योजना।
342. ‘‘Yo na chandāgatiṃ gacchatī’’tiādīsu evaṃ vinicchayo veditabboti yojanā. Ñātakādīnaṃ cīvaranti sambandho. Ekaccasminti jane. Vāsaddo vikappattho. Etesu tīsu aññatarena kāraṇena chandāgatiṃ gacchati nāmāti hi attho. Āgatassāpi cīvaranti sambandho pisaddo garahattho. Pageva pacchā āgatassāti hi attho. Avamaññanti uññātaṃ. Voti tumhākaṃ. Natthi kinti yojanā. Muṭṭhā sati etassāti muṭṭhassati. Āgatānampi cīvaranti sambandho. Pisaddo sambhāvanattho. Pageva paṭhamaṃ āgatānanti hi attho. Etaṃ cīvarapaṭiggāhakaṭṭhānaṃ nāmāti yojanā. Santasanto vāti khedakhedo vā. Idañcidañcāti idañca idañca cīvaraṃ. Tasmāti yasmā ca gacchati, yasmā ca jānāti, tasmā. Yoti bhikkhu. Sakkotīti sambandho. Evarūpo bhikkhu sammanitabboti yojanā.
अपलोकनेनपीति ‘‘इत्थन्नामं भिक्खुं चीवरपटिग्गाहकं कातुं सङ्घं अपलोकेमी’’ति अपलोकनेनपि, सम्मनितुन्ति सम्बन्धो। यत्थ पनाति यस्मिं पन धुरविहारे।
Apalokanenapīti ‘‘itthannāmaṃ bhikkhuṃ cīvarapaṭiggāhakaṃ kātuṃ saṅghaṃ apalokemī’’ti apalokanenapi, sammanitunti sambandho. Yattha panāti yasmiṃ pana dhuravihāre.
‘‘गहितट्ठानेयेवा’’ति इमिना तत्थेवाति एत्थ तसद्दस्स विसयं दस्सेति। ‘‘छड्डेत्वा’’ति इमिना उज्झित्वाति एत्थ उधधातुया विस्सज्जनत्थं दस्सेति। चीवरपटिग्गाहकन्ति पदस्स चीवरं पटिग्गण्हातीति चीवरपटिग्गाहकोति वचनत्थं दस्सेन्तो आह ‘‘यो’’तिआदि। तत्थ यो पटिग्गण्हाति, सो चीवरपटिग्गाहको नामाति योजना। ‘‘चीवरपटिसामक’’न्ति इमिना चीवरं गहितट्ठानतो नीहरित्वा भण्डागारे दहति ठपेतीति चीवरनिदहकोति अत्थं दस्सेति। यो न छन्दातिं गच्छतीतिआदीसु एत्थ एतेसु च इतो परञ्चाति योजना।
‘‘Gahitaṭṭhāneyevā’’ti iminā tatthevāti ettha tasaddassa visayaṃ dasseti. ‘‘Chaḍḍetvā’’ti iminā ujjhitvāti ettha udhadhātuyā vissajjanatthaṃ dasseti. Cīvarapaṭiggāhakanti padassa cīvaraṃ paṭiggaṇhātīti cīvarapaṭiggāhakoti vacanatthaṃ dassento āha ‘‘yo’’tiādi. Tattha yo paṭiggaṇhāti, so cīvarapaṭiggāhako nāmāti yojanā. ‘‘Cīvarapaṭisāmaka’’nti iminā cīvaraṃ gahitaṭṭhānato nīharitvā bhaṇḍāgāre dahati ṭhapetīti cīvaranidahakoti atthaṃ dasseti. Yo na chandātiṃ gacchatītiādīsu ettha etesu ca ito parañcāti yojanā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / २१३. चीवरपटिग्गाहकसम्मुतिकथा • 213. Cīvarapaṭiggāhakasammutikathā
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / कम्बलानुजाननादिकथा • Kambalānujānanādikathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / चीवरपटिग्गाहकसम्मुतिआदिकथावण्णना • Cīvarapaṭiggāhakasammutiādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / भण्डागारसम्मुतिआदिकथावण्णना • Bhaṇḍāgārasammutiādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / जीवकवत्थुकथादिवण्णना • Jīvakavatthukathādivaṇṇanā
