| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೧. ಚೀವರಸುತ್ತವಣ್ಣನಾ
11. Cīvarasuttavaṇṇanā
೧೫೪. ರಾಜಗಹಸ್ಸ ದಕ್ಖಿಣಭಾಗೇ ಗಿರಿ ದಕ್ಖಿಣಾಗಿರಿ ಣ-ಕಾರೇ ಅ-ಕಾರಸ್ಸ ದೀಘಂ ಕತ್ವಾ, ತಸ್ಸ ದಕ್ಖಿಣಭಾಗೇ ಜನಪದೋಪಿ ‘‘ದಕ್ಖಿಣಾಗಿರೀ’’ತಿ ವುಚ್ಚತಿ, ‘‘ಗಿರಿತೋ ದಕ್ಖಿಣಭಾಗೋ’’ತಿ ಕತ್ವಾ। ಏಕದಿವಸೇನಾತಿ ಏಕೇನ ದಿವಸೇನ ಉಪ್ಪಬ್ಬಾಜೇಸುಂ ತೇಸಂ ಸದ್ಧಾಪಬ್ಬಜಿತಾಭಾವತೋ।
154. Rājagahassa dakkhiṇabhāge giri dakkhiṇāgiri ṇa-kāre a-kārassa dīghaṃ katvā, tassa dakkhiṇabhāge janapadopi ‘‘dakkhiṇāgirī’’ti vuccati, ‘‘girito dakkhiṇabhāgo’’ti katvā. Ekadivasenāti ekena divasena uppabbājesuṃ tesaṃ saddhāpabbajitābhāvato.
ಯತ್ಥ ಚತ್ತಾರೋ ವಾ ಉತ್ತರಿ ವಾ ಭಿಕ್ಖೂ ಅಕಪ್ಪಿಯನಿಮನ್ತನಂ ಸಾದಿಯಿತ್ವಾ ಪಞ್ಚನ್ನಂ ಭೋಜನಾನಂ ಅಞ್ಞತರಂ ಭೋಜನಂ ಏಕತೋ ಪಟಿಗ್ಗಣ್ಹಿತ್ವಾ ಭುಞ್ಜನ್ತಿ, ಏತಂ ಗಣಭೋಜನಂ ನಾಮ, ತಂ ತಿಣ್ಣಂ ಭಿಕ್ಖೂನಂ ಭುಞ್ಜಿತುಂ ವಟ್ಟತೀತಿ ‘‘ತಿಕಭೋಜನಂ ಪಞ್ಞತ್ತ’’ನ್ತಿ ವಚನೇನ ಗಣಭೋಜನಂ ಪಟಿಕ್ಖಿತ್ತನ್ತಿ ವುತ್ತಂ ಹೋತಿ। ತಯೋ ಅತ್ಥವಸೇ ಪಟಿಚ್ಚ ಅನುಞ್ಞಾತತ್ತಾಪಿ ‘‘ತಿಕಭೋಜನ’’ನ್ತಿ ವದನ್ತಿ।
Yattha cattāro vā uttari vā bhikkhū akappiyanimantanaṃ sādiyitvā pañcannaṃ bhojanānaṃ aññataraṃ bhojanaṃ ekato paṭiggaṇhitvā bhuñjanti, etaṃ gaṇabhojanaṃ nāma, taṃ tiṇṇaṃ bhikkhūnaṃ bhuñjituṃ vaṭṭatīti ‘‘tikabhojanaṃ paññatta’’nti vacanena gaṇabhojanaṃ paṭikkhittanti vuttaṃ hoti. Tayo atthavase paṭicca anuññātattāpi ‘‘tikabhojana’’nti vadanti.
‘‘ದುಮ್ಮಙ್ಕೂನಂ ನಿಗ್ಗಹೋ ಏವ ಪೇಸಲಾನಂ ಫಾಸುವಿಹಾರೋ’’ತಿ ಇದಂ ಏಕಂ ಅಙ್ಗಂ। ತೇನೇವಾಹ ‘‘ದುಮ್ಮಙ್ಕೂನಂ ನಿಗ್ಗಹೇನೇವಾ’’ತಿಆದಿ। ‘‘ಯಥಾ ದೇವದತ್ತೋ…ಪೇ॰… ಸಙ್ಘಂ ಭಿನ್ದೇಯ್ಯು’’ನ್ತಿ ಇಮಿನಾ ಕಾರಣೇನ ತಿಕಭೋಜನಂ ಪಞ್ಞತ್ತಂ।
‘‘Dummaṅkūnaṃ niggaho eva pesalānaṃ phāsuvihāro’’ti idaṃ ekaṃ aṅgaṃ. Tenevāha ‘‘dummaṅkūnaṃ niggahenevā’’tiādi. ‘‘Yathā devadatto…pe… saṅghaṃ bhindeyyu’’nti iminā kāraṇena tikabhojanaṃ paññattaṃ.
ಅಥ ಕಿಞ್ಚರಹೀತಿ ಅಥ ಕಸ್ಮಾ ತ್ವಂ ಅಸಮ್ಪನ್ನಗಣಂ ಬನ್ಧಿತ್ವಾ ಚರಸೀತಿ ಅಧಿಪ್ಪಾಯೋ। ಅಸಮ್ಪನ್ನಾಯ ಪರಿಸಾಯ ಚಾರಿಕಾಚರಣಂ ಕುಲಾನುದ್ದಯಾಯ ನ ಹೋತಿ, ಕುಲಾನಂ ಘಾತಿತತ್ತಾತಿ ಅಧಿಪ್ಪಾಯೇನ ಥೇರೋ ‘‘ಸಸ್ಸಘಾತಂ ಮಞ್ಞೇ ಚರಸೀ’’ತಿಆದಿಮವೋಚ।
Atha kiñcarahīti atha kasmā tvaṃ asampannagaṇaṃ bandhitvā carasīti adhippāyo. Asampannāya parisāya cārikācaraṇaṃ kulānuddayāya na hoti, kulānaṃ ghātitattāti adhippāyena thero ‘‘sassaghātaṃ maññe carasī’’tiādimavoca.
