| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੧੧. ਚੀવਰਸੁਤ੍ਤવਣ੍ਣਨਾ
11. Cīvarasuttavaṇṇanā
੧੫੪. ਰਾਜਗਹਸ੍ਸ ਦਕ੍ਖਿਣਭਾਗੇ ਗਿਰਿ ਦਕ੍ਖਿਣਾਗਿਰਿ ਣ-ਕਾਰੇ ਅ-ਕਾਰਸ੍ਸ ਦੀਘਂ ਕਤ੍વਾ, ਤਸ੍ਸ ਦਕ੍ਖਿਣਭਾਗੇ ਜਨਪਦੋਪਿ ‘‘ਦਕ੍ਖਿਣਾਗਿਰੀ’’ਤਿ વੁਚ੍ਚਤਿ, ‘‘ਗਿਰਿਤੋ ਦਕ੍ਖਿਣਭਾਗੋ’’ਤਿ ਕਤ੍વਾ। ਏਕਦਿવਸੇਨਾਤਿ ਏਕੇਨ ਦਿવਸੇਨ ਉਪ੍ਪਬ੍ਬਾਜੇਸੁਂ ਤੇਸਂ ਸਦ੍ਧਾਪਬ੍ਬਜਿਤਾਭਾવਤੋ।
154. Rājagahassa dakkhiṇabhāge giri dakkhiṇāgiri ṇa-kāre a-kārassa dīghaṃ katvā, tassa dakkhiṇabhāge janapadopi ‘‘dakkhiṇāgirī’’ti vuccati, ‘‘girito dakkhiṇabhāgo’’ti katvā. Ekadivasenāti ekena divasena uppabbājesuṃ tesaṃ saddhāpabbajitābhāvato.
ਯਤ੍ਥ ਚਤ੍ਤਾਰੋ વਾ ਉਤ੍ਤਰਿ વਾ ਭਿਕ੍ਖੂ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍વਾ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਏਕਤੋ ਪਟਿਗ੍ਗਣ੍ਹਿਤ੍વਾ ਭੁਞ੍ਜਨ੍ਤਿ, ਏਤਂ ਗਣਭੋਜਨਂ ਨਾਮ, ਤਂ ਤਿਣ੍ਣਂ ਭਿਕ੍ਖੂਨਂ ਭੁਞ੍ਜਿਤੁਂ વਟ੍ਟਤੀਤਿ ‘‘ਤਿਕਭੋਜਨਂ ਪਞ੍ਞਤ੍ਤ’’ਨ੍ਤਿ વਚਨੇਨ ਗਣਭੋਜਨਂ ਪਟਿਕ੍ਖਿਤ੍ਤਨ੍ਤਿ વੁਤ੍ਤਂ ਹੋਤਿ। ਤਯੋ ਅਤ੍ਥવਸੇ ਪਟਿਚ੍ਚ ਅਨੁਞ੍ਞਾਤਤ੍ਤਾਪਿ ‘‘ਤਿਕਭੋਜਨ’’ਨ੍ਤਿ વਦਨ੍ਤਿ।
Yattha cattāro vā uttari vā bhikkhū akappiyanimantanaṃ sādiyitvā pañcannaṃ bhojanānaṃ aññataraṃ bhojanaṃ ekato paṭiggaṇhitvā bhuñjanti, etaṃ gaṇabhojanaṃ nāma, taṃ tiṇṇaṃ bhikkhūnaṃ bhuñjituṃ vaṭṭatīti ‘‘tikabhojanaṃ paññatta’’nti vacanena gaṇabhojanaṃ paṭikkhittanti vuttaṃ hoti. Tayo atthavase paṭicca anuññātattāpi ‘‘tikabhojana’’nti vadanti.
‘‘ਦੁਮ੍ਮਙ੍ਕੂਨਂ ਨਿਗ੍ਗਹੋ ਏવ ਪੇਸਲਾਨਂ ਫਾਸੁવਿਹਾਰੋ’’ਤਿ ਇਦਂ ਏਕਂ ਅਙ੍ਗਂ। ਤੇਨੇવਾਹ ‘‘ਦੁਮ੍ਮਙ੍ਕੂਨਂ ਨਿਗ੍ਗਹੇਨੇવਾ’’ਤਿਆਦਿ। ‘‘ਯਥਾ ਦੇવਦਤ੍ਤੋ…ਪੇ॰… ਸਙ੍ਘਂ ਭਿਨ੍ਦੇਯ੍ਯੁ’’ਨ੍ਤਿ ਇਮਿਨਾ ਕਾਰਣੇਨ ਤਿਕਭੋਜਨਂ ਪਞ੍ਞਤ੍ਤਂ।
‘‘Dummaṅkūnaṃ niggaho eva pesalānaṃ phāsuvihāro’’ti idaṃ ekaṃ aṅgaṃ. Tenevāha ‘‘dummaṅkūnaṃ niggahenevā’’tiādi. ‘‘Yathā devadatto…pe… saṅghaṃ bhindeyyu’’nti iminā kāraṇena tikabhojanaṃ paññattaṃ.
ਅਥ ਕਿਞ੍ਚਰਹੀਤਿ ਅਥ ਕਸ੍ਮਾ ਤ੍વਂ ਅਸਮ੍ਪਨ੍ਨਗਣਂ ਬਨ੍ਧਿਤ੍વਾ ਚਰਸੀਤਿ ਅਧਿਪ੍ਪਾਯੋ। ਅਸਮ੍ਪਨ੍ਨਾਯ ਪਰਿਸਾਯ ਚਾਰਿਕਾਚਰਣਂ ਕੁਲਾਨੁਦ੍ਦਯਾਯ ਨ ਹੋਤਿ, ਕੁਲਾਨਂ ਘਾਤਿਤਤ੍ਤਾਤਿ ਅਧਿਪ੍ਪਾਯੇਨ ਥੇਰੋ ‘‘ਸਸ੍ਸਘਾਤਂ ਮਞ੍ਞੇ ਚਰਸੀ’’ਤਿਆਦਿਮવੋਚ।
Atha kiñcarahīti atha kasmā tvaṃ asampannagaṇaṃ bandhitvā carasīti adhippāyo. Asampannāya parisāya cārikācaraṇaṃ kulānuddayāya na hoti, kulānaṃ ghātitattāti adhippāyena thero ‘‘sassaghātaṃ maññe carasī’’tiādimavoca.
ਸੋਧੇਨ੍ਤੋ ਤਸ੍ਸਾ ਅਤਿવਿਯ ਪਰਿਸੁਦ੍ਧਭਾવਦਸ੍ਸਨੇਨ। ਉਦ੍ਦਿਸਿਤੁਂ ਨ ਜਾਨਾਮਿ ਤਥਾ ਚਿਤ੍ਤਸ੍ਸੇવ ਅਨੁਪ੍ਪਨ੍ਨਪੁਬ੍ਬਤ੍ਤਾ। ਕਿਞ੍ਚਨਂ ਕਿਲੇਸવਤ੍ਥੁ। ਸਙ੍ਗਹੇਤਬ੍ਬਖੇਤ੍ਤવਤ੍ਥੁ ਪਲਿਬੋਧੋ, ਆਲਯੋ ਅਪੇਕ੍ਖਾ। ਓਕਾਸਾਭਾવਤੋਤਿ ਬਹੁਕਿਚ੍ਚਕਰਣੀਯਤਾਯ ਕੁਸਲਕਿਰਿਯਾਯ ਓਕਾਸਾਭਾવਤੋ। ਸਨ੍ਨਿਪਾਤਟ੍ਠਾਨਤੋਤਿ ਸਙ੍ਕੇਤਂ ਕਤ੍વਾ વਿਯ ਕਿਲੇਸਰਜਾਨਂ ਤਤ੍ਥ ਸਨ੍ਨਿਜ੍ਝਪવਤ੍ਤਨਤੋ।
Sodhento tassā ativiya parisuddhabhāvadassanena. Uddisituṃ na jānāmi tathā cittasseva anuppannapubbattā. Kiñcanaṃ kilesavatthu. Saṅgahetabbakhettavatthu palibodho, ālayo apekkhā. Okāsābhāvatoti bahukiccakaraṇīyatāya kusalakiriyāya okāsābhāvato. Sannipātaṭṭhānatoti saṅketaṃ katvā viya kilesarajānaṃ tattha sannijjhapavattanato.
