| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๖. จีวรสิพฺพนสิกฺขาปทํ
6. Cīvarasibbanasikkhāpadaṃ
๑๗๕. ฉเฎฺฐ อุทายีติ เอตฺถ มหาอุทายี, กาฬุทายี, ลาฬุทายีติ ตโย อุทายี โหนฺติฯ เตสุ ตติโยวาธิเปฺปโตติ อาห ‘‘ลาฬุทายี’’ติฯ ปภาเวน ฐาติ ปวตฺตตีติ ปโฎฺฐติ กเต ปฎิพโลว ลพฺภติฯ เตนาห ‘‘ปฎิพโล’’ติฯ นิปุโณติ กุสโลฯ ‘‘ปฎิภาเนน กตจิตฺต’’นฺติอิมินา ‘‘ปฎิภานจิตฺต’’นฺติ ปทสฺส มเชฺฌ ปทโลปํ ทเสฺสติฯ โสติ ลาฬุทายี อกาสีติ สมฺพโนฺธฯ ตสฺสาติ จีวรสฺสฯ ‘‘ยถาสํหฎ’’นฺติ เอตฺถ เอวสโทฺท อชฺฌาหริตโพฺพติ อาห ‘‘ยถาสํหฎเมวา’’ติฯ
175. Chaṭṭhe udāyīti ettha mahāudāyī, kāḷudāyī, lāḷudāyīti tayo udāyī honti. Tesu tatiyovādhippetoti āha ‘‘lāḷudāyī’’ti. Pabhāvena ṭhāti pavattatīti paṭṭhoti kate paṭibalova labbhati. Tenāha ‘‘paṭibalo’’ti. Nipuṇoti kusalo. ‘‘Paṭibhānena katacitta’’ntiiminā ‘‘paṭibhānacitta’’nti padassa majjhe padalopaṃ dasseti. Soti lāḷudāyī akāsīti sambandho. Tassāti cīvarassa. ‘‘Yathāsaṃhaṭa’’nti ettha evasaddo ajjhāharitabboti āha ‘‘yathāsaṃhaṭamevā’’ti.
๑๗๖. ยํ จีวรํ นิวาสิตุํ วา ปารุปิตุํ วา สกฺกา โหติ, ตํ จีวรํ นามาติ โยชนาฯ เอวํ หีติ เอวเมวฯ ‘‘ทุกฺกฎ’’นฺติอิมินา ‘‘สยํ สิพฺพติ, อาปตฺติ ปาจิตฺติยสฺสา’’ติ เอตฺถ อนฺตราปตฺติํ ทเสฺสติฯ อาราติ สูจิฯ สา หิ อรติ นิสฺสงฺควเสน คจฺฉติ ปวิสตีติ ‘‘อารา’’ติ วุจฺจติ, ตสฺสา ปโถ คมนํ อาราปโถ, ตสฺมิํ, อาราปถสฺส นีหรณาวสานตฺตา ‘‘นีหรเณ’’ติ วุตฺตํฯ สตกฺขตฺตุมฺปีติ อเนกกฺขตฺตุมฺปิฯ อาณโตฺตติ อาณาปียตีติ อาณโตฺตฯ ‘‘อาณาปิโต’’ติ วตฺตเพฺพ ณาเปสทฺทสฺส โลปํ, อิการสฺส จ อการํ กตฺวา, ‘‘อาทเตฺต’’ติ อาขฺยาตปเท เตวิภตฺติยา วิย ตปจฺจยสฺส จ ทฺวิภาวํ กตฺวา เอวํ วุตฺตํฯ เตนาห ‘‘สกิํ จีวรํ สิพฺพาติ วุโตฺต’’ติฯ อถ ปนาติ ตโต อญฺญถา ปนฯ อาณตฺตสฺสาติ อาณาปิตสฺสฯ สมฺพหุลานิปิ ปาจิตฺติยานิ โหนฺตีติ สมฺพโนฺธฯ
176. Yaṃ cīvaraṃ nivāsituṃ vā pārupituṃ vā sakkā hoti, taṃ cīvaraṃ nāmāti yojanā. Evaṃ hīti evameva. ‘‘Dukkaṭa’’ntiiminā ‘‘sayaṃ sibbati, āpatti pācittiyassā’’ti ettha antarāpattiṃ dasseti. Ārāti sūci. Sā hi arati nissaṅgavasena gacchati pavisatīti ‘‘ārā’’ti vuccati, tassā patho gamanaṃ ārāpatho, tasmiṃ, ārāpathassa nīharaṇāvasānattā ‘‘nīharaṇe’’ti vuttaṃ. Satakkhattumpīti anekakkhattumpi. Āṇattoti āṇāpīyatīti āṇatto. ‘‘Āṇāpito’’ti vattabbe ṇāpesaddassa lopaṃ, ikārassa ca akāraṃ katvā, ‘‘ādatte’’ti ākhyātapade tevibhattiyā viya tapaccayassa ca dvibhāvaṃ katvā evaṃ vuttaṃ. Tenāha ‘‘sakiṃ cīvaraṃ sibbāti vutto’’ti. Atha panāti tato aññathā pana. Āṇattassāti āṇāpitassa. Sambahulānipi pācittiyāni hontīti sambandho.
เยปิ นิสฺสิตกา สิพฺพนฺตีติ โยชนา, อาจริยุปชฺฌาเยสุ สิพฺพเนฺตสูติ สมฺพโนฺธฯ เตสนฺติ อาจริยุปชฺฌายานํฯ เตสมฺปีติ นิสฺสิตกานมฺปิฯ ญาติกานํ ภิกฺขุนีนํ จีวรนฺติ สมฺพโนฺธฯ ‘‘อเนฺตวาสิเกหี’’ติปทํ ‘‘สิพฺพาเปนฺตี’’ติปเท การิตกมฺมํฯ ตตฺราปีติ อาจริยุปชฺฌาเยหิ สิพฺพาปเนปิฯ ‘‘อเนฺตวาสิเก’’ติปทํ ‘‘วเญฺจตฺวา’’ติปเท สุทฺธกมฺมํ, ‘‘สิพฺพาเปนฺตี’’ติปเท การิตกมฺมํฯ อิตเรสนฺติ อาจริยุปชฺฌายานนฺติฯ ฉฎฺฐํฯ
Yepi nissitakā sibbantīti yojanā, ācariyupajjhāyesu sibbantesūti sambandho. Tesanti ācariyupajjhāyānaṃ. Tesampīti nissitakānampi. Ñātikānaṃ bhikkhunīnaṃ cīvaranti sambandho. ‘‘Antevāsikehī’’tipadaṃ ‘‘sibbāpentī’’tipade kāritakammaṃ. Tatrāpīti ācariyupajjhāyehi sibbāpanepi. ‘‘Antevāsike’’tipadaṃ ‘‘vañcetvā’’tipade suddhakammaṃ, ‘‘sibbāpentī’’tipade kāritakammaṃ. Itaresanti ācariyupajjhāyānanti. Chaṭṭhaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๓. โอวาทวโคฺค • 3. Ovādavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๖. จีวรสิพฺพนสิกฺขาปทวณฺณนา • 6. Cīvarasibbanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๖. จีวรสิพฺพาปนสิกฺขาปทวณฺณนา • 6. Cīvarasibbāpanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๖. จีวรสิพฺพนสิกฺขาปทวณฺณนา • 6. Cīvarasibbanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๖. จีวรสิพฺพนสิกฺขาปทวณฺณนา • 6. Cīvarasibbanasikkhāpadavaṇṇanā
