| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
9. சீவரவிப்பவாஸவினிச்ச²யகதா²
9. Cīvaravippavāsavinicchayakathā
51. சீவரேனவினாவாஸோதி திசீவராதி⁴ட்டா²னேன அதி⁴ட்டி²தானங் திண்ணங் சீவரானங் அஞ்ஞதரேன விப்பவாஸோ. ஏவங் அதி⁴ட்டி²தேஸு ஹி தீஸு சீவரேஸு ஏகேனபி வினா வஸிதுங் ந வட்டதி, வஸந்தஸ்ஸ ஸஹ அருணுக்³க³மனா சீவரங் நிஸ்ஸக்³கி³யங் ஹோதி, தஸ்மா அருணுக்³க³மனஸமயே சீவரங் அட்³ட⁴தெய்யரதனப்பமாணே ஹத்த²பாஸே கத்வா வஸிதப்³ப³ங். கா³மனிவேஸனஉதோ³ஸிதஅட்³ட³மாளபாஸாத³ஹம்மியனாவாஸத்த²கெ²த்தத⁴ஞ்ஞகரணஆராமவிஹாரருக்க²மூலஅஜ்ஜோ²காஸேஸு பன அயங் விஸேஸோ (பாரா॰ அட்ட²॰ 2.477-8) – ஸசே ஏகஸ்ஸ ரஞ்ஞோ கா³மபோ⁴ஜகஸ்ஸ வா ஸந்தகோ கா³மோ ஹோதி, யேன கேனசி பாகாரேன வா வதியா வா பரிகா²ய வா பரிக்கி²த்தோ ச, ஏவரூபே கா³மே சீவரங் நிக்கி²பித்வா கா³மப்³ப⁴ந்தரே யத்த² கத்த²சி யதா²ருசிதட்டா²னே அருணங் உட்டா²பேதுங் வட்டதி. ஸசே பன அபரிக்கி²த்தோ ஹோதி, ஏவரூபே கா³மே யஸ்மிங் க⁴ரே சீவரங் நிக்கி²த்தங், தஸ்மிங் வத்த²ப்³ப³ங், தஸ்ஸ வா க⁴ரஸ்ஸ ஹத்த²பாஸே ஸமந்தா அட்³ட⁴தெய்யரதனப்³ப⁴ந்தரே வஸிதப்³ப³ங். தங் பமாணங் அதிக்கமித்வா ஸசேபி இத்³தி⁴மா பி⁴க்கு² ஆகாஸே அருணங் உட்டா²பேதி, சீவரங் நிஸ்ஸக்³கி³யமேவ ஹோதி.
51.Cīvarenavināvāsoti ticīvarādhiṭṭhānena adhiṭṭhitānaṃ tiṇṇaṃ cīvarānaṃ aññatarena vippavāso. Evaṃ adhiṭṭhitesu hi tīsu cīvaresu ekenapi vinā vasituṃ na vaṭṭati, vasantassa saha aruṇuggamanā cīvaraṃ nissaggiyaṃ hoti, tasmā aruṇuggamanasamaye cīvaraṃ aḍḍhateyyaratanappamāṇe hatthapāse katvā vasitabbaṃ. Gāmanivesanaudositaaḍḍamāḷapāsādahammiyanāvāsatthakhettadhaññakaraṇaārāmavihārarukkhamūlaajjhokāsesu pana ayaṃ viseso (pārā. aṭṭha. 2.477-8) – sace ekassa rañño gāmabhojakassa vā santako gāmo hoti, yena kenaci pākārena vā vatiyā vā parikhāya vā parikkhitto ca, evarūpe gāme cīvaraṃ nikkhipitvā gāmabbhantare yattha katthaci yathārucitaṭṭhāne aruṇaṃ uṭṭhāpetuṃ vaṭṭati. Sace pana aparikkhitto hoti, evarūpe gāme yasmiṃ ghare cīvaraṃ nikkhittaṃ, tasmiṃ vatthabbaṃ, tassa vā gharassa hatthapāse samantā aḍḍhateyyaratanabbhantare vasitabbaṃ. Taṃ pamāṇaṃ atikkamitvā sacepi iddhimā bhikkhu ākāse aruṇaṃ uṭṭhāpeti, cīvaraṃ nissaggiyameva hoti.
ஸசே நானாராஜூனங் வா போ⁴ஜகானங் வா கா³மோ ஹோதி வேஸாலீகுஸினாராதி³ஸதி³ஸோ பரிக்கி²த்தோ ச, ஏவரூபே கா³மே யஸ்மிங் க⁴ரே சீவரங் நிக்கி²த்தங், தத்த² வா வத்த²ப்³ப³ங், தத்த² ஸத்³த³ஸங்க⁴ட்டனேன வா ஜனஸம்பா³தே⁴ன வா வஸிதுங் அஸக்கொந்தேன ஸபா⁴யே வா வத்த²ப்³ப³ங் நக³ரத்³வாரமூலே வா. தத்ராபி வஸிதுங் அஸக்கொந்தேன யத்த² கத்த²சி பா²ஸுகட்டா²னே வஸித்வா அந்தோஅருணே ஆக³ம்ம தேஸங்யேவ ஸபா⁴யனக³ரத்³வாரமூலானங் ஹத்த²பாஸே வஸிதப்³ப³ங். க⁴ரஸ்ஸ பன சீவரஸ்ஸ வா ஹத்த²பாஸே வத்தப்³ப³மேவ நத்தி².
