| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၅. စီဝရပ္ပဋိဂ္ဂဟဏသိက္ခာပဒဝဏ္ဏနာ
5. Cīvarappaṭiggahaṇasikkhāpadavaṇṇanā
ဆန္နန္တိ ခောမာဒီနံ ဆန္နံ စီဝရာနံ မဇ္ဈေ။ ဥပစာရံ မုဉ္စိတ္ဝာတိ ဒ္ဝာဒသဟတ္ထူပစာရံ မုဉ္စိတ္ဝာ။ ပိ-သဒ္ဒေန ဓမ္မကထံ ကထေန္တသ္သ စတသ္သော ပရိသာ စီဝရာနိ စ နာနာဝိရာဂဝတ္ထာနိ စ အာဟရိတ္ဝာ ပာဒမူလေ ဌပေန္တိ, ဥပစာရေ ဝာ ဌတ္ဝာ ဥပရိ ခိပန္တိ, ‘‘သစေ သာဒိယတိ, ပဋိဂ္ဂဟိတမေဝာ’’တိ ဧတ္ထ ဝတ္တဗ္ဗမေဝ နတ္ထီတိ ဒသ္သေတိ။ ခိပတူတိ ဒိဝာ ဝာ ရတ္တိဘာဂေ ဝာ ခိပတု။ ပဋိဂ္ဂဟိတမေဝ ဟောတီတိ ကိဉ္စာပိ ‘‘ဣဒံ ဘိက္ခုနိယာ, ဣဒံ အညေသ’’န္တိ ဉာတုံ န သက္ကာ, တထာပိ အစိတ္တကဘာဝေန ဂဟိတမေဝ ဟောတိ။ ယသ္သ ကသ္သစိ ပန အနုပသမ္ပန္နသ္သာတိ သိက္ခမာနသာမဏေရသာမဏေရိဥပာသကဥပာသိကာဒီသု ယသ္သ ကသ္သစိ အနုပသမ္ပန္နသ္သ။ ဌပိတန္တိ ဘိက္ခုနိယာ ဌပိတံ။ ပံသုကူလံ အဓိဋ္ဌဟိတ္ဝာတိ ‘‘အသ္သာမိကံ ဣဒ’’န္တိ သညံ ဥပ္ပာဒေတ္ဝာ။ အသ္သာမိကဉ္ဟိ ‘‘ပံသုကူလ’’န္တိ ဝုစ္စတိ။ ဣမိနာ ‘‘အမ္ဟာကမတ္ထာယ ဌပိတ’’န္တိအာဒိကာယ သညာယ ဂဟေတုံ န ဝဋ္ဋတီတိ ဒသ္သေတိ။ အညတ္ရ ပာရိဝတ္တကာတိ ပရိဝတ္တေတဗ္ဗံ ပရိဝတ္တံ, ပရိဝတ္တမေဝ ပာရိဝတ္တကံ, ပရိဝတ္တေတ္ဝာ ဒိယ္ယမာနံ, တံ ဝိနာတိ အတ္ထော။ တေနာဟ ‘‘ယံ အန္တမသော ဟရီဋကက္ခဏ္ဍမ္ပီ’’တိအာဒိ။ အာဘောဂံ ကတ္ဝာတိ စိတ္တေန သမန္နာဟရိတ္ဝာ။ သစေ ဘိက္ခုနီ ဝသ္သာဝာသိကမ္ပိ ဒေတိ, တမ္ပိ ယထာဝုတ္တဝိဓာနံ အကတ္ဝာ ဂဟေတုံ န ဝဋ္ဋတီတိ ဝေဒိတဗ္ဗံ။
Channanti khomādīnaṃ channaṃ cīvarānaṃ majjhe. Upacāraṃ muñcitvāti dvādasahatthūpacāraṃ muñcitvā. Pi-saddena dhammakathaṃ kathentassa catasso parisā cīvarāni ca nānāvirāgavatthāni ca āharitvā pādamūle ṭhapenti, upacāre vā ṭhatvā upari khipanti, ‘‘sace sādiyati, paṭiggahitamevā’’ti ettha vattabbameva natthīti dasseti. Khipatūti divā vā rattibhāge vā khipatu. Paṭiggahitameva hotīti kiñcāpi ‘‘idaṃ bhikkhuniyā, idaṃ aññesa’’nti ñātuṃ na sakkā, tathāpi acittakabhāvena gahitameva hoti. Yassa kassaci pana anupasampannassāti sikkhamānasāmaṇerasāmaṇeriupāsakaupāsikādīsu yassa kassaci anupasampannassa. Ṭhapitanti bhikkhuniyā ṭhapitaṃ. Paṃsukūlaṃ adhiṭṭhahitvāti ‘‘assāmikaṃ ida’’nti saññaṃ uppādetvā. Assāmikañhi ‘‘paṃsukūla’’nti vuccati. Iminā ‘‘amhākamatthāya ṭhapita’’ntiādikāya saññāya gahetuṃ na vaṭṭatīti dasseti. Aññatra pārivattakāti parivattetabbaṃ parivattaṃ, parivattameva pārivattakaṃ, parivattetvā diyyamānaṃ, taṃ vināti attho. Tenāha ‘‘yaṃ antamaso harīṭakakkhaṇḍampī’’tiādi. Ābhogaṃ katvāti cittena samannāharitvā. Sace bhikkhunī vassāvāsikampi deti, tampi yathāvuttavidhānaṃ akatvā gahetuṃ na vaṭṭatīti veditabbaṃ.
