| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā |
೬. ಚೀವರಸಿಬ್ಬನಸಿಕ್ಖಾಪದವಣ್ಣನಾ
6. Cīvarasibbanasikkhāpadavaṇṇanā
೧೭೫. ಛಟ್ಠಸಿಕ್ಖಾಪದೇ – ಉದಾಯೀತಿ ಲಾಳುದಾಯೀ। ಪಟ್ಠೋತಿ ಪಟಿಬಲೋ, ನಿಪುಣೋ ಚೇವ ಸಮತ್ಥೋ ಚಾತಿ ವುತ್ತಂ ಹೋತಿ। ಅಞ್ಞತರಾ ಭಿಕ್ಖುನೀತಿ ತಸ್ಸೇವ ಪುರಾಣದುತಿಯಿಕಾ। ಪಟಿಭಾನಚಿತ್ತನ್ತಿ ಅತ್ತನೋ ಪಟಿಭಾನೇನ ಕತಚಿತ್ತಂ, ಸೋ ಕಿರ ಚೀವರಂ ರಜಿತ್ವಾ ತಸ್ಸ ಮಜ್ಝೇ ನಾನಾವಣ್ಣೇಹಿ ವಿಪ್ಪಕತಮೇಥುನಂ ಇತ್ಥಿಪುರಿಸರೂಪಮಕಾಸಿ। ತೇನ ವುತ್ತಂ – ‘‘ಮಜ್ಝೇ ಪಟಿಭಾನಚಿತ್ತಂ ವುಟ್ಠಾಪೇತ್ವಾ’’ತಿ। ಯಥಾಸಂಹಟನ್ತಿ ಯಥಾಸಂಹರಿತಮೇವ।
175. Chaṭṭhasikkhāpade – udāyīti lāḷudāyī. Paṭṭhoti paṭibalo, nipuṇo ceva samattho cāti vuttaṃ hoti. Aññatarā bhikkhunīti tasseva purāṇadutiyikā. Paṭibhānacittanti attano paṭibhānena katacittaṃ, so kira cīvaraṃ rajitvā tassa majjhe nānāvaṇṇehi vippakatamethunaṃ itthipurisarūpamakāsi. Tena vuttaṃ – ‘‘majjhe paṭibhānacittaṃ vuṭṭhāpetvā’’ti. Yathāsaṃhaṭanti yathāsaṃharitameva.
೧೭೬. ಚೀವರನ್ತಿ ಯಂ ನಿವಾಸಿತುಂ ವಾ ಪಾರುಪಿತುಂ ವಾ ಸಕ್ಕಾ ಹೋತಿ, ಏವಞ್ಹಿ ಮಹಾಪಚ್ಚರಿಯಾದೀಸು ವುತ್ತಂ। ಸಯಂ ಸಿಬ್ಬತೀತಿ ಏತ್ಥ ಸಿಬ್ಬಿಸ್ಸಾಮೀತಿ ವಿಚಾರೇನ್ತಸ್ಸಾಪಿ ಛಿನ್ದನ್ತಸ್ಸಾಪಿ ದುಕ್ಕಟಂ, ಸಿಬ್ಬನ್ತಸ್ಸ ಪನ ಪಾಚಿತ್ತಿಯಂ। ಆರಾಪಥೇ ಆರಾಪಥೇತಿ ಸೂಚಿಂ ಪವೇಸೇತ್ವಾ ಪವೇಸೇತ್ವಾ ನೀಹರಣೇ। ಸಚೇ ಪನ ಸಕಲಸೂಚಿಂ ಅನೀಹರನ್ತೋ ದೀಘಸುತ್ತಪ್ಪವೇಸನತ್ಥಂ ಸತಕ್ಖತ್ತುಮ್ಪಿ ವಿಜ್ಝಿತ್ವಾ ನೀಹರತಿ, ಏಕಮೇವ ಪಾಚಿತ್ತಿಯಂ। ಸಕಿಂ ಆಣತ್ತೋತಿ ಸಕಿಂ ‘‘ಚೀವರಂ ಸಿಬ್ಬಾ’’ತಿ ವುತ್ತೋ। ಬಹುಕಮ್ಪಿ ಸಿಬ್ಬತೀತಿ ಸಚೇಪಿ ಸಬ್ಬಂ ಸೂಚಿಕಮ್ಮಂ ಪರಿಯೋಸಾಪೇತ್ವಾ ಚೀವರಂ ನಿಟ್ಠಾಪೇತಿ, ಏಕಮೇವ ಪಾಚಿತ್ತಿಯಂ। ಅಥ ಪನ ‘‘ಇಮಸ್ಮಿಂ ಚೀವರೇ ಕತ್ತಬ್ಬಕಮ್ಮಂ ತವ ಭಾರೋ’’ತಿ ವುತ್ತೋ ಕರೋತಿ, ಆಣತ್ತಸ್ಸ ಆರಾಪಥೇ ಆರಾಪಥೇ ಏಕಮೇಕಂ ಪಾಚಿತ್ತಿಯಂ, ಆಣಾಪಕಸ್ಸ ಏಕವಾಚಾಯ ಸಮ್ಬಹುಲಾನಿಪಿ। ಪುನಪ್ಪುನಂ ಆಣತ್ತಿಯಂ ಪನ ವತ್ತಬ್ಬಮೇವ ನತ್ಥಿ।