ಸೋಧೇನ್ತೋ ತಸ್ಸಾ ಅತಿವಿಯ ಪರಿಸುದ್ಧಭಾವದಸ್ಸನೇನ। ಉದ್ದಿಸಿತುಂ ನ ಜಾನಾಮಿ ತಥಾ ಚಿತ್ತಸ್ಸೇವ ಅನುಪ್ಪನ್ನಪುಬ್ಬತ್ತಾ। ಕಿಞ್ಚನಂ ಕಿಲೇಸವತ್ಥು। ಸಙ್ಗಹೇತಬ್ಬಖೇತ್ತವತ್ಥು ಪಲಿಬೋಧೋ, ಆಲಯೋ ಅಪೇಕ್ಖಾ। ಓಕಾಸಾಭಾವತೋತಿ ಬಹುಕಿಚ್ಚಕರಣೀಯತಾಯ ಕುಸಲಕಿರಿಯಾಯ ಓಕಾಸಾಭಾವತೋ। ಸನ್ನಿಪಾತಟ್ಠಾನತೋತಿ ಸಙ್ಕೇತಂ ಕತ್ವಾ ವಿಯ ಕಿಲೇಸರಜಾನಂ ತತ್ಥ ಸನ್ನಿಜ್ಝಪವತ್ತನತೋ।
Sodhento tassā ativiya parisuddhabhāvadassanena. Uddisituṃ na jānāmi tathā cittasseva anuppannapubbattā. Kiñcanaṃ kilesavatthu. Saṅgahetabbakhettavatthu palibodho, ālayo apekkhā. Okāsābhāvatoti bahukiccakaraṇīyatāya kusalakiriyāya okāsābhāvato. Sannipātaṭṭhānatoti saṅketaṃ katvā viya kilesarajānaṃ tattha sannijjhapavattanato.
ಸಿಕ್ಖತ್ತಯಬ್ರಹ್ಮಚರಿಯನ್ತಿ ಅಧಿಸೀಲಸಿಕ್ಖಾದಿಸಿಕ್ಖತ್ತಯಸಙ್ಗಹಂ ಬ್ರಹ್ಮಂ ಸೇಟ್ಠಂ ಚರಿಯಂ। ಖಣ್ಡಾದಿಭಾವಾಪಾದನೇನ ಅಖಣ್ಡಂ ಕತ್ವಾ। ಲಕ್ಖಣವಚನಞ್ಹೇತಂ। ಕಿಞ್ಚಿ ಸಿಕ್ಖೇಕದೇಸಂ ಅಸೇಸೇತ್ವಾ ಏಕನ್ತೇನೇವ ಪರಿಪೂರೇತಬ್ಬತಾಯ ಏಕನ್ತಪರಿಪುಣ್ಣಂ। ಚಿತ್ತುಪ್ಪಾದಮತ್ತಮ್ಪಿ ಸಂಕಿಲೇಸಮಲಂ ಅನುಪ್ಪಾದೇತ್ವಾ ಅಚ್ಚನ್ತಮೇವ ವಿಸುದ್ಧಂ ಕತ್ವಾ ಪರಿಹರಿತಬ್ಬತಾಯ ಏಕನ್ತಪರಿಸುದ್ಧಂ। ತತೋ ಏವ ಸಙ್ಖಂ ವಿಯ ಲಿಖಿತನ್ತಿ ಸಙ್ಖಲಿಖಿತಂ। ತೇನಾಹ ‘‘ಲಿಖಿತಸಙ್ಖಸದಿಸ’’ನ್ತಿ। ದಾಠಿಕಾಪಿ ತಗ್ಗಹಣೇನೇವ ಗಹೇತ್ವಾ ‘‘ಮಸ್ಸು’’ತ್ವೇವ ವುತ್ತಂ, ನ ಏತ್ಥ ಕೇವಲಂ ಮಸ್ಸುಯೇವಾತಿ ಅತ್ಥೋ। ಕಸಾಯೇನ ರತ್ತಾನಿ ಕಾಸಾಯಾನಿ।
Sikkhattayabrahmacariyanti adhisīlasikkhādisikkhattayasaṅgahaṃ brahmaṃ seṭṭhaṃ cariyaṃ. Khaṇḍādibhāvāpādanena akhaṇḍaṃ katvā. Lakkhaṇavacanañhetaṃ. Kiñci sikkhekadesaṃ asesetvā ekanteneva paripūretabbatāya ekantaparipuṇṇaṃ. Cittuppādamattampi saṃkilesamalaṃ anuppādetvā accantameva visuddhaṃ katvā pariharitabbatāya ekantaparisuddhaṃ. Tato eva saṅkhaṃ viya likhitanti saṅkhalikhitaṃ. Tenāha ‘‘likhitasaṅkhasadisa’’nti. Dāṭhikāpi taggahaṇeneva gahetvā ‘‘massu’’tveva vuttaṃ, na ettha kevalaṃ massuyevāti attho. Kasāyena rattāni kāsāyāni.
ವಙ್ಗಸಾಟಕೋತಿ ವಙ್ಗದೇಸೇ ಉಪ್ಪನ್ನಸಾಟಕೋ। ಏಸಾತಿ ಮಹಾಕಸ್ಸಪತ್ಥೇರೋ। ಅಭಿನೀಹಾರತೋ ಪಟ್ಠಾಯ ಪಣಿಧಾನತೋ ಪಭುತಿ, ಅಯಂ ಇದಾನಿ ವುಚ್ಚಮಾನಾ। ಅಗ್ಗಸಾವಕದ್ವಯಂ ಉಪಾದಾಯ ತತಿಯತ್ತಾ ‘‘ತತಿಯಸಾವಕ’’ನ್ತಿ ವುತ್ತಂ। ಅಟ್ಠಸಟ್ಠಿಭಿಕ್ಖುಸತಸಹಸ್ಸನ್ತಿ ಭಿಕ್ಖೂನಂ ಸತಸಹಸ್ಸಞ್ಚೇವ ಸಟ್ಠಿಸಹಸ್ಸಾನಿ ಚ ಅಟ್ಠ ಚ ಸಹಸ್ಸಾನಿ।
Vaṅgasāṭakoti vaṅgadese uppannasāṭako. Esāti mahākassapatthero. Abhinīhārato paṭṭhāya paṇidhānato pabhuti, ayaṃ idāni vuccamānā. Aggasāvakadvayaṃ upādāya tatiyattā ‘‘tatiyasāvaka’’nti vuttaṃ. Aṭṭhasaṭṭhibhikkhusatasahassanti bhikkhūnaṃ satasahassañceva saṭṭhisahassāni ca aṭṭha ca sahassāni.
ಅಯಞ್ಚ ಅಯಞ್ಚ ಗುಣೋತಿ ಸೀಲತೋ ಪಟ್ಠಾಯ ಯಾವ ಅಗ್ಗಫಲಾ ಗುಣೋತಿ ಕಿತ್ತೇನ್ತೋ ಮಹಾಸಮುದ್ದಂ ಪೂರಯಮಾನೋ ವಿಯ ಕಥೇಸಿ।
Ayañca ayañca guṇoti sīlato paṭṭhāya yāva aggaphalā guṇoti kittento mahāsamuddaṃ pūrayamāno viya kathesi.
ಕೋಲಾಹಲನ್ತಿ ದೇವತಾಹಿ ನಿಬ್ಬತ್ತಿತೋ ಕೋಲಾಹಲೋ।
Kolāhalanti devatāhi nibbattito kolāhalo.