ਸਿਕ੍ਖਤ੍ਤਯਬ੍ਰਹ੍ਮਚਰਿਯਨ੍ਤਿ ਅਧਿਸੀਲਸਿਕ੍ਖਾਦਿਸਿਕ੍ਖਤ੍ਤਯਸਙ੍ਗਹਂ ਬ੍ਰਹ੍ਮਂ ਸੇਟ੍ਠਂ ਚਰਿਯਂ। ਖਣ੍ਡਾਦਿਭਾવਾਪਾਦਨੇਨ ਅਖਣ੍ਡਂ ਕਤ੍વਾ। ਲਕ੍ਖਣવਚਨਞ੍ਹੇਤਂ। ਕਿਞ੍ਚਿ ਸਿਕ੍ਖੇਕਦੇਸਂ ਅਸੇਸੇਤ੍વਾ ਏਕਨ੍ਤੇਨੇવ ਪਰਿਪੂਰੇਤਬ੍ਬਤਾਯ ਏਕਨ੍ਤਪਰਿਪੁਣ੍ਣਂ। ਚਿਤ੍ਤੁਪ੍ਪਾਦਮਤ੍ਤਮ੍ਪਿ ਸਂਕਿਲੇਸਮਲਂ ਅਨੁਪ੍ਪਾਦੇਤ੍વਾ ਅਚ੍ਚਨ੍ਤਮੇવ વਿਸੁਦ੍ਧਂ ਕਤ੍વਾ ਪਰਿਹਰਿਤਬ੍ਬਤਾਯ ਏਕਨ੍ਤਪਰਿਸੁਦ੍ਧਂ। ਤਤੋ ਏવ ਸਙ੍ਖਂ વਿਯ ਲਿਖਿਤਨ੍ਤਿ ਸਙ੍ਖਲਿਖਿਤਂ। ਤੇਨਾਹ ‘‘ਲਿਖਿਤਸਙ੍ਖਸਦਿਸ’’ਨ੍ਤਿ। ਦਾਠਿਕਾਪਿ ਤਗ੍ਗਹਣੇਨੇવ ਗਹੇਤ੍વਾ ‘‘ਮਸ੍ਸੁ’’ਤ੍વੇવ વੁਤ੍ਤਂ, ਨ ਏਤ੍ਥ ਕੇવਲਂ ਮਸ੍ਸੁਯੇવਾਤਿ ਅਤ੍ਥੋ। ਕਸਾਯੇਨ ਰਤ੍ਤਾਨਿ ਕਾਸਾਯਾਨਿ।
Sikkhattayabrahmacariyanti adhisīlasikkhādisikkhattayasaṅgahaṃ brahmaṃ seṭṭhaṃ cariyaṃ. Khaṇḍādibhāvāpādanena akhaṇḍaṃ katvā. Lakkhaṇavacanañhetaṃ. Kiñci sikkhekadesaṃ asesetvā ekanteneva paripūretabbatāya ekantaparipuṇṇaṃ. Cittuppādamattampi saṃkilesamalaṃ anuppādetvā accantameva visuddhaṃ katvā pariharitabbatāya ekantaparisuddhaṃ. Tato eva saṅkhaṃ viya likhitanti saṅkhalikhitaṃ. Tenāha ‘‘likhitasaṅkhasadisa’’nti. Dāṭhikāpi taggahaṇeneva gahetvā ‘‘massu’’tveva vuttaṃ, na ettha kevalaṃ massuyevāti attho. Kasāyena rattāni kāsāyāni.
વਙ੍ਗਸਾਟਕੋਤਿ વਙ੍ਗਦੇਸੇ ਉਪ੍ਪਨ੍ਨਸਾਟਕੋ। ਏਸਾਤਿ ਮਹਾਕਸ੍ਸਪਤ੍ਥੇਰੋ। ਅਭਿਨੀਹਾਰਤੋ ਪਟ੍ਠਾਯ ਪਣਿਧਾਨਤੋ ਪਭੁਤਿ, ਅਯਂ ਇਦਾਨਿ વੁਚ੍ਚਮਾਨਾ। ਅਗ੍ਗਸਾવਕਦ੍વਯਂ ਉਪਾਦਾਯ ਤਤਿਯਤ੍ਤਾ ‘‘ਤਤਿਯਸਾવਕ’’ਨ੍ਤਿ વੁਤ੍ਤਂ। ਅਟ੍ਠਸਟ੍ਠਿਭਿਕ੍ਖੁਸਤਸਹਸ੍ਸਨ੍ਤਿ ਭਿਕ੍ਖੂਨਂ ਸਤਸਹਸ੍ਸਞ੍ਚੇવ ਸਟ੍ਠਿਸਹਸ੍ਸਾਨਿ ਚ ਅਟ੍ਠ ਚ ਸਹਸ੍ਸਾਨਿ।
Vaṅgasāṭakoti vaṅgadese uppannasāṭako. Esāti mahākassapatthero. Abhinīhārato paṭṭhāya paṇidhānato pabhuti, ayaṃ idāni vuccamānā. Aggasāvakadvayaṃ upādāya tatiyattā ‘‘tatiyasāvaka’’nti vuttaṃ. Aṭṭhasaṭṭhibhikkhusatasahassanti bhikkhūnaṃ satasahassañceva saṭṭhisahassāni ca aṭṭha ca sahassāni.
ਅਯਞ੍ਚ ਅਯਞ੍ਚ ਗੁਣੋਤਿ ਸੀਲਤੋ ਪਟ੍ਠਾਯ ਯਾવ ਅਗ੍ਗਫਲਾ ਗੁਣੋਤਿ ਕਿਤ੍ਤੇਨ੍ਤੋ ਮਹਾਸਮੁਦ੍ਦਂ ਪੂਰਯਮਾਨੋ વਿਯ ਕਥੇਸਿ।
Ayañca ayañca guṇoti sīlato paṭṭhāya yāva aggaphalā guṇoti kittento mahāsamuddaṃ pūrayamāno viya kathesi.
ਕੋਲਾਹਲਨ੍ਤਿ ਦੇવਤਾਹਿ ਨਿਬ੍ਬਤ੍ਤਿਤੋ ਕੋਲਾਹਲੋ।
Kolāhalanti devatāhi nibbattito kolāhalo.
