| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༥. ཙཱིཝརཔཊིགྒཧཎསིཀྑཱཔདཾ
5. Cīvarapaṭiggahaṇasikkhāpadaṃ
༥༠༨. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན ཨུཔྤལཝཎྞཱ བྷིཀྑུནཱི སཱཝཏྠིཡཾ ཝིཧརཏི། ཨཐ ཁོ ཨུཔྤལཝཎྞཱ བྷིཀྑུནཱི པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ སཱཝཏྠིཾ པིཎྜཱཡ པཱཝིསི། སཱཝཏྠིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟཱ ཡེན ཨནྡྷཝནཾ ཏེནུཔསངྐམི དིཝཱཝིཧཱརཱཡ། ཨནྡྷཝནཾ ཨཛ྄ཛྷོགཱཧེཏྭཱ ཨཉྙཏརསྨིཾ རུཀྑམཱུལེ དིཝཱཝིཧཱརཾ ནིསཱིདི། ཏེན ཁོ པན སམཡེན ཙོརཱ ཀཏཀམྨཱ གཱཝིཾ ཝདྷིཏྭཱ མཾསཾ གཧེཏྭཱ ཨནྡྷཝནཾ པཝིསིཾསུ། ཨདྡསཱ ཁོ ཙོརགཱམཎིཀོ ཨུཔྤལཝཎྞཾ བྷིཀྑུནིཾ ཨཉྙཏརསྨིཾ རུཀྑམཱུལེ དིཝཱཝིཧཱརཾ ནིསིནྣཾ། དིསྭཱནསྶ ཨེཏདཧོསི – ‘‘སཙེ མེ པུཏྟབྷཱཏུཀཱ པསྶིསྶནྟི ཝིཧེཋིསྶནྟི ཨིམཾ བྷིཀྑུནི’’ནྟི ཨཉྙེན མགྒེན ཨགམཱསི། ཨཐ ཁོ སོ ཙོརགཱམཎིཀོ མཾསེ པཀྐེ ཝརམཾསཱནི གཧེཏྭཱ པཎྞཔུཊཾ 1 བནྡྷིཏྭཱ ཨུཔྤལཝཎྞཱཡ བྷིཀྑུནིཡཱ ཨཝིདཱུརེ རུཀྑེ ཨཱལགྒེཏྭཱ – ‘‘ཡོ པསྶཏི སམཎོ ཝཱ བྲཱཧྨཎོ ཝཱ དིནྣཾཡེཝ ཧརཏཱུ’’ཏི, ཝཏྭཱ པཀྐཱམི། ཨསྶོསི ཁོ ཨུཔྤལཝཎྞཱ བྷིཀྑུནཱི སམཱདྷིམྷཱ ཝུཊྛཧིཏྭཱ ཏསྶ ཙོརགཱམཎིཀསྶ ཨིམཾ ཝཱཙཾ བྷཱསམཱནསྶ། ཨཐ ཁོ ཨུཔྤལཝཎྞཱ བྷིཀྑུནཱི ཏཾ མཾསཾ གཧེཏྭཱ ཨུཔསྶཡཾ ཨགམཱསི། ཨཐ ཁོ ཨུཔྤལཝཎྞཱ བྷིཀྑུནཱི ཏསྶཱ རཏྟིཡཱ ཨཙྩཡེན ཏཾ མཾསཾ སམྤཱདེཏྭཱ ཨུཏྟརཱསངྒེན བྷཎྜིཀཾ བནྡྷིཏྭཱ ཝེཧཱསཾ ཨབྦྷུགྒནྟྭཱ ཝེལུ༹ཝནེ པཙྩུཊྛཱསི 2།
508. Tena samayena buddho bhagavā rājagahe viharati veḷuvane kalandakanivāpe. Tena kho pana samayena uppalavaṇṇā bhikkhunī sāvatthiyaṃ viharati. Atha kho uppalavaṇṇā bhikkhunī pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātappaṭikkantā yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Tena kho pana samayena corā katakammā gāviṃ vadhitvā maṃsaṃ gahetvā andhavanaṃ pavisiṃsu. Addasā kho coragāmaṇiko uppalavaṇṇaṃ bhikkhuniṃ aññatarasmiṃ rukkhamūle divāvihāraṃ nisinnaṃ. Disvānassa etadahosi – ‘‘sace me puttabhātukā passissanti viheṭhissanti imaṃ bhikkhuni’’nti aññena maggena agamāsi. Atha kho so coragāmaṇiko maṃse pakke varamaṃsāni gahetvā paṇṇapuṭaṃ 3 