ಖುದ್ದಕಾದಿವಸೇನ ಪಞ್ಚವಣ್ಣಾ। ತರಣಂ ವಾ ಹೋತು ಮರಣಂ ವಾತಿ ಮಹೋಘಂ ಓಗಾಹನ್ತೋ ಪುರಿಸೋ ವಿಯ ಮಚ್ಛೇರಸಮುದ್ದಂ ಉತ್ತರನ್ತೋ ಪಚ್ಛಾಪಿ…ಪೇ॰… ಪಾದಮೂಲೇ ಠಪೇಸಿ ಭಗವತೋ ಧಮ್ಮದೇಸನಾಯ ಮಚ್ಛೇರಪಹಾನಸ್ಸ ಕಥಿತತ್ತಾ।
Khuddakādivasena pañcavaṇṇā. Taraṇaṃ vā hotu maraṇaṃ vāti mahoghaṃ ogāhanto puriso viya maccherasamuddaṃ uttaranto pacchāpi…pe… pādamūle ṭhapesi bhagavato dhammadesanāya maccherapahānassa kathitattā.
ಸತ್ಥು ಗುಣಾ ಕಥಿತಾ ನಾಮ ಹೋನ್ತೀತಿ ವುತ್ತಂ ‘‘ಸತ್ಥು ಗುಣೇ ಕಥೇನ್ತಸ್ಸಾ’’ತಿ। ತತೋ ಪಟ್ಠಾಯಾತಿ ತದಾ ಸತ್ಥು ಸಮ್ಮುಖಾ ಧಮ್ಮಸ್ಸವನತೋ ಪಟ್ಠಾಯ।
Satthu guṇā kathitā nāma hontīti vuttaṃ ‘‘satthu guṇe kathentassā’’ti. Tato paṭṭhāyāti tadā satthu sammukhā dhammassavanato paṭṭhāya.
ತಥಾಗತಮಞ್ಚಸ್ಸಾತಿ ತಥಾಗತಸ್ಸ ಪರಿಭೋಗಮಞ್ಚಸ್ಸ। ದಾನಂ ದತ್ವಾ ಬ್ರಾಹ್ಮಣಸ್ಸ ಪುರೋಹಿತಟ್ಠಾನೇ ಠಪೇಸಿ। ತಾದಿಸಸ್ಸೇವ ಸೇಟ್ಠಿನೋ ಧೀತಾ ಹುತ್ವಾ।
Tathāgatamañcassāti tathāgatassa paribhogamañcassa. Dānaṃ datvā brāhmaṇassa purohitaṭṭhāne ṭhapesi. Tādisasseva seṭṭhino dhītā hutvā.
ಅದಿನ್ನವಿಪಾಕಸ್ಸಾತಿ ಪುಬ್ಬೇ ಕತೂಪಚಿತಸ್ಸ ಸಬ್ಬಸೋ ನ ದಿನ್ನವಿಪಾಕಸ್ಸ। ತಸ್ಸ ಕಮ್ಮಸ್ಸಾತಿ ತಸ್ಸ ಪಚ್ಚೇಕಬುದ್ಧಸ್ಸ ಪತ್ತೇ ಪಿಣ್ಡಪಾತಂ ಛಿನ್ದಿತ್ವಾ ಕಲಲಪೂರಣಕಮ್ಮಸ್ಸ। ತಸ್ಮಿಂಯೇವ ಅತ್ತಭಾವೇ ಸತ್ತಸು ಠಾನೇಸು ದುಗ್ಗನ್ಧಸರೀರತಾಯ ಪಟಿನಿವತ್ತಿತಾ। ಇಟ್ಠಕಪನ್ತೀತಿ ಸುವಣ್ಣಿಟ್ಠಕಪನ್ತಿ। ಘಟನಿಟ್ಠಕಾಯಾತಿ ತಸ್ಸ ಪನ್ತಿಯಂ ಪಠಮಂ ಠಪಿತಇಟ್ಠಕಾಯ ಸದ್ಧಿಂ ಘಟೇತಬ್ಬಇಟ್ಠಕಾಯ ಊನಾ ಹೋತಿ। ಭದ್ದಕೇ ಕಾಲೇತಿ ಈದಿಸಿಯಾ ಇಟ್ಠಕಾಯ ಇಚ್ಛಿತಕಾಲೇಯೇವ ಆಗತಾಸಿ। ತೇನ ಬನ್ಧನೇನಾತಿ ತೇನ ಸಿಲೇಸಸಮ್ಬನ್ಧೇನ।
Adinnavipākassāti pubbe katūpacitassa sabbaso na dinnavipākassa. Tassa kammassāti tassa paccekabuddhassa patte piṇḍapātaṃ chinditvā kalalapūraṇakammassa. Tasmiṃyeva attabhāve sattasu ṭhānesu duggandhasarīratāya paṭinivattitā. Iṭṭhakapantīti suvaṇṇiṭṭhakapanti. Ghaṭaniṭṭhakāyāti tassa pantiyaṃ paṭhamaṃ ṭhapitaiṭṭhakāya saddhiṃ ghaṭetabbaiṭṭhakāya ūnā hoti. Bhaddake kāleti īdisiyā iṭṭhakāya icchitakāleyeva āgatāsi. Tena bandhanenāti tena silesasambandhena.
ಓಲಮ್ಬಕಾತಿ ಮುತ್ತಾಮಣಿಮಯಾ ಓಲಮ್ಬಕಾ। ಪುಞ್ಞನ್ತಿ ನತ್ಥಿ ನೋ ಪುಞ್ಞಂ ತಂ, ಯಂ ನಿಮಿತ್ತಂ ಯಂ ಕಾರಣಾ ಇತೋ ಸುಖುಮತರಸ್ಸ ಪಟಿಲಾಭೋ ಸಿಯಾತಿ ಅತ್ಥೋ। ಪುಞ್ಞನಿಯಾಮೇನಾತಿ ಪುಞ್ಞಾನುಭಾವಸಿದ್ಧೇನ ನಿಯಾಮೇನ। ಸೋ ಚ ಅಸ್ಸ ಬಾರಾಣಸಿರಜ್ಜಂ ದಾತುಂ ಕತೋಕಾಸೋ।
Olambakāti muttāmaṇimayā olambakā. Puññanti natthi no puññaṃ taṃ, yaṃ nimittaṃ yaṃ kāraṇā ito sukhumatarassa paṭilābho siyāti attho. Puññaniyāmenāti puññānubhāvasiddhena niyāmena. So ca assa bārāṇasirajjaṃ dātuṃ katokāso.
ಫುಸ್ಸರಥನ್ತಿ ಮಙ್ಗಲರಥಂ। ಉಣ್ಹೀಸಂ ವಾಲಬೀಜನೀ ಖಗ್ಗೋ ಮಣಿಪಾದುಕಾ ಸೇತಚ್ಛತ್ತನ್ತಿ ಪಞ್ಚವಿಧಂ ರಾಜಕಕುಧಭಣ್ಡಂ । ಸೇತಚ್ಛತ್ತಂ ವಿಸುಂ ಗಹಿತಂ। ದಿಬ್ಬವತ್ಥಂ ಸಾದಿಯಿತುಂ ಪುಞ್ಞಾನುಭಾವಚೋದಿತೋ ‘‘ನನು ತಾತಾ ಥೂಲ’’ನ್ತಿಆದಿಮಾಹ।
Phussarathanti maṅgalarathaṃ. Uṇhīsaṃ vālabījanī khaggo maṇipādukā setacchattanti pañcavidhaṃ rājakakudhabhaṇḍaṃ. Setacchattaṃ visuṃ gahitaṃ. Dibbavatthaṃ sādiyituṃ puññānubhāvacodito ‘‘nanu tātā thūla’’ntiādimāha.
