| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೧೩. ಚೀವರಪಟಿಗ್ಗಾಹಕಸಮ್ಮುತಿಕಥಾ
213. Cīvarapaṭiggāhakasammutikathā
೩೪೨. ‘‘ಯೋ ನ ಛನ್ದಾಗತಿಂ ಗಚ್ಛತೀ’’ತಿಆದೀಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ಞಾತಕಾದೀನಂ ಚೀವರನ್ತಿ ಸಮ್ಬನ್ಧೋ। ಏಕಚ್ಚಸ್ಮಿನ್ತಿ ಜನೇ। ವಾಸದ್ದೋ ವಿಕಪ್ಪತ್ಥೋ। ಏತೇಸು ತೀಸು ಅಞ್ಞತರೇನ ಕಾರಣೇನ ಛನ್ದಾಗತಿಂ ಗಚ್ಛತಿ ನಾಮಾತಿ ಹಿ ಅತ್ಥೋ। ಆಗತಸ್ಸಾಪಿ ಚೀವರನ್ತಿ ಸಮ್ಬನ್ಧೋ ಪಿಸದ್ದೋ ಗರಹತ್ಥೋ। ಪಗೇವ ಪಚ್ಛಾ ಆಗತಸ್ಸಾತಿ ಹಿ ಅತ್ಥೋ। ಅವಮಞ್ಞನ್ತಿ ಉಞ್ಞಾತಂ। ವೋತಿ ತುಮ್ಹಾಕಂ। ನತ್ಥಿ ಕಿನ್ತಿ ಯೋಜನಾ। ಮುಟ್ಠಾ ಸತಿ ಏತಸ್ಸಾತಿ ಮುಟ್ಠಸ್ಸತಿ। ಆಗತಾನಮ್ಪಿ ಚೀವರನ್ತಿ ಸಮ್ಬನ್ಧೋ। ಪಿಸದ್ದೋ ಸಮ್ಭಾವನತ್ಥೋ। ಪಗೇವ ಪಠಮಂ ಆಗತಾನನ್ತಿ ಹಿ ಅತ್ಥೋ। ಏತಂ ಚೀವರಪಟಿಗ್ಗಾಹಕಟ್ಠಾನಂ ನಾಮಾತಿ ಯೋಜನಾ। ಸನ್ತಸನ್ತೋ ವಾತಿ ಖೇದಖೇದೋ ವಾ। ಇದಞ್ಚಿದಞ್ಚಾತಿ ಇದಞ್ಚ ಇದಞ್ಚ ಚೀವರಂ। ತಸ್ಮಾತಿ ಯಸ್ಮಾ ಚ ಗಚ್ಛತಿ, ಯಸ್ಮಾ ಚ ಜಾನಾತಿ, ತಸ್ಮಾ। ಯೋತಿ ಭಿಕ್ಖು। ಸಕ್ಕೋತೀತಿ ಸಮ್ಬನ್ಧೋ। ಏವರೂಪೋ ಭಿಕ್ಖು ಸಮ್ಮನಿತಬ್ಬೋತಿ ಯೋಜನಾ।
342. ‘‘Yo na chandāgatiṃ gacchatī’’tiādīsu evaṃ vinicchayo veditabboti yojanā. Ñātakādīnaṃ cīvaranti sambandho. Ekaccasminti jane. Vāsaddo vikappattho. Etesu tīsu aññatarena kāraṇena chandāgatiṃ gacchati nāmāti hi attho. Āgatassāpi cīvaranti sambandho pisaddo garahattho. Pageva pacchā āgatassāti hi attho. Avamaññanti uññātaṃ. Voti tumhākaṃ. Natthi kinti yojanā. Muṭṭhā sati etassāti muṭṭhassati. Āgatānampi cīvaranti sambandho. Pisaddo sambhāvanattho. Pageva paṭhamaṃ āgatānanti hi attho. Etaṃ cīvarapaṭiggāhakaṭṭhānaṃ nāmāti yojanā. Santasanto vāti khedakhedo vā. Idañcidañcāti idañca idañca cīvaraṃ. Tasmāti yasmā ca gacchati, yasmā ca jānāti, tasmā. Yoti bhikkhu. Sakkotīti sambandho. Evarūpo bhikkhu sammanitabboti yojanā.
