| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਅਭਿਨવ-ਟੀਕਾ • Kaṅkhāvitaraṇī-abhinava-ṭīkā |
੫. ਚੀવਰਪ੍ਪਟਿਗ੍ਗਹਣਸਿਕ੍ਖਾਪਦવਣ੍ਣਨਾ
5. Cīvarappaṭiggahaṇasikkhāpadavaṇṇanā
ਛਨ੍ਨਨ੍ਤਿ ਖੋਮਾਦੀਨਂ ਛਨ੍ਨਂ ਚੀવਰਾਨਂ ਮਜ੍ਝੇ। ਉਪਚਾਰਂ ਮੁਞ੍ਚਿਤ੍વਾਤਿ ਦ੍વਾਦਸਹਤ੍ਥੂਪਚਾਰਂ ਮੁਞ੍ਚਿਤ੍વਾ। ਪਿ-ਸਦ੍ਦੇਨ ਧਮ੍ਮਕਥਂ ਕਥੇਨ੍ਤਸ੍ਸ ਚਤਸ੍ਸੋ ਪਰਿਸਾ ਚੀવਰਾਨਿ ਚ ਨਾਨਾવਿਰਾਗવਤ੍ਥਾਨਿ ਚ ਆਹਰਿਤ੍વਾ ਪਾਦਮੂਲੇ ਠਪੇਨ੍ਤਿ, ਉਪਚਾਰੇ વਾ ਠਤ੍વਾ ਉਪਰਿ ਖਿਪਨ੍ਤਿ, ‘‘ਸਚੇ ਸਾਦਿਯਤਿ, ਪਟਿਗ੍ਗਹਿਤਮੇવਾ’’ਤਿ ਏਤ੍ਥ વਤ੍ਤਬ੍ਬਮੇવ ਨਤ੍ਥੀਤਿ ਦਸ੍ਸੇਤਿ। ਖਿਪਤੂਤਿ ਦਿવਾ વਾ ਰਤ੍ਤਿਭਾਗੇ વਾ ਖਿਪਤੁ। ਪਟਿਗ੍ਗਹਿਤਮੇવ ਹੋਤੀਤਿ ਕਿਞ੍ਚਾਪਿ ‘‘ਇਦਂ ਭਿਕ੍ਖੁਨਿਯਾ, ਇਦਂ ਅਞ੍ਞੇਸ’’ਨ੍ਤਿ ਞਾਤੁਂ ਨ ਸਕ੍ਕਾ, ਤਥਾਪਿ ਅਚਿਤ੍ਤਕਭਾવੇਨ ਗਹਿਤਮੇવ ਹੋਤਿ। ਯਸ੍ਸ ਕਸ੍ਸਚਿ ਪਨ ਅਨੁਪਸਮ੍ਪਨ੍ਨਸ੍ਸਾਤਿ ਸਿਕ੍ਖਮਾਨਸਾਮਣੇਰਸਾਮਣੇਰਿਉਪਾਸਕਉਪਾਸਿਕਾਦੀਸੁ ਯਸ੍ਸ ਕਸ੍ਸਚਿ ਅਨੁਪਸਮ੍ਪਨ੍ਨਸ੍ਸ। ਠਪਿਤਨ੍ਤਿ ਭਿਕ੍ਖੁਨਿਯਾ ਠਪਿਤਂ। ਪਂਸੁਕੂਲਂ ਅਧਿਟ੍ਠਹਿਤ੍વਾਤਿ ‘‘ਅਸ੍ਸਾਮਿਕਂ ਇਦ’’ਨ੍ਤਿ ਸਞ੍ਞਂ ਉਪ੍ਪਾਦੇਤ੍વਾ। ਅਸ੍ਸਾਮਿਕਞ੍ਹਿ ‘‘ਪਂਸੁਕੂਲ’’ਨ੍ਤਿ વੁਚ੍ਚਤਿ। ਇਮਿਨਾ ‘‘ਅਮ੍ਹਾਕਮਤ੍ਥਾਯ ਠਪਿਤ’’ਨ੍ਤਿਆਦਿਕਾਯ ਸਞ੍ਞਾਯ ਗਹੇਤੁਂ ਨ વਟ੍ਟਤੀਤਿ ਦਸ੍ਸੇਤਿ। ਅਞ੍ਞਤ੍ਰ ਪਾਰਿવਤ੍ਤਕਾਤਿ ਪਰਿવਤ੍ਤੇਤਬ੍ਬਂ ਪਰਿવਤ੍ਤਂ, ਪਰਿવਤ੍ਤਮੇવ ਪਾਰਿવਤ੍ਤਕਂ, ਪਰਿવਤ੍ਤੇਤ੍વਾ ਦਿਯ੍ਯਮਾਨਂ, ਤਂ વਿਨਾਤਿ ਅਤ੍ਥੋ। ਤੇਨਾਹ ‘‘ਯਂ ਅਨ੍ਤਮਸੋ ਹਰੀਟਕਕ੍ਖਣ੍ਡਮ੍ਪੀ’’ਤਿਆਦਿ। ਆਭੋਗਂ ਕਤ੍વਾਤਿ ਚਿਤ੍ਤੇਨ ਸਮਨ੍ਨਾਹਰਿਤ੍વਾ। ਸਚੇ ਭਿਕ੍ਖੁਨੀ વਸ੍ਸਾવਾਸਿਕਮ੍ਪਿ ਦੇਤਿ, ਤਮ੍ਪਿ ਯਥਾવੁਤ੍ਤવਿਧਾਨਂ ਅਕਤ੍વਾ ਗਹੇਤੁਂ ਨ વਟ੍ਟਤੀਤਿ વੇਦਿਤਬ੍ਬਂ।
