| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၅. စီဝရပဋိဂ္ဂဟဏသိက္ခာပဒံ
5. Cīvarapaṭiggahaṇasikkhāpadaṃ
၅၀၈. တေန သမယေန ဗုဒ္ဓော ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန ဥပ္ပလဝဏ္ဏာ ဘိက္ခုနီ သာဝတ္ထိယံ ဝိဟရတိ။ အထ ခော ဥပ္ပလဝဏ္ဏာ ဘိက္ခုနီ ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ သာဝတ္ထိံ ပိဏ္ဍာယ ပာဝိသိ။ သာဝတ္ထိယံ ပိဏ္ဍာယ စရိတ္ဝာ ပစ္ဆာဘတ္တံ ပိဏ္ဍပာတပ္ပဋိက္ကန္တာ ယေန အန္ဓဝနံ တေနုပသင္ကမိ ဒိဝာဝိဟာရာယ။ အန္ဓဝနံ အဇ္ဈောဂာဟေတ္ဝာ အညတရသ္မိံ ရုက္ခမူလေ ဒိဝာဝိဟာရံ နိသီဒိ။ တေန ခော ပန သမယေန စောရာ ကတကမ္မာ ဂာဝိံ ဝဓိတ္ဝာ မံသံ ဂဟေတ္ဝာ အန္ဓဝနံ ပဝိသိံသု။ အဒ္ဒသာ ခော စောရဂာမဏိကော ဥပ္ပလဝဏ္ဏံ ဘိက္ခုနိံ အညတရသ္မိံ ရုက္ခမူလေ ဒိဝာဝိဟာရံ နိသိန္နံ။ ဒိသ္ဝာနသ္သ ဧတဒဟောသိ – ‘‘သစေ မေ ပုတ္တဘာတုကာ ပသ္သိသ္သန္တိ ဝိဟေဌိသ္သန္တိ ဣမံ ဘိက္ခုနိ’’န္တိ အညေန မဂ္ဂေန အဂမာသိ။ အထ ခော သော စောရဂာမဏိကော မံသေ ပက္ကေ ဝရမံသာနိ ဂဟေတ္ဝာ ပဏ္ဏပုဋံ 1 ဗန္ဓိတ္ဝာ ဥပ္ပလဝဏ္ဏာယ ဘိက္ခုနိယာ အဝိဒူရေ ရုက္ခေ အာလဂ္ဂေတ္ဝာ – ‘‘ယော ပသ္သတိ သမဏော ဝာ ဗ္ရာဟ္မဏော ဝာ ဒိန္နံယေဝ ဟရတူ’’တိ, ဝတ္ဝာ ပက္ကာမိ။ အသ္သောသိ ခော ဥပ္ပလဝဏ္ဏာ ဘိက္ခုနီ သမာဓိမ္ဟာ ဝုဋ္ဌဟိတ္ဝာ တသ္သ စောရဂာမဏိကသ္သ ဣမံ ဝာစံ ဘာသမာနသ္သ။ အထ ခော ဥပ္ပလဝဏ္ဏာ ဘိက္ခုနီ တံ မံသံ ဂဟေတ္ဝာ ဥပသ္သယံ အဂမာသိ။ အထ ခော ဥပ္ပလဝဏ္ဏာ ဘိက္ခုနီ တသ္သာ ရတ္တိယာ အစ္စယေန တံ မံသံ သမ္ပာဒေတ္ဝာ ဥတ္တရာသင္ဂေန ဘဏ္ဍိကံ ဗန္ဓိတ္ဝာ ဝေဟာသံ အဗ္ဘုဂ္ဂန္တ္ဝာ ဝေဠုဝနေ ပစ္စုဋ္ဌာသိ 2။
508. Tena samayena buddho bhagavā rājagahe viharati veḷuvane kalandakanivāpe. Tena kho pana samayena uppalavaṇṇā bhikkhunī sāvatthiyaṃ viharati. Atha kho uppalavaṇṇā bhikkhunī pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātappaṭikkantā yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Tena kho pana samayena corā katakammā gāviṃ vadhitvā maṃsaṃ gahetvā andhavanaṃ pavisiṃsu. Addasā kho coragāmaṇiko uppalavaṇṇaṃ bhikkhuniṃ aññatarasmiṃ rukkhamūle divāvihāraṃ nisinnaṃ. Disvānassa etadahosi – ‘‘sace me puttabhātukā passissanti viheṭhissanti imaṃ bhikkhuni’’nti