| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
9. жийваравиббаваасавинижчаяагат̇аа
9. Cīvaravippavāsavinicchayakathā
51. жийварзнавинааваасод̇и д̇ижийвараад̇хидтаанзна ад̇хидтид̇аанам̣ д̇ин̣н̣ам̣ жийвараанам̣ ан̃н̃ад̇арзна виббаваасо. звам̣ ад̇хидтид̇зсу хи д̇ийсу жийварзсу згзнаби винаа васид̇ум̣ на ваддад̇и, васанд̇асса саха арун̣уг̇г̇аманаа жийварам̣ ниссаг̇г̇ияам̣ ход̇и, д̇асмаа арун̣уг̇г̇аманасамаяз жийварам̣ ад̣дхад̇зяяарад̇анаббамаан̣з хад̇т̇абаасз гад̇ваа васид̇аб̣б̣ам̣. г̇ааманивзсанауд̣̇осид̇аад̣д̣амаал̣абаасаад̣̇ахаммияанааваасад̇т̇акзд̇д̇ад̇хан̃н̃агаран̣ааараамавихаараругкамуулааж̇жхогаасзсу бана аяам̣ висзсо (баараа. адта. 2.477-8) – сажз згасса ран̃н̃о г̇аамабхож̇агасса ваа санд̇аго г̇аамо ход̇и, язна гзнажи баагаарзна ваа вад̇ияаа ваа барикааяа ваа баригкид̇д̇о жа, зваруубз г̇аамз жийварам̣ нигкибид̇ваа г̇аамаб̣бханд̇арз яад̇т̇а гад̇т̇ажи яат̇ааружид̇адтаанз арун̣ам̣ удтаабзд̇ум̣ ваддад̇и. сажз бана абаригкид̇д̇о ход̇и, зваруубз г̇аамз яасмим̣ гхарз жийварам̣ нигкид̇д̇ам̣, д̇асмим̣ вад̇т̇аб̣б̣ам̣, д̇асса ваа гхарасса хад̇т̇абаасз саманд̇аа ад̣дхад̇зяяарад̇анаб̣бханд̇арз васид̇аб̣б̣ам̣. д̇ам̣ бамаан̣ам̣ ад̇иггамид̇ваа сажзби ид̣̇д̇химаа бхигку аагаасз арун̣ам̣ удтаабзд̇и, жийварам̣ ниссаг̇г̇ияамзва ход̇и.
51.Cīvarenavināvāsoti ticīvarādhiṭṭhānena adhiṭṭhitānaṃ tiṇṇaṃ cīvarānaṃ aññatarena vippavāso. Evaṃ adhiṭṭhitesu hi tīsu cīvaresu ekenapi vinā vasituṃ na vaṭṭati, vasantassa saha aruṇuggamanā cīvaraṃ nissaggiyaṃ hoti, tasmā aruṇuggamanasamaye cīvaraṃ aḍḍhateyyaratanappamāṇe hatthapāse katvā vasitabbaṃ. Gāmanivesanaudositaaḍḍamāḷapāsādahammiyanāvāsatthakhettadhaññakaraṇaārāmavihārarukkhamūlaajjhokāsesu pana ayaṃ viseso (pārā. aṭṭha. 2.477-8) – sace ekassa rañño gāmabhojakassa vā santako gāmo hoti, yena kenaci pākārena vā vatiyā vā parikhāya vā parikkhitto ca, evarūpe gāme cīvaraṃ nikkhipitvā gāmabbhantare yattha katthaci yathārucitaṭṭhāne aruṇaṃ uṭṭhāpetuṃ vaṭṭati. Sace pana aparikkhitto hoti, evarūpe gāme yasmiṃ ghare cīvaraṃ nikkhittaṃ, tasmiṃ vatthabbaṃ, tassa vā gharassa hatthapāse samantā aḍḍhateyyaratanabbhantare vasitabbaṃ. Taṃ pamāṇaṃ atikkamitvā sacepi iddhimā bhikkhu ākāse aruṇaṃ uṭṭhāpeti, cīvaraṃ nissaggiyameva hoti.
сажз наанаарааж̇уунам̣ ваа бхож̇агаанам̣ ваа г̇аамо ход̇и взсаалийгусинаараад̣̇исад̣̇исо баригкид̇д̇о жа, зваруубз г̇аамз яасмим̣ гхарз жийварам̣ нигкид̇д̇ам̣, д̇ад̇т̇а ваа вад̇т̇аб̣б̣ам̣, д̇ад̇т̇а сад̣̇д̣̇асан̇гхадданзна ваа ж̇анасамб̣аад̇хзна ваа васид̇ум̣ асаггонд̇зна сабхааяз ваа вад̇т̇аб̣б̣ам̣ наг̇арад̣̇ваарамуулз ваа. д̇ад̇рааби васид̇ум̣ асаггонд̇зна яад̇т̇а гад̇т̇ажи паасугадтаанз васид̇ваа анд̇оарун̣з ааг̇амма д̇зсам̣язва сабхааяанаг̇арад̣̇ваарамуулаанам̣ хад̇т̇абаасз васид̇аб̣б̣ам̣. гхарасса бана жийварасса ваа хад̇т̇абаасз вад̇д̇аб̣б̣амзва над̇т̇и.