bandhitvā uppalavaṇṇāya bhikkhuniyā avidūre rukkhe ālaggetvā – ‘‘yo passati samaṇo vā brāhmaṇo vā dinnaṃyeva haratū’’ti, vatvā pakkāmi. Assosi kho uppalavaṇṇā bhikkhunī samādhimhā vuṭṭhahitvā tassa coragāmaṇikassa imaṃ vācaṃ bhāsamānassa. Atha kho uppalavaṇṇā bhikkhunī taṃ maṃsaṃ gahetvā upassayaṃ agamāsi. Atha kho uppalavaṇṇā bhikkhunī tassā rattiyā accayena taṃ maṃsaṃ sampādetvā uttarāsaṅgena bhaṇḍikaṃ bandhitvā vehāsaṃ abbhuggantvā veḷuvane paccuṭṭhāsi 4.
ཏེན ཁོ པན སམཡེན བྷགཝཱ གཱམཾ པིཎྜཱཡ པཝིཊྛོ ཧོཏི། ཨཱཡསྨཱ ཨུདཱཡཱི ཨོཧིཡྻཀོ ཧོཏི ཝིཧཱརཔཱལོ། ཨཐ ཁོ ཨུཔྤལཝཎྞཱ བྷིཀྑུནཱི ཡེནཱཡསྨཱ ཨུདཱཡཱི ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུདཱཡིཾ ཨེཏདཝོཙ – ‘‘ཀཧཾ, བྷནྟེ, བྷགཝཱ’’ཏི? ‘‘པཝིཊྛོ, བྷགིནི, བྷགཝཱ གཱམཾ པིཎྜཱཡཱ’’ཏི། ‘‘ཨིམཾ, བྷནྟེ, མཾསཾ བྷགཝཏོ དེཧཱི’’ཏི། ‘‘སནྟཔྤིཏོ ཏཡཱ, བྷགིནི, བྷགཝཱ མཾསེན། སཙེ མེ ཏྭཾ ཨནྟརཝཱསཀཾ དདེཡྻཱསི, ཨེཝཾ ཨཧམྤི སནྟཔྤིཏོ བྷཝེཡྻཾ ཨནྟརཝཱསཀེནཱ’’ཏི། ‘‘མཡཾ ཁོ, བྷནྟེ, མཱཏུགཱམཱ ནཱམ ཀིཙྪལཱབྷཱ། ཨིདཉྩ མེ ཨནྟིམཾ པཉྩམཾ ཙཱིཝརཾ། ནཱཧཾ དསྶཱམཱི’’ཏི། ‘‘སེཡྻཐཱཔི, བྷགིནི, པུརིསོ ཧཏྠིཾ དཏྭཱ ཀཙྪེ སཛྫེཡྻ 5 ཨེཝམེཝ ཁོ ཏྭཾ བྷགིནི བྷགཝཏོ མཾསཾ དཏྭཱ མཡི ཨནྟརཝཱསཀེ སཛྫསཱི’’ཏི 6། ཨཐ ཁོ ཨུཔྤལཝཎྞཱ བྷིཀྑུནཱི ཨཱཡསྨཏཱ ཨུདཱཡིནཱ ནིཔྤཱིལི༹ཡམཱནཱ ཨནྟརཝཱསཀཾ དཏྭཱ ཨུཔསྶཡཾ ཨགམཱསི། བྷིཀྑུནིཡོ ཨུཔྤལཝཎྞཱཡ བྷིཀྑུནིཡཱ པཏྟཙཱིཝརཾ པཊིགྒཎྷནྟིཡོ ཨུཔྤལཝཎྞཾ བྷིཀྑུནིཾ ཨེཏདཝོཙུཾ – ‘‘ཀཧཾ ཏེ, ཨཡྻེ, ཨནྟརཝཱསཀོ’’ཏི? ཨུཔྤལཝཎྞཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། བྷིཀྑུནིཡོ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻོ ཨུདཱཡཱི བྷིཀྑུནིཡཱ ཙཱིཝརཾ པཊིགྒཧེསྶཏི ཀིཙྪལཱབྷོ མཱཏུགཱམོ’’ཏི། ཨཐ ཁོ ཏཱ བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཨུདཱཡཱི བྷིཀྑུནིཡཱ ཙཱིཝརཾ པཊིགྒཧེསྶཏཱི’’ཏི! ཨཐ ཁོ ཏེ བྷིཀྑཱུ ཨཱཡསྨནྟཾ ཨུདཱཡིཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, ཨུདཱཡི, བྷིཀྑུནིཡཱ ཙཱིཝརཾ པཊིགྒཧེསཱི’’ཏི? ‘‘སཙྩཾ , བྷགཝཱ’’ཏི། ‘‘ཉཱཏིཀཱ ཏེ, ཨུདཱཡི, ཨཉྙཱཏིཀཱ’’ཏི? ‘‘ཨཉྙཱཏིཀཱ, བྷགཝཱ’’ཏི། ‘‘ཨཉྙཱཏཀོ, མོགྷཔུརིས, ཨཉྙཱཏིཀཱཡ ན ཛཱནཱཏི པཏིརཱུཔཾ ཝཱ ཨཔྤཏིརཱུཔཾ ཝཱ སནྟཾ ཝཱ ཨསནྟཾ ཝཱ། ཏཏྠ ནཱམ ཏྭཾ, མོགྷཔུརིས, ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཾ པཊིགྒཧེསྶསི! ནེཏཾ མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Tena kho pana samayena bhagavā gāmaṃ piṇḍāya paviṭṭho hoti. Āyasmā udāyī ohiyyako hoti vihārapālo. Atha kho uppalavaṇṇā bhikkhunī yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘kahaṃ, bhante, bhagavā’’ti? ‘‘Paviṭṭho, bhagini, bhagavā gāmaṃ piṇḍāyā’’ti. ‘‘Imaṃ, bhante, maṃsaṃ bhagavato dehī’’ti. ‘‘Santappito tayā, bhagini, bhagavā maṃsena. Sace me tvaṃ antaravāsakaṃ dadeyyāsi, evaṃ ahampi santappito bhaveyyaṃ antaravāsakenā’’ti. ‘‘Mayaṃ kho, bhante, mātugāmā nāma kicchalābhā. Idañca me antimaṃ pañcamaṃ cīvaraṃ. Nāhaṃ dassāmī’’ti. ‘‘Seyyathāpi, bhagini, puriso hatthiṃ datvā kacche sajjeyya 7 evameva kho tvaṃ bhagini bhagavato maṃsaṃ datvā mayi antaravāsake sajjasī’’ti 8. Atha kho uppalavaṇṇā bhikkhunī āyasmatā udāyinā nippīḷiyamānā antaravāsakaṃ datvā upassayaṃ agamāsi. Bhikkhuniyo uppalavaṇṇāya bhikkhuniyā pattacīvaraṃ paṭiggaṇhantiyo uppalavaṇṇaṃ bhikkhuniṃ etadavocuṃ – ‘‘kahaṃ te, ayye, antaravāsako’’ti? Uppalavaṇṇā bhikkhunī bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā cīvaraṃ paṭiggahessati kicchalābho mātugāmo’’ti. Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā cīvaraṃ paṭiggahessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā cīvaraṃ paṭiggahesī’’ti? ‘‘Saccaṃ , bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātikāya bhikkhuniyā hatthato cīvaraṃ paṭiggahessasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༥༠༩. ‘‘ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཾ པཊིགྒཎྷེཡྻ, ནིསྶགྒིཡཾ པཱཙིཏྟིཡ’’ནྟི།