Sace nānārājūnaṃ vā bhojakānaṃ vā gāmo hoti vesālīkusinārādisadiso parikkhitto ca, evarūpe gāme yasmiṃ ghare cīvaraṃ nikkhittaṃ, tattha vā vatthabbaṃ, tattha saddasaṅghaṭṭanena vā janasambādhena vā vasituṃ asakkontena sabhāye vā vatthabbaṃ nagaradvāramūle vā. Tatrāpi vasituṃ asakkontena yattha katthaci phāsukaṭṭhāne vasitvā antoaruṇe āgamma tesaṃyeva sabhāyanagaradvāramūlānaṃ hatthapāse vasitabbaṃ. Gharassa pana cīvarassa vā hatthapāse vattabbameva natthi.
ஸசே க⁴ரே அட்ட²பெத்வா ‘‘ஸபா⁴யே ட²பெஸ்ஸாமீ’’தி ஸபா⁴யங் க³ச்ச²ந்தோ ஹத்த²ங் பஸாரெத்வா ‘‘ஹந்தி³மங் சீவரங் ட²பேஹீ’’தி ஏவங் நிக்கே²பஸுகே² ஹத்த²பாஸக³தே கிஸ்மிஞ்சி ஆபணே சீவரங் நிக்கி²பதி, தேன புரிமனயேனேவ ஸபா⁴யே வா வத்த²ப்³ப³ங், த்³வாரமூலே வா தேஸங் ஹத்த²பாஸே வா வஸிதப்³ப³ங்.
Sace ghare aṭṭhapetvā ‘‘sabhāye ṭhapessāmī’’ti sabhāyaṃ gacchanto hatthaṃ pasāretvā ‘‘handimaṃ cīvaraṃ ṭhapehī’’ti evaṃ nikkhepasukhe hatthapāsagate kismiñci āpaṇe cīvaraṃ nikkhipati, tena purimanayeneva sabhāye vā vatthabbaṃ, dvāramūle vā tesaṃ hatthapāse vā vasitabbaṃ.
ஸசே நக³ரஸ்ஸ ப³ஹூனிபி த்³வாரானி ஹொந்தி ப³ஹூனி ச ஸபா⁴யானி, ஸப்³ப³த்த² வஸிதுங் ந வட்டதி. யஸ்ஸா பன வீதி²யா சீவரங் ட²பிதங், யங் தஸ்ஸா ஸம்முக²ட்டா²னே ஸபா⁴யஞ்ச த்³வாரஞ்ச, தஸ்ஸ ஸபா⁴யஸ்ஸ ச த்³வாரஸ்ஸ ச ஹத்த²பாஸே வஸிதப்³ப³ங். ஏவஞ்ஹி ஸதி ஸக்கா சீவரஸ்ஸ பவத்திங் ஜானிதுங் . ஸபா⁴யங் பன க³ச்ச²ந்தேன யஸ்ஸ ஆபணிகஸ்ஸ ஹத்தே² நிக்கி²த்தங், ஸசே ஸோ தங் சீவரங் அதிஹரித்வா க⁴ரே நிக்கி²பதி, வீதி²ஹத்த²பாஸோ ந ரக்க²தி, க⁴ரஸ்ஸ ஹத்த²பாஸே வத்த²ப்³ப³ங். ஸசே மஹந்தங் க⁴ரங் ஹோதி த்³வே வீதி²யோ ப²ரித்வா டி²தங், புரதோ வா பச்ச²தோ வா ஹத்த²பாஸேயேவ அருணங் உட்டா²பேதப்³ப³ங். ஸபா⁴யே நிக்கி²பித்வா பன ஸபா⁴யே வா தஸ்ஸ ஸம்முகே² நக³ரத்³வாரமூலே வா தேஸங்யேவ ஹத்த²பாஸே வா அருணங் உட்டா²பேதப்³ப³ங். ஸசே பன கா³மோ அபரிக்கி²த்தோ ஹோதி, யஸ்மிங் க⁴ரே சீவரங் நிக்கி²த்தங், தஸ்மிங் க⁴ரே தஸ்ஸ க⁴ரஸ்ஸ வா ஹத்த²பாஸே வத்த²ப்³ப³ங்.
Sace nagarassa bahūnipi dvārāni honti bahūni ca sabhāyāni, sabbattha vasituṃ na vaṭṭati. Yassā pana vīthiyā cīvaraṃ ṭhapitaṃ, yaṃ tassā sammukhaṭṭhāne sabhāyañca dvārañca, tassa sabhāyassa ca dvārassa ca hatthapāse vasitabbaṃ. Evañhi sati sakkā cīvarassa pavattiṃ jānituṃ . Sabhāyaṃ pana gacchantena yassa āpaṇikassa hatthe nikkhittaṃ, sace so taṃ cīvaraṃ atiharitvā ghare nikkhipati, vīthihatthapāso na rakkhati, gharassa hatthapāse vatthabbaṃ. Sace mahantaṃ gharaṃ hoti dve vīthiyo pharitvā ṭhitaṃ, purato vā pacchato vā hatthapāseyeva aruṇaṃ uṭṭhāpetabbaṃ. Sabhāye nikkhipitvā pana sabhāye vā tassa sammukhe nagaradvāramūle vā tesaṃyeva hatthapāse vā aruṇaṃ uṭṭhāpetabbaṃ. Sace pana gāmo aparikkhitto hoti, yasmiṃ ghare cīvaraṃ nikkhittaṃ, tasmiṃ ghare tassa gharassa vā hatthapāse vatthabbaṃ.
