| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
೫. ಚೀವರಪಟಿಗ್ಗಹಣಸಿಕ್ಖಾಪದವಣ್ಣನಾ
5. Cīvarapaṭiggahaṇasikkhāpadavaṇṇanā
೫೦೮. ಪಞ್ಚಮೇ ಅಪಞ್ಞತ್ತೇ ಸಿಕ್ಖಾಪದೇತಿ ಗಣಮ್ಹಾ ಓಹೀಯನಸಿಕ್ಖಾಪದೇ (ಪಾಚಿ॰ ೬೯೧-೬೯೨) ಅಪಞ್ಞತ್ತೇ। ಕೋಟ್ಠಾಸಸಮ್ಪತ್ತೀತಿ ಕೇಸಾದಿಪಞ್ಚಕೋಟ್ಠಾಸಾನಂ ಕಲ್ಯಾಣತಾ। ಹತ್ಥತಲೇಯೇವ ದಸ್ಸೇತ್ವಾತಿ ಹತ್ಥತಲತೋ ಸೇಸಕಾಯಸ್ಸ ಅದಸ್ಸನಂ ದೀಪೇತಿ।
508. Pañcame apaññatte sikkhāpadeti gaṇamhā ohīyanasikkhāpade (pāci. 691-692) apaññatte. Koṭṭhāsasampattīti kesādipañcakoṭṭhāsānaṃ kalyāṇatā. Hatthataleyeva dassetvāti hatthatalato sesakāyassa adassanaṃ dīpeti.
೫೧೦. ವಿಹತ್ಥತಾಯಾತಿ ವಿಹತತಾಯ, ಅಮಿಸ್ಸಿತತಾಯ ಅಪಟಿಸರಣತಾಯಾತಿ ಅತ್ಥೋ। ತೇನಾಹ ‘‘ಸಮಭಿತುನ್ನತ್ತಾ’’ತಿ, ಬ್ಯಧಿತತ್ತಾತಿ ಅತ್ಥೋ। ಪರಿವತ್ತೇತಬ್ಬಂ ಪರಿವತ್ತಂ, ತದೇವ ಪಾರಿವತ್ತಕಂ, ಪರಿವತ್ತೇತ್ವಾ ದಿಯ್ಯಮಾನನ್ತಿ ಅತ್ಥೋ।
510.Vihatthatāyāti vihatatāya, amissitatāya apaṭisaraṇatāyāti attho. Tenāha ‘‘samabhitunnattā’’ti, byadhitattāti attho. Parivattetabbaṃ parivattaṃ, tadeva pārivattakaṃ, parivattetvā diyyamānanti attho.
ಪುರಿಮಸಿಕ್ಖಾಪದೇ ವಿಯ ಇಧ ದ್ವಾದಸಹತ್ಥೋ ಉಪಚಾರನಿಯಮೋ ನತ್ಥೀತಿ ಆಹ ‘‘ಉಪಚಾರಂ ಮುಞ್ಚಿತ್ವಾ’’ತಿ। ಅಞ್ಞತ್ರ ಪಾರಿವತ್ತಕಾತಿ ಯಂ ಅನ್ತಮಸೋ ಹರೀಟಕಖಣ್ಡಮ್ಪಿ ದತ್ವಾ ವಾ ‘‘ದಸ್ಸಾಮೀ’’ತಿ ಆಭೋಗಂ ಕತ್ವಾ ವಾ ಪರಿವತ್ತಕಂ ಗಣ್ಹಾತಿ, ತಂ ಠಪೇತ್ವಾ। ‘‘ತಂ ಅಚಿತ್ತಕಭಾವೇನ ನ ಸಮೇತೀ’’ತಿ ಇಮಿನಾ ಞಾತಿಭಾವಾಜಾನನಾದೀಸು ವಿಯ ಭಿಕ್ಖುನೀಭಾವಾಜಾನನಾದಿವಸೇನಾಪಿ ಅಚಿತ್ತಕತಂ ಪಕಾಸೇತಿ।
Purimasikkhāpade viya idha dvādasahattho upacāraniyamo natthīti āha ‘‘upacāraṃ muñcitvā’’ti. Aññatra pārivattakāti yaṃ antamaso harīṭakakhaṇḍampi datvā vā ‘‘dassāmī’’ti ābhogaṃ katvā vā parivattakaṃ gaṇhāti, taṃ ṭhapetvā. ‘‘Taṃ acittakabhāvena na sametī’’ti iminā ñātibhāvājānanādīsu viya bhikkhunībhāvājānanādivasenāpi acittakataṃ pakāseti.