ਖੁਦ੍ਦਕਾਦਿવਸੇਨ ਪਞ੍ਚવਣ੍ਣਾ। ਤਰਣਂ વਾ ਹੋਤੁ ਮਰਣਂ વਾਤਿ ਮਹੋਘਂ ਓਗਾਹਨ੍ਤੋ ਪੁਰਿਸੋ વਿਯ ਮਚ੍ਛੇਰਸਮੁਦ੍ਦਂ ਉਤ੍ਤਰਨ੍ਤੋ ਪਚ੍ਛਾਪਿ…ਪੇ॰… ਪਾਦਮੂਲੇ ਠਪੇਸਿ ਭਗવਤੋ ਧਮ੍ਮਦੇਸਨਾਯ ਮਚ੍ਛੇਰਪਹਾਨਸ੍ਸ ਕਥਿਤਤ੍ਤਾ।
Khuddakādivasena pañcavaṇṇā. Taraṇaṃ vā hotu maraṇaṃ vāti mahoghaṃ ogāhanto puriso viya maccherasamuddaṃ uttaranto pacchāpi…pe… pādamūle ṭhapesi bhagavato dhammadesanāya maccherapahānassa kathitattā.
ਸਤ੍ਥੁ ਗੁਣਾ ਕਥਿਤਾ ਨਾਮ ਹੋਨ੍ਤੀਤਿ વੁਤ੍ਤਂ ‘‘ਸਤ੍ਥੁ ਗੁਣੇ ਕਥੇਨ੍ਤਸ੍ਸਾ’’ਤਿ। ਤਤੋ ਪਟ੍ਠਾਯਾਤਿ ਤਦਾ ਸਤ੍ਥੁ ਸਮ੍ਮੁਖਾ ਧਮ੍ਮਸ੍ਸવਨਤੋ ਪਟ੍ਠਾਯ।
Satthu guṇā kathitā nāma hontīti vuttaṃ ‘‘satthu guṇe kathentassā’’ti. Tato paṭṭhāyāti tadā satthu sammukhā dhammassavanato paṭṭhāya.
ਤਥਾਗਤਮਞ੍ਚਸ੍ਸਾਤਿ ਤਥਾਗਤਸ੍ਸ ਪਰਿਭੋਗਮਞ੍ਚਸ੍ਸ। ਦਾਨਂ ਦਤ੍વਾ ਬ੍ਰਾਹ੍ਮਣਸ੍ਸ ਪੁਰੋਹਿਤਟ੍ਠਾਨੇ ਠਪੇਸਿ। ਤਾਦਿਸਸ੍ਸੇવ ਸੇਟ੍ਠਿਨੋ ਧੀਤਾ ਹੁਤ੍વਾ।
Tathāgatamañcassāti tathāgatassa paribhogamañcassa. Dānaṃ datvā brāhmaṇassa purohitaṭṭhāne ṭhapesi. Tādisasseva seṭṭhino dhītā hutvā.
ਅਦਿਨ੍ਨવਿਪਾਕਸ੍ਸਾਤਿ ਪੁਬ੍ਬੇ ਕਤੂਪਚਿਤਸ੍ਸ ਸਬ੍ਬਸੋ ਨ ਦਿਨ੍ਨવਿਪਾਕਸ੍ਸ। ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਪਿਣ੍ਡਪਾਤਂ ਛਿਨ੍ਦਿਤ੍વਾ ਕਲਲਪੂਰਣਕਮ੍ਮਸ੍ਸ। ਤਸ੍ਮਿਂਯੇવ ਅਤ੍ਤਭਾવੇ ਸਤ੍ਤਸੁ ਠਾਨੇਸੁ ਦੁਗ੍ਗਨ੍ਧਸਰੀਰਤਾਯ ਪਟਿਨਿવਤ੍ਤਿਤਾ। ਇਟ੍ਠਕਪਨ੍ਤੀਤਿ ਸੁવਣ੍ਣਿਟ੍ਠਕਪਨ੍ਤਿ। ਘਟਨਿਟ੍ਠਕਾਯਾਤਿ ਤਸ੍ਸ ਪਨ੍ਤਿਯਂ ਪਠਮਂ ਠਪਿਤਇਟ੍ਠਕਾਯ ਸਦ੍ਧਿਂ ਘਟੇਤਬ੍ਬਇਟ੍ਠਕਾਯ ਊਨਾ ਹੋਤਿ। ਭਦ੍ਦਕੇ ਕਾਲੇਤਿ ਈਦਿਸਿਯਾ ਇਟ੍ਠਕਾਯ ਇਚ੍ਛਿਤਕਾਲੇਯੇવ ਆਗਤਾਸਿ। ਤੇਨ ਬਨ੍ਧਨੇਨਾਤਿ ਤੇਨ ਸਿਲੇਸਸਮ੍ਬਨ੍ਧੇਨ।
Adinnavipākassāti pubbe katūpacitassa sabbaso na dinnavipākassa. Tassa kammassāti tassa paccekabuddhassa patte piṇḍapātaṃ chinditvā kalalapūraṇakammassa. Tasmiṃyeva attabhāve sattasu ṭhānesu duggandhasarīratāya paṭinivattitā. Iṭṭhakapantīti suvaṇṇiṭṭhakapanti. Ghaṭaniṭṭhakāyāti tassa pantiyaṃ paṭhamaṃ ṭhapitaiṭṭhakāya saddhiṃ ghaṭetabbaiṭṭhakāya ūnā hoti. Bhaddake kāleti īdisiyā iṭṭhakāya icchitakāleyeva āgatāsi. Tena bandhanenāti tena silesasambandhena.
ਓਲਮ੍ਬਕਾਤਿ ਮੁਤ੍ਤਾਮਣਿਮਯਾ ਓਲਮ੍ਬਕਾ। ਪੁਞ੍ਞਨ੍ਤਿ ਨਤ੍ਥਿ ਨੋ ਪੁਞ੍ਞਂ ਤਂ, ਯਂ ਨਿਮਿਤ੍ਤਂ ਯਂ ਕਾਰਣਾ ਇਤੋ ਸੁਖੁਮਤਰਸ੍ਸ ਪਟਿਲਾਭੋ ਸਿਯਾਤਿ ਅਤ੍ਥੋ। ਪੁਞ੍ਞਨਿਯਾਮੇਨਾਤਿ ਪੁਞ੍ਞਾਨੁਭਾવਸਿਦ੍ਧੇਨ ਨਿਯਾਮੇਨ। ਸੋ ਚ ਅਸ੍ਸ ਬਾਰਾਣਸਿਰਜ੍ਜਂ ਦਾਤੁਂ ਕਤੋਕਾਸੋ।
Olambakāti muttāmaṇimayā olambakā. Puññanti natthi no puññaṃ taṃ, yaṃ nimittaṃ yaṃ kāraṇā ito sukhumatarassa paṭilābho siyāti attho. Puññaniyāmenāti puññānubhāvasiddhena niyāmena. So ca assa bārāṇasirajjaṃ dātuṃ katokāso.
ਫੁਸ੍ਸਰਥਨ੍ਤਿ ਮਙ੍ਗਲਰਥਂ। ਉਣ੍ਹੀਸਂ વਾਲਬੀਜਨੀ ਖਗ੍ਗੋ ਮਣਿਪਾਦੁਕਾ ਸੇਤਚ੍ਛਤ੍ਤਨ੍ਤਿ ਪਞ੍ਚવਿਧਂ ਰਾਜਕਕੁਧਭਣ੍ਡਂ । ਸੇਤਚ੍ਛਤ੍ਤਂ વਿਸੁਂ ਗਹਿਤਂ। ਦਿਬ੍ਬવਤ੍ਥਂ ਸਾਦਿਯਿਤੁਂ ਪੁਞ੍ਞਾਨੁਭਾવਚੋਦਿਤੋ ‘‘ਨਨੁ ਤਾਤਾ ਥੂਲ’’ਨ੍ਤਿਆਦਿਮਾਹ।
Phussarathanti maṅgalarathaṃ. Uṇhīsaṃ vālabījanī khaggo maṇipādukā setacchattanti pañcavidhaṃ rājakakudhabhaṇḍaṃ. Setacchattaṃ visuṃ gahitaṃ. Dibbavatthaṃ sādiyituṃ puññānubhāvacodito ‘‘nanu tātā thūla’’ntiādimāha.