ಪಞ್ಚ ಚಙ್ಕಮನಸತಾನೀತಿ ಏತ್ಥ ಇತಿ-ಸದ್ದೇನ ಆದಿಅತ್ಥೇನ ಅಗ್ಗಿಸಾಲಾದೀನಿ ಪಬ್ಬಜಿತಸಾರುಪ್ಪಟ್ಠಾನಾನಿ ಸಙ್ಗಣ್ಹಾತಿ।
Pañca caṅkamanasatānīti ettha iti-saddena ādiatthena aggisālādīni pabbajitasāruppaṭṭhānāni saṅgaṇhāti.
ಸಾಧುಕೀಳಿತನ್ತಿ ಅರಿಯಾನಂ ಪರಿನಿಬ್ಬುತಟ್ಠಾನೇ ಕಾತಬ್ಬಸಕ್ಕಾರಂ ವದತಿ।
Sādhukīḷitanti ariyānaṃ parinibbutaṭṭhāne kātabbasakkāraṃ vadati.
ನಪ್ಪಮಜ್ಜಿ ನಿರೋಗಾ ಅಯ್ಯಾತಿ ಪುಚ್ಛಿತಾಕಾರದಸ್ಸನಂ। ಪರಿನಿಬ್ಬುತಾ ದೇವಾತಿ ದೇವೀ ಪಟಿವಚನಂ ಅದಾಸಿ। ಪಟಿಯಾದೇತ್ವಾತಿ ನಿಯ್ಯಾತೇತ್ವಾ। ಸಮಣಕಪಬ್ಬಜ್ಜನ್ತಿ ಸಮಿತಪಾಪೇಹಿ ಅರಿಯೇಹಿ ಅನುಟ್ಠಾತಬ್ಬಪಬ್ಬಜ್ಜಂ। ಸೋ ಹಿ ರಾಜಾ ಪಚ್ಚೇಕಬುದ್ಧಾನಂ ವೇಸಸ್ಸ ದಿಟ್ಠತ್ತಾ ‘‘ಇದಮೇವ ಭದ್ದಕ’’ನ್ತಿ ತಾದಿಸಂಯೇವ ಲಿಙ್ಗಂ ಗಣ್ಹಿ।
Nappamajji nirogā ayyāti pucchitākāradassanaṃ. Parinibbutā devāti devī paṭivacanaṃ adāsi. Paṭiyādetvāti niyyātetvā. Samaṇakapabbajjanti samitapāpehi ariyehi anuṭṭhātabbapabbajjaṃ. So hi rājā paccekabuddhānaṃ vesassa diṭṭhattā ‘‘idameva bhaddaka’’nti tādisaṃyeva liṅgaṃ gaṇhi.
ತತ್ಥೇವಾತಿ ಬ್ರಹ್ಮಲೋಕೇಯೇವ। ವೀಸತಿಮೇ ವಸ್ಸೇ ಸಮ್ಪತ್ತೇತಿ ಆಹರಿತ್ವಾ ಸಮ್ಬನ್ಧೋ। ಬ್ರಹ್ಮಲೋಕತೋ ಆಗನ್ತ್ವಾ ನಿಬ್ಬತ್ತತ್ತಾ ಬ್ರಹ್ಮಚರಿಯಾಧಿಕಾರಸ್ಸ ಚಿರಕಾಲಂ ಸಙ್ಗಹಿತತ್ತಾ ‘‘ಏವರೂಪಂ ಕಥಂ ಮಾ ಕಥೇಥಾ’’ತಿಆದಿಮಾಹ।
Tatthevāti brahmalokeyeva. Vīsatime vasse sampatteti āharitvā sambandho. Brahmalokato āgantvā nibbattattā brahmacariyādhikārassa cirakālaṃ saṅgahitattā ‘‘evarūpaṃ kathaṃ mā kathethā’’tiādimāha.
ವೀಸತಿ ಧರಣಾನಿ ‘‘ನಿಕ್ಖ’’ನ್ತಿ ವದನ್ತಿ। ಅಲಭನ್ತೋ ನ ವಸಾಮೀತಿ ಸಞ್ಞಾಪೇಸ್ಸಾಮೀತಿ ಸಮ್ಬನ್ಧೋ।
Vīsati dharaṇāni ‘‘nikkha’’nti vadanti. Alabhanto na vasāmīti saññāpessāmīti sambandho.
ಇತ್ಥಾಕರೋತಿ ಇತ್ಥಿರತನಸ್ಸ ಉಪ್ಪತ್ತಿಟ್ಠಾನಂ। ಅಯ್ಯಧೀತಾತಿ ಅಮ್ಹಾಕಂ ಅಯ್ಯಸ್ಸ ಧೀತಾ, ಭದ್ದಕಾಪಿಲಾನೀತಿ ಅತ್ಥೋ। ಪಸಾದರೂಪೇನ ನಿಬ್ಬಿಸಿಟ್ಠತಾಯ ‘‘ಮಹಾಗೀವ’’ನ್ತಿ ಪಟಿಮಾಯ ಸದಿಸಭಾವಮಾಹ। ತೇನಾಹ ‘‘ಅಯ್ಯಧೀತಾಯಾ’’ತಿಆದಿ।
Itthākaroti itthiratanassa uppattiṭṭhānaṃ. Ayyadhītāti amhākaṃ ayyassa dhītā, bhaddakāpilānīti attho. Pasādarūpena nibbisiṭṭhatāya ‘‘mahāgīva’’nti paṭimāya sadisabhāvamāha. Tenāha ‘‘ayyadhītāyā’’tiādi.
ಸಮಾನಪಣ್ಣನ್ತಿ ಸದಿಸಪಣ್ಣಂ, ಕುಮಾರಸ್ಸ ಕುಮಾರಿಯಾ ಚ ವುತ್ತನ್ತಪಣ್ಣಂ। ಇತೋ ಚ ಏತ್ತೋ ಚಾತಿ ತೇ ಪುರಿಸಾ ಸಮಾಗಮಟ್ಠಾನತೋ ಮಗಧರಟ್ಠೇ ಮಹಾತಿತ್ಥಗಾಮಂ ಮದ್ದರಟ್ಠೇ ಸಾಗಲನಗರಞ್ಚ ಉದ್ದಿಸ್ಸ ಪಕ್ಕಮನ್ತಾ ಅಞ್ಞಮಞ್ಞಂ ವಿಸ್ಸಜ್ಜೇನ್ತಾ ನಾಮ ಹೋನ್ತೀತಿ ‘‘ಇತೋ ಚ ಏತ್ತೋ ಚ ಪೇಸೇಸು’’ನ್ತಿ ವುತ್ತಾ।
Samānapaṇṇanti sadisapaṇṇaṃ, kumārassa kumāriyā ca vuttantapaṇṇaṃ. Ito ca etto cāti te purisā samāgamaṭṭhānato magadharaṭṭhe mahātitthagāmaṃ maddaraṭṭhe sāgalanagarañca uddissa pakkamantā aññamaññaṃ vissajjentā nāma hontīti ‘‘ito ca etto ca pesesu’’nti vuttā.
