| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১০. চোদকচুদিতকপটিসংযুত্তকথা
10. Codakacuditakapaṭisaṃyuttakathā
৪০১. অজ্ঝত্তন্তি এত্থ অত্তসদ্দস্স চিত্তৰাচকভাৰঞ্চ সত্তমীৰিভত্তিযাপি অমাদেসভাৰঞ্চ দস্সেন্তো আহ ‘‘অত্তনো চিত্তে’’তি। উপ্পাদেত্ৰাতি ইমিনা ‘‘মনসিকরিত্ৰা’’তি পদস্স অধিপ্পাযত্থং দস্সেতি। কারুঞ্ঞতাতি এত্থ দ্ৰীসু ণ্যপচ্চযতাপচ্চযেসু একস্সেৰ ভাৰৰাচকত্তা একো স্ৰত্থোতি দস্সেন্তো আহ ‘‘করুণভাৰো’’তি। তত্থ করুণস্স পুগ্গলস্স ভাৰো কারুঞ্ঞং, তদেৰ কারুঞ্ঞতা। অথ ৰা করুণো এৰ পুগ্গলো কারুঞ্ঞং, তস্স ভাৰো কারুঞ্ঞতাতি ৰচনত্থো কাতব্বো। ইমিনাতি ‘‘কারুঞ্ঞতা’’তি পদেন। করুণঞ্চাতি অপ্পনাপত্তং করুণঞ্চ। করুণাপুব্বভাগঞ্চাতি অপ্পনাপত্তায করুণায পুব্বভাগে পরিকম্মূপচারৰসেন পৰত্তং কামাৰচরকরুণঞ্চ। দ্ৰীহিপীতি ‘‘হিতেসিতা, অনুকম্পিতা’’তি দ্ৰীহিপি পদেহি। মেত্তঞ্চাতি অপ্পনাপত্তমেত্তঞ্চ। মেত্তাপুব্বভাগঞ্চাতি অপ্পনাপত্তায মেত্তায পুব্বভাগে পরিকম্মূপচারৰসেন পৰত্তং কামাৰচরমেত্তঞ্চ। সুদ্ধন্তেতি সুদ্ধে কোট্ঠাসে। পটিঞ্ঞং আরোপেত্ৰাতি চুদিতকং পটিঞ্ঞং আরোপেত্ৰা। যে এতেতি ‘‘কারুঞ্ঞতা’’তিআদিনা নযেন যে এতে পঞ্চ ধম্মা ৰুত্তাতি যোজনা। ইমিনা ইমে পঞ্চ ধম্মেতি এত্থ ইমসদ্দস্স অনিযমনিদ্দেসভাৰং দস্সেতি।
401.Ajjhattanti ettha attasaddassa cittavācakabhāvañca sattamīvibhattiyāpi amādesabhāvañca dassento āha ‘‘attano citte’’ti. Uppādetvāti iminā ‘‘manasikaritvā’’ti padassa adhippāyatthaṃ dasseti. Kāruññatāti ettha dvīsu ṇyapaccayatāpaccayesu ekasseva bhāvavācakattā eko svatthoti dassento āha ‘‘karuṇabhāvo’’ti. Tattha karuṇassa puggalassa bhāvo kāruññaṃ, tadeva kāruññatā. Atha vā karuṇo eva puggalo kāruññaṃ, tassa bhāvo kāruññatāti vacanattho kātabbo. Imināti ‘‘kāruññatā’’ti padena. Karuṇañcāti appanāpattaṃ karuṇañca. Karuṇāpubbabhāgañcāti appanāpattāya karuṇāya pubbabhāge parikammūpacāravasena pavattaṃ kāmāvacarakaruṇañca. Dvīhipīti ‘‘hitesitā, anukampitā’’ti dvīhipi padehi. Mettañcāti appanāpattamettañca. Mettāpubbabhāgañcāti appanāpattāya mettāya pubbabhāge parikammūpacāravasena pavattaṃ kāmāvacaramettañca. Suddhanteti suddhe koṭṭhāse. Paṭiññaṃ āropetvāti cuditakaṃ paṭiññaṃ āropetvā. Ye eteti ‘‘kāruññatā’’tiādinā nayena ye ete pañca dhammā vuttāti yojanā. Iminā ime pañca dhammeti ettha imasaddassa aniyamaniddesabhāvaṃ dasseti.
সচ্চে চ অকুপ্পে চাতি এত্থ সচ্চসদ্দস্স ৰিরতিসচ্চপরমত্থসচ্চানি পটিক্খিপন্তো আহ ‘‘ৰচীসচ্চে চা’’তি। ‘‘অকুপ্পনতাযা’’তি ইমিনা নকুপস্স ভাৰো অকুপ্পন্তি কত্ৰা ণ্যপচ্চযস্স ভাৰত্থং দস্সেতি। হীতি সচ্চং, ৰিত্থারো ৰা। ন পরো ঘট্টেতব্বোতি ন পরো কুজ্ঝাপেতব্বো। সব্বত্থাতি সব্বস্মিং পাতিমোক্খট্ঠপনক্খন্ধকে।
Sacceca akuppe cāti ettha saccasaddassa viratisaccaparamatthasaccāni paṭikkhipanto āha ‘‘vacīsacce cā’’ti. ‘‘Akuppanatāyā’’ti iminā nakupassa bhāvo akuppanti katvā ṇyapaccayassa bhāvatthaṃ dasseti. Hīti saccaṃ, vitthāro vā. Na paro ghaṭṭetabboti na paro kujjhāpetabbo. Sabbatthāti sabbasmiṃ pātimokkhaṭṭhapanakkhandhake.
ইতি পাতিমোক্খট্ঠপনক্খন্ধকৰণ্ণনায যোজনা সমত্তা।
Iti pātimokkhaṭṭhapanakkhandhakavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১০. চোদকচুদিতকপটিসংযুত্তকথা • 10. Codakacuditakapaṭisaṃyuttakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / চোদকচুদিতকপটিসংযুত্তকথা • Codakacuditakapaṭisaṃyuttakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / চোদকচুদিতকপটিসংযুত্তকথাৰণ্ণনা • Codakacuditakapaṭisaṃyuttakathāvaṇṇanā