ਪਞ੍ਚ ਚਙ੍ਕਮਨਸਤਾਨੀਤਿ ਏਤ੍ਥ ਇਤਿ-ਸਦ੍ਦੇਨ ਆਦਿਅਤ੍ਥੇਨ ਅਗ੍ਗਿਸਾਲਾਦੀਨਿ ਪਬ੍ਬਜਿਤਸਾਰੁਪ੍ਪਟ੍ਠਾਨਾਨਿ ਸਙ੍ਗਣ੍ਹਾਤਿ।
Pañca caṅkamanasatānīti ettha iti-saddena ādiatthena aggisālādīni pabbajitasāruppaṭṭhānāni saṅgaṇhāti.
ਸਾਧੁਕੀਲ਼ਿਤਨ੍ਤਿ ਅਰਿਯਾਨਂ ਪਰਿਨਿਬ੍ਬੁਤਟ੍ਠਾਨੇ ਕਾਤਬ੍ਬਸਕ੍ਕਾਰਂ વਦਤਿ।
Sādhukīḷitanti ariyānaṃ parinibbutaṭṭhāne kātabbasakkāraṃ vadati.
ਨਪ੍ਪਮਜ੍ਜਿ ਨਿਰੋਗਾ ਅਯ੍ਯਾਤਿ ਪੁਚ੍ਛਿਤਾਕਾਰਦਸ੍ਸਨਂ। ਪਰਿਨਿਬ੍ਬੁਤਾ ਦੇવਾਤਿ ਦੇવੀ ਪਟਿવਚਨਂ ਅਦਾਸਿ। ਪਟਿਯਾਦੇਤ੍વਾਤਿ ਨਿਯ੍ਯਾਤੇਤ੍વਾ। ਸਮਣਕਪਬ੍ਬਜ੍ਜਨ੍ਤਿ ਸਮਿਤਪਾਪੇਹਿ ਅਰਿਯੇਹਿ ਅਨੁਟ੍ਠਾਤਬ੍ਬਪਬ੍ਬਜ੍ਜਂ। ਸੋ ਹਿ ਰਾਜਾ ਪਚ੍ਚੇਕਬੁਦ੍ਧਾਨਂ વੇਸਸ੍ਸ ਦਿਟ੍ਠਤ੍ਤਾ ‘‘ਇਦਮੇવ ਭਦ੍ਦਕ’’ਨ੍ਤਿ ਤਾਦਿਸਂਯੇવ ਲਿਙ੍ਗਂ ਗਣ੍ਹਿ।
Nappamajji nirogā ayyāti pucchitākāradassanaṃ. Parinibbutā devāti devī paṭivacanaṃ adāsi. Paṭiyādetvāti niyyātetvā. Samaṇakapabbajjanti samitapāpehi ariyehi anuṭṭhātabbapabbajjaṃ. So hi rājā paccekabuddhānaṃ vesassa diṭṭhattā ‘‘idameva bhaddaka’’nti tādisaṃyeva liṅgaṃ gaṇhi.
ਤਤ੍ਥੇવਾਤਿ ਬ੍ਰਹ੍ਮਲੋਕੇਯੇવ। વੀਸਤਿਮੇ વਸ੍ਸੇ ਸਮ੍ਪਤ੍ਤੇਤਿ ਆਹਰਿਤ੍વਾ ਸਮ੍ਬਨ੍ਧੋ। ਬ੍ਰਹ੍ਮਲੋਕਤੋ ਆਗਨ੍ਤ੍વਾ ਨਿਬ੍ਬਤ੍ਤਤ੍ਤਾ ਬ੍ਰਹ੍ਮਚਰਿਯਾਧਿਕਾਰਸ੍ਸ ਚਿਰਕਾਲਂ ਸਙ੍ਗਹਿਤਤ੍ਤਾ ‘‘ਏવਰੂਪਂ ਕਥਂ ਮਾ ਕਥੇਥਾ’’ਤਿਆਦਿਮਾਹ।
Tatthevāti brahmalokeyeva. Vīsatime vasse sampatteti āharitvā sambandho. Brahmalokato āgantvā nibbattattā brahmacariyādhikārassa cirakālaṃ saṅgahitattā ‘‘evarūpaṃ kathaṃ mā kathethā’’tiādimāha.
વੀਸਤਿ ਧਰਣਾਨਿ ‘‘ਨਿਕ੍ਖ’’ਨ੍ਤਿ વਦਨ੍ਤਿ। ਅਲਭਨ੍ਤੋ ਨ વਸਾਮੀਤਿ ਸਞ੍ਞਾਪੇਸ੍ਸਾਮੀਤਿ ਸਮ੍ਬਨ੍ਧੋ।
Vīsati dharaṇāni ‘‘nikkha’’nti vadanti. Alabhanto na vasāmīti saññāpessāmīti sambandho.
ਇਤ੍ਥਾਕਰੋਤਿ ਇਤ੍ਥਿਰਤਨਸ੍ਸ ਉਪ੍ਪਤ੍ਤਿਟ੍ਠਾਨਂ। ਅਯ੍ਯਧੀਤਾਤਿ ਅਮ੍ਹਾਕਂ ਅਯ੍ਯਸ੍ਸ ਧੀਤਾ, ਭਦ੍ਦਕਾਪਿਲਾਨੀਤਿ ਅਤ੍ਥੋ। ਪਸਾਦਰੂਪੇਨ ਨਿਬ੍ਬਿਸਿਟ੍ਠਤਾਯ ‘‘ਮਹਾਗੀવ’’ਨ੍ਤਿ ਪਟਿਮਾਯ ਸਦਿਸਭਾવਮਾਹ। ਤੇਨਾਹ ‘‘ਅਯ੍ਯਧੀਤਾਯਾ’’ਤਿਆਦਿ।
Itthākaroti itthiratanassa uppattiṭṭhānaṃ. Ayyadhītāti amhākaṃ ayyassa dhītā, bhaddakāpilānīti attho. Pasādarūpena nibbisiṭṭhatāya ‘‘mahāgīva’’nti paṭimāya sadisabhāvamāha. Tenāha ‘‘ayyadhītāyā’’tiādi.
ਸਮਾਨਪਣ੍ਣਨ੍ਤਿ ਸਦਿਸਪਣ੍ਣਂ, ਕੁਮਾਰਸ੍ਸ ਕੁਮਾਰਿਯਾ ਚ વੁਤ੍ਤਨ੍ਤਪਣ੍ਣਂ। ਇਤੋ ਚ ਏਤ੍ਤੋ ਚਾਤਿ ਤੇ ਪੁਰਿਸਾ ਸਮਾਗਮਟ੍ਠਾਨਤੋ ਮਗਧਰਟ੍ਠੇ ਮਹਾਤਿਤ੍ਥਗਾਮਂ ਮਦ੍ਦਰਟ੍ਠੇ ਸਾਗਲਨਗਰਞ੍ਚ ਉਦ੍ਦਿਸ੍ਸ ਪਕ੍ਕਮਨ੍ਤਾ ਅਞ੍ਞਮਞ੍ਞਂ વਿਸ੍ਸਜ੍ਜੇਨ੍ਤਾ ਨਾਮ ਹੋਨ੍ਤੀਤਿ ‘‘ਇਤੋ ਚ ਏਤ੍ਤੋ ਚ ਪੇਸੇਸੁ’’ਨ੍ਤਿ વੁਤ੍ਤਾ।
Samānapaṇṇanti sadisapaṇṇaṃ, kumārassa kumāriyā ca vuttantapaṇṇaṃ. Ito ca etto cāti te purisā samāgamaṭṭhānato magadharaṭṭhe mahātitthagāmaṃ maddaraṭṭhe sāgalanagarañca uddissa pakkamantā aññamaññaṃ vissajjentā nāma hontīti ‘‘ito ca etto ca pesesu’’nti vuttā.