509.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, nissaggiyaṃ pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༥༡༠. ཏེན ཁོ པན སམཡེན བྷིཀྑཱུ ཀུཀྐུཙྩཱཡནྟཱ བྷིཀྑུནཱིནཾ པཱརིཝཏྟཀཙཱིཝརཾ ན པཊིགྒཎྷནྟི། བྷིཀྑུནིཡོ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཨམྷཱཀཾ པཱརིཝཏྟཀཙཱིཝརཾ ན པཊིགྒཧེསྶནྟཱི’’ཏི! ཨསྶོསུཾ ཁོ བྷིཀྑཱུ ཏཱསཾ བྷིཀྑུནཱིནཾ ཨུཛ྄ཛྷཱཡནྟཱིནཾ ཁིཡྻནྟཱིནཾ ཝིཔཱཙེནྟཱིནཾ། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, པཉྩནྣཾ པཱརིཝཏྟཀཾ པཊིགྒཧེཏུཾ – བྷིཀྑུསྶ, བྷིཀྑུནིཡཱ, སིཀྑམཱནཱཡ, སཱམཎེརསྶ, སཱམཎེརིཡཱ། ཨནུཛཱནཱམི, བྷིཀྑཝེ, ཨིམེསཾ པཉྩནྣཾ པཱརིཝཏྟཀཾ པཊིགྒཧེཏུཾ། ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ།
510. Tena kho pana samayena bhikkhū kukkuccāyantā bhikkhunīnaṃ pārivattakacīvaraṃ na paṭiggaṇhanti. Bhikkhuniyo ujjhāyanti khiyyanti vipācenti – ‘‘kathañhi nāma ayyā amhākaṃ pārivattakacīvaraṃ na paṭiggahessantī’’ti! Assosuṃ kho bhikkhū tāsaṃ bhikkhunīnaṃ ujjhāyantīnaṃ khiyyantīnaṃ vipācentīnaṃ. Atha kho te bhikkhū bhagavato etamatthaṃ ārocesu. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, pañcannaṃ pārivattakaṃ paṭiggahetuṃ – bhikkhussa, bhikkhuniyā, sikkhamānāya, sāmaṇerassa, sāmaṇeriyā. Anujānāmi, bhikkhave, imesaṃ pañcannaṃ pārivattakaṃ paṭiggahetuṃ. Evañca pana, bhikkhave, imaṃ sikkhāpadaṃ uddiseyyātha.
༥༡༡. ‘‘ཡོ པན བྷིཀྑུ ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཾ པཊིགྒཎྷེཡྻ, ཨཉྙཏྲ པཱརིཝཏྟཀཱ, ནིསྶགྒིཡཾ པཱཙིཏྟིཡ’’ནྟི།
511.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, aññatra pārivattakā, nissaggiyaṃ pācittiya’’nti.
༥༡༢. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
512.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨཉྙཱཏིཀཱ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ པིཏཱམཧཡུགཱ ཨསམྦདྡྷཱ།
Aññātikā nāma mātito vā pitito vā yāva sattamā pitāmahayugā asambaddhā.
བྷིཀྑུནཱི ནཱམ ཨུབྷཏོསངྒྷེ ཨུཔསམྤནྣཱ།
Bhikkhunī nāma ubhatosaṅghe upasampannā.
ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམཾ།
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
ཨཉྙཏྲ པཱརིཝཏྟཀཱཏི ཋཔེཏྭཱ པཱརིཝཏྟཀཾ།
Aññatra pārivattakāti ṭhapetvā pārivattakaṃ.
