| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. சீவரஸிப்³ப³னஸிக்கா²பத³வண்ணனா
6. Cīvarasibbanasikkhāpadavaṇṇanā
175. ச²ட்ட²ஸிக்கா²பதே³ – உதா³யீதி லாளுதா³யீ. பட்டோ²தி படிப³லோ, நிபுணோ சேவ ஸமத்தோ² சாதி வுத்தங் ஹோதி. அஞ்ஞதரா பி⁴க்கு²னீதி தஸ்ஸேவ புராணது³தியிகா. படிபா⁴னசித்தந்தி அத்தனோ படிபா⁴னேன கதசித்தங், ஸோ கிர சீவரங் ரஜித்வா தஸ்ஸ மஜ்ஜே² நானாவண்ணேஹி விப்பகதமேது²னங் இத்தி²புரிஸரூபமகாஸி. தேன வுத்தங் – ‘‘மஜ்ஜே² படிபா⁴னசித்தங் வுட்டா²பெத்வா’’தி. யதா²ஸங்ஹடந்தி யதா²ஸங்ஹரிதமேவ.
175. Chaṭṭhasikkhāpade – udāyīti lāḷudāyī. Paṭṭhoti paṭibalo, nipuṇo ceva samattho cāti vuttaṃ hoti. Aññatarā bhikkhunīti tasseva purāṇadutiyikā. Paṭibhānacittanti attano paṭibhānena katacittaṃ, so kira cīvaraṃ rajitvā tassa majjhe nānāvaṇṇehi vippakatamethunaṃ itthipurisarūpamakāsi. Tena vuttaṃ – ‘‘majjhe paṭibhānacittaṃ vuṭṭhāpetvā’’ti. Yathāsaṃhaṭanti yathāsaṃharitameva.
176. சீவரந்தி யங் நிவாஸிதுங் வா பாருபிதுங் வா ஸக்கா ஹோதி, ஏவஞ்ஹி மஹாபச்சரியாதீ³ஸு வுத்தங். ஸயங் ஸிப்³ப³தீதி எத்த² ஸிப்³பி³ஸ்ஸாமீதி விசாரெந்தஸ்ஸாபி சி²ந்த³ந்தஸ்ஸாபி து³க்கடங், ஸிப்³ப³ந்தஸ்ஸ பன பாசித்தியங். ஆராபதே² ஆராபதே²தி ஸூசிங் பவேஸெத்வா பவேஸெத்வா நீஹரணே. ஸசே பன ஸகலஸூசிங் அனீஹரந்தோ தீ³க⁴ஸுத்தப்பவேஸனத்த²ங் ஸதக்க²த்தும்பி விஜ்ஜி²த்வா நீஹரதி, ஏகமேவ பாசித்தியங். ஸகிங் ஆணத்தோதி ஸகிங் ‘‘சீவரங் ஸிப்³பா³’’தி வுத்தோ. ப³ஹுகம்பி ஸிப்³ப³தீதி ஸசேபி ஸப்³ப³ங் ஸூசிகம்மங் பரியோஸாபெத்வா சீவரங் நிட்டா²பேதி, ஏகமேவ பாசித்தியங். அத² பன ‘‘இமஸ்மிங் சீவரே கத்தப்³ப³கம்மங் தவ பா⁴ரோ’’தி வுத்தோ கரோதி, ஆணத்தஸ்ஸ ஆராபதே² ஆராபதே² ஏகமேகங் பாசித்தியங், ஆணாபகஸ்ஸ ஏகவாசாய ஸம்ப³ஹுலானிபி. புனப்புனங் ஆணத்தியங் பன வத்தப்³ப³மேவ நத்தி².
176.Cīvaranti yaṃ nivāsituṃ vā pārupituṃ vā sakkā hoti, evañhi mahāpaccariyādīsu vuttaṃ. Sayaṃ sibbatīti ettha sibbissāmīti vicārentassāpi chindantassāpi dukkaṭaṃ, sibbantassa pana pācittiyaṃ. Ārāpathe ārāpatheti sūciṃ pavesetvā pavesetvā nīharaṇe. Sace pana sakalasūciṃ anīharanto dīghasuttappavesanatthaṃ satakkhattumpi vijjhitvā nīharati, ekameva pācittiyaṃ. Sakiṃ āṇattoti sakiṃ ‘‘cīvaraṃ sibbā’’ti vutto. Bahukampi sibbatīti sacepi sabbaṃ sūcikammaṃ pariyosāpetvā cīvaraṃ niṭṭhāpeti, ekameva pācittiyaṃ. Atha pana ‘‘imasmiṃ cīvare kattabbakammaṃ tava bhāro’’ti vutto karoti, āṇattassa ārāpathe ārāpathe ekamekaṃ pācittiyaṃ, āṇāpakassa ekavācāya sambahulānipi. Punappunaṃ āṇattiyaṃ pana vattabbameva natthi.
