| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
5. சீவரபடிக்³க³ஹணஸிக்கா²பத³ங்
5. Cīvarapaṭiggahaṇasikkhāpadaṃ
508. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன உப்பலவண்ணா பி⁴க்கு²னீ ஸாவத்தி²யங் விஹரதி. அத² கோ² உப்பலவண்ணா பி⁴க்கு²னீ புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தா யேன அந்த⁴வனங் தேனுபஸங்கமி தி³வாவிஹாராய. அந்த⁴வனங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³. தேன கோ² பன ஸமயேன சோரா கதகம்மா கா³விங் வதி⁴த்வா மங்ஸங் க³ஹெத்வா அந்த⁴வனங் பவிஸிங்ஸு. அத்³த³ஸா கோ² சோரகா³மணிகோ உப்பலவண்ணங் பி⁴க்கு²னிங் அஞ்ஞதரஸ்மிங் ருக்க²மூலே தி³வாவிஹாரங் நிஸின்னங். தி³ஸ்வானஸ்ஸ ஏதத³ஹோஸி – ‘‘ஸசே மே புத்தபா⁴துகா பஸ்ஸிஸ்ஸந்தி விஹேடி²ஸ்ஸந்தி இமங் பி⁴க்கு²னி’’ந்தி அஞ்ஞேன மக்³கே³ன அக³மாஸி. அத² கோ² ஸோ சோரகா³மணிகோ மங்ஸே பக்கே வரமங்ஸானி க³ஹெத்வா பண்ணபுடங் 1 ப³ந்தி⁴த்வா உப்பலவண்ணாய பி⁴க்கு²னியா அவிதூ³ரே ருக்கே² ஆலக்³கெ³த்வா – ‘‘யோ பஸ்ஸதி ஸமணோ வா ப்³ராஹ்மணோ வா தி³ன்னங்யேவ ஹரதூ’’தி, வத்வா பக்காமி. அஸ்ஸோஸி கோ² உப்பலவண்ணா பி⁴க்கு²னீ ஸமாதி⁴ம்ஹா வுட்ட²ஹித்வா தஸ்ஸ சோரகா³மணிகஸ்ஸ இமங் வாசங் பா⁴ஸமானஸ்ஸ. அத² கோ² உப்பலவண்ணா பி⁴க்கு²னீ தங் மங்ஸங் க³ஹெத்வா உபஸ்ஸயங் அக³மாஸி. அத² கோ² உப்பலவண்ணா பி⁴க்கு²னீ தஸ்ஸா ரத்தியா அச்சயேன தங் மங்ஸங் ஸம்பாதெ³த்வா உத்தராஸங்கே³ன ப⁴ண்டி³கங் ப³ந்தி⁴த்வா வேஹாஸங் அப்³பு⁴க்³க³ந்த்வா வேளுவனே பச்சுட்டா²ஸி 2.
508. Tena samayena buddho bhagavā rājagahe viharati veḷuvane kalandakanivāpe. Tena kho pana samayena uppalavaṇṇā bhikkhunī sāvatthiyaṃ viharati. Atha kho uppalavaṇṇā bhikkhunī pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātappaṭikkantā yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Tena kho pana samayena corā katakammā gāviṃ vadhitvā maṃsaṃ gahetvā andhavanaṃ pavisiṃsu. Addasā kho coragāmaṇiko uppalavaṇṇaṃ bhikkhuniṃ aññatarasmiṃ rukkhamūle divāvihāraṃ nisinnaṃ. Disvānassa etadahosi – ‘‘sace me puttabhātukā passissanti viheṭhissanti imaṃ bhikkhuni’’nti aññena maggena agamāsi. Atha kho so coragāmaṇiko maṃse pakke varamaṃsāni gahetvā paṇṇapuṭaṃ 3 bandhitvā uppalavaṇṇāya bhikkhuniyā avidūre rukkhe ālaggetvā – ‘‘yo passati samaṇo vā brāhmaṇo vā dinnaṃyeva haratū’’ti, vatvā pakkāmi. Assosi kho uppalavaṇṇā bhikkhunī samādhimhā vuṭṭhahitvā tassa coragāmaṇikassa imaṃ vācaṃ bhāsamānassa. Atha kho uppalavaṇṇā bhikkhunī taṃ maṃsaṃ gahetvā upassayaṃ agamāsi. Atha kho uppalavaṇṇā bhikkhunī tassā rattiyā accayena taṃ maṃsaṃ sampādetvā uttarāsaṅgena bhaṇḍikaṃ bandhitvā vehāsaṃ abbhuggantvā veḷuvane paccuṭṭhāsi 4.