Sace nānārājūnaṃ vā bhojakānaṃ vā gāmo hoti vesālīkusinārādisadiso parikkhitto ca, evarūpe gāme yasmiṃ ghare cīvaraṃ nikkhittaṃ, tattha vā vatthabbaṃ, tattha saddasaṅghaṭṭanena vā janasambādhena vā vasituṃ asakkontena sabhāye vā vatthabbaṃ nagaradvāramūle vā. Tatrāpi vasituṃ asakkontena yattha katthaci phāsukaṭṭhāne vasitvā antoaruṇe āgamma tesaṃyeva sabhāyanagaradvāramūlānaṃ hatthapāse vasitabbaṃ. Gharassa pana cīvarassa vā hatthapāse vattabbameva natthi.
сажз гхарз адтабзд̇ваа ‘‘сабхааяз табзссаамий’’д̇и сабхааяам̣ г̇ажчанд̇о хад̇т̇ам̣ басаарзд̇ваа ‘‘ханд̣̇имам̣ жийварам̣ табзхий’’д̇и звам̣ нигкзбасукз хад̇т̇абаасаг̇ад̇з гисмин̃жи аабан̣з жийварам̣ нигкибад̇и, д̇зна буриманаязнзва сабхааяз ваа вад̇т̇аб̣б̣ам̣, д̣̇ваарамуулз ваа д̇зсам̣ хад̇т̇абаасз ваа васид̇аб̣б̣ам̣.
Sace ghare aṭṭhapetvā ‘‘sabhāye ṭhapessāmī’’ti sabhāyaṃ gacchanto hatthaṃ pasāretvā ‘‘handimaṃ cīvaraṃ ṭhapehī’’ti evaṃ nikkhepasukhe hatthapāsagate kismiñci āpaṇe cīvaraṃ nikkhipati, tena purimanayeneva sabhāye vā vatthabbaṃ, dvāramūle vā tesaṃ hatthapāse vā vasitabbaṃ.
сажз наг̇арасса б̣ахууниби д̣̇ваараани хонд̇и б̣ахууни жа сабхааяаани, саб̣б̣ад̇т̇а васид̇ум̣ на ваддад̇и. яассаа бана вийт̇ияаа жийварам̣ табид̇ам̣, яам̣ д̇ассаа саммукадтаанз сабхааяан̃жа д̣̇вааран̃жа, д̇асса сабхааяасса жа д̣̇ваарасса жа хад̇т̇абаасз васид̇аб̣б̣ам̣. зван̃хи сад̇и саггаа жийварасса бавад̇д̇им̣ ж̇аанид̇ум̣ . сабхааяам̣ бана г̇ажчанд̇зна яасса аабан̣игасса хад̇т̇з нигкид̇д̇ам̣, сажз со д̇ам̣ жийварам̣ ад̇ихарид̇ваа гхарз нигкибад̇и, вийт̇ихад̇т̇абаасо на рагкад̇и, гхарасса хад̇т̇абаасз вад̇т̇аб̣б̣ам̣. сажз маханд̇ам̣ гхарам̣ ход̇и д̣̇вз вийт̇ияо парид̇ваа тид̇ам̣, бурад̇о ваа бажчад̇о ваа хад̇т̇абаасзязва арун̣ам̣ удтаабзд̇аб̣б̣ам̣. сабхааяз нигкибид̇ваа бана сабхааяз ваа д̇асса саммукз наг̇арад̣̇ваарамуулз ваа д̇зсам̣язва хад̇т̇абаасз ваа арун̣ам̣ удтаабзд̇аб̣б̣ам̣. сажз бана г̇аамо абаригкид̇д̇о ход̇и, яасмим̣ гхарз жийварам̣ нигкид̇д̇ам̣, д̇асмим̣ гхарз д̇асса гхарасса ваа хад̇т̇абаасз вад̇т̇аб̣б̣ам̣.
Sace nagarassa bahūnipi dvārāni honti bahūni ca sabhāyāni, sabbattha vasituṃ na vaṭṭati. Yassā pana vīthiyā cīvaraṃ ṭhapitaṃ, yaṃ tassā sammukhaṭṭhāne sabhāyañca dvārañca, tassa sabhāyassa ca dvārassa ca hatthapāse vasitabbaṃ. Evañhi sati sakkā cīvarassa pavattiṃ jānituṃ . Sabhāyaṃ pana gacchantena yassa āpaṇikassa hatthe nikkhittaṃ, sace so taṃ cīvaraṃ atiharitvā ghare nikkhipati, vīthihatthapāso na rakkhati, gharassa hatthapāse vatthabbaṃ. Sace mahantaṃ gharaṃ hoti dve vīthiyo pharitvā ṭhitaṃ, purato vā pacchato vā hatthapāseyeva aruṇaṃ uṭṭhāpetabbaṃ. Sabhāye nikkhipitvā pana sabhāye vā tassa sammukhe nagaradvāramūle vā tesaṃyeva hatthapāse vā aruṇaṃ uṭṭhāpetabbaṃ. Sace pana gāmo aparikkhitto hoti, yasmiṃ ghare cīvaraṃ nikkhittaṃ, tasmiṃ ghare tassa gharassa vā hatthapāse vatthabbaṃ.
сажз (баараа. 480) згагуласса санд̇агам̣ нивзсанам̣ ход̇и баригкид̇д̇ан̃жа наанааг̇аб̣бхам̣ наанааоварагам̣, анд̇онивзсанз жийварам̣ нигкибид̇ваа анд̇онивзсанз вад̇т̇аб̣б̣ам̣. сажз абаригкид̇д̇ам̣, яасмим̣ г̇аб̣бхз жийварам̣ нигкид̇д̇ам̣ ход̇и, д̇асмим̣ г̇аб̣бхз вад̇т̇аб̣б̣ам̣ г̇аб̣бхасса хад̇т̇абаасз ваа. сажз наанаагуласса нивзсанам̣ ход̇и баригкид̇д̇ан̃жа наанааг̇аб̣бхам̣ наанааоварагам̣, яасмим̣ г̇аб̣бхз жийварам̣ нигкид̇д̇ам̣ ход̇и, д̇асмим̣ г̇аб̣бхз вад̇т̇аб̣б̣ам̣, саб̣б̣зсам̣ саад̇хааран̣з гхарад̣̇ваарамуулз ваа г̇аб̣бхасса ваа гхарад̣̇ваарамууласса ваа хад̇т̇абаасз. сажз абаригкид̇д̇ам̣ ход̇и, яасмим̣ г̇аб̣бхз жийварам̣ нигкид̇д̇ам̣, д̇асмим̣ г̇аб̣бхз вад̇т̇аб̣б̣ам̣ г̇аб̣бхасса ваа хад̇т̇абаасз. уд̣̇осид̇аад̣д̣амаал̣абаасаад̣̇ахаммиязсуби нивзсанз вуд̇д̇анаязнзва винижчаяо взд̣̇ид̇аб̣б̣о.
Sace (pārā. 480) ekakulassa santakaṃ nivesanaṃ hoti parikkhittañca nānāgabbhaṃ nānāovarakaṃ, antonivesane cīvaraṃ nikkhipitvā antonivesane vatthabbaṃ. Sace aparikkhittaṃ, yasmiṃ gabbhe cīvaraṃ nikkhittaṃ hoti, tasmiṃ gabbhe vatthabbaṃ gabbhassa hatthapāse vā. Sace nānākulassa nivesanaṃ hoti parikkhittañca nānāgabbhaṃ nānāovarakaṃ, yasmiṃ gabbhe cīvaraṃ nikkhittaṃ hoti, tasmiṃ gabbhe vatthabbaṃ, sabbesaṃ sādhāraṇe gharadvāramūle vā gabbhassa vā gharadvāramūlassa vā hatthapāse. Sace aparikkhittaṃ hoti, yasmiṃ gabbhe cīvaraṃ nikkhittaṃ, tasmiṃ gabbhe vatthabbaṃ gabbhassa vā hatthapāse. Udositaaḍḍamāḷapāsādahammiyesupi nivesane vuttanayeneva vinicchayo veditabbo.
сажз згагуласса нааваа ход̇и, анд̇онаавааяам̣ жийварам̣ нигкибид̇ваа анд̇онаавааяам̣ вад̇т̇аб̣б̣ам̣. сажз наанаагуласса нааваа ход̇и наанааг̇аб̣бхаа наанааоварагаа, яасмим̣ оварагз жийварам̣ нигкид̇д̇ам̣ ход̇и, д̇асмим̣ оварагз вад̇т̇аб̣б̣ам̣ оварагасса хад̇т̇абаасз ваа.
Sace ekakulassa nāvā hoti, antonāvāyaṃ cīvaraṃ nikkhipitvā antonāvāyaṃ vatthabbaṃ. Sace nānākulassa nāvā hoti nānāgabbhā nānāovarakā, yasmiṃ ovarake cīvaraṃ nikkhittaṃ hoti, tasmiṃ ovarake vatthabbaṃ ovarakassa hatthapāse vā.