པཊིགྒཎྷཱཏི, པཡོགེ དུཀྐཊཾ། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ, ཙཱིཝརཾ ཨཉྙཱཏིཀཱཡ བྷིཀྑུནིཡཱ ཧཏྠཏོ པཊིགྒཧིཏཾ, ཨཉྙཏྲ པཱརིཝཏྟཀཱ, ནིསྶགྒིཡཾ། ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Paṭiggaṇhāti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ aññātikāya bhikkhuniyā hatthato paṭiggahitaṃ, aññatra pārivattakā, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༥༡༣. ཨཉྙཱཏིཀཱཡ ཨཉྙཱཏིཀསཉྙཱི ཙཱིཝརཾ པཊིགྒཎྷཱཏི, ཨཉྙཏྲ པཱརིཝཏྟཀཱ, ནིསྶགྒིཡཾ པཱཙིཏྟིཡཾ། ཨཉྙཱཏིཀཱཡ ཝེམཏིཀོ ཙཱིཝརཾ པཊིགྒཎྷཱཏི, ཨཉྙཏྲ པཱརིཝཏྟཀཱ, ནིསྶགྒིཡཾ པཱཙིཏྟིཡཾ། ཨཉྙཱཏིཀཱཡ ཉཱཏིཀསཉྙཱི ཙཱིཝརཾ པཊིགྒཎྷཱཏི, ཨཉྙཏྲ པཱརིཝཏྟཀཱ, ནིསྶགྒིཡཾ པཱཙིཏྟིཡཾ།
513. Aññātikāya aññātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya vematiko cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya ñātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ.
ཨེཀཏོཨུཔསམྤནྣཱཡ ཧཏྠཏོ ཙཱིཝརཾ པཊིགྒཎྷཱཏི, ཨཉྙཏྲ པཱརིཝཏྟཀཱ, ཨཱཔཏྟི དུཀྐཊསྶ། ཉཱཏིཀཱཡ ཨཉྙཱཏིཀསཉྙཱི, ཨཱཔཏྟི དུཀྐཊསྶ། ཉཱཏིཀཱཡ ཝེམཏིཀོ, ཨཱཔཏྟི དུཀྐཊསྶ། ཉཱཏིཀཱཡ ཉཱཏིཀསཉྙཱི, ཨནཱཔཏྟི།
Ekatoupasampannāya hatthato cīvaraṃ paṭiggaṇhāti, aññatra pārivattakā, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
༥༡༤. ཨནཱཔཏྟི ཉཱཏིཀཱཡ, པཱརིཝཏྟཀཾ པརིཏྟེན ཝཱ ཝིཔུལཾ, ཝིཔུལེན ཝཱ པརིཏྟཾ, བྷིཀྑུ ཝིསྶཱསཾ གཎྷཱཏི, ཏཱཝཀཱལིཀཾ གཎྷཱཏི , ཙཱིཝརཾ ཋཔེཏྭཱ ཨཉྙཾ པརིཀྑཱརཾ གཎྷཱཏི, སིཀྑམཱནཱཡ, སཱམཎེརིཡཱ, ཨུམྨཏྟཀསྶ, ཨཱདིཀམྨིཀསྶཱཏི།
514. Anāpatti ñātikāya, pārivattakaṃ parittena vā vipulaṃ, vipulena vā parittaṃ, bhikkhu vissāsaṃ gaṇhāti, tāvakālikaṃ gaṇhāti , cīvaraṃ ṭhapetvā aññaṃ parikkhāraṃ gaṇhāti, sikkhamānāya, sāmaṇeriyā, ummattakassa, ādikammikassāti.
ཙཱིཝརཔཊིགྒཧཎསིཀྑཱཔདཾ ནིཊྛིཏཾ པཉྩམཾ།
Cīvarapaṭiggahaṇasikkhāpadaṃ niṭṭhitaṃ pañcamaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༥. ཙཱིཝརཔཊིགྒཧཎསིཀྑཱཔདཝཎྞནཱ • 5. Cīvarapaṭiggahaṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༥. ཙཱིཝརཔཊིགྒཧཎསིཀྑཱཔདཝཎྞནཱ • 5. Cīvarapaṭiggahaṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. ཙཱིཝརཔཊིགྒཧཎསིཀྑཱཔདཝཎྞནཱ • 5. Cīvarapaṭiggahaṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. ཙཱིཝརཔཊིགྒཧཎསིཀྑཱཔདཝཎྞནཱ • 5. Cīvarapaṭiggahaṇasikkhāpadavaṇṇanā
