| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
១០. ចោទកចុទិតកបដិសំយុត្តកថា
10. Codakacuditakapaṭisaṃyuttakathā
៤០១. អជ្ឈត្តន្តិ ឯត្ថ អត្តសទ្ទស្ស ចិត្តវាចកភាវញ្ច សត្តមីវិភត្តិយាបិ អមាទេសភាវញ្ច ទស្សេន្តោ អាហ ‘‘អត្តនោ ចិត្តេ’’តិ។ ឧប្បាទេត្វាតិ ឥមិនា ‘‘មនសិករិត្វា’’តិ បទស្ស អធិប្បាយត្ថំ ទស្សេតិ។ ការុញ្ញតាតិ ឯត្ថ ទ្វីសុ ណ្យបច្ចយតាបច្ចយេសុ ឯកស្សេវ ភាវវាចកត្តា ឯកោ ស្វត្ថោតិ ទស្សេន្តោ អាហ ‘‘ករុណភាវោ’’តិ។ តត្ថ ករុណស្ស បុគ្គលស្ស ភាវោ ការុញ្ញំ, តទេវ ការុញ្ញតា។ អថ វា ករុណោ ឯវ បុគ្គលោ ការុញ្ញំ, តស្ស ភាវោ ការុញ្ញតាតិ វចនត្ថោ កាតព្ពោ។ ឥមិនាតិ ‘‘ការុញ្ញតា’’តិ បទេន។ ករុណញ្ចាតិ អប្បនាបត្តំ ករុណញ្ច។ ករុណាបុព្ពភាគញ្ចាតិ អប្បនាបត្តាយ ករុណាយ បុព្ពភាគេ បរិកម្មូបចារវសេន បវត្តំ កាមាវចរករុណញ្ច។ ទ្វីហិបីតិ ‘‘ហិតេសិតា, អនុកម្បិតា’’តិ ទ្វីហិបិ បទេហិ។ មេត្តញ្ចាតិ អប្បនាបត្តមេត្តញ្ច។ មេត្តាបុព្ពភាគញ្ចាតិ អប្បនាបត្តាយ មេត្តាយ បុព្ពភាគេ បរិកម្មូបចារវសេន បវត្តំ កាមាវចរមេត្តញ្ច។ សុទ្ធន្តេតិ សុទ្ធេ កោដ្ឋាសេ។ បដិញ្ញំ អារោបេត្វាតិ ចុទិតកំ បដិញ្ញំ អារោបេត្វា។ យេ ឯតេតិ ‘‘ការុញ្ញតា’’តិអាទិនា នយេន យេ ឯតេ បញ្ច ធម្មា វុត្តាតិ យោជនា។ ឥមិនា ឥមេ បញ្ច ធម្មេតិ ឯត្ថ ឥមសទ្ទស្ស អនិយមនិទ្ទេសភាវំ ទស្សេតិ។
401.Ajjhattanti ettha attasaddassa cittavācakabhāvañca sattamīvibhattiyāpi amādesabhāvañca dassento āha ‘‘attano citte’’ti. Uppādetvāti iminā ‘‘manasikaritvā’’ti padassa adhippāyatthaṃ dasseti. Kāruññatāti ettha dvīsu ṇyapaccayatāpaccayesu ekasseva bhāvavācakattā eko svatthoti dassento āha ‘‘karuṇabhāvo’’ti. Tattha karuṇassa puggalassa bhāvo kāruññaṃ, tadeva kāruññatā. Atha vā karuṇo eva puggalo kāruññaṃ, tassa bhāvo kāruññatāti vacanattho kātabbo. Imināti ‘‘kāruññatā’’ti padena. Karuṇañcāti appanāpattaṃ karuṇañca. Karuṇāpubbabhāgañcāti appanāpattāya karuṇāya pubbabhāge parikammūpacāravasena pavattaṃ kāmāvacarakaruṇañca. Dvīhipīti ‘‘hitesitā, anukampitā’’ti dvīhipi padehi. Mettañcāti appanāpattamettañca. Mettāpubbabhāgañcāti appanāpattāya mettāya pubbabhāge parikammūpacāravasena pavattaṃ kāmāvacaramettañca. Suddhanteti suddhe koṭṭhāse. Paṭiññaṃ āropetvāti cuditakaṃ paṭiññaṃ āropetvā. Ye eteti ‘‘kāruññatā’’tiādinā nayena ye ete pañca dhammā vuttāti yojanā. Iminā ime pañca dhammeti ettha imasaddassa aniyamaniddesabhāvaṃ dasseti.
សច្ចេ ច អកុប្បេ ចាតិ ឯត្ថ សច្ចសទ្ទស្ស វិរតិសច្ចបរមត្ថសច្ចានិ បដិក្ខិបន្តោ អាហ ‘‘វចីសច្ចេ ចា’’តិ។ ‘‘អកុប្បនតាយា’’តិ ឥមិនា នកុបស្ស ភាវោ អកុប្បន្តិ កត្វា ណ្យបច្ចយស្ស ភាវត្ថំ ទស្សេតិ។ ហីតិ សច្ចំ, វិត្ថារោ វា។ ន បរោ ឃដ្ដេតព្ពោតិ ន បរោ កុជ្ឈាបេតព្ពោ។ សព្ពត្ថាតិ សព្ពស្មិំ បាតិមោក្ខដ្ឋបនក្ខន្ធកេ។
Sacceca akuppe cāti ettha saccasaddassa viratisaccaparamatthasaccāni paṭikkhipanto āha ‘‘vacīsacce cā’’ti. ‘‘Akuppanatāyā’’ti iminā nakupassa bhāvo akuppanti katvā ṇyapaccayassa bhāvatthaṃ dasseti. Hīti saccaṃ, vitthāro vā. Na paro ghaṭṭetabboti na paro kujjhāpetabbo. Sabbatthāti sabbasmiṃ pātimokkhaṭṭhapanakkhandhake.
ឥតិ បាតិមោក្ខដ្ឋបនក្ខន្ធកវណ្ណនាយ យោជនា សមត្តា។
Iti pātimokkhaṭṭhapanakkhandhakavaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / ១០. ចោទកចុទិតកបដិសំយុត្តកថា • 10. Codakacuditakapaṭisaṃyuttakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ចោទកចុទិតកបដិសំយុត្តកថា • Codakacuditakapaṭisaṃyuttakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចោទកចុទិតកបដិសំយុត្តកថាវណ្ណនា • Codakacuditakapaṭisaṃyuttakathāvaṇṇanā
