| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
5. சீவரப்படிக்³க³ஹணஸிக்கா²பத³வண்ணனா
5. Cīvarappaṭiggahaṇasikkhāpadavaṇṇanā
ச²ன்னந்தி கோ²மாதீ³னங் ச²ன்னங் சீவரானங் மஜ்ஜே². உபசாரங் முஞ்சித்வாதி த்³வாத³ஸஹத்தூ²பசாரங் முஞ்சித்வா. பி-ஸத்³தே³ன த⁴ம்மகத²ங் கதெ²ந்தஸ்ஸ சதஸ்ஸோ பரிஸா சீவரானி ச நானாவிராக³வத்தா²னி ச ஆஹரித்வா பாத³மூலே ட²பெந்தி, உபசாரே வா ட²த்வா உபரி கி²பந்தி, ‘‘ஸசே ஸாதி³யதி, படிக்³க³ஹிதமேவா’’தி எத்த² வத்தப்³ப³மேவ நத்தீ²தி த³ஸ்ஸேதி. கி²பதூதி தி³வா வா ரத்திபா⁴கே³ வா கி²பது. படிக்³க³ஹிதமேவ ஹோதீதி கிஞ்சாபி ‘‘இத³ங் பி⁴க்கு²னியா, இத³ங் அஞ்ஞேஸ’’ந்தி ஞாதுங் ந ஸக்கா, ததா²பி அசித்தகபா⁴வேன க³ஹிதமேவ ஹோதி. யஸ்ஸ கஸ்ஸசி பன அனுபஸம்பன்னஸ்ஸாதி ஸிக்க²மானஸாமணேரஸாமணேரிஉபாஸகஉபாஸிகாதீ³ஸு யஸ்ஸ கஸ்ஸசி அனுபஸம்பன்னஸ்ஸ. ட²பிதந்தி பி⁴க்கு²னியா ட²பிதங். பங்ஸுகூலங் அதி⁴ட்ட²ஹித்வாதி ‘‘அஸ்ஸாமிகங் இத³’’ந்தி ஸஞ்ஞங் உப்பாதெ³த்வா. அஸ்ஸாமிகஞ்ஹி ‘‘பங்ஸுகூல’’ந்தி வுச்சதி. இமினா ‘‘அம்ஹாகமத்தா²ய ட²பித’’ந்திஆதி³காய ஸஞ்ஞாய க³ஹேதுங் ந வட்டதீதி த³ஸ்ஸேதி. அஞ்ஞத்ர பாரிவத்தகாதி பரிவத்தேதப்³ப³ங் பரிவத்தங், பரிவத்தமேவ பாரிவத்தகங், பரிவத்தெத்வா தி³ய்யமானங், தங் வினாதி அத்தோ². தேனாஹ ‘‘யங் அந்தமஸோ ஹரீடகக்க²ண்ட³ம்பீ’’திஆதி³. ஆபோ⁴க³ங் கத்வாதி சித்தேன ஸமன்னாஹரித்வா. ஸசே பி⁴க்கு²னீ வஸ்ஸாவாஸிகம்பி தே³தி, தம்பி யதா²வுத்தவிதா⁴னங் அகத்வா க³ஹேதுங் ந வட்டதீதி வேதி³தப்³ப³ங்.
Channanti khomādīnaṃ channaṃ cīvarānaṃ majjhe. Upacāraṃ muñcitvāti dvādasahatthūpacāraṃ muñcitvā. Pi-saddena dhammakathaṃ kathentassa catasso parisā cīvarāni ca nānāvirāgavatthāni ca āharitvā pādamūle ṭhapenti, upacāre vā ṭhatvā upari khipanti, ‘‘sace sādiyati, paṭiggahitamevā’’ti ettha vattabbameva natthīti dasseti. Khipatūti divā vā rattibhāge vā khipatu. Paṭiggahitameva hotīti kiñcāpi ‘‘idaṃ bhikkhuniyā, idaṃ aññesa’’nti ñātuṃ na sakkā, tathāpi acittakabhāvena gahitameva hoti. Yassa kassaci pana anupasampannassāti sikkhamānasāmaṇerasāmaṇeriupāsakaupāsikādīsu yassa kassaci anupasampannassa. Ṭhapitanti bhikkhuniyā ṭhapitaṃ. Paṃsukūlaṃ adhiṭṭhahitvāti ‘‘assāmikaṃ ida’’nti saññaṃ uppādetvā. Assāmikañhi ‘‘paṃsukūla’’nti vuccati. Iminā ‘‘amhākamatthāya ṭhapita’’ntiādikāya saññāya gahetuṃ na vaṭṭatīti dasseti. Aññatra pārivattakāti parivattetabbaṃ parivattaṃ, parivattameva pārivattakaṃ, parivattetvā diyyamānaṃ, taṃ vināti attho. Tenāha ‘‘yaṃ antamaso harīṭakakkhaṇḍampī’’tiādi. Ābhogaṃ katvāti cittena samannāharitvā. Sace bhikkhunī vassāvāsikampi deti, tampi yathāvuttavidhānaṃ akatvā gahetuṃ na vaṭṭatīti veditabbaṃ.