aññena maggena agamāsi. Atha kho so coragāmaṇiko maṃse pakke varamaṃsāni gahetvā paṇṇapuṭaṃ 3 bandhitvā uppalavaṇṇāya bhikkhuniyā avidūre rukkhe ālaggetvā – ‘‘yo passati samaṇo vā brāhmaṇo vā dinnaṃyeva haratū’’ti, vatvā pakkāmi. Assosi kho uppalavaṇṇā bhikkhunī samādhimhā vuṭṭhahitvā tassa coragāmaṇikassa imaṃ vācaṃ bhāsamānassa. Atha kho uppalavaṇṇā bhikkhunī taṃ maṃsaṃ gahetvā upassayaṃ agamāsi. Atha kho uppalavaṇṇā bhikkhunī tassā rattiyā accayena taṃ maṃsaṃ sampādetvā uttarāsaṅgena bhaṇḍikaṃ bandhitvā vehāsaṃ abbhuggantvā veḷuvane paccuṭṭhāsi 4.
တေန ခော ပန သမယေန ဘဂဝာ ဂာမံ ပိဏ္ဍာယ ပဝိဋ္ဌော ဟောတိ။ အာယသ္မာ ဥဒာယီ ဩဟိယ္ယကော ဟောတိ ဝိဟာရပာလော။ အထ ခော ဥပ္ပလဝဏ္ဏာ ဘိက္ခုနီ ယေနာယသ္မာ ဥဒာယီ တေနုပသင္ကမိ; ဥပသင္ကမိတ္ဝာ အာယသ္မန္တံ ဥဒာယိံ ဧတဒဝောစ – ‘‘ကဟံ, ဘန္တေ, ဘဂဝာ’’တိ? ‘‘ပဝိဋ္ဌော, ဘဂိနိ, ဘဂဝာ ဂာမံ ပိဏ္ဍာယာ’’တိ။ ‘‘ဣမံ, ဘန္တေ, မံသံ ဘဂဝတော ဒေဟီ’’တိ။ ‘‘သန္တပ္ပိတော တယာ, ဘဂိနိ, ဘဂဝာ မံသေန။ သစေ မေ တ္ဝံ အန္တရဝာသကံ ဒဒေယ္ယာသိ, ဧဝံ အဟမ္ပိ သန္တပ္ပိတော ဘဝေယ္ယံ အန္တရဝာသကေနာ’’တိ။ ‘‘မယံ ခော, ဘန္တေ, မာတုဂာမာ နာမ ကိစ္ဆလာဘာ။ ဣဒဉ္စ မေ အန္တိမံ ပဉ္စမံ စီဝရံ။ နာဟံ ဒသ္သာမီ’’တိ။ ‘‘သေယ္ယထာပိ, ဘဂိနိ, ပုရိသော ဟတ္ထိံ ဒတ္ဝာ ကစ္ဆေ သဇ္ဇေယ္ယ 5 ဧဝမေဝ ခော တ္ဝံ ဘဂိနိ ဘဂဝတော မံသံ ဒတ္ဝာ မယိ အန္တရဝာသကေ သဇ္ဇသီ’’တိ 6။ အထ ခော ဥပ္ပလဝဏ္ဏာ ဘိက္ခုနီ အာယသ္မတာ ဥဒာယိနာ နိပ္ပီဠိယမာနာ အန္တရဝာသကံ ဒတ္ဝာ ဥပသ္သယံ အဂမာသိ။ ဘိက္ခုနိယော ဥပ္ပလဝဏ္ဏာယ ဘိက္ခုနိယာ ပတ္တစီဝရံ ပဋိဂ္ဂဏ္ဟန္တိယော ဥပ္ပလဝဏ္ဏံ ဘိက္ခုနိံ ဧတဒဝောစုံ – ‘‘ကဟံ တေ, အယ္ယေ, အန္တရဝာသကော’’တိ? ဥပ္ပလဝဏ္ဏာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယော ဥဒာယီ ဘိက္ခုနိယာ စီဝရံ ပဋိဂ္ဂဟေသ္သတိ ကိစ္ဆလာဘော မာတုဂာမော’’တိ။ အထ ခော တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ ဥဒာယီ ဘိက္ခုနိယာ စီဝရံ ပဋိဂ္ဂဟေသ္သတီ’’တိ! အထ ခော တေ ဘိက္ခူ အာယသ္မန္တံ ဥဒာယိံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဥဒာယိ, ဘိက္ခုနိယာ စီဝရံ ပဋိဂ္ဂဟေသီ’’တိ? ‘‘သစ္စံ , ဘဂဝာ’’တိ။ ‘‘ဉာတိကာ တေ, ဥဒာယိ, အညာတိကာ’’တိ? ‘‘အညာတိကာ, ဘဂဝာ’’တိ။ ‘‘အညာတကော, မောဃပုရိသ, အညာတိကာယ န ဇာနာတိ ပတိရူပံ ဝာ အပ္ပတိရူပံ ဝာ သန္တံ ဝာ အသန္တံ ဝာ။ တတ္ထ နာမ တ္ဝံ, မောဃပုရိသ, အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဟေသ္သသိ! နေတံ မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Tena kho pana samayena bhagavā gāmaṃ piṇḍāya paviṭṭho hoti. Āyasmā udāyī ohiyyako hoti vihārapālo. Atha kho uppalavaṇṇā bhikkhunī yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘kahaṃ, bhante, bhagavā’’ti? ‘‘Paviṭṭho, bhagini, bhagavā gāmaṃ piṇḍāyā’’ti. ‘‘Imaṃ, bhante, maṃsaṃ bhagavato dehī’’ti. ‘‘Santappito tayā, bhagini, bhagavā maṃsena. Sace me tvaṃ antaravāsakaṃ dadeyyāsi, evaṃ ahampi santappito bhaveyyaṃ antaravāsakenā’’ti. ‘‘Mayaṃ kho, bhante, mātugāmā nāma kicchalābhā. Idañca me antimaṃ pañcamaṃ cīvaraṃ. Nāhaṃ dassāmī’’ti. ‘‘Seyyathāpi, bhagini, puriso hatthiṃ datvā kacche sajjeyya 7 evameva kho tvaṃ bhagini bhagavato maṃsaṃ datvā mayi antaravāsake sajjasī’’ti 8. Atha kho uppalavaṇṇā bhikkhunī āyasmatā udāyinā nippīḷiyamānā antaravāsakaṃ datvā upassayaṃ agamāsi. Bhikkhuniyo uppalavaṇṇāya bhikkhuniyā pattacīvaraṃ paṭiggaṇhantiyo uppalavaṇṇaṃ bhikkhuniṃ etadavocuṃ – ‘‘kahaṃ te, ayye, antaravāsako’’ti? Uppalavaṇṇā bhikkhunī bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā cīvaraṃ paṭiggahessati kicchalābho mātugāmo’’ti. Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā cīvaraṃ paṭiggahessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā cīvaraṃ paṭiggahesī’’ti? ‘‘Saccaṃ , bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātikāya bhikkhuniyā hatthato cīvaraṃ paṭiggahessasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၅၀၉. ‘‘ယော ပန ဘိက္ခု အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဏ္ဟေယ္ယ, နိသ္သဂ္ဂိယံ ပာစိတ္တိယ’’န္တိ။
509.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, nissaggiyaṃ pācittiya’’nti.
ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
၅၁၀. တေန ခော ပန သမယေန ဘိက္ခူ ကုက္ကုစ္စာယန္တာ ဘိက္ခုနီနံ ပာရိဝတ္တကစီဝရံ န ပဋိဂ္ဂဏ္ဟန္တိ။ ဘိက္ခုနိယော ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယာ အမ္ဟာကံ ပာရိဝတ္တကစီဝရံ န ပဋိဂ္ဂဟေသ္သန္တီ’’တိ! အသ္သောသုံ ခော ဘိက္ခူ တာသံ ဘိက္ခုနီနံ ဥဇ္ဈာယန္တီနံ ခိယ္ယန္တီနံ ဝိပာစေန္တီနံ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသု။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပဉ္စန္နံ ပာရိဝတ္တကံ ပဋိဂ္ဂဟေတုံ – ဘိက္ခုသ္သ, ဘိက္ခုနိယာ, သိက္ခမာနာယ, သာမဏေရသ္သ, သာမဏေရိယာ။ အနုဇာနာမိ, ဘိက္ခဝေ, ဣမေသံ ပဉ္စန္နံ ပာရိဝတ္တကံ ပဋိဂ္ဂဟေတုံ။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ။
510. Tena kho pana samayena bhikkhū kukkuccāyantā bhikkhunīnaṃ pārivattakacīvaraṃ na paṭiggaṇhanti. Bhikkhuniyo ujjhāyanti khiyyanti vipācenti – ‘‘kathañhi nāma ayyā amhākaṃ pārivattakacīvaraṃ na paṭiggahessantī’’ti! Assosuṃ kho bhikkhū tāsaṃ bhikkhunīnaṃ ujjhāyantīnaṃ khiyyantīnaṃ vipācentīnaṃ. Atha kho te bhikkhū bhagavato etamatthaṃ ārocesu. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, pañcannaṃ pārivattakaṃ paṭiggahetuṃ – bhikkhussa, bhikkhuniyā, sikkhamānāya, sāmaṇerassa, sāmaṇeriyā. Anujānāmi, bhikkhave, imesaṃ pañcannaṃ pārivattakaṃ paṭiggahetuṃ. Evañca pana, bhikkhave, imaṃ sikkhāpadaṃ uddiseyyātha.
၅၁၁. ‘‘ယော ပန ဘိက္ခု အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဏ္ဟေယ္ယ, အညတ္ရ ပာရိဝတ္တကာ, နိသ္သဂ္ဂိယံ ပာစိတ္တိယ’’န္တိ။
511.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, aññatra pārivattakā, nissaggiyaṃ pācittiya’’nti.
၅၁၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
512.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
အညာတိကာ နာမ မာတိတော ဝာ ပိတိတော ဝာ ယာဝ သတ္တမာ ပိတာမဟယုဂာ အသမ္ဗဒ္ဓာ။
Aññātikā nāma mātito vā pitito vā yāva sattamā pitāmahayugā asambaddhā.
ဘိက္ခုနီ နာမ ဥဘတောသင္ဃေ ဥပသမ္ပန္နာ။
Bhikkhunī nāma ubhatosaṅghe upasampannā.
စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ။
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
အညတ္ရ ပာရိဝတ္တကာတိ ဌပေတ္ဝာ ပာရိဝတ္တကံ။
Aññatra pārivattakāti ṭhapetvā pārivattakaṃ.