Channanti khomādīnaṃ channaṃ cīvarānaṃ majjhe. Upacāraṃ muñcitvāti dvādasahatthūpacāraṃ muñcitvā. Pi-saddena dhammakathaṃ kathentassa catasso parisā cīvarāni ca nānāvirāgavatthāni ca āharitvā pādamūle ṭhapenti, upacāre vā ṭhatvā upari khipanti, ‘‘sace sādiyati, paṭiggahitamevā’’ti ettha vattabbameva natthīti dasseti. Khipatūti divā vā rattibhāge vā khipatu. Paṭiggahitameva hotīti kiñcāpi ‘‘idaṃ bhikkhuniyā, idaṃ aññesa’’nti ñātuṃ na sakkā, tathāpi acittakabhāvena gahitameva hoti. Yassa kassaci pana anupasampannassāti sikkhamānasāmaṇerasāmaṇeriupāsakaupāsikādīsu yassa kassaci anupasampannassa. Ṭhapitanti bhikkhuniyā ṭhapitaṃ. Paṃsukūlaṃ adhiṭṭhahitvāti ‘‘assāmikaṃ ida’’nti saññaṃ uppādetvā. Assāmikañhi ‘‘paṃsukūla’’nti vuccati. Iminā ‘‘amhākamatthāya ṭhapita’’ntiādikāya saññāya gahetuṃ na vaṭṭatīti dasseti. Aññatra pārivattakāti parivattetabbaṃ parivattaṃ, parivattameva pārivattakaṃ, parivattetvā diyyamānaṃ, taṃ vināti attho. Tenāha ‘‘yaṃ antamaso harīṭakakkhaṇḍampī’’tiādi. Ābhogaṃ katvāti cittena samannāharitvā. Sace bhikkhunī vassāvāsikampi deti, tampi yathāvuttavidhānaṃ akatvā gahetuṃ na vaṭṭatīti veditabbaṃ.