сажз згагуласса сад̇т̇о ход̇и, д̇асмим̣ сад̇т̇з жийварам̣ нигкибид̇ваа бурад̇о ваа бажчад̇о ваа сад̇д̇аб̣бханд̇араа на виж̇ахид̇аб̣б̣аа, бассад̇о аб̣бханд̇арам̣ на виж̇ахид̇аб̣б̣ам̣. згам̣ аб̣бханд̇арам̣ адтавийсад̇ихад̇т̇ам̣ ход̇и. сажз наанаагуласса сад̇т̇о ход̇и, сад̇т̇з жийварам̣ нигкибид̇ваа жийварасса хад̇т̇абаасз васид̇аб̣б̣ам̣. сажз сад̇т̇о г̇ажчанд̇о г̇аамам̣ ваа над̣̇им̣ ваа барияаад̣̇ияид̇ваа д̇идтад̇и, анд̇обавидтзна сад̣̇д̇хим̣ згааб̣ад̣̇д̇хо худ̇ваа оран̃жа бааран̃жа парид̇ваа тид̇о ход̇и, сад̇т̇абарихааро лаб̣бхад̇и. ат̇а г̇аамз ваа над̣̇ияаа ваа барияаабанно ход̇и, г̇аамабарихааро жзва над̣̇ийбарихааро жа лаб̣бхад̇и. сажз вихаарасиймам̣ ад̇иггамид̇ваа д̇идтад̇и, анд̇осиймааяа жа жийварам̣ ход̇и, вихаарам̣ г̇анд̇ваа васид̇аб̣б̣ам̣. сажз б̣ахисиймааяа жийварам̣ ход̇и, сад̇т̇асамийбзязва васид̇аб̣б̣ам̣. сажз г̇ажчанд̇о сад̇т̇о сагадз ваа бхаг̇г̇з г̇он̣з ваа надтз анд̇араа чиж̇ж̇ад̇и, яасмим̣ годтаасз жийварам̣ нигкид̇д̇ам̣, д̇ад̇т̇а васид̇аб̣б̣ам̣.
Sace ekakulassa sattho hoti, tasmiṃ satthe cīvaraṃ nikkhipitvā purato vā pacchato vā sattabbhantarā na vijahitabbā, passato abbhantaraṃ na vijahitabbaṃ. Ekaṃ abbhantaraṃ aṭṭhavīsatihatthaṃ hoti. Sace nānākulassa sattho hoti, satthe cīvaraṃ nikkhipitvā cīvarassa hatthapāse vasitabbaṃ. Sace sattho gacchanto gāmaṃ vā nadiṃ vā pariyādiyitvā tiṭṭhati, antopaviṭṭhena saddhiṃ ekābaddho hutvā orañca pārañca pharitvā ṭhito hoti, satthaparihāro labbhati. Atha gāme vā nadiyā vā pariyāpanno hoti, gāmaparihāro ceva nadīparihāro ca labbhati. Sace vihārasīmaṃ atikkamitvā tiṭṭhati, antosīmāya ca cīvaraṃ hoti, vihāraṃ gantvā vasitabbaṃ. Sace bahisīmāya cīvaraṃ hoti, satthasamīpeyeva vasitabbaṃ. Sace gacchanto sattho sakaṭe vā bhagge goṇe vā naṭṭhe antarā chijjati, yasmiṃ koṭṭhāse cīvaraṃ nikkhittaṃ, tattha vasitabbaṃ.
сажз згагуласса кзд̇д̇ам̣ ход̇и баригкид̇д̇ан̃жа, анд̇окзд̇д̇з жийварам̣ нигкибид̇ваа анд̇окзд̇д̇з вад̇т̇аб̣б̣ам̣. сажз абаригкид̇д̇ам̣ ход̇и, жийварасса хад̇т̇абаасз васид̇аб̣б̣ам̣. сажз наанаагуласса кзд̇д̇ам̣ ход̇и баригкид̇д̇ан̃жа, анд̇окзд̇д̇з жийварам̣ нигкибид̇ваа д̣̇ваарамуулз вад̇т̇аб̣б̣ам̣ д̣̇ваарамууласса хад̇т̇абаасз ваа. сажз абаригкид̇д̇ам̣ ход̇и, жийварасса хад̇т̇абаасз васид̇аб̣б̣ам̣.
Sace ekakulassa khettaṃ hoti parikkhittañca, antokhette cīvaraṃ nikkhipitvā antokhette vatthabbaṃ. Sace aparikkhittaṃ hoti, cīvarassa hatthapāse vasitabbaṃ. Sace nānākulassa khettaṃ hoti parikkhittañca, antokhette cīvaraṃ nikkhipitvā dvāramūle vatthabbaṃ dvāramūlassa hatthapāse vā. Sace aparikkhittaṃ hoti, cīvarassa hatthapāse vasitabbaṃ.
сажз згагуласса д̇хан̃н̃агаран̣ам̣ ход̇и баригкид̇д̇ан̃жа, анд̇од̇хан̃н̃агаран̣з жийварам̣ нигкибид̇ваа анд̇од̇хан̃н̃агаран̣з вад̇т̇аб̣б̣ам̣. сажз абаригкид̇д̇ам̣ ход̇и, жийварасса хад̇т̇абаасз васид̇аб̣б̣ам̣. сажз наанаагуласса д̇хан̃н̃агаран̣ам̣ ход̇и баригкид̇д̇ан̃жа, анд̇од̇хан̃н̃агаран̣з жийварам̣ нигкибид̇ваа д̣̇ваарамуулз ваа вад̇т̇аб̣б̣ам̣ д̣̇ваарамууласса ваа хад̇т̇абаасз. сажз абаригкид̇д̇ам̣ ход̇и, жийварасса хад̇т̇абаасз васид̇аб̣б̣ам̣. бубпаараамапалаараамзсуби кзд̇д̇з вуд̇д̇анаязнзва винижчаяо взд̣̇ид̇аб̣б̣о.
