Library / Tipiṭaka / तिपिटक • Tipiṭaka / महावग्गपाळि • Mahāvaggapāḷi

    २१५. चीवररजनकथा

    215. Cīvararajanakathā

    ३४४. तेन खो पन समयेन भिक्खू छकणेनपि पण्डुमत्तिकायपि चीवरं रजन्ति। चीवरं दुब्बण्णं होति। भगवतो एतमत्थं आरोचेसुं। अनुजानामि , भिक्खवे, छ रजनानि – मूलरजनं, खन्धरजनं, तचरजनं, पत्तरजनं, पुप्फरजनं, फलरजनन्ति।

    344. Tena kho pana samayena bhikkhū chakaṇenapi paṇḍumattikāyapi cīvaraṃ rajanti. Cīvaraṃ dubbaṇṇaṃ hoti. Bhagavato etamatthaṃ ārocesuṃ. Anujānāmi , bhikkhave, cha rajanāni – mūlarajanaṃ, khandharajanaṃ, tacarajanaṃ, pattarajanaṃ, puppharajanaṃ, phalarajananti.

    तेन खो पन समयेन भिक्खू सीतुदकाय 1 चीवरं रजन्ति। चीवरं दुग्गन्धं होति। भगवतो एतमत्थं आरोचेसुं। अनुजानामि, भिक्खवे, रजनं पचितुं चुल्‍लं रजनकुम्भिन्ति। रजनं उत्तरियति। भगवतो एतमत्थं आरोचेसुं। अनुजानामि, भिक्खवे, उत्तराळुम्पं 2 बन्धितुन्ति।

    Tena kho pana samayena bhikkhū sītudakāya 3 cīvaraṃ rajanti. Cīvaraṃ duggandhaṃ hoti. Bhagavato etamatthaṃ ārocesuṃ. Anujānāmi, bhikkhave, rajanaṃ pacituṃ cullaṃ rajanakumbhinti. Rajanaṃ uttariyati. Bhagavato etamatthaṃ ārocesuṃ. Anujānāmi, bhikkhave, uttarāḷumpaṃ 4 bandhitunti.

    तेन खो पन समयेन भिक्खू न जानन्ति रजनं पक्‍कं वा अपक्‍कं वा। भगवतो एतमत्थं आरोचेसुं। अनुजानामि, भिक्खवे, उदके वा नखपिट्ठिकाय वा थेवकं दातुन्ति।

    Tena kho pana samayena bhikkhū na jānanti rajanaṃ pakkaṃ vā apakkaṃ vā. Bhagavato etamatthaṃ ārocesuṃ. Anujānāmi, bhikkhave, udake vā nakhapiṭṭhikāya vā thevakaṃ dātunti.

    तेन खो पन समयेन भिक्खू रजनं ओरोपेन्ता कुम्भिं आविञ्छन्ति 5। कुम्भी भिज्‍जति। भगवतो एतमत्थं आरोचेसुं। अनुजानामि, भिक्खवे, रजनुळुङ्कं 6 दण्डकथालकन्ति।

    Tena kho pana samayena bhikkhū rajanaṃ oropentā kumbhiṃ āviñchanti 7. Kumbhī bhijjati. Bhagavato etamatthaṃ ārocesuṃ. Anujānāmi, bhikkhave, rajanuḷuṅkaṃ 8 daṇḍakathālakanti.

    तेन खो पन समयेन भिक्खूनं रजनभाजनं न संविज्‍जति। भगवतो एतमत्थं आरोचेसुं। अनुजानामि, भिक्खवे, रजनकोलम्बं रजनघटन्ति।

    Tena kho pana samayena bhikkhūnaṃ rajanabhājanaṃ na saṃvijjati. Bhagavato etamatthaṃ ārocesuṃ. Anujānāmi, bhikkhave, rajanakolambaṃ rajanaghaṭanti.

    तेन खो पन समयेन भिक्खू पातियापि पत्तेपि चीवरं ओमद्दन्ति। चीवरं परिभिज्‍जति। भगवतो एतमत्थं आरोचेसुं। अनुजानामि, भिक्खवे, रजनदोणिकन्ति।

    Tena kho pana samayena bhikkhū pātiyāpi pattepi cīvaraṃ omaddanti. Cīvaraṃ paribhijjati. Bhagavato etamatthaṃ ārocesuṃ. Anujānāmi, bhikkhave, rajanadoṇikanti.

    तेन खो पन समयेन भिक्खू छमाय चीवरं पत्थरन्ति। चीवरं पंसुकितं होति। भगवतो एतमत्थं आरोचेसुं। अनुजानामि, भिक्खवे, तिणसन्थारकन्ति।

    Tena kho pana samayena bhikkhū chamāya cīvaraṃ pattharanti. Cīvaraṃ paṃsukitaṃ hoti. Bhagavato etamatthaṃ ārocesuṃ. Anujānāmi, bhikkhave, tiṇasanthārakanti.

