| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
11. жийварасуд̇д̇аван̣н̣анаа
11. Cīvarasuttavaṇṇanā
154. рааж̇аг̇ахасса д̣̇агкин̣абхааг̇з г̇ири д̣̇агкин̣ааг̇ири н̣а-гаарз а-гаарасса д̣̇ийгхам̣ гад̇ваа, д̇асса д̣̇агкин̣абхааг̇з ж̇анабад̣̇оби ‘‘д̣̇агкин̣ааг̇ирий’’д̇и вужжад̇и, ‘‘г̇ирид̇о д̣̇агкин̣абхааг̇о’’д̇и гад̇ваа. згад̣̇ивасзнаад̇и згзна д̣̇ивасзна уббаб̣б̣ааж̇зсум̣ д̇зсам̣ сад̣̇д̇хаабаб̣б̣аж̇ид̇аабхаавад̇о.
154. Rājagahassa dakkhiṇabhāge giri dakkhiṇāgiri ṇa-kāre a-kārassa dīghaṃ katvā, tassa dakkhiṇabhāge janapadopi ‘‘dakkhiṇāgirī’’ti vuccati, ‘‘girito dakkhiṇabhāgo’’ti katvā. Ekadivasenāti ekena divasena uppabbājesuṃ tesaṃ saddhāpabbajitābhāvato.
яад̇т̇а жад̇д̇ааро ваа уд̇д̇ари ваа бхигкуу агаббияаниманд̇анам̣ саад̣̇ияид̇ваа бан̃жаннам̣ бхож̇анаанам̣ ан̃н̃ад̇арам̣ бхож̇анам̣ згад̇о бадиг̇г̇ан̣хид̇ваа бхун̃ж̇анд̇и, зд̇ам̣ г̇ан̣абхож̇анам̣ наама, д̇ам̣ д̇ин̣н̣ам̣ бхигкуунам̣ бхун̃ж̇ид̇ум̣ ваддад̇ийд̇и ‘‘д̇игабхож̇анам̣ бан̃н̃ад̇д̇а’’нд̇и важанзна г̇ан̣абхож̇анам̣ бадигкид̇д̇анд̇и вуд̇д̇ам̣ ход̇и. д̇аяо ад̇т̇авасз бадижжа анун̃н̃аад̇ад̇д̇ааби ‘‘д̇игабхож̇ана’’нд̇и вад̣̇анд̇и.
Yattha cattāro vā uttari vā bhikkhū akappiyanimantanaṃ sādiyitvā pañcannaṃ bhojanānaṃ aññataraṃ bhojanaṃ ekato paṭiggaṇhitvā bhuñjanti, etaṃ gaṇabhojanaṃ nāma, taṃ tiṇṇaṃ bhikkhūnaṃ bhuñjituṃ vaṭṭatīti ‘‘tikabhojanaṃ paññatta’’nti vacanena gaṇabhojanaṃ paṭikkhittanti vuttaṃ hoti. Tayo atthavase paṭicca anuññātattāpi ‘‘tikabhojana’’nti vadanti.
‘‘д̣̇умман̇гуунам̣ ниг̇г̇ахо зва бзсалаанам̣ паасувихааро’’д̇и ид̣̇ам̣ згам̣ ан̇г̇ам̣. д̇знзвааха ‘‘д̣̇умман̇гуунам̣ ниг̇г̇ахзнзваа’’д̇иаад̣̇и. ‘‘яат̇аа д̣̇звад̣̇ад̇д̇о…бз… сан̇гхам̣ бхинд̣̇зяяу’’нд̇и иминаа гааран̣зна д̇игабхож̇анам̣ бан̃н̃ад̇д̇ам̣.
‘‘Dummaṅkūnaṃ niggaho eva pesalānaṃ phāsuvihāro’’ti idaṃ ekaṃ aṅgaṃ. Tenevāha ‘‘dummaṅkūnaṃ niggahenevā’’tiādi. ‘‘Yathā devadatto…pe… saṅghaṃ bhindeyyu’’nti iminā kāraṇena tikabhojanaṃ paññattaṃ.
ат̇а гин̃жарахийд̇и ат̇а гасмаа д̇вам̣ асамбаннаг̇ан̣ам̣ б̣анд̇хид̇ваа жарасийд̇и ад̇хиббааяо. асамбаннааяа барисааяа жааригаажаран̣ам̣ гулаануд̣̇д̣̇аяааяа на ход̇и, гулаанам̣ гхаад̇ид̇ад̇д̇аад̇и ад̇хиббааязна т̇зро ‘‘сассагхаад̇ам̣ ман̃н̃з жарасий’’д̇иаад̣̇имавожа.
Atha kiñcarahīti atha kasmā tvaṃ asampannagaṇaṃ bandhitvā carasīti adhippāyo. Asampannāya parisāya cārikācaraṇaṃ kulānuddayāya na hoti, kulānaṃ ghātitattāti adhippāyena thero ‘‘sassaghātaṃ maññe carasī’’tiādimavoca.
сод̇хзнд̇о д̇ассаа ад̇ивияа барисуд̣̇д̇хабхаавад̣̇ассанзна. уд̣̇д̣̇исид̇ум̣ на ж̇аанаами д̇ат̇аа жид̇д̇ассзва ануббаннабуб̣б̣ад̇д̇аа. гин̃жанам̣ гилзсавад̇т̇у. сан̇г̇ахзд̇аб̣б̣акзд̇д̇авад̇т̇у балиб̣од̇хо, аалаяо абзгкаа. огаасаабхаавад̇од̇и б̣ахугижжагаран̣ийяад̇ааяа гусалагирияааяа огаасаабхаавад̇о. саннибаад̇адтаанад̇од̇и сан̇гзд̇ам̣ гад̇ваа вияа гилзсараж̇аанам̣ д̇ад̇т̇а санниж̇жхабавад̇д̇анад̇о.