Sace ekakulassa dhaññakaraṇaṃ hoti parikkhittañca, antodhaññakaraṇe cīvaraṃ nikkhipitvā antodhaññakaraṇe vatthabbaṃ. Sace aparikkhittaṃ hoti, cīvarassa hatthapāse vasitabbaṃ. Sace nānākulassa dhaññakaraṇaṃ hoti parikkhittañca, antodhaññakaraṇe cīvaraṃ nikkhipitvā dvāramūle vā vatthabbaṃ dvāramūlassa vā hatthapāse. Sace aparikkhittaṃ hoti, cīvarassa hatthapāse vasitabbaṃ. Pupphārāmaphalārāmesupi khette vuttanayeneva vinicchayo veditabbo.
сажз згагуласса вихааро ход̇и баригкид̇д̇о жа, анд̇овихаарз жийварам̣ нигкибид̇ваа анд̇овихаарз вад̇т̇аб̣б̣ам̣. сажз абаригкид̇д̇о ход̇и, яасмим̣ вихаарз жийварам̣ нигкид̇д̇ам̣, д̇асмим̣ вад̇т̇аб̣б̣ам̣ д̇асса вихаарасса ваа хад̇т̇абаасз.
Sace ekakulassa vihāro hoti parikkhitto ca, antovihāre cīvaraṃ nikkhipitvā antovihāre vatthabbaṃ. Sace aparikkhitto hoti, yasmiṃ vihāre cīvaraṃ nikkhittaṃ, tasmiṃ vatthabbaṃ tassa vihārassa vā hatthapāse.
сажз згагуласса ругкамуулам̣ ход̇и, яам̣ маж̇жханхигз гаалз саманд̇аа чааяаа парад̇и, анд̇очааяааяа жийварам̣ нигкибид̇ваа анд̇очааяааяа вад̇т̇аб̣б̣ам̣. вирал̣асаакасса бана ругкасса аад̇абзна пудтогаасз табид̇ам̣ ниссаг̇г̇ияамзва ход̇и, д̇асмаа д̇аад̣̇исасса ругкасса саакажчааяааяа ваа канд̇хажчааяааяа ваа табзд̇аб̣б̣ам̣. сажз саакааяа ваа видабз ваа табзд̇и, убари ан̃н̃асаакажчааяааяа пудтогаасзязва табзд̇аб̣б̣ам̣. куж̇ж̇аругкасса чааяаа д̣̇уурам̣ г̇ажчад̇и, чааяааяа г̇ад̇адтаанз табзд̇ум̣ ваддад̇иязва. сажз наанаагуласса ругкамуулам̣ ход̇и, жийварасса хад̇т̇абаасз васид̇аб̣б̣ам̣.
Sace ekakulassa rukkhamūlaṃ hoti, yaṃ majjhanhike kāle samantā chāyā pharati, antochāyāya cīvaraṃ nikkhipitvā antochāyāya vatthabbaṃ. Viraḷasākhassa pana rukkhassa ātapena phuṭṭhokāse ṭhapitaṃ nissaggiyameva hoti, tasmā tādisassa rukkhassa sākhacchāyāya vā khandhacchāyāya vā ṭhapetabbaṃ. Sace sākhāya vā viṭape vā ṭhapeti, upari aññasākhacchāyāya phuṭṭhokāseyeva ṭhapetabbaṃ. Khujjarukkhassa chāyā dūraṃ gacchati, chāyāya gataṭṭhāne ṭhapetuṃ vaṭṭatiyeva. Sace nānākulassa rukkhamūlaṃ hoti, cīvarassa hatthapāse vasitabbaṃ.
аж̇жхогаасз бана аг̇аамагз аран̃н̃з жийварам̣ табзд̇ваа д̇асса саманд̇аа сад̇д̇аб̣бханд̇арз васид̇аб̣б̣ам̣. аг̇аамагам̣ наама аран̃н̃ам̣ вин̃жхаадавийаад̣̇ийсу ваа самуд̣̇д̣̇амаж̇жхз ваа мажчаб̣анд̇хаанам̣ аг̇аманабат̇з д̣̇ийбагзсу лаб̣бхад̇и. д̇аад̣̇исз аран̃н̃з маж̇жхз тид̇асса саманд̇аа сад̇д̇аб̣бханд̇арабарижчзд̣̇о, виниб̣б̣зд̇хзна жуд̣̇д̣̇аса хонд̇и. маж̇жхз нисинно бурад̇т̇имааяа ваа бажчимааяа ваа д̣̇исааяа барияанд̇з табид̇ажийварам̣ рагкад̇и. сажз бана арун̣уг̇г̇аманасамаяз гзсаг̇г̇амад̇д̇амби бурад̇т̇имам̣ д̣̇исам̣ г̇ажчад̇и, бажчимааяа д̣̇исааяа жийварам̣ ниссаг̇г̇ияам̣ ход̇и. зса наяо ид̇арасмим̣. ниссаг̇г̇ияам̣ бана жийварам̣ аниссаж̇ж̇ид̇ваа барибхун̃ж̇анд̇о д̣̇уггадам̣ аабаж̇ж̇ад̇и.