தேன கோ² பன ஸமயேன ப⁴க³வா கா³மங் பிண்டா³ய பவிட்டோ² ஹோதி. ஆயஸ்மா உதா³யீ ஓஹிய்யகோ ஹோதி விஹாரபாலோ. அத² கோ² உப்பலவண்ணா பி⁴க்கு²னீ யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தங் உதா³யிங் ஏதத³வோச – ‘‘கஹங், ப⁴ந்தே, ப⁴க³வா’’தி? ‘‘பவிட்டோ², ப⁴கி³னி, ப⁴க³வா கா³மங் பிண்டா³யா’’தி. ‘‘இமங், ப⁴ந்தே, மங்ஸங் ப⁴க³வதோ தே³ஹீ’’தி. ‘‘ஸந்தப்பிதோ தயா, ப⁴கி³னி, ப⁴க³வா மங்ஸேன. ஸசே மே த்வங் அந்தரவாஸகங் த³தெ³ய்யாஸி, ஏவங் அஹம்பி ஸந்தப்பிதோ ப⁴வெய்யங் அந்தரவாஸகேனா’’தி. ‘‘மயங் கோ², ப⁴ந்தே, மாதுகா³மா நாம கிச்ச²லாபா⁴. இத³ஞ்ச மே அந்திமங் பஞ்சமங் சீவரங். நாஹங் த³ஸ்ஸாமீ’’தி. ‘‘ஸெய்யதா²பி, ப⁴கி³னி, புரிஸோ ஹத்தி²ங் த³த்வா கச்சே² ஸஜ்ஜெய்ய 5 ஏவமேவ கோ² த்வங் ப⁴கி³னி ப⁴க³வதோ மங்ஸங் த³த்வா மயி அந்தரவாஸகே ஸஜ்ஜஸீ’’தி 6. அத² கோ² உப்பலவண்ணா பி⁴க்கு²னீ ஆயஸ்மதா உதா³யினா நிப்பீளியமானா அந்தரவாஸகங் த³த்வா உபஸ்ஸயங் அக³மாஸி. பி⁴க்கு²னியோ உப்பலவண்ணாய பி⁴க்கு²னியா பத்தசீவரங் படிக்³க³ண்ஹந்தியோ உப்பலவண்ணங் பி⁴க்கு²னிங் ஏதத³வோசுங் – ‘‘கஹங் தே, அய்யே, அந்தரவாஸகோ’’தி? உப்பலவண்ணா பி⁴க்கு²னீ பி⁴க்கு²னீனங் ஏதமத்த²ங் ஆரோசேஸி. பி⁴க்கு²னியோ உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யோ உதா³யீ பி⁴க்கு²னியா சீவரங் படிக்³க³ஹெஸ்ஸதி கிச்ச²லாபோ⁴ மாதுகா³மோ’’தி. அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ பி⁴க்கு²னியா சீவரங் படிக்³க³ஹெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உதா³யி, பி⁴க்கு²னியா சீவரங் படிக்³க³ஹேஸீ’’தி? ‘‘ஸச்சங் , ப⁴க³வா’’தி. ‘‘ஞாதிகா தே, உதா³யி, அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபங் வா அப்பதிரூபங் வா ஸந்தங் வா அஸந்தங் வா. தத்த² நாம த்வங், மோக⁴புரிஸ, அஞ்ஞாதிகாய பி⁴க்கு²னியா ஹத்த²தோ சீவரங் படிக்³க³ஹெஸ்ஸஸி! நேதங் மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Tena kho pana samayena bhagavā gāmaṃ piṇḍāya paviṭṭho hoti. Āyasmā udāyī ohiyyako hoti vihārapālo. Atha kho uppalavaṇṇā bhikkhunī yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘kahaṃ, bhante, bhagavā’’ti? ‘‘Paviṭṭho, bhagini, bhagavā gāmaṃ piṇḍāyā’’ti. ‘‘Imaṃ, bhante, maṃsaṃ bhagavato dehī’’ti. ‘‘Santappito tayā, bhagini, bhagavā maṃsena. Sace me tvaṃ antaravāsakaṃ dadeyyāsi, evaṃ ahampi santappito bhaveyyaṃ antaravāsakenā’’ti. ‘‘Mayaṃ kho, bhante, mātugāmā nāma kicchalābhā. Idañca me antimaṃ pañcamaṃ cīvaraṃ. Nāhaṃ dassāmī’’ti. ‘‘Seyyathāpi, bhagini, puriso hatthiṃ datvā kacche sajjeyya 7 evameva kho tvaṃ bhagini bhagavato maṃsaṃ datvā mayi