Sodhento tassā ativiya parisuddhabhāvadassanena. Uddisituṃ na jānāmi tathā cittasseva anuppannapubbattā. Kiñcanaṃ kilesavatthu. Saṅgahetabbakhettavatthu palibodho, ālayo apekkhā. Okāsābhāvatoti bahukiccakaraṇīyatāya kusalakiriyāya okāsābhāvato. Sannipātaṭṭhānatoti saṅketaṃ katvā viya kilesarajānaṃ tattha sannijjhapavattanato.
сигкад̇д̇аяаб̣рахмажарияанд̇и ад̇хисийласигкаад̣̇исигкад̇д̇аяасан̇г̇ахам̣ б̣рахмам̣ сздтам̣ жарияам̣. кан̣д̣аад̣̇ибхааваабаад̣̇анзна акан̣д̣ам̣ гад̇ваа. лагкан̣аважанан̃хзд̇ам̣. гин̃жи сигкзгад̣̇зсам̣ асзсзд̇ваа зганд̇знзва барибуурзд̇аб̣б̣ад̇ааяа зганд̇абарибун̣н̣ам̣. жид̇д̇уббаад̣̇амад̇д̇амби сам̣гилзсамалам̣ ануббаад̣̇зд̇ваа ажжанд̇амзва висуд̣̇д̇хам̣ гад̇ваа барихарид̇аб̣б̣ад̇ааяа зганд̇абарисуд̣̇д̇хам̣. д̇ад̇о зва сан̇кам̣ вияа ликид̇анд̇и сан̇каликид̇ам̣. д̇знааха ‘‘ликид̇асан̇касад̣̇иса’’нд̇и. д̣̇аатигааби д̇аг̇г̇ахан̣знзва г̇ахзд̇ваа ‘‘массу’’д̇взва вуд̇д̇ам̣, на зд̇т̇а гзвалам̣ массуязваад̇и ад̇т̇о. гасааязна рад̇д̇аани гаасааяаани.
Sikkhattayabrahmacariyanti adhisīlasikkhādisikkhattayasaṅgahaṃ brahmaṃ seṭṭhaṃ cariyaṃ. Khaṇḍādibhāvāpādanena akhaṇḍaṃ katvā. Lakkhaṇavacanañhetaṃ. Kiñci sikkhekadesaṃ asesetvā ekanteneva paripūretabbatāya ekantaparipuṇṇaṃ. Cittuppādamattampi saṃkilesamalaṃ anuppādetvā accantameva visuddhaṃ katvā pariharitabbatāya ekantaparisuddhaṃ. Tato eva saṅkhaṃ viya likhitanti saṅkhalikhitaṃ. Tenāha ‘‘likhitasaṅkhasadisa’’nti. Dāṭhikāpi taggahaṇeneva gahetvā ‘‘massu’’tveva vuttaṃ, na ettha kevalaṃ massuyevāti attho. Kasāyena rattāni kāsāyāni.
ван̇г̇асаадагод̇и ван̇г̇ад̣̇зсз уббаннасаадаго. зсаад̇и махаагассабад̇т̇зро. абхинийхаарад̇о бадтааяа бан̣ид̇хаанад̇о бабхуд̇и, аяам̣ ид̣̇аани вужжамаанаа. аг̇г̇асаавагад̣̇ваяам̣ убаад̣̇ааяа д̇ад̇ияад̇д̇аа ‘‘д̇ад̇ияасаавага’’нд̇и вуд̇д̇ам̣. адтасадтибхигкусад̇асахассанд̇и бхигкуунам̣ сад̇асахассан̃жзва садтисахассаани жа адта жа сахассаани.
Vaṅgasāṭakoti vaṅgadese uppannasāṭako. Esāti mahākassapatthero. Abhinīhārato paṭṭhāya paṇidhānato pabhuti, ayaṃ idāni vuccamānā. Aggasāvakadvayaṃ upādāya tatiyattā ‘‘tatiyasāvaka’’nti vuttaṃ. Aṭṭhasaṭṭhibhikkhusatasahassanti bhikkhūnaṃ satasahassañceva saṭṭhisahassāni ca aṭṭha ca sahassāni.
аяан̃жа аяан̃жа г̇ун̣од̇и сийлад̇о бадтааяа яаава аг̇г̇апалаа г̇ун̣од̇и гид̇д̇знд̇о махаасамуд̣̇д̣̇ам̣ буураяамаано вияа гат̇зси.
Ayañca ayañca guṇoti sīlato paṭṭhāya yāva aggaphalā guṇoti kittento mahāsamuddaṃ pūrayamāno viya kathesi.
голаахаланд̇и д̣̇звад̇аахи ниб̣б̣ад̇д̇ид̇о голаахало.
Kolāhalanti devatāhi nibbattito kolāhalo.