ਪੁਪ੍ਫਦਾਮਨ੍ਤਿ ਹਤ੍ਥਿਹਤ੍ਥਪ੍ਪਮਾਣਂ ਪੁਪ੍ਫਦਾਮਂ। ਤਾਨਿ ਪੁਪ੍ਫਦਾਮਾਨਿ। ਤੇਤਿ ਉਭੋ ਭਦ੍ਦਾ ਚੇવ ਪਿਪ੍ਪਲਿਕੁਮਾਰੋ ਚ। ਲੋਕਾਮਿਸੇਨਾਤਿ ਗੇਹਸ੍ਸਿਤਪੇਮੇਨ, ਕਾਮਸ੍ਸਾਦੇਨਾਤਿ ਅਤ੍ਥੋ। ਅਸਂਸਟ੍ਠਾਤਿ ਨ ਸਂਸਟ੍ਠਾ । વਿਚਾਰਯਿਂਸੁ ਘਟੇ ਜਲਨ੍ਤੇਨ વਿਯ ਪਦੀਪੇਨ ਅਜ੍ਝਾਸਯੇਨ ਸਮੁਜ੍ਜਲਨ੍ਤੇਨ વਿਮੋਕ੍ਖਬੀਜੇਨ ਸਮੁਸ੍ਸਾਹਿਤਚਿਤ੍ਤਾ। ਯਨ੍ਤਬਦ੍ਧਾਨੀਤਿ ਸਸ੍ਸਸਮ੍ਪਾਦਨਤ੍ਥਂ ਤਤ੍ਥ ਤਤ੍ਥ ਇਟ੍ਠਕਦ੍વਾਰਕવਾਟਯੋਜਨવਸੇਨ ਯਨ੍ਤਬਦ੍ਧਉਦਕਨਿਕ੍ਖਮਨਤੁਮ੍ਬਾਨਿ। ਕਮ੍ਮਨ੍ਤੋਤਿ ਕਸਿਕਮ੍ਮਕਰਣਟ੍ਠਾਨਂ। ਦਾਸਗਾਮਾਤਿ ਦਾਸਾਨਂ વਸਨਗਾਮਾ।
Pupphadāmanti hatthihatthappamāṇaṃ pupphadāmaṃ. Tāni pupphadāmāni. Teti ubho bhaddā ceva pippalikumāro ca. Lokāmisenāti gehassitapemena, kāmassādenāti attho. Asaṃsaṭṭhāti na saṃsaṭṭhā . Vicārayiṃsu ghaṭe jalantena viya padīpena ajjhāsayena samujjalantena vimokkhabījena samussāhitacittā. Yantabaddhānīti sassasampādanatthaṃ tattha tattha iṭṭhakadvārakavāṭayojanavasena yantabaddhaudakanikkhamanatumbāni. Kammantoti kasikammakaraṇaṭṭhānaṃ. Dāsagāmāti dāsānaṃ vasanagāmā.
ਓਸਾਪੇਤ੍વਾਤਿ ਪਕ੍ਖਿਪਿਤ੍વਾ। ਆਕਪ੍ਪਕੁਤ੍ਤવਸੇਨਾਤਿ ਆਕਾਰવਸੇਨ ਕਿਰਿਯਾવਸੇਨ ਚ। ਅਨਨੁਚ੍ਛવਿਕਨ੍ਤਿ ਪਬ੍ਬਜਿਤવੇਸਸ੍ਸ ਅਨਨੁਰੂਪਂ। ਤਸ੍ਸ ਮਤ੍ਥਕੇਤਿ ਦ੍વੇਧਾਪਥਸ੍ਸ ਦ੍વਿਧਾਭੂਤਟ੍ਠਾਨੇ।
Osāpetvāti pakkhipitvā. Ākappakuttavasenāti ākāravasena kiriyāvasena ca. Ananucchavikanti pabbajitavesassa ananurūpaṃ. Tassa matthaketi dvedhāpathassa dvidhābhūtaṭṭhāne.
ਏਤੇਸਂ ਸਙ੍ਗਹਂ ਕਾਤੁਂ વਟ੍ਟਤੀਤਿ ਨਿਸੀਦੀਤਿ ਸਮ੍ਬਨ੍ਧੋ। ਸਾ ਪਨ ਸਤ੍ਥੁ ਤਤ੍ਥ ਨਿਸਜ੍ਜਾ ਏਦਿਸੀਤਿ ਦਸ੍ਸੇਤੁਂ ‘‘ਨਿਸੀਦਨ੍ਤੋ ਪਨਾ’’ਤਿਆਦਿ વੁਤ੍ਤਂ। ਤਤ੍ਥ ਯਾ ਬੁਦ੍ਧਾਨਂ ਅਪਰਿਮਿਤਕਾਲਸਙ੍ਗਹਿਤਾ ਅਚਿਨ੍ਤੇਯ੍ਯਾਪਰਿਮੇਯ੍ਯਪੁਞ੍ਞਸਮ੍ਭਾਰੂਪਚਯਨਿਬ੍ਬਤ੍ਤਾ ਨਿਰੂਪਿਤਸਭਾવਬੁਦ੍ਧਗੁਣવਿਜ੍ਜੋਤਿਤਾ ਲਕ੍ਖਣਾਨੁਬ੍ਯਞ੍ਜਨਸਮੁਜ੍ਜਲਾ ਬ੍ਯਾਮਪ੍ਪਭਾਕੇਤੁਮਾਲਾਲਙ੍ਕਤਾ ਸਭਾવਸਿਦ੍ਧਤਾਯ ਅਕਿਤ੍ਤਿਮਾ ਰੂਪਕਾਯਸਿਰੀ, ਤਂਯੇવ ਮਹਾਕਸ੍ਸਪਸ੍ਸ ਅਦਿਟ੍ਠਪੁਬ੍ਬਂ ਪਸਾਦਸਂવਡ੍ਢਨਤ੍ਥਂ ਅਨਿਗ੍ਗਹੇਤ੍વਾ ਨਿਸਿਨ੍ਨੋ ਭਗવਾ ‘‘ਬੁਦ੍ਧવੇਸਂ ਗਹੇਤ੍વਾ…ਪੇ॰… ਨਿਸੀਦੀ’’ਤਿ વੁਤ੍ਤੋ। ਅਸੀਤਿਹਤ੍ਥਂ ਪਦੇਸਂ ਬ੍ਯਾਪੇਤ੍વਾ ਪવਤ੍ਤਿਯਾ ‘‘ਅਸੀਤਿਹਤ੍ਥਾ’’ਤਿ વੁਤ੍ਤਾ। ਸਤਸਾਖੋਤਿ ਬਹੁਸਾਖੋ ਅਨੇਕਸਾਖੋ। ਸੁવਣ੍ਣવਣ੍ਣੋ ਅਹੋਸਿ ਨਿਰਨ੍ਤਰਂ ਬੁਦ੍ਧਰਸ੍ਮੀਹਿ ਸਮਨ੍ਤਤੋ ਸਮੋਕਿਣ੍ਣਤ੍ਤਾ। ਏવਂ વੁਤ੍ਤਪ੍ਪਕਾਰੇਨ વੇਦਿਤਬ੍ਬਾ।
Etesaṃ saṅgahaṃ kātuṃ vaṭṭatīti nisīdīti sambandho. Sā pana satthu tattha nisajjā edisīti dassetuṃ ‘‘nisīdanto panā’’tiādi vuttaṃ. Tattha yā buddhānaṃ aparimitakālasaṅgahitā acinteyyāparimeyyapuññasambhārūpacayanibbattā nirūpitasabhāvabuddhaguṇavijjotitā lakkhaṇānubyañjanasamujjalā byāmappabhāketumālālaṅkatā sabhāvasiddhatāya akittimā rūpakāyasirī, taṃyeva mahākassapassa adiṭṭhapubbaṃ pasādasaṃvaḍḍhanatthaṃ aniggahetvā nisinno bhagavā ‘‘buddhavesaṃ gahetvā…pe… nisīdī’’ti vutto. Asītihatthaṃ padesaṃ byāpetvā pavattiyā ‘‘asītihatthā’’ti vuttā. Satasākhoti bahusākho anekasākho. Suvaṇṇavaṇṇo ahosi nirantaraṃ buddharasmīhi samantato samokiṇṇattā. Evaṃ vuttappakārena veditabbā.