ஸசே (பாரா॰ 480) ஏககுலஸ்ஸ ஸந்தகங் நிவேஸனங் ஹோதி பரிக்கி²த்தஞ்ச நானாக³ப்³ப⁴ங் நானாஓவரகங், அந்தோனிவேஸனே சீவரங் நிக்கி²பித்வா அந்தோனிவேஸனே வத்த²ப்³ப³ங். ஸசே அபரிக்கி²த்தங், யஸ்மிங் க³ப்³பே⁴ சீவரங் நிக்கி²த்தங் ஹோதி, தஸ்மிங் க³ப்³பே⁴ வத்த²ப்³ப³ங் க³ப்³ப⁴ஸ்ஸ ஹத்த²பாஸே வா. ஸசே நானாகுலஸ்ஸ நிவேஸனங் ஹோதி பரிக்கி²த்தஞ்ச நானாக³ப்³ப⁴ங் நானாஓவரகங், யஸ்மிங் க³ப்³பே⁴ சீவரங் நிக்கி²த்தங் ஹோதி, தஸ்மிங் க³ப்³பே⁴ வத்த²ப்³ப³ங், ஸப்³பே³ஸங் ஸாதா⁴ரணே க⁴ரத்³வாரமூலே வா க³ப்³ப⁴ஸ்ஸ வா க⁴ரத்³வாரமூலஸ்ஸ வா ஹத்த²பாஸே. ஸசே அபரிக்கி²த்தங் ஹோதி, யஸ்மிங் க³ப்³பே⁴ சீவரங் நிக்கி²த்தங், தஸ்மிங் க³ப்³பே⁴ வத்த²ப்³ப³ங் க³ப்³ப⁴ஸ்ஸ வா ஹத்த²பாஸே. உதோ³ஸிதஅட்³ட³மாளபாஸாத³ஹம்மியேஸுபி நிவேஸனே வுத்தனயேனேவ வினிச்ச²யோ வேதி³தப்³போ³.
Sace (pārā. 480) ekakulassa santakaṃ nivesanaṃ hoti parikkhittañca nānāgabbhaṃ nānāovarakaṃ, antonivesane cīvaraṃ nikkhipitvā antonivesane vatthabbaṃ. Sace aparikkhittaṃ, yasmiṃ gabbhe cīvaraṃ nikkhittaṃ hoti, tasmiṃ gabbhe vatthabbaṃ gabbhassa hatthapāse vā. Sace nānākulassa nivesanaṃ hoti parikkhittañca nānāgabbhaṃ nānāovarakaṃ, yasmiṃ gabbhe cīvaraṃ nikkhittaṃ hoti, tasmiṃ gabbhe vatthabbaṃ, sabbesaṃ sādhāraṇe gharadvāramūle vā gabbhassa vā gharadvāramūlassa vā hatthapāse. Sace aparikkhittaṃ hoti, yasmiṃ gabbhe cīvaraṃ nikkhittaṃ, tasmiṃ gabbhe vatthabbaṃ gabbhassa vā hatthapāse. Udositaaḍḍamāḷapāsādahammiyesupi nivesane vuttanayeneva vinicchayo veditabbo.
ஸசே ஏககுலஸ்ஸ நாவா ஹோதி, அந்தோனாவாயங் சீவரங் நிக்கி²பித்வா அந்தோனாவாயங் வத்த²ப்³ப³ங். ஸசே நானாகுலஸ்ஸ நாவா ஹோதி நானாக³ப்³பா⁴ நானாஓவரகா, யஸ்மிங் ஓவரகே சீவரங் நிக்கி²த்தங் ஹோதி, தஸ்மிங் ஓவரகே வத்த²ப்³ப³ங் ஓவரகஸ்ஸ ஹத்த²பாஸே வா.
Sace ekakulassa nāvā hoti, antonāvāyaṃ cīvaraṃ nikkhipitvā antonāvāyaṃ vatthabbaṃ. Sace nānākulassa nāvā hoti nānāgabbhā nānāovarakā, yasmiṃ ovarake cīvaraṃ nikkhittaṃ hoti, tasmiṃ ovarake vatthabbaṃ ovarakassa hatthapāse vā.