куд̣̇д̣̇агаад̣̇ивасзна бан̃жаван̣н̣аа. д̇аран̣ам̣ ваа ход̇у маран̣ам̣ ваад̇и махогхам̣ ог̇ааханд̇о бурисо вияа мажчзрасамуд̣̇д̣̇ам̣ уд̇д̇аранд̇о бажчааби…бз… баад̣̇амуулз табзси бхаг̇авад̇о д̇хаммад̣̇зсанааяа мажчзрабахаанасса гат̇ид̇ад̇д̇аа.
Khuddakādivasena pañcavaṇṇā. Taraṇaṃ vā hotu maraṇaṃ vāti mahoghaṃ ogāhanto puriso viya maccherasamuddaṃ uttaranto pacchāpi…pe… pādamūle ṭhapesi bhagavato dhammadesanāya maccherapahānassa kathitattā.
сад̇т̇у г̇ун̣аа гат̇ид̇аа наама хонд̇ийд̇и вуд̇д̇ам̣ ‘‘сад̇т̇у г̇ун̣з гат̇знд̇ассаа’’д̇и. д̇ад̇о бадтааяаад̇и д̇ад̣̇аа сад̇т̇у саммукаа д̇хаммассаванад̇о бадтааяа.
Satthu guṇā kathitā nāma hontīti vuttaṃ ‘‘satthu guṇe kathentassā’’ti. Tato paṭṭhāyāti tadā satthu sammukhā dhammassavanato paṭṭhāya.
д̇ат̇ааг̇ад̇аман̃жассаад̇и д̇ат̇ааг̇ад̇асса барибхог̇аман̃жасса. д̣̇аанам̣ д̣̇ад̇ваа б̣раахман̣асса бурохид̇адтаанз табзси. д̇аад̣̇исассзва сздтино д̇хийд̇аа худ̇ваа.
Tathāgatamañcassāti tathāgatassa paribhogamañcassa. Dānaṃ datvā brāhmaṇassa purohitaṭṭhāne ṭhapesi. Tādisasseva seṭṭhino dhītā hutvā.
ад̣̇иннавибаагассаад̇и буб̣б̣з гад̇уубажид̇асса саб̣б̣асо на д̣̇иннавибаагасса. д̇асса гаммассаад̇и д̇асса бажжзгаб̣уд̣̇д̇хасса бад̇д̇з бин̣д̣абаад̇ам̣ чинд̣̇ид̇ваа галалабууран̣агаммасса. д̇асмим̣язва ад̇д̇абхаавз сад̇д̇асу таанзсу д̣̇уг̇г̇анд̇хасарийрад̇ааяа бадинивад̇д̇ид̇аа. идтагабанд̇ийд̇и суван̣н̣идтагабанд̇и. гхаданидтагааяаад̇и д̇асса банд̇ияам̣ батамам̣ табид̇аидтагааяа сад̣̇д̇хим̣ гхадзд̇аб̣б̣аидтагааяа уунаа ход̇и. бхад̣̇д̣̇агз гаалзд̇и ийд̣̇исияаа идтагааяа ижчид̇агаалзязва ааг̇ад̇ааси. д̇зна б̣анд̇ханзнаад̇и д̇зна силзсасамб̣анд̇хзна.
Adinnavipākassāti pubbe katūpacitassa sabbaso na dinnavipākassa. Tassa kammassāti tassa paccekabuddhassa patte piṇḍapātaṃ chinditvā kalalapūraṇakammassa. Tasmiṃyeva attabhāve sattasu ṭhānesu duggandhasarīratāya paṭinivattitā. Iṭṭhakapantīti suvaṇṇiṭṭhakapanti. Ghaṭaniṭṭhakāyāti tassa pantiyaṃ paṭhamaṃ ṭhapitaiṭṭhakāya saddhiṃ ghaṭetabbaiṭṭhakāya ūnā hoti. Bhaddake kāleti īdisiyā iṭṭhakāya icchitakāleyeva āgatāsi. Tena bandhanenāti tena silesasambandhena.
оламб̣агаад̇и муд̇д̇ааман̣имаяаа оламб̣агаа. бун̃н̃анд̇и над̇т̇и но бун̃н̃ам̣ д̇ам̣, яам̣ нимид̇д̇ам̣ яам̣ гааран̣аа ид̇о сукумад̇арасса бадилаабхо сияаад̇и ад̇т̇о. бун̃н̃анияаамзнаад̇и бун̃н̃аанубхаавасид̣̇д̇хзна нияаамзна. со жа асса б̣аараан̣асираж̇ж̇ам̣ д̣̇аад̇ум̣ гад̇огаасо.
Olambakāti muttāmaṇimayā olambakā. Puññanti natthi no puññaṃ taṃ, yaṃ nimittaṃ yaṃ kāraṇā ito sukhumatarassa paṭilābho siyāti attho. Puññaniyāmenāti puññānubhāvasiddhena niyāmena. So ca assa bārāṇasirajjaṃ dātuṃ katokāso.
пуссарат̇анд̇и ман̇г̇аларат̇ам̣. ун̣хийсам̣ ваалаб̣ийж̇аний каг̇г̇о ман̣ибаад̣̇угаа сзд̇ажчад̇д̇анд̇и бан̃жавид̇хам̣ рааж̇агагуд̇хабхан̣д̣ам̣ . сзд̇ажчад̇д̇ам̣ висум̣ г̇ахид̇ам̣. д̣̇иб̣б̣авад̇т̇ам̣ саад̣̇ияид̇ум̣ бун̃н̃аанубхааважод̣̇ид̇о ‘‘нану д̇аад̇аа т̇уула’’нд̇иаад̣̇имааха.