ਰਾਜਗਹਂ ਨਾਲ਼ਨ੍ਦਨ੍ਤਿ ਚ ਸਾਮਿਅਤ੍ਥੇ ਉਪਯੋਗવਚਨਂ ਅਨ੍ਤਰਾਸਦ੍ਦਯੋਗਤੋਤਿ ਆਹ ‘‘ਰਾਜਗਹਸ੍ਸ ਨਾਲ਼ਨ੍ਦਾਯ ਚਾ’’ਤਿ। ਨ ਹਿ ਮੇ ਇਤੋ ਅਞ੍ਞੇਨ ਸਤ੍ਥਾਰਾ ਭવਿਤੁਂ ਸਕ੍ਕਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਸਤ੍ਤਾਨਂ ਯਥਾਰਹਂ ਅਨੁਸਾਸਨਸਮਤ੍ਥਸ੍ਸ ਅਞ੍ਞਸ੍ਸ ਸਦੇવਕੇ ਅਭਾવਤੋ। ਨ ਹਿ ਮੇ ਇਤੋ ਅਞ੍ਞੇਨ ਸੁਗਤੇਨ ਭવਿਤੁਂ ਸਕ੍ਕਾ ਸੋਭਨਗਮਨਗੁਣਗਣਯੁਤ੍ਤਸ੍ਸ ਅਞ੍ਞਸ੍ਸ ਅਭਾવਤੋ। ਨ ਹਿ ਮੇ ਇਤੋ ਅਞ੍ਞੇਨ ਸਮ੍ਮਾਸਮ੍ਬੁਦ੍ਧੇਨ ਭવਿਤੁਂ ਸਕ੍ਕਾ ਸਮ੍ਮਾ ਸਬ੍ਬਧਮ੍ਮਾਨਂ ਸਯਮ੍ਭੁਞਾਣੇਨ ਅਭਿਸਮ੍ਬੁਦ੍ਧਸ੍ਸ ਅਭਾવਤੋ। ਇਮਿਨਾਤਿ ‘‘ਸਤ੍ਥਾ ਮੇ, ਭਨ੍ਤੇ’’ਤਿ ਇਮਿਨਾ વਚਨੇਨ।
Rājagahaṃ nāḷandanti ca sāmiatthe upayogavacanaṃ antarāsaddayogatoti āha ‘‘rājagahassa nāḷandāya cā’’ti. Na hi me ito aññena satthārā bhavituṃ sakkā diṭṭhadhammikasamparāyikaparamatthehi sattānaṃ yathārahaṃ anusāsanasamatthassa aññassa sadevake abhāvato. Na hi me ito aññena sugatena bhavituṃ sakkā sobhanagamanaguṇagaṇayuttassa aññassa abhāvato. Na hi me ito aññena sammāsambuddhena bhavituṃ sakkā sammā sabbadhammānaṃ sayambhuñāṇena abhisambuddhassa abhāvato. Imināti ‘‘satthā me, bhante’’ti iminā vacanena.
ਅਜਾਨਮਾਨੋવ ਸਬ੍ਬਞ੍ਞੇਯ੍ਯਨ੍ਤਿ ਅਧਿਪ੍ਪਾਯੋ। ਸਬ੍ਬਚੇਤਸਾਤਿ ਸਬ੍ਬਅਜ੍ਝਤ੍ਤਿਕਙ੍ਗਪਰਿਪੁਣ੍ਣਚੇਤਸਾ। ਸਮਨ੍ਨਾਗਤਨ੍ਤਿ ਸਮ੍ਪਨ੍ਨਂ ਸਮ੍ਮਦੇવ ਅਨੁ ਅਨੁ ਆਗਤਂ ਉਪਗਤਂ। ਫਲੇਯ੍ਯਾਤਿ વਿਦਾਲੇਯ੍ਯ। વਿਲਯਨ੍ਤਿ વਿਨਾਸਂ।
Ajānamānova sabbaññeyyanti adhippāyo. Sabbacetasāti sabbaajjhattikaṅgaparipuṇṇacetasā. Samannāgatanti sampannaṃ sammadeva anu anu āgataṃ upagataṃ. Phaleyyāti vidāleyya. Vilayanti vināsaṃ.
