| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
சீவரரஜனகதா²
Cīvararajanakathā
344. ச²கணேனாதி கோ³மயேன. பண்டு³மத்திகாயாதி தம்ப³மத்திகாய. மூலரஜனாதீ³ஸு ஹலித்³தி³ங் ட²பெத்வா ஸப்³ப³ங் மூலரஜனங் வட்டதி. மஞ்ஜிட்டி²ஞ்ச துங்க³ஹாரஞ்ச ட²பெத்வா ஸப்³ப³ங் க²ந்த⁴ரஜனங் வட்டதி. துங்க³ஹாரோ நாம ஏகோ ஸகண்டகருக்கோ², தஸ்ஸ ஹரிதாலவண்ணங் க²ந்த⁴ரஜனங் ஹோதி. லொத்³த³ஞ்ச கண்டு³லஞ்ச ட²பெத்வா ஸப்³ப³ங் தசரஜனங் வட்டதி. அல்லிபத்தங் நீலிபத்தஞ்ச ட²பெத்வா ஸப்³ப³ங் பத்தரஜனங் வட்டதி. கி³ஹிபரிபு⁴த்தங் பன அல்லிபத்தேன ஏகவாரங் ரஜிதுங் வட்டதி. கிங்ஸுகபுப்ப²ஞ்ச குஸும்ப⁴புப்ப²ஞ்ச ட²பெத்வா ஸப்³ப³ங் புப்ப²ரஜனங் வட்டதி. ப²லரஜனே பன ந கிஞ்சி ந வட்டதி.
344.Chakaṇenāti gomayena. Paṇḍumattikāyāti tambamattikāya. Mūlarajanādīsu haliddiṃ ṭhapetvā sabbaṃ mūlarajanaṃ vaṭṭati. Mañjiṭṭhiñca tuṅgahārañca ṭhapetvā sabbaṃ khandharajanaṃ vaṭṭati. Tuṅgahāro nāma eko sakaṇṭakarukkho, tassa haritālavaṇṇaṃ khandharajanaṃ hoti. Loddañca kaṇḍulañca ṭhapetvā sabbaṃ tacarajanaṃ vaṭṭati. Allipattaṃ nīlipattañca ṭhapetvā sabbaṃ pattarajanaṃ vaṭṭati. Gihiparibhuttaṃ pana allipattena ekavāraṃ rajituṃ vaṭṭati. Kiṃsukapupphañca kusumbhapupphañca ṭhapetvā sabbaṃ puppharajanaṃ vaṭṭati. Phalarajane pana na kiñci na vaṭṭati.
ஸீதுத³காதி அபக்கரஜனங் வுச்சதி. உத்தராளும்பந்தி வட்டாதா⁴ரகங், ரஜனகும்பி⁴யா மஜ்ஜே² ட²பெத்வா தங் ஆதா⁴ரகங் பரிக்கி²பித்வா ரஜனங் பக்கி²பிதுங் அனுஜானாமீதி அத்தோ². ஏவஞ்ஹி கதே ரஜனங் ந உத்தரதி. உத³கே வா நக²பிட்டி²காய வாதி ஸசே பரிபக்கங் ஹோதி, உத³கபாதியா தி³ன்னோ தே²வோ ஸஹஸா ந விஸரதி, நக²பிட்டி²யம்பி அவிஸரந்தோ திட்ட²தி. ரஜனுளுங்கந்தி ரஜனஉளுங்கங். த³ண்ட³கதா²லகந்தி தமேவ ஸத³ண்ட³கங். ரஜனகோலம்ப³ந்தி ரஜனகுண்ட³ங். ஓமத்³த³ந்தீதி ஸம்மத்³த³ந்தி. ந ச அச்சி²ன்னே தே²வே பக்கமிதுந்தி யாவ ரஜனபி³ந்து³ க³ளிதங் ந சி²ஜ்ஜதி, தாவ ந அஞ்ஞத்ர க³ந்தப்³ப³ங். பத்தி²ன்னந்தி அதிரஜிதத்தா த²த்³த⁴ங். உத³கே ஓஸாரேதுந்தி உத³கே பக்கி²பித்வா ட²பேதுங். ரஜனே பன நிக்க²ந்தே தங் உத³கங் ச²ட்³டெ³த்வா சீவரங் மத்³தி³தப்³ப³ங். த³ந்தகாஸாவானீதி ஏகங் வா த்³வே வா வாரே ரஜித்வா த³ந்தவண்ணானி தா⁴ரெந்தி.
Sītudakāti apakkarajanaṃ vuccati. Uttarāḷumpanti vaṭṭādhārakaṃ, rajanakumbhiyā majjhe ṭhapetvā taṃ ādhārakaṃ parikkhipitvā rajanaṃ pakkhipituṃ anujānāmīti attho. Evañhi kate rajanaṃ na uttarati. Udake vā nakhapiṭṭhikāya vāti sace paripakkaṃ hoti, udakapātiyā dinno thevo sahasā na visarati, nakhapiṭṭhiyampi avisaranto tiṭṭhati. Rajanuḷuṅkanti rajanauḷuṅkaṃ. Daṇḍakathālakanti tameva sadaṇḍakaṃ. Rajanakolambanti rajanakuṇḍaṃ. Omaddantīti sammaddanti. Na ca acchinne theve pakkamitunti yāva rajanabindu gaḷitaṃ na chijjati, tāva na aññatra gantabbaṃ. Patthinnanti atirajitattā thaddhaṃ. Udake osāretunti udake pakkhipitvā ṭhapetuṃ. Rajane pana nikkhante taṃ udakaṃ chaḍḍetvā cīvaraṃ madditabbaṃ. Dantakāsāvānīti ekaṃ vā dve vā vāre rajitvā dantavaṇṇāni dhārenti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 215. சீவரரஜனகதா² • 215. Cīvararajanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சீவரரஜனகதா²வண்ணனா • Cīvararajanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சீவரரஜனகதா²வண்ணனா • Cīvararajanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சீவரரஜனகதா²தி³வண்ணனா • Cīvararajanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 215. சீவரரஜனகதா² • 215. Cīvararajanakathā