Phussarathanti maṅgalarathaṃ. Uṇhīsaṃ vālabījanī khaggo maṇipādukā setacchattanti pañcavidhaṃ rājakakudhabhaṇḍaṃ. Setacchattaṃ visuṃ gahitaṃ. Dibbavatthaṃ sādiyituṃ puññānubhāvacodito ‘‘nanu tātā thūla’’ntiādimāha.
бан̃жа жан̇гаманасад̇аанийд̇и зд̇т̇а ид̇и-сад̣̇д̣̇зна аад̣̇иад̇т̇зна аг̇г̇исаалаад̣̇ийни баб̣б̣аж̇ид̇асааруббадтаанаани сан̇г̇ан̣хаад̇и.
Pañca caṅkamanasatānīti ettha iti-saddena ādiatthena aggisālādīni pabbajitasāruppaṭṭhānāni saṅgaṇhāti.
саад̇хугийл̣ид̇анд̇и арияаанам̣ бариниб̣б̣уд̇адтаанз гаад̇аб̣б̣асаггаарам̣ вад̣̇ад̇и.
Sādhukīḷitanti ariyānaṃ parinibbutaṭṭhāne kātabbasakkāraṃ vadati.
наббамаж̇ж̇и нирог̇аа аяяаад̇и бужчид̇аагаарад̣̇ассанам̣. бариниб̣б̣уд̇аа д̣̇зваад̇и д̣̇звий бадиважанам̣ ад̣̇ааси. бадияаад̣̇зд̇ваад̇и нияяаад̇зд̇ваа. саман̣агабаб̣б̣аж̇ж̇анд̇и самид̇абаабзхи ариязхи анудтаад̇аб̣б̣абаб̣б̣аж̇ж̇ам̣. со хи рааж̇аа бажжзгаб̣уд̣̇д̇хаанам̣ взсасса д̣̇идтад̇д̇аа ‘‘ид̣̇амзва бхад̣̇д̣̇ага’’нд̇и д̇аад̣̇исам̣язва лин̇г̇ам̣ г̇ан̣хи.
Nappamajji nirogā ayyāti pucchitākāradassanaṃ. Parinibbutā devāti devī paṭivacanaṃ adāsi. Paṭiyādetvāti niyyātetvā. Samaṇakapabbajjanti samitapāpehi ariyehi anuṭṭhātabbapabbajjaṃ. So hi rājā paccekabuddhānaṃ vesassa diṭṭhattā ‘‘idameva bhaddaka’’nti tādisaṃyeva liṅgaṃ gaṇhi.
д̇ад̇т̇зваад̇и б̣рахмалогзязва. вийсад̇имз вассз самбад̇д̇зд̇и аахарид̇ваа самб̣анд̇хо. б̣рахмалогад̇о ааг̇анд̇ваа ниб̣б̣ад̇д̇ад̇д̇аа б̣рахмажарияаад̇хигаарасса жирагаалам̣ сан̇г̇ахид̇ад̇д̇аа ‘‘зваруубам̣ гат̇ам̣ маа гат̇зт̇аа’’д̇иаад̣̇имааха.
Tatthevāti brahmalokeyeva. Vīsatime vasse sampatteti āharitvā sambandho. Brahmalokato āgantvā nibbattattā brahmacariyādhikārassa cirakālaṃ saṅgahitattā ‘‘evarūpaṃ kathaṃ mā kathethā’’tiādimāha.
вийсад̇и д̇харан̣аани ‘‘нигка’’нд̇и вад̣̇анд̇и. алабханд̇о на васаамийд̇и сан̃н̃аабзссаамийд̇и самб̣анд̇хо.
Vīsati dharaṇāni ‘‘nikkha’’nti vadanti. Alabhanto na vasāmīti saññāpessāmīti sambandho.
ид̇т̇аагарод̇и ид̇т̇ирад̇анасса уббад̇д̇идтаанам̣. аяяад̇хийд̇аад̇и амхаагам̣ аяяасса д̇хийд̇аа, бхад̣̇д̣̇агаабилаанийд̇и ад̇т̇о. басаад̣̇аруубзна ниб̣б̣исидтад̇ааяа ‘‘махааг̇ийва’’нд̇и бадимааяа сад̣̇исабхаавамааха. д̇знааха ‘‘аяяад̇хийд̇ааяаа’’д̇иаад̣̇и.
Itthākaroti itthiratanassa uppattiṭṭhānaṃ. Ayyadhītāti amhākaṃ ayyassa dhītā, bhaddakāpilānīti attho. Pasādarūpena nibbisiṭṭhatāya ‘‘mahāgīva’’nti paṭimāya sadisabhāvamāha. Tenāha ‘‘ayyadhītāyā’’tiādi.
самаанабан̣н̣анд̇и сад̣̇исабан̣н̣ам̣, гумаарасса гумаарияаа жа вуд̇д̇анд̇абан̣н̣ам̣. ид̇о жа зд̇д̇о жаад̇и д̇з бурисаа самааг̇амадтаанад̇о маг̇ад̇харадтз махаад̇ид̇т̇аг̇аамам̣ мад̣̇д̣̇арадтз сааг̇аланаг̇аран̃жа уд̣̇д̣̇исса баггаманд̇аа ан̃н̃аман̃н̃ам̣ виссаж̇ж̇знд̇аа наама хонд̇ийд̇и ‘‘ид̇о жа зд̇д̇о жа бзсзсу’’нд̇и вуд̇д̇аа.
Samānapaṇṇanti sadisapaṇṇaṃ, kumārassa kumāriyā ca vuttantapaṇṇaṃ. Ito ca etto cāti te purisā samāgamaṭṭhānato magadharaṭṭhe mahātitthagāmaṃ maddaraṭṭhe sāgalanagarañca uddissa pakkamantā aññamaññaṃ vissajjentā nāma hontīti ‘‘ito ca etto ca pesesu’’nti vuttā.
бубпад̣̇ааманд̇и хад̇т̇ихад̇т̇аббамаан̣ам̣ бубпад̣̇аамам̣. д̇аани бубпад̣̇аамаани. д̇зд̇и убхо бхад̣̇д̣̇аа жзва биббалигумааро жа. логаамисзнаад̇и г̇зхассид̇абзмзна, гаамассаад̣̇знаад̇и ад̇т̇о. асам̣садтаад̇и на сам̣садтаа . вижаараяим̣су гхадз ж̇аланд̇зна вияа бад̣̇ийбзна аж̇жхаасаязна самуж̇ж̇аланд̇зна вимогкаб̣ийж̇зна самуссаахид̇ажид̇д̇аа. яанд̇аб̣ад̣̇д̇хаанийд̇и сассасамбаад̣̇анад̇т̇ам̣ д̇ад̇т̇а д̇ад̇т̇а идтагад̣̇ваарагаваадаяож̇анавасзна яанд̇аб̣ад̣̇д̇хауд̣̇аганигкаманад̇умб̣аани. гамманд̇од̇и гасигаммагаран̣адтаанам̣. д̣̇аасаг̇аамаад̇и д̣̇аасаанам̣ васанаг̇аамаа.
Pupphadāmanti hatthihatthappamāṇaṃ pupphadāmaṃ. Tāni pupphadāmāni. Teti ubho bhaddā ceva pippalikumāro ca. Lokāmisenāti gehassitapemena, kāmassādenāti attho. Asaṃsaṭṭhāti na saṃsaṭṭhā . Vicārayiṃsu ghaṭe jalantena viya padīpena ajjhāsayena samujjalantena vimokkhabījena samussāhitacittā. Yantabaddhānīti sassasampādanatthaṃ tattha tattha iṭṭhakadvārakavāṭayojanavasena yantabaddhaudakanikkhamanatumbāni. Kammantoti kasikammakaraṇaṭṭhānaṃ. Dāsagāmāti dāsānaṃ vasanagāmā.
осаабзд̇ваад̇и багкибид̇ваа. аагаббагуд̇д̇авасзнаад̇и аагааравасзна гирияаавасзна жа. ананужчавиганд̇и баб̣б̣аж̇ид̇авзсасса анануруубам̣. д̇асса мад̇т̇агзд̇и д̣̇взд̇хаабат̇асса д̣̇вид̇хаабхууд̇адтаанз.
Osāpetvāti pakkhipitvā. Ākappakuttavasenāti ākāravasena kiriyāvasena ca. Ananucchavikanti pabbajitavesassa ananurūpaṃ. Tassa matthaketi dvedhāpathassa dvidhābhūtaṭṭhāne.
зд̇зсам̣ сан̇г̇ахам̣ гаад̇ум̣ ваддад̇ийд̇и нисийд̣̇ийд̇и самб̣анд̇хо. саа бана сад̇т̇у д̇ад̇т̇а нисаж̇ж̇аа зд̣̇исийд̇и д̣̇ассзд̇ум̣ ‘‘нисийд̣̇анд̇о банаа’’д̇иаад̣̇и вуд̇д̇ам̣. д̇ад̇т̇а яаа б̣уд̣̇д̇хаанам̣ абаримид̇агааласан̇г̇ахид̇аа ажинд̇зяяаабаримзяяабун̃н̃асамбхааруубажаяаниб̣б̣ад̇д̇аа нируубид̇асабхааваб̣уд̣̇д̇хаг̇ун̣авиж̇ж̇од̇ид̇аа лагкан̣аануб̣яан̃ж̇анасамуж̇ж̇алаа б̣яаамаббабхаагзд̇умаалаалан̇гад̇аа сабхаавасид̣̇д̇хад̇ааяа агид̇д̇имаа руубагааяасирий, д̇ам̣язва махаагассабасса ад̣̇идтабуб̣б̣ам̣ басаад̣̇асам̣вад̣дханад̇т̇ам̣ аниг̇г̇ахзд̇ваа нисинно бхаг̇аваа ‘‘б̣уд̣̇д̇хавзсам̣ г̇ахзд̇ваа…бз… нисийд̣̇ий’’д̇и вуд̇д̇о. асийд̇ихад̇т̇ам̣ бад̣̇зсам̣ б̣яаабзд̇ваа бавад̇д̇ияаа ‘‘асийд̇ихад̇т̇аа’’д̇и вуд̇д̇аа. сад̇асаакод̇и б̣ахусаако анзгасаако. суван̣н̣аван̣н̣о ахоси ниранд̇арам̣ б̣уд̣̇д̇харасмийхи саманд̇ад̇о самогин̣н̣ад̇д̇аа. звам̣ вуд̇д̇аббагаарзна взд̣̇ид̇аб̣б̣аа.