ஸசே ஏககுலஸ்ஸ ஸத்தோ² ஹோதி, தஸ்மிங் ஸத்தே² சீவரங் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரங் ந விஜஹிதப்³ப³ங். ஏகங் அப்³ப⁴ந்தரங் அட்ட²வீஸதிஹத்த²ங் ஹோதி. ஸசே நானாகுலஸ்ஸ ஸத்தோ² ஹோதி, ஸத்தே² சீவரங் நிக்கி²பித்வா சீவரஸ்ஸ ஹத்த²பாஸே வஸிதப்³ப³ங். ஸசே ஸத்தோ² க³ச்ச²ந்தோ கா³மங் வா நதி³ங் வா பரியாதி³யித்வா திட்ட²தி, அந்தோபவிட்டே²ன ஸத்³தி⁴ங் ஏகாப³த்³தோ⁴ ஹுத்வா ஓரஞ்ச பாரஞ்ச ப²ரித்வா டி²தோ ஹோதி, ஸத்த²பரிஹாரோ லப்³ப⁴தி. அத² கா³மே வா நதி³யா வா பரியாபன்னோ ஹோதி, கா³மபரிஹாரோ சேவ நதீ³பரிஹாரோ ச லப்³ப⁴தி. ஸசே விஹாரஸீமங் அதிக்கமித்வா திட்ட²தி, அந்தோஸீமாய ச சீவரங் ஹோதி, விஹாரங் க³ந்த்வா வஸிதப்³ப³ங். ஸசே ப³ஹிஸீமாய சீவரங் ஹோதி, ஸத்த²ஸமீபேயேவ வஸிதப்³ப³ங். ஸசே க³ச்ச²ந்தோ ஸத்தோ² ஸகடே வா ப⁴க்³கே³ கோ³ணே வா நட்டே² அந்தரா சி²ஜ்ஜதி, யஸ்மிங் கொட்டா²ஸே சீவரங் நிக்கி²த்தங், தத்த² வஸிதப்³ப³ங்.
Sace ekakulassa sattho hoti, tasmiṃ satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Ekaṃ abbhantaraṃ aṭṭhavīsatihatthaṃ hoti. Sace nānākulassa sattho hoti, satthe cīvaraṃ nikkhipitvā cīvarassa hatthapāse vasitabbaṃ. Sace sattho gacchanto gāmaṃ vā nadiṃ vā pariyādiyitvā tiṭṭhati, antopaviṭṭhena saddhiṃ ekābaddho hutvā orañca pārañca pharitvā ṭhito hoti, satthaparihāro labbhati. Atha gāme vā nadiyā vā pariyāpanno hoti, gāmaparihāro ceva nadīparihāro ca labbhati. Sace vihārasīmaṃ atikkamitvā tiṭṭhati, antosīmāya ca cīvaraṃ hoti, vihāraṃ gantvā vasitabbaṃ. Sace bahisīmāya cīvaraṃ hoti, satthasamīpeyeva vasitabbaṃ. Sace gacchanto sattho sakaṭe vā bhagge goṇe vā naṭṭhe antarā chijjati, yasmiṃ koṭṭhāse cīvaraṃ nikkhittaṃ, tattha vasitabbaṃ.
ஸசே ஏககுலஸ்ஸ கெ²த்தங் ஹோதி பரிக்கி²த்தஞ்ச, அந்தோகெ²த்தே சீவரங் நிக்கி²பித்வா அந்தோகெ²த்தே வத்த²ப்³ப³ங். ஸசே அபரிக்கி²த்தங் ஹோதி, சீவரஸ்ஸ ஹத்த²பாஸே வஸிதப்³ப³ங். ஸசே நானாகுலஸ்ஸ கெ²த்தங் ஹோதி பரிக்கி²த்தஞ்ச, அந்தோகெ²த்தே சீவரங் நிக்கி²பித்வா த்³வாரமூலே வத்த²ப்³ப³ங் த்³வாரமூலஸ்ஸ ஹத்த²பாஸே வா. ஸசே அபரிக்கி²த்தங் ஹோதி, சீவரஸ்ஸ ஹத்த²பாஸே வஸிதப்³ப³ங்.
Sace ekakulassa khettaṃ hoti parikkhittañca, antokhette cīvaraṃ nikkhipitvā antokhette vatthabbaṃ. Sace aparikkhittaṃ hoti, cīvarassa hatthapāse vasitabbaṃ. Sace nānākulassa khettaṃ hoti parikkhittañca, antokhette cīvaraṃ nikkhipitvā dvāramūle vatthabbaṃ dvāramūlassa hatthapāse vā. Sace aparikkhittaṃ hoti, cīvarassa hatthapāse vasitabbaṃ.
ஸசே ஏககுலஸ்ஸ த⁴ஞ்ஞகரணங் ஹோதி பரிக்கி²த்தஞ்ச, அந்தோத⁴ஞ்ஞகரணே சீவரங் நிக்கி²பித்வா அந்தோத⁴ஞ்ஞகரணே வத்த²ப்³ப³ங். ஸசே அபரிக்கி²த்தங் ஹோதி, சீவரஸ்ஸ ஹத்த²பாஸே வஸிதப்³ப³ங். ஸசே நானாகுலஸ்ஸ த⁴ஞ்ஞகரணங் ஹோதி பரிக்கி²த்தஞ்ச, அந்தோத⁴ஞ்ஞகரணே சீவரங் நிக்கி²பித்வா த்³வாரமூலே வா வத்த²ப்³ப³ங் த்³வாரமூலஸ்ஸ வா ஹத்த²பாஸே. ஸசே அபரிக்கி²த்தங் ஹோதி, சீவரஸ்ஸ ஹத்த²பாஸே வஸிதப்³ப³ங். புப்பா²ராமப²லாராமேஸுபி கெ²த்தே வுத்தனயேனேவ வினிச்ச²யோ வேதி³தப்³போ³.