ਏવਂ ਸਿਕ੍ਖਿਤਬ੍ਬਨ੍ਤਿ ਇਦਾਨਿ વੁਚ੍ਚਮਾਨਾਕਾਰੇਨ। ਹਿਰੋਤ੍ਤਪ੍ਪਸ੍ਸ ਬਹਲਤਾ ਨਾਮ વਿਪੁਲਤਾਤਿ ਆਹ ‘‘ਮਹਨ੍ਤ’’ਨ੍ਤਿ। ਪਠਮਤਰਮੇવਾਤਿ ਪਗੇવ ਉਪਸਙ੍ਕਮਨਤੋ। ਤਥਾ ਅਤਿਮਾਨਪਹੀਨੋ ਅਸ੍ਸ, ਹਿਰਿਓਤ੍ਤਪ੍ਪਂ ਯਥਾ ਸਣ੍ਠਾਤਿ। ਕੁਸਲਸਨ੍ਨਿਸ੍ਸਿਤਨ੍ਤਿ ਅਨવਜ੍ਜਧਮ੍ਮਨਿਸ੍ਸਿਤਂ। ਅਟ੍ਠਿਕਨ੍ਤਿ ਤੇਨ ਧਮ੍ਮੇਨ ਅਟ੍ਠਿਕਂ। ਆਦਿਤੋ ਪਟ੍ਠਾਯ ਯਾવ ਪਰਿਯੋਸਾਨਾ ਸવਨਚਿਤ੍ਤਂ ‘‘ਸਬ੍ਬਚੇਤੋ’’ਤਿ ਅਧਿਪ੍ਪੇਤਨ੍ਤਿ ਆਹ ‘‘ਚਿਤ੍ਤਸ੍ਸ ਥੋਕਮ੍ਪਿ ਬਹਿ ਗਨ੍ਤੁਂ ਅਦੇਨ੍ਤੋ’’ਤਿ। ਤੇਨ ਸਮੋਧਾਨਂ ਦਸ੍ਸੇਤਿ। ਸਬ੍ਬੇਨ…ਪੇ॰… ਸਮਨ੍ਨਾਹਰਿਤ੍વਾ ਆਰਮ੍ਭਤੋ ਪਭੁਤਿ ਯਾવ ਦੇਸਨਾ ਨਿਪ੍ਫਨ੍ਨਾ, ਤਾવ ਅਨ੍ਤਰਨ੍ਤਰਾ ਪવਤ੍ਤੇਨ ਸਬ੍ਬੇਨ ਸਮਨ੍ਨਾਹਾਰਚਿਤ੍ਤੇਨ ਧਮ੍ਮਂਯੇવ ਸਮਨ੍ਨਾਹਰਿਤ੍વਾ। ਠਪਿਤਸੋਤੋਤਿ ਧਮ੍ਮੇ ਨਿਹਿਤਸੋਤੋ। ਓਦਹਿਤ੍વਾਤਿ ਅਪਿਹਿਤਂ ਕਤ੍વਾ। ਪਠਮਜ੍ਝਾਨવਸੇਨਾਤਿ ਇਦਂ ਅਸੁਭੇਸੁ ਤਸ੍ਸੇવ ਇਜ੍ਝਤੋ, ਇਤਰਤ੍ਥਞ੍ਚ ਸੁਖਸਮ੍ਪਯੁਤ੍ਤਤਾ વੁਤ੍ਤਾ।
Evaṃ sikkhitabbanti idāni vuccamānākārena. Hirottappassa bahalatā nāma vipulatāti āha ‘‘mahanta’’nti. Paṭhamataramevāti pageva upasaṅkamanato. Tathā atimānapahīno assa, hiriottappaṃ yathā saṇṭhāti. Kusalasannissitanti anavajjadhammanissitaṃ. Aṭṭhikanti tena dhammena aṭṭhikaṃ. Ādito paṭṭhāya yāva pariyosānā savanacittaṃ ‘‘sabbaceto’’ti adhippetanti āha ‘‘cittassa thokampi bahi gantuṃ adento’’ti. Tena samodhānaṃ dasseti. Sabbena…pe… samannāharitvā ārambhato pabhuti yāva desanā nipphannā, tāva antarantarā pavattena sabbena samannāhāracittena dhammaṃyeva samannāharitvā. Ṭhapitasototi dhamme nihitasoto. Odahitvāti apihitaṃ katvā. Paṭhamajjhānavasenāti idaṃ asubhesu tasseva ijjhato, itaratthañca sukhasampayuttatā vuttā.
ਸਂਸਾਰਸਾਗਰੇ ਪਰਿਬ੍ਭਮਨ੍ਤਸ੍ਸ ਇਣਟ੍ਠਾਨੇ ਤਿਟ੍ਠਨ੍ਤਿ ਕਿਲੇਸਾ ਆਸવਸਭਾવਾਪਾਦਨਤੋਤਿ ਆਹ ‘‘ਸਰਣੋਤਿ ਸਕਿਲੇਸੋ’’ਤਿ। ਚਤ੍ਤਾਰੋ ਹਿ ਪਰਿਭੋਗਾਤਿਆਦੀਸੁ ਯਂ વਤ੍ਤਬ੍ਬਂ, ਤਂ વਿਸੁਦ੍ਧਿਮਗ੍ਗਤ੍ਤਂ ਸਂવਣ੍ਣਨਾਸੁ વੁਤ੍ਤਨਯੇਨੇવ વੇਦਿਤਬ੍ਬਂ। ਏਤ੍ਥ ਚ ਭਗવਾ ਪਠਮਂ ਓવਾਦਂ ਥੇਰਸ੍ਸ ਬ੍ਰਾਹ੍ਮਣਜਾਤਿਕਤ੍ਤਾ ਜਾਤਿਮਾਨਪਹਾਨਤ੍ਥਮਭਾਸਿ, ਦੁਤਿਯਂ ਬਾਹੁਸਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਅਹਂਕਾਰਪਹਾਨਤ੍ਥਂ, ਤਤਿਯਂ ਉਪਧਿਸਮ੍ਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਅਤ੍ਤਸਿਨੇਹਪਹਾਨਤ੍ਥਂ। ਅਟ੍ਠਮੇ ਦਿવਸੇਤਿ ਭਗવਤਾ ਸਮਾਗਤਦਿવਸਤੋ ਅਟ੍ਠਮੇ ਦਿવਸੇ।
Saṃsārasāgare paribbhamantassa iṇaṭṭhāne tiṭṭhanti kilesā āsavasabhāvāpādanatoti āha ‘‘saraṇoti sakileso’’ti. Cattāro hi paribhogātiādīsu yaṃ vattabbaṃ, taṃ visuddhimaggattaṃ saṃvaṇṇanāsu vuttanayeneva veditabbaṃ. Ettha ca bhagavā paṭhamaṃ ovādaṃ therassa brāhmaṇajātikattā jātimānapahānatthamabhāsi, dutiyaṃ bāhusaccaṃ nissāya uppajjanakaahaṃkārapahānatthaṃ, tatiyaṃ upadhisampattiṃ nissāya uppajjanakaattasinehapahānatthaṃ. Aṭṭhame divaseti bhagavatā samāgatadivasato aṭṭhame divase.
ਮਗ੍ਗਤੋ ਓਕ੍ਕਮਨਂ ਪਠਮਤਰਂ ਭਗવਤਾ ਸਮਾਗਤਦਿવਸੇਯੇવ ਅਹੋਸਿ। ਯਦਿ ਅਰਹਤ੍ਤਾਧਿਗਮੋ ਪਚ੍ਛਾ, ਅਥ ਕਸ੍ਮਾ ਪਾਲ਼ਿਯਂ ਪਗੇવ ਸਿਦ੍ਧਂ વਿਯ વੁਤ੍ਤਨ੍ਤਿ ਆਹ ‘‘ਦੇਸਨਾવਾਰਸ੍ਸਾ’’ਤਿਆਦਿ। ‘‘ਸਤ੍ਤਾਹਮੇવ ਖ੍વਾਹਂ, ਆવੁਸੋ ਸਰਣੋ, ਰਟ੍ਠਪਿਣ੍ਡਂ ਭੁਞ੍ਜਿ’’ਨ੍ਤਿ વਤ੍વਾ ਅવਸਰਪ੍ਪਤ੍ਤਂ ਅਰਹਤ੍ਤਂ ਪવੇਦੇਨ੍ਤੋ ‘‘ਅਟ੍ਠਮਿਯਾ ਅਞ੍ਞਾ ਉਦਪਾਦੀ’’ਤਿ ਆਹ। ਅਯਮੇਤ੍ਥ ਦੇਸਨਾવਾਰਸ੍ਸ ਆਗਮੋ। ਤਤੋ ਪਰਂ ਭਗવਤਾ ਅਤ੍ਤਨੋ ਕਤਂ ਅਨੁਗ੍ਗਹਂ ਚੀવਰਪਰਿવਤ੍ਤਨਂ ਦਸ੍ਸੇਨ੍ਤੋ ‘‘ਅਥ ਖੋ, ਆવੁਸੋ’’ਤਿਆਦਿਮਾਹ।
Maggato okkamanaṃ paṭhamataraṃ bhagavatā samāgatadivaseyeva ahosi. Yadi arahattādhigamo pacchā, atha kasmā pāḷiyaṃ pageva siddhaṃ viya vuttanti āha ‘‘desanāvārassā’’tiādi. ‘‘Sattāhameva khvāhaṃ, āvuso saraṇo, raṭṭhapiṇḍaṃ bhuñji’’nti vatvā avasarappattaṃ arahattaṃ pavedento ‘‘aṭṭhamiyā aññā udapādī’’ti āha. Ayamettha desanāvārassa āgamo. Tato paraṃ bhagavatā attano kataṃ anuggahaṃ cīvaraparivattanaṃ dassento ‘‘atha kho, āvuso’’tiādimāha.