Etesaṃ saṅgahaṃ kātuṃ vaṭṭatīti nisīdīti sambandho. Sā pana satthu tattha nisajjā edisīti dassetuṃ ‘‘nisīdanto panā’’tiādi vuttaṃ. Tattha yā buddhānaṃ aparimitakālasaṅgahitā acinteyyāparimeyyapuññasambhārūpacayanibbattā nirūpitasabhāvabuddhaguṇavijjotitā lakkhaṇānubyañjanasamujjalā byāmappabhāketumālālaṅkatā sabhāvasiddhatāya akittimā rūpakāyasirī, taṃyeva mahākassapassa adiṭṭhapubbaṃ pasādasaṃvaḍḍhanatthaṃ aniggahetvā nisinno bhagavā ‘‘buddhavesaṃ gahetvā…pe… nisīdī’’ti vutto. Asītihatthaṃ padesaṃ byāpetvā pavattiyā ‘‘asītihatthā’’ti vuttā. Satasākhoti bahusākho anekasākho. Suvaṇṇavaṇṇo ahosi nirantaraṃ buddharasmīhi samantato samokiṇṇattā. Evaṃ vuttappakārena veditabbā.
рааж̇аг̇ахам̣ наал̣анд̣̇анд̇и жа саамиад̇т̇з убаяог̇аважанам̣ анд̇араасад̣̇д̣̇аяог̇ад̇од̇и ааха ‘‘рааж̇аг̇ахасса наал̣анд̣̇ааяа жаа’’д̇и. на хи мз ид̇о ан̃н̃зна сад̇т̇аараа бхавид̇ум̣ саггаа д̣̇идтад̇хаммигасамбарааяигабарамад̇т̇зхи сад̇д̇аанам̣ яат̇аарахам̣ анусаасанасамад̇т̇асса ан̃н̃асса сад̣̇звагз абхаавад̇о. на хи мз ид̇о ан̃н̃зна суг̇ад̇зна бхавид̇ум̣ саггаа собханаг̇аманаг̇ун̣аг̇ан̣аяуд̇д̇асса ан̃н̃асса абхаавад̇о. на хи мз ид̇о ан̃н̃зна саммаасамб̣уд̣̇д̇хзна бхавид̇ум̣ саггаа саммаа саб̣б̣ад̇хаммаанам̣ саяамбхун̃аан̣зна абхисамб̣уд̣̇д̇хасса абхаавад̇о. иминаад̇и ‘‘сад̇т̇аа мз, бханд̇з’’д̇и иминаа важанзна.
Rājagahaṃ nāḷandanti ca sāmiatthe upayogavacanaṃ antarāsaddayogatoti āha ‘‘rājagahassa nāḷandāya cā’’ti. Na hi me ito aññena satthārā bhavituṃ sakkā diṭṭhadhammikasamparāyikaparamatthehi sattānaṃ yathārahaṃ anusāsanasamatthassa aññassa sadevake abhāvato. Na hi me ito aññena sugatena bhavituṃ sakkā sobhanagamanaguṇagaṇayuttassa aññassa abhāvato. Na hi me ito aññena sammāsambuddhena bhavituṃ sakkā sammā sabbadhammānaṃ sayambhuñāṇena abhisambuddhassa abhāvato. Imināti ‘‘satthā me, bhante’’ti iminā vacanena.
аж̇аанамаанова саб̣б̣ан̃н̃зяяанд̇и ад̇хиббааяо. саб̣б̣ажзд̇асаад̇и саб̣б̣ааж̇жхад̇д̇иган̇г̇абарибун̣н̣ажзд̇асаа. саманнааг̇ад̇анд̇и самбаннам̣ саммад̣̇зва ану ану ааг̇ад̇ам̣ убаг̇ад̇ам̣. палзяяаад̇и вид̣̇аалзяяа. вилаяанд̇и винаасам̣.
Ajānamānova sabbaññeyyanti adhippāyo. Sabbacetasāti sabbaajjhattikaṅgaparipuṇṇacetasā. Samannāgatanti sampannaṃ sammadeva anu anu āgataṃ upagataṃ. Phaleyyāti vidāleyya. Vilayanti vināsaṃ.
звам̣ сигкид̇аб̣б̣анд̇и ид̣̇аани вужжамаанаагаарзна. хирод̇д̇аббасса б̣ахалад̇аа наама вибулад̇аад̇и ааха ‘‘маханд̇а’’нд̇и. батамад̇арамзваад̇и баг̇зва убасан̇гаманад̇о. д̇ат̇аа ад̇имаанабахийно асса, хириод̇д̇аббам̣ яат̇аа сан̣таад̇и. гусаласанниссид̇анд̇и анаваж̇ж̇ад̇хамманиссид̇ам̣. адтиганд̇и д̇зна д̇хаммзна адтигам̣. аад̣̇ид̇о бадтааяа яаава барияосаанаа саванажид̇д̇ам̣ ‘‘саб̣б̣ажзд̇о’’д̇и ад̇хиббзд̇анд̇и ааха ‘‘жид̇д̇асса т̇огамби б̣ахи г̇анд̇ум̣ ад̣̇знд̇о’’д̇и. д̇зна самод̇хаанам̣ д̣̇ассзд̇и. саб̣б̣зна…бз… саманнаахарид̇ваа аарамбхад̇о бабхуд̇и яаава д̣̇зсанаа нибпаннаа, д̇аава анд̇аранд̇араа бавад̇д̇зна саб̣б̣зна саманнаахааражид̇д̇зна д̇хаммам̣язва саманнаахарид̇ваа. табид̇асод̇од̇и д̇хаммз нихид̇асод̇о. од̣̇ахид̇ваад̇и абихид̇ам̣ гад̇ваа. батамаж̇жхаанавасзнаад̇и ид̣̇ам̣ асубхзсу д̇ассзва иж̇жхад̇о, ид̇арад̇т̇ан̃жа сукасамбаяуд̇д̇ад̇аа вуд̇д̇аа.