ਪਟਿਲਾਭੇਨਾਤਿ ਗਹਣੇਨ। ਤਿਕਪਾਚਿਤ੍ਤਿਯਨ੍ਤਿ ਤੀਣਿ ਪਰਿਮਾਣਾਨਿ ਅਸ੍ਸਾਤਿ ਤਿਕਂ,ਤਿਕਞ੍ਚ ਤਂ ਪਾਚਿਤ੍ਤਿਯਞ੍ਚਾਤਿ ਤਿਕਪਾਚਿਤ੍ਤਿਯਂ, ਅਞ੍ਞਾਤਿਕਾਯ ਞਾਤਿਕਸਞ੍ਞਿવੇਮਤਿਕਅਞ੍ਞਾਤਿਕਸਞ੍ਞੀਨਂ વਸੇਨ ਤੀਣਿ ਪਾਚਿਤ੍ਤਿਯਾਨੀਤਿ ਅਤ੍ਥੋ। ਏਕਤੋਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ। ਤਾਯ ਹਿ ਹਤ੍ਥਤੋ ਅਞ੍ਞਤ੍ਰ ਪਾਰਿવਤ੍ਤਕਾ ਚੀવਰਂ ਪਟਿਗ੍ਗਣ੍ਹਨ੍ਤਸ੍ਸ ਦੁਕ੍ਕਟਂ, ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਪਾਚਿਤ੍ਤਿਯਮੇવ। ‘‘ਪਤ੍ਤਤ੍ਥવਿਕਾਦਿਮ੍ਹਿ ਚ ਅਨਧਿਟ੍ਠਾਤਬ੍ਬਪਰਿਕ੍ਖਾਰੇ’’ਤਿ ਇਮਿਨਾ ਭਿਸਿਚ੍ਛવਿਮ੍ਪਿ ਸਙ੍ਗਣ੍ਹਾਤਿ। ਸਾ ਹਿ ਮਹਨ੍ਤਾਪਿ ਸੇਨਾਸਨਸਙ੍ਗਹਿਤਤ੍ਤਾ ਚੀવਰਸਙ੍ਖਂ ਨ ਗਚ੍ਛਤੀਤਿ ਨੇવ ਅਧਿਟ੍ਠਾਨੁਪਗਾ, ਨ વਿਕਪ੍ਪਨੁਪਗਾ ਚ। વੁਤ੍ਤਞ੍ਹਿ ਸਮਨ੍ਤਪਾਸਾਦਿਕਾਯਂ ‘‘ਸਚੇਪਿ ਮਞ੍ਚਪ੍ਪਮਾਣਾ ਭਿਸਿਚ੍ਛવਿ ਹੋਤਿ, વਟ੍ਟਤਿਯੇવਾ’’ਤਿ (ਪਾਰਾ॰ ਅਟ੍ਠ॰ ੨.੫੧੪)। ‘‘ਹਤ੍ਥਤੋ ਚੀવਰਂ ਪਟਿਗ੍ਗਣ੍ਹਾਤੀ’’ਤਿ વਚਨਤੋ ਪਨ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਪੇਸਿਤਗ੍ਗਹਣੇਪਿ ਅਨਾਪਤ੍ਤਿ। ਪਟਿਗ੍ਗਹਣਤੋ, ਪਰਿવਤ੍ਤਨਾਕਰਣਤੋ ਚ ਕਿਰਿਯਾਕਿਰਿਯਂ।
Paṭilābhenāti gahaṇena. Tikapācittiyanti tīṇi parimāṇāni assāti tikaṃ,tikañca taṃ pācittiyañcāti tikapācittiyaṃ, aññātikāya ñātikasaññivematikaaññātikasaññīnaṃ vasena tīṇi pācittiyānīti attho. Ekatoupasampannāyāti bhikkhunīnaṃ santike upasampannāya. Tāya hi hatthato aññatra pārivattakā cīvaraṃ paṭiggaṇhantassa dukkaṭaṃ, bhikkhūnaṃ santike upasampannāya pana pācittiyameva. ‘‘Pattatthavikādimhi ca anadhiṭṭhātabbaparikkhāre’’ti iminā bhisicchavimpi saṅgaṇhāti. Sā hi mahantāpi senāsanasaṅgahitattā cīvarasaṅkhaṃ na gacchatīti neva adhiṭṭhānupagā, na vikappanupagā ca. Vuttañhi samantapāsādikāyaṃ ‘‘sacepi mañcappamāṇā bhisicchavi hoti, vaṭṭatiyevā’’ti (pārā. aṭṭha. 2.514). ‘‘Hatthato cīvaraṃ paṭiggaṇhātī’’ti vacanato pana aññātikāya bhikkhuniyā pesitaggahaṇepi anāpatti. Paṭiggahaṇato, parivattanākaraṇato ca kiriyākiriyaṃ.
ਚੀવਰਪ੍ਪਟਿਗ੍ਗਹਣਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Cīvarappaṭiggahaṇasikkhāpadavaṇṇanā niṭṭhitā.