ਅਨ੍ਤਨ੍ਤੇਨਾਤਿ ਚਤੁਗ੍ਗੁਣਂ ਕਤ੍વਾ ਪਞ੍ਞਤ੍ਤਾਯ ਸਙ੍ਘਾਟਿਯਾ ਅਨ੍ਤਨ੍ਤੇਨ। ਜਾਤਿਪਂਸੁਕੂਲਿਕੇਨ…ਪੇ॰… ਭવਿਤੁਂ વਟ੍ਟਤੀਤਿ ਏਤੇਨ ਪੁਬ੍ਬੇ ਜਾਤਿਆਰਞ੍ਞਕਗ੍ਗਹਣੇਨ ਚ ਤੇਰਸ ਧੁਤਙ੍ਗਾ ਗਹਿਤਾ ਏવਾਤਿ ਦਟ੍ਠਬ੍ਬਂ। ਅਨੁਚ੍ਛવਿਕਂ ਕਾਤੁਨ੍ਤਿ ਅਨੁਰੂਪਂ ਪਟਿਪਤ੍ਤਿਂ ਪਟਿਪਜ੍ਜਿਤੁਂ। ਥੇਰੋ ਪਾਰੁਪੀਤਿ ਸਮ੍ਬਨ੍ਧੋ।
Antantenāti catugguṇaṃ katvā paññattāya saṅghāṭiyā antantena. Jātipaṃsukūlikena…pe… bhavituṃ vaṭṭatīti etena pubbe jātiāraññakaggahaṇena ca terasa dhutaṅgā gahitā evāti daṭṭhabbaṃ. Anucchavikaṃ kātunti anurūpaṃ paṭipattiṃ paṭipajjituṃ. Thero pārupīti sambandho.
ਭਗવਤੋ ਓવਾਦਂ ਭਗવਤੋ વਾ ਧਮ੍ਮਕਾਯਂ ਨਿਸ੍ਸਾਯ ਉਰਸ੍ਸ વਸੇਨ ਜਾਤੋਤਿ ਓਰਸੋ। ਭਗવਤੋ વਾ ਧਮ੍ਮਸਰੀਰਸ੍ਸ ਮੁਖਤੋ ਸਤ੍ਤਤਿਂਸਬੋਧਿਪਕ੍ਖਿਯਤੋ ਜਾਤੋ। ਤੇਨੇવ ਧਮ੍ਮਜਾਤਧਮ੍ਮਨਿਮ੍ਮਿਤਭਾવੋਪਿ ਸਂવਣ੍ਣਿਤੋਤਿ ਦਟ੍ਠਬ੍ਬੋ। ਓવਾਦਧਮ੍ਮੋ ਏવ ਸਤ੍ਥਾਰਾ ਦਾਤਬ੍ਬਤੋ ਥੇਰੇਨ ਆਦਾਤਬ੍ਬਤੋ ਓવਾਦਧਮ੍ਮਦਾਯਾਦੋ, ਓવਾਦਧਮ੍ਮਦਾਯਜ੍ਜੋਤਿ ਅਤ੍ਥੋ, ਤਂ ਅਰਹਤੀਤਿ। ਏਸ ਨਯੋ ਸੇਸਪਦੇਸੁਪਿ।
Bhagavato ovādaṃ bhagavato vā dhammakāyaṃ nissāya urassa vasena jātoti oraso. Bhagavato vā dhammasarīrassa mukhato sattatiṃsabodhipakkhiyato jāto. Teneva dhammajātadhammanimmitabhāvopi saṃvaṇṇitoti daṭṭhabbo. Ovādadhammo eva satthārā dātabbato therena ādātabbato ovādadhammadāyādo, ovādadhammadāyajjoti attho, taṃ arahatīti. Esa nayo sesapadesupi.
‘‘ਪਬ੍ਬਜ੍ਜਾ ਚ ਪਰਿਸੋਧਿਤਾ’’ਤਿ વਤ੍વਾ ਤਸ੍ਸਾ ਸਮ੍ਮਦੇવ ਸੋਧਿਤਭਾવਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ, ‘‘ਆવੁਸੋ, ਯਸ੍ਸਾ’’ਤਿਆਦਿ વੁਤ੍ਤਂ। ਤਤ੍ਥ ਏવਨ੍ਤਿ ਯਥਾ ਅਹਂ ਲਭਿਂ, ਏવਂ ਸੋ ਸਤ੍ਥੁ ਸਨ੍ਤਿਕਾ ਲਭਤੀਤਿ ਯੋਜਨਾ। ਸੀਹਨਾਦਂ ਨਦਿਤੁਨ੍ਤਿ ਏਤ੍ਥਾਪਿ ਸੀਹਨਾਦਨਦਨਾ ਨਾਮ ਦੇਸਨਾવ, ਥੇਰੋ ਸਤ੍ਥਾਰਾ ਅਤ੍ਤਨੋ ਕਤਾਨੁਗ੍ਗਹਮੇવ ਅਨਨ੍ਤਰਸੁਤ੍ਤੇ વੁਤ੍ਤਨਯੇਨ ਉਲ੍ਲਿਙ੍ਗੇਤਿ, ਨ ਅਞ੍ਞਥਾ। ਨ ਹਿ ਮਹਾਥੇਰੋ ਕੇવਲਂ ਅਤ੍ਤਨੋ ਗੁਣਾਨੁਭਾવਂ વਿਭਾવੇਤਿ। ਸੇਸਨ੍ਤਿ ਯਂ ਇਧ ਅਸਂવਣ੍ਣਿਤਂ। ਪੁਰਿਮਨਯੇਨੇવਾਤਿ ਅਨਨ੍ਤਰਸੁਤ੍ਤੇ વੁਤ੍ਤਨਯੇਨੇવ।
‘‘Pabbajjā ca parisodhitā’’ti vatvā tassā sammadeva sodhitabhāvaṃ byatirekamukhena dassetuṃ, ‘‘āvuso, yassā’’tiādi vuttaṃ. Tattha evanti yathā ahaṃ labhiṃ, evaṃ so satthu santikā labhatīti yojanā. Sīhanādaṃ naditunti etthāpi sīhanādanadanā nāma desanāva, thero satthārā attano katānuggahameva anantarasutte vuttanayena ulliṅgeti, na aññathā. Na hi mahāthero kevalaṃ attano guṇānubhāvaṃ vibhāveti. Sesanti yaṃ idha asaṃvaṇṇitaṃ. Purimanayenevāti anantarasutte vuttanayeneva.
ਚੀવਰਸੁਤ੍ਤવਣ੍ਣਨਾ ਨਿਟ੍ਠਿਤਾ।
Cīvarasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੧. ਚੀવਰਸੁਤ੍ਤਂ • 11. Cīvarasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧੧. ਚੀવਰਸੁਤ੍ਤવਣ੍ਣਨਾ • 11. Cīvarasuttavaṇṇanā