antaravāsake sajjasī’’ti 8. Atha kho uppalavaṇṇā bhikkhunī āyasmatā udāyinā nippīḷiyamānā antaravāsakaṃ datvā upassayaṃ agamāsi. Bhikkhuniyo uppalavaṇṇāya bhikkhuniyā pattacīvaraṃ paṭiggaṇhantiyo uppalavaṇṇaṃ bhikkhuniṃ etadavocuṃ – ‘‘kahaṃ te, ayye, antaravāsako’’ti? Uppalavaṇṇā bhikkhunī bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā cīvaraṃ paṭiggahessati kicchalābho mātugāmo’’ti. Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā cīvaraṃ paṭiggahessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā cīvaraṃ paṭiggahesī’’ti? ‘‘Saccaṃ , bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātikāya bhikkhuniyā hatthato cīvaraṃ paṭiggahessasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
509. ‘‘யோ பன பி⁴க்கு² அஞ்ஞாதிகாய பி⁴க்கு²னியா ஹத்த²தோ சீவரங் படிக்³க³ண்ஹெய்ய, நிஸ்ஸக்³கி³யங் பாசித்திய’’ந்தி.
509.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, nissaggiyaṃ pācittiya’’nti.
ஏவஞ்சித³ங் ப⁴க³வதா பி⁴க்கூ²னங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
510. தேன கோ² பன ஸமயேன பி⁴க்கூ² குக்குச்சாயந்தா பி⁴க்கு²னீனங் பாரிவத்தகசீவரங் ந படிக்³க³ண்ஹந்தி. பி⁴க்கு²னியோ உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா அம்ஹாகங் பாரிவத்தகசீவரங் ந படிக்³க³ஹெஸ்ஸந்தீ’’தி! அஸ்ஸோஸுங் கோ² பி⁴க்கூ² தாஸங் பி⁴க்கு²னீனங் உஜ்ஜா²யந்தீனங் கி²ய்யந்தீனங் விபாசெந்தீனங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸு. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பஞ்சன்னங் பாரிவத்தகங் படிக்³க³ஹேதுங் – பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா. அனுஜானாமி, பி⁴க்க²வே, இமேஸங் பஞ்சன்னங் பாரிவத்தகங் படிக்³க³ஹேதுங். ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத².
510. Tena kho pana samayena bhikkhū kukkuccāyantā bhikkhunīnaṃ pārivattakacīvaraṃ na paṭiggaṇhanti. Bhikkhuniyo ujjhāyanti khiyyanti vipācenti – ‘‘kathañhi nāma ayyā amhākaṃ pārivattakacīvaraṃ na paṭiggahessantī’’ti! Assosuṃ kho bhikkhū tāsaṃ bhikkhunīnaṃ ujjhāyantīnaṃ khiyyantīnaṃ vipācentīnaṃ. Atha kho te bhikkhū bhagavato etamatthaṃ ārocesu. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, pañcannaṃ pārivattakaṃ paṭiggahetuṃ – bhikkhussa, bhikkhuniyā, sikkhamānāya, sāmaṇerassa, sāmaṇeriyā. Anujānāmi, bhikkhave, imesaṃ pañcannaṃ pārivattakaṃ paṭiggahetuṃ. Evañca pana, bhikkhave, imaṃ sikkhāpadaṃ uddiseyyātha.