Evaṃ sikkhitabbanti idāni vuccamānākārena. Hirottappassa bahalatā nāma vipulatāti āha ‘‘mahanta’’nti. Paṭhamataramevāti pageva upasaṅkamanato. Tathā atimānapahīno assa, hiriottappaṃ yathā saṇṭhāti. Kusalasannissitanti anavajjadhammanissitaṃ. Aṭṭhikanti tena dhammena aṭṭhikaṃ. Ādito paṭṭhāya yāva pariyosānā savanacittaṃ ‘‘sabbaceto’’ti adhippetanti āha ‘‘cittassa thokampi bahi gantuṃ adento’’ti. Tena samodhānaṃ dasseti. Sabbena…pe… samannāharitvā ārambhato pabhuti yāva desanā nipphannā, tāva antarantarā pavattena sabbena samannāhāracittena dhammaṃyeva samannāharitvā. Ṭhapitasototi dhamme nihitasoto. Odahitvāti apihitaṃ katvā. Paṭhamajjhānavasenāti idaṃ asubhesu tasseva ijjhato, itaratthañca sukhasampayuttatā vuttā.
сам̣саарасааг̇арз бариб̣бхаманд̇асса ин̣адтаанз д̇идтанд̇и гилзсаа аасавасабхааваабаад̣̇анад̇од̇и ааха ‘‘саран̣од̇и сагилзсо’’д̇и. жад̇д̇ааро хи барибхог̇аад̇иаад̣̇ийсу яам̣ вад̇д̇аб̣б̣ам̣, д̇ам̣ висуд̣̇д̇химаг̇г̇ад̇д̇ам̣ сам̣ван̣н̣анаасу вуд̇д̇анаязнзва взд̣̇ид̇аб̣б̣ам̣. зд̇т̇а жа бхаг̇аваа батамам̣ оваад̣̇ам̣ т̇зрасса б̣раахман̣аж̇аад̇игад̇д̇аа ж̇аад̇имаанабахаанад̇т̇амабхааси, д̣̇уд̇ияам̣ б̣аахусажжам̣ ниссааяа уббаж̇ж̇анагаахам̣гаарабахаанад̇т̇ам̣, д̇ад̇ияам̣ убад̇хисамбад̇д̇им̣ ниссааяа уббаж̇ж̇анагаад̇д̇асинзхабахаанад̇т̇ам̣. адтамз д̣̇ивасзд̇и бхаг̇авад̇аа самааг̇ад̇ад̣̇ивасад̇о адтамз д̣̇ивасз.
Saṃsārasāgare paribbhamantassa iṇaṭṭhāne tiṭṭhanti kilesā āsavasabhāvāpādanatoti āha ‘‘saraṇoti sakileso’’ti. Cattāro hi paribhogātiādīsu yaṃ vattabbaṃ, taṃ visuddhimaggattaṃ saṃvaṇṇanāsu vuttanayeneva veditabbaṃ. Ettha ca bhagavā paṭhamaṃ ovādaṃ therassa brāhmaṇajātikattā jātimānapahānatthamabhāsi, dutiyaṃ bāhusaccaṃ nissāya uppajjanakaahaṃkārapahānatthaṃ, tatiyaṃ upadhisampattiṃ nissāya uppajjanakaattasinehapahānatthaṃ. Aṭṭhame divaseti bhagavatā samāgatadivasato aṭṭhame divase.
маг̇г̇ад̇о оггаманам̣ батамад̇арам̣ бхаг̇авад̇аа самааг̇ад̇ад̣̇ивасзязва ахоси. яад̣̇и арахад̇д̇аад̇хиг̇амо бажчаа, ат̇а гасмаа баал̣ияам̣ баг̇зва сид̣̇д̇хам̣ вияа вуд̇д̇анд̇и ааха ‘‘д̣̇зсанааваарассаа’’д̇иаад̣̇и. ‘‘сад̇д̇аахамзва кваахам̣, аавусо саран̣о, радтабин̣д̣ам̣ бхун̃ж̇и’’нд̇и вад̇ваа авасараббад̇д̇ам̣ арахад̇д̇ам̣ бавзд̣̇знд̇о ‘‘адтамияаа ан̃н̃аа уд̣̇абаад̣̇ий’’д̇и ааха. аяамзд̇т̇а д̣̇зсанааваарасса ааг̇амо. д̇ад̇о барам̣ бхаг̇авад̇аа ад̇д̇ано гад̇ам̣ ануг̇г̇ахам̣ жийварабаривад̇д̇анам̣ д̣̇ассзнд̇о ‘‘ат̇а ко, аавусо’’д̇иаад̣̇имааха.
Maggato okkamanaṃ paṭhamataraṃ bhagavatā samāgatadivaseyeva ahosi. Yadi arahattādhigamo pacchā, atha kasmā pāḷiyaṃ pageva siddhaṃ viya vuttanti āha ‘‘desanāvārassā’’tiādi. ‘‘Sattāhameva khvāhaṃ, āvuso saraṇo, raṭṭhapiṇḍaṃ bhuñji’’nti vatvā avasarappattaṃ arahattaṃ pavedento ‘‘aṭṭhamiyā aññā udapādī’’ti āha. Ayamettha desanāvārassa āgamo. Tato paraṃ bhagavatā attano kataṃ anuggahaṃ cīvaraparivattanaṃ dassento ‘‘atha kho, āvuso’’tiādimāha.