Ajjhokāse pana agāmake araññe cīvaraṃ ṭhapetvā tassa samantā sattabbhantare vasitabbaṃ. Agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Tādise araññe majjhe ṭhitassa samantā sattabbhantaraparicchedo, vinibbedhena cuddasa honti. Majjhe nisinno puratthimāya vā pacchimāya vā disāya pariyante ṭhapitacīvaraṃ rakkhati. Sace pana aruṇuggamanasamaye kesaggamattampi puratthimaṃ disaṃ gacchati, pacchimāya disāya cīvaraṃ nissaggiyaṃ hoti. Esa nayo itarasmiṃ. Nissaggiyaṃ pana cīvaraṃ anissajjitvā paribhuñjanto dukkaṭaṃ āpajjati.
52. сажз бад̇хааниго бхигку саб̣б̣арад̇д̇им̣ бад̇хаанамануяун̃ж̇ид̇ваа бажжуусасамаяз ‘‘нахааяиссаамий’’д̇и д̇ийн̣и жийвараани д̇ийрз табзд̇ваа над̣̇им̣ од̇арад̇и, нахааяанд̇ассзва жасса арун̣ам̣ удтахад̇и, гим̣ гаад̇аб̣б̣ам̣? со хи яад̣̇и уд̇д̇арид̇ваа жийварам̣ ниваасзд̇и, ниссаг̇г̇ияам̣ жийварам̣, аниссаж̇ж̇ид̇ваа барибхун̃ж̇анабажжаяаа д̣̇уггадам̣ аабаж̇ж̇ад̇и. ат̇а наг̇г̇о г̇ажчад̇и, звамби д̣̇уггадам̣ аабаж̇ж̇ад̇ийд̇и? наабаж̇ж̇ад̇и. со хи яаава ан̃н̃ам̣ бхигкум̣ д̣̇исваа винаяагаммам̣ на гарод̇и, д̇аава д̇зсам̣ жийвараанам̣ абарибхог̇аарахад̇д̇аа надтажийварадтаанз тид̇о ход̇и, надтажийварасса жа агаббияам̣ наама над̇т̇и, д̇асмаа згам̣ ниваасзд̇ваа д̣̇вз хад̇т̇зна г̇ахзд̇ваа вихаарам̣ г̇анд̇ваа винаяагаммам̣ гаад̇аб̣б̣ам̣. сажз д̣̇уурз вихааро ход̇и, анд̇араамаг̇г̇з мануссаа сан̃жаранд̇и, згам̣ ниваасзд̇ваа згам̣ баарубид̇ваа згам̣ ам̣сагуудз табзд̇ваа г̇анд̇аб̣б̣ам̣. сажз вихаарз сабхааг̇ам̣ бхигкум̣ на бассад̇и, бхигкаажаарам̣ г̇ад̇аа хонд̇и, сан̇гхаадим̣ б̣ахиг̇аамз табзд̇ваа санд̇аруд̇д̇арзна аасанасаалам̣ г̇анд̇ваа винаяагаммам̣ гаад̇аб̣б̣ам̣. сажз б̣ахиг̇аамз жорабхаяам̣ ход̇и, баарубид̇ваа г̇анд̇аб̣б̣ам̣. сажз аасанасаалаа самб̣аад̇хаа ход̇и, ж̇анаагин̣н̣аа на саггаа згаманд̇з жийварам̣ абанзд̇ваа винаяагаммам̣ гаад̇ум̣, згам̣ бхигкум̣ аад̣̇ааяа б̣ахиг̇аамам̣ г̇анд̇ваа винаяагаммам̣ гад̇ваа жийвараани барибхун̃ж̇ид̇аб̣б̣аани.
52. Sace padhāniko bhikkhu sabbarattiṃ padhānamanuyuñjitvā paccūsasamaye ‘‘nahāyissāmī’’ti tīṇi cīvarāni tīre ṭhapetvā nadiṃ otarati, nahāyantasseva cassa aruṇaṃ uṭṭhahati, kiṃ kātabbaṃ? So hi yadi uttaritvā cīvaraṃ nivāseti, nissaggiyaṃ cīvaraṃ, anissajjitvā paribhuñjanapaccayā dukkaṭaṃ āpajjati. Atha naggo gacchati, evampi dukkaṭaṃ āpajjatīti? Nāpajjati. So hi yāva aññaṃ bhikkhuṃ disvā vinayakammaṃ na karoti, tāva tesaṃ cīvarānaṃ aparibhogārahattā naṭṭhacīvaraṭṭhāne ṭhito hoti, naṭṭhacīvarassa ca akappiyaṃ nāma natthi, tasmā ekaṃ nivāsetvā dve hatthena gahetvā vihāraṃ gantvā vinayakammaṃ kātabbaṃ. Sace dūre vihāro hoti, antarāmagge manussā sañcaranti, ekaṃ nivāsetvā ekaṃ pārupitvā ekaṃ aṃsakūṭe ṭhapetvā gantabbaṃ. Sace vihāre sabhāgaṃ bhikkhuṃ na passati, bhikkhācāraṃ gatā honti, saṅghāṭiṃ bahigāme ṭhapetvā santaruttarena āsanasālaṃ gantvā vinayakammaṃ kātabbaṃ. Sace bahigāme corabhayaṃ hoti, pārupitvā gantabbaṃ. Sace āsanasālā sambādhā hoti, janākiṇṇā na sakkā ekamante cīvaraṃ apanetvā vinayakammaṃ kātuṃ, ekaṃ bhikkhuṃ ādāya bahigāmaṃ gantvā vinayakammaṃ katvā cīvarāni paribhuñjitabbāni.