ပဋိဂ္ဂဏ္ဟာတိ, ပယောဂေ ဒုက္ကဋံ။ ပဋိလာဘေန နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ, စီဝရံ အညာတိကာယ ဘိက္ခုနိယာ ဟတ္ထတော ပဋိဂ္ဂဟိတံ, အညတ္ရ ပာရိဝတ္တကာ, နိသ္သဂ္ဂိယံ။ ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Paṭiggaṇhāti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ aññātikāya bhikkhuniyā hatthato paṭiggahitaṃ, aññatra pārivattakā, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
၅၁၃. အညာတိကာယ အညာတိကသညီ စီဝရံ ပဋိဂ္ဂဏ္ဟာတိ, အညတ္ရ ပာရိဝတ္တကာ, နိသ္သဂ္ဂိယံ ပာစိတ္တိယံ။ အညာတိကာယ ဝေမတိကော စီဝရံ ပဋိဂ္ဂဏ္ဟာတိ, အညတ္ရ ပာရိဝတ္တကာ, နိသ္သဂ္ဂိယံ ပာစိတ္တိယံ။ အညာတိကာယ ဉာတိကသညီ စီဝရံ ပဋိဂ္ဂဏ္ဟာတိ, အညတ္ရ ပာရိဝတ္တကာ, နိသ္သဂ္ဂိယံ ပာစိတ္တိယံ။
513. Aññātikāya aññātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya vematiko cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya ñātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ.
ဧကတောဥပသမ္ပန္နာယ ဟတ္ထတော စီဝရံ ပဋိဂ္ဂဏ္ဟာတိ, အညတ္ရ ပာရိဝတ္တကာ, အာပတ္တိ ဒုက္ကဋသ္သ။ ဉာတိကာယ အညာတိကသညီ, အာပတ္တိ ဒုက္ကဋသ္သ။ ဉာတိကာယ ဝေမတိကော, အာပတ္တိ ဒုက္ကဋသ္သ။ ဉာတိကာယ ဉာတိကသညီ, အနာပတ္တိ။
Ekatoupasampannāya hatthato cīvaraṃ paṭiggaṇhāti, aññatra pārivattakā, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
၅၁၄. အနာပတ္တိ ဉာတိကာယ, ပာရိဝတ္တကံ ပရိတ္တေန ဝာ ဝိပုလံ, ဝိပုလေန ဝာ ပရိတ္တံ, ဘိက္ခု ဝိသ္သာသံ ဂဏ္ဟာတိ, တာဝကာလိကံ ဂဏ္ဟာတိ , စီဝရံ ဌပေတ္ဝာ အညံ ပရိက္ခာရံ ဂဏ္ဟာတိ, သိက္ခမာနာယ, သာမဏေရိယာ, ဥမ္မတ္တကသ္သ, အာဒိကမ္မိကသ္သာတိ။
514. Anāpatti ñātikāya, pārivattakaṃ parittena vā vipulaṃ, vipulena vā parittaṃ, bhikkhu vissāsaṃ gaṇhāti, tāvakālikaṃ gaṇhāti , cīvaraṃ ṭhapetvā aññaṃ parikkhāraṃ gaṇhāti, sikkhamānāya, sāmaṇeriyā, ummattakassa, ādikammikassāti.
စီဝရပဋိဂ္ဂဟဏသိက္ခာပဒံ နိဋ္ဌိတံ ပဉ္စမံ။
Cīvarapaṭiggahaṇasikkhāpadaṃ niṭṭhitaṃ pañcamaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၅. စီဝရပဋိဂ္ဂဟဏသိက္ခာပဒဝဏ္ဏနာ • 5. Cīvarapaṭiggahaṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၅. စီဝရပဋိဂ္ဂဟဏသိက္ခာပဒဝဏ္ဏနာ • 5. Cīvarapaṭiggahaṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၅. စီဝရပဋိဂ္ဂဟဏသိက္ခာပဒဝဏ္ဏနာ • 5. Cīvarapaṭiggahaṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၅. စီဝရပဋိဂ္ဂဟဏသိက္ခာပဒဝဏ္ဏနာ • 5. Cīvarapaṭiggahaṇasikkhāpadavaṇṇanā