೫೧೩-೪. ತಿಕಞ್ಚ ತಂ ಪಾಚಿತ್ತಿಯಞ್ಚಾತಿ ತಿಕಪಾಚಿತ್ತಿಯಂ, ಪಾಚಿತ್ತಿಯತಿಕನ್ತಿ ಅತ್ಥೋ। ಪತ್ತತ್ಥವಿಕಾದೀತಿ ಅನಧಿಟ್ಠಾನುಪಗಂ ಸನ್ಧಾಯ ವದತಿ। ಕೋ ಪನ ವಾದೋ ಪತ್ತತ್ಥವಿಕಾದೀಸೂತಿ ಮಹತಿಯಾಪಿ ತಾವ ಭಿಸಿಚ್ಛವಿಯಾ ಅನಧಿಟ್ಠಾನುಪಗತ್ತಾ ಅನಾಪತ್ತಿ, ವಿಕಪ್ಪನುಪಗಪಚ್ಛಿಮಪ್ಪಮಾಣವಿರಹಿತತಾಯ ಅನಧಿಟ್ಠಾತಬ್ಬೇಸು ಕಿಮೇವ ವತ್ತಬ್ಬನ್ತಿ ದಸ್ಸೇತಿ। ಪತ್ತತ್ಥವಿಕಾದೀನಿ ಪನ ವಿಕಪ್ಪನುಪಗಪಚ್ಛಿಮಾನಿ ಗಣ್ಹಿತುಂ ನ ವಟ್ಟತಿ ಏವ। ಪಟಿಗ್ಗಹಣಂ ಕಿರಿಯಾ, ಅಪರಿವತ್ತನಂ ಅಕಿರಿಯಾ। ವಿಕಪ್ಪನುಪಗಚೀವರತಾ, ಪಾರಿವತ್ತಕಾಭಾವೋ, ಅಞ್ಞಾತಿಕಾಯ ಹತ್ಥತೋ ಗಹಣನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ।
513-4. Tikañca taṃ pācittiyañcāti tikapācittiyaṃ, pācittiyatikanti attho. Pattatthavikādīti anadhiṭṭhānupagaṃ sandhāya vadati. Ko pana vādo pattatthavikādīsūti mahatiyāpi tāva bhisicchaviyā anadhiṭṭhānupagattā anāpatti, vikappanupagapacchimappamāṇavirahitatāya anadhiṭṭhātabbesu kimeva vattabbanti dasseti. Pattatthavikādīni pana vikappanupagapacchimāni gaṇhituṃ na vaṭṭati eva. Paṭiggahaṇaṃ kiriyā, aparivattanaṃ akiriyā. Vikappanupagacīvaratā, pārivattakābhāvo, aññātikāya hatthato gahaṇanti imānettha tīṇi aṅgāni.
ಚೀವರಪಟಿಗ್ಗಹಣಸಿಕ್ಖಾಪದವಣ್ಣನಾ ನಿಟ್ಠಿತಾ।
Cīvarapaṭiggahaṇasikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೫. ಚೀವರಪಟಿಗ್ಗಹಣಸಿಕ್ಖಾಪದಂ • 5. Cīvarapaṭiggahaṇasikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೫. ಚೀವರಪಟಿಗ್ಗಹಣಸಿಕ್ಖಾಪದವಣ್ಣನಾ • 5. Cīvarapaṭiggahaṇasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೫. ಚೀವರಪಟಿಗ್ಗಹಣಸಿಕ್ಖಾಪದವಣ್ಣನಾ • 5. Cīvarapaṭiggahaṇasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೫. ಚೀವರಪಟಿಗ್ಗಹಣಸಿಕ್ಖಾಪದವಣ್ಣನಾ • 5. Cīvarapaṭiggahaṇasikkhāpadavaṇṇanā