Sace ekakulassa dhaññakaraṇaṃ hoti parikkhittañca, antodhaññakaraṇe cīvaraṃ nikkhipitvā antodhaññakaraṇe vatthabbaṃ. Sace aparikkhittaṃ hoti, cīvarassa hatthapāse vasitabbaṃ. Sace nānākulassa dhaññakaraṇaṃ hoti parikkhittañca, antodhaññakaraṇe cīvaraṃ nikkhipitvā dvāramūle vā vatthabbaṃ dvāramūlassa vā hatthapāse. Sace aparikkhittaṃ hoti, cīvarassa hatthapāse vasitabbaṃ. Pupphārāmaphalārāmesupi khette vuttanayeneva vinicchayo veditabbo.
ஸசே ஏககுலஸ்ஸ விஹாரோ ஹோதி பரிக்கி²த்தோ ச, அந்தோவிஹாரே சீவரங் நிக்கி²பித்வா அந்தோவிஹாரே வத்த²ப்³ப³ங். ஸசே அபரிக்கி²த்தோ ஹோதி, யஸ்மிங் விஹாரே சீவரங் நிக்கி²த்தங், தஸ்மிங் வத்த²ப்³ப³ங் தஸ்ஸ விஹாரஸ்ஸ வா ஹத்த²பாஸே.
Sace ekakulassa vihāro hoti parikkhitto ca, antovihāre cīvaraṃ nikkhipitvā antovihāre vatthabbaṃ. Sace aparikkhitto hoti, yasmiṃ vihāre cīvaraṃ nikkhittaṃ, tasmiṃ vatthabbaṃ tassa vihārassa vā hatthapāse.
ஸசே ஏககுலஸ்ஸ ருக்க²மூலங் ஹோதி, யங் மஜ்ஜ²ன்ஹிகே காலே ஸமந்தா சா²யா ப²ரதி, அந்தோசா²யாய சீவரங் நிக்கி²பித்வா அந்தோசா²யாய வத்த²ப்³ப³ங். விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பிதங் நிஸ்ஸக்³கி³யமேவ ஹோதி, தஸ்மா தாதி³ஸஸ்ஸ ருக்க²ஸ்ஸ ஸாக²ச்சா²யாய வா க²ந்த⁴ச்சா²யாய வா ட²பேதப்³ப³ங். ஸசே ஸாகா²ய வா விடபே வா ட²பேதி, உபரி அஞ்ஞஸாக²ச்சா²யாய பு²ட்டோ²காஸேயேவ ட²பேதப்³ப³ங். கு²ஜ்ஜருக்க²ஸ்ஸ சா²யா தூ³ரங் க³ச்ச²தி, சா²யாய க³தட்டா²னே ட²பேதுங் வட்டதியேவ. ஸசே நானாகுலஸ்ஸ ருக்க²மூலங் ஹோதி, சீவரஸ்ஸ ஹத்த²பாஸே வஸிதப்³ப³ங்.
Sace ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Viraḷasākhassa pana rukkhassa ātapena phuṭṭhokāse ṭhapitaṃ nissaggiyameva hoti, tasmā tādisassa rukkhassa sākhacchāyāya vā khandhacchāyāya vā ṭhapetabbaṃ. Sace sākhāya vā viṭape vā ṭhapeti, upari aññasākhacchāyāya phuṭṭhokāseyeva ṭhapetabbaṃ. Khujjarukkhassa chāyā dūraṃ gacchati, chāyāya gataṭṭhāne ṭhapetuṃ vaṭṭatiyeva. Sace nānākulassa rukkhamūlaṃ hoti, cīvarassa hatthapāse vasitabbaṃ.
அஜ்ஜோ²காஸே பன அகா³மகே அரஞ்ஞே சீவரங் ட²பெத்வா தஸ்ஸ ஸமந்தா ஸத்தப்³ப⁴ந்தரே வஸிதப்³ப³ங். அகா³மகங் நாம அரஞ்ஞங் விஞ்ஜா²டவீஆதீ³ஸு வா ஸமுத்³த³மஜ்ஜே² வா மச்ச²ப³ந்தா⁴னங் அக³மனபதே² தீ³பகேஸு லப்³ப⁴தி. தாதி³ஸே அரஞ்ஞே மஜ்ஜே² டி²தஸ்ஸ ஸமந்தா ஸத்தப்³ப⁴ந்தரபரிச்சே²தோ³, வினிப்³பே³தே⁴ன சுத்³த³ஸ ஹொந்தி. மஜ்ஜே² நிஸின்னோ புரத்தி²மாய வா பச்சி²மாய வா தி³ஸாய பரியந்தே ட²பிதசீவரங் ரக்க²தி. ஸசே பன அருணுக்³க³மனஸமயே கேஸக்³க³மத்தம்பி புரத்தி²மங் தி³ஸங் க³ச்ச²தி, பச்சி²மாய தி³ஸாய சீவரங் நிஸ்ஸக்³கி³யங் ஹோதி. ஏஸ நயோ இதரஸ்மிங். நிஸ்ஸக்³கி³யங் பன சீவரங் அனிஸ்ஸஜ்ஜித்வா பரிபு⁴ஞ்ஜந்தோ து³க்கடங் ஆபஜ்ஜதி.