ಪುಪ್ಫದಾಮನ್ತಿ ಹತ್ಥಿಹತ್ಥಪ್ಪಮಾಣಂ ಪುಪ್ಫದಾಮಂ। ತಾನಿ ಪುಪ್ಫದಾಮಾನಿ। ತೇತಿ ಉಭೋ ಭದ್ದಾ ಚೇವ ಪಿಪ್ಪಲಿಕುಮಾರೋ ಚ। ಲೋಕಾಮಿಸೇನಾತಿ ಗೇಹಸ್ಸಿತಪೇಮೇನ, ಕಾಮಸ್ಸಾದೇನಾತಿ ಅತ್ಥೋ। ಅಸಂಸಟ್ಠಾತಿ ನ ಸಂಸಟ್ಠಾ । ವಿಚಾರಯಿಂಸು ಘಟೇ ಜಲನ್ತೇನ ವಿಯ ಪದೀಪೇನ ಅಜ್ಝಾಸಯೇನ ಸಮುಜ್ಜಲನ್ತೇನ ವಿಮೋಕ್ಖಬೀಜೇನ ಸಮುಸ್ಸಾಹಿತಚಿತ್ತಾ। ಯನ್ತಬದ್ಧಾನೀತಿ ಸಸ್ಸಸಮ್ಪಾದನತ್ಥಂ ತತ್ಥ ತತ್ಥ ಇಟ್ಠಕದ್ವಾರಕವಾಟಯೋಜನವಸೇನ ಯನ್ತಬದ್ಧಉದಕನಿಕ್ಖಮನತುಮ್ಬಾನಿ। ಕಮ್ಮನ್ತೋತಿ ಕಸಿಕಮ್ಮಕರಣಟ್ಠಾನಂ। ದಾಸಗಾಮಾತಿ ದಾಸಾನಂ ವಸನಗಾಮಾ।
Pupphadāmanti hatthihatthappamāṇaṃ pupphadāmaṃ. Tāni pupphadāmāni. Teti ubho bhaddā ceva pippalikumāro ca. Lokāmisenāti gehassitapemena, kāmassādenāti attho. Asaṃsaṭṭhāti na saṃsaṭṭhā . Vicārayiṃsu ghaṭe jalantena viya padīpena ajjhāsayena samujjalantena vimokkhabījena samussāhitacittā. Yantabaddhānīti sassasampādanatthaṃ tattha tattha iṭṭhakadvārakavāṭayojanavasena yantabaddhaudakanikkhamanatumbāni. Kammantoti kasikammakaraṇaṭṭhānaṃ. Dāsagāmāti dāsānaṃ vasanagāmā.
ಓಸಾಪೇತ್ವಾತಿ ಪಕ್ಖಿಪಿತ್ವಾ। ಆಕಪ್ಪಕುತ್ತವಸೇನಾತಿ ಆಕಾರವಸೇನ ಕಿರಿಯಾವಸೇನ ಚ। ಅನನುಚ್ಛವಿಕನ್ತಿ ಪಬ್ಬಜಿತವೇಸಸ್ಸ ಅನನುರೂಪಂ। ತಸ್ಸ ಮತ್ಥಕೇತಿ ದ್ವೇಧಾಪಥಸ್ಸ ದ್ವಿಧಾಭೂತಟ್ಠಾನೇ।
Osāpetvāti pakkhipitvā. Ākappakuttavasenāti ākāravasena kiriyāvasena ca. Ananucchavikanti pabbajitavesassa ananurūpaṃ. Tassa matthaketi dvedhāpathassa dvidhābhūtaṭṭhāne.
ಏತೇಸಂ ಸಙ್ಗಹಂ ಕಾತುಂ ವಟ್ಟತೀತಿ ನಿಸೀದೀತಿ ಸಮ್ಬನ್ಧೋ। ಸಾ ಪನ ಸತ್ಥು ತತ್ಥ ನಿಸಜ್ಜಾ ಏದಿಸೀತಿ ದಸ್ಸೇತುಂ ‘‘ನಿಸೀದನ್ತೋ ಪನಾ’’ತಿಆದಿ ವುತ್ತಂ। ತತ್ಥ ಯಾ ಬುದ್ಧಾನಂ ಅಪರಿಮಿತಕಾಲಸಙ್ಗಹಿತಾ ಅಚಿನ್ತೇಯ್ಯಾಪರಿಮೇಯ್ಯಪುಞ್ಞಸಮ್ಭಾರೂಪಚಯನಿಬ್ಬತ್ತಾ ನಿರೂಪಿತಸಭಾವಬುದ್ಧಗುಣವಿಜ್ಜೋತಿತಾ ಲಕ್ಖಣಾನುಬ್ಯಞ್ಜನಸಮುಜ್ಜಲಾ ಬ್ಯಾಮಪ್ಪಭಾಕೇತುಮಾಲಾಲಙ್ಕತಾ ಸಭಾವಸಿದ್ಧತಾಯ ಅಕಿತ್ತಿಮಾ ರೂಪಕಾಯಸಿರೀ, ತಂಯೇವ ಮಹಾಕಸ್ಸಪಸ್ಸ ಅದಿಟ್ಠಪುಬ್ಬಂ ಪಸಾದಸಂವಡ್ಢನತ್ಥಂ ಅನಿಗ್ಗಹೇತ್ವಾ ನಿಸಿನ್ನೋ ಭಗವಾ ‘‘ಬುದ್ಧವೇಸಂ ಗಹೇತ್ವಾ…ಪೇ॰… ನಿಸೀದೀ’’ತಿ ವುತ್ತೋ। ಅಸೀತಿಹತ್ಥಂ ಪದೇಸಂ ಬ್ಯಾಪೇತ್ವಾ ಪವತ್ತಿಯಾ ‘‘ಅಸೀತಿಹತ್ಥಾ’’ತಿ ವುತ್ತಾ। ಸತಸಾಖೋತಿ ಬಹುಸಾಖೋ ಅನೇಕಸಾಖೋ। ಸುವಣ್ಣವಣ್ಣೋ ಅಹೋಸಿ ನಿರನ್ತರಂ ಬುದ್ಧರಸ್ಮೀಹಿ ಸಮನ್ತತೋ ಸಮೋಕಿಣ್ಣತ್ತಾ। ಏವಂ ವುತ್ತಪ್ಪಕಾರೇನ ವೇದಿತಬ್ಬಾ।
Etesaṃ saṅgahaṃ kātuṃ vaṭṭatīti nisīdīti sambandho. Sā pana satthu tattha nisajjā edisīti dassetuṃ ‘‘nisīdanto panā’’tiādi vuttaṃ. Tattha yā buddhānaṃ aparimitakālasaṅgahitā acinteyyāparimeyyapuññasambhārūpacayanibbattā nirūpitasabhāvabuddhaguṇavijjotitā lakkhaṇānubyañjanasamujjalā byāmappabhāketumālālaṅkatā sabhāvasiddhatāya akittimā rūpakāyasirī, taṃyeva mahākassapassa adiṭṭhapubbaṃ pasādasaṃvaḍḍhanatthaṃ aniggahetvā nisinno bhagavā ‘‘buddhavesaṃ gahetvā…pe… nisīdī’’ti vutto. Asītihatthaṃ padesaṃ byāpetvā pavattiyā ‘‘asītihatthā’’ti vuttā. Satasākhoti bahusākho anekasākho. Suvaṇṇavaṇṇo ahosi nirantaraṃ buddharasmīhi samantato samokiṇṇattā. Evaṃ vuttappakārena veditabbā.
