| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৫. চীৰরপটিগ্গহণসিক্খাপদৰণ্ণনা
5. Cīvarapaṭiggahaṇasikkhāpadavaṇṇanā
৫০৮. পঞ্চমে অপঞ্ঞত্তে সিক্খাপদেতি গণম্হা ওহীযনসিক্খাপদে (পাচি॰ ৬৯১-৬৯২) অপঞ্ঞত্তে। কোট্ঠাসসম্পত্তীতি কেসাদিপঞ্চকোট্ঠাসানং কল্যাণতা। হত্থতলেযেৰ দস্সেত্ৰাতি হত্থতলতো সেসকাযস্স অদস্সনং দীপেতি।
508. Pañcame apaññatte sikkhāpadeti gaṇamhā ohīyanasikkhāpade (pāci. 691-692) apaññatte. Koṭṭhāsasampattīti kesādipañcakoṭṭhāsānaṃ kalyāṇatā. Hatthataleyeva dassetvāti hatthatalato sesakāyassa adassanaṃ dīpeti.
৫১০. ৰিহত্থতাযাতি ৰিহততায, অমিস্সিততায অপটিসরণতাযাতি অত্থো। তেনাহ ‘‘সমভিতুন্নত্তা’’তি, ব্যধিতত্তাতি অত্থো। পরিৰত্তেতব্বং পরিৰত্তং, তদেৰ পারিৰত্তকং, পরিৰত্তেত্ৰা দিয্যমানন্তি অত্থো।
510.Vihatthatāyāti vihatatāya, amissitatāya apaṭisaraṇatāyāti attho. Tenāha ‘‘samabhitunnattā’’ti, byadhitattāti attho. Parivattetabbaṃ parivattaṃ, tadeva pārivattakaṃ, parivattetvā diyyamānanti attho.
পুরিমসিক্খাপদে ৰিয ইধ দ্ৰাদসহত্থো উপচারনিযমো নত্থীতি আহ ‘‘উপচারং মুঞ্চিত্ৰা’’তি। অঞ্ঞত্র পারিৰত্তকাতি যং অন্তমসো হরীটকখণ্ডম্পি দত্ৰা ৰা ‘‘দস্সামী’’তি আভোগং কত্ৰা ৰা পরিৰত্তকং গণ্হাতি, তং ঠপেত্ৰা। ‘‘তং অচিত্তকভাৰেন ন সমেতী’’তি ইমিনা ঞাতিভাৰাজাননাদীসু ৰিয ভিক্খুনীভাৰাজাননাদিৰসেনাপি অচিত্তকতং পকাসেতি।
Purimasikkhāpade viya idha dvādasahattho upacāraniyamo natthīti āha ‘‘upacāraṃ muñcitvā’’ti. Aññatra pārivattakāti yaṃ antamaso harīṭakakhaṇḍampi datvā vā ‘‘dassāmī’’ti ābhogaṃ katvā vā parivattakaṃ gaṇhāti, taṃ ṭhapetvā. ‘‘Taṃ acittakabhāvena na sametī’’ti iminā ñātibhāvājānanādīsu viya bhikkhunībhāvājānanādivasenāpi acittakataṃ pakāseti.
৫১৩-৪. তিকঞ্চ তং পাচিত্তিযঞ্চাতি তিকপাচিত্তিযং, পাচিত্তিযতিকন্তি অত্থো। পত্তত্থৰিকাদীতি অনধিট্ঠানুপগং সন্ধায ৰদতি। কো পন ৰাদো পত্তত্থৰিকাদীসূতি মহতিযাপি তাৰ ভিসিচ্ছৰিযা অনধিট্ঠানুপগত্তা অনাপত্তি, ৰিকপ্পনুপগপচ্ছিমপ্পমাণৰিরহিততায অনধিট্ঠাতব্বেসু কিমেৰ ৰত্তব্বন্তি দস্সেতি। পত্তত্থৰিকাদীনি পন ৰিকপ্পনুপগপচ্ছিমানি গণ্হিতুং ন ৰট্টতি এৰ। পটিগ্গহণং কিরিযা, অপরিৰত্তনং অকিরিযা। ৰিকপ্পনুপগচীৰরতা, পারিৰত্তকাভাৰো, অঞ্ঞাতিকায হত্থতো গহণন্তি ইমানেত্থ তীণি অঙ্গানি।
513-4. Tikañca taṃ pācittiyañcāti tikapācittiyaṃ, pācittiyatikanti attho. Pattatthavikādīti anadhiṭṭhānupagaṃ sandhāya vadati. Ko pana vādo pattatthavikādīsūti mahatiyāpi tāva bhisicchaviyā anadhiṭṭhānupagattā anāpatti, vikappanupagapacchimappamāṇavirahitatāya anadhiṭṭhātabbesu kimeva vattabbanti dasseti. Pattatthavikādīni pana vikappanupagapacchimāni gaṇhituṃ na vaṭṭati eva. Paṭiggahaṇaṃ kiriyā, aparivattanaṃ akiriyā. Vikappanupagacīvaratā, pārivattakābhāvo, aññātikāya hatthato gahaṇanti imānettha tīṇi aṅgāni.
চীৰরপটিগ্গহণসিক্খাপদৰণ্ণনা নিট্ঠিতা।
Cīvarapaṭiggahaṇasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. চীৰরপটিগ্গহণসিক্খাপদং • 5. Cīvarapaṭiggahaṇasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. চীৰরপটিগ্গহণসিক্খাপদৰণ্ণনা • 5. Cīvarapaṭiggahaṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৫. চীৰরপটিগ্গহণসিক্খাপদৰণ্ণনা • 5. Cīvarapaṭiggahaṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. চীৰরপটিগ্গহণসিক্খাপদৰণ্ণনা • 5. Cīvarapaṭiggahaṇasikkhāpadavaṇṇanā