511. ‘‘யோ பன பி⁴க்கு² அஞ்ஞாதிகாய பி⁴க்கு²னியா ஹத்த²தோ சீவரங் படிக்³க³ண்ஹெய்ய, அஞ்ஞத்ர பாரிவத்தகா, நிஸ்ஸக்³கி³யங் பாசித்திய’’ந்தி.
511.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, aññatra pārivattakā, nissaggiyaṃ pācittiya’’nti.
512. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
512.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.
Aññātikā nāma mātito vā pitito vā yāva sattamā pitāmahayugā asambaddhā.
பி⁴க்கு²னீ நாம உப⁴தோஸங்கே⁴ உபஸம்பன்னா.
Bhikkhunī nāma ubhatosaṅghe upasampannā.
சீவரங் நாம ச²ன்னங் சீவரானங் அஞ்ஞதரங் சீவரங் விகப்பனுபக³ங் பச்சி²மங்.
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
அஞ்ஞத்ர பாரிவத்தகாதி ட²பெத்வா பாரிவத்தகங்.
Aññatra pārivattakāti ṭhapetvā pārivattakaṃ.
படிக்³க³ண்ஹாதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, சீவரங் அஞ்ஞாதிகாய பி⁴க்கு²னியா ஹத்த²தோ படிக்³க³ஹிதங், அஞ்ஞத்ர பாரிவத்தகா, நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Paṭiggaṇhāti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ aññātikāya bhikkhuniyā hatthato paṭiggahitaṃ, aññatra pārivattakā, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
513. அஞ்ஞாதிகாய அஞ்ஞாதிகஸஞ்ஞீ சீவரங் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யங் பாசித்தியங். அஞ்ஞாதிகாய வேமதிகோ சீவரங் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யங் பாசித்தியங். அஞ்ஞாதிகாய ஞாதிகஸஞ்ஞீ சீவரங் படிக்³க³ண்ஹாதி, அஞ்ஞத்ர பாரிவத்தகா, நிஸ்ஸக்³கி³யங் பாசித்தியங்.
513. Aññātikāya aññātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya vematiko cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya ñātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ.
ஏகதோஉபஸம்பன்னாய ஹத்த²தோ சீவரங் படிக்³க³ண்ஹாதி, அஞ்ஞத்ர பாரிவத்தகா, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.
Ekatoupasampannāya hatthato cīvaraṃ paṭiggaṇhāti, aññatra pārivattakā, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
514. அனாபத்தி ஞாதிகாய, பாரிவத்தகங் பரித்தேன வா விபுலங், விபுலேன வா பரித்தங், பி⁴க்கு² விஸ்ஸாஸங் க³ண்ஹாதி, தாவகாலிகங் க³ண்ஹாதி , சீவரங் ட²பெத்வா அஞ்ஞங் பரிக்கா²ரங் க³ண்ஹாதி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.
514. Anāpatti ñātikāya, pārivattakaṃ parittena vā vipulaṃ, vipulena vā parittaṃ, bhikkhu vissāsaṃ gaṇhāti, tāvakālikaṃ gaṇhāti , cīvaraṃ ṭhapetvā aññaṃ parikkhāraṃ gaṇhāti, sikkhamānāya, sāmaṇeriyā, ummattakassa, ādikammikassāti.
சீவரபடிக்³க³ஹணஸிக்கா²பத³ங் நிட்டி²தங் பஞ்சமங்.
Cīvarapaṭiggahaṇasikkhāpadaṃ niṭṭhitaṃ pañcamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. சீவரபடிக்³க³ஹணஸிக்கா²பத³வண்ணனா • 5. Cīvarapaṭiggahaṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. சீவரபடிக்³க³ஹணஸிக்கா²பத³வண்ணனா • 5. Cīvarapaṭiggahaṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. சீவரபடிக்³க³ஹணஸிக்கா²பத³வண்ணனா • 5. Cīvarapaṭiggahaṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. சீவரபடிக்³க³ஹணஸிக்கா²பத³வண்ணனா • 5. Cīvarapaṭiggahaṇasikkhāpadavaṇṇanā