сажз т̇зраа бхигкуу д̣̇ахараанам̣ хад̇т̇з бад̇д̇ажийварам̣ д̣̇ад̇ваа маг̇г̇ам̣ г̇ажчанд̇аа бажчимаяаамз саяид̇угаамаа хонд̇и, ад̇д̇ано ад̇д̇ано жийварам̣ хад̇т̇абаасз гад̇ваава саяид̇аб̣б̣ам̣. сажз г̇ажчанд̇аанам̣язва асамбад̇д̇зсу д̣̇ахарзсу арун̣ам̣ уг̇г̇ажчад̇и, жийварам̣ ниссаг̇г̇ияам̣ ход̇и, ниссаяо бана на бадиббассамбхад̇и. д̣̇ахараанамби бурад̇о г̇ажчанд̇аанам̣ т̇зрзсу асамбад̇д̇зсу зсзва наяо. маг̇г̇ам̣ вираж̇жхид̇ваа аран̃н̃з ан̃н̃аман̃н̃ам̣ абассанд̇зсуби зсзва наяо. сажз бана д̣̇ахараа ‘‘маяам̣, бханд̇з, мухуд̇д̇ам̣ саяид̇ваа асугасмим̣ наама огаасз д̇умхз самбаабун̣иссаамаа’’д̇и вад̇ваа яаава арун̣уг̇г̇аманаа саяанд̇и, жийваран̃жа ниссаг̇г̇ияам̣ ход̇и, ниссаяо жа бадиббассамбхад̇и. д̣̇ахарз уяяож̇зд̇ваа т̇зрзсу саяанд̇зсуби зсзва наяо. д̣̇взд̇хаабат̇ам̣ д̣̇исваа т̇зраа ‘‘аяам̣ маг̇г̇о’’ , д̣̇ахараа ‘‘аяам̣ маг̇г̇о’’д̇и вад̇ваа ан̃н̃аман̃н̃асса важанам̣ аг̇г̇ахзд̇ваа г̇ад̇аа, саха арун̣асса уг̇г̇аманаа жийвараани жа ниссаг̇г̇ияаани хонд̇и, ниссаяо жа бадиббассамбхад̇и. сажз д̣̇ахараа маг̇г̇ад̇о оггамма ‘‘анд̇оарун̣зязва нивад̇д̇иссаамаа’’д̇и бхзсаж̇ж̇ад̇т̇ааяа г̇аамам̣ бависид̇ваа ааг̇ажчанд̇и, асамбад̇д̇аанам̣язва жа нзсам̣ арун̣о уг̇г̇ажчад̇и, жийвараани ниссаг̇г̇ияаани хонд̇и, ниссаяо бана на бадиббассамбхад̇и. сажз бана д̇хзнубхаязна ваа сунакабхаязна ваа мухуд̇д̇ам̣ тад̇ваа ‘‘г̇амиссаамаа’’д̇и тад̇ваа ваа нисийд̣̇ид̇ваа ваа г̇ажчанд̇и, анд̇араа арун̣з уг̇г̇ад̇з жийвараани жа ниссаг̇г̇ияаани хонд̇и, ниссаяо жа бадиббассамбхад̇и.
Sace therā bhikkhū daharānaṃ hatthe pattacīvaraṃ datvā maggaṃ gacchantā pacchimayāme sayitukāmā honti, attano attano cīvaraṃ hatthapāse katvāva sayitabbaṃ. Sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhati. Daharānampi purato gacchantānaṃ theresu asampattesu eseva nayo. Maggaṃ virajjhitvā araññe aññamaññaṃ apassantesupi eseva nayo. Sace pana daharā ‘‘mayaṃ, bhante, muhuttaṃ sayitvā asukasmiṃ nāma okāse tumhe sampāpuṇissāmā’’ti vatvā yāva aruṇuggamanā sayanti, cīvarañca nissaggiyaṃ hoti, nissayo ca paṭippassambhati. Dahare uyyojetvā theresu sayantesupi eseva nayo. Dvedhāpathaṃ disvā therā ‘‘ayaṃ maggo’’ , daharā ‘‘ayaṃ maggo’’ti vatvā aññamaññassa vacanaṃ aggahetvā gatā, saha aruṇassa uggamanā cīvarāni ca nissaggiyāni honti, nissayo ca paṭippassambhati. Sace daharā maggato okkamma ‘‘antoaruṇeyeva nivattissāmā’’ti bhesajjatthāya gāmaṃ pavisitvā āgacchanti, asampattānaṃyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace pana dhenubhayena vā sunakhabhayena vā muhuttaṃ ṭhatvā ‘‘gamissāmā’’ti ṭhatvā vā nisīditvā vā gacchanti, antarā aruṇe uggate cīvarāni ca nissaggiyāni honti, nissayo ca paṭippassambhati.