ರಾಜಗಹಂ ನಾಳನ್ದನ್ತಿ ಚ ಸಾಮಿಅತ್ಥೇ ಉಪಯೋಗವಚನಂ ಅನ್ತರಾಸದ್ದಯೋಗತೋತಿ ಆಹ ‘‘ರಾಜಗಹಸ್ಸ ನಾಳನ್ದಾಯ ಚಾ’’ತಿ। ನ ಹಿ ಮೇ ಇತೋ ಅಞ್ಞೇನ ಸತ್ಥಾರಾ ಭವಿತುಂ ಸಕ್ಕಾ ದಿಟ್ಠಧಮ್ಮಿಕಸಮ್ಪರಾಯಿಕಪರಮತ್ಥೇಹಿ ಸತ್ತಾನಂ ಯಥಾರಹಂ ಅನುಸಾಸನಸಮತ್ಥಸ್ಸ ಅಞ್ಞಸ್ಸ ಸದೇವಕೇ ಅಭಾವತೋ। ನ ಹಿ ಮೇ ಇತೋ ಅಞ್ಞೇನ ಸುಗತೇನ ಭವಿತುಂ ಸಕ್ಕಾ ಸೋಭನಗಮನಗುಣಗಣಯುತ್ತಸ್ಸ ಅಞ್ಞಸ್ಸ ಅಭಾವತೋ। ನ ಹಿ ಮೇ ಇತೋ ಅಞ್ಞೇನ ಸಮ್ಮಾಸಮ್ಬುದ್ಧೇನ ಭವಿತುಂ ಸಕ್ಕಾ ಸಮ್ಮಾ ಸಬ್ಬಧಮ್ಮಾನಂ ಸಯಮ್ಭುಞಾಣೇನ ಅಭಿಸಮ್ಬುದ್ಧಸ್ಸ ಅಭಾವತೋ। ಇಮಿನಾತಿ ‘‘ಸತ್ಥಾ ಮೇ, ಭನ್ತೇ’’ತಿ ಇಮಿನಾ ವಚನೇನ।
Rājagahaṃ nāḷandanti ca sāmiatthe upayogavacanaṃ antarāsaddayogatoti āha ‘‘rājagahassa nāḷandāya cā’’ti. Na hi me ito aññena satthārā bhavituṃ sakkā diṭṭhadhammikasamparāyikaparamatthehi sattānaṃ yathārahaṃ anusāsanasamatthassa aññassa sadevake abhāvato. Na hi me ito aññena sugatena bhavituṃ sakkā sobhanagamanaguṇagaṇayuttassa aññassa abhāvato. Na hi me ito aññena sammāsambuddhena bhavituṃ sakkā sammā sabbadhammānaṃ sayambhuñāṇena abhisambuddhassa abhāvato. Imināti ‘‘satthā me, bhante’’ti iminā vacanena.
ಅಜಾನಮಾನೋವ ಸಬ್ಬಞ್ಞೇಯ್ಯನ್ತಿ ಅಧಿಪ್ಪಾಯೋ। ಸಬ್ಬಚೇತಸಾತಿ ಸಬ್ಬಅಜ್ಝತ್ತಿಕಙ್ಗಪರಿಪುಣ್ಣಚೇತಸಾ। ಸಮನ್ನಾಗತನ್ತಿ ಸಮ್ಪನ್ನಂ ಸಮ್ಮದೇವ ಅನು ಅನು ಆಗತಂ ಉಪಗತಂ। ಫಲೇಯ್ಯಾತಿ ವಿದಾಲೇಯ್ಯ। ವಿಲಯನ್ತಿ ವಿನಾಸಂ।
Ajānamānova sabbaññeyyanti adhippāyo. Sabbacetasāti sabbaajjhattikaṅgaparipuṇṇacetasā. Samannāgatanti sampannaṃ sammadeva anu anu āgataṃ upagataṃ. Phaleyyāti vidāleyya. Vilayanti vināsaṃ.