யேபி ஸசே ஆசரியுபஜ்ஜா²யேஸு அத்தனோ ஞாதிகானங் சீவரங் ஸிப்³ப³ந்தேஸு தேஸங் நிஸ்ஸிதகா ‘‘ஆசரியுபஜ்ஜா²யவத்தங் வா கதி²னவத்தங் வா கரோமா’’தி ஸிப்³ப³ந்தி, தேஸம்பி ஆராபத²க³ணனாய ஆபத்தியோ. ஆசரியுபஜ்ஜா²யா அத்தனோ ஞாதிகானங் சீவரங் அந்தேவாஸிகேஹி ஸிப்³பா³பெந்தி, ஆசரியுபஜ்ஜா²யானங் து³க்கடங், அந்தேவாஸிகானங் பாசித்தியங். அந்தேவாஸிகா அத்தனோ ஞாதிகானங் ஆசரியுபஜ்ஜா²யேஹி ஸிப்³பா³பெந்தி, தத்ராபி ஏஸேவ நயோ. அந்தேவாஸிகானம்பி ஆசரியுபஜ்ஜா²யானம்பி ஞாதிகாய சீவரங் ஹோதி, ஆசரியுபஜ்ஜா²யா பன அந்தேவாஸிகே வஞ்செத்வா ஸிப்³பா³பெந்தி, உபி⁴ன்னம்பி து³க்கடங். கஸ்மா? அந்தேவாஸிகானங் அஞ்ஞாதிகஸஞ்ஞாய ஸிப்³பி³தத்தா , இதரேஸங் அகப்பியே நியோஜிதத்தா. தஸ்மா ‘‘இத³ங் தே மாது சீவரங், இத³ங் ப⁴கி³னியா’’தி ஆசிக்கி²த்வா ஸிப்³பா³பேதப்³ப³ங்.
Yepi sace ācariyupajjhāyesu attano ñātikānaṃ cīvaraṃ sibbantesu tesaṃ nissitakā ‘‘ācariyupajjhāyavattaṃ vā kathinavattaṃ vā karomā’’ti sibbanti, tesampi ārāpathagaṇanāya āpattiyo. Ācariyupajjhāyā attano ñātikānaṃ cīvaraṃ antevāsikehi sibbāpenti, ācariyupajjhāyānaṃ dukkaṭaṃ, antevāsikānaṃ pācittiyaṃ. Antevāsikā attano ñātikānaṃ ācariyupajjhāyehi sibbāpenti, tatrāpi eseva nayo. Antevāsikānampi ācariyupajjhāyānampi ñātikāya cīvaraṃ hoti, ācariyupajjhāyā pana antevāsike vañcetvā sibbāpenti, ubhinnampi dukkaṭaṃ. Kasmā? Antevāsikānaṃ aññātikasaññāya sibbitattā , itaresaṃ akappiye niyojitattā. Tasmā ‘‘idaṃ te mātu cīvaraṃ, idaṃ bhaginiyā’’ti ācikkhitvā sibbāpetabbaṃ.
179. அஞ்ஞங் பரிக்கா²ரந்தி யங்கிஞ்சி உபாஹனத்த²விகாதி³ங். ஸேஸங் உத்தானமேவ. ச²ஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
179.Aññaṃparikkhāranti yaṃkiñci upāhanatthavikādiṃ. Sesaṃ uttānameva. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
சீவரஸிப்³ப³னஸிக்கா²பத³ங் ச²ட்ட²ங்.
Cīvarasibbanasikkhāpadaṃ chaṭṭhaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ஓவாத³வக்³கோ³ • 3. Ovādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. சீவரஸிப்³பா³பனஸிக்கா²பத³வண்ணனா • 6. Cīvarasibbāpanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. சீவரஸிப்³ப³னஸிக்கா²பத³வண்ணனா • 6. Cīvarasibbanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. சீவரஸிப்³ப³னஸிக்கா²பத³வண்ணனா • 6. Cīvarasibbanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. சீவரஸிப்³ப³னஸிக்கா²பத³ங் • 6. Cīvarasibbanasikkhāpadaṃ