Ajjhokāse pana agāmake araññe cīvaraṃ ṭhapetvā tassa samantā sattabbhantare vasitabbaṃ. Agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Tādise araññe majjhe ṭhitassa samantā sattabbhantaraparicchedo, vinibbedhena cuddasa honti. Majjhe nisinno puratthimāya vā pacchimāya vā disāya pariyante ṭhapitacīvaraṃ rakkhati. Sace pana aruṇuggamanasamaye kesaggamattampi puratthimaṃ disaṃ gacchati, pacchimāya disāya cīvaraṃ nissaggiyaṃ hoti. Esa nayo itarasmiṃ. Nissaggiyaṃ pana cīvaraṃ anissajjitvā paribhuñjanto dukkaṭaṃ āpajjati.
52. ஸசே பதா⁴னிகோ பி⁴க்கு² ஸப்³ப³ரத்திங் பதா⁴னமனுயுஞ்ஜித்வா பச்சூஸஸமயே ‘‘நஹாயிஸ்ஸாமீ’’தி தீணி சீவரானி தீரே ட²பெத்வா நதி³ங் ஓதரதி, நஹாயந்தஸ்ஸேவ சஸ்ஸ அருணங் உட்ட²ஹதி, கிங் காதப்³ப³ங்? ஸோ ஹி யதி³ உத்தரித்வா சீவரங் நிவாஸேதி, நிஸ்ஸக்³கி³யங் சீவரங், அனிஸ்ஸஜ்ஜித்வா பரிபு⁴ஞ்ஜனபச்சயா து³க்கடங் ஆபஜ்ஜதி. அத² நக்³கோ³ க³ச்ச²தி, ஏவம்பி து³க்கடங் ஆபஜ்ஜதீதி? நாபஜ்ஜதி. ஸோ ஹி யாவ அஞ்ஞங் பி⁴க்கு²ங் தி³ஸ்வா வினயகம்மங் ந கரோதி, தாவ தேஸங் சீவரானங் அபரிபோ⁴கா³ரஹத்தா நட்ட²சீவரட்டா²னே டி²தோ ஹோதி, நட்ட²சீவரஸ்ஸ ச அகப்பியங் நாம நத்தி², தஸ்மா ஏகங் நிவாஸெத்வா த்³வே ஹத்தே²ன க³ஹெத்வா விஹாரங் க³ந்த்வா வினயகம்மங் காதப்³ப³ங். ஸசே தூ³ரே விஹாரோ ஹோதி, அந்தராமக்³கே³ மனுஸ்ஸா ஸஞ்சரந்தி, ஏகங் நிவாஸெத்வா ஏகங் பாருபித்வா ஏகங் அங்ஸகூடே ட²பெத்வா க³ந்தப்³ப³ங். ஸசே விஹாரே ஸபா⁴க³ங் பி⁴க்கு²ங் ந பஸ்ஸதி, பி⁴க்கா²சாரங் க³தா ஹொந்தி, ஸங்கா⁴டிங் ப³ஹிகா³மே ட²பெத்வா ஸந்தருத்தரேன ஆஸனஸாலங் க³ந்த்வா வினயகம்மங் காதப்³ப³ங். ஸசே ப³ஹிகா³மே சோரப⁴யங் ஹோதி, பாருபித்வா க³ந்தப்³ப³ங். ஸசே ஆஸனஸாலா ஸம்பா³தா⁴ ஹோதி, ஜனாகிண்ணா ந ஸக்கா ஏகமந்தே சீவரங் அபனெத்வா வினயகம்மங் காதுங், ஏகங் பி⁴க்கு²ங் ஆதா³ய ப³ஹிகா³மங் க³ந்த்வா வினயகம்மங் கத்வா சீவரானி பரிபு⁴ஞ்ஜிதப்³பா³னி.
52. Sace padhāniko bhikkhu sabbarattiṃ padhānamanuyuñjitvā paccūsasamaye ‘‘nahāyissāmī’’ti tīṇi cīvarāni tīre ṭhapetvā nadiṃ otarati, nahāyantasseva cassa aruṇaṃ uṭṭhahati, kiṃ kātabbaṃ? So hi yadi uttaritvā cīvaraṃ nivāseti, nissaggiyaṃ cīvaraṃ, anissajjitvā paribhuñjanapaccayā dukkaṭaṃ āpajjati. Atha naggo gacchati, evampi dukkaṭaṃ āpajjatīti? Nāpajjati. So hi yāva aññaṃ bhikkhuṃ disvā vinayakammaṃ na karoti, tāva tesaṃ cīvarānaṃ aparibhogārahattā naṭṭhacīvaraṭṭhāne ṭhito hoti, naṭṭhacīvarassa ca akappiyaṃ nāma natthi, tasmā ekaṃ nivāsetvā dve hatthena gahetvā vihāraṃ gantvā vinayakammaṃ kātabbaṃ. Sace dūre vihāro hoti, antarāmagge manussā sañcaranti, ekaṃ nivāsetvā ekaṃ pārupitvā ekaṃ aṃsakūṭe ṭhapetvā gantabbaṃ. Sace vihāre sabhāgaṃ bhikkhuṃ na passati, bhikkhācāraṃ gatā honti, saṅghāṭiṃ bahigāme ṭhapetvā santaruttarena āsanasālaṃ gantvā vinayakammaṃ kātabbaṃ. Sace bahigāme corabhayaṃ hoti, pārupitvā gantabbaṃ. Sace āsanasālā sambādhā hoti, janākiṇṇā na sakkā ekamante cīvaraṃ apanetvā vinayakammaṃ kātuṃ, ekaṃ bhikkhuṃ ādāya bahigāmaṃ gantvā vinayakammaṃ katvā cīvarāni paribhuñjitabbāni.