ಏವಂ ಸಿಕ್ಖಿತಬ್ಬನ್ತಿ ಇದಾನಿ ವುಚ್ಚಮಾನಾಕಾರೇನ। ಹಿರೋತ್ತಪ್ಪಸ್ಸ ಬಹಲತಾ ನಾಮ ವಿಪುಲತಾತಿ ಆಹ ‘‘ಮಹನ್ತ’’ನ್ತಿ। ಪಠಮತರಮೇವಾತಿ ಪಗೇವ ಉಪಸಙ್ಕಮನತೋ। ತಥಾ ಅತಿಮಾನಪಹೀನೋ ಅಸ್ಸ, ಹಿರಿಓತ್ತಪ್ಪಂ ಯಥಾ ಸಣ್ಠಾತಿ। ಕುಸಲಸನ್ನಿಸ್ಸಿತನ್ತಿ ಅನವಜ್ಜಧಮ್ಮನಿಸ್ಸಿತಂ। ಅಟ್ಠಿಕನ್ತಿ ತೇನ ಧಮ್ಮೇನ ಅಟ್ಠಿಕಂ। ಆದಿತೋ ಪಟ್ಠಾಯ ಯಾವ ಪರಿಯೋಸಾನಾ ಸವನಚಿತ್ತಂ ‘‘ಸಬ್ಬಚೇತೋ’’ತಿ ಅಧಿಪ್ಪೇತನ್ತಿ ಆಹ ‘‘ಚಿತ್ತಸ್ಸ ಥೋಕಮ್ಪಿ ಬಹಿ ಗನ್ತುಂ ಅದೇನ್ತೋ’’ತಿ। ತೇನ ಸಮೋಧಾನಂ ದಸ್ಸೇತಿ। ಸಬ್ಬೇನ…ಪೇ॰… ಸಮನ್ನಾಹರಿತ್ವಾ ಆರಮ್ಭತೋ ಪಭುತಿ ಯಾವ ದೇಸನಾ ನಿಪ್ಫನ್ನಾ, ತಾವ ಅನ್ತರನ್ತರಾ ಪವತ್ತೇನ ಸಬ್ಬೇನ ಸಮನ್ನಾಹಾರಚಿತ್ತೇನ ಧಮ್ಮಂಯೇವ ಸಮನ್ನಾಹರಿತ್ವಾ। ಠಪಿತಸೋತೋತಿ ಧಮ್ಮೇ ನಿಹಿತಸೋತೋ। ಓದಹಿತ್ವಾತಿ ಅಪಿಹಿತಂ ಕತ್ವಾ। ಪಠಮಜ್ಝಾನವಸೇನಾತಿ ಇದಂ ಅಸುಭೇಸು ತಸ್ಸೇವ ಇಜ್ಝತೋ, ಇತರತ್ಥಞ್ಚ ಸುಖಸಮ್ಪಯುತ್ತತಾ ವುತ್ತಾ।
Evaṃ sikkhitabbanti idāni vuccamānākārena. Hirottappassa bahalatā nāma vipulatāti āha ‘‘mahanta’’nti. Paṭhamataramevāti pageva upasaṅkamanato. Tathā atimānapahīno assa, hiriottappaṃ yathā saṇṭhāti. Kusalasannissitanti anavajjadhammanissitaṃ. Aṭṭhikanti tena dhammena aṭṭhikaṃ. Ādito paṭṭhāya yāva pariyosānā savanacittaṃ ‘‘sabbaceto’’ti adhippetanti āha ‘‘cittassa thokampi bahi gantuṃ adento’’ti. Tena samodhānaṃ dasseti. Sabbena…pe… samannāharitvā ārambhato pabhuti yāva desanā nipphannā, tāva antarantarā pavattena sabbena samannāhāracittena dhammaṃyeva samannāharitvā. Ṭhapitasototi dhamme nihitasoto. Odahitvāti apihitaṃ katvā. Paṭhamajjhānavasenāti idaṃ asubhesu tasseva ijjhato, itaratthañca sukhasampayuttatā vuttā.
ಸಂಸಾರಸಾಗರೇ ಪರಿಬ್ಭಮನ್ತಸ್ಸ ಇಣಟ್ಠಾನೇ ತಿಟ್ಠನ್ತಿ ಕಿಲೇಸಾ ಆಸವಸಭಾವಾಪಾದನತೋತಿ ಆಹ ‘‘ಸರಣೋತಿ ಸಕಿಲೇಸೋ’’ತಿ। ಚತ್ತಾರೋ ಹಿ ಪರಿಭೋಗಾತಿಆದೀಸು ಯಂ ವತ್ತಬ್ಬಂ, ತಂ ವಿಸುದ್ಧಿಮಗ್ಗತ್ತಂ ಸಂವಣ್ಣನಾಸು ವುತ್ತನಯೇನೇವ ವೇದಿತಬ್ಬಂ। ಏತ್ಥ ಚ ಭಗವಾ ಪಠಮಂ ಓವಾದಂ ಥೇರಸ್ಸ ಬ್ರಾಹ್ಮಣಜಾತಿಕತ್ತಾ ಜಾತಿಮಾನಪಹಾನತ್ಥಮಭಾಸಿ, ದುತಿಯಂ ಬಾಹುಸಚ್ಚಂ ನಿಸ್ಸಾಯ ಉಪ್ಪಜ್ಜನಕಅಹಂಕಾರಪಹಾನತ್ಥಂ, ತತಿಯಂ ಉಪಧಿಸಮ್ಪತ್ತಿಂ ನಿಸ್ಸಾಯ ಉಪ್ಪಜ್ಜನಕಅತ್ತಸಿನೇಹಪಹಾನತ್ಥಂ। ಅಟ್ಠಮೇ ದಿವಸೇತಿ ಭಗವತಾ ಸಮಾಗತದಿವಸತೋ ಅಟ್ಠಮೇ ದಿವಸೇ।
Saṃsārasāgare paribbhamantassa iṇaṭṭhāne tiṭṭhanti kilesā āsavasabhāvāpādanatoti āha ‘‘saraṇoti sakileso’’ti. Cattāro hi paribhogātiādīsu yaṃ vattabbaṃ, taṃ visuddhimaggattaṃ saṃvaṇṇanāsu vuttanayeneva veditabbaṃ. Ettha ca bhagavā paṭhamaṃ ovādaṃ therassa brāhmaṇajātikattā jātimānapahānatthamabhāsi, dutiyaṃ bāhusaccaṃ nissāya uppajjanakaahaṃkārapahānatthaṃ, tatiyaṃ upadhisampattiṃ nissāya uppajjanakaattasinehapahānatthaṃ. Aṭṭhame divaseti bhagavatā samāgatadivasato aṭṭhame divase.
ಮಗ್ಗತೋ ಓಕ್ಕಮನಂ ಪಠಮತರಂ ಭಗವತಾ ಸಮಾಗತದಿವಸೇಯೇವ ಅಹೋಸಿ। ಯದಿ ಅರಹತ್ತಾಧಿಗಮೋ ಪಚ್ಛಾ, ಅಥ ಕಸ್ಮಾ ಪಾಳಿಯಂ ಪಗೇವ ಸಿದ್ಧಂ ವಿಯ ವುತ್ತನ್ತಿ ಆಹ ‘‘ದೇಸನಾವಾರಸ್ಸಾ’’ತಿಆದಿ। ‘‘ಸತ್ತಾಹಮೇವ ಖ್ವಾಹಂ, ಆವುಸೋ ಸರಣೋ, ರಟ್ಠಪಿಣ್ಡಂ ಭುಞ್ಜಿ’’ನ್ತಿ ವತ್ವಾ ಅವಸರಪ್ಪತ್ತಂ ಅರಹತ್ತಂ ಪವೇದೇನ್ತೋ ‘‘ಅಟ್ಠಮಿಯಾ ಅಞ್ಞಾ ಉದಪಾದೀ’’ತಿ ಆಹ। ಅಯಮೇತ್ಥ ದೇಸನಾವಾರಸ್ಸ ಆಗಮೋ। ತತೋ ಪರಂ ಭಗವತಾ ಅತ್ತನೋ ಕತಂ ಅನುಗ್ಗಹಂ ಚೀವರಪರಿವತ್ತನಂ ದಸ್ಸೇನ್ತೋ ‘‘ಅಥ ಖೋ, ಆವುಸೋ’’ತಿಆದಿಮಾಹ।
Maggato okkamanaṃ paṭhamataraṃ bhagavatā samāgatadivaseyeva ahosi. Yadi arahattādhigamo pacchā, atha kasmā pāḷiyaṃ pageva siddhaṃ viya vuttanti āha ‘‘desanāvārassā’’tiādi. ‘‘Sattāhameva khvāhaṃ, āvuso saraṇo, raṭṭhapiṇḍaṃ bhuñji’’nti vatvā avasarappattaṃ arahattaṃ pavedento ‘‘aṭṭhamiyā aññā udapādī’’ti āha. Ayamettha desanāvārassa āgamo. Tato paraṃ bhagavatā attano kataṃ anuggahaṃ cīvaraparivattanaṃ dassento ‘‘atha kho, āvuso’’tiādimāha.