ပဋိလာဘေနာတိ ဂဟဏေန။ တိကပာစိတ္တိယန္တိ တီဏိ ပရိမာဏာနိ အသ္သာတိ တိကံ,တိကဉ္စ တံ ပာစိတ္တိယဉ္စာတိ တိကပာစိတ္တိယံ, အညာတိကာယ ဉာတိကသညိဝေမတိကအညာတိကသညီနံ ဝသေန တီဏိ ပာစိတ္တိယာနီတိ အတ္ထော။ ဧကတောဥပသမ္ပန္နာယာတိ ဘိက္ခုနီနံ သန္တိကေ ဥပသမ္ပန္နာယ။ တာယ ဟိ ဟတ္ထတော အညတ္ရ ပာရိဝတ္တကာ စီဝရံ ပဋိဂ္ဂဏ္ဟန္တသ္သ ဒုက္ကဋံ, ဘိက္ခူနံ သန္တိကေ ဥပသမ္ပန္နာယ ပန ပာစိတ္တိယမေဝ။ ‘‘ပတ္တတ္ထဝိကာဒိမ္ဟိ စ အနဓိဋ္ဌာတဗ္ဗပရိက္ခာရေ’’တိ ဣမိနာ ဘိသိစ္ဆဝိမ္ပိ သင္ဂဏ္ဟာတိ။ သာ ဟိ မဟန္တာပိ သေနာသနသင္ဂဟိတတ္တာ စီဝရသင္ခံ န ဂစ္ဆတီတိ နေဝ အဓိဋ္ဌာနုပဂာ, န ဝိကပ္ပနုပဂာ စ။ ဝုတ္တဉ္ဟိ သမန္တပာသာဒိကာယံ ‘‘သစေပိ မဉ္စပ္ပမာဏာ ဘိသိစ္ဆဝိ ဟောတိ, ဝဋ္ဋတိယေဝာ’’တိ (ပာရာ. အဋ္ဌ. ၂.၅၁၄)။ ‘‘ဟတ္ထတော စီဝရံ ပဋိဂ္ဂဏ္ဟာတီ’’တိ ဝစနတော ပန အညာတိကာယ ဘိက္ခုနိယာ ပေသိတဂ္ဂဟဏေပိ အနာပတ္တိ။ ပဋိဂ္ဂဟဏတော, ပရိဝတ္တနာကရဏတော စ ကိရိယာကိရိယံ။
Paṭilābhenāti gahaṇena. Tikapācittiyanti tīṇi parimāṇāni assāti tikaṃ,tikañca taṃ pācittiyañcāti tikapācittiyaṃ, aññātikāya ñātikasaññivematikaaññātikasaññīnaṃ vasena tīṇi pācittiyānīti attho. Ekatoupasampannāyāti bhikkhunīnaṃ santike upasampannāya. Tāya hi hatthato aññatra pārivattakā cīvaraṃ paṭiggaṇhantassa dukkaṭaṃ, bhikkhūnaṃ santike upasampannāya pana pācittiyameva. ‘‘Pattatthavikādimhi ca anadhiṭṭhātabbaparikkhāre’’ti iminā bhisicchavimpi saṅgaṇhāti. Sā hi mahantāpi senāsanasaṅgahitattā cīvarasaṅkhaṃ na gacchatīti neva adhiṭṭhānupagā, na vikappanupagā ca. Vuttañhi samantapāsādikāyaṃ ‘‘sacepi mañcappamāṇā bhisicchavi hoti, vaṭṭatiyevā’’ti (pārā. aṭṭha. 2.514). ‘‘Hatthato cīvaraṃ paṭiggaṇhātī’’ti vacanato pana aññātikāya bhikkhuniyā pesitaggahaṇepi anāpatti. Paṭiggahaṇato, parivattanākaraṇato ca kiriyākiriyaṃ.
စီဝရပ္ပဋိဂ္ဂဟဏသိက္ခာပဒဝဏ္ဏနာ နိဋ္ဌိတာ။
Cīvarappaṭiggahaṇasikkhāpadavaṇṇanā niṭṭhitā.