படிலாபே⁴னாதி க³ஹணேன. திகபாசித்தியந்தி தீணி பரிமாணானி அஸ்ஸாதி திகங்,திகஞ்ச தங் பாசித்தியஞ்சாதி திகபாசித்தியங், அஞ்ஞாதிகாய ஞாதிகஸஞ்ஞிவேமதிகஅஞ்ஞாதிகஸஞ்ஞீனங் வஸேன தீணி பாசித்தியானீதி அத்தோ². ஏகதோஉபஸம்பன்னாயாதி பி⁴க்கு²னீனங் ஸந்திகே உபஸம்பன்னாய. தாய ஹி ஹத்த²தோ அஞ்ஞத்ர பாரிவத்தகா சீவரங் படிக்³க³ண்ஹந்தஸ்ஸ து³க்கடங், பி⁴க்கூ²னங் ஸந்திகே உபஸம்பன்னாய பன பாசித்தியமேவ. ‘‘பத்தத்த²விகாதி³ம்ஹி ச அனதி⁴ட்டா²தப்³ப³பரிக்கா²ரே’’தி இமினா பி⁴ஸிச்ச²விம்பி ஸங்க³ண்ஹாதி. ஸா ஹி மஹந்தாபி ஸேனாஸனஸங்க³ஹிதத்தா சீவரஸங்க²ங் ந க³ச்ச²தீதி நேவ அதி⁴ட்டா²னுபகா³, ந விகப்பனுபகா³ ச. வுத்தஞ்ஹி ஸமந்தபாஸாதி³காயங் ‘‘ஸசேபி மஞ்சப்பமாணா பி⁴ஸிச்ச²வி ஹோதி, வட்டதியேவா’’தி (பாரா॰ அட்ட²॰ 2.514). ‘‘ஹத்த²தோ சீவரங் படிக்³க³ண்ஹாதீ’’தி வசனதோ பன அஞ்ஞாதிகாய பி⁴க்கு²னியா பேஸிதக்³க³ஹணேபி அனாபத்தி. படிக்³க³ஹணதோ, பரிவத்தனாகரணதோ ச கிரியாகிரியங்.
Paṭilābhenāti gahaṇena. Tikapācittiyanti tīṇi parimāṇāni assāti tikaṃ,tikañca taṃ pācittiyañcāti tikapācittiyaṃ, aññātikāya ñātikasaññivematikaaññātikasaññīnaṃ vasena tīṇi pācittiyānīti attho. Ekatoupasampannāyāti bhikkhunīnaṃ santike upasampannāya. Tāya hi hatthato aññatra pārivattakā cīvaraṃ paṭiggaṇhantassa dukkaṭaṃ, bhikkhūnaṃ santike upasampannāya pana pācittiyameva. ‘‘Pattatthavikādimhi ca anadhiṭṭhātabbaparikkhāre’’ti iminā bhisicchavimpi saṅgaṇhāti. Sā hi mahantāpi senāsanasaṅgahitattā cīvarasaṅkhaṃ na gacchatīti neva adhiṭṭhānupagā, na vikappanupagā ca. Vuttañhi samantapāsādikāyaṃ ‘‘sacepi mañcappamāṇā bhisicchavi hoti, vaṭṭatiyevā’’ti (pārā. aṭṭha. 2.514). ‘‘Hatthato cīvaraṃ paṭiggaṇhātī’’ti vacanato pana aññātikāya bhikkhuniyā pesitaggahaṇepi anāpatti. Paṭiggahaṇato, parivattanākaraṇato ca kiriyākiriyaṃ.
சீவரப்படிக்³க³ஹணஸிக்கா²பத³வண்ணனா நிட்டி²தா.
Cīvarappaṭiggahaṇasikkhāpadavaṇṇanā niṭṭhitā.