ಅನ್ತನ್ತೇನಾತಿ ಚತುಗ್ಗುಣಂ ಕತ್ವಾ ಪಞ್ಞತ್ತಾಯ ಸಙ್ಘಾಟಿಯಾ ಅನ್ತನ್ತೇನ। ಜಾತಿಪಂಸುಕೂಲಿಕೇನ…ಪೇ॰… ಭವಿತುಂ ವಟ್ಟತೀತಿ ಏತೇನ ಪುಬ್ಬೇ ಜಾತಿಆರಞ್ಞಕಗ್ಗಹಣೇನ ಚ ತೇರಸ ಧುತಙ್ಗಾ ಗಹಿತಾ ಏವಾತಿ ದಟ್ಠಬ್ಬಂ। ಅನುಚ್ಛವಿಕಂ ಕಾತುನ್ತಿ ಅನುರೂಪಂ ಪಟಿಪತ್ತಿಂ ಪಟಿಪಜ್ಜಿತುಂ। ಥೇರೋ ಪಾರುಪೀತಿ ಸಮ್ಬನ್ಧೋ।
Antantenāti catugguṇaṃ katvā paññattāya saṅghāṭiyā antantena. Jātipaṃsukūlikena…pe… bhavituṃ vaṭṭatīti etena pubbe jātiāraññakaggahaṇena ca terasa dhutaṅgā gahitā evāti daṭṭhabbaṃ. Anucchavikaṃ kātunti anurūpaṃ paṭipattiṃ paṭipajjituṃ. Thero pārupīti sambandho.
ಭಗವತೋ ಓವಾದಂ ಭಗವತೋ ವಾ ಧಮ್ಮಕಾಯಂ ನಿಸ್ಸಾಯ ಉರಸ್ಸ ವಸೇನ ಜಾತೋತಿ ಓರಸೋ। ಭಗವತೋ ವಾ ಧಮ್ಮಸರೀರಸ್ಸ ಮುಖತೋ ಸತ್ತತಿಂಸಬೋಧಿಪಕ್ಖಿಯತೋ ಜಾತೋ। ತೇನೇವ ಧಮ್ಮಜಾತಧಮ್ಮನಿಮ್ಮಿತಭಾವೋಪಿ ಸಂವಣ್ಣಿತೋತಿ ದಟ್ಠಬ್ಬೋ। ಓವಾದಧಮ್ಮೋ ಏವ ಸತ್ಥಾರಾ ದಾತಬ್ಬತೋ ಥೇರೇನ ಆದಾತಬ್ಬತೋ ಓವಾದಧಮ್ಮದಾಯಾದೋ, ಓವಾದಧಮ್ಮದಾಯಜ್ಜೋತಿ ಅತ್ಥೋ, ತಂ ಅರಹತೀತಿ। ಏಸ ನಯೋ ಸೇಸಪದೇಸುಪಿ।
Bhagavato ovādaṃ bhagavato vā dhammakāyaṃ nissāya urassa vasena jātoti oraso. Bhagavato vā dhammasarīrassa mukhato sattatiṃsabodhipakkhiyato jāto. Teneva dhammajātadhammanimmitabhāvopi saṃvaṇṇitoti daṭṭhabbo. Ovādadhammo eva satthārā dātabbato therena ādātabbato ovādadhammadāyādo, ovādadhammadāyajjoti attho, taṃ arahatīti. Esa nayo sesapadesupi.
‘‘ಪಬ್ಬಜ್ಜಾ ಚ ಪರಿಸೋಧಿತಾ’’ತಿ ವತ್ವಾ ತಸ್ಸಾ ಸಮ್ಮದೇವ ಸೋಧಿತಭಾವಂ ಬ್ಯತಿರೇಕಮುಖೇನ ದಸ್ಸೇತುಂ, ‘‘ಆವುಸೋ, ಯಸ್ಸಾ’’ತಿಆದಿ ವುತ್ತಂ। ತತ್ಥ ಏವನ್ತಿ ಯಥಾ ಅಹಂ ಲಭಿಂ, ಏವಂ ಸೋ ಸತ್ಥು ಸನ್ತಿಕಾ ಲಭತೀತಿ ಯೋಜನಾ। ಸೀಹನಾದಂ ನದಿತುನ್ತಿ ಏತ್ಥಾಪಿ ಸೀಹನಾದನದನಾ ನಾಮ ದೇಸನಾವ, ಥೇರೋ ಸತ್ಥಾರಾ ಅತ್ತನೋ ಕತಾನುಗ್ಗಹಮೇವ ಅನನ್ತರಸುತ್ತೇ ವುತ್ತನಯೇನ ಉಲ್ಲಿಙ್ಗೇತಿ, ನ ಅಞ್ಞಥಾ। ನ ಹಿ ಮಹಾಥೇರೋ ಕೇವಲಂ ಅತ್ತನೋ ಗುಣಾನುಭಾವಂ ವಿಭಾವೇತಿ। ಸೇಸನ್ತಿ ಯಂ ಇಧ ಅಸಂವಣ್ಣಿತಂ। ಪುರಿಮನಯೇನೇವಾತಿ ಅನನ್ತರಸುತ್ತೇ ವುತ್ತನಯೇನೇವ।
‘‘Pabbajjā ca parisodhitā’’ti vatvā tassā sammadeva sodhitabhāvaṃ byatirekamukhena dassetuṃ, ‘‘āvuso, yassā’’tiādi vuttaṃ. Tattha evanti yathā ahaṃ labhiṃ, evaṃ so satthu santikā labhatīti yojanā. Sīhanādaṃ naditunti etthāpi sīhanādanadanā nāma desanāva, thero satthārā attano katānuggahameva anantarasutte vuttanayena ulliṅgeti, na aññathā. Na hi mahāthero kevalaṃ attano guṇānubhāvaṃ vibhāveti. Sesanti yaṃ idha asaṃvaṇṇitaṃ. Purimanayenevāti anantarasutte vuttanayeneva.
ಚೀವರಸುತ್ತವಣ್ಣನಾ ನಿಟ್ಠಿತಾ।
Cīvarasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೧. ಚೀವರಸುತ್ತಂ • 11. Cīvarasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೧. ಚೀವರಸುತ್ತವಣ್ಣನಾ • 11. Cīvarasuttavaṇṇanā