сажз ‘‘анд̇оарун̣зязва ааг̇амиссаамаа’’д̇и анд̇осиймааяам̣ г̇аамам̣ бавидтаанам̣ анд̇араа арун̣о уг̇г̇ажчад̇и, нзва жийвараани ниссаг̇г̇ияаани хонд̇и, на ниссаяо бадиббассамбхад̇и. сажз бана ‘‘вибхааяад̇у д̇ааваа’’д̇и нисийд̣̇анд̇и, арун̣з уг̇г̇ад̇з на жийвараани ниссаг̇г̇ияаани хонд̇и, ниссаяо бана бадиббассамбхад̇и. сажз язби ‘‘анд̇оарун̣зязва ааг̇амиссаамаа’’д̇и сааманд̇авихаарам̣ д̇хаммассаванад̇т̇ааяа сауссаахаа г̇ажчанд̇и, анд̇араамаг̇г̇зязва жа нзсам̣ арун̣о уг̇г̇ажчад̇и, жийвараани ниссаг̇г̇ияаани хонд̇и, ниссаяо бана на бадиббассамбхад̇и. сажз д̇хаммаг̇ааравзна ‘‘яаавабарияосаанам̣ суд̇ваава г̇амиссаамаа’’д̇и нисийд̣̇анд̇и, саха арун̣асса уг̇г̇аманаа жийварааниби ниссаг̇г̇ияаани хонд̇и, ниссаяо жа бадиббассамбхад̇и. т̇зрзна д̣̇ахарам̣ жийварад̇хованад̇т̇ааяа г̇аамагам̣ бзсзнд̇зна ад̇д̇ано жийварам̣ бажжуд̣̇д̇харид̇ваава д̣̇аад̇аб̣б̣ам̣, д̣̇ахарассаби жийварам̣ бажжуд̣̇д̇хараабзд̇ваава табзд̇аб̣б̣ам̣. сажз асад̇ияаа г̇ажчад̇и, ад̇д̇ано жийварам̣ бажжуд̣̇д̇харид̇ваа д̣̇ахарасса жийварам̣ виссаасзна г̇ахзд̇ваа табзд̇аб̣б̣ам̣. сажз т̇зро на сарад̇и, д̣̇ахарова сарад̇и, д̣̇ахарзна ад̇д̇ано жийварам̣ бажжуд̣̇д̇харид̇ваа т̇зрасса жийварам̣ виссаасзна г̇ахзд̇ваа г̇анд̇ваа вад̇д̇аб̣б̣ам̣ ‘‘бханд̇з, д̇умхаагам̣ жийварам̣ ад̇хидтахид̇ваа барибхун̃ж̇ат̇аа’’д̇и. ад̇д̇аноби жийварам̣ ад̇хидтаад̇аб̣б̣ам̣. звам̣ згасса сад̇ияааби аабад̇д̇имогко ход̇и.
Sace ‘‘antoaruṇeyeva āgamissāmā’’ti antosīmāyaṃ gāmaṃ paviṭṭhānaṃ antarā aruṇo uggacchati, neva cīvarāni nissaggiyāni honti, na nissayo paṭippassambhati. Sace pana ‘‘vibhāyatu tāvā’’ti nisīdanti, aruṇe uggate na cīvarāni nissaggiyāni honti, nissayo pana paṭippassambhati. Sace yepi ‘‘antoaruṇeyeva āgamissāmā’’ti sāmantavihāraṃ dhammassavanatthāya saussāhā gacchanti, antarāmaggeyeva ca nesaṃ aruṇo uggacchati, cīvarāni nissaggiyāni honti, nissayo pana na paṭippassambhati. Sace dhammagāravena ‘‘yāvapariyosānaṃ sutvāva gamissāmā’’ti nisīdanti, saha aruṇassa uggamanā cīvarānipi nissaggiyāni honti, nissayo ca paṭippassambhati. Therena daharaṃ cīvaradhovanatthāya gāmakaṃ pesentena attano cīvaraṃ paccuddharitvāva dātabbaṃ, daharassapi cīvaraṃ paccuddharāpetvāva ṭhapetabbaṃ. Sace asatiyā gacchati, attano cīvaraṃ paccuddharitvā daharassa cīvaraṃ vissāsena gahetvā ṭhapetabbaṃ. Sace thero na sarati, daharova sarati, daharena attano cīvaraṃ paccuddharitvā therassa cīvaraṃ vissāsena gahetvā gantvā vattabbaṃ ‘‘bhante, tumhākaṃ cīvaraṃ adhiṭṭhahitvā paribhuñjathā’’ti. Attanopi cīvaraṃ adhiṭṭhātabbaṃ. Evaṃ ekassa satiyāpi āpattimokkho hoti.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
жийваравиббаваасавинижчаяагат̇аа самад̇д̇аа.
Cīvaravippavāsavinicchayakathā samattā.
