| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៦. ចីវរសិព្ពនសិក្ខាបទវណ្ណនា
6. Cīvarasibbanasikkhāpadavaṇṇanā
សូចិំ បវេសេត្វា បវេសេត្វា នីហរណេតិ អារាបថេ អារាបថេ បាចិត្តិយំ។ ‘‘សិព្ពិស្សាមី’’តិ បន វិចារេន្តស្ស, ឆិន្ទន្តស្សាបិ ទុក្កដំ។ សតក្ខត្តុម្បិ វិជ្ឈិត្វា សកិំ នីហរន្តស្សាតិ សកលសូចិំ អនីហរន្តោ ទីឃសុត្តប្បវេសនត្ថំ សតក្ខត្តុម្បិ វិជ្ឈិត្វា សកិំ នីហរន្តស្ស។ ‘‘សិព្ពា’’តិ វុត្តោតិ សកិំ ‘‘ចីវរំ សិព្ពា’’តិ វុត្តោ។ និដ្ឋាបេតីតិ សព្ពំ សូចិកម្មំ បរិយោសាបេតិ។ តស្ស អារាបថេ អារាបថេ បាចិត្តិយន្តិ អាណត្តស្ស សូចិំ បវេសេត្វា បវេសេត្វា នីហរណេ ឯកមេកំ បាចិត្តិយំ។
Sūciṃ pavesetvā pavesetvā nīharaṇeti ārāpathe ārāpathe pācittiyaṃ. ‘‘Sibbissāmī’’ti pana vicārentassa, chindantassāpi dukkaṭaṃ. Satakkhattumpi vijjhitvā sakiṃ nīharantassāti sakalasūciṃ anīharanto dīghasuttappavesanatthaṃ satakkhattumpi vijjhitvā sakiṃ nīharantassa. ‘‘Sibbā’’ti vuttoti sakiṃ ‘‘cīvaraṃ sibbā’’ti vutto. Niṭṭhāpetīti sabbaṃ sūcikammaṃ pariyosāpeti. Tassa ārāpathe ārāpathe pācittiyanti āṇattassa sūciṃ pavesetvā pavesetvā nīharaṇe ekamekaṃ pācittiyaṃ.
ឧទាយិត្ថេរន្តិ លាឡុទាយិត្ថេរំ។ វុត្តលក្ខណំ សិព្ពនំ វា សិព្ពាបនំ វាតិ ‘‘សូចិំ បវេសេត្វា’’តិអាទិនា វុត្តលក្ខណំ សិព្ពនំ វា សិព្ពាបនំ វា។
Udāyittheranti lāḷudāyittheraṃ. Vuttalakkhaṇaṃ sibbanaṃ vā sibbāpanaṃ vāti ‘‘sūciṃ pavesetvā’’tiādinā vuttalakkhaṇaṃ sibbanaṃ vā sibbāpanaṃ vā.
ចីវរសិព្ពនសិក្ខាបទវណ្ណនា និដ្ឋិតា។
Cīvarasibbanasikkhāpadavaṇṇanā niṭṭhitā.