ஸசே தே²ரா பி⁴க்கூ² த³ஹரானங் ஹத்தே² பத்தசீவரங் த³த்வா மக்³க³ங் க³ச்ச²ந்தா பச்சி²மயாமே ஸயிதுகாமா ஹொந்தி, அத்தனோ அத்தனோ சீவரங் ஹத்த²பாஸே கத்வாவ ஸயிதப்³ப³ங். ஸசே க³ச்ச²ந்தானங்யேவ அஸம்பத்தேஸு த³ஹரேஸு அருணங் உக்³க³ச்ச²தி, சீவரங் நிஸ்ஸக்³கி³யங் ஹோதி, நிஸ்ஸயோ பன ந படிப்பஸ்ஸம்ப⁴தி. த³ஹரானம்பி புரதோ க³ச்ச²ந்தானங் தே²ரேஸு அஸம்பத்தேஸு ஏஸேவ நயோ. மக்³க³ங் விரஜ்ஜி²த்வா அரஞ்ஞே அஞ்ஞமஞ்ஞங் அபஸ்ஸந்தேஸுபி ஏஸேவ நயோ. ஸசே பன த³ஹரா ‘‘மயங், ப⁴ந்தே, முஹுத்தங் ஸயித்வா அஸுகஸ்மிங் நாம ஓகாஸே தும்ஹே ஸம்பாபுணிஸ்ஸாமா’’தி வத்வா யாவ அருணுக்³க³மனா ஸயந்தி, சீவரஞ்ச நிஸ்ஸக்³கி³யங் ஹோதி, நிஸ்ஸயோ ச படிப்பஸ்ஸம்ப⁴தி. த³ஹரே உய்யோஜெத்வா தே²ரேஸு ஸயந்தேஸுபி ஏஸேவ நயோ. த்³வேதா⁴பத²ங் தி³ஸ்வா தே²ரா ‘‘அயங் மக்³கோ³’’ , த³ஹரா ‘‘அயங் மக்³கோ³’’தி வத்வா அஞ்ஞமஞ்ஞஸ்ஸ வசனங் அக்³க³ஹெத்வா க³தா, ஸஹ அருணஸ்ஸ உக்³க³மனா சீவரானி ச நிஸ்ஸக்³கி³யானி ஹொந்தி, நிஸ்ஸயோ ச படிப்பஸ்ஸம்ப⁴தி. ஸசே த³ஹரா மக்³க³தோ ஓக்கம்ம ‘‘அந்தோஅருணேயேவ நிவத்திஸ்ஸாமா’’தி பே⁴ஸஜ்ஜத்தா²ய கா³மங் பவிஸித்வா ஆக³ச்ச²ந்தி, அஸம்பத்தானங்யேவ ச நேஸங் அருணோ உக்³க³ச்ச²தி, சீவரானி நிஸ்ஸக்³கி³யானி ஹொந்தி, நிஸ்ஸயோ பன ந படிப்பஸ்ஸம்ப⁴தி. ஸசே பன தே⁴னுப⁴யேன வா ஸுனக²ப⁴யேன வா முஹுத்தங் ட²த்வா ‘‘க³மிஸ்ஸாமா’’தி ட²த்வா வா நிஸீதி³த்வா வா க³ச்ச²ந்தி, அந்தரா அருணே உக்³க³தே சீவரானி ச நிஸ்ஸக்³கி³யானி ஹொந்தி, நிஸ்ஸயோ ச படிப்பஸ்ஸம்ப⁴தி.
Sace therā bhikkhū daharānaṃ hatthe pattacīvaraṃ datvā maggaṃ gacchantā pacchimayāme sayitukāmā honti, attano attano cīvaraṃ hatthapāse katvāva sayitabbaṃ. Sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhati. Daharānampi purato gacchantānaṃ theresu asampattesu eseva nayo. Maggaṃ virajjhitvā araññe aññamaññaṃ apassantesupi eseva nayo. Sace pana daharā ‘‘mayaṃ, bhante, muhuttaṃ sayitvā asukasmiṃ nāma okāse tumhe sampāpuṇissāmā’’ti vatvā yāva aruṇuggamanā sayanti, cīvarañca nissaggiyaṃ hoti, nissayo ca paṭippassambhati. Dahare uyyojetvā theresu sayantesupi eseva nayo. Dvedhāpathaṃ disvā therā ‘‘ayaṃ maggo’’ , daharā ‘‘ayaṃ maggo’’ti vatvā aññamaññassa vacanaṃ aggahetvā gatā, saha aruṇassa uggamanā cīvarāni ca nissaggiyāni honti, nissayo ca paṭippassambhati. Sace daharā maggato okkamma ‘‘antoaruṇeyeva nivattissāmā’’ti bhesajjatthāya gāmaṃ pavisitvā āgacchanti, asampattānaṃyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace pana dhenubhayena vā sunakhabhayena vā muhuttaṃ ṭhatvā ‘‘gamissāmā’’ti ṭhatvā vā nisīditvā vā gacchanti, antarā aruṇe uggate cīvarāni ca nissaggiyāni honti, nissayo ca paṭippassambhati.
