| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
6. චීවරසිබ්‌බාපනසික්‌ඛාපදවණ්‌ණනා
6. Cīvarasibbāpanasikkhāpadavaṇṇanā
175. ඡට්‌ඨෙ සචෙ සා භික්‌ඛුනී තං චීවරං ආදිතොව පාරුපෙය්‍ය, අඤ්‌ඤා භික්‌ඛුනියො දිස්‌වා උජ්‌ඣාපෙය්‍යුං, තතො මහාජනො පස්‌සිතුං න ලභතීති මඤ්‌ඤමානො ‘‘යථාසංහටං හරිත්‌වා නික්‌ඛිපිත්‌වා’’තිආදිමාහ.
175. Chaṭṭhe sace sā bhikkhunī taṃ cīvaraṃ āditova pārupeyya, aññā bhikkhuniyo disvā ujjhāpeyyuṃ, tato mahājano passituṃ na labhatīti maññamāno ‘‘yathāsaṃhaṭaṃ haritvā nikkhipitvā’’tiādimāha.
176. නීහරතීති සකිං නීහරති. යෙපි තෙසං නිස්‌සිතකාති සම්‌බන්‌ධො. කථිනවත්‌තන්‌ති ‘‘සබ්‍රහ්‌මචාරීනං කාතුං වට්‌ටතී’’ති ඉතිකත්‌තබ්‌බතාවසෙන සූචිකම්‌මකරණං. ආචරියුපජ්‌ඣායානං දුක්‌කටන්‌ති අකප්‌පියසමාදානවසෙන දුක්‌කටං. වඤ්‌චෙත්‌වාති ‘‘තව ඤාතිකායා’’ති අවත්‌වා ‘‘එකිස්‌සා භික්‌ඛුනියා’’ති එත්‌තකමෙව වත්‌වා. ‘‘එකිස්‌සා භික්‌ඛුනියා’’ති සුත්‌වා තෙ අඤ්‌ඤාතිකසඤ්‌ඤිනො භවෙය්‍යුන්‌ති ආහ ‘‘අකප්‌පියෙ නියොජිතත්‌තා’’ති . ‘‘ඉදං තෙ මාතු චීවර’’න්‌තිආදීනි අවත්‌වාපි ‘‘ඉදං චීවරං සිබ්‌බෙහී’’ති සුද්‌ධචිත්‌තෙන සිබ්‌බාපෙන්‌තස්‌සපි අනාපත්‌ති.
176.Nīharatīti sakiṃ nīharati. Yepi tesaṃ nissitakāti sambandho. Kathinavattanti ‘‘sabrahmacārīnaṃ kātuṃ vaṭṭatī’’ti itikattabbatāvasena sūcikammakaraṇaṃ. Ācariyupajjhāyānaṃ dukkaṭanti akappiyasamādānavasena dukkaṭaṃ. Vañcetvāti ‘‘tava ñātikāyā’’ti avatvā ‘‘ekissā bhikkhuniyā’’ti ettakameva vatvā. ‘‘Ekissā bhikkhuniyā’’ti sutvā te aññātikasaññino bhaveyyunti āha ‘‘akappiye niyojitattā’’ti . ‘‘Idaṃ te mātu cīvara’’ntiādīni avatvāpi ‘‘idaṃ cīvaraṃ sibbehī’’ti suddhacittena sibbāpentassapi anāpatti.
179. උපාහනත්‌ථවිකාදින්‌ති ආදි-සද්‌දෙන යං චීවරං නිවාසෙතුං වා පාරුපිතුං වා න සක්‌කා හොති, තම්‌පි සඞ්‌ගණ්‌හාති. සෙසමෙත්‌ථ උත්‌තානමෙව. අඤ්‌ඤාතිකාය භික්‌ඛුනියා සන්‌තකතා, නිවාසනපාරුපනූපගතා, වුත්‌තනයෙන සිබ්‌බනං වා සිබ්‌බාපනං වාති ඉමානි පනෙත්‌ථ තීණි අඞ්‌ගානි.
179.Upāhanatthavikādinti ādi-saddena yaṃ cīvaraṃ nivāsetuṃ vā pārupituṃ vā na sakkā hoti, tampi saṅgaṇhāti. Sesamettha uttānameva. Aññātikāya bhikkhuniyā santakatā, nivāsanapārupanūpagatā, vuttanayena sibbanaṃ vā sibbāpanaṃ vāti imāni panettha tīṇi aṅgāni.
චීවරසිබ්‌බාපනසික්‌ඛාපදවණ්‌ණනා නිට්‌ඨිතා.
Cīvarasibbāpanasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 3. ඔවාදවග්‌ගො • 3. Ovādavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. චීවරසිබ්‌බනසික්‌ඛාපදවණ්‌ණනා • 6. Cīvarasibbanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. චීවරසිබ්‌බනසික්‌ඛාපදවණ්‌ණනා • 6. Cīvarasibbanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. චීවරසිබ්‌බනසික්‌ඛාපදවණ්‌ණනා • 6. Cīvarasibbanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. චීවරසිබ්‌බනසික්‌ඛාපදං • 6. Cīvarasibbanasikkhāpadaṃ