анд̇анд̇знаад̇и жад̇уг̇г̇ун̣ам̣ гад̇ваа бан̃н̃ад̇д̇ааяа сан̇гхаадияаа анд̇анд̇зна. ж̇аад̇ибам̣сугуулигзна…бз… бхавид̇ум̣ ваддад̇ийд̇и зд̇зна буб̣б̣з ж̇аад̇иааран̃н̃агаг̇г̇ахан̣зна жа д̇зраса д̇худ̇ан̇г̇аа г̇ахид̇аа зваад̇и д̣̇адтаб̣б̣ам̣. анужчавигам̣ гаад̇унд̇и ануруубам̣ бадибад̇д̇им̣ бадибаж̇ж̇ид̇ум̣. т̇зро баарубийд̇и самб̣анд̇хо.
Antantenāti catugguṇaṃ katvā paññattāya saṅghāṭiyā antantena. Jātipaṃsukūlikena…pe… bhavituṃ vaṭṭatīti etena pubbe jātiāraññakaggahaṇena ca terasa dhutaṅgā gahitā evāti daṭṭhabbaṃ. Anucchavikaṃ kātunti anurūpaṃ paṭipattiṃ paṭipajjituṃ. Thero pārupīti sambandho.
бхаг̇авад̇о оваад̣̇ам̣ бхаг̇авад̇о ваа д̇хаммагааяам̣ ниссааяа урасса васзна ж̇аад̇од̇и орасо. бхаг̇авад̇о ваа д̇хаммасарийрасса мукад̇о сад̇д̇ад̇им̣саб̣од̇хибагкияад̇о ж̇аад̇о. д̇знзва д̇хаммаж̇аад̇ад̇хамманиммид̇абхаавоби сам̣ван̣н̣ид̇од̇и д̣̇адтаб̣б̣о. оваад̣̇ад̇хаммо зва сад̇т̇аараа д̣̇аад̇аб̣б̣ад̇о т̇зрзна аад̣̇аад̇аб̣б̣ад̇о оваад̣̇ад̇хаммад̣̇ааяаад̣̇о, оваад̣̇ад̇хаммад̣̇ааяаж̇ж̇од̇и ад̇т̇о, д̇ам̣ арахад̇ийд̇и. зса наяо сзсабад̣̇зсуби.
Bhagavato ovādaṃ bhagavato vā dhammakāyaṃ nissāya urassa vasena jātoti oraso. Bhagavato vā dhammasarīrassa mukhato sattatiṃsabodhipakkhiyato jāto. Teneva dhammajātadhammanimmitabhāvopi saṃvaṇṇitoti daṭṭhabbo. Ovādadhammo eva satthārā dātabbato therena ādātabbato ovādadhammadāyādo, ovādadhammadāyajjoti attho, taṃ arahatīti. Esa nayo sesapadesupi.
‘‘баб̣б̣аж̇ж̇аа жа барисод̇хид̇аа’’д̇и вад̇ваа д̇ассаа саммад̣̇зва сод̇хид̇абхаавам̣ б̣яад̇ирзгамукзна д̣̇ассзд̇ум̣, ‘‘аавусо, яассаа’’д̇иаад̣̇и вуд̇д̇ам̣. д̇ад̇т̇а званд̇и яат̇аа ахам̣ лабхим̣, звам̣ со сад̇т̇у санд̇игаа лабхад̇ийд̇и яож̇анаа. сийханаад̣̇ам̣ над̣̇ид̇унд̇и зд̇т̇ааби сийханаад̣̇анад̣̇анаа наама д̣̇зсанаава, т̇зро сад̇т̇аараа ад̇д̇ано гад̇аануг̇г̇ахамзва ананд̇арасуд̇д̇з вуд̇д̇анаязна уллин̇г̇зд̇и, на ан̃н̃ат̇аа. на хи махаат̇зро гзвалам̣ ад̇д̇ано г̇ун̣аанубхаавам̣ вибхаавзд̇и. сзсанд̇и яам̣ ид̇ха асам̣ван̣н̣ид̇ам̣. буриманаязнзваад̇и ананд̇арасуд̇д̇з вуд̇д̇анаязнзва.
‘‘Pabbajjā ca parisodhitā’’ti vatvā tassā sammadeva sodhitabhāvaṃ byatirekamukhena dassetuṃ, ‘‘āvuso, yassā’’tiādi vuttaṃ. Tattha evanti yathā ahaṃ labhiṃ, evaṃ so satthu santikā labhatīti yojanā. Sīhanādaṃ naditunti etthāpi sīhanādanadanā nāma desanāva, thero satthārā attano katānuggahameva anantarasutte vuttanayena ulliṅgeti, na aññathā. Na hi mahāthero kevalaṃ attano guṇānubhāvaṃ vibhāveti. Sesanti yaṃ idha asaṃvaṇṇitaṃ. Purimanayenevāti anantarasutte vuttanayeneva.
жийварасуд̇д̇аван̣н̣анаа нидтид̇аа.
Cīvarasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 11. жийварасуд̇д̇ам̣ • 11. Cīvarasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 11. жийварасуд̇д̇аван̣н̣анаа • 11. Cīvarasuttavaṇṇanā