176.Cīvaranti yaṃ nivāsituṃ vā pārupituṃ vā sakkā hoti, evañhi mahāpaccariyādīsu vuttaṃ. Sayaṃ sibbatīti ettha sibbissāmīti vicārentassāpi chindantassāpi dukkaṭaṃ, sibbantassa pana pācittiyaṃ. Ārāpathe ārāpatheti sūciṃ pavesetvā pavesetvā nīharaṇe. Sace pana sakalasūciṃ anīharanto dīghasuttappavesanatthaṃ satakkhattumpi vijjhitvā nīharati, ekameva pācittiyaṃ. Sakiṃ āṇattoti sakiṃ ‘‘cīvaraṃ sibbā’’ti vutto. Bahukampi sibbatīti sacepi sabbaṃ sūcikammaṃ pariyosāpetvā cīvaraṃ niṭṭhāpeti, ekameva pācittiyaṃ. Atha pana ‘‘imasmiṃ cīvare kattabbakammaṃ tava bhāro’’ti vutto karoti, āṇattassa ārāpathe ārāpathe ekamekaṃ pācittiyaṃ, āṇāpakassa ekavācāya sambahulānipi. Punappunaṃ āṇattiyaṃ pana vattabbameva natthi.
ಯೇಪಿ ಸಚೇ ಆಚರಿಯುಪಜ್ಝಾಯೇಸು ಅತ್ತನೋ ಞಾತಿಕಾನಂ ಚೀವರಂ ಸಿಬ್ಬನ್ತೇಸು ತೇಸಂ ನಿಸ್ಸಿತಕಾ ‘‘ಆಚರಿಯುಪಜ್ಝಾಯವತ್ತಂ ವಾ ಕಥಿನವತ್ತಂ ವಾ ಕರೋಮಾ’’ತಿ ಸಿಬ್ಬನ್ತಿ, ತೇಸಮ್ಪಿ ಆರಾಪಥಗಣನಾಯ ಆಪತ್ತಿಯೋ। ಆಚರಿಯುಪಜ್ಝಾಯಾ ಅತ್ತನೋ ಞಾತಿಕಾನಂ ಚೀವರಂ ಅನ್ತೇವಾಸಿಕೇಹಿ ಸಿಬ್ಬಾಪೇನ್ತಿ, ಆಚರಿಯುಪಜ್ಝಾಯಾನಂ ದುಕ್ಕಟಂ, ಅನ್ತೇವಾಸಿಕಾನಂ ಪಾಚಿತ್ತಿಯಂ। ಅನ್ತೇವಾಸಿಕಾ ಅತ್ತನೋ ಞಾತಿಕಾನಂ ಆಚರಿಯುಪಜ್ಝಾಯೇಹಿ ಸಿಬ್ಬಾಪೇನ್ತಿ, ತತ್ರಾಪಿ ಏಸೇವ ನಯೋ। ಅನ್ತೇವಾಸಿಕಾನಮ್ಪಿ ಆಚರಿಯುಪಜ್ಝಾಯಾನಮ್ಪಿ ಞಾತಿಕಾಯ ಚೀವರಂ ಹೋತಿ, ಆಚರಿಯುಪಜ್ಝಾಯಾ ಪನ ಅನ್ತೇವಾಸಿಕೇ ವಞ್ಚೇತ್ವಾ ಸಿಬ್ಬಾಪೇನ್ತಿ, ಉಭಿನ್ನಮ್ಪಿ ದುಕ್ಕಟಂ। ಕಸ್ಮಾ? ಅನ್ತೇವಾಸಿಕಾನಂ ಅಞ್ಞಾತಿಕಸಞ್ಞಾಯ ಸಿಬ್ಬಿತತ್ತಾ , ಇತರೇಸಂ ಅಕಪ್ಪಿಯೇ ನಿಯೋಜಿತತ್ತಾ। ತಸ್ಮಾ ‘‘ಇದಂ ತೇ ಮಾತು ಚೀವರಂ, ಇದಂ ಭಗಿನಿಯಾ’’ತಿ ಆಚಿಕ್ಖಿತ್ವಾ ಸಿಬ್ಬಾಪೇತಬ್ಬಂ।