ಅಪಲೋಕನೇನಪೀತಿ ‘‘ಇತ್ಥನ್ನಾಮಂ ಭಿಕ್ಖುಂ ಚೀವರಪಟಿಗ್ಗಾಹಕಂ ಕಾತುಂ ಸಙ್ಘಂ ಅಪಲೋಕೇಮೀ’’ತಿ ಅಪಲೋಕನೇನಪಿ, ಸಮ್ಮನಿತುನ್ತಿ ಸಮ್ಬನ್ಧೋ। ಯತ್ಥ ಪನಾತಿ ಯಸ್ಮಿಂ ಪನ ಧುರವಿಹಾರೇ।
Apalokanenapīti ‘‘itthannāmaṃ bhikkhuṃ cīvarapaṭiggāhakaṃ kātuṃ saṅghaṃ apalokemī’’ti apalokanenapi, sammanitunti sambandho. Yattha panāti yasmiṃ pana dhuravihāre.
‘‘ಗಹಿತಟ್ಠಾನೇಯೇವಾ’’ತಿ ಇಮಿನಾ ತತ್ಥೇವಾತಿ ಏತ್ಥ ತಸದ್ದಸ್ಸ ವಿಸಯಂ ದಸ್ಸೇತಿ। ‘‘ಛಡ್ಡೇತ್ವಾ’’ತಿ ಇಮಿನಾ ಉಜ್ಝಿತ್ವಾತಿ ಏತ್ಥ ಉಧಧಾತುಯಾ ವಿಸ್ಸಜ್ಜನತ್ಥಂ ದಸ್ಸೇತಿ। ಚೀವರಪಟಿಗ್ಗಾಹಕನ್ತಿ ಪದಸ್ಸ ಚೀವರಂ ಪಟಿಗ್ಗಣ್ಹಾತೀತಿ ಚೀವರಪಟಿಗ್ಗಾಹಕೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಯೋ’’ತಿಆದಿ। ತತ್ಥ ಯೋ ಪಟಿಗ್ಗಣ್ಹಾತಿ, ಸೋ ಚೀವರಪಟಿಗ್ಗಾಹಕೋ ನಾಮಾತಿ ಯೋಜನಾ। ‘‘ಚೀವರಪಟಿಸಾಮಕ’’ನ್ತಿ ಇಮಿನಾ ಚೀವರಂ ಗಹಿತಟ್ಠಾನತೋ ನೀಹರಿತ್ವಾ ಭಣ್ಡಾಗಾರೇ ದಹತಿ ಠಪೇತೀತಿ ಚೀವರನಿದಹಕೋತಿ ಅತ್ಥಂ ದಸ್ಸೇತಿ। ಯೋ ನ ಛನ್ದಾತಿಂ ಗಚ್ಛತೀತಿಆದೀಸು ಏತ್ಥ ಏತೇಸು ಚ ಇತೋ ಪರಞ್ಚಾತಿ ಯೋಜನಾ।
‘‘Gahitaṭṭhāneyevā’’ti iminā tatthevāti ettha tasaddassa visayaṃ dasseti. ‘‘Chaḍḍetvā’’ti iminā ujjhitvāti ettha udhadhātuyā vissajjanatthaṃ dasseti. Cīvarapaṭiggāhakanti padassa cīvaraṃ paṭiggaṇhātīti cīvarapaṭiggāhakoti vacanatthaṃ dassento āha ‘‘yo’’tiādi. Tattha yo paṭiggaṇhāti, so cīvarapaṭiggāhako nāmāti yojanā. ‘‘Cīvarapaṭisāmaka’’nti iminā cīvaraṃ gahitaṭṭhānato nīharitvā bhaṇḍāgāre dahati ṭhapetīti cīvaranidahakoti atthaṃ dasseti. Yo na chandātiṃ gacchatītiādīsu ettha etesu ca ito parañcāti yojanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೧೩. ಚೀವರಪಟಿಗ್ಗಾಹಕಸಮ್ಮುತಿಕಥಾ • 213. Cīvarapaṭiggāhakasammutikathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಕಮ್ಬಲಾನುಜಾನನಾದಿಕಥಾ • Kambalānujānanādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚೀವರಪಟಿಗ್ಗಾಹಕಸಮ್ಮುತಿಆದಿಕಥಾವಣ್ಣನಾ • Cīvarapaṭiggāhakasammutiādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಭಣ್ಡಾಗಾರಸಮ್ಮುತಿಆದಿಕಥಾವಣ್ಣನಾ • Bhaṇḍāgārasammutiādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಜೀವಕವತ್ಥುಕಥಾದಿವಣ್ಣನಾ • Jīvakavatthukathādivaṇṇanā