ஸசே ‘‘அந்தோஅருணேயேவ ஆக³மிஸ்ஸாமா’’தி அந்தோஸீமாயங் கா³மங் பவிட்டா²னங் அந்தரா அருணோ உக்³க³ச்ச²தி, நேவ சீவரானி நிஸ்ஸக்³கி³யானி ஹொந்தி, ந நிஸ்ஸயோ படிப்பஸ்ஸம்ப⁴தி. ஸசே பன ‘‘விபா⁴யது தாவா’’தி நிஸீத³ந்தி, அருணே உக்³க³தே ந சீவரானி நிஸ்ஸக்³கி³யானி ஹொந்தி, நிஸ்ஸயோ பன படிப்பஸ்ஸம்ப⁴தி. ஸசே யேபி ‘‘அந்தோஅருணேயேவ ஆக³மிஸ்ஸாமா’’தி ஸாமந்தவிஹாரங் த⁴ம்மஸ்ஸவனத்தா²ய ஸஉஸ்ஸாஹா க³ச்ச²ந்தி, அந்தராமக்³கே³யேவ ச நேஸங் அருணோ உக்³க³ச்ச²தி, சீவரானி நிஸ்ஸக்³கி³யானி ஹொந்தி, நிஸ்ஸயோ பன ந படிப்பஸ்ஸம்ப⁴தி. ஸசே த⁴ம்மகா³ரவேன ‘‘யாவபரியோஸானங் ஸுத்வாவ க³மிஸ்ஸாமா’’தி நிஸீத³ந்தி, ஸஹ அருணஸ்ஸ உக்³க³மனா சீவரானிபி நிஸ்ஸக்³கி³யானி ஹொந்தி, நிஸ்ஸயோ ச படிப்பஸ்ஸம்ப⁴தி. தே²ரேன த³ஹரங் சீவரதோ⁴வனத்தா²ய கா³மகங் பேஸெந்தேன அத்தனோ சீவரங் பச்சுத்³த⁴ரித்வாவ தா³தப்³ப³ங், த³ஹரஸ்ஸபி சீவரங் பச்சுத்³த⁴ராபெத்வாவ ட²பேதப்³ப³ங். ஸசே அஸதியா க³ச்ச²தி, அத்தனோ சீவரங் பச்சுத்³த⁴ரித்வா த³ஹரஸ்ஸ சீவரங் விஸ்ஸாஸேன க³ஹெத்வா ட²பேதப்³ப³ங். ஸசே தே²ரோ ந ஸரதி, த³ஹரோவ ஸரதி, த³ஹரேன அத்தனோ சீவரங் பச்சுத்³த⁴ரித்வா தே²ரஸ்ஸ சீவரங் விஸ்ஸாஸேன க³ஹெத்வா க³ந்த்வா வத்தப்³ப³ங் ‘‘ப⁴ந்தே, தும்ஹாகங் சீவரங் அதி⁴ட்ட²ஹித்வா பரிபு⁴ஞ்ஜதா²’’தி. அத்தனோபி சீவரங் அதி⁴ட்டா²தப்³ப³ங். ஏவங் ஏகஸ்ஸ ஸதியாபி ஆபத்திமொக்கோ² ஹோதி.
Sace ‘‘antoaruṇeyeva āgamissāmā’’ti antosīmāyaṃ gāmaṃ paviṭṭhānaṃ antarā aruṇo uggacchati, neva cīvarāni nissaggiyāni honti, na nissayo paṭippassambhati. Sace pana ‘‘vibhāyatu tāvā’’ti nisīdanti, aruṇe uggate na cīvarāni nissaggiyāni honti, nissayo pana paṭippassambhati. Sace yepi ‘‘antoaruṇeyeva āgamissāmā’’ti sāmantavihāraṃ dhammassavanatthāya saussāhā gacchanti, antarāmaggeyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace dhammagāravena ‘‘yāvapariyosānaṃ sutvāva gamissāmā’’ti nisīdanti, saha aruṇassa uggamanā cīvarānipi nissaggiyāni honti, nissayo ca paṭippassambhati. Therena daharaṃ cīvaradhovanatthāya gāmakaṃ pesentena attano cīvaraṃ paccuddharitvāva dātabbaṃ, daharassapi cīvaraṃ paccuddharāpetvāva ṭhapetabbaṃ. Sace asatiyā gacchati, attano cīvaraṃ paccuddharitvā daharassa cīvaraṃ vissāsena gahetvā ṭhapetabbaṃ. Sace thero na sarati, daharova sarati, daharena attano cīvaraṃ paccuddharitvā therassa cīvaraṃ vissāsena gahetvā gantvā vattabbaṃ ‘‘bhante, tumhākaṃ cīvaraṃ adhiṭṭhahitvā paribhuñjathā’’ti. Attanopi cīvaraṃ adhiṭṭhātabbaṃ. Evaṃ ekassa satiyāpi āpattimokkho hoti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
சீவரவிப்பவாஸவினிச்ச²யகதா² ஸமத்தா.
Cīvaravippavāsavinicchayakathā samattā.