Yepi sace ācariyupajjhāyesu attano ñātikānaṃ cīvaraṃ sibbantesu tesaṃ nissitakā ‘‘ācariyupajjhāyavattaṃ vā kathinavattaṃ vā karomā’’ti sibbanti, tesampi ārāpathagaṇanāya āpattiyo. Ācariyupajjhāyā attano ñātikānaṃ cīvaraṃ antevāsikehi sibbāpenti, ācariyupajjhāyānaṃ dukkaṭaṃ, antevāsikānaṃ pācittiyaṃ. Antevāsikā attano ñātikānaṃ ācariyupajjhāyehi sibbāpenti, tatrāpi eseva nayo. Antevāsikānampi ācariyupajjhāyānampi ñātikāya cīvaraṃ hoti, ācariyupajjhāyā pana antevāsike vañcetvā sibbāpenti, ubhinnampi dukkaṭaṃ. Kasmā? Antevāsikānaṃ aññātikasaññāya sibbitattā , itaresaṃ akappiye niyojitattā. Tasmā ‘‘idaṃ te mātu cīvaraṃ, idaṃ bhaginiyā’’ti ācikkhitvā sibbāpetabbaṃ.
೧೭೯. ಅಞ್ಞಂ ಪರಿಕ್ಖಾರನ್ತಿ ಯಂಕಿಞ್ಚಿ ಉಪಾಹನತ್ಥವಿಕಾದಿಂ। ಸೇಸಂ ಉತ್ತಾನಮೇವ। ಛಸಮುಟ್ಠಾನಂ – ಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ।
179.Aññaṃparikkhāranti yaṃkiñci upāhanatthavikādiṃ. Sesaṃ uttānameva. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ಚೀವರಸಿಬ್ಬನಸಿಕ್ಖಾಪದಂ ಛಟ್ಠಂ।
Cīvarasibbanasikkhāpadaṃ chaṭṭhaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ಓವಾದವಗ್ಗೋ • 3. Ovādavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೬. ಚೀವರಸಿಬ್ಬಾಪನಸಿಕ್ಖಾಪದವಣ್ಣನಾ • 6. Cīvarasibbāpanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೬. ಚೀವರಸಿಬ್ಬನಸಿಕ್ಖಾಪದವಣ್ಣನಾ • 6. Cīvarasibbanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೬. ಚೀವರಸಿಬ್ಬನಸಿಕ್ಖಾಪದವಣ್ಣನಾ • 6. Cīvarasibbanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೬. ಚೀವರಸಿಬ್ಬನಸಿಕ್ಖಾಪದಂ • 6. Cīvarasibbanasikkhāpadaṃ