    तिणसन्थारको उपचिकाहि खज्‍जति। भगवतो एतमत्थं आरोचेसुं। अनुजानामि, भिक्खवे, चीवरवंसं चीवररज्‍जुन्ति।

    Tiṇasanthārako upacikāhi khajjati. Bhagavato etamatthaṃ ārocesuṃ. Anujānāmi, bhikkhave, cīvaravaṃsaṃ cīvararajjunti.

    मज्झेन लग्गेन्ति। रजनं उभतो गलति। भगवतो एतमत्थं आरोचेसुं। अनुजानामि, भिक्खवे, कण्णे बन्धितुन्ति।

    Majjhena laggenti. Rajanaṃ ubhato galati. Bhagavato etamatthaṃ ārocesuṃ. Anujānāmi, bhikkhave, kaṇṇe bandhitunti.

    कण्णो जीरति। भगवतो एतमत्थं आरोचेसुं। अनुजानामि, भिक्खवे, कण्णसुत्तकन्ति।

    Kaṇṇo jīrati. Bhagavato etamatthaṃ ārocesuṃ. Anujānāmi, bhikkhave, kaṇṇasuttakanti.

    रजनं एकतो गलति। भगवतो एतमत्थं आरोचेसुं। अनुजानामि, भिक्खवे, सम्परिवत्तकं सम्परिवत्तकं रजेतुं, न च अच्छिन्‍ने थेवे पक्‍कमितुन्ति।

    Rajanaṃ ekato galati. Bhagavato etamatthaṃ ārocesuṃ. Anujānāmi, bhikkhave, samparivattakaṃ samparivattakaṃ rajetuṃ, na ca acchinne theve pakkamitunti.

    तेन खो पन समयेन चीवरं पत्थिन्‍नं होति। भगवतो एतमत्थं आरोचेसुं। अनुजानामि, भिक्खवे, उदके ओसारेतुन्ति।

    Tena kho pana samayena cīvaraṃ patthinnaṃ hoti. Bhagavato etamatthaṃ ārocesuṃ. Anujānāmi, bhikkhave, udake osāretunti.

    तेन खो पन समयेन चीवरं फरुसं होति। भगवतो एतमत्थं आरोचेसुं। अनुजानामि , भिक्खवे, पाणिना आकोटेतुन्ति ।

    Tena kho pana samayena cīvaraṃ pharusaṃ hoti. Bhagavato etamatthaṃ ārocesuṃ. Anujānāmi , bhikkhave, pāṇinā ākoṭetunti .

    तेन खो पन समयेन भिक्खू अच्छिन्‍नकानि चीवरानि धारेन्ति दन्तकासावानि। मनुस्सा उज्झायन्ति खिय्यन्ति विपाचेन्ति – सेय्यथापि नाम 9 गिही कामभोगिनोति। भगवतो एतमत्थं आरोचेसुं। न, भिक्खवे, अच्छिन्‍नकानि चीवरानि धारेतब्बानि। यो धारेय्य, आपत्ति दुक्‍कटस्साति।

    Tena kho pana samayena bhikkhū acchinnakāni cīvarāni dhārenti dantakāsāvāni. Manussā ujjhāyanti khiyyanti vipācenti – seyyathāpi nāma 10 gihī kāmabhoginoti. Bhagavato etamatthaṃ ārocesuṃ. Na, bhikkhave, acchinnakāni cīvarāni dhāretabbāni. Yo dhāreyya, āpatti dukkaṭassāti.

    चीवररजनकथा निट्ठिता।

    Cīvararajanakathā niṭṭhitā.




    Next: २१६. छिन्‍नकचीवरानुजानना • 216. Chinnakacīvarānujānanā




    Footnotes:
    1. सीतुन्दिकाय (सी॰), सीतूदकाय (स्या॰)
    2. उत्तराळुपं (योजना), उत्तराळुपं (स्या॰)
    3. sītundikāya (sī.), sītūdakāya (syā.)
    4. uttarāḷupaṃ (yojanā), uttarāḷupaṃ (syā.)
    5. आविञ्‍जन्ति (सी॰), आवट्टन्ति (स्या॰)
    6. रजनाळुङ्कं (योजना)
    7. āviñjanti (sī.), āvaṭṭanti (syā.)
    8. rajanāḷuṅkaṃ (yojanā)
    9. सेय्यथापि (?)
    10. seyyathāpi (?)



    Related texts:



    अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / चीवररजनकथा • Cīvararajanakathā

    टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / चीवररजनकथावण्णना • Cīvararajanakathāvaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / चीवररजनकथावण्णना • Cīvararajanakathāvaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / चीवररजनकथादिवण्णना • Cīvararajanakathādivaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / २१५. चीवररजनकथा • 215. Cīvararajanakